Mataio

TE MAU PǏPǏ I TE HUHUTIRAA I TE SITONA I TE SABATI.

12 I reira to Iesu haereraa na roto i te mau aua sitona i te sabati; e poia ihora ta ˈna mau pǐpǐ, ua huhuti ihora i te sitona ua amu ihora. 2 Te hiˈo maira te mau Pharisea, e ua na ô maira ia ˈna, Inaha! te rave nei ta oe mau pǐpǐ i te mea au ore i te ture ia rave i te sabati. 3 Ua parau atura oia ia ratou, Aitâ outou i taio i ta Davida i rave e tana mau taata atoa a poia ˈi ratou ra; 4 e i tomo oia i roto i te fare o te Atua, e ua amu i te mau pane o te aro ra, o te ore e au i te ture ia amu oia e tana mau taata atoa, maori râ o te feia tahuˈa anaˈe ra? 5 E aitâ outou i ite i roto i te ture e te faahapa nei te feia tahuˈa i te sabati i roto i te hiero, e aore i hara? 6 E faaite papu atu râ vau ia outou, Tei ǒ nei te hoê, e rahi ïa oia i te hiero. 7 Ahiri outou i ite na i te auraa i teie nei maa parau, O te aroha ta ˈu i hinaaro eiaha te tusia, e ore ïa outou e faahapa mai i te feia hara ore. 8 O te Tamaiti a te taata nei hoi te Fatu o te sabati.

9 Faarue maira oia i taua vaehaa ra, haere atura i roto i to ratou sunago. 10 E inaha, tei reira te hoê taata ua mǎrô te rima. Ua ui maira ratou ia ˈna, na ô maira, E au anei i te ture ia faaora i te sabati? ei pariraa mai na ratou ia ˈna. 11 Ua parau atura oia ia ratou, O vai ïa taata i roto ia outou na, hoê a ˈna mamoe e ia mairi i roto i te apoo i te sabati, e ore e rave atu, e ume mai i nia? 12 E ere anei e maitai rahi to te taata i to te mamoe? E au maori i te ture ia hamani maitai i te sabati. 13 Ua parau atura oia i taua taata ra, A titoo mai na i to rima. Ua titoo maira oia i tana rima, ora roa aˈera mai te tahi atoa ra.

14 Haere atura râ te mau Pharisea i rapae au, tahuˈa ihora i ta ratou parau e taparahi ia ˈna. 15 Ite aˈera râ Iesu, haere ê atura, e te taata e rave rahi i te peeraa ia ˈna, faaora ˈtura oia ia ratou atoa ra. 16 Ua aˈo papu atura oia ia ratou e eiaha ratou e faˈi ia ˈna. 17 Tia mau atura te parau a te peropheta ra a Isaia, i te na ôraa mai e, 18 Inaha tau tavini, tei haapaohia e au ra; tau here e au maite ai tau aau: e tuu roa ˈtu vau i tau Varua i nia iho ia ˈna, e na ˈna e tuu atu i te ture i te mau Etene. 19 E ore oia e mârô, e ore hoi e pii, e e ore hoi to ˈna reo e itea i te mau aroâ. 20 Te aeho paruparu ra e ore oia e ofati; e te mori ama mohimohi ra e ore oia e tinai, e ia faatupu roa oia i ta ˈna ra mau ture. 21 E e tiaturi atoa te mau Etene i to ˈna ra iˈoa.

22 Afaihia maira ia ˈna ra te hoê taata demoni, e matapo e te vava; faaora ˈtura oia ia ˈna, ite atura e ua parau ihora taua matapo e te vava ra. 23 Ua parau anaˈe ihora te taata atoa ma te maere, O te Tamaiti teie a Davida? 24 Faaroo aˈera râ te mau Pharisea, ua na ô aˈera ratou, Aita teie nei taata i tiavaru i te demoni i rapae, maori râ i te mana o te demoni rahi ra o Belezebuba. 25 Ua ite râ Iesu i to ratou manaˈo, e ua parau atura ia ratou, Te basileia i amaha e rave ia ˈna ihora, e pau ïa; e te oire e te fetii i amaha e rave ia ˈna ihora, eita ïa e mau. 26 E ia tiavaru Satani ia Satani i rapae, ua amaha oia e rave ia ˈna iho; eaha ihora to ˈna basileia e mau ai? 27 E te tiavaru nei au i te demoni i rapae au i te mana o Belezebuba, i te mana o vai râ ta ta outou tamarii e tiavaru i rapae na? e teie nei, ei ia ratou te parau ia outou. 28 Te tiavaru nei râ vau i te demoni i rapae i te Varua o te Atua, ua roohia iho nei outou e te hau o te Atua. 29 Eaha hoi e tia ˈi ia tomo i te fare o te taata etaeta ra a haru ai i ta ˈna taoˈa, ia ore ia mata i te tapea i taua taata etaeta ra? ia na reira râ e tia ˈi ïa ia ˈna ia haru i to ˈna fare. 30 E ere oia i to ǒ nei ia ˈu nei, no ǒ mai ïa: e o tei ore i haaputu atoa mai, ua haaapurara ïa.

31 E teie nei, e parau atu vau ia outou, E tia te mau hara atoa e te faaino a te taata nei ia faaore, eita râ te faaino i te Varua e faaorehia. 32 E o te parau ino i te Tamaiti a te taata nei, e tia ïa ia faaore i ta ˈna hara; area te parau ino i te Varua Maitai ra; e ore ta ˈna e faaorehia, i teie nei ao, e e ore hoi i te ao a muri atu. 33 A haamaitai na i te raau, e e haamaitai atoa i te huero; e aore ra, a faaino i te raau, e e faaino atoa i te huero: te itea nei hoi te raau i te huero. 34 E te mau fanauˈa ehidena e, eaha outou te feia iino na e tia ˈi ia parau i te parau maitai? no te î o te aau hoi i parau ai te vaha. 35 E tuu mai te taata maitai i te mea maitai no roto i te pueraa maitai o te aau; e tuu mai hoi te taata ino i te mea ino, no roto i tana pueraa ino. 36 Ia ite râ outou, E e haavahia te taata i te mau parau faufaa ore atoa ta ratou e parau ra ia tae i te mahana haavaraa. 37 E tiahia hoi oe i ta oe parau, e e faahapahia oe i ta oe parau.

38 Ua parau maira te tahi pae o te mau papai parau e te mau Pharisea ia ˈna, na ô maira, E Rabi, te hinaaro nei matou ia ite matou i te tahi semeio ia oe. 39 Ua parau atura râ oia ia ratou, na ô atura, E titau â te ui taata ino e te faaturi i te semeio; aita râ e semeio e horoahia ˈtu, maori râ te semeio i te peropheta ra ia Iona. 40 Mai ia Iona hoi e toru o ˈna rui e toru hoi ao i roto i te opu o te iˈa rahi ra, e riro atoa i te toru to te Tamaiti a te taata nei rui e e toru hoi ao i raro i te repo. 41 Na to Nineve i te tia-atoa-raa i te haavaraa ra, e faahapa i teie nei ui; i te mea ua tatarahapa ratou i te aˈoraahia e Iona ra; e inaha, e rahi teie ia Iona. 42 Na te arii vahine o apatoa i te tia-atoa-raa i te haavaraa ra, e faahapa i teie nei ui; i te mea i haere mai oia mai te hopea mai o te fenua e faaroo i te parau paari a Solomona; e inaha, e rahi teie ia Solomona.

43 Ia reva te varua faufau i roto i te taata ra i rapae au, ua na te mau vahi pâpâmǎrô i te haere i te imiraa i te faaearaa. 44 E aore roa i itea, ua na ô aˈera, E hoˈi au i tau fare mai reira mai au nei; e te roohiaraa maira ite ihora, aita o roto, ua purumuhia, e ua atuatu. 45 Ua tii atura oia, amui atoa maira i e toohitu pue varua e ino rahi roa to ratou i to ˈna iho; e ô anaˈe atura ratou i roto, parahi atura i reira; ino rahi atura te hopea o taua taata ra, i tei mutaa iho: oia atoa teie nei ui taata iino.

46 E te parau atura oia i te mau taata ra, inaha, te tia noa maira tana metua vahine i rapae au, e tana mau taeae, i hinaaro i te parau mai ia ˈna. 47 Ua parau atura te hoê ia ˈna, inaha, Te tia noa aˈera to metua vahine e to mau taeae i rapae au, te hinaaro ra i te parau mai ia oe. 48 Ua parau maira râ oia i tei parau atu ia ˈna ra, na ô maira, O vai to ˈu metua vahine, e o vai hoi to ˈu mau taeae? 49 Ua tohu atura oia i tana rima i te mau pǐpǐ na ˈna ra, ua na ô maira, A hiˈo na i to ˈu metua vahine e i to ˈu mau taeae. 50 O tei haapao i te hinaaro o tau Metua i te ao ra, o to ˈu ïa taeae, o to ˈu ïa tuahine, e o to ˈu ïa metua vahine.