1 Јәһја

4 Әзизләрим, ешитдијиниз һәр вәһјә* инанмајын.+ Вәһјләрин Аллаһдан олуб-олмадығыны јохлајын,+ чүнки дүнјада чохлу јаланчы пејғәмбәр пејда олуб.+

2 Аллаһдан ҝәлән вәһји белә танымаг олар: Иса Мәсиһин инсан ҹисминдә ҝәлдијини тәсдиг едән вәһј Аллаһдандыр.+ 3 Исаны гәбул етмәјән вәһј исә Аллаһдан дејил.+ Бу, Мәсиһ әлејһдарынын илһамландырдығы вәһјдир. Сиз бу вәһјин дүнјаја ҝәләҹәјини ешитмисиниз+ вә о, артыг дүнјададыр.+

4 Әзиз балалар, сиз Аллаһдансыныз вә белә адамлара галиб ҝәлмисиниз,+ чүнки сизинлә вәһдәтдә Олан+ бу дүнја илә вәһдәтдә оландан бөјүкдүр.+ 5 Онлар дүнјадандырлар;+ буна ҝөрә дә дүнјанын дилиндә данышырлар вә дүнја онлара гулаг асыр.+ 6 Биз исә Аллаһданыг. Аллаһы танымыш инсан бизә гулаг асыр,+ Аллаһдан олмајан исә бизә гулаг асмыр.+ Һәгигәтдән доған вәһјләри вә јаландан доған вәһјләри беләҹә ајырд едирик.+

7 Әзизләрим, ҝәлин бир-биримизи севәк,+ чүнки мәһәббәт Аллаһдандыр, севән инсан Аллаһын өвладыдыр вә Аллаһы таныјыр.+ 8 Севмәјән инсан Аллаһы танымамышдыр, чүнки Аллаһ мәһәббәтдир.+ 9 Аллаһ мәһәббәти бизә бу ҹүр изһар олду: Аллаһ илкин Оғлуну+ дүнјаја ҝөндәрди ки, онун васитәсилә һәјата говушаг.+ 10 Мәһәббәт ондадыр ки, биз Аллаһы јох, О, бизи севди вә Оғлуну ҝүнаһларымызы өртән кәффарә гурбаны кими дүнјаја ҝөндәрди.+

11 Әзизләрим, Аллаһ бизи белә севдисә, биз дә бир-биримизи севмәјә борҹлујуг.+ 12 Аллаһы һеч ким һеч вахт ҝөрмәјиб;+ әҝәр бир-биримизи севириксә, Аллаһ биздә јашајыр вә Онун мәһәббәти биздә камиллијә јетишир.+ 13 Бизим Онунла вә Онун бизимлә вәһдәтдә олдуғуну бизә Өз руһуну вердијиндән билирик. 14 Биз буну шәхсән ҝөрмүшүк вә шәһадәт едирик ки, Ата Оғлуну дүнјанын Хиласкары кими ҝөндәриб.+ 15 Ким Иса Мәсиһи Аллаһын Оғлу кими гәбул едирсә,+ Аллаһ онунла вәһдәтдәдир, о да Аллаһла вәһдәтдәдир.+ 16 Биз дә Аллаһ севҝисини танымышыг вә бу мәһәббәтә инанмышыг.+

Аллаһ мәһәббәтдир+ вә мәһәббәтлә јашајан Аллаһла вәһдәтдәдир, Аллаһ да онунла вәһдәтдәдир.+ 17 Беләҹә, мәһәббәт үрәјимиздә камиллијә јетишир ки, һөкм ҝүнүндә алныачыг+ олаг, чүнки Мәсиһ неҹәдирсә, биз дә бу дүнјада еләјик. 18 Мәһәббәтдә горху јохдур.+ Камил мәһәббәт горхуну говур. Горху инсаны буховлајыр, буна ҝөрә дә горхан адамын мәһәббәти камиллијә чатмамышдыр.+ 19 Бизә ҝәлинҹә, биз севирик, чүнки әввәлҹә Аллаһ бизи севди.+

20 Ким дилдә «Аллаһы севирәм» дејиб, гардашына нифрәт едирсә, о, јаланчыдыр,+ чүнки ҝөрдүјү гардашыны севмәјән+ адам ҝөрмәдији Аллаһы севә билмәз.+ 21 Ондан алдығымыз әмр будур: Аллаһы севән гардашыны да севмәлидир.+