ဖိလိပ္ပိ

၄ ထို့ကြောင့် ငါချစ်မြတ်နိုးပြီး တမ်းတသတိရသည့်၊ ငါ၏ရွှင်လန်းမှုနှင့် သရဖူဖြစ်သည့် ငါချစ်ရသောညီအစ်ကိုတို့၊ သခင်၏နောက်တော်လိုက်အဖြစ် ထိုနည်းအတိုင်း ခိုင်ခံ့မြဲမြံခြင်းရှိကြလော့။

၂ ဧဝေါဒိနှင့် သုန္တုတ်တို့သည် သခင်၌ တစ်စိတ်တစ်သဘောတည်းဖြစ်ကြရန် ငါတိုက်တွန်းပါ၏။ ၃ ငါ၏စစ်မှန်သော လုပ်ဖော်ဆောင်ဖက်၊ ထိုအမျိုးသမီးတို့ကို ကူညီထောက်မနေရန် သင့်ကိုလည်း ငါတောင်းပန်၏။ အကြောင်းမူကား သူတို့သည် ငါနှင့် ကလေမင်မှစ၍ အသက်စာစောင်တွင် အမည်စာရင်းဝင်သည့် အခြားသော ငါ၏လုပ်ဖော်ဆောင်ဖက်တို့နှင့်အတူ သတင်းကောင်းဟောပြောရာတွင် ငါနှင့်လက်တွဲလျက် ကြိုးစား ပါဝင်သူများ ဖြစ်ကြ၏။

၄ သခင်၌ အမြဲဝမ်းမြောက်ကြလော့။ တစ်ဖန် ငါဆိုသည်ကား ဝမ်းမြောက်ကြလော့။ ၅ သင်တို့၏ အကျိုးသင့်အကြောင်းသင့်သဘောကို လူအပေါင်းတို့ရှေ့တွင် ထင်ရှားစေကြလော့။ သခင်သည် အနီးအပါး၌ ရှိတော်မူ၏။ ၆ မည်သည့်အမှုကိုမျှ စိုးရိမ်ခြင်းမရှိဘဲ အရာရာတွင် ကျေးဇူးတော် ချီးမွမ်းခြင်းနှင့်တကွ ဆုတောင်းခြင်း၊ တိုးလျှိုးအသနားခံခြင်းအားဖြင့် သင်တို့အသနားခံလိုသောအရာများကို ဘုရားသခင်ထံ ကြားလျှောက်ကြလော့။ ၇ ထိုသို့ပြုလျှင် စဉ်းစား၍မမီနိုင်သည့် ဘုရားသခင်၏ ငြိမ်သက်ခြင်းသည် ခရစ်တော်ယေရှုအားဖြင့် သင်တို့၏စိတ်နှလုံးနှင့် ဉာဏ်တို့ကို စောင့်ရှောက်လိမ့်မည်။

၈ နောက်ဆုံး မှာကြားလိုသည်မှာ ညီအစ်ကိုတို့၊ မှန်ကန်သောအရာရှိသမျှ၊ အလေးအနက်ထားရမည့်အရာရှိသမျှ၊ ဖြောင့်မတ်သောအရာရှိသမျှ၊ စင်ကြယ်သောအရာရှိသမျှ၊ ချစ်ဖွယ်သောအရာရှိသမျှ၊ အသရေရှိသောအရာရှိသမျှ၊ မွန်မြတ်သောအရာရှိသမျှ၊ ချီးမွမ်းဖွယ်သောအရာရှိသမျှတို့ကို ဆက်၍ ဆင်ခြင်သုံးသပ်ကြလော့။ ၉ သင်တို့သည် ငါ့ထံမှ လက်ခံသင်ယူပြီး ကြားခဲ့မြင်ခဲ့ရာများကို ကျင့်သုံးကြလော့။ သို့ပြုလျှင် ငြိမ်သက်ခြင်း၏ ဘုရားသခင်သည် သင်တို့နှင့်အတူ ရှိတော်မူလိမ့်မည်။

၁၀ ယခုလည်း သင်တို့သည် ငါ့ကိုပြန်လည်သတိရကြသဖြင့် ငါသည် သခင်၌ အလွန်ဝမ်းမြောက်ပါ၏။ သင်တို့သည် ငါ့ကိုအမှန်ပင် သတိရကြသော်လည်း ထိုသို့ဖော်ပြခွင့် မရကြ။ ၁၁ ငါလိုအပ်နေသောကြောင့် ထိုသို့ဆိုခြင်းမဟုတ်။ အကြောင်းမူကား ငါသည် မည်သည့်အခြေအနေမျိုး၌မဆို ရောင့်ရဲတတ်ရန် သင်ယူခဲ့ပြီ။ ၁၂ ငါသည် နည်းပါးခြင်းနှင့်လည်းကောင်း၊ ပိုလျှံခြင်းနှင့်လည်းကောင်း နေတတ်၏။ ဝပြောခြင်းနှင့် မွတ်သိပ်ခြင်း၊ ကြွယ်ဝခြင်းနှင့် ချို့တဲ့ခြင်းတို့ကို အရာရာတိုင်းနှင့် အခြေအနေတိုင်းတွင် မည်သို့ကိုင်တွယ်ရမည်ကို ငါသင်ယူခဲ့ပြီ။ ၁၃ အကြောင်းမူကား ငါ့ကို တန်ခိုးပေးတော်မူသော ကိုယ်တော်အားဖြင့် အရာခပ်သိမ်းကို ငါတတ်စွမ်းနိုင်၏။

၁၄ သို့သော်လည်း ငါသည် ဆင်းရဲဒုက္ခကိုခံရစဉ် သင်တို့သည် ငါနှင့်အတူခံခြင်းအားဖြင့် ကောင်းမွန်စွာ ပြုကြပြီ။ ၁၅ ဖိလိပ္ပိမြို့သားတို့၊ ငါသည် သတင်းကောင်းကို စတင်ဟောပြော၍ မက်ဆီဒိုးနီးယားပြည်မှ ထွက်ခွာသောအခါ သင်တို့မှလွဲ၍ မည်သည့်အသင်းတော်မျှ ငါနှင့်အတူ အပေးအယူ မလုပ်ကြ။ ၁၆ အကြောင်းမူကား သက်သာလောနိတ်မြို့တွင် ငါရှိစဉ် ငါလိုအပ်ရာကို နှစ်ကြိမ်တိုင်အောင် သင်တို့ပို့ပေးခဲ့ကြ၏။ ၁၇ သင်တို့ထံမှ လက်ဆောင်ရလို၍ ထိုသို့ ငါဆိုနေခြင်းမဟုတ်။ သင်တို့၏အကျိုးစီးပွားကို သာ၍တိုးပွားစေလို၍ ငါဆိုနေခြင်းဖြစ်၏။ ၁၈ သို့ရာတွင် ငါ၌ အရာခပ်သိမ်းရှိ၍ ကြွယ်ဝပြည့်စုံ၏။ မွှေးကြိုင်သောရနံ့၊ ဘုရားသခင် နှစ်သက်အားရတော်မူသည့် လက်သင့်ခံနိုင်ဖွယ်ယဇ်ဖြစ်သော သင်တို့ ပေးလိုက်သည့်အရာများကို ဧပဖြောဒိတ်ထံမှ ငါလက်ခံရရှိသဖြင့် ယခုအခါ ပြည့်စုံလျက်ရှိ၏။ ၁၉ တစ်ဖန်၊ ငါ၏ဘုရားသခင်သည် ဘုန်းအသရေ ကြွယ်ဝပြည့်စုံတော်မူသည့်အတိုင်း သင်တို့၏လိုအပ်ရာ မှန်သမျှကို ခရစ်တော်ယေရှုအားဖြင့် ပြည့်စုံစေတော်မူလိမ့်မည်။ ၂၀ ငါတို့၏အဖ ဘုရားသခင်၏ ဘုန်းတော်သည် ကာလအစဉ်အဆက် ထင်ရှားပါစေ။ အာမင်။

၂၁ ခရစ်တော်ယေရှုနှင့် တစည်းတလုံးတည်းရှိသော သန့်ရှင်းသူရှိသမျှကို နှုတ်ဆက်ပေးကြလော့။ ငါနှင့်အတူရှိသော ညီအစ်ကိုတို့သည်လည်း သင်တို့ကို နှုတ်ဆက်လိုက်ပါ၏။ ၂၂ သန့်ရှင်းသူအပေါင်းတို့သည် သင်တို့ကို နှုတ်ဆက်ကြ၏။ အထူးသဖြင့် ကဲသာ*၏ နန်းတော်၌နေသော သန့်ရှင်းသူတို့သည် သင်တို့ကို နှုတ်ဆက်ကြ၏။

၂၃ ငါတို့၏သခင် ယေရှုခရစ်၏ မဟာကရုဏာသည် သင်တို့၏စိတ်နှလုံး၌ ရှိပါစေ။