उत्पत्ति
१५ त्यसपछि अब्रामले एउटा दर्शनमा* यहोवा परमेश्वरको यस्तो वचन सुने: “अब्राम, नडराऊ।+ म तिम्रो ढाल हुनेछु।+ तिमीले ठूलो इनाम पाउनेछौ।”+ २ अब्रामले सोधे: “सारा ब्रह्माण्डका मालिक यहोवा, तपाईँ मलाई के इनाम दिनुहुन्छ? किनभने म निस्सन्तान छु र मेरो सबै सम्पत्ति मेरो दासले, हो, दमिसकको एलिएजरले पाउनेछ।”+ ३ अब्रामले अझै भने: “तपाईँले मलाई सन्तान दिनुभएको छैन।+ त्यसैले मेरो घरको दास* नै अब मेरो उत्तराधिकारी हुनेछ।” ४ तब यहोवा परमेश्वरले तिनलाई यो जवाफ दिनुभयो: “त्यो मानिस तिम्रो उत्तराधिकारी हुनेछैन तर तिम्रो आफ्नै छोरा तिम्रो उत्तराधिकारी हुनेछ।”+
५ उहाँले तिनलाई बाहिर लैजानुभयो र आग्रह गर्नुभयो: “आकाशतिर हेर! अनि सक्छौ भने ताराहरू गन!” त्यसपछि उहाँले तिनलाई भन्नुभयो: “तिम्रा सन्तान पनि आकाशका ताराजत्तिकै असङ्ख्य हुनेछन्।”+ ६ अनि अब्रामले यहोवा परमेश्वरमाथि विश्वास गरे।+ त्यसैले परमेश्वरले तिनलाई आफ्नो नजरमा धर्मी* ठहराउनुभयो।+ ७ त्यसपछि परमेश्वरले भन्नुभयो: “म यहोवा हुँ; यो देश तिमीलाई दिन मैले नै तिमीलाई कल्दियालीहरूको सहर उरबाट ल्याएँ।”+ ८ अनि अब्रामले भने: “हे ब्रह्माण्डका मालिक यहोवा, यो देश मेरो हुनेछ भनेर म कसरी थाह पाउन सक्छु?” ९ परमेश्वरले तिनलाई भन्नुभयो: “गाईको तीन वर्षको एउटा कोरली,* बाख्राको तीन वर्षको एउटा पाठी, भेडाको तीन वर्षको एउटा पाठो, एक जोडी ढुकुर र परेवाको एउटा बचेरा लिएर आऊ।” १० अब्रामले ती सबै ल्याएर मारे। अनि जनावरहरूलाई दुई फ्याक पारेर तिनीहरूको एक भाग दायाँतिर र अर्को भाग बायाँतिर लहरै राखे। तिनले ढुकुर र परेवालाई चाहिँ दुई फ्याक पारेनन्। ११ अनि सिनु खाने चराहरू ती जनावरहरूको मासुमाथि झुम्मिन थाले। तर तिनले ती चराहरू धपाइरहे।
१२ घाम अस्ताउनै लाग्दा अब्राम निद्राले लट्ठ परे र भुसुक्कै निदाए। त्यसपछि तिनले भयङ्कर अन्धकार छाएको सपना देखे। १३ अनि परमेश्वरले अब्रामलाई भन्नुभयो: “यो कुरा थाह पाइराख, तिम्रा सन्तान पराई देशमा परदेशी भएर बाँच्नुपर्नेछ। तिनीहरूलाई त्यहाँका मानिसहरूले दास बनाउनेछन्। अनि तिम्रा सन्तानले ४०० वर्षसम्म अत्याचार सहनुपर्नेछ।+ १४ तर तिनीहरूलाई दास बनाउने देशलाई म दण्ड दिनेछु।+ त्यसपछि प्रशस्त धनसम्पत्ति लिएर तिनीहरू त्यहाँबाट निस्कनेछन्।+ १५ तिमीचाहिँ दीर्घायु हुनेछौ अनि चैनसित मर्नेछौ र आफ्ना पुर्खाहरूजस्तै गाडिनेछौ।+ १६ तर चौथो पुस्ताको पालामा तिनीहरू यहाँ फर्कनेछन्+ किनभने त्यतिबेला एमोरीहरूले* आफ्नो कुकर्मको सजाय पाउने समय भइसकेको हुनेछ।”+
१७ घाम अस्ताएपछि चारैतिर निस्पट्ट अन्धकार छायो। अनि धुवाँ निस्कँदै गरेको आगोको मुस्लो देखा पऱ्यो र दुई फ्याक पारेर राखिएका जनावरहरूको बीचबाट एउटा राँको छिऱ्यो। १८ त्यही दिन यहोवा परमेश्वरले अब्रामसँग एउटा करार गर्नुभयो।+ उहाँले यसो भन्नुभयो: “म यो भूमि तिम्रा सन्तानलाई दिनेछु।+ मिश्रको नदीदेखि महानदी युफ्रेटिससम्म:+ १९ केनी,+ केनाजी, कद्मोनी, २० हित्ती,+ परिज्जी,+ रेफाई,+ २१ एमोरी, कनानी, गिर्गासी र यबुसीहरूको सबै इलाका तिम्रा सन्तानका हुनेछन्।”+