Marcos
Chakra arriendaq runakunaman tinkutsiypa Jesús yachatsishqan
12 Tsaypitanami tinkutsiypa yachatsir Jesús kayno nirqan: “Juk runashi chakranman üvata plantaykatsir* intëru kuchunpa perqatsirqan. Üvata jarunanpaqshi pözuta ruratsirqan. Chakranta täpananpaqshi törritapis sharkatsirqan. Lapanta ruraykatsirnashi chakranta arriendakuykur juk lädu markapa aywakurqan.
2 “Cosëcha qalaykuptinnashi juk ashmayninta kacharqan üva chakra arrindunpita cobramunanpaq. 3 Tsay ashmay chayaykuptinshi pasaypa maqarkur jinaylata qarqurirqan. 4 Tsayshi chakrapa duëñun juk ashmayninta yapay kacharqan. Tsaytapis ashlirshi [saqmaypa] umanta rachiparkur qarqurirqan. 5 Tsaypita juk ashmayninta kachaptinpis wanutsipäkurqanshi. Tsaynölashi atskaqta kachaptinpis wakinta maqapäkurqan y wakintana wanutsipäkurqan.
6 “Ashmayninkuna manana kaptinnashi kuyay tsurintana kacharqan. Tsay tsurinta kacharshi kayno nirqan: ‘Tsurïtaqa respitapäkunqami’. 7 Tsurin aywaykaqta rikärirshi chakra arriendaqkuna wilanakur kayno nipäkurqan: ‘Taqaymi kay chakrawan quëdananpaq kaykan. Kanan wanuratsishun noqantsipaqna chakran kananpaq’. 8 Chayaykuptinnashi wilanakushqannöla wanurkatsir üva chakrapita juk läduman jitarirqan”.
9 Tsayno wilaparkurmi Jesús kayno nirqan: “Üva chakrapa duëñun ¡imataraq ruranqa tsay runakunata! ¿Manatsuraq lapanta wanutsir ushanqa? Nirkurqa chakrantapis juktanami arriendakuykunqa. 10 ¿Manaku liyipäkushqanki Tayta Diospa palabran kayno nishqanta?
“ ‘Wayi sharkatsiqkuna “kay rumiqa manami alitsu” nir jitarishqanmi wayi esquïnan cimientuchöna churaraykan.
11 Tsayno kananpaq Tayta Diosmi kamakätsishqa.
12 Jesús tsayno niptinmi tantiyapäkurqan paykunapa contran rimaykashqanta.* Tsawraqa prësu tsaritsiyta munarpis runakunata mantsakushpan mana tsaritsiylapa aywakärirqan.
Impuestuta pägananpaq tapushqan
Mateo 22.15-22; Lucas 20.20-26
13 Tsaypitanami *fariseukunata y Herodespa favornin sharkuq runakunata Jesús kaqman kachapäkurqan lutanta rimatsinanpaq. 14 Chayaykurnami kayno nipäkurqan: “*Rabí, noqakuna musyapäkümi rasun kaqlata yachatsishqaykita. Manami runakuna alabashunaykita munartsu yachatsinki, sinöqa Tayta Dios munashqannölami. Romacho mandaq *Césarpaq ¿impuestuta pägashwanku o manaku?”*
15 Lutanta parlatsinanpaq tapushqanta tantiyarmi Jesús kayno nirqan: “¿Imanirtaq lutanta parlatsimayta munapäkunki? Mä juk qellayta rikatsimay”.
16 Tsayno niptinmi qellayta aptaparqan. Tsayta rikaykurmi Jesús tapurqan kayno nir: “Kay qellaycho ¿pipa reträtuntaq kaykan? Tsaynöpis ¿pipa jutintaq qelqaraykan?”
Tsawraqa kayno nipäkurqan: “Mandaq Césarpami”.
17 Tsawraqa Jesús kayno nirqan: “Césarpa kaqtaqa Césarta qoykuy. Tayta Diospa kaqtaqa Tayta Diosta qoykuy”.*
Tsayno niptinmi tsay runakuna ima niytapis mana kamäpakurqantsu.
Kawarimuypita tapushqan
Mateo 22.23-33; Lucas 20.27-40
18 Tsaypitanami *saduceukunapis Jesústa tapuq aywapäkurqan. Paykunaqa manami criyipäkuntsu wanuqkuna kawarimunanpaq kashqanta.* Tsaymi Jesústa tapur kayno nipäkurqan: 19 “*Rabí, Moisés qelqashqancho kaynömi niykan: ‘Warmiyuq runa tsuriynaq wanuptin wawqinmi cuñädan viüdawan tanqa. Tsaynöpami wamrankuna kaptin tsay wanuq wawqinpa tsurinkunano kanqa’.* 20 Kanan nishayki. Juk kutishi qanchis wawqikuna karqan. Qechpa kaqshi warmita ashir manaraq tsurin kaptin wanukurqan. 21 Tsayshi shulka kaq wawqinna tsay viüdawan tarqan. Paypis tsurin manaraq kaptinshi wanukurqan. Tsaypita mas shulkan kaqnashi tsay viüdawan tarqan. Paypis tsurin manaraq kaptinshi wanukurqan. 22 Tsaynölashi lapan wawqinkuna tsay viüdawan tarqan. Tsurin manaraq kaptinshi lapanpis wanukurqan. Tsaypitanashi tsay viüdapis wanukurqan. 23 Wanushkuna kawarimunan junaqqa ¿mayqanpa warmintaq kanqa, qanchis wawqiwan tashqa kaykarqa?”
24 Tsayno niptinmi Jesús kayno nirqan: “Qamkunaqa lutantami yarparkaykanki. Manami Tayta Diospa palabrantapis ni Tayta Dios munayniyuq kashqantapis tantiyapäkunkitsu. 25 Kawarimurqa mananami pipis warmiyuqtsu ni runayuqtsu kanqa, sinöqa jana patsacho *angilkunanölanami kanqa. 26 Wanushkuna kawarimunanpaq kashqanta ¿manaku Moisés qelqashqanta liyipäkushqanki? Rupaykaq shirakapitami Moisésta Tayta Dios kayno nirqan: ‘Noqaqa Abrahampa, Isaacpa y Jacobpa Diosninmi kaykä’.* 27 Tayta Diosqa manami wanushkunapa Diosnintsu kaykan, sinöqa kawaykaqkunapa Diosninmi. Tsayta mana tantiyarmi qamkunaqa lutanta yarparkaykanki”.
Mas cäsukunantsipaq kaq mandamientu
Mateo 22.34-40; Lucas 10.25-28
28 Jesús ali contestashqanta mayarmi ley yachatsiq runapis tapurqan kayno nir: “¿Mayqan mandamientutataq mas cäsukushwan?”
29 Tsayno tapuptinmi Jesús kayno nirqan: “Mas cäsukunantsipaq kaq mandamientuqa kaynömi qelqaraykan: ‘Israel runakuna, shumaq wiyakäriy. Tayta Diosnintsiqa juklaylami. 30 Tayta Diosta *kuyanki lapan shonquykiwan, lapan voluntänikiwan, lapan yarpaynikiwan y lapan kalpaykiwan’. [Kayqa mas cäsukunantsipaq kaq mandamientumi kaykan.]* 31 Tsaynölami juk mandamientupis kayno niykan: ‘Kikiki kuyakushqaykino runa mayikita kuyanki’.* Tsay ishkan mandamientukunata mas cumplinantsitami Tayta Dios munan”.
32 Tsaymi ley yachatsiq runa kayno nirqan: “*Rabí, rasun kaqtami nishqanki. Rasunpapis juklaylami Tayta Diosqa. Paypita mas juk diosqa manami kantsu.* 33 Tsay ishkay mandamientukunata cumplishqantsiqa lapan sacrificiupitapis mas alimi kaykan”.*
34 Shumaq tantiyaykur niptinmi Jesús kayno nirqan: “Qamqa Tayta Dios *mandaykashqanman yaykunaykipaqnami kaykanki”.
Ali contestaptinmi pipis tapupayta almitirqannatsu.
Davidpitapis Cristo mas mandaq kashqan
Mateo 22.41-46; Lucas 20.41-44
35 Templu patiucho yachaykätsishqanchömi runakunata Jesús kayno nirqan: “¿Imanirtaq ley yachatsiqkuna nipäkun *Davidpa Tsurin Cristo kashqanta? 36 Espíritu Santu tantiyatsiptinmi kikin Davidpis kayno nirqan: ‘Mandamaqnïtami Tayta Dios kayno nirqan: Alawqa kaq nawpäman jamakamuy lapan chikishuqnikikunata munaynikiman churanäyaq’.*
37 “Tsayno niykaptinqa ¿imanöpataq Cristuqa Davidpa Tsurin kanman kikin Davidpis mandaqnin kashqanta niykaptinqa?”*
Jesús tsayno yachatsiptinmi runakuna kushikärirqan.
Ley yachatsiqkuna y fariseukuna lutan ruraq kashqanta Jesús nishqan
38 Tsaypitanami Jesús kayno nirqan: “Paqta ley yachatsiqkunano kapäkunkiman. Paykunaqa runa tukushpanmi chaki puntanyaq sotänan jatishqa puripäkun. Pläzakunachöpis runakuna winchikur ali rikanantami munapäkun. 39 *Sinagögakunachöpis nawpaqninkunamanraqmi jamakärin. Mikunanpaq qayatsiptinpis mësachöraqmi mikuyta munapäkun. 40 Viüdakunapa imaykantapis qechupäkun. Nirkurmi *santu tukärishpan may höra Tayta Diosta manakärin. Tsayno kashqanpitami Tayta Dios mana kuyapaypa mas fiyupa castiganqa”.
Waktsa viüda ofrendashqan
41 Tsaypitanami templucho ofrenda winakunan babul nawpancho Jesús jamarashpan rikapaykarqan runakuna ofrendata winapäkuqta. Tsaynöpis rikarqan rïcu runakuna tsaytsika qellayta winarkaykaqta. 42 Juk waktsa viüdapis tsayman chayaykushpanmi ishkay centävulata winarqan. 43 Tsayta rikaykurmi discïpulunkunata qayaykur Jesús kayno nirqan: “Rasunpami kayno nï: Kay waktsa viüdaqa lapan runakunapita mas atskatami winashqa. 44 Wakinkunaqa putsuq qellaynilantami winashqa. Kay viüdami itsanqa tsaylawan rantipakunanpaq kaykaptinpis lapan qellayninta winashqa”.