కీర్తనలు

37 చెడ్డవాళ్లను చూసి బాధపడకు,*

తప్పుచేసేవాళ్లను చూసి ఈర్ష్యపడకు.+

 2 వాళ్లు గడ్డిలా త్వరగా ఎండిపోతారు,+

పచ్చగడ్డిలా వాడిపోతారు.

 3 యెహోవా మీద నమ్మకముంచి మంచి చేయి;+

భూమ్మీద* నివసిస్తూ నమ్మకంగా ప్రవర్తించు.+

 4 యెహోవాను బట్టి అధికంగా సంతోషించు,

అప్పుడు ఆయన నీ హృదయ కోరికల్ని తీరుస్తాడు.

 5 నీ మార్గాన్ని యెహోవాకు అప్పగించు;+

ఆయన మీద ఆధారపడు, అప్పుడు ఆయన నీ తరఫున చర్య తీసుకుంటాడు.+

 6 ఆయన నీ నీతిని ఉదయకాల వెలుగులా,

నీ న్యాయాన్ని మిట్టమధ్యాహ్న సూర్యునిలా ప్రకాశింపజేస్తాడు.

 7 యెహోవా ఎదుట మౌనంగా ఉండి,+

ఆయన కోసం ఓపిగ్గా* ఎదురుచూడు.

తన పన్నాగాల్ని అమలు చేయడంలో

సఫలమయ్యే మనిషిని చూసి బాధపడకు.+

 8 కోపం మానుకో, ఆగ్రహం విడిచిపెట్టు;+

కోపం తెచ్చుకొని చెడు చేయాలనుకోకు.*

 9 ఎందుకంటే, చెడ్డవాళ్లు నాశనమౌతారు,+

కానీ యెహోవా కోసం కనిపెట్టుకునేవాళ్లు భూమిని స్వాధీనం చేసుకుంటారు.+

10 కొంతకాలం తర్వాత దుష్టులు ఇక ఉండరు;+

ఒకప్పుడు వాళ్లు ఉన్న స్థలాన్ని నువ్వు వెదికినా

వాళ్లు కనిపించరు.+

11 అయితే సాత్వికులు భూమిని స్వాధీనం చేసుకుంటారు,+

వాళ్లు ఎంతో శాంతిని అనుభవిస్తూ చాలా సంతోషంగా ఉంటారు.+

12 దుష్టుడు నీతిమంతుల మీద పన్నాగాలు పన్నుతాడు;+

వాళ్లను చూసి పళ్లు కొరుకుతాడు.

13 కానీ యెహోవా అతన్ని చూసి నవ్వుతాడు,

ఎందుకంటే అతను నాశనమౌతాడని ఆయనకు తెలుసు.+

14 అణచివేయబడినవాళ్లను, పేదవాళ్లను పడగొట్టడానికి,

నిజాయితీగా నడుచుకునేవాళ్లను చంపడానికి

దుష్టులు తమ కత్తులు దూస్తారు, తమ విల్లులు ఎక్కుపెడతారు.

15 కానీ వాళ్ల కత్తి వాళ్ల గుండెలోకే దూసుకెళ్తుంది;+

వాళ్ల విల్లులు విరగ్గొట్టబడతాయి.

16 చాలామంది దుష్టుల దగ్గరున్న సమృద్ధి కన్నా

నీతిమంతుల దగ్గరున్న కొంచెమే శ్రేష్ఠమైనది.+

17 ఎందుకంటే, దుష్టుల చేతులు విరగ్గొట్టబడతాయి,

అయితే నీతిమంతుల్ని యెహోవా ఆదుకుంటాడు.

18 నిర్దోషులు* ఏమేం ఎదుర్కొంటున్నారో* యెహోవాకు తెలుసు,

వాళ్ల స్వాస్థ్యం నిరంతరం ఉంటుంది.+

19 విపత్తు సమయంలో వాళ్లు అవమానించబడరు;

కరువు సమయంలో వాళ్ల దగ్గర ఆహారం సమృద్ధిగా ఉంటుంది.

20 కానీ దుష్టులు నాశనమౌతారు;+

యెహోవా శత్రువులు పచ్చికబయళ్ల సొగసులా కనుమరుగైపోతారు;

వాళ్లు పొగలా మాయమైపోతారు.

21 దుష్టుడు అప్పు తీసుకొని తిరిగి ఇవ్వడు,

కానీ నీతిమంతుడు ఉదారంగా ఇస్తాడు,* కనికరం చూపిస్తాడు.+

22 దేవుడు ఆశీర్వదించినవాళ్లు భూమిని స్వాధీనం చేసుకుంటారు,

ఆయన శపించినవాళ్లు నాశనమౌతారు.+

23 యెహోవా ఒక మనిషి మార్గాన్ని చూసి సంతోషించినప్పుడు,+

ఆయన అతని అడుగుల్ని నిర్దేశిస్తాడు.*+

24 అతను తొట్రిల్లినా కింద పడిపోడు,+

ఎందుకంటే యెహోవా తన చేతితో అతన్ని ఆదుకుంటాడు.+

25 ఒకప్పుడు నేను చిన్నవాణ్ణి, ఇప్పుడు ముసలివాణ్ణి,

అయితే ఒక్క నీతిమంతుడైనా విడిచిపెట్టబడడం+ గానీ,

అతని పిల్లలు ఆహారం కోసం భిక్షమెత్తుకోవడం గానీ నేను చూడలేదు.+

26 అతను ఎప్పుడూ ఉదారంగా అప్పు ఇస్తాడు,+

అతని పిల్లలు దీవెనలు పొందుతారు.

27 చెడు చేయడం మానేసి, మంచి చేయి,+

అప్పుడు నువ్వు భూమ్మీద శాశ్వతంగా జీవిస్తావు.

28 ఎందుకంటే, యెహోవా న్యాయాన్ని ప్రేమిస్తాడు,

ఆయన తన విశ్వసనీయుల్ని విడిచిపెట్టడు.+

వాళ్లు ఎప్పటికీ కాపాడబడతారు,+

కానీ దుష్టుల సంతానం నాశనమౌతుంది.+

29 నీతిమంతులు భూమిని స్వాధీనం చేసుకుంటారు,+

వాళ్లు దానిలో శాశ్వతంగా జీవిస్తారు.+

30 నీతిమంతుని నోరు తెలివిని బోధిస్తుంది,*

అతని నాలుక న్యాయం గురించి మాట్లాడుతుంది.+

31 అతని దేవుని ధర్మశాస్త్రం అతని హృదయంలో ఉంటుంది;+

అతని అడుగులు తడబడవు.+

32 దుష్టుడు నీతిమంతుణ్ణి చంపాలని

అతన్ని గమనిస్తూ ఉంటాడు.

33 అయితే యెహోవా అతన్ని దుష్టుని చేతికి అప్పగించడు,+

తీర్పు తీర్చేటప్పుడు అతన్ని అపరాధిగా ఎంచడు.+

34 యెహోవా కోసం కనిపెట్టుకొని ఉంటూ ఆయన మార్గాన్ని అనుసరించు,

అప్పుడు ఆయన నిన్ను ఘనపరుస్తాడు, నువ్వు భూమిని స్వాధీనం చేసుకుంటావు,

35 నేను క్రూరుడైన చెడ్డవాణ్ణి చూశాను,

తన నేలలో పెరిగే పచ్చని చెట్టులా అతను పెరుగుతాడు.+

36 కానీ అతను ఉన్నట్టుండి చనిపోయి లేకుండా పోయాడు;+

నేను అతని కోసం వెతికాను కానీ అతను కనబడలేదు.+

37 నిందలేనివాణ్ణి* గమనించు,

నిజాయితీపరుణ్ణి+ చూస్తూ ఉండు,

ఎందుకంటే, అతని భవిష్యత్తు నెమ్మదిగా ఉంటుంది.+

38 అయితే అపరాధులందరూ నాశనం చేయబడతారు;

దుష్టులకు భవిష్యత్తే ఉండదు.+

39 నీతిమంతుల రక్షణ యెహోవా నుండి వస్తుంది;+

కష్ట సమయంలో ఆయనే వాళ్ల కోట.+

40 యెహోవాయే వాళ్లకు సహాయం చేసి, వాళ్లను రక్షిస్తాడు.+

ఆయన దుష్టుల నుండి వాళ్లను రక్షించి, కాపాడతాడు.