Onde sho sukɛka lowandji laki Jehowa?

‘Nyote wedja nyate: Jehowa ndamɛ aya nkumekanga.’​—OSAMBU 96:10.

1, 2. a) Naa dikambo dia diambo efula diakasalema oya lo Ngɔndɔ ka dikumi lo 29 tena diaso nɛ? b) Dikambo sɔ diaki la kitshimudi yakɔna le Yeso?

DIKAMBO dimɔtshi dia diambo efula diaki diatasalemaka ndoko lushi la nkɛtɛ, diakasalema oya lo Ngɔndɔ ka dikumi lo 29 tena diaso nɛ. Mateo, ofundji ɔmɔtshi w’Evanjiliɔ kɔndɔlaka ate: “Lam’akabatizama Jesu, kem’edja ndi akatumbi uma l’ashi. Nyulungi, ulungu akadihwama, ku ndi [Joani obatizanyi] akenyi nyuma ka [Nzambi] ayahulo uku fudu k’inga, akayuwahema [Yeso]. Ku diui diakayi uma l’ulungu ati: On’ami la ngandji one, ndi atongenyangenyaka.” Ɔnɛ ekɔ dui dimɔtshi l’atei w’awui amɔtshi angana wakafunde afundji akɔ anɛi w’Evanjiliɔ.​—Mateu 3:16, 17; Mako 1:9-11; Luka 3:21, 22; Joani 1:32-34.

² Woho wakatshulwama nyuma k’ekila le Yeso lo yoho yɛnama akɛnya dia nde mbaki Okitami, tshɛkɛta yalembetshiya Mɛsiya kana Kristo. (Joani 1:33) L’ekomelo, ‘kanula’ yakalakema yakɛnama! Ɔnɛ lakemala la ntondo ka Joani Obatizanyi mbaki ɔnɛ lakahombe ndjolumatama l’etshindji oma le Satana ndo nde mbayohomba ndjominola ɔtɛ waki otunyi woleki woke waki Jehowa ndo wa lowandji Lande. (Etatelu 3:15) Oma k’etena kɛsɔ, Yeso akeye dimɛna dia nde pombaka sala la wolo dia kotsha sangwelo diaki Jehowa diendana la lowandji ndo la Diolelo Diande.

3. Ngande wakayalɔngɔsɔla Yeso lo kɛnɛ kendana l’ɔkɛndɛ wakahombe monga lande wa sukɛ lowandji laki Jehowa?

³ Dia ndjalɔngɔsɔla dikambo di’ɔkɛndɛ waki la ntondo kande, “Jesu akakalula uma la Jorodana uludiami la nyuma k’[ekila]. Ndi akalombwama le nyuma l’usui.” (Luka 4:1; Mako 1:12) Lo nshi 40 yakandetsha lɛkɔ, Yeso akakondja etena ka kana yimba efula lo dikambo diendana la lowandji diakonyiya Satana ndo di’olimu wakandahombe sala dia sukɛ lowandji laki Jehowa. Dikambo sɔ mendanaka la ditongami tshɛ diele la yimba dia l’olongo ndo dia la nkɛtɛ. Ɔnkɔnɛ, sho pombaka sɛdingola lɔsɛnɔ la kɔlamelo laki Yeso ndo menda kɛnɛ kahombaso sala dia mɛnya ɔnɛ sho lawɔ nangaka sukɛ lowandji laki Jehowa.​—Jobo 1:6-12; 2:2-6.

Satana akalɔshana la lowandji laki Jehowa lo sɛkɛ

4. Kakɔna kakasale Satana dia ndɔshana la lowandji laki Nzambi lo sɛkɛ?

⁴ Lo mɛtɛ, Satana akeyaka akambo w’omaso la mbuta asɔ tshɛ. Mbala kakɔ ɔtɔi, nde akatatɛ ndɔsha etenyi ka ntondo ka ‘kanula’ ya ‘womoto’ laki Nzambi. (Etatelu 3:15) Satana akahembe Yeso mbala shato, lo mbotɛ dia nde sala kɛnɛ kakɛnamaka dia kekɔ la wahɔ le Yeso, lo dihole dia nde sala kɛnɛ kakakombolaka She dia nde sala. Lo yoho ya lânde, ohemba wa sato mbakayotondjaka tɔfwɛfwɛ taki Satana tendana la lowandji laki Nzambi sɛkɛ. Lo mɛnya Yeso “waulelu tshe wa l’andja ndu lutumbu lawo,” la otako tshɛ Satana akatɛ Yeso ate: “Dimi layukushawo, vo tshe, naka we ayunkhusamela dia ntemolami.” Oko wakandeyaka dimɛna dia Satana kalɔmbɔla “waulelu tshe wa l’andja,” Yeso akɛnya wedi wakinde lo kɛnɛ kendana la lowandji lo kadimola ate: “Satana, mo! Ne dia akafundama ati: Kotemolaki [Jehowa Nzambi k]aye, kûkambelaki ndame olimu.”​—Mateu 4:8-10.

5. Ɔkɛndɛ akɔna wa wolo wakahombe Yeso kotsha?

⁵ Lɔsɛnɔ laki Yeso lakɛnya hwe ɔnɛ oyango ande wa ntondo aki wa sukɛ lowandji laki Jehowa. Yeso akeyaka dimɛna dia nde akahombe tshikala la kɔlamelo polo l’etena kakandahombe ndjakema oma l’anya waki Satana dia mɛnya ɔnɛ Nzambi mbele la lotshungɔ la nɔmbɔla. Nyɔi kɛsɔ kakewoyama lo yoho ya prɔfɛsiya oko olumatamelo wa ‘kanula’ ya womoto l’etshindji. (Mateu 16:21; 17:12) Nde akahombe mɛnya nto dia Diolelo diaki Nzambi mbele ehomɔ kayokamba la Jehowa dia ndanya Satana ɔtɔmbɔki ndo mbidja wɔladi ndo akambo l’ɔnɔngɔ l’atei wa ditongami tshɛ. (Mateu 6:9, 10) Kakɔna kakasale Yeso dia kotsha ɔkɛndɛ wa wolo ɔsɔ na?

“Diulelu diaki [Nzambi] diaya suki”

6. Ngande wakɛnya Yeso dia Diolelo mbele ehomɔ kayokamba la Nzambi dia ndanya elimu wa Diabolo?

⁶ Ntondotondo, “Jesu aka[tshu] la Ngalili, a[t]asambisha lukumu l’ololo la [Nzambi]. Ndi akati ati: Etena kambukuka, diulelu dia [Nzambi] diaya suki.” (Mako 1:14, 15) Ɔnkɔnɛ, nde akate ate: “Dieli la mi dia nsambisha lukumu l’ololo la diulelu dia [Nzambi] . . . , ne dia dimi lakatumama dia dikambu diako.” (Luka 4:18-21, 43) Yeso akakindjakindja wodja ɔsɔ w’otondo, “atasambisha lukumu l’ololo la diulelu dia [Nzambi].” (Luka 8:1) Yeso akatshe nto ahindo efula, mbuta ate akalesha elui w’anto, akɔladia mpɛpɛ ya wolo, akakɔnɔla ase hemɔ ndo akolola edo. Lo tshimbo y’ahindo asɔ, Yeso akɛnya dia Nzambi kokaka minya akambo tshɛ wa kɔlɔ ndo asui wakaye oma l’ɔtɔmbɔkwɛlɔ wa l’Ɛdɛna ndo ‘ndanya elimu wa Diabolo.’​—1 Joani 3:8.

7. Kakɔna kaketsha Yeso ambeki ande dia vɔ sala, ndo etombelo akɔna wakawakondja?

⁷ Dia lokumu l’ɔlɔlɔ la Diolelo sambishama dimɛna dimɛna, Yeso akatshumanya olui w’ambeki wa kɔlamelo ndo akawaetsha olimu akɔ. Ntondotondo nde akasha apɔstɔlɔ ande 12 olimu ɔsɔ ndo “akâtumi dia ntusambisha dikambu dia diulelu dia [Nzambi].” (Luka 9:1, 2) Oma lâsɔ, nde akatome ambeki akina 70 dia tosambisha ɔnɛ: “Diulelu dia [Nzambi] diaya suki la nyu.” (Luka 10:1, 8, 9) Etena kakakalola ambeki asɔ ndo kakawayotɛka Yeso etombelo w’ɛlɔlɔ wakawakondja l’olimu w’esambishelo ka Diolelo, nde akawatɛ ate: “Dimi lakenyi Satana ako uma l’ulungu uku dingadimu.”​—Luka 10:17, 18.

8. Kakɔna kakɛnya lɔsɛnɔ laki Yeso l’otondo?

⁸ Yeso akayasha tshɛ ndo koshisha ndoko diaaso ɔtɔi dia sambisha Diolelo. Nde akasambisha aha la mpekɔ, yanyi oko yanyi otsho oko otsho, aha la nyanga dia nsɛna lɔsɛnɔ la kawotake. Nde akate ate: “Mbulu yeko la afuku, fudu ya l’ulungu yeko la kefu, keli On’a untu kema la lama mbetamia ote andi!” (Luke 9:58; Mako 6:31; Joani 4:31-34) Yema tshitshɛ la ntondo ka nyɔi kande, Yeso akatɛ Pɔnsɔ Pilato la dihonga tshɛ ate: “Dia dikambu ne mbakamayi la kete, dia mvuta akambu wa mete.” (Joani 18:37) Lɔsɛnɔ laki Yeso l’otondo lakɛnya dia nde akaye, aha tsho dia ndjonga ombetsha a woke kana osadi w’ahindo kana Oshimbedi wele la yimba ya ndjahombia, koko dia ndjosukɛ lolango laki Jehowa nkum’olongo ndo mɛnya akoka wele la Nzambi wa kotsha lolango lande lo tshimbo ya Diolelo.​—Joani 14:6.

‘Diambokotshama’

9. L’ekomelo, ngande wakatondoya Satana dia numata ‘kanula’ ya womoto laki Nzambi l’etshindji?

⁹ Kɛnɛ tshɛ kakasale Yeso dikambo dia Diolelo kɔngɛnyangɛnya Ɔndɔshi, Satana Diabolo. Mbala ko mbala, lo tshimbo ya etenyi ka la nkɛtɛ ka ‘kanula’ yande, mbuta ate ase pɔlitikɛ ndo ase ɛtɛmwɛlɔ, Satana akahembe dia ndjaka ‘kanula’ ya womoto laki Nzambi. Tatɛ oma lo mbotwelo ka Yeso polo lo nyɔi kande, Satana la anto ande wakasɔmana la nde. L’ekomelo, l’eleko kamɔnga akatshi ka lo 33 tena diaso nɛ, etena kakakoke ka Ɔna onto kimwama l’anya w’Ɔndɔshi ndo numatama l’etshindji oma le nde. (Mateu 20:18, 19; Luka 18:31-33) Ɛkɔndɔ wa l’Evanjiliɔ mɛnyaka hwe woho wakakambe Satana la Judasɛ Isakariyɔtɛ, ɛlɔmbɛdi a wake, afundji, Afarisɛ ndo ase Rɔma, dia vɔ manya Yeso ndo mbodiaka nyɔi ka kɔlɔ efula l’otamba w’asui.​—Etsha 2:22, 23.

10. Naa dui diakaleke ohomba diakakotsha Yeso oma lo nyɔi kande l’otamba w’asui?

¹⁰ Kakɔna kakoyɛ lo yimba etena kakanyiyayɛ dikambo dia Yeso l’otamba w’asui ahɛnyahɛnyama ndo asunyasunya lomu? Ondo wɛ mbohɔka olambo wa tshungo wakakimɔ Yeso la ngandji tshɛ lo wahɔ w’anto wa kɔlɔ. (Mateu 20:28; Joani 15:13) Wɛ mbeyaka mamba dia ngandji k’otamanya kakɛnya Jehowa lo kimɔ olambo ɔsɔ. (Joani 3:16) Ondo wɛ ndjaokaka oko wakayaoke owandji w’asɔlayi w’ose Rɔma lakatshutshuyama dia mbuta ate: “Mete, one aki On’a [Nzambi]!” (Mateu 27:54) Akambo asɔ tshɛ wekɔ ekadimwelo wa shikaa lo dimbola sɔ. Lo wedi okina, ohɔ dia ɛtɛkɛta w’ekomelo waki Yeso l’otamba w’asui aki ɔnɛ: ‘Diambokotshama!’ (Joani 19:30) Kakɔna kakakotshama? Kânga mbakakotsha Yeso akambo efula oma lo lɔsɛnɔ ndo oma lo nyɔi kande, shi nde akaye la nkɛtɛ ntondotondo dia ndjokandola dikambo diendana la lowandji laki Jehowa? Shi akatama la ntondo dia oko wakinde ‘kanula,’ nde akahombe soyama otamanya oma le Satana dia mbɛdia lokombo laki Jehowa oma lo sɔnyi tshɛ kamboloshama? (Isaya 53:3-7) Ɔsɔ aki ɛkɛndɛ wa wotsho efula, koko Yeso akâkotsha vɔ tshɛ dimɛna dimɛna. Ande woho wakakotshama awui asɔ lee!

11. Kakɔna kayosala Yeso dia kotsha prɔfɛsiya kakatɛkɛtama l’Ɛdɛna tshɛ lo tshɛ?

¹¹ L’ɔtɛ wa kɔlamelo ndo olowanyi ande, Yeso akolwama, aha oko onto, koko oko ‘nyuma kasha anto lɔsɛnɔ.’ (1 Koreto 15:45; 1 Petero 3:18) Jehowa akalake Ɔnande lakatombɔma ɔnɛ: “Udjase lu lunya lami la pami, edja ndu lam’ayumukitsha atunyi aye [l’ɛse k]’akaka aye.” (Osambu 110:1) Satana nde la anto tshɛ wakenga ‘kanula’ yande mbele “atunyi.” Oko wende Nkumekanga ka lo Diolelo diaki Jehowa diakakimɔma l’anya wa Mɛsiya, Yeso Kristo ayeta la ntondo dia shila atunyi tshɛ oshiki, wa l’olongo ndo wa la nkɛtɛ. (Enyelo 12:7-9; 19:11-16; 20:1-3, 10) Oma lâsɔ mbayokotshama tshɛ lo tshɛ prɔfɛsiya kele lo Etatelu 3:15 ndo dɔmbɛlɔ diaketsha Yeso ambeki ande ɔnɛ: “Diulelu diaye diayi. Lulangu laye latshami la kete uku atshamalo l’ulungu.”​—Mateu 6:10; Filipi 2:8-11.

Yeso akatotshikɛ ɛnyɛlɔ ka sho ndjela

12, 13. a) Etombelo akɔna wɛnama ɛlɔ kɛnɛ lo woho wasambishama lokumu l’ɔlɔlɔ la Diolelo? b) Ambola akɔna wahombaso ndjambola naka sho nangaka ndjela wanya waki Yeso?

¹² Ɛlɔ kɛnɛ, lokumu l’ɔlɔlɔ la Diolelo lekɔ lo sambishama lo wedja efula, oko wakatatshi Yeso. (Mateu 24:14) Etombelo wamboyala ele, miliyɔ y’anto yambolambola nsɛnɔ yawɔ le Nzambi. Vɔ ngɛnangɛnaka ɛtshɔkɔ wayowaela Diolelo sɔ. Vɔ wekɔ lo nongamɛ dia ndjɔsɛna pondjo pondjo lo wɔladi ndo lo lotui tshitshi lo paradiso ka la nkɛtɛ, ndo vɔ mbewoyaka anto akina elongamelo kawɔ l’ɔngɛnɔngɛnɔ tshɛ. (Osambu 37:11; 2 Petero 3:13) Onde wɛ ekɔ ɔmɔtshi l’atei w’esambisha wa Diolelo asɔ? Naka eelo, kete wɛ kokaka mandɔma. Koko, ekɔ dui dikina diahomba onto tshɛ la l’atei aso sɛdingola.

¹³ Ɔpɔstɔlɔ Petero akafunde ate: “Kristu akanyusuwela, akanyutshikela djimbitelu, dia nyu mbuyela lu wanya andi.” (1 Petero 2:21) Tolembete dia l’ɛtɛkɛta ɛnɛ, Petero kombuta dia ohetoheto waki la Yeso l’esambishelo kana dia diewo dia mbetsha diaki lande, koko dia asui ande. Oko wakinde ɔmɛnyi w’awui asɔ, Petero akeyaka polo lo yɛdikɔ yakɔna yaketawɔ Yeso dia sowa dia kitanyiya lowandji laki Jehowa ndo dia mɛnya ɔnɛ Satana ekɔ kanga kashi. Ko lo toho takɔna takokaso ndjela wanya waki Yeso? Sho pombaka ndjambola ɔnɛ: ‘Polo lo yɛdikɔ yakɔna yetawɔmi sowa dia sukɛ ndo nɛmiya lowandji laki Jehowa? Onde dimi mɛnyaka oma lo yoho yasɛnami ndo yakotshami olimu ami dia dimi ndekaka sukɛ lowandji laki Jehowa?’​—Kolosai 3:17.

14, 15. a) Kakɔna kakasale Yeso etena kakawawosha alako wa kɔlɔ ndo kakawalange mbodja nkumekanga, ndo lande na? b) Dui diakɔna diahomba mongaka wonya tshɛ lo timba taso? (Dja ndo kɔmatɛrɛ yele lo kiombo yata ɔnɛ: “Tete lo wedi wa Jehowa.”)

¹⁴ Lushi tshɛ, sho mongaka la ntondo k’ehemba ndo ka tɛdikɔ ta weke kana ta totshitshɛ ta mbɔsa. Kakɔna kahomba to kimanyiya dia mbeya kɛnɛ kahombaso sala? Ɛnyɛlɔ, etena kahembamaso dia sala dui dimɔtshi diakoka mbidja lonto laso l’Okristo lo wâle, kakɔna kahombaso sala? Etena kakatɛ Petero Yeso dia nde ndjasalɛ ɔlɔlɔ, kakɔna kakasale Yeso? Nde akawotɛ ate: “Satana, utshimbi l’okongo ami! . . . we kema lu leke la [Nzambi] paka lu leke l’antu.” (Mateu 16:21-23) Etena katoshawɔ waaso kana olimu wa falanga efula wakoka todjɛ wekamu l’elimu aso w’Okristo, onde sho tosalaka oko wakasale Yeso? Etena kakeye Yeso dia anto wakɛnyi ahindo ande ‘woyanga mbonda dia mbodja nkumekanga la wolo,’ aha la tshimbatshimba nde akâlawɔ.​—Joani 6:15.

¹⁵ Lande na kakɔshi Yeso yɛdikɔ ya wolo ngasɔ lo waaso asɔ ndo lo waaso akina? Nɛ dia nde akashihodia hwe dia akambo efula wakendanaka la dui sɔ, koko aha paka ekokelo kande kana wahɔ ande hita. Nde akakombolaka sala lolango laki She ndo sukɛ lowandji lande oyadi kakɔna kakakoke mbokomɛ. (Mateu 26:50-54) Ɔnkɔnɛ, naka dikambo diendana la lowandji laki Jehowa bu wonya tshɛ lo yimba yaso oko wakidiɔ le Yeso, kete tayongaka wonya tshɛ lo wâle wa sekola ɛlɛmbɛ wa Jehowa. Lande na? Nɛ dia sho mbeyaka nkɔ esadi eto lo nkeso yaki Satana, ɔnɛ lele manyi lo sala dia kɛnɛ kele kɔlɔ mɛnama diele oko kekɔ ɔlɔlɔ, oko wakandasale etena kakandahembe Eva.​—2 Koreto 11:14; 1 Timote 2:14.

16. Naa oyango woleki woke wahombaso monga lawɔ lam’akimanyiyaso anto akina?

¹⁶ Lo olimu aso w’esambishelo, sho salaka la wolo dia sawola l’anto lo kɛnɛ kendana l’ekiyanu awɔ ndo mbaɛnyaka kɛnɛ kata Bible. Ɔsɔ ekɔ yoho ya dimɛna ya memula nsaki yawɔ dia mbeka Bible. Koko, oyango aso woleki woke kema tsho wa kimanyiya anto dia vɔ mbeya kɛnɛ kata Bible kana ɛtshɔkɔ wayela Diolelo diaki Nzambi. Sho pombaka mbakimanyiya dia vɔ shihodia dikambo diendana la lowandji laki Jehowa. Onde vɔ nangaka koma Akristo wa mɛtɛ ndo mɛmba ‘otamba awɔ w’asui’ ndo sowa l’ɔtɛ wa Diolelo? (Mako 8:34) Onde vɔ wekɔ suke dia mbɔtɔ l’ɔnɔngɔ wa wanɛ wasukɛ lowandji laki Jehowa ndo wɛnya ɔnɛ Satana ekɔ kanga kashi ndo omamanyishi? (Tukedi 27:11) Tekɔ la diɛsɛ dia ndjakimanyiya ndo kimanyiya anto akina dia vɔ mbeta lo wedi wa lowandji laki Jehowa.​—1 Timote 4:16.

Etena kayokoma Nzambi ‘awui tshɛ le onto tshɛ’

17, 18. Etena kakɔna ka diambo efula kakokaso kongɛ naka sho mɛnya dia tekɔ lo wedi wa lowandji laki Jehowa?

¹⁷ Etena kɛnɛ kasalaso tshɛ dia mɛnya oma lo dionga ndo oma l’olimu aso w’esambishelo ɔnɛ tekɔ lo wedi wa lowandji laki Jehowa, sho kokaka kongɛ etena kele Yeso Kristo “[ayu]kimo diulelu le [Nzambi] Shesu.” Etena kakɔna kayosalema dikambo sɔ? Ɔpɔstɔlɔ Paulo nembetshiyaka ate: “Lam’ayundulanya diulelu tshe, luwandji tshe, diahamelu la wulu tshe. Ne dia dieli la ndi mbulela, edja ndu lam’ayundukamela atunyi andi tshe [l’ɛse k]’ekulu andi. . . . Ndu Ona ndame ayolembiama le one lakayalembiya diango tshe, dia [“Nzambi koma awui tshɛ le onto tshɛ,” NW].”​—1 Koreto 15:24, 25, 28.

¹⁸ Ayonga mɛtɛ etena ka diambo efula lam’ayokoma Nzambi “awui tshɛ le onto tshɛ”! L’etena kɛsɔ, Diolelo diayokotsha oyango adiɔ. Wanɛ tshɛ walɔshana la lowandji laki Jehowa wayolanyema. Wɔladi wayonga lo nkɛtɛ k’otondo ndo awui tshɛ wayonga l’ɔnɔngɔ. Lo ndjela ɛtɛkɛta w’omembi w’esambo, ditongami tshɛ diayemba ɔnɛ: ‘Nyosha Jehowa lotombo lɛdimi la lokombo lande! Nyote wedja nyate: Jehowa ndamɛ aya nkumekanga.’​—Osambu 96:8, 10.

Onde wɛ kokaka kadimola?

• Ngande wakatetemala lowandji laki Jehowa monga dikambo dioleki ohomba le Yeso?

• Kakɔna kakakotsha Yeso ntondotondo oma l’olimu ndo nyɔi kande?

• Lo toho takɔna takokaso ndjela ɛnyɛlɔ ka Yeso lo mɛnya ɔnɛ tekɔ lo wedi wa lowandji laki Jehowa?

[Kiombo/​Esato wa lo lɛkɛ 11]

TETE LO WEDI WA JEHOWA

L’ɛnyɛlɔ ka anangɛso efula wa lo wodja wa Corée ndo wa l’ahole akina, etena kahomana Akristo l’ekakatanu wa wolo, ekɔ ohomba mbeya dimɛna lande na katokomɛ ekakatanu ɛsɔ.

Ɔmɛnyi wa Jehowa ɔmɔtshi wakadjama lo lokanu lo lowandji l’edjedja la Union soviétique akate ate: “Kɛnɛ kakatokimanyiya dia sho mbikikɛ, ele woho wakatashihodia dimɛna dikambo diakatombe l’ekambɔ ka Ɛdɛna diendana la lotshungɔ lele la Nzambi la nɔmbɔla. . . . Takeyaka dia tambokondja diaaso di’ɔlɔlɔ dia sukɛ lowandji laki Jehowa. . . . Dikambo sɔ diakatokeketsha ndo diakatokimanyiya dia sho nama olowanyi aso.”

Ɔmɛnyi wa Jehowa okina akate kɛnɛ kakokimanyiya nde l’asekande akina lo pango kakawakambishaka anto olimu la wolo. Nde akate ate: “Jehowa akatosukɛ. Kânga mbakatasowaka, takasɛnaka lo nyuma dia nama diɔtɔnganelo di’ɔlɔlɔ diasaso la Jehowa. Takakeketshanaka nshi tshɛ lo mbohɔnaka ɔnɛ tekɔ lo wedi wa Jehowa lo dikambo diendana la lowandji lande la lo andja w’otondo.”

[Osato wa lo lɛkɛ 8]

Ngande wakasukɛ Yeso lowandji laki Jehowa etena kakandahembamaoma le Satana?

[Osato wa lo lɛkɛ 10]

Kakɔna kakakotshama oma lo nyɔi ka Yeso?