23-ТӘТҚИҚ МАҚАЛИСИ
138-НАХША Йәһва — Сениң исмиң
Йәһва Худаниң исми сиз үчүн қанчилик муһим?
«Силәр — Мениң гувачилирим,— дәйду Йәһва» (ЙӘШАЯ 43:10).
АСАСИЙ ОЙ-ПИКИР
Йәһваниң исмини муқәддәсләп, ақлаш үчүн немә қилидиғанлиғимизни көрүп бақайли.
1, 2. Әйса үчүн Йәһва Худаниң исми әһмийәтлик екәнлигини қәйәрдин билимиз?
ӘЙСА МӘСИҺ үчүн Йәһваниң исмидин артуқ башқа һеч нәрсә болмиған. Һечбир адәм Йәһва Худаниң исмини аян қилиш үчүн Әйсаға охшаш әҗир сиңдүрмигән. Алдинқи мақалидә қараштурғинимиздәк, Әйса Атисиниң муқәддәс вә адил екәнлигини дәлилләш үчүн өз җенини пида қилишқа тәйяр болған (Марк 14:36; Ибр. 10:7—9). Әйса Мәсиһ миң жил һөкүмранлиқ қилғандин кейин Йәһва Худаға шан-шәрәп кәлтүрүш үчүн һөкүмранлиқни Униңға қайтуруп бериду (Кор. 1-х. 15:26—28). Әйсаниң бу қилған һәммә ишлири Атисини қаттиқ яхши көридиғанлиғини испатлайду.
2 Һәзрити Әйса йәр йүзигә Атисиниң намидин кәлгән (Йоһ. 5:43; 12:13). У өз әгәшкүчилиригә Йәһваниң исмини аян қилған (Йоһ. 17:6, 26). Әйса Йәһваниң намидин тәлим берип, мөҗүзиләрни көрсәткән (Йоһ. 10:25). Йәнә Әйса шагиртлири үчүн дуа қилғанда, у «маңа бәргән исмиң үчүн уларни қоғдиғина» дәп сориған (Йоһ. 17:11). Көргинимиздәк, Әйса үчүн Йәһва Худаниң исми әң муһим болған. Демәк, мәсиһийләр Йәһваниң исмини билмисә вә уни қолланмиса, өзини «мән Әйсаниң шагирти» дәп ейталамду?
3. Бу мақалидә биз немиләрни қараштуримиз?
3 Биз Әйсаниң изидин меңиватқан шагиртлири сүпитидә, Йәһва Худаниң исмини яхши көрүмиз вә Униңға иззәт-һөрмәт көрситимиз (Пет. 1-х. 2:21). Биз бу мақалидә немә үчүн Йәһва Худа Падишалиқ тоғрилиқ хуш хәвәрни вәз қиливатқанларни Өз исми билән атиғанлиғини қараштуримиз (Мәт. 24:14). Йәнә Худаниң исми һәрқайсимиз үчүн қанчилик муһим екәнлигини көрүмиз.
«ӨЗ ИСМИ БИЛӘН АТИЛИДИҒАН ХӘЛИҚ»
4. а) Әйса асманға көтирилиштин авал шагиртлириға қандақ тапшуруқ бәргән? ә) Буниңдин қандақ соал пәйда болиду?
4 Әйса асманға көтирилиштин авал шагиртлириға мундақ дегән: «Үстүңларға муқәддәс роһ чүшкәндә, силәр күч елип, Йерусалимда, пүткүл Йәһудийә вә Самарийәдә һәм йәр-зиминниң чәтлиригичә маңа гувачилар болисиләр» (Әлч. 1:8). Шуңа, Әйсаниң шагиртлири хуш хәвәрни пәқәт Исраилда әмәс, пүткүл йәр йүзидә ейтиши керәк еди. Һәтта башқа хәлиқләрму Әйсаниң шагиртлири болуш мүмкинчилигигә еришәләтти (Мәт. 28:19, 20). Бир қизиқ йери, Әйса: «маңа гувачилар болисиләр» деди. Шуниңда, йеңи шагиртлар пәқәт Әйсаниң гувачилири болуши керәкму яки Йәһва Худаниң исмини билип, У тоғрилиқ ейтиши керәкму? Бу соалға Әлчиләр китавиниң 15-бабида йезилған вақиәләр җавап бериду.
5. Йерусалимдики әлчиләр билән ақсақалларниң муһакимиси һәммә хәлиқләр Йәһваниң исмини билиши керәклигини қандақ көрсәтти? (Рәсимгиму қараң.)
5 Милади 49-жили, Йерусалимдики әлчиләр вә ақсақаллар «Әйсаниң шагирти болушни халайдиған башқа хәлиқләр хәтнә қилиш керәкму?» дегән муһим соални муһакимә қилиши үчүн җәм болди. Бу муһакимини йәкүнләп, Әйсаниң иниси Яқуп мундақ деди: «Өз исми билән атилидиған хәлиқни жиғиш үчүн, Худа дәсләп башқа хәлиқләргә диққәт ағдурғини тоғрисида Симун тәпсилий ейтип бәрди». Яқуп кимниң исми тоғрилиқ ейтқан? У Амос пәйғәмбәрниң сөзлирини нәқил кәлтүрүп, мундақ дегән: «“Барлиқ хәлиқләрдин чиққан вәкилләр билән биллә адәмләрдин қалғанлири, йәни Мениң исмим билән атиливатқанлар, Йәһвани әстаидил издиши үчүн, әзәлдин мәлум болғанни қилимән”,— дәйду Йәһва» (Әлч. 15:14—18). Йеңи шагиртлар пәқәт Йәһваниң исмини тонуп-билипла қалмай, Униң исми билән атилиши керәк еди. Демәк, улар Худаниң исмини башқиларға ейтиши вә адәмләр уларни шу исим билән тонуши керәк еди.
Биринчи әсирдики рәһбәрлик кеңәшниң учришишида бурадәрләр мәсиһийләрниң Йәһва Худаниң исми билән атилидиған хәлиқ болуш керәклигини ениқ чүшәнгән (5-абзацқа қараң)
6, 7. а) Әйса йәр йүзигә немә үчүн кәлгән? ә) Әйсаниң йәргә келишиниң башқа муһимирақ сәвәви немидә болған?
6 Әйсаниң исми «Йәһва — Қутқузғучи» дегән мәнани билдүриду. Йәһва Худа Әйса Мәсиһ арқилиқ дунияни қутқузмақчи болған. Буниң үчүн Әйса йәр йүзигә келип, өз җенини қурбан қилған (Мәт. 20:28). Шуңа, төләмгә ишәнч билдүргән адәмләрниң гуналири кәчүрүлүп, улар мәңгүлүк һаятқа еришәләйду (Йоһ. 3:16).
7 Бирақ немә үчүн төләм керәк болди? Бу соалниң җававини Ерәм беғида болған вақиәдин биләләймиз. Алдинқи мақалидә муһакимә қилғинимиздәк, Адәм ата билән Һава ана Худаға қарши исиян көтирип, мәңгү яшаш пурситидин айрилди (Ярит. 3:6, 24). Амма Әйсаниң йәргә келишиниң адәмләрни қутқузуштинму муһим сәвәви болған. У Йәһва Худаниң исмини ақлаш керәк еди (Ярит. 3:4, 5). Чүнки Шәйтан Йәһваниң исмиға дағ кәлтүргән. Һәрбир инсан Йәһваниң һечқандақ яман иш қилмиғанлиғини вә көйүмчан Ата екәнлигини билиши керәк еди. Әйса Йәһваниң вәкили болуп, Униң исми билән аталғанлиқтин, Йәһваниң исмини ақлашта әң муһим бир роль ойниған.
Әгәр адәм Худаниң исмини билмисә вә уни қолланмиса, қандақларчә Әйсаниң һәқиқий әгәшкүчиси болалайду?
8. Әйсаниң һәммә шагиртлири немини яхши чүшиниши керәк еди?
8 Әйсаға ишәнч билдүргән йәһудийларму, ят хәлиқләрму қутқузуш Әйсаниң Атиси Йәһва Худадин келидиғанлиғини чүшиниши керәк еди. Униңдин ташқири, улар Әйсаға охшаш Йәһваниң исми билән атилиши керәк болған (Йоһ. 17:3). Йәнә улар Йәһваниң исмини муқәддәсләш қанчилик муһим екәнлигини чүшиниши лазим еди. Уларниң қутқузулуши шуниңға бағлиқ болған (Әлч. 2:21, 22). Шуниң үчүн Әйсаниң шагирти болушни халайдиғанларниң һәммиси пәқәт Әйса тоғрилиқ әмәс, Йәһва Худа тоғрилиқму яхши билим елиши керәк еди. Йоһан 17-бапта Әйса өзиниң дуасида мундақ дәп ейтқанлиғи һәйран қаларлиқ әмәс: «Сениң исмиңни мән уларға аян қилдим һәм йәниму аян қилимән. Мән улар билән бирликтә болушум үчүн, Сән маңа көрсәткән меһир-муһәббәтни уларму башқиларға көрсәтсун» (Йоһ. 17:26).
«СИЛӘР МЕНИҢ ГУВАЧИЛИРИМ»
9. Йәһваниң исми биз үчүн муһим екәнлигини қандақ көрситәләймиз?
9 Әйсаниң һәммә шагиртлири Йәһваниң исмини муқәддәслиши керәк (Мәт. 6:9, 10). Биз Йәһваниң исмини әң муһим дәп қаришимиз лазим. Буни иш-һәрикитимиз билән көрситишимиз зөрүр. Шуңа, Йәһваниң исмини ақлап, Шәйтан Худа тоғрилиқ ялған ейтиватқанлиғини қандақ испатлалаймиз?
10. Биз Йәшая 42—44 баплиридин немини билимиз? (Йәшая 43:9; 44:7—9; рәсимгиму қараң.)
10 Йәшая 42дин 44-бапларғичә Йәһва Худаниң исмини қандақ муқәддәсләйдиғанлиғимизни биләләймиз. Бу бапларда Йәһва Худа Униңға ибадәт қилмиғанларни өз илаһлириниң һәқиқий худа екәнлигини испатлашқа тәклип қиливатиду. Йәнә Йәһва уларниң сөзлирини тәстиқләйдиған гувачилар барму дәп сориғанда, бирму гувачи болмиди! (Йәшая 43:9; 44:7—9ни оқуң).
Биз ейтқан сөзлиримиз билән қилған ишлиримиз арқилиқ Йәһваниң һәқиқий Худа екәнлигини дәлилләймиз (10, 11-абзацқа қараң)
11. Йәшая 43:10—12дә Йәһва Худа Өз хизмәтчилиригә немә дәйду?
11 Йәшая 43:10—12ни оқуң. Йәһва Өзиниң хәлқигә: «Силәр — Мениң гувачилирим, . . . Мән болсам, силәрниң Пәрвәрдигариңлар». Йәһва улардин: «Мәндин башқа Худа барму?» дәп сорайду (Йәшая 44:8). Бу соалға җавап бериш биз үчүн чоң шан-шәрәп. Сөзлиримиз вә иш-һәрикәтлиримиз билән биз Йәһваниң бирдинбир һәқиқий Худа екәнлигини испатлаймиз. Униң исми әң улуқ. Биз һаят тәрзимиз билән Йәһва Худани һәқиқәтән яхши көридиғанлиғимизни дәлилләймиз. Шәйтан бизни қандақ синишидин қәтъийнәзәр, биз Йәһваға садиқ болуп қалимиз. Шундақ қилип биз Йәһваниң исмини муқәддәсләш үчүн өз үлишимизни қошумиз.
12. Йәшая 40:3, 5тики сөзләр қандақ әмәлгә ашти?
12 Биз Йәһваниң нам-абройини ақлиғанда, Әйсаға тәқлит қилимиз. Шундақла Йәшая пәйғәмбәр «Йәһва үчүн йолни» тәйярлайдиған бир киши келидиғанлиғини алдин-ала ейтқан (Йәшая 40:3). Бу бәшарәт қандақ әмәлгә ашқан? Йәһия Чөмдүргүчи Әйса үчүн йол тәйярлиған. Бирақ у әслидә бу йолни Йәһва үчүн тәйярлиған. Чүнки Әйсани Йәһваниң Өзи әвәткән вә у Худаниң намидин сөзлигән (Мәтта 3:3; Марк 1:2—4; Луқа 3:3—6). Йәнә шу бәшарәттә «Йәһваниң шөһрити намайән болсун» дейилгән (Йәшая 40:5). Бу сөзләр қандақ әмәлгә ашти? Әйса Йәһваниң вәкили болуп, бу ишни әҗайип атқурди. У Атисиниң хисләтлирини мукәммәл әкс әттүргәнлиги шунчилик, адәмләр Әйсаға қарап, Йәһва Худани көргәндәк болди (Йоһан 12:45).
13. Әйсани қандақ тәқлит қилалаймиз?
13 Әйсаға охшаш, бизму Йәһваниң гувачилири. Биз Йәһваниң нами билән атилип, Униң әҗайип ишлирини һәммә адәмләргә ейтимиз. Буни үнүмлүк қилиш үчүн, биз Йәһваниң исмини ақлашта Әйсаниң муһим роль ойнайдиғанлиғи тоғрилиқ ейтишимиз керәк (Әлч. 1:8). Һечким Әйсадәк Йәһва тоғрилиқ яхши гувалиқ бәрмигән. Шуңа биз униңдин үлгә елишимиз керәк (Вәһ. 1:5). Йәһва Худаниң исми биз үчүн муһим екәнлигини йәнә қандақ көрсәтсәк болиду?
ЙӘҺВАНИҢ ИСМИ БИЗ ҮЧҮН ӘҺМИЙӘТЛИК
14. Зәбур 105:3кә бенаән, биз Йәһваниң исмиға қандақ қараймиз?
14 Биз Йәһва Худаниң исмидин мәғрурлинимиз (Зәбур 105:3ни оқуң). Худаниң исмини билгәнлигимиз үчүн махтансақ, Йәһва буниңға шатлиниду (Йәр. 9:23, 24; Кор. 1-х. 1:31; Кор. 2-х. 10:17). «Йәһва екәнлигимни билип, махтансун» дегән сөзләр У бизниң Худайимиз екәнлигидин пәхирлинишимизни билдүриду. Башқиларниң алдида Йәһваниң нам-абройини қоғдап, Униң муқәддәс Худа екәнлигини ейтиш биз үчүн чоң шан-шәрәп. Биз хизмәтдашлиримиз, синипдашлиримиз, хошнилиримиз вә башқиму адәмләргә Йәһва гувачиси екәнлигимизни ейтиштин уялмаслиғимиз керәк! Шәйтан бизниң башқиларға Йәһва Худа тоғрилиқ ейтишимизни қәтъий халимайду (Йәр. 11:21; Вәһ. 12:17). Шәйтан вә униң сахта пәйғәмбәрлири адәмләр Худаниң исмини унтуп қелишини халайду (Йәр. 23:26, 27). Бирақ биз Йәһваниң исмини яхши көргәнликтин, Уни мәдһийиләш үчүн һәрқандақ пурсәтни қолдин бәрмәймиз (Зәб. 5:11; 89:16).
15. Йәһвани исми билән чақириш дегән немини билдүриду?
15 Биз Йәһваниң исмини атап чақиримиз (Йоел 2:32; Рим. 10:13, 14). Йәһвани исми билән чақириш дегинимиз Униң исмини билип, қоллиништинму көп нәрсини өз ичигә алиду. Бу Йәһва Худани шәхс сүпитидә билишни, Униңға ишинишни вә рәһбәрлик билән ярдәм сорашни билдүриду (Зәб. 20:7; 99:6; 116:4; 145:18). Йәнә Худаниң исмини атап чақириш дегинимиз — Униң исмини вә әҗайип хисләтлирини башқиларға ейтишни билдүриду. Биз адәмләрниң яхши тәрәпкә өзгиришигә, Худаниң рәһимигә еришишигә вә қутқузулушиға ярдәм беримиз (Йәшая 12:4; Әлч. 2:21, 38).
16. Биз Шәйтанниң ялғанчи екәнлигини қандақ испатлалаймиз?
16 Биз Йәһва Худаниң исми үчүн азаплинишқа тәйяр (Яқуп 5:10, 11). Биз қийинчилиқларға дуч кәлгәндә, Йәһва Худаға садиқ болуп қалсақ, Шәйтанниң ялғанчи екәнлигини испатлаймиз. Аюп пәйғәмбәрниң күнлиридә Шәйтан Худаниң хизмәтчилирини мундақ дәп әйиплигән: «Инсан бар нәрсисини һаяти үчүн бериветиду» (Аюп 2:4). Шәйтан адәмләрни Йәһваға пәқәт ғәм-қайғуси йоқ вақитта хизмәт қилиду, бирақ һаятида қандақту бир қийинчилиқлири пәйда болғанда, Уни ташлап кетиду дәп әйиплиди. Аюп пәйғәмбәр буниң ялған екәнлигини испатлиди. Бизму Шәйтанниң әйиплишигә шундақ җавап қайтуралаймиз. Шәйтан бизниң һаятимизни еғирлаштуруп, роһумизниң чүшүп кетишини халисиму, Йәһваға хизмәт қилишни тохтатмаймиз. Йәһва бизни Өз исми үчүн қоғдайдиғанлиғиға қилчиму гуман қилмаймиз (Йоһ. 17:11).
17. Петрусниң 1-хети 2:12дә йезилғандәк, биз Йәһва Худаниң исмиға йәнә қандақ қилип шан-шәрәп кәлтүрәләймиз?
17 Биз һәммини Йәһвани мәдһийиләш үчүн қилимиз (Пәнд н. 30:9; Йәр. 7:8—11). Адәмләр бизни Йәһва гувачиси сүпитидә тонуғанлиқтин, биз Йәһва Худани йә мәдһийиләймиз, йә Униң исмиға дағ кәлтүримиз (Петрусниң 1-хети 2:12ни оқуң). Шуңа биз гәп-сөзлиримизгә вә жүрүш-турушимизға диққәт қилишимиз керәк. Шундақ қилип, биз намукәммәл болсақму, Йәһва Худаниң исмиға шан-шәрәп кәлтүрәләймиз.
18. Йәһва Худаниң исми биз үчүн муһим екәнлигини испатлашниң йәнә қандақ йоллири бар? (Рәсимгиму қараң.)
18 Йәһваниң исми шәхсий нам-абройимиздинму үстүн (Зәб. 138:2). Биз Йәһва Худани мәдһийиләш үчүн қандақту бир ишларни қилғанда, бу башқа адәмләргә пат-пат яқмай, биз тоғрилиқ яман гәп-сөзләрни ейтиши мүмкинa. Адәмләр Әйсани җинайәтчи сүпитидә әйипләп, мәсхирә қилған. Бирақ у Йәһва Худаниң исми үчүн шундақ өлүшкә тәйяр болған. У «шәрмәндичиликкә писәң қилмиди», йәни «адәмләр мениң тоғрилиқ немә ойлайду» дәп әнсиримиди (Ибр. 12:2—4). У бар диққитини Йәһва Худаниң ирадисини орунлашқа қаратқан (Мәт. 26:39).
19. Йәһва Худаниң исми тоғрилиқ сиз қандақ һис-туйғуда вә немә үчүн?
19 Биз Йәһва Худаға хизмәт қилиштин пәхирлинимиз. Биз үчүн Униң Гувачиси болуш чоң шан-шәрәп. Шуңа, Худаниң исми үчүн бизгә қарита ейтилған һәрқандақ яман сөзләргә тәқабил турушқа тәйяр болайли. Йәһва Худаниң исмини өз нам-абройимиздинму муһим дәп һесаплаймиз. Шуңа, Шәйтан бизниң көңлүмизни чүшириш үчүн қандақла қаршилиқ көрсәтмисун, Йәһва Худаниң исмини мәдһийиләшни тохтатмайли. Шундақ қилсақ, бизму Әйса Мәсиһкә охшаш, Йәһваниң исмидин әһмийәтлик һечнәрсә йоқ екәнлигини көрситимиз.
9-НАХША Алқишлаң Худайимиз Йәһвани!
a Үч дости Аюп пәйғәмбәрни әйиплигәндә, у өзиниң абройи тоғрилиқ көп ойлап кәткән. Бешида Аюп балилири вә мал-мүлкидин айрилип қалғанда, у «еғизида күпүрлүк сөз қилмиди вә Худаға қарши гуна өткүзмиди» (Аюп 1:22; 2:10). Бирақ достлири уни наһәқ әйиплигәндә, у өзини қоғдап, әқилгә сиғмайдиған сөзләрни ейтқан. Униңға Йәһва Худаниң нам-абройини қоғдаштин көрә, өз нам-абройини қоғдаш муһимирақ болған (Аюп 6:3; 13:4, 5; 32:2; 34:5).