Baa Yéhôva a ñemble masoohe mem?

1-2. Inyuki di nla nôgda wengoñle Yéhôva a ntimbhe bé masoohe més?

“YÉHÔVA a bane we lingoñoo, ha nyen a ga ti we i mam ma nkon we ngôñ.” (Tjémbi 37:4) Kinje mbônga nlam! Ndi baa hala a nkobla le di nlama bem le hiki yom di mbat Yéhôva a ti bés yo kunda yada? Inyuki di nlama badba i mbadga i? Di wan le i mam mana. Sita yada i i yé ngi biiba, i nyônôs lipep inyu ke i suklu baañal ñañ nlam. Ndi ngandak nwii i ntagbe, ba mah bé sébél nye. Njohok mankéé nu munlôm u nsoohe Yéhôva le a mélés béba yé kon kayéle a pam i gwel ngim minson ikété likoda. Ndi kon wé u mal bé. Bagwal ba ba yé bikristen ba nsoohe le man wap a téñbe ikété maliga. Ndi man wap a mpohol i tjôô Yéhôva.

² Bebek le yak we, u bi bat Yéhôva ngim yom, ndi u yé ngi kôs yo. Hala a nla boñ le u kahal hoñol le Yéhôva a ñemble masoohe ma bôt bape ndi a ñemble bé moñ. Tole u nla hoñol le bebek u mboñ béba jam. Hala a bi pémél sita yada le Janiceb. Nye ni nlô wé ba bi soohe Yéhôva le ba nsômbôl ke i sal i Bétel. A nkal le: “Me bé nkwoog nkaa le ba ga hoo sébél bés i Bétel.” Sôñ i bi tagbe, yak nwii mi tagbe, ba sébél bé bo. Janice a nkal le: “Hala a bi lôôha tééñga me. Me bé badba le, limbe jam libe me bi boñ inyu boñ le Yéhôva a unbene me. Me bi soohe nye inyu boñ le me gwel nson u. Inyuki a ntimbhe bé masoohe mem?”

3. Kii di ga tehe munu i yigil ini?

³ Ngim mangéda, di nla badba too Yéhôva a ñemble masoohe més. Yak bagwélél ba Yéhôva ba kôba ba bé badba hala. (Hiôb 30:20; Tjémbi 22:2; Habakuk 1:2) Kii i nla kwés we nkaa le Yéhôva a ga timbhe masoohe moñ? (Tjémbi 65:2) Inyu timbhe i mbadga ini, di wan le mambadga mana: (1) Kii di nla bémél Yéhôva? (2) Kii Yéhôva a mbémél bés? (3) Lelaa di nla lémés masoohe més?

KII DI NLA BÉMÉL YÉHÔVA?

4. Inoñnaga ni Yérémia 29:​12, kii Yéhôva a mbôn bés?

⁴ Yéhôva a mbôn le a ga emble masoohe més. (Añ Yérémia 29:12.) Nyambe a ngwés bagwélél bé, jon a ga emble masoohe map. (Tjémbi 10:17; 37:28) Ndi hala a nsômbôl bé kal le a ga ti bés i ni i di mbat nye. Inyu ngim mam ipe di mbat nye, di ga bem letee mbok yondo i lo inyu kôs mo.

5. Kii Yéhôva a mbéñge i ngéda a ñemble masoohe més? Toñol.

⁵ Ilole a ntimbhe masoohe més, Yéhôva a nhoñol bitééne gwé inyu hisi. (Yésaya 55:​8, 9) Jam jada mu bitééne bi, li yé le hisi hi ba nyonok ni bôlôm ni bôda ba ba ngwélél nye ni maséé. Ndi Satan a nkal le bôt ba binam ba ga ba maséé ibale bomede bon ba ñéga mabal map. (Bibôdle 3:​1-5) Inyu unda le i yom Satan a nkal i yé bitembee, Yéhôva a bi nwas le bôt ba binam ba éga bomede. Ndi énél i bôt ba binam i bi lona ndik mandutu di ntehe i len ini. (Ñañal 8:9) Hala a nhôla bés i nok le Yéhôva a ga mélés bé mandutu momasôna i len ini. Ibale a mboñ hala, ki bôt ba binam bape ba ga kal le énél i bôt ba binam i yé loñge inyule ba nla mélés mandutu map bomede.

6. Inyuki di nlama ba nkwoog nkaa le Yéhôva a ga boñ mam ni gwéha ni telep sép?

⁶ Bôt ba nla soohe inyu nlélém jam, ndi Yéhôva a timbhe bé bo nlélém. Kiki hihéga, Kiñe Hézékia a bi bana béba kon ngandak, a soohe Yéhôva le a mbuubaha nye. Inyu timbhe, Yéhôva a bi boñ le a mbôôp. (2 Bikiñe 20:​1-6) Ñôma Paul a bééna “loo ikété minsôn,” bebek i bé ngim kon. Yak nye a bi soohe Yéhôva le a boñ le i kon u u mal, ndi Yéhôva a bi boñ bé hala. (2 Korintô 12:​7-9) Di yoñ ki hihéga hi baôma iba bana, Yakôbô ni Pétrô. Bo iba ba bé bebee ni nyemb inyule Kiñe Hérôdé a bi gwel bo. Likoda li bi soohe inyu yap. Ndi Yakôbô a bi nôla ki le Pétrô a bi pei i nya i nhélhana. (Minson mi baôma 12:​1-11) Di nla badba inyuki Yéhôva a bi péyés Pétrô, ndi a péyés bé Yakôbô? Bibel i nkal bé bés inyuki.c Ndi di nla ba nkwoog nkaa le, manjel ma Yéhôva ma “téé sép.” (Ndiimba Mbén 32:4) Ni ki le Yéhôva a bé gwés Pétrô bona Yakôbô. (Masoola 21:14) Ngim mangéda i nla pam le Yéhôva a timbhe masoohe més i nya di bemek bé. Ndi kiki di yé nkwoog nkaa le Yéhôva a mboñ mam ni gwéha lôñni telepsép, di ga badba bé inyuki a mpohol i timbhe bés ni ini njel tole ii.​—Hiôb 33:13.

7. Kii di nlama keñgle, inyuki?

⁷ Di boñ biliya le di hégha bañ jam li mpémél bés ni jam li mpémél bôt bape. Kiki hihéga, u nla soohe Yéhôva le a hôla we inyu ngim jam i tôbôtôbô ndi a ntimbhe bé we. I mbus u nok le mut numpe a mboñ minlélém mi masoohe kiki we, ndi i nene le Yéhôva a ntimbhe masoohe mé. Hala a bi pémél sita yada le Anna. A bi soohe Yéhôva inyu boñ le nlô wé Matthew nu a bééna kon u pos a mbôôp. I nlélém ngéda miñunuk mi bisita biba, yak bo ba bééna kon u pos. Anna a bi soohe ngandak inyu nlô wé Matthew ni bini bi sita gwobiba. Bisita bi, bi bi mbôôp, ndi Matthew a bi wo. Anna a bi bôk ndugi a badba too bisita bini bi bi mbôôp inyule Yéhôva a bi hôla bo. Ndi ibale hala, inyuki a bi hôla bé nlô wé Matthew? Di nyi bé inyuki bisita biba bini bi bi mbôôp. Ndi i yom di nyi i yé le Yéhôva a ga mélés mandutu més momasôna, a tugul ki mawanda mé ma ma bi wo.​—Hiôb 14:15.

8. (a) Inoñnaga ni Yésaya 43:​2, lelaa Yéhôva a nhôla bés? (b) Lelaa Yéhôva a ntimbhe masoohe més i ngéda di mboma mandutu? (Béñge i vidéô ini le Masoohe ma nhôla bés i hônba mandutu.)

⁸ Yéhôva a ga waa bé hôla bés. Tata wés Nugwéha le Yéhôva a ngwés bé a ntehe bés di nok ndutu. (Yésaya 63:9) Ndi Yéhôva a nkéñ bé mandutu momasôna ma ma nkwél bés, ma di nla hégha ni balom tole lindômbôô li hié. (Añ Yésaya 43:2.) Ndi a mbôn bés le a ga hôla bés ‘i yap’ mandutu ma. A ga nwas bé le mandutu més ma tééñga bés i boga ni boga. Yéhôva a nti ki bés mbuu wé mpubi inyu boñ le di hônba mandutu ma nkwél bés. (Lukas 11:13; Filipi 4:13) Jon di nla ki ba nkwoog nkaa le hiki kel Yéhôva a ga ti bés i yom i mbéda bés inyu hônba mandutu més ni i ke ni bisu i gwélél nye.d

KII YÉHÔVA A MBÉMÉL BÉS?

9. Inoñnaga ni Yakôbô 1:​6, 7, inyuki di nlama bana botñem le Yéhôva a ga hôla bés?

⁹ Yéhôva a mbem le di bôdôl nye ñem. (Lôk Héber 11:6) Ngim mangéda, mandutu ma nla yuu bés kayéle di hoñol le di nla bé pamba. Di nla yak bôdôl badba too Yéhôva a ga hôla bés. Ndi Bibel i nkwés bés nkaa le ni ngui i Nyambe, di nla “pind lipénd.” (Tjémbi 18:29) Iloole di nwas le i nya pééna i i nañ i miñem nwés, di nla soohe Yéhôva ni ñem wés wonsôna, di bak nkwoog nkaa le a ga timbhe masoohe més.​—Añ Yakôbô 1:​6, 7.

10. Ti hihéga hi hi ñunda lelaa di nla boñ mam inoñnaga ni masoohe més.

¹⁰ Yéhôva a mbem le di boñ mam ma ma nkiha ni masoohe més. Kiki hihéga, mankéé wada a nla soohe Yéhôva le a hôla nye i bana kunde i homa wé bôlô kayéle a pam i ke i likoda li ndôn. Lelaa Yéhôva a yé le a timbhe masoohe ma? Yéhôva a nla ti i mankéé nu ñem ngui a gwé ngôñ inyu boma isañ wé bôlô. Nano nyemede nyen a nlama ke i tehe isañ wé bôlô inyu bat nye kunde. I nla pam le a boñ hala ngandak ngélé. I nla ki pam le a héñha dilo tjé di bôlô ni solôñ yé i bôlô ipe. Tole a yoñ dilo di noi, to ibale i mpam le ba kit nye nsaa.

11. Inyuki di nlama soohe ngandak ngélé inyu nduña yés?

¹¹ Yéhôva a mbem le di soohe hiki ngéda inyu nduña yés. (1 Tésalônika 5:17) Yésu a bi kal le ngim mangéda, di nlama bat ngandak ngélé inyu boñ le ba timbhe bés. (Lukas 11:9) Jon di waa bañ! Di soohe ni ñem wés wonsôna, di boñok hala ngandak ngélé. (Lukas 18:​1-7) I ngéda di nsoohe Yéhôva ngandak ngélé inyu nlélém jam, hala a ñunda nye le i jam li, li nlôôha ba bés nseñ. Di ñunda yak nye le di mbôdôl nye ñem le a nla hôla bés.

LELAA DI NLA LÉMÉS MASOOHE MÉS?

12. (a) Imbe mbadga di nlama badba inyu masoohe més, inyuki? (b) Lelaa di nla ba nkwoog nkaa le masoohe més ma nti Yéhôva lipém? (Béñge minkéñék mi matila le “Baa masoohe mem ma nti Yéhôva lipém?”)

¹² Ibale di yé ngi kôhna i yom di mbat mu masoohe més, di nlama badba mambadga maa mana: Pog, ‘Baa me nsoohe inyu mam ma kôli?’ Ngim mangéda, di yé di nhoñol le di nyi i mam ma yé loñge inyu yés. Ndi i nla pam le i mam di mbat ma tane toi bé bés nseñ. I nla ki pam le di bat Yéhôva mahôla inyu ngim ndutu, ndi mahoñol mé mu i jam li ma nlôôha malam iloo i yom bés di nhégda. I nla ki ba le i yom di mbat i nkiha bé ni nsômbôl i Yéhôva. (1 Yôhanes 5:14) Di yoñ le hihéga hi bagwal di mbôk di sima. Ba bi bat Yéhôva le a boñ le man wap a kee ni bisu i gwélél nye. Inyu yap masoohe map ma bé nseñ. Ndi, Yéhôva a nyégsa bé to mut i gwélél nye. A gwé ngôñ le hiki wada wés yak bon bés ba pohol ni bomede i gwélél nye. (Ndiimba Mbén 10:​12, 13; 30:​19, 20) Jon bagwal bana ba nla soohe Yéhôva le a hôla bo i tihba miñem mi bon bap kayéle ba pam i gwés nye ni yila mawanda mé.​—Bingéngén 22:6; Éfésô 6:4.

13. Inoñnaga ni Lôk Héber 4:​16, imbe ngéda Yéhôva a nhôla bés? Toñol.

¹³ Iba, di nlama ki badba le ‘baa nano nyen Yéhôva a nlama timbhe masoohe mem?’ Di nla hoñol le Yéhôva a nlama timbhe masoohe més kunda yada. Maliga ma yé le Yéhôva nyen a nyi loñge ngéda inyu hôla bés. (Añ Lôk Héber 4:16.) I ngéda di nkôhna bé i yom di mbat nye, di nlama bé hoñol le ndimbhe i Yéhôva i yé le ‘To.’ Ndi, ndimbhe i Yéhôva i nla ba le ‘To nano bé.’ Kiki hihéga, di hoñol njohok mankéé nu munlôm nu a nsoohe Yéhôva le a mélés kon wé. Ibale Yéhôva a mboñ manyaga inyu mélés kon wé, Satan a nla bôdôl kal le i mankéé nu a nke ni bisu i gwélél Yéhôva ndik inyule a nhôla nye i témbna mbôô wé. (Hiôb 1:​9-11; 2:4) Jam lipe li yé ki le, Yéhôva a gwé ntéak ngéda inyu mélés makon momasôna. (Yésaya 33:24; Masoola 21:​3, 4) Jon, kiki i ngéda i, i yé ngi kola, di nla bé bem le Yéhôva a boñ manyaga inyu mélés mandutu més. I mankéé nunu a nla ni soohe Yéhôva le a ti nye ngui ni nsañ inyu boñ le a pam i hônba kon wé ni le a kee ni bisu i gwélél nye.​—Tjémbi 29:11.

14. Kii hihéga hi Janice hi niiga bés?

¹⁴ Di hoñol hihéga hi Janice nu a bééna ngôñ i ke sal i Bétel. I mbus nwii mintan nyen a bi nok le Yéhôva a bi timbhe masoohe mé ni njel ipe. A nkal le: “Yéhôva a bi gwélél i ngéda i, inyu niiga me ngandak mam ni i hôla me i hol i pes mbuu. Me bééna ngôñ i kônde bôdôl nye ñem. Me bé lama ki nigil Bibel bañga bañga. I bé béda ki le me nok le, me nla ba maséé i gwélél nye to hee homa me yé.” I mbus ngéda, ba bi naña Janice bo nlôm i ke i nson u makiiña. I ngéda a hoñol i mam ma, Janice a nkal le: “Yéhôva a bi timbhe masoohe mem i nya me bemek bé. Hala a bi yoñ me ngandak ngéda inyu tehe lelaa a bé timbhe masoohe mem. Jon me nlôôha ti nye mayéga, inyule me bi pam i nôgda gwéha yé ni loñge yé ñem.”

15. Inyuki di nlama kônde mam mape mu masoohe més? (Béñge yak bititii.)

¹⁵ Aa, di nlama badba le, ‘baa jam lipe li yé le me nlama kônde mu masoohe mem?’ To hala kiki i yé nseñ i bat Yéhôva ngim mam ma tôbotôbô, di nla ki yi kii i yé sômbôl i Yéhôva i ngéda di nkônde mam mape mu masoohe ma. Di yoñ hihéga hi sita i i yé ngi biiba, i i bé sômbôl ke i suklu baañal ñañ nlam u Ane. A bééna ngôñ i boñ i suklu i, inyu ke i ti mahôla i het ngôñ i batéé likalô i bé ikeñi. Jon, to hala kiki a nke ni bisu i soohe inyu ke mu suklu i, a nla ki soohe Yéhôva le a hôla nye i yéñ manjel mape inyu kéñbaha nson wé. (Minson mi baôma 16:​9, 10) I mbus le a mal soohe hala, a nla bat ngwélél makiiña ibale likoda jada li li yé bo bebee li nla bana ngôñ ni basañal. Tole a nla tilna hikuu hi loñ inyu bat bo i het ngôñ i batéé likalô i yé.e

16. Di nla ba nkwoog nkaa ni kii?

¹⁶ Kiki di ntehe munu i yigil ini, di nla ba nkwoog nkaa le Yéhôva a ga timbhe masoohe més ni gwéha, ni i nya i téé sép. (Tjémbi 4:3; Yésaya 30:18) Ngim mangéda, di ga kôhna bé ndimbhe di bemek. Ndi Yéhôva a nyoñ ngéda i emble masoohe més. A ngwés bés ngandak. Kekikel a ga tjôô bé bés. (Tjémbi 9:10) Jon, kee ni bisu i “bôdôl nye ñem hiki ngéda, u yiblege nye ñem woñ,” ikété masoohe.​—Tjémbi 62:8.