July

Meinisin met Jesus a apasa me féri, kapachelong ekkewe manaman a fériir, a unusen áppirú ekiekin me meefien Seman we. (Joh. 14:9) Met sia tongeni káé seni ekkewe manaman Jesus a fériir? Jesus me Seman we ra unusen tongekich. Atun Jesus a nóm fénúfan, a pwári úkúkún an tongei aramas ren an áeá an tufichin féri manaman le álisiir lón ar kewe riáfféú. Lón eú atun, rúúemén mwán mi mesechun ra tingormaú ngeni an epwe álisiir. (Mat. 20:​30-34) Nengeni pwe Jesus a “fokun tongeer,” iwe mwirin a echikareretá. Ewe kapasen Krik mi afféúni ena kapas “fokun tongeer,” a wewe ngeni eú memmeefin tongei me weweiti meefien emén seni alóllóólun leutuch. Ena esin memmeef mi pwári tong, a pwal amwékútú Jesus le amwéngééni ekkewe mi echik me echikara emén mi úri rupun pwétúr. (Mat. 15:32; Mark. 1:41) Sia tongeni lúkúlúk pwe Jiowa, ewe Koten “ümöümöch o lukpwetete,” me Néún we, ra fókkun tongekich me ra meefi ekkewe weires sia kúkkúna. (Luk. 1:78; 1 Pet. 5:7) Ra fókkun mwétéresiti ewe atun repwe aúkatiw meinisin ekkewe osukosuk mi eriáfféwú aramas! w23.04 3 ¶4-5

Sia tongeni achocho úkúúkún ach tufich ach sisap álleani me aúseling ngeni ekkewe mettóch mi limengaw mi chéú lón án Setan ei ótót. Sia tongeni ouraló tupwuach ren ekiek mi limeliméch ren ach álleani me káé ewe Paipel. Ach fiffiti mwiich me ewe angangen afalafal epwe pwal tongeni túmúnú ekiekich. Jiowa a pwon pwe esap fókkun mut ngenikich ach sipwe kúna sóssót mi lap seni ach tufich. (1 Kor. 10:​12, 13) A lamot ngeni emén me emén kich ach sipwe alapaaló ach ikkiótek pwe sipwe akkamwéchú ach túppwél ngeni Jiowa lón ekkeei ránin lesópwólóón mi áweires. Jiowa a mochen ach sipwe ‘pwäri ngeni ach weires meinisin’ lón iótek. (Kölf. 62:8) Mwareiti Jiowa me kilisou ngeni ren meinisin met a féri. Tingorei an epwe fang ngonuk pwora lón ewe angangen afalafal. Tingorei an epwe álisuk le likiitú fán ekkewe osukosuk mi toruk me álisuk le ú ngeni sóssót. Kosap mut ngeni och mettóch are emén an epwe aúkatiw óm ikkiótek ngeni Jiowa iteitan. w23.05 7 ¶17-18

Pwata sia kan fiti mwich? Ewe akkaúchean popun, pwe sipwe mwareiti Jiowa. (Kölf. 26:12; 111:1) Sia pwal fiti ach kewe mwich pwe sipwe apéchékkúlafengenikich lón ekkeei fansoun mi áweires. (1 Tes. 5:11) Atun sia uwawu meefiach lón ach kewe mwich, sia féri iir me ruu ekkena mettóch. Nge a wor met a tongeni áweiresi ach sipwe uwawu meefiach. Eli sia niwokkus are eli sia fókkun mochen memmeef, nge fán ekkóch ewe chónemmwen ese kérikich atun sia eitietá péúch. Met a tongeni álisikich lón ekkena atun? Aposel Paulus a erá pwe a lamot ach sipwe nefótófót wóón ach “apéchékkúlafengenikich.” Atun sia mirititi pwe ekkewe ekkóch lón ewe mwich ra tongeni péchékkúletá ren pwal mwo nge ach ekis uwawu meefiach mi pwári ach lúkú, iwe sisap kon pireir le memmeef. Me inaamwo ika ewe chónemmwen ese kan kon kékkérikich, nge sia pwapwa pwe ekkewe ekkóch ra pwal tongeni uwawu meefier.—1 Pet. 3:8. w23.04 20 ¶1-3

A katowu eú pwóróus! Ekkewe chón Jus mi eoló lón Papilon ina epwe úkúúkún 70 ier ra tongeni liwiniti Israel, pwisin fénúer we. (Esr. 1:​2-4) Jiowa chék a tongeni féri ena. Pún ekkewe chón Papilon rese kan omusawu chókkewe ra liapeniir. (Ais. 14:​4, 17) Nge Papilon a fen kkuf, me ewe mineféén sounemenem a ereni ekkewe chón Jus pwe ra tongeni ló seni. Meinisin ekkewe chón Jus, nge ákkáeúin ekkewe mékúren famili repwe féri eú kefil, iká repwe ló seni Papilon are repwe chék nómwotiw. Ese mwáál, ese mecheres ena kefil. Eli chómmóng ra kon chinnap, ina popun epwe weires ngeniir ar repwe sáittam. Me pokiten lape ngeni ekkewe chón Jus ra uputiw lón Papilon, iwe ina chék ewe leeni ra sissilei. Me rer pwe Israel, ina chék fénúen semelaper kewe. Ekkóch ekkena chón Jus ra fókkun pisekisekiló me lón Papilon, iwe eli ra meefi pwe epwe weires ar repwe likitaaló nónnóméchúúr are ar kewe business ikena ie me ló nónnóm lón eú leeni rese sissilei. w23.05 14 ¶1-2

Án Kot we Kapas a pesengenikich ach sipwe sópweeló le ámááraatá ach likiitú, úméúméch, me tong. Lukas 21:19 a apasa: “Ren ämi likitü oupwe püsin amanauakemi.” Kolose 3:​12, Testament mi Fö a apasa: “Oupwe pwilitalong womi umoumouch.” Me 1 Tesalonika 4:​9, 10 a apasa: “Kot a fen aiti ngenikemi usun ämi oupwe echenifengenikemi lefilemi. . . . Iei mine pwiim kana, aia tüngormau ngenikemi, oupwe alapala ämi echenifengenikemi lefilemi.” Ekkena wokisin ra weneiti ekkewe Chón Kraist lóóm mi fen pwáári ar likiitú, úméúméch, me tong. Iwe nge, a lamot repwe sópweeló le ámááraatá ekkena napanap. A lamot sipwe pwal ina ussun. Ren óm kopwe kúna álillis, ppii ifa ussun ekkena Chón Kraist lóóm ra pwáári eú me eú ekkena napanap. Mwirin, kopwe ppii ifa ussun ka tongeni áppirúúr me ánneta pwe ka mmólnetá ngeni ewe riáfféú mi lapalap. Iwe, atun ewe riáfféú mi lapalap epwe poputá, ka fen silei ifa ussun kopwe likiitú me kopwe tipeppós le sópweeló óm likiitú. w23.07 3 ¶4, 8

Ese lifilifil iká kich mi kepit are kich ekkewe ‘ekoch sip,’ nge a lamot sipwe chék feffetál wóón ena “Al mi Pin.” Epwe álisikich ach sipwe chék feffel ngeni Jiowa lón ei fansoun me lón fansoun mwach, atun ewe Mwú epwe atoto watteen feiéch ngeni fénúfan. (Joh. 10:16) Seni ewe ier 1919, fite million mwán, fefin, me ekkewe naw ra towu seni Papilon mi Lapalap, ewe mwicheichen lamalam mi chofona wóón fénúfan, me poputá le fetál wóón ena al lón kapas áwewe. Jiowa a túmúnú an esap wor och minen eppet epwe eppeti án ekkewe chón Jus ló seni Papilon. (Ais. 57:14) Nge ifa ussun ren ewe “Al mi Pin” lón ei fansoun? Fitepúkú ier mwen ewe ier 1919, Jiowa a poputá le néúnéú ekkewe mwán mi fókkun súféliti le wáási ewe alen towu seni Papilon mi Lapalap. (Apépé ngeni Aisea 40:3.) Ekkena mwán ra féri ekkewe angang mi lamot pwe repwe álisi ekkewe mi letipwenechar le towu seni lamalam mi chofona me fiti néún Jiowa kewe aramas le fel ngeni I. w23.05 15-16 ¶8-9

Jiowa a mochen ach sipwe angang ngeni fán pwapwa me seni enletin mochenich. (2 Kor. 9:7) Iká ina, iwe itá sipwe chúen akkachocho ngeni ekkóch angang lón pekin ngún, inaamwo sise enletin mochen? Nengeni met aposel Paul a féri. A erá: “Üa fokun pöchökül ngeni inisi o anomu fän nemeniei.” (1 Kor. 9:​25-27) Paul a eriáni pwisin i le féri minne mi pwúng, inaamwo iká ese enletin mochen féri met Jiowa a apasa an epwe féri. Itá Jiowa a pwapwa ren án Paul angang ngeni? Ewer! Me a efeiéchú an achocho. (2 Tim. 4:​7, 8) Pwal ina chék ussun, Jiowa a pwapwa le kúna ach achocho le tikeri ekkóch angang lón pekin ngún, inaamwo sise enletin mochen. A pwapwa pokiten a silei pwe inaamwo iká sise kon sani ena angang sia féri, nge sia chúen féri pokiten sia tongei i. Jiowa epwe efeiéchú ach achocho, ussun an efeiéchú Paul. (Kölf. 126:5) Iwe, atun sia kúna án Jiowa efeiéchúkich, neman ina met epwe tongeni apéchékkúlaló ach mochen. w23.05 29 ¶9-10

Ewe aposel Paul a alélléfengeni chókkewe resap kúna manaw lón ránin Jiowa we ngeni ekkewe aramas mi méúr. Rese silei met a fiffis únúkkúr are feilóón ewe kulók. Ina popun, rese silei ineet a fis ekkewe mettóch mi aúchea me rese silei met repwe féri. Lape ngeni aramas lón ei fansoun, ra méúr lón pekin ngún. (Rom 11:8) Rese lúkú ekkewe esissil mi pwáári pwe sia nóm lón “ekewe ränin lesopolan,” me rese lúkú pwe ekiseló chék ewe riáfféú mi lapalap epwele fis. (2 Pet. 3:​3, 4) Iwe nge, sia mirititi pwe án Paipel pesei ngenikich ach sipwe nenneló, a fen kon lapóló aúchean rán me rán. (1 Tes. 5:6) Ina minne, sipwe chék kikkinamwe me núkúchar. Pwata? A lamot ena pwe site angolong lón mwékútúkútún politics are mwékútúkútún ei fénúfan. Epwe lapóló án aramas etipetipakich lón ekkena mettóch atun a kakkanoto ránin Jiowa we. Iwe nge, ese pwal lamot ach sipwe aúreki met sipwe féri. Án Kot we ngún mi fel a tongeni álisikich le eáni ekiek mi kinamwe me eáni kefil mi múrinné.—Luk. 12:​11, 12. w23.06 10 ¶6-7

Met ka ekieki atun ka rong ewe it Samison? Ese mwáál kopwe ekieki emén mwán mi fókkun péchékkúl. Mi pwúng ena. Nge Samison a féri eú kefil mi ngaw mi atoto ngeni watteen feiengaw. Ikáámwo ina, nge Jiowa a nefótófót wóón meinisin met Samison a fen féri lón an angang ngeni. Me a apachaalong lón ewe Paipel pwóróusen án Samison leenien áppirú mi múrinné ussun an túppwél pwe sipwe káé seni. Jiowa a néúnéú Samison le féri ekkóch mettóch mi amwarar ren an epwe álisi néún kewe aramas ekkewe chón Israel. Fitepúkú ier mwirin málóón Samison, Jiowa a emmweni aposel Paul le apachaalong iten Samison lein iten ekkewe aramas mi watte ar lúkú. (Ipru 11:​32-34) Pwóróusen Samison a tongeni apéchékkúlakich. A lúkúlúk wóón Jiowa pwal mwo nge lón fansoun weires. Sia tongeni káé seni Samison me ifa ussun an leenien áppirú a tongeni apéchékkúlakich. w23.09 2 ¶1-2

Sia tongeni alapaaló ach likiitú ren ach ikkiótek ngeni Jiowa iteitan me ereni meinisin ach kewe aúrek. (1 Tes. 5:17) Eli lón ei fansoun ese toruk eú watteen sóssót. Ikáámwo ina, nge en mi kan tittingorei Jiowa an emmwen atun ka letipengaw, osukosuk, are atun kese silei met kopwe féri? Iká ka kan tittingorei Kot an álillis iteitan lón óm kewe osukosuk mi kisikis rán me rán, iwe epwe mecheres ngonuk óm kopwe féri ena atun epwe toruk watteen weires. Kopwe lúkúlúk pwe i a wesewesen silei ineet epwe álisuk me ifa ussun epwe álisuk. (Kölf. 27:​1, 3) Iká sia akkamwéchú ach túppwél ngeni Jiowa lón ei fansoun, ese wor tipemwárámwár pwe sipwe pwal likiitú atun ewe riáfféú mi lapalap epwe war. (Rom 5:3) Pwata sia tongeni apasa ena? Chómmóng me lein chienach kewe ra erá pwe iteiten eú me eú ekkewe sóssót ra likiitú fan, a álisiir le likiitú fán ewe sóssót mi toriir mwirin. Likiitú a émúrinnéreló me apéchékkúla ar lúkú pwe Jiowa a mmólnetá me mochen álisiir. Pokiten ra lúkú Jiowa, ra tongeni likiitú fán ewe sóssót epwe toriir.—Jas. 1:​2-4. w23.07 3 ¶7-8

Án Jiowa tipetekison me tong a amwékútú an epwe tipemecheres. Áwewe chék, a pwá án Jiowa tipetekison ewe atun epwele nieló ekkewe aramas mi ngaw lón Sotom. Jiowa a néúnéú néún kewe chónláng le ereni Lot an epwe sú ngeni ewe leeni mi chukuchukutá. Nge Lot a niwokkus le ló ngeni ikena. Ina minne, a tingormaw ngeni Jiowa an epwe mut ngeni me an we famili ar repwe chék sú ngeni Soar, eú kúkkún sóópw Jiowa epwe pwal ataieló. Jiowa a tongeni chék péchéú le ereni Lot an epwe fiti met ewe a ereni an epwe féri. Iwe nge, Jiowa a mut ngeni Lot an epwe ló ngeni Soar, me ese ataieló ena kúkkún sóópw. (Ken. 19:​18-22) Fitepúkú ier mwirin, Jiowa a pwáári tong ngeni aramasen Ninifa. Ina minne, a tiinaaló ewe soufós Sona an epwe esilei ngeniir katalóón ena telinimw me ninilóón ekkewe aramas lón mi fókkun ngaw. Nge atun ekkewe chón Ninifa ra áier, Jiowa a tongeer me ese ataieló ena telinimw.—Sona 3:​1, 10; 4:​10, 11. w23.07 21 ¶5

Met sia tongeni káé seni pwóróusen Joas? Joas a ussun efóch irá ese alóllóóletiw waaran, a chék lóngólóng wóón efóch émwúch mi úreni. Mwirin málóón Jehoiata ewe mi wisen álisi, me atun a poputá le aúseling ngeni ekkewe chón rikiló, iwe ese chúen túppwél ngeni Jiowa. Ei pwóróus a áiti ngenikich pwe ach álleasochisi Kot, esap chék lóngólóng wóón án chienach kewe Chón Kraist leenien áppirú, kapachelong chón ach famili. Ren ach sipwe ririéch ngeni Jiowa, a lamot sipwe apéchékkúla ach tong ngeni me súféliti ren ach kákkáé iteitan, ekilon, me iótek. (Jer. 17:​7, 8; Kol. 2:​6, 7) Jiowa ese menei senikich ach sipwe féri watteen mettóch fán itan. Minne a mochen ach sipwe féri, iei a mak lón Än Salomon Afalafal 12:​13, a apasa: “Oupwe niueiti Kot o alesochisi an kewe allük, pun iei a fichiti aramas meinisin.” Iká sia niwokkusiti Kot, sia tongeni akkamwéchú ach túppwél ngeni I ese lifilifil met epwe fis ngenikich lón mwachkkan. Iwe, esap fókkun wor met epwe atai ach riri ngeni Jiowa. w23.06 19 ¶17-19

Wokisin 5 a poputá ren ekkeei kapas: “Ewe Emén mi móót wóón ewe leenien móótun king a apasa.” (Pwár. 21:5a) Ekkena kapas ra mmen aúchea pwe ina chék eú me lein ekkewe úlúngát atun lón puken Pwärätä Jiowa a pwisin fós. Ina popun, pwisin Jiowa a alúkúlúkúkich, esap emén chónláng mi manaman, esap pwal mwo nge Jises ewe mi manawsefál! Ena pwóróus a ánnetatá pwe sia tongeni lúkúlúkú met a apasa mwirin. Pwata? Pún Jiowa “esap chofona.” (Tit. 1:2) Ina popun, minne sia álleani lón Pwärätä 21:​5, 6 epwe fókkun pwénútá. Mwirin, Jiowa a apasa: “Nengeni.” Fán chómmóng, ewe puken Pwärätä a fen néúnéú ena kapasen Krik mi afféú ngeni “nengeni.” Iwe met Kot a apasa mwirin? A erá: “Ngang úa aséfésefáli mettóch meinisin.” Pwúngún pwe Jiowa a fósun ekkewe siwil repwe fis lón mwachkkan, nge me ren, a fókkun alúkúlúk ei pwon pwe a fósun pwe ussun itá nge ra fen fiffis.—Ais. 46:10. w23.11 3-4 ¶7-8

Ewe aposel Piter a meefi weires ren an kewe apwangapwang. Ikkeei fitu me leir. Lupwen Jises a áweweei ifa ussun epwe kúna riáfféú me máló pwe ina pwénútáán ekkewe oesini lón Paipel, Piter a ereni pwe esap fókkun fis ngeni ena. (Mark. 8:​31-33) Fán fite, Piter me ekkewe pwal ekkóch aposel ra kan ánini ussun ié a lap seniir meinisin. (Mark. 9:​33, 34) Lón ewe pwinin me mwen án Jises epwele máló, Piter a chék mwittir pékúoló eféú selingen emén mwán. (Joh. 18:10) Lón pwal ena chék pwinin, Piter a fókkun niwokkus me fán úlúngát a amam Jises ren an apasa pwe ese sissilei. (Mark. 14:​66-72) Ina met a efisi an epwe kechiw pokiten a fókkun letipechou. Jises ese fangetá wóón néún na aposel mi fókkun letipechou. Mwirin án Jises manawsefál, a suuki ngeni Piter alen an epwe pwáári pwe a chúen tongei i. A etiwa Piter an epwe masa néún kewe siip fán tipetekison. (Joh. 21:​15-17) Piter a tipemecheres le etiwa ena wis. A nóm Jerusalem lón ewe ránin Pentikos me i emén me lein chókkewe mi akkomw kepit ren ewe ngún mi fel. w23.09 21-22 ¶6-7

Ewe aposel Piter a pesei chienan kewe mwán mi ásimaw ar repwe túmúnú néún Kot mwichen siip. (1 Pet. 5:​1-4) Iká en emén mwán mi ásimaw, áúa silei pwe ka tongei chienom kewe Chón Kraist me ka mochen túmúnúúr. Iwe nge, fán ekkóch eli ka meefi pwe ka tawengaw are fókkun mélúlú ina popun kese tongeni apwénúetá ena wis. Met ka tongeni féri? Iinaawu ngeni Jiowa met ka aúreki. Piter a makkeei: “Are eman a alisi aramas, epwe alilis lon ükükün an pöchökül Kot a ngeni.” (1 Pet. 4:11) Eli chienom kewe Chón Kraist ra pwal kúna ewe esin weires ese fókkun tongeni pwák lón ei ótót. Nge chemeni pwe Jises Kraist, “ewe Meilapen Chonmas,” a tongeni álisiir lap seni met ka tongeni féri. I a tongeni álisiir lón ei fansoun me pwal lón ewe fénúfan séfé. Kot a ereni ekkewe mwán mi ásimaw ar repwe tongei chiener kewe Chón Kraist, túmúnúúr, me isettiw “eu lenien apirü” ngeniir. w23.09 30 ¶13-14

A lamot sipwe túmúnú ach sisap eáni ekiekin chókkewe mi tunaaló án Jiowa allúk. Iká sia poputá le eáni ekiekin aramas, eli sipwe pwal poputá le tunaaló Jiowa me an kewe allúk. (1 Kor. 3:19) Tipáchemen ei fénúfan, lape ngeni a etipetipa aramas ar repwe álleasolapa Kot. Ekkóch ekkewe Chón Kraist lón Perkamom me Taiataira ra pwal tipetipeló ren ekkewe aramas lón leenier we, iir kewe mi eáni manaw mi limengaw me fel ngeni uluulun. Jises a tiinaaló kapasen fén mi chou ngeni iir me ruu ekkena mwichefel pokiten ra chék fitaaló aramas lón ar féfférún lisowumwáál. (Pwär. 2:​14, 20) Lón ei fansoun, ekkewe aramas sia nóm rer, ra tongeni etipetipakich ach sipwe etiwa ekiek ese pwúng. Chón ach famili me chienach kewe ra tongeni erenikich pwe sia kon tichik me sia tongeni atai án Jiowa allúk. Áwewe chék, ra tongeni apasa pwe ese pwal lamot ach sipwe amwéchú liméchún manawach, me án Paipel kewe allúk ussun liméchún manawach, ra fen minen lóóm. Fán ekkóch, eli sia ekieki pwe ekkewe kapasen emmwen Jiowa a ngenikich, ese kon fataffatéch. Eli sia pwal mwo nge tipetipeló le féri met mi “luló seni ekkewe mettóch mi makketiw.”—1 Kor. 4:​6, NW. w23.07 16 ¶10-11

A lamot ngeni Meri inen Jises we péchékkúl. Epwe pwopwo inaamwo iká ese wor pwúlúwan. Esaamwo silei ifa ussun epwe ámááraatá emén semirit, nge iei epwele túmúnú ewe át epwe wiliiti ewe Messaia. Me pokiten Meri esaamwo féri féfférún lisowu, ifa ussun epwe áweweei ngeni kófótun we Josef pwe a pwopwo? (Luk. 1:​26-33) Ifa ussun Meri a angei péchékkúl? A kútta álillis seni ekkewe ekkóch. Áwewe chék, a ereni Kapriel an epwe áiti ngeni pwal ekkóch pwóróus ussun ewe wis epwele wiseni. (Luk. 1:34) Mwirin fitu rán, a ló “ngeni eu telinimw won chukuchukutan” Juta pwe epwe chuuri aramasan we itan Elisapet. Elisapet a apúnga Meri me án Jiowa manaman a emmweni an epwe eáni eú oesini mi apéchékkúl ussun ewe át Meri epwele néúnatiw. (Luk. 1:​39-45) Meri a erá pwe Jiowa a pwáári an manaman. (Luk. 1:​46-51) Jiowa a néúnéú Kapriel me Elisapet le apéchékkúla Meri. w23.10 14-15 ¶10-12

Mi chék kaúk chóchóón néún Kraist kewe chón káé mi kepit ren ewe ngún mi fel, me eáni eú riri ngeni Jiowa mi kkóló aúchean. Ekkena 144,000 repwe eti Jises lón ewe wis souasor lón láng. (Pwär. 14:1) Ewe Leeni mi Pin lón ewe imwenfel mangaku, a liosuetá ar mumu pwe repwe néún Kot lón pekin ngún atun ra chúen nóm wóón fénúfan. (Rom 8:​15-17) Ewe Leeni mi Unusen Pin lón ewe imwenfel mangaku a liosuetá láng, ikewe ie Jiowa a nónnóm ie. Ewe kaaten mi refifesenni ewe Leeni mi Pin me ewe Leeni mi Unusen Pin, a liosuetá inisin Jises, inisin futuk. Atun a chúen inisini ena inisin futuk, i ese tongeni tolong lón láng an epwe Souasor mi Lap lón ewe imwenfel lón pekin lúkú. Ren an fangoló inisin pwe epwe eú asor fán iten aramas, a suuki ngeni meinisin Chón Kraist mi kepit ar repwe eáni manaw lón láng. Iwe, a pwal lamot ar repwe fangoló inisiir inisin futuk pwe repwe manaw lón láng.—Ipru 10:​19, 20; 1 Kor. 15:50. w23.10 28 ¶13

Kition a silei an kewe apwangapwang, iwe fán mosonoson a pélúweni ekkewe chón Efraim mi esiita i. (Souk. 8:​1-3) Ese pélúweniir fán song. A pwáári pwe i mi tipetekison ren an aúseling ngeni ar ngúnúngúnúngaw, me pwal ren an fós ngeniir fán mosonoson. Iwe, ina met a efisi ar resap chúen song. Ekkewe mwán mi ásimaw mi mirit, ra áppirú Kition ren ar aúselingéch me mosonoson le pélúweni chókkewe mi esiiter. (Jas. 3:13) Ar féri ena a álisaatá kinamween ewe mwichefel. Atun ekkewe ekkóch ra mwareiti Kition ren an okkufu ekkewe chón Mitian, i a chék ngeni Jiowa ewe ling. (Souk. 8:​22, 23) Ifa ussun ekkewe mi wor wiser lón mwichefel ra tongeni áppirú Kition? Repwe elingaaló Jiowa ren minne ra féri lón wiser kewe. (1 Kor. 4:​6, 7) Áwewe chék, iká emén a apúnga emén mwán mi ásimaw ren lipwákéchún le asukul, a tongeni apasa pwe minne a eáni káit a feito seni án Kot we Kapas, me kich meinisin sia káé seni án Jiowa we mwicheich. Ekkewe mwán mi ásimaw ra tongeni ekieki iká ra elingaaló Jiowa lón napanapen ar asukul, are iká ra chék mochen einga aramas. w23.06 4 ¶7-8

Iká ese fis met sia ióteki, eli sipwe eisini pwisinkich, ‘Mi pwúng met ewe úa ióteki?’ Fán chómmóng sia kan ekieki pwe sia silei met epwe fókkun échitikich. Nge eli ewe mettóch sia tingor esap ina ewe epwe kon álisikich. Iká sia tingorei Jiowa an epwe féri eú mettóch sia ekieki pwe epwe ataweei ach osukosuk, nge eli met ena sia ekieki, esap ina met epwe wesewesen ataweei ach na osukosuk. Me eli ekkóch mettóch sia tingor rese tipeeú ngeni letipen Jiowa. (1 Joh. 5:14) Áwewe chék ren pwóróusen ekkewe sam me in ra tingorei Jiowa an epwe álisi néúr we pwe epwe chék nónnóm lón ewe enlet. Ussun mi fich ena tingor. Iwe nge, Jiowa ese tongeni eriánikich ach sipwe angang ngeni. A mochen pwe oukich meinisin, kapachelong ekkewe naw, ach sipwe pwisin filaatá le fel ngeni. (Tut. 10:​12, 13; 30:​19, 20) Ina minne ekkewe sam me in ra tongeni tingorei Jiowa an epwe álisiir le achchúngú letipen néúr we pwe epwe tongei me wiliiti chiechian.—SalF. 22:6; Ef. 6:4. w23.11 21 ¶5; 23 ¶12

Pwata ach oururu pwiich kewe a mmen aúchea lón ach pwáári pwe sia tongeer? Me ren eú puken áweween Paipel, ewe kapas “ourur” Paul a néúnéú a wewe ngeni “án emén úkkúútá únúkkún emén pwe epwe apéchékkúla atun a nóm fán watteen riáfféú.” Ina popun, atun sia oururu emén pwiich mi riáfféú, sia álisi an epwe sópweeló le angang ngeni Jiowa fán túppwél. Me iteiten sia oururu, sia pwáári pwe sia tongei. (2 Kor. 7:​6, 7, 13) Ach tongei me weweiti meefien aramas a riri ngeni ach oururuur. Ifa ussun? Emén mi tongei aramas me weweiti meefian epwe mochen oururu me ekisikisaaló an weires. Ina popun iká sia tongei me weweiti meefien emén, epwe amwékútúkich ach sipwe oururu. Paul a áweweei pwe án Jiowa tongei aramas me weweiti meefier a amwékútú le oururuur. A erá pwe Jiowa i “ewe Sam mi eäni tong me ewe Kot mi echipakich lon mettoch meinisin.”—2 Kor. 1:3. w23.11 9-10 ¶8-10

Meinisin chón tapweló mwirin Kraist repwe kúna riáfféú. Áwewe chék ren pwóróusen Paul. A ereni chókkewe lón Tesalonika: “Lupwen aia chüen nom remi, aia ürenikemi me mwen an esamwo fis, pwe sipwe tolong lon riaföü. Iwe, ei a wesewesen fis.” (1 Tes. 3:4) Me a makke ngeni chókkewe lón Korint ei: “Ämi pwii kana, aia mochen achema ngenikemi usun ekewe riaföü mi torikem . . . Aia apilükingau ngeni äm aipwe chüen manau.” (2 Kor. 1:8; 11:​23-27) Ekkewe Chón Kraist lón ei fansoun repwe pwal kúna riáfféú. (2 Tim. 3:12) Atun ka lúkú Jises me tapweló mwirin eli chiechiom kewe me aramasom ra kirikiringaw ngonuk. Are eli noum boss are chiechiom kewe chón angang ra eriáfféwuk pokiten ka wenechar? (Ipru 13:18) Ewe mwú lón leeniom a oputok pokiten ka afalafala ussun óm we ápilúkúlúk? Ese lifilifil ewe sókkun riáfféú eli sipwe kúna, nge Paul a erá pwe sipwe pwapwa. w23.12 10-11 ¶9-10

Jakop a likiitú fán chómmóng osukosuk. Rúúemén me lein néún Jakop kewe, Simeon me Lefi, ra atoto itengaw ngeni ar we famili me pwal ngeni iten Jiowa. Pwal och, Rahel, pwúlúwen Jakop we mi áchengicheng, a máló atun a néúnatiw néúr we arúúeménún. Me pokiten a fókkun watte ewe lengita, Jakop a osenimu le mwékút ngeni Isip lón an ierin chinnap. (Ken. 35:​16-19; 37:28; 45:​9-11, 28) Inaamwo ika a fis ngeni Jakop ekkena osukosuk, nge ese fókkun úkútiw lón an lúkú Jiowa me an kewe pwon. Iwe, Jiowa a pwár ngeni pwe a nóm ren an chen. Áwewe chék, Jiowa a awéúéchúóló. Pwal ekieki úkúkún kilisoun Jakop ngeni Jiowa atun a kúnasefáli Josef, néún we a ekieki pwe a fen máló ren fite fite ier! Án Jakop ririéch ngeni Jiowa a atufichi le sópwéch lón an likiitú fán an kewe weires. (Ken. 30:43; 32:​9, 10; 46:​28-30) Atun sia akkamwéchú ach ririéch ngeni Jiowa, sipwe pwal sópwéch le likiitú fán ach kewe osukosuk mi weiweitá. w23.04 15 ¶6-7

Kölfel 23, ina eché kél mi fós ussun án Tafit lúkúlúkú án Jiowa tong me túmún. Tafit a áweweei ussun ewe riri mi péchékkúl lefiler me Jiowa, ewe mi eita ngeni Chón Mmasen Siip. Tafit a meefi núkúnúkéch ren an mut ngeni Jiowa an epwe emmweni me unusen onómu an lúkúlúk wóón i. Tafit a silei pwe iteiten rán, Jiowa epwe pwáppwári ngeni an tong lón unusen manawan. Pwata a fókkun lúkú ena? Tafit a meefi túmún pokiten Jiowa a chék akkawora meinisin met an osupwang. Tafit a pwal silei pwe Jiowa i chiechian me Jiowa a pwapwa ren. Ina popun a lúkúlúk pwe ese lifilifil met epwe fis ngeni lón fansoun mwan, nge Jiowa epwe chék sópweeló le awora meinisin met a osupwangan. Pokiten Tafit a lúkúlúk pwe Jiowa a tongei me epwe túmúnú, a álisi an esap lólilen nge epwe chék pwapwa me menemenéch.—Kölf. 16:11. w24.01 28-29 ¶12-13

Seni ewe Oruuen Maunen Fénúfan, a suuk ngeni néún Jiowa kewe aramas ar repwe afalafal lón chómmóng fénú nge ese wor pinepinan. Ren enletin, a fókkun sópwéch ena angang. Lón ei fansoun, chón ewe Mwichen Soupwúngúpwúng ra sópweeló le kútta emmwen seni Kraist. Ra mochen pwe ewe emmwen ra awora ngeni chón ewe mwichefel epwe tipeeú ngeni meefien Jiowa. Me ra néúnéú ekkewe chónemmwen mi wisen sáifetál me ekkewe mwán mi ásimaw le awora emmwen ngeni ekkewe mwichefel. Ekkewe mwán mi ásimaw mi kepit ra nóm lón “péúmwáánin péún” Kraist. (Pwár. 2:1) Pwúngún, ekkewe mwán mi ásimaw meinisin rese unuséch me ra kan mwámmwáálliló. Moses me Josua ra pwal mwámmwáálliló fán ekkóch, ussun chék ekkewe aposel. (Num. 20:12; Jos. 9:​14, 15; Rom 3:23) Nge sia tongeni fókkun kúna pwe Jises a emmweniéchú ewe chón angang mi túppwél me ekkewe mwán mi ásimaw mi kefilitá, me epwe sópweeló le féri ena. Ina minne, a wor chómmóng popun pwata sipwe lúkú ewe emmwen mi kawor seni chókkewe mi filitá le emmwenikich. w24.02 23-24 ¶13-14

Lón ei fansoun, sia tongeni apwapwaai Jiowa ren ach fóffós ussun i lón ewe napanap mi pwáári úkúúkún ach kilisou ngeni me tongei i. Atun sia fiti afalafal, sipwe chemeni pwe sia achocho le álisi aramas ar repwe riri ngeni Jiowa me meefi met sia pwal meefi ussun Semach na mi tong. (Jem. 4:8) Sia pwapwa le áiti ngeni aramas ussun met Paipel a apasa ussun i, ifa ussun a pwáraaló an tong, pwúng, tipáchem, manaman, me pwal ekkóch napanapan kewe mi aúchea. Sia pwal mwareiti Jiowa me apwapwaai i ren ach achocho le áppirú i. Atun sia féri ena, ekkóch repwe esilla pwe sia sókkóló seni chón lón ei fénúfan mi ngaw, me eli repwe ekieki iká pwata sia sókkóló. (Mat. 5:​14-16) Atun sia fós ngeniir are chuuriir, sia tongeni áwewe ngeniir pwata sia ina ussun. Mwirilóón, chókkewe mi letipwenechar repwe mochen ririéch ngeni ach na Kot. Atun sia mwareiti Jiowa lón ekkena esin napanap, sia apwapwaai letipan.—1 Tim. 2:​3, 4. w24.02 10 ¶7

Ren óm kopwe wiliiti emén Chón Kraist mwán mi ásimaw, a lamot kopwe ámááraatá ekkewe tufich epwe tongeni álisuk iteiten rán. Óm féri ena epwe álisuk le etiwa ekkewe wis lón ewe mwichefel, óm kopwe kúnékún óm angang pwe kopwe atufichuk are óm famili, me kopwe ririéch ngeni aramas. Áwewe chék, káé óm kopwe angéch le mak me állea. Ewe Paipel a erá emén mwán mi pwapwa me sópwéch a kan awora fansoun iteiten rán le ákkálleani án Kot we Kapas me ekilonei. (Kölf. 1:​1-3) An ákkálleani ewe Paipel iteitan rán, epwe álisi le silefichi án Jiowa ekiek, pwe epwe tongeni ekiekéch me apwénúetáéchú masouan. (SalF. 1:​3, 4) A lamot ngeni pwiich kewe álillis seni ekkewe mwán mi tongeni asukula me awora kapasen fén seni ewe Paipel. Iká ka angéch le állea me mak, iwe ka tongeni ammólnatá ekkewe sókkun afalafal me memmeef a tongeni álisi me apéchékkúla pwiich kewe. Ka pwal tongeni makkeetiw ekkewe pwóróus mi aúchea epwe álisuk le apéchékkúlaló óm lúkú me ekkewe ekkóch. w23.12 26-27 ¶9-11

Atun ka meefi niwokkus, ekilonei met Jiowa epwe féri lón mwachkkan atun Setan ese chúen nóm. Lón eú pwoomw lón ewe 2014 mwichelap, emén sam a pwóróus ngeni chón an we famili ussun 2 Timoty 3:​1-5 iká a oesini met epwe fis lón ewe Paratis: “Lón ewe ótót séfé epwe war ewe fansoun mi fókkun apwapwa. Pún aramas repwe tongei aramas, aúcheani pwóróus mi enlet, tipetekison, chón mwareiti Kot, álleasochis semer me iner, sile kilisou, túppwél, tongei chón ar famili, tipemecheres, fóséch ussun ekkewe ekkóch fansoun meinisin, nemeni pwisin mocheniir, mosonoson, sani minne mi múrinné, repwe chón alúkúlúk, rongosich, tekisosson, repwe tongei Kot nge resap aúcheani pwapwaan letiper, repwe manaweni eú manaw mi fich ngeni Kot; iwe kopwe chiechiéch ngeni ekkeei sókkun aramas.” Ka kan pwóppwóróus ngeni chón óm famili are chiechiom kewe chón lúkú epwe ifa ussun manaw lón ewe ótót séfé? w24.01 6 ¶13-14

A ifa me pwapwaach le silei pwe Jiowa a tongei meinisin néún kewe aramas! Ewe Paipel a erá: “Ewe Samol mi Lapalap a pwapwaäsini nöün aramas.” (Kölf. 149:4) Iwe nge, a wor atun ekkóch repwe fókkun lichippúng me ekieki, ‘Jiowa mi fen pwapwa rei?’ A pwal wor fitemén lón ewe Paipel iir mi túppwél ngeni Jiowa nge ra fiffiu ngeni ena esin memmeef. (1 Sam. 1:​6-10; Hiop 29:​2, 4; Kölf. 51:11) Ewe Paipel a affata pwe Jiowa a tongeni pwapwa ren chókkewe rese unuséch. Ifa ussun? A lamot sipwe anganga ach lúkú lón Jises Kraist me papatais. (Jon 3:16) Ach féri ena, sia pwáári ngeni ekkewe ekkóch pwe sia áier seni ach kewe tipis me sia pwon ngeni Kot pwe sipwe féri letipan. (Féf. 2:38; 3:19) Jiowa a fókkun pwapwa rech atun sia féri ekkena mettóch pwe sipwe tongeni chiechiéch ngeni. Iká sia achocho úkúúkún ach tufich le apwénúetá ach pwon le angang ngeni, iwe Jiowa epwe pwapwa rech me sipwe chiechian.—Kölf. 25:14. w24.03 26 ¶1-2

Sia pwal tongeni áppirú ekkewe chón káé ren ach sópweeló le afalafal pwal mwo nge atun ekkewe néúwisin mwú ra allúkú ngenikich ach sipwe úkútiw le afalafal. Sia pwal tongeni lúkúlúk pwe Jiowa epwe álisikich le apwénúetá ach angangen afalafal. Sipwe tingorei Jiowa an epwe fang ngenikich pwora me tipáchem, me sipwe pwal tingorei an epwe álisikich le likiitú fán ekkewe osukosuk mi torikich. Chómmóng me leich sia kan weires pokiten apwangapwangen inisich are meefiach, málóón attongeach, osukosuk lón famili, riáfféúmwáál, are pwal ekkóch osukosuk. A fen lapóló áweiresin ekkena osukosuk ren ewe pandemic me ekkewe maun mi fiffis. Kopwe iinaawu ngeni Jiowa masouen letipom. Ereni nónnómum ussun chék óm kopwe apwóróusa ngeni emén chiechiom ka pacheéch ngeni. Kopwe lúkúlúk pwe Jiowa “epwe alisuk.” (Kölf. 37:​3, 5) Ach likiitú le ikkiótek epwe álisikich le ‘mosonotam lon ach riaföü.’ (Rom 12:12) Jiowa a silei pwe chókkewe mi fel ngeni ra lillikiitú fán ar kewe osukosuk me “a rong ar siö.”—Kölf. 145:​18, 19. w23.05 5-6 ¶12-15

Atun sipwe eáni eú kefil mi chou a lamot ach sipwe weweiti “minne letipen Jiowa,” iwe mwirin apwénúetá. (Efi. 5:17) Atun sia kúna án Paipel kewe kapasen emmwen mi kon weneitikich, ren enletin sia kan kúkkútta án Kot ekiek wóón ach we kefil. Iwe atun sia apwénúetá an kewe kapasen emmwen, sipwe tongeni eáni kefil mi múrinné. Setan “ewe mi ngaw,” ewe mi oputakich a mochen erikikicheló ren ekkewe chómmóngun mettóch lón ei fénúfan pwe esap wor ach fansoun fán iten Kot. (1 Jon 5:19) Emén Chón Kraist a tongeni poputá le nefótófót wóón moni, sukul, are angang nge esap wóón ekkewe mettóch a tongeni féri lón an angang ngeni Jiowa. Iká a fis ena, a ffat pwe a tupuló ren ekiekin ei fénúfan. Pwúngún pwe ese wor ngawen ekkena mettóch, nge sisap fókkun akkomwer lón manawach. w24.03 24 ¶16-17