Juillet

Nǔ e Jezu nɔ ɖɔ lɛ́ é kpó nǔ e é nɔ wa lɛ́ é kpó bǐ, káká jɛ nǔjíwǔ ɖěɖěe é bló lɛ́ é jí ɖe linlin e Tɔ́ tɔn nɔ ɖó é xlɛ́, bo lɛ́ ɖe lěe nǔ nɔ cí n’i é xlɛ́ bɔ nǔ bǐ nɔ vɔ ɖ’é wú. (Jaan 14:9) Étɛ́ nǔjíwǔ e Jezu bló lɛ́ é ka sixú kplɔ́n mǐ? Jezu kpó Tɔ́ tɔn kpó yí wǎn nú mǐ tawun. Hwenu e Jezu ɖo ayǐkúngban jí é ɔ, é xlɛ́ ɖɔ émí yí wǎn nú gbɛtɔ́ lɛ́ tawun, gbɔn hlɔ̌nhlɔ́n e é nɔ zán dó bló nǔjíwǔ ná é zínzán dó d’alɔ yě gblamɛ. Ðo ninɔmɛ ɖé mɛ ɔ, nukúntɔ́nnɔ we byɔ́ Jezu ɖɔ é ní d’alɔ émí. (Mat. 20:30-34) Ð’ayi wú ɖɔ “nǔ yětɔn blá wǔ nú Jezu,” bɔ énɛ́ gúdo ɔ, é gbɔ azɔn nú yě. Xógbe Glɛ̌kigbe tɔn e è tínmɛ bɔ é nyí “nǔ yětɔn blá wǔ nú” é nɔ dó gesí wǔvɛ́ syɛ́nsyɛ́n e mɛɖé nɔ se xá mɛ ɖo agbaza mɛ é. Wǔvɛ́ syɛ́nsyɛ́n énɛ́ e Jezu se xá mɛ é ɔ, xlɛ̌ wǎnyíyí tɔn ɖé wɛ, bɔ énɛ́ wɛ lɛ́ sísɛ́ ɛ bɔ é ná nǔɖuɖu mɛ e xovɛ́ sin lɛ́ é, bo lɛ́ gbɔ azɔn nú gudunɔ ɖokpó. (Mat. 15:32; Mak. 1:41) Mǐ sixú kú d’é jí ɖɔ Jexóva, Mawu ‘nǔbláwǔkúnúmɛtɔ́ ɔ’ kpó Vǐ tɔn kpó yí wǎn nú mǐ tawun, bɔ ényí mǐ ɖo wǔvɛ́ se wɛ ɔ, yě lɔmɔ̌ nɔ se wǔvɛ́. (Luk. 1:78; 1 Pi. 5:7) Akpakpa ɖo yě sɔ́ wɛ bónú yě ná ɖe tagba e nɔ wa nǔ dó gbɛtɔ́ lɛ́ wú lɛ́ é bǐ síin. w23.04 3 akpá. 4-5

Mǐ sixú wa nǔ e wú mǐ kpé é bǐ, bo nyi alɔ nú nǔ ɖěɖěe nɔ sɔ́ linlin nyanya gbɛ Satáan tɔn tɔn ɖ’ajo lɛ́ é xixa alǒ ɖíɖótó. Mǐ sixú bló bɔ linlin mímɛ́ lɛ́ ná nɔ gɔ́ ayi mǐtɔn mɛ, gbɔn Biblu xixa kpó Biblu kplɔ́nkplɔ́n kpó gblamɛ. Kplé lɛ́ yiyi kpó alɔ ɖíɖó ɖo sinsɛnzɔ́ ɔ mɛ kpó lɔ ná d’alɔ mǐ bɔ mǐ ná cyɔ́n alɔ linlin mǐtɔn jí. Gɔ́ ná ɔ, Jexóva d’akpá ɖɔ émí kún ná lɔn bónú tɛ́nkpɔ́n ɖé ná wá nú mǐ bo hú gǎn hlɔ̌nhlɔ́n e mǐ ɖó é ó. (1 Kɔ. 10:12, 13) Mǐ mɛ bǐ wɛ ɖó hudó ɖɛxixo tɔn din hú ɖ’ayǐ tɔn, bá dó kpo ɖo gbejí nɔ nú Jexóva wɛ ɖo azǎn gǔdo gúdo tɔn élɔ́ lɛ́ e vɛ́ wǔ lɛ́ é mɛ. Jexóva ba ɖɔ mǐ ní nɔ ‘ɖɔ nǔ e ɖo ayi mǐtɔn mɛ lɛ́ é bǐ nú émí’ ɖo ɖɛ mɛ. (Ðɛh. 62:9) Nɔ kpa susu nú Jexóva, bo nɔ dó kú n’i ɖó nǔ e é nɔ wa lɛ́ é bǐ wú. Nɔ byɔ́ ɛ ɖɔ é ní nɔ d’alɔ we, bónú a ná nɔ kpankɔ́n ɖo sinsɛnzɔ́ ɔ mɛ. Nɔ sa vo n’i ɖɔ é ní d’alɔ we bónú a ná ɖí xwi xá tagba ɖěbǔ e a ná mɔ é, bo ná gbí dɔn ɖo mɛtɛ́nkpɔ́n ɖěbǔ e ná wá kpan nukɔn we é nukɔn. Ma lɔn nú nǔ ɖěbǔ alǒ mɛ ɖěbǔ glɔ́n ali nú we bónú a gɔn ɖɛ xo sɛ́dó Jexóva ɖo gbesisɔmɛ ó. w23.05 7 akpá. 17-18

Étɛ́wú mǐ ka nɔ yi kplé agun tɔn lɛ́? Nukɔntɔn, bo ná dó kpa susu nú Jexóva. (Ðɛh. 26:12; 111:1) Mǐ nɔ lɛ́ yi kplé lɛ́, bo ná dó sixú dó wǔsyɛ́n lanmɛ nú mǐɖée ɖo hwenu vɛ́ wǔ élɔ́ lɛ́ mɛ. (1 Tɛ. 5:11) Ényí mǐ zé alɔ bo ná xósin ɖo kplé lɛ́ jí hǔn, nǔ we énɛ́ lɛ́ bló wɛ mǐ ɖe mɔ̌ nɛ́. Amɔ̌, xósin níná sixú nɔ vɛ́ wǔ nú mǐ. Ado sixú nɔ hu mǐ dó xósin níná wú, alǒ mǐ sixú nɔ ba vɛ́návɛ́ná bo ná ɖ’alɔ ɖo kplé lɛ́ mɛ, có è ka sixú gɔn alɔ mǐtɔn yí azɔn nabí e mǐ ba é. Étɛ́ ka sixú d’alɔ mǐ? Mɛsɛ́dó Pɔ́lu ɖɔ ɖɔ mǐ ɖó ná nɔ sɔ́ ayi ɖó ‘kanmɛsyɛ́n níná mǐɖée’ jí. Ényí mǐ tuun ɖɔ mǐ ná bo tlɛ ɖɔ xó kléwún ɖé dó ɖe nǔɖiɖi mǐtɔn xlɛ́ ɔ, é ná dó wǔsyɛ́n lanmɛ nú mɛ ɖěvo lɛ́ ɔ, ado sɔ́ ná hu mǐ dó alɔ sísɔ́ bo ná xósin wú ǎ. Gɔ́ ná ɔ, ényí è ma nɔ yí alɔ mǐtɔn hwɛhwɛ lěe ba gbɔn wɛ mǐ ɖe é ǎ ɔ, xomɛ sixú hun mǐ ɖɔ ali ná hun nú mɛ ɖěvo lɛ́ ɖo agun ɔ mɛ bɔ yě lɔmɔ̌ ná ná xósin.—1 Pi. 3:8. w23.04 20-21 akpá. 1-3

Axɔ́sú ɔ ɖe gbeta ɖé tɔ́n. Kan jó Jwifu ɖěɖěe è wlí kannumɔ yětɔn hɛn yi Babilɔ́nu sín xwe 70 mɔ̌ ɖíe lɛ́ é bɔ yě ná lɛ́ kɔ yi to yětɔn mɛ ɖo Izlayɛ́li. (Ɛsd. 1:2-4.) Jexóva mɛvo ɔ, nǔ mɔ̌hun sixú jɛ ǎ. È tuun ɖɔ ɖo kpaa mɛ ɔ, Babilɔ́nu kún nɔ jó ahwankannumɔ tɔn lɛ́ ó. (Eza. 14:4, 17) Amɔ̌, è flí zinkpo sín glɔ̌ nú mɛ e ɖo acɛ kpa wɛ ɖo Babilɔ́nu é, bɔ acɛkpatɔ́ yɔ̌yɔ́ ɔ ɖɔ nú Jwifu lɛ́ ɖɔ yě sixú tɔ́n. Jwifu lɛ́ ɖokpó ɖokpó, tají ɔ, tatɔ́ xwédo tɔn lɛ́ ɖó ná wá gbeta ɖé kɔn: Yě ná gosín Babilɔ́nu, kabǐ yě ná gbɔ. Gbeta énɛ́ kɔn wíwá nyí nǔ d’ayihún ǎ. Yě mɛ gěgé ko kpo tawun bo sɔ́ sixú zɔn ali gaga ǎ. Gɔ́ ná ɔ, ɖó Babilɔ́nu wɛ è ji Jwifu lɛ́ gěgé ɖe wútu ɔ, fínɛ́ wɛ yě hun nukún dó. Mɛ énɛ́ lɛ́ nɔ mɔ ɖɔ tɔ́gbó émítɔn lɛ́ sín to wɛ Izlayɛ́li nyí. É cí ɖɔ Jwifu ɖé lɛ́ tíin bɔ gbɛ nyɔ́ nú yě tawun ɖo Babilɔ́nu, énɛ́ wú ɔ, yě sixú mɔ ɖɔ é vɛ́ wǔ tawun ɖɔ yě ní jó xwé yětɔn ɖaaɖagbe lɛ́, alǒ ajɔ̌ yětɔn dó bo sɛ tɛn yi to e yě ma tuun ǎ é mɛ. w23.05 14 akpá. 1-2

Xó Mawu tɔn dó wǔsyɛ́n lanmɛ nú mǐ ɖɔ mǐ ní kpo ɖo tíntɛ́nkpɔ́n wɛ bá ɖó jijɔ élɔ́ lɛ́: didɛ, wǔvɛ́sexámɛ kpó wǎnyíyí kpó. Luki 21:19 ɖɔ: “Ényí mi dɛ ɔ, mi ná hwlɛ́n gbɛ mitɔn gán.” Kolósinu lɛ́ 3:12 ɖɔ: “Mi ní sɔ́ wǔvɛ́sexámɛ . . . dó.” Gɔ́ ná ɔ, 1 Tɛsaloníkinu lɛ́ 4:9, 10 ɖɔ: “Mawu kplɔ́n miɖésúnɔ ɖɔ mi ní yí wǎn nú miɖée lɛ́. . . . Amɔ̌, nɔví lɛ́ mi, mǐ byɔ́ mi ɖɔ mi ní nɔ ɖo mɔ̌ wa wɛ bǐ mlɛ́mlɛ́.” Xó e ɖo wěmafɔ énɛ́ lɛ́ mɛ lɛ́ é bǐ ɔ, ahwanvú ɖěɖěe ko dɛ, se wǔvɛ́ xá mɛ, lobo lɛ́ yí wǎn nú mɛ lɛ́ é wɛ è ɖɔ yě ná. Amɔ̌, yě ɖó ná lɛ́ kpo ɖo tíntɛ́nkpɔ́n wɛ bo ná nɔ ɖe jijɔ énɛ́ lɛ́ xlɛ́. Mǐ lɔ ɖó ná wa nǔ ɖokpó ɔ. Bo ná dó d’alɔ we ɔ, gbějé lěe klisánwun nukɔn nukɔntɔn lɛ́ ɖe jijɔ énɛ́ lɛ́ xlɛ́ gbɔn é wú. Énɛ́ gúdo ɔ, a ná mɔ lěe a sixú wa nǔ ahwanvú énɛ́ lɛ́ ɖɔhun gbɔn é, bɔ wǎgbɔ tɔn ɔ, a ná xlɛ́ ɖɔ émí ɖo gbesisɔmɛ nú wǔvɛ́ ɖaxó ɔ. Énɛ́ ɔ, hwenu e wǔvɛ́ ɖaxó ɔ ná bɛ́ é ɔ, a ná ko kplɔ́n lěe a ná dɛ gbɔn é, lobo ná kán ɖ’é jí, bo ná kpo ɖo didɛ wɛ. w23.07 2-3 akpá. 4; 3-4 akpá. 8

Mɛ yí ami dó ɖe wɛ nú mǐ oo, alǒ “lɛ̌ngbɔ́ ɖěvo” wɛ nú mǐ ɔ, mǐ ɖó ná kpo ɖo “Ali mímɛ́” ɔ jí gbɔn wɛ; mɔ̌ wiwa ná d’alɔ mǐ bɔ mǐ ná kpo ɖo Jexóva sɛn wɛ din, bo ná lɛ́ kpo ɖo mɔ̌ wa wɛ hwenu e Axɔ́súɖuto ɔ ná hɛn nyɔ̌ná jí wǔ tɔn lɛ́ wá ayǐkúngban jí é. (Jaan 10:16) Sín 1919 H.M. tɔn ɔ, súnnu kpó nyɔ̌nu kpó, gɔ́ nú yɔkpɔ́vú lǐvi mɔ̌kpán ko tɔ́n sín Babilɔ́nu ɖaxó, éé nyí kplékplé sinsɛn nǔvú lɛ́ tɔn é mɛ, bo ko jɛ zɔnlin zun gbɔn ali nǔjlɛ́dónǔwú tɔn ɔ jí jí. Hwenu e Jwifu lɛ́ tɔ́n sín Babilɔ́nu é ɔ, Jexóva wa nǔ e wú é kpé é bǐ bɔ è ɖe afɔklɛ́nnú lɛ́ bǐ sín ali yětɔn jí. (Eza. 57:14.) “Ali mímɛ́” e jí gbɔn wɛ è ɖe ɖo égbé é ka ló? Xwe kanweko mɔ̌kpán jɛ nukɔn nú 1919 ɔ, Jexóva zán súnnu ɖěɖěe nɔ ɖó sísí n’i lɛ́ é, bɔ yě bló bónú mɛ ɖěvo lɛ́ ná tɔ́n sín Babilɔ́nu ɖaxó ɔ mɛ. (Sɔ́ jlɛ́ dó Ezayíi 40:3 wú.) Yě w’azɔ̌ tají lɛ́, bɔ énɛ́ zɔ́n bɔ nukɔnmɛ ɔ, gbɛtɔ́ ayijlɔ́jlɔ́nɔ lɛ́ tɔ́n sín sinsɛn nǔvú mɛ, bo jɛ Jexóva sɛn jí xá togun tɔn. w23.05 15-16 akpá. 8-9

Jexóva ba ɖɔ mǐ ní sɛn émí kpó xomɛhunhun kpó, kpódó jlǒ kpán. (2 Kɔ. 9:7) Énɛ́ wú ɔ, ényí nǔ gbigbɔ tɔn ɖé gbé nyinya sín akpakpa ma nɔ sɔ́ mǐ ǎ ɔ, mǐ ka ɖó ná kpo ɖo gbě tɔn nya wɛ wɛ a? Ð’ayi kpɔ́ndéwú mɛsɛ́dó Pɔ́lu tɔn wú; é ɖɔ: “Un nɔ dó nǔ agbaza ce bo nɔ hɛn ɛ kannumɔ ɖɔhun.” (1 Kɔ. 9:25-27) Ényí Pɔ́lu ma tlɛ ba ná wa nǔ e Jexóva ba ɖɔ é ní wa é ǎ ɔ, é nɔ tɛ́n kpɔ́n bo nɔ bló. Jexóva ka yí gbe nú sinsɛnzɔ́ Pɔ́lu tɔn a? Ganjí, bo d’ajɔ ɛ ɖó gǎndídó tɔn lɛ́ wú. (2 Tim. 4:7, 8) Mɔ̌ ɖokpó ɔ, ényí Jexóva mɔ bɔ mǐ ɖo tíntɛ́nkpɔ́n wɛ bo ná kpé nǔ e gbé nya wɛ mǐ ɖe é wú hwenu e akpakpa tɔn ma sɔ́ mǐ ǎ é ɔ, xomɛ nɔ hun i. Xomɛ nɔ hun i, ɖó é tuun ɖɔ ényí mǐ ná bo ma tlɛ nɔ yí wǎn nú nǔ e wa wɛ mǐ ɖe é hwebǐnu ǎ ɔ, mǐ ka nɔ wa nǔ ɔ ɖó wǎn e mǐ yí n’i é wútu. Lěe Jexóva kɔn nyɔ̌ná dó Pɔ́lu jí gbɔn é ɔ, é ná kɔn nyɔ̌ná dó gǎn e mǐ nɔ dó lɛ́ é jí. (Ðɛh. 126:5) Gɔ́ ná ɔ, ényí mǐ ɖo lěe Jexóva kɔn nyɔ̌ná dó mǐ jí gbɔn é mɔ wɛ ɔ, akpakpa tlɛ sixú jɛ mǐ sɔ́ jí. w23.05 29 akpá. 9-10

Mɛsɛ́dó Pɔ́lu jlɛ́ mɛ ɖěɖěe ma ná gán ɖo azǎn Jexóva tɔn gbe ǎ lɛ́ é dó mɛ ɖěɖěe nɔ d’amlɔ lɛ́ é wú. Yě tuun nǔ e ɖo jijɛ lɛ́ lɛ̌ dó yě wɛ lɛ́ é, alǒ tuun ɖɔ ganmɛ ɖo yiyi wɛ ǎ. Énɛ́ wú ɔ, yě nɔ tuun hwenu e nǔ tají ɖé jɛ é, bo nɔ ce glíwún dó yěɖée wú ǎ. Égbé ɔ, mɛ gěgé nɔ d’amlɔ ɖo gbigbɔ lixo. (Hlɔ̌. 11:8) Yě ɖi nǔ nú nǔ ɖěɖěe xlɛ́ ɖɔ mǐ ɖo gbɛ nɔ wɛ ɖo “azǎn gǔdo gúdo tɔn lɛ́” mɛ, bɔ wǔvɛ́ ɖaxó ɔ ná bɛ́ ɖo malínmálín mɛ lɛ́ é ǎ. (2 Pi. 3:3, 4) É ɖo mɔ̌ có, mǐ tuun ɖɔ wě e Mawu sɔ́ d’ayi mɛ nú mɛ bɔ è ɖe xá mǐ ɖɔ mǐ ní nɔ wunzɛn é ɖo tají tawun égbé, din e azǎn ɔ ɖo sisɛkpɔ́ wɛ é. (1 Tɛ. 5:6) Énɛ́ wú ɔ, mǐ ɖó ná nɔ cí xwíí? Aniwú? Mɔ̌ wiwa ná zɔ́n bɔ mǐ ná ɖó nu ɖo toxóɖiɖɔ, alǒ nǔ e nɔ jɛ ɖo to égbé lɛ́ é mɛ ǎ. Ée azǎn Jexóva tɔn ná ɖo sisɛkpɔ́ wɛ é ɔ, kɔ e mɛ lɛ́ ná gbídí nú mǐ bónú mǐ ná ɖó nu ɖo nǔ énɛ́ lɛ́ mɛ é ná lɛ́ jɛjí. É ɖo mɔ̌ có, é byɔ́ ɖɔ ado ní hu mǐ dó lěe mǐ ná wa nǔ gbɔn é wú ǎ. Gbigbɔ Mawu tɔn sixú d’alɔ mǐ bɔ mǐ ná cí xwíí, ɖó ninɔmɛ ayi mɛ tɔn ɖagbe, bo lɛ́ kpé wú bo wá gbeta e nǔnywɛ́ kpé lɛ́ é kɔn.—Luk. 12:11, 12. w23.06 10 akpá. 6-7

Ényí a se nyǐkɔ Sanmusɔ́ɔn ɔ, étɛ́ ka nɔ wá ayi mɛ nú we? Ayi towe sixú ko nɔ yi lě do é dó hlɔ̌nhlɔ́n sɔ é jí. Nǔgbó ka wɛ. Amɔ̌, Sanmusɔ́ɔn wá gbeta nyanya ɖé kɔn bɔ énɛ́ dɔn wǔvɛ́ gěgé wá n’i. É ɖo mɔ̌ có, Jexóva sɔ́ ayi ɖó nǔ ɖagbe e Sanmusɔ́ɔn wa dó sɛn ɛ lɛ́ é bǐ jí. Gɔ́ ná ɔ, Mawu yí gbe bɔ è wlán kpɔ́ndéwú gbejíninɔ tɔn Sanmusɔ́ɔn tɔn dó Biblu mɛ nú ɖagbe mǐtɔn. Jexóva zán Sanmusɔ́ɔn dó bló nǔjíwǔ gěgé dó d’alɔ Izlayɛ́li e nyí togun Tɔn e é sɔ́ é. Sanmusɔ́ɔn kú bɔ é bló xwe kanweko mɔ̌kpán gúdo é ɔ, Jexóva sɔ́ d’ayi mɛ nú mɛsɛ́dó Pɔ́lu bɔ é wlán nyǐkɔ tɔn dó mɛ ɖěɖěe ɖe nǔɖiɖi nukúnɖéjí xlɛ́ lɛ́ é mɛ. (Ebl. 11:32-34) Kpɔ́ndéwú Sanmusɔ́ɔn tɔn sixú dó wǔsyɛ́n lanmɛ nǔ mǐ. É ɖeji dó Jexóva wú, é ná bo tlɛ nyí ɖo ninɔmɛ e vɛ́ wǔ lɛ́ é mɛ ɔ nɛ́. Kpɔ́ndéwú Sanmusɔ́ɔn tɔn sixú kplɔ́n nǔ mǐ bo lɛ́ dó wǔsyɛ́n lanmɛ nú mǐ. w23.09 2 akpá. 1-2

Ényí mǐ nɔ xo ɖɛ sɛ́dó Jexóva hwɛhwɛ, bo nɔ ɖɔ nǔ e ɖo ayimɛya dó nú mǐ wɛ lɛ́ é bǐ n’i hǔn, hlɔ̌nhlɔ́n ná didɛ mǐtɔn wɛ mǐ ɖe gbɔn mɔ̌ nɛ́. (1 Tɛ. 5:17) Bóyá fí e mǐ ɖe din é ɔ, a ɖo wǔvɛ́ syɛ́nsyɛ́n ɖé ɖí xwi xá wɛ ǎ. É ná bo tlɛ nyí mɔ̌ ɔ, a ka nɔ ba wěɖexámɛ Jexóva tɔn hweɖébǔnu e xomɛ sin we, a flú, alǒ a dán ɖěwagbɛn é a? Ényí a nɔ ba alɔdó Mawu tɔn hwɛhwɛ ɖo wǔvɛ́ e a nɔ mɔ ayǐhɔ́ngbe ayǐhɔ́ngbe lɛ́ é mɛ din ɔ, a ná xo nǔ kpɔ́n dó mɔ̌ wiwa wú hwenu e a ná wá mɔ wǔvɛ́ e d’agba hú mɔ̌ lɛ́ é ɖo sɔgúdo é ǎ. Mɔ̌ mɛ ɔ, a ná kú d’é jí ɖɔ é tuun hwenu e é ná d’alɔ we é kpó lěe é ná wa mɔ̌ gbɔn é kpó ganjí. (Ðɛh. 27:1, 3) Ényí mǐ nɔ dɛ ɖo wǔvɛ́ lɛ́ nu ɖo égbé ɔ, é ná ɖibla bɔ wǔ nú mǐ hú gǎn bɔ mǐ ná dɛ ɖo wǔvɛ́ ɖaxó e jawě é nu. (Hlɔ̌. 5:3) Étɛ́wú mǐ ka sixú ɖɔ mɔ̌? Nɔví gěgé ɖɔ ɖɔ hweɖébǔnu e émí dɛ ɖo ninɔmɛ syɛ́nsyɛ́n ɖé nu é ɔ, é nɔ d’alɔ émí bɔ émí nɔ dɛ ɖo wǔvɛ́ e bɔ d’é wú é nu. Didɛ nɔ zɔ́n bɔ yě nɔ kpɔ́n te d’é jí; é nɔ lɛ́ ná hlɔ̌nhlɔ́n nǔɖiɖi e yě ɖó ɖɔ Jexóva ɖo gbesisɔmɛ, bo lɛ́ ɖó jlǒ ɔ, lobo ná d’alɔ yě é. Wǎgbɔ tɔn ɔ, nǔɖiɖi nɔ d’alɔ yě bɔ yě nɔ dɛ ɖo wǔvɛ́ e bɔ d’é wú é nu.—Ja. 1:2-4. w23.07 3-4 akpá. 7-8

Mɛɖéesɔ́hwe Jexóva tɔn kpó wǔvɛ́sexámɛ tɔn kpó nɔ sísɛ́ ɛ bɔ é nɔ nɔ jlɛ̌ jí. Ði kpɔ́ndéwú ɔ, mɛɖéesɔ́hwe Jexóva tɔn jɛ wě hwenu e é jló ná sú kún dó nú mɛ nyanya e ɖo Sodɔ́mu lɛ́ é é. Jexóva gbɔn wɛnsagun tɔn lɛ́ jí, bo ɖe wě xá Lɔti hwɛjijɔnɔ ɔ ɖɔ é ní hɔn yi sókan mɛ. Xɛsi ɖi Lɔti dó dɔ̌n yiyi wú. Énɛ́ wú ɔ, é sa vo nú Jexóva ɖɔ é ní yí gbe bónú émí kpó xwédo émítɔn kpó ná yi Sowáa; toxo kpɛví ɖé wɛ bɔ è ɖó ná sú é lɔmɔ̌ sín kún dó. Jexóva hɛn ɔ, é ná ko dó zǒgbe jí ɖɔ Lɔti ɖó ná xwedó wě e émí ɖe xá ɛ lɛ́ é tlélé. É ɖo mɔ̌ có, é yí gbe nú nǔ e Lɔti byɔ́ ɛ é, nú é ná bo tlɛ byɔ́ ɖɔ é ní ma sú kún dó nú toxo Sowáa tɔn ó ɔ nɛ́. (Bǐb. 19:18-22) Xwe kanweko mɔ̌kpán gúdo ɔ, Jexóva se wǔvɛ́ xá Ninívunu lɛ́. É sɛ́ gbeyíɖɔ Jonási dó bónú é ná yi ɖɔ nú mɛ nyanya e ɖo toxo ɔ mɛ lɛ́ é ɖɔ, è ná sú kún dó nú yě kpó toxo ɔ kpó ɖo malínmálín mɛ. Amɔ̌, ée hwɛ Ninívunu lɛ́ tɔn vɛ́ nú yě é ɔ, Jexóva kú nǔbláwǔ nú yě, bo sɔ́ sú kún yětɔn dó ǎ.—Joná. 3:1, 10; 4:10, 11. w23.07 21 akpá. 5

Étɛ́ kpɔ́ndéwú Joasi tɔn ka sixú kplɔ́n mǐ? É cí atín e sín ɖɔ ma yi do ganjí ǎ, bɔ è sɔ́ kpo dó gán ná é ɖɔhun. Hwenu e atín e è dó gán ɛ ná é, ɖo xógbe ɖěvo mɛ ɔ, Yexoyáda ma sɔ́ ɖo fínɛ́ ǎ, bɔ jɔhɔn gǔfɔ́ndómawujítɔ́ lɛ́ tɔn nyi é ɔ, Joasi j’ayǐ. Kpɔ́ndéwú énɛ́ xlɛ́ ɖɔ mǐ kún ɖó ná nɔ se tónú nú Mawu ɖó xwédo mǐtɔn kpó mɛ ɖěvo e ɖo agun ɔ mɛ lɛ́ é kpó nɔ sɔ́ kpɔ́ndéwú ɖagbe ɖ’ayǐ nú mǐ kpowun wútu ó. Bónú mǐ ná kpo ɖo vǐvɛ́ xá Jexóva wɛ ɔ, mǐ ɖó ná kpo ɖo hlɔ̌nhlɔ́n ná wǎn e mǐ yí n’i é kpó sísí e mǐ ɖó n’i é kpó wɛ gbɔn nǔ kplɔ́nkplɔ́n hwɛhwɛ, tamɛ linlin kpó ɖɛxixo kpó gblamɛ. (Jel. 17:7, 8; Koló. 2:6, 7) Jexóva nɔ byɔ́ nǔ mǐ zɛ xwé wú ǎ. È sɛ sin xwe nú nǔ e é byɔ́ mǐ é ɖo Nǔnywɛ́tɔ́xó 12:13 mɛ; fínɛ́ ɖɔ: “Ðǒ sísí nú Mawu bo bló nǔ e é zɔ́n lɛ́; nǔ e ɖo tají bɔ gbɛtɔ́ bǐ ɖó ná wa é nɛ́.” Ényí mǐ nɔ ɖó sísí nú Mawu ɔ, mǐ ná kpé wú bo dɛ ɖo mɛtɛ́nkpɔ́n e ɖo nukɔn ja lɛ́ é nu bo gbí dɔn. Nǔ ɖěbǔ ná kpé wú bo d’akpa xɔ́ntɔn e mǐ zun xá Jexóva é wú ǎ. w23.06 18-19 akpá. 17-19

Gǎnjɛwú e Mawu ná mǐ é bɛ́ gbɔn lě: “Mɛ e ɖo ayǐjínjɔ́n ɖo axɔ́súzinkpo ɔ jí é ɖɔ.” (Nǔɖe. 21:5a) Xó bǔnɔ wɛ xó énɛ́ lɛ́ nyí, ɖó yě nyí ɖokpó ɖo xó ɖěɖěe Jexóva ɖɔ azɔn atɔn gbɔn nǔmimɔ mɛ ɖo wěma Nǔɖexlɛ́mɛ tɔn mɛ lɛ́ é mɛ. Énɛ́ wú ɔ, é nyí wɛnsagun hlɔ̌nhlɔ́nnɔ ɖé wɛ ná gǎnjɛwú énɛ́ mǐ ǎ, mɔ̌ jɛ́n é ma ka lɛ́ nyí Jezu e è fɔ́n sín kú é ǎ é nɛ́, Jexóva ɖésúnɔ wɛ! Énɛ́ xlɛ́ ɖɔ mǐ sixú ɖeji bǐ mlɛ́mlɛ́ dó nǔ e é ɖɔ bɔ d’é wú é wú. Étɛ́wú nǔ ka nyí mɔ̌? Ðó Jexóva “sixú ɖó adingban ǎ.” (Ti. 1:2) Xó énɛ́ zɔ́n bɔ mǐ sixú ɖeji dó nǔ e mǐ xa ɖo Nǔɖexlɛ́mɛ 21:5, 6 mɛ é wú bǐ mlɛ́mlɛ́. Ð’ayi xókwín “Éɖíe!” ɔ wú. Azɔn mɔ̌kpán wɛ è zán xókwín Glɛ̌kigbe tɔn e tínmɛ tɔn nyí “Éɖíe!” é ɖo wěma Nǔɖexlɛ́mɛ tɔn mɛ. Étɛ́ ka bɔ dó axwáxwi ɔ wú? Mawu ɖɔ: “Un ɖo nǔ lɛ́ bǐ bló wɛ yɔ̌yɔ́ tɔn.” Nǔgbó wɛ ɖɔ hǔzúhúzú sɔgúdo tɔn lɛ́ xó ɖɔ wɛ Jexóva ɖe, amɔ̌, nú éyɛ́ ɔ, akpá énɛ́ lɛ́ sín jijɛnu ɖó gǎnjɛwú sɔmɔ̌ bɔ é ɖɔ xó dó yě wú cí nǔ ɖɔ yě ko ɖo jijɛnu wɛ ɖɔhun.—Eza. 46:10. w23.11 3-4 akpá. 7-8

Mɛsɛ́dó Piyɛ́ɛ ɖo xwi ɖí xá gǎnmaɖó tɔn lɛ́ wɛ. Mǐ ní ɖɔ xó dó kpɔ́ndéwú ɖé lɛ́ wú. Hwenu e Jezu tín lěe é ná mɔ wǔvɛ́ bo kú bɔ nǔɖɔɖayǐ Biblu tɔn lɛ́ ná jɛnu gbɔn é mɛ é ɔ, Piyɛ́ɛ gbɛ́ nǔ n’i. (Mak. 8:31-33) Azɔn mɔ̌kpán wɛ Piyɛ́ɛ kpó mɛsɛ́dó ɖě lɛ́ kpó dɔn nǔ dó mɛ e ná nyí nǔɖaxó ɖo tɛ́ntin yětɔn é wú. (Mak. 9:33, 34) Ðo zǎn e jɛ nukɔn nú kú Jezu tɔn é mɛ ɔ, Piyɛ́ɛ kpa tó nya ɖé. (Jaan 18:10) Ðo zǎn ɖokpó énɛ́ mɛ ɔ, xɛsi jɛ Piyɛ́ɛ jí bɔ é gbɛ́ ɖɔ émí kún tuun xɔ́ntɔn émítɔn Jezu ó azɔn atɔn. (Mak. 14:66-72) Énɛ́ zɔ́n bɔ Piyɛ́ɛ ya avǐ vívɛ́ vívɛ́. Jezu jó gbe dó mɛsɛ́dó tɔn e awakanmɛ kú tawun é wú ǎ. Ée Jezu fɔ́n sín kú gúdo é ɔ, é hun ali nú Piyɛ́ɛ bónú Piyɛ́ɛ ná ɖe xlɛ́ ɛ ɖɔ émí kpo ɖo wǎn yí n’i wɛ. Jezu byɔ́ ɛ ɖɔ é ní kpé nukún dó lɛ̌ngbɔ́ émítɔn lɛ́ wú kpó mɛɖéesɔ́hwe kpó. (Jaan 21:15-17) Piyɛ́ɛ ɖo gbesisɔmɛ bo ná wa nǔ e Jezu byɔ́ ɛ é. É ɖo Jeluzalɛ́mu ɖo Pantekótu sín azǎn gbe, bo ɖo mɛ nukɔn nukɔntɔn ɖěɖěe gbigbɔ mímɛ́ sɔ́ lɛ́ é mɛ. w23.09 22 akpá. 6-7

Mɛsɛ́dó Piyɛ́ɛ byɔ́ nǔ élɔ́ mɛxó agun tɔn gbɛ̌ tɔn lɛ́: “Mi nyi lɛ̌ngbɔ́ Mawu tɔn” lɛ́. (1 Pi. 5:1-4) Ényí mɛxó agun tɔn ɖé wɛ nú we ɔ, mǐ tuun ɖɔ a yí wǎn nú nɔví towe lɛ́, bo ba ná kpé nukún dó yě wú. Amɔ̌, hweɖélɛ́nu ɔ, a sixú nɔ mɔ ɖɔ alɔnu émítɔn ján dín, alǒ nǔ ci kɔ nú émí dín bɔ émí kún sixú kpé azɔ̌ énɛ́ wú bo wa ó. Étɛ́ a ka sixú wa? Ðɔ lěe nǔ cí nú we é nú Jexóva. Piyɛ́ɛ wlán ɖɔ: “Ényí mɛɖé ɖo sinsɛnzɔ́ wa wɛ hǔn, é ní gán jɛ hlɔ̌nhlɔ́n e Mawu nɔ ná mɛ é wú.” (1 Pi. 4:11) Nɔví towe lɛ́ sixú wá gbɔn tagba e è ma sixú ɖe ɖɛ bǐ mlɛ́mlɛ́ ɖo gbɛ élɔ́ mɛ din ǎ lɛ́ é mɛ. Amɔ̌, flín ɖɔ Jezu Klísu e nyí “lɛ̌ngbɔ́nyitɔ́gán” ɔ é sixú wa nǔ zɛ nǔ e hwɛ sixú wa dó d’alɔ yě é wú. É hɛn ɔ, é ná d’alɔ yě din, bo lɛ́ d’alɔ yě ɖo gbɛ yɔ̌yɔ́ ɔ mɛ. Nǔ e Mawu byɔ́ mɛxó agun tɔn lɛ́ kpowun é wɛ nyí ɖɔ, yě ní yí wǎn nú nɔví yětɔn lɛ́, kpé nukún dó yě wú, lobo lɛ́ nyí “kpɔ́ndéwú nú lɛ̌ngbɔ́hwan ɔ.” w23.09 29-30 akpá. 13-14

Mǐ ɖó ná nɔ zɔ nú linlin e mɛ ɖěɖěe nɔ xo sɛ́n Jexóva tɔn lɛ́ nyi kɛ́n lɛ́ é nɔ ɖó lɛ́ é. Ényí mǐ nɔ lin nǔ lěe mɛ ɖěɖěe nɔ xo sɛ́n Jexóva tɔn lɛ́ nyi kɛ́n lɛ́ é nɔ lin gbɔn é ɔ, mǐ lɔmɔ̌ sixú jɛ ya wɔn nú Jexóva kpó sɛ́n tɔn lɛ́ kpó jí. (1 Kɔ. 3:19) Hwɛhwɛ wɛ “nǔnywɛ́ gbɛ élɔ́ tɔn” nɔ sísɛ́ gbɛtɔ́ lɛ́, bɔ yě nɔ gbɛ́ gbe nú Mawu. Klisánwun e ɖo Pɛɛgámu kpó Tiatíi kpó lɛ́ é ɖé lɛ́ lɔn bɔ mɛ e lɛ́ lɛ̌ dó yě bo nɔ lɛ aga, lobo nɔ lɛ́ sɛn vodún lɛ́ é sín nǔwalɔ wa nǔ dó yě wú. Jezu ɖe wě syɛ́nsyɛ́n xá agun we énɛ́ lɛ́ bǐ ɖó gbe e yě yí nú agalilɛ é wútu. (Nǔɖe. 2:14, 20) Égbé ɔ, mɛ e lɛ́ lɛ̌ dó mǐ lɛ́ é sixú nɔ tɛ́n kpɔ́n bo nɔ gbídí kɔ nú mǐ bónú mǐ ná ɖó linlin nyanya lɛ́. Mɛ e ɖo xwédo mǐtɔn mɛ lɛ́ é kpó xɔ́ntɔn mǐtɔn lɛ́ kpó sixú tɛ́n kpɔ́n bo ná bló bɔ mǐ ná mɔ ɖɔ è hɛn kan gli mǐtɔn dín, bo nɔ dó wǔsyɛ́n lanmɛ nú mǐ ɖɔ mǐ ní t’afɔ sɛ́n Jexóva tɔn lɛ́ jí. Ði kpɔ́ndéwú ɔ, yě sixú nɔ ɖɔ nú mǐ ɖɔ é kún ɖo tají ɖɔ è ní nɔ mǐmɛ́ jí ɖo walɔ lixo ó, lé nǔgbódodó walɔ ɖagbe tɔn Jexóva tɔn lɛ́ ko cá. Hweɖélɛ́nu ɔ, mǐ sixú nɔ lin ɖɔ ali e xlɛ́ mǐ wɛ Jexóva ɖe é kún za wě ganjí ó. Ényí mǐ ma nyɔ́ bló ǎ ɔ, mǐ tlɛ sixú “wa nǔ zɛ nǔ e è wlán lɛ́ é wú.”—1 Kɔ. 4:6. w23.07 16 akpá. 10-11

Jezu sín nɔ Mali ɖó hudó hlɔ̌nhlɔ́n tɔn. É ko da asú ǎ, bo ka ná mɔ xo. É tuun nǔ ɖě dó vǐ kplɔ́nkplɔ́n wú ǎ, bo ka ná wá kpé nukún dó vǐ vǔ e ná wá húzú Mɛsíya ɔ é wú. É ɖó xó xá mɛɖé kpɔ́n gbeɖé ǎ, bo ka ná yi ɖɔ nú asú xɔ́ntɔn tɔn Jozɛ́fu din ɖɔ émí ɖo xo a? (Luk. 1:26-33) Nɛ̌ Mali ka mɔ hlɔ̌nhlɔ́n gbɔn? É ba alɔdó mɛ ɖěvo lɛ́ tɔn. Ði kpɔ́ndéwú ɔ, é byɔ́ Gabliyɛ́li ɖɔ é ní ɖɔ gǒflɛ́mɛ ɖěvo lɛ́ nú émí dó azɔ̌ ɔ wú. (Luk. 1:34) Táan kpɛɖé ɖo énɛ́ gúdo ɔ, é yi ba hɛ̌nnumɔ tɔn Elizabɛ́ti kpɔ́n ɖo toxo Judáa tɔn e “ɖo sókan mɛ é” ɖé mɛ. Elizabɛ́ti kpa Mali, bɔ Mawu sɔ́ d’ayi mɛ n’i bɔ é má nǔɖɔɖayǐ e dó wǔsyɛ́n lanmɛ nú mɛ, bo ɖɔ xó dó Mali sín vǐ e è ma ko ji ǎ é wú é ɖé xá ɛ. (Luk. 1:39-45) Mali ɖɔ ɖɔ Jexóva “zán hlɔ̌nhlɔ́n tɔn dó bló nǔ ɖaxó ɖaxó lɛ́ ná.” (Luk. 1:46-51) Jexóva gbɔn Gabliyɛ́li kpó Elizabɛ́ti kpó jí, bo ná hlɔ̌nhlɔ́n Mali. w23.10 14-15 akpá. 10-12

Ahwanvú Klísu tɔn kléwún ɖé jɛ́n gbigbɔ mímɛ́ sɔ́, bɔ yě nɔ ɖu vǐví xɔ́ntɔn bǔnɔ ɖé zunzun xá Jexóva tɔn. Mɛ 144000 énɛ́ lɛ́ ná nyí vɔ̌sánúxwlémawutɔ́ ɖo jǐxwé xá Jezu. (Nǔɖe. 14:1) Tɛn mímɛ́ e ɖo goxɔ ɔ mɛ é xlɛ́ ɖɔ yě kpo ɖo ayǐkúngban jí có, è ko sɔ́ yě dó ɖó vǐ gbigbɔ tɔn Mawu tɔn lɛ́. (Hlɔ̌. 8:15-17) Tɛn mímɛ́ bǐ e ɖo goxɔ ɔ mɛ é nɔ te nú jǐxwé, fí e Jexóva ɖésúnɔ nɔ nɔ é. “Xɔmɛgbovɔ” e gbo Tɛn mímɛ́ ɔ kpó Tɛn mímɛ́ bǐ ɔ kpó é nɔ te nú agbaza Jezu tɔn, éé sú ali d’è, bɔ é ma sixú yi jǐxwé bo húzú Vɔ̌sánúxwlémawutɔ́ ɖaxó ɖo tɛ́npli gbigbɔ tɔn ɔ mɛ ǎ é. Hwenu e Jezu zé agbaza tɔn dó sá vɔ̌ dó gbɛtɔ́ lɛ́ tamɛ é ɔ, é hun gbɛ ninɔ ɖo jǐxwé sín ali nú klisánwun e è sɔ́ gbigbɔ dó sɔ́ lɛ́ é bǐ. Yě lɔmɔ̌ ɖó ná jó gbɛtɔ́gbaza yětɔn dó, bá dó mɔ ajɔ yětɔn jǐxwé tɔn ɔ yí.—Ebl. 10:19, 20; 1 Kɔ. 15:50. w23.10 28 akpá. 13

Hwenu e Eflayímunu lɛ́ mɔ xó ɖɔ dó Jedenyɔ́ɔ wǔ é ɔ, é ná xósin yě kpó gbe fífá kpó. (Hwɛ. 8:1-3) É ná xósin yě kpó adǎn kpó ǎ. É xlɛ́ ɖɔ émí nɔ sɔ́ émíɖée hwe gbɔn tó ɖíɖó nǔ e dó xomɛsin nú yě é kpó xó ɖiɖɔ nú yě kpó xomɛnyínyɔ́ kpó gblamɛ; énɛ́ zɔ́n bɔ xomɛ yětɔn fá. Mɛxó agun tɔn nǔnywɛ́tɔ́ lɛ́ nɔ wa nǔ Jedenyɔ́ɔ ɖɔhun gbɔn tó ɖíɖó mɛ kpó sɔxwixwe kpó, kpódó xósin níná kpó gbe fífá kpó gblamɛ, ényí è tlɛ mɔ xó ɖɔ dó yě wú ɔ nɛ́. (Ja. 3:13) Mɔ̌ mɛ ɔ, yě nɔ gɔ́ so nú fífá ɖo agun ɔ mɛ. Hwenu e mɛ ɖěvo lɛ́ xɔ susu nú Jedenyɔ́ɔ ɖó ɖu e é ɖu ɖo Madiáani ví lɛ́ jí é wútu é ɔ, é sɔ́ susu ɔ bǐ jó nú Jexóva. (Hwɛ. 8:22, 23) Nɛ̌ súnnu ɖěɖěe è sɔ́ azɔ̌ d’así ná lɛ́ é ka sixú wa nǔ Jedenyɔ́ɔ ɖɔhun gbɔn? Yě ɖó ná nɔ sɔ́ susu nǔ e yě wa lɛ́ é tɔn nú Jexóva. (1 Kɔ. 4:6, 7) Ði kpɔ́ndéwú ɔ, ényí è kpa mɛxó agun tɔn ɖé ɖó nǔwúkpíkpé e é ɖó bo nɔ kplɔ́n nǔ mɛ ganjí é wú ɔ, é sixú dɔn ayi mɛ lɛ́ tɔn yi Xó Mawu tɔn e nyí jɔtɛn nǔkplɔ́nmɛ lɛ́ tɔn é jí, alǒ dɔn ayi yětɔn yi azɔ̌ e kplɔ́n mǐ wɛ tutoblónúnǔ Jexóva tɔn ɖe é jí. Mɛxó agun tɔn lɛ́ sixú nɔ kanbyɔ́ yěɖée hweɖélɛ́nu ɖɔ lěe émí nɔ kplɔ́n nǔ mɛ gbɔn é ka nɔ kpa susu nú Jexóva a jí, alǒ nɔ dɔn ayi mɛ lɛ́ tɔn wá émíɖée jí. w23.06 4 akpá. 7-8

Ényí mǐ ma mɔ nǔ e mǐ byɔ́ ɖo ɖɛ mǐtɔn mɛ é ǎ ɔ, mǐ sixú kanbyɔ́ mǐɖée ɖɔ: ‘Un ka ɖo nǔ e jɛxá é takúnmɛ xo ɖɛ dó wɛ a?’ Hwɛhwɛ ɔ, mǐ nɔ lin ɖɔ mǐ tuun nǔ e nyɔ́ nú mǐ hú gǎn é. Amɔ̌, nǔ e byɔ́ wɛ mǐ ɖe lɛ́ é sixú gɔn nǔ e nyɔ́ hú gǎn é nyí nú mǐ. Ényí mǐ ɖo ɖɛ xo dó tagba ɖé tamɛ wɛ ɔ, wlɛnwín e nyɔ́ hú gǎn é nɔ ɖo fínɛ́, có mǐ nɔ ɖo ɖɛ xo dó ɖěvo tamɛ wɛ. Gɔ́ ná ɔ, nǔ e mǐ nɔ byɔ́ é ɖé lɛ́ sixú gɔn gbe sɔ xá jlǒ Jexóva tɔn. (1 Jaan 5:14) Ði kpɔ́ndéwú ɔ, mǐ ní ɖɔ xó dó kpɔ́ndéwú mɛjitɔ́ e byɔ́ Jexóva ɖɔ é ní bló bónú vǐ émítɔn ní nɔ nǔgbó ɔ mɛ lɛ́ é tɔn jí. Nǔ énɛ́ e yě byɔ́ é cí nǔ e sɔgbe é ɖɔhun. Amɔ̌, Jexóva ná hɛn mǐ mɛ ɖě gǎnnugǎnnu ɖɔ mǐ ní sɛn émí ǎ. É jló ɖɔ mǐ mɛ bǐ, káká jɛ vǐ mǐtɔn lɛ́ jí ní wá gbeta ɔ kɔn bá sɛn émí. (Sɛ́n. 10:12, 13; 30:19, 20) Énɛ́ wú ɔ, mɛjitɔ́ lɛ́ sixú byɔ́ Jexóva ɖɔ é ní d’alɔ émí bónú émí ná bló bónú nǔgbó ɔ ná byɔ́ ayi vǐ émítɔn tɔn mɛ, énɛ́ ná zɔ́n bɔ é ná yí wǎn nú Jexóva, lobo lɛ́ húzú xɔ́ntɔn tɔn.—Nǔx. 22:6; Efɛ́. 6:4. w23.11 21 akpá. 5; 23 akpá. 12

Étɛ́wú gbɔ e mǐ nɔ dó nú mɛ ɖěvo lɛ́ é ka nyí xlɛ̌ wǎnyíyí e mǐ ɖó nú yě é tɔn tají ɖokpó? Sɔgbe xá wěma alɔdlɛ́ndónǔ tɔn Biblu tɔn ɖé ɔ, xókwín e Pɔ́lu zán bɔ é nyí “gbɔ” é sín tínmɛ wɛ nyí “è ní nɔ te ɖo mɛɖé kpá, bo dó wǔsyɛ́n lanmɛ n’i hwenu e é ɖo ninɔmɛ syɛ́nsyɛ́n ɖé mɛ gbɔn dín wɛ é.” Nǔgbó ɔ, ényí mǐ nɔ dó gbɔ nú nǔɖitɔ́ hǎtɔ́ mǐtɔn e ɖo wǔvɛ́ mɛ é ɖé hǔn, alɔ dó è wɛ mǐ ɖe bónú é ná mɔ éɖée mɛ, lobo lɛ́ kpo ɖo gbɛ li ɔ jí nɛ́. Hweɖébǔnu e mǐ d’alɔ nɔví súnnu, alǒ nɔví nyɔ̌nu e ɖo xó sú dó byɔ́ alɔdó wɛ é ɖé é ɔ, wǎnyíyí e mǐ ɖó nú nǔɖitɔ́ hǎtɔ́ énɛ́ é ɖe xlɛ́ wɛ mǐ ɖe gbɔn mɔ̌ nɛ́. (2 Kɔ. 7:6, 7, 13) Wǔvɛ́sexámɛ kpó gbɔdónúmɛ kpó cá kan tawun. Ðo ali tɛ́ nu? Wǔvɛ́sexámɛ nɔ sísɛ́ mɛɖé bɔ é nɔ dó gbɔ nú mɛ ɖěvo lɛ́, lobo nɔ tɛ́n kpɔ́n bo nɔ ɖe nǔ e ɖo wǔvɛ́ ɖó nú yě wɛ é síin. Hǔn, wǔvɛ́sexámɛ wɛ nɔ sísɛ́ mǐ jɛ nukɔn, bɔ énɛ́ gúdo ɔ, mǐ nɔ wá dó gbɔ nú mɛ ɖěvo lɛ́. Ð’ayi lěe Pɔ́lu cá wǔvɛ́sexámɛ Jexóva tɔn kpó gbɔ e É nɔ dó nú mɛ é kpó ɖó kpɔ́ gbɔn é wú. Pɔ́lu ɖɔ dó Jexóva wú ɖɔ é nyí “Tɔ́ e nɔ kú nǔbláwǔ ɖaxó nú mɛ é, bo lɛ́ nyí Mawu e nɔ dó gbɔ nú mɛ ɖo ali bǐ nu é.”—2 Kɔ. 1:3. w23.11 9-10 akpá. 8-10

Mɛ e nɔ xwedó Klísu lɛ́ é bǐ sixú ɖó nukún wǔvɛ́. Mǐ ní ɖɔ xó dó kpɔ́ndéwú mɛsɛ́dó Pɔ́lu tɔn wú. É ɖɔ nú Tɛsaloníkinu lɛ́ ɖɔ: “Hwenu e mǐ ɖo gɔ̌n mitɔn é ɔ, mǐ nɔ ɖɔ nú mi jɛ nukɔn ɖɔ mǐ ná se wǔvɛ́, bɔ nǔ e ka jɛ é nɛ́.” (1 Tɛ. 3:4) Gɔ́ ná ɔ, é wlán sɛ́dó mɛ e ɖo Kɔlɛ́nti lɛ́ é ɖɔ: “Nɔví lɛ́ mi, mǐ ba ɖɔ mi ní dán wǔvɛ́ e mǐ mɔ . . . lɛ́ é ǎ. . . . Mǐ tlɛ tuun nú mǐ ná gán ɖ’é mɛ ǎ.” (2 Kɔ. 1:8; 11:23-27) Égbé ɔ, klisánwun lɛ́ lɔ sixú ɖó nukún wǔvɛ́ alɔkpa ɖé lɛ́. (2 Tim. 3:12) Ée a ɖi nǔ nú Jezu, bo xwedó è é ɔ, xɔ́ntɔn towe lɛ́ kpó hɛ̌nnumɔ towe lɛ́ kpó sixú klán gbe xá we syɛ́nsyɛ́n. Kán e a kán ɖ’é jí bo ná nɔ ɖɔ nǔgbó ɖo nǔ bǐ mɛ é ka ko dɔn tagba lɛ́ wá nú we ɖo azɔ̌ towe jí wɛ a? (Ebl. 13:18) Mɛ e ɖo tɛn acɛkpikpa tɔn mɛ é ɖé ka ko klán gbe xá we ɖó mǎ e a má nukúnɖíɖó towe xá mɛ ɖěvo lɛ́ é wú kpɔ́n a? Pɔ́lu ɖɔ ɖɔ mǐ ɖó ná j’awǎ, ényí mǐ ná bo mɔ wǔvɛ́ alɔkpa ɖěbǔ ɔ nɛ́. w23.12 10-11 akpá. 9-10

Jakɔ́bu dɛ ɖo tagba gěgé nu. Jakɔ́bu ví we, Sinmɛnyɔ́ɔ kpó Levíi kpó bló bɔ xwédo ɔ húzú nǔvɛ́mɔ, bɔ yě lɛ́ kɔn cí dó nyǐkɔ Jexóva tɔn wú. Gɔ́ ná ɔ, Jakɔ́bu sín asivɛ́ Hlacɛ́li kú hwenu e é ɖo vǐ wegɔ́ ɔ ji wɛ é. Adɔ syɛ́nsyɛ́n ɖé lɛ́vɔ́ zɔ́n bɔ é byɔ́ ɖɔ Jakɔ́bu ní sɛ tɛn yi Ejípu hwenu e é ko nyí mɛxó tawun é. (Bǐb. 35:16-19; 37:28; 45:9-11, 28) Wǔvɛ́ énɛ́ lɛ́ bǐ ɖo fínɛ́ có, Jakɔ́bu ka gɔn nǔ ɖi nú Jexóva kpó akpá tɔn lɛ́ kpó gbeɖé ǎ. Wǎgbɔ tɔn ɔ, Jexóva xlɛ́ Jakɔ́bu ɖɔ nǔ tɔn nyɔ́ nukún émítɔn mɛ. Ði kpɔ́ndéwú ɔ, Jexóva dó dɔkun nú Jakɔ́bu. Gɔ́ ná ɔ, hwenu e Jakɔ́bu lɛ́ mɔ vǐ súnnu tɔn Jozɛ́fu e é lin ɖɔ é ko kú é ɔ, dǒ nukún lě do nǔ e Jexóva wa n’i é ná ko su nukún tɔn mɛ sɔ é mɛ kpɔ́n. Xɔ́ntɔn vívɛ́ e Jakɔ́bu zun xá Jexóva é zɔ́n bɔ é dɛ ɖo tagba tɔn lɛ́ nu. (Bǐb. 30:43; 32:10, 11; 46:28-30) Ényí mǐ zun xɔ́ntɔn vívɛ́ xá Jexóva ɔ, mǐ lɔmɔ̌ sixú dɛ ɖo tagba ɖěɖěe mǐ ma ɖó nukún tɔn ǎ, bɔ yě wá xwetɔ́n lɛ́ é nu, bɔ é ná kpa mǐ. w23.04 15 akpá. 6-7

Ðɛhan 23​gɔ́ ɔ, han e ɖe jiɖiɖe e mǐ ɖó dó wǎn e Jexóva yí nú mǐ é wú é xlɛ́ é wɛ. Ðɛhanwlántɔ́ Davídi tínmɛ kancícá syɛ́nsyɛ́n e ɖo Jexóva e nyí Lɛ̌ngbɔ́nyitɔ́ tɔn é kpó éɖésúnɔ kpó tɛ́ntin é. Davídi mɔ ɖɔ émí ɖo ayijayǐ mɛ, ɖó é jó Jexóva dó b’ɛ nɔ xlɛ́ ali i, bɔ é wú wɛ é lɛ́ ɖeji dó bǐ mlɛ́mlɛ́. Davídi tuun ɖɔ Jexóva ná nɔ ɖe wǎnyíyí tɔn xlɛ́ émí ayǐhɔ́ngbe ayǐhɔ́ngbe nú gbɛhwenu émítɔn bǐ. Étɛ́ ka zɔ́n bɔ é ɖeji sɔmɔ̌? Davídi nɔ mɔ ɖɔ è nɔ kpé nukún dó émí wú ganjí, ɖó Jexóva nɔ ná ɛ nǔ e nɔ hudó è lɛ́ é hwebǐnu. Davídi lɛ́ tuun ɖɔ Jexóva ɔ, xɔ́ntɔn émítɔn wɛ é nyí, bɔ nǔ émítɔn nɔ lɛ́ nyɔ́ nukún tɔn mɛ. Énɛ́ wú wɛ é kú d’é jí ɖɔ gbɛ na bo gbɔn ɖěbǔ ɖo sɔgúdo ɔ, Jexóva ná kpo ɖo nǔ e hudó émí lɛ́ é sín do sú nú émí wɛ. Davídi tuun ɖɔ wǎnyíyí Jexóva tɔn ɖó hlɔ̌nhlɔ́n hú adohu adohu émítɔn ɖěbǔ, bɔ énɛ́ nɔ ná ɛ awǎjijɛ jɔ awǎjijɛ ɔ, bɔ nǔ e é ɖó é nɔ lɛ́ kpé è.—Ðɛh. 16:11. w24.01 29 akpá. 12-13

Sín Wɛ̌kɛ́hwan 2​gɔ́ ɔ hwenu ɔ, mɛsɛntɔ́ Jexóva tɔn e ɖo awa vovo gbɛ ɔ tɔn lɛ́ xwé lɛ́ é gěgé ɖu fífá kpó mɛɖésúsíninɔ kpó sín vǐví ɖó bǎ ɖé mɛ, ée yě ɖo wɛnɖagbejíjlázɔ́ ɔ wa wɛ é. Nǔgbó ɔ, è jlá wɛn ɖagbe ɔ gbɔn fí lɛ́ bǐ. Égbé ɔ, mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é kpo ɖo wěɖexámɛ ba wɛ ɖo Klísu gɔ́n. Yě nɔ ba ɖɔ ali e émí nɔ xlɛ́ nɔví lɛ́ é ní nɔ ɖe linlin e Jexóva kpó Jezu kpó nɔ ɖó dó nǔ lɛ́ wú é xlɛ́. Wǎgbɔ tɔn ɔ, nukúnkpénǔwútɔ́ lɛ̌dó tɔn lɛ́ kpó mɛxó agun tɔn lɛ́ kpó nɔ ɖe wě xá agun lɛ́. Mɛxó agun tɔn e gbigbɔ mímɛ́ sɔ́ lɛ́ é ɖo Klísu sín ‘alɔ ɖisí’ ɔ mɛ. (Nǔɖe. 2:1) É ɖo wɛn ɖɔ mɛxó agun tɔn énɛ́ lɛ́ ɔ, hwɛhutɔ́ wɛ nú yě, bɔ yě nɔ wa nǔ nyi do. Mɔyízi kpó Jozuwée kpó wa nǔ nyi do hweɖélɛ́nu, bɔ mɔ̌ wɛ nǔ nyí gbɔn nú mɛsɛ́dó lɛ́ lɔmɔ̌. (Kɛ́n. 20:12; Joz. 9:14, 15; Hlɔ̌. 3:23) Amɔ̌, Klísu kpo ɖo ali xlɛ́ mɛsɛntɔ́ gbejínɔtɔ́ ɔ kpó mɛxó agun tɔn lɛ́ kpó wɛ kpó sɔxwixwe kpó, bo ná lɛ́ kpo ɖo mɔ̌ wa wɛ. Nǔgbó ɔ, mǐ ɖó hwɛjijɔ lɛ́ bǐ bo ná ɖeji dó ali e xlɛ́ mǐ wɛ é ɖe gbɔn mɛ e é sɔ́ ɖó nukɔn nú nǔ lɛ́ é jí é wú. w24.02 23-24 akpá. 13-14

Égbé ɔ, mǐ sixú dó xomɛhunhun nú Jexóva, gbɔn xó ɖiɖɔ dó wǔ tɔn kpó akpakpa sɔ́ mɛ kpó, kpó nǔsumɛnukúnmɛ kpó, kpódó wǎnyíyí kpán gblamɛ. Ényí mǐ ɖo sinsɛnzɔ́ ɔ mɛ ɔ, mǐ nɔ hɛn d’ayi mɛ ɖɔ nǔ tají e gbé nya wɛ mǐ ɖe é wɛ nyí ɖɔ mǐ ná dɔn mɛ lɛ́ wá Jexóva gɔ́n, lobo d’alɔ yě bɔ yě ná nɔ ɖó linlin e mǐ nɔ ɖó dó Tɔ́ mǐtɔn wǎnyíyínɔ ɔ wú é. (Ja. 4:8) Akpakpa nɔ sɔ́ mǐ dó nǔ élɔ́ lɛ́ wú: lěe Biblu ɖɔ xó dó Jexóva wú gbɔn é ɖiɖexlɛ́ mɛ ɖěvo lɛ́, wǎnyíyí tɔn, hwɛjijɔ tɔn, nǔnywɛ́ tɔn, hlɔ̌nhlɔ́n tɔn kpó jijɔ tɔn ɖěvo e dɔn mɛ lɛ́ é kpó ɖiɖexlɛ́ yě. Mǐ nɔ lɛ́ kpa susu nú Jexóva, bo nɔ lɛ́ dó xomɛhunhun n’i, gbɔn tíntɛ́nkpɔ́n bo wa nǔ éɖɔhun gblamɛ. Ényí mǐ wa mɔ̌ ɔ, mǐ nɔ gbɔn vo bǐ mlɛ́mlɛ́ ɖo gbɛ nyanya élɔ́ mɛ. Mɛ lɛ́ sixú ɖ’ayi wú ɖɔ mǐ gbɔn vo, bo sixú kan nǔ e wú wɛ é byɔ́ yěɖée. (Mat. 5:14-16) Ée mǐ ná ɖo nǔ wa ɖó kpɔ́ xá yě wɛ ɖo gbɛzínzán gbe bǐ gbe tɔn mǐtɔn mɛ é ɔ, mǐ sixú kpé wú bo tínmɛ nǔ e wú mǐ nɔ wa nǔ gbɔn mɔ̌ é nú yě. Énɛ́ nɔ zɔ́n bɔ ayijlɔ́jlɔ́nɔ lɛ́ nɔ mɔ ɖɔ Mawu mǐtɔn dɔn émí. Ényí mǐ nɔ kpa susu nú Jexóva ɖo ali énɛ́ lɛ́ nu ɔ, xomɛhunhun dó n’i wɛ mǐ ɖe mɔ̌ nɛ́.—1 Tim. 2:3, 4. w24.02 10 akpá. 7

Cóbɔ a ná húzú klisánwun e zin é ɖé ɔ, a ɖó ná kplɔ́n nǔ tawun tawun ɖěɖěe ná d’alɔ we ɖo gbɛzínzán towe gbe bǐ gbe tɔn mɛ lɛ́ é. Nǔ énɛ́ lɛ́ ná d’alɔ we bɔ a ná yí gbe nú azɔ̌ e è ná sɔ́ d’así nú we ɖo agun ɔ mɛ lɛ́ é, mɔ agbazazɔ́, lobo wlíbo ná, bo ná dó kpé nukún dó hudó towe lɛ́, alǒ xwédo towe tɔn lɛ́ wú, bo lɛ́ vɛ́ kpó mɛ ɖěvo lɛ́ kpó. Ði kpɔ́ndéwú ɔ, kplɔ́n lěe è nɔ xa nǔ ganjí bo nɔ lɛ́ wlán nǔ ganjí gbɔn é. Biblu ɖɔ ɖɔ mɛ e nɔ zán hwenu ayǐhɔ́ngbe ayǐhɔ́ngbe bo nɔ xa Xó Mawu tɔn, lobo nɔ lɛ́ lin tamɛ d’é jí é nɔ ɖ’awǎjijɛ, bɔ nǔ nɔ lɛ́ nyɔ́ n’i. (Ðɛh. 1:1-3) Ényí a nɔ xa Biblu gbe bǐ gbe ɔ, a ná kplɔ́n bo ná tuun lěe Jexóva nɔ lin nǔ gbɔn é, bɔ énɛ́ ná d’alɔ we bɔ a ná nɔ lin tamɛ kpɔ́n ganjí, bo ná nɔ lɛ́ jlɛ́ xó dó xó wú xá mɛ ganjí. (Nǔx. 1:3, 4) Nɔví súnnu kpó nɔví nyɔ̌nu kpó mǐtɔn lɛ́ ɖó hudó súnnu e kpé wú bo ná kplɔ́n nǔ mɛ, lobo lɛ́ ɖe wě e jínjɔ́n Biblu jí lɛ́ é xá mɛ lɛ́ é tɔn. Ényí a kpé wú bo nɔ xa nǔ, bo nɔ lɛ́ wlán nǔ ganjí ɔ, a sixú sɔ́ nǔ nú xóɖiɖɔ kpó xósin kpó ɖěɖěe ná hɛn le wá nú mɛ ɖěvo lɛ́, bo lɛ́ ná hlɔ̌nhlɔ́n nǔɖiɖi yětɔn lɛ́ é. A ná lɛ́ kpé wú, bo wlán nǔ e ná d’alɔ we bɔ a ná ná hlɔ̌nhlɔ́n nǔɖiɖi towe, bo lɛ́ dó wǔsyɛ́n lanmɛ nú mɛ ɖěvo lɛ́ é ɖ’ayǐ. w23.12 26-27 akpá. 9-11

Ényí xɛsi ɖi we hǔn, lin tamɛ dó nǔ e Jexóva ná wa nú we ɖo sɔgúdo hwenu e è ná ko sú kún dó nú Satáan lɛ́ é jí. Kpléɖókpɔ́ ɖaxó 2014 tɔn sín wǎzéxlɛ́ ɖokpó xlɛ́ lěe tɔ́ ɖé ɖɔ xó ɖó kpɔ́ xá xwédo tɔn dó 2 Timɔtée 3:1-5 jí, bo ɖɔ ɖɔ xógbe lěhun lɛ́ wɛ è ná ko zán, ényí wěmafɔ énɛ́ lɛ́ ɖo lěe palaɖísi ɔ ná wá cí é ɖɔ ɖ’ayǐ wɛ ɔ nɛ́: “Gbɛ yɔ̌yɔ́ ɔ mɛ ɔ, hwenu e víví hú gǎn lɛ́ é ná tíin. Gbɛtɔ́ lɛ́ ná nɔ ba ɖɔ mɛ ɖěvo lɛ́ tɔn ní nyɔ́, yě ná nɔ yí wǎn nú dɔkun gbigbɔ tɔn lɛ́, yě ná nɔ nɔ jlɛ̌ jí, yě ná nɔ sɔ́ yěɖée hwe, yě ná nɔ kpa susu nú Mawu, yě ná nɔ se tónú nú mɛjitɔ́ yětɔn lɛ́, yě ná tuun ɖagbe nú mɛ, yě ná nɔ nɔ gbejí, yě ná nɔ ɖó wǎnyíyí jɔwámɔ tɔn, yě ná nɔ ɖó gbe kpɔ́, yě ná nɔ ɖɔ ɖagbe mɛ ɖěvo lɛ́ tɔn hwebǐnu, yě ná nɔ ɖu ɖo yěɖée jí, yě ná nɔ fá xomɛ, yě ná nɔ yí wǎn nú ɖagbewiwa, yě ná nyí mɛ ɖejidéwú, yě ná nɔ se tónú, yě ná nɔ hwíhwɛ́ yěɖée tawun, yě ná yí wǎn nú Mawu hú ɖɔ yě ná yí wǎn nú gbɛɖuɖu, yě ná nyí gbejínɔnúmawutɔ́ ɖo nukúnta bo ka ná nɔ lɛ́ yí gbe nú hlɔ̌nhlɔ́n gbejí nɔ nú Mawu tɔn ɔ; xwedó mɛ mɔ̌hun lɛ́.” A ka nɔ ɖɔ xó ɖó kpɔ́ xá xwédo towe, alǒ nǔɖitɔ́ hǎtɔ́ towe dó lěe gbɛ ná cí ɖo gbɛ yɔ̌yɔ́ ɔ mɛ é jí a? w24.01 6 akpá. 13-14

Tuun e mǐ tuun ɖɔ togun Jexóva tɔn blěbú sín nǔ nɔ nyɔ́ nukún Tɔn mɛ é nɔ dó wǔsyɛ́n lanmɛ nú mǐ kpɔ́n. Biblu ɖɔ: ‘Nǔ nɔ víví nú Jexóva ɖo togun tɔn mɛ.’ (Ðɛh. 149:4) Amɔ̌ hweɖélɛ́nu ɔ, awakanmɛ nɔ wá kú mɛɖé lɛ́ káká bɔ yě sixú kanbyɔ́ ɖɔ: ‘Nǔ ce ka nɔ nyɔ́ Jexóva nukúnmɛ dóó a?’ Hweɖélɛ́nu wá su bɔ mɛsɛntɔ́ Jexóva tɔn gbejínɔtɔ́ hwexónu tɔn ɖé lɛ́ wá ɖí xwi xá linlin mɔ̌hun lɛ́. (1 Sam. 1:6-10; Jɔb. 29:2, 4; Ðɛh. 51:13) Biblu ɖe xlɛ́ nyi wɛn ɖɔ gbɛtɔ́ hwɛhutɔ́ lɛ́ sín nǔ sixú nyɔ́ Jexóva nukúnmɛ. Gbɔn nɛ̌ é? Mǐ ɖó ná tɛ́n kpɔ́n bo ɖi nǔ nú Jezu Klísu, lobo bló batɛ́mu. (Jaan 3:16) Mɔ̌ mɛ ɔ, mǐ nɔ ɖe xlɛ́ ɖo agbawungba ɖɔ hwɛ mǐtɔn lɛ́ vɛ́ nú mǐ, bo ko d’akpá nú Mawu ɖɔ mǐ ná wa jlǒ tɔn. (Mɛ. 2:38; 3:19) Ényí mǐ ɖe afɔ énɛ́ lɛ́ bá zun xɔ́ntɔn xá Jexóva ɔ, xomɛ nɔ hun i. Ényí mǐ kpo ɖo nǔ e wú mǐ kpé é bǐ wa wɛ, bo nɔ zán gbɛ sɔgbe xá akpá e mǐ dó nú Jexóva bo zé mǐɖée jó n’i é ɔ, nǔ mǐtɔn nɔ nyɔ́ nukún tɔn mɛ bɔ é nɔ sɔ́ mǐ dó ɖó xɔ́ntɔn vívɛ́.—Ðɛh. 25:14. w24.03 26 akpá. 1-2

Ényí acɛkpikpa e ɖo to nu lɛ́ é ɖe gbe ɖɔ mǐ ní ɖó mawuxóɖiɖɔ te ɔ, mǐ sixú kpo ɖo wɛn ɖagbe ɔ jlá wɛ, dó xlɛ́ ɖɔ mǐ ɖo nǔ wa wɛ ahwanvú lɛ́ ɖɔhun. Mǐ sixú kú d’é jí ɖɔ Jexóva ná d’alɔ mǐ, bɔ mǐ ná wa sinsɛnzɔ́ mǐtɔn. Énɛ́ wú ɔ, nɔ xo ɖɛ, bo byɔ́ akɔ́nkpinkpan kpó nǔnywɛ́ kpó. Nɔ byɔ́ Jexóva ɖɔ é ní d’alɔ we bónú a ná ɖí xwi xá tagba lɛ́. Mǐ mɛ gěgé wɛ ɖo wǔvɛ́ se wɛ ɖo agbaza, alǒ lěe nǔ nɔ cí nú mɛ é linu; nǔ élɔ́ lɛ́ ɖo nǔ e nɔ zɔ́n nǔ mɔ̌hun lɛ́ é mɛ: Kú mɛvívɛ́ ɖé tɔn, tagba xwédo tɔn, yadónúmɛ, alǒ tagba ɖěvo lɛ́. Gɔ́ ná ɔ, jɛmɛjí kpó ahwan kpó zɔ́n bɔ wǔvɛ́ mɔ̌hun lɛ́ gěgé nu didɛ ɖe lɛ́ vɛ́ wǔ d’é jí. Nɔ ɖɔ lěe nǔ cí nú we é nyi wɛn nú Jexóva. Nɔ ɖɔ ninɔmɛ towe n’i lěe a ná ɖɔ nú xɔ́ntɔn vívɛ́ ɖé gbɔn é. Ðeji ɖɔ Jexóva “ná wa azɔ̌ tɔn.” (Ðɛh. 37:3, 5) Ényí mǐ nɔ ɖó kan dó ɖɛxixo wú ɔ, é ná d’alɔ mǐ bɔ mǐ ná “dɛ ɖo wǔvɛ́ lɛ́ nu.” (Hlɔ̌. 12:12) Jexóva tuun wǔvɛ́ e nu dɛ ɖe wɛ mɛsɛntɔ́ tɔn lɛ́ ɖe lɛ́ é; “yě sú xó ɔ, é nɔ se.”—Ðɛh. 145:18, 19. w23.05 5-6 akpá. 12-15

Ényí mǐ ɖo gbeta tají lɛ́ kɔn ná wa wɛ ɔ, é byɔ́ ɖɔ mǐ ní nɔ mɔ nukúnnú jɛ “nǔ e nyí jlǒ Jexóva tɔn é” mɛ, bɔ énɛ́ gúdo ɔ, mǐ ná nɔ wa nǔ sɔgbe xá. (Efɛ́. 5:17) Ényí mǐ nɔ ba nǔgbódodó Biblu tɔn e ɖɔ xó dó ninɔmɛ mǐtɔn wú lɛ́ é hǔn, linlin e Mawu ɖó dó xó ɔ wú é ba wɛ mǐ ɖe mɔ̌ nɛ́. Énɛ́ gúdo ɔ, ényí mǐ nɔ wa nǔ sɔgbe xá nǔgbódodó tɔn lɛ́ ɔ, mǐ ná kpé wú bo ná nɔ wá gbeta ɖagbe lɛ́ kɔn. Kɛntɔ́ mǐtɔn Satáan e nyí “mɛ nyanya ɔ” é nɔ ba ná bló bɔ alɔnu mǐtɔn ná ján ɖo gbɛ ɔ sín nǔ lɛ́ kɔn sɔmɔ̌, bɔ mǐ sɔ́ ná mɔ hwenu ɖě dó sɛn Mawu ǎ. (1 Jaan 5:19) É bɔ wǔ tawun ɖɔ klisánwun ɖé ní jɛ ayi sɔ́ ɖó nǔɖókan lɛ́, wěmaxɔmɛ kpó azɔ̌ kpó jí jí, bo sɔ́ ná nɔ sɔ́ ayi ɖó ali tootóbú e hun n’i bɔ é ná sɛn Jexóva é jí ǎ. Ényí nǔ nyí mɔ̌ hǔn, xlɛ́xlɛ́ wɛ énɛ́ ɖe ɖɔ linlin gbɛ ɔ tɔn ko ɖo nǔ wa dó wǔ tɔn wɛ. Nǔ énɛ́ lɛ́ nylá dandan wɛ ǎ, loɔ, yě ɖó ná nɔ nɔ tɛn nukɔntɔn ɔ mɛ ɖo gbɛzán mǐtɔn mɛ gbeɖé ǎ. w24.03 24 akpá. 16-17