Juan

10 “Pudno unay kunak kadakayo, Ti saan a sumrek iti pakayaponan ti karnero babaen iti ruangan+ no di ket kumalay-at iti sabali a lugar, dayta ket mannanakaw ken managsamsam.+ 2 Ngem ti sumrek babaen iti ruangan+ ket pastor+ dagiti karnero.+ 3 Ti agay-aywan iti ruangan+ ilukatanna daytoy, ket dagiti karnero+ imdenganda ti timekna, ken ayabanna nga inaganan dagiti bukodna a karnero ken iturongna nga iruar ida. 4 No mairuarna aminen a kukuana, mapan iti sanguananda, ket sumurot kenkuana dagiti karnero,+ agsipud ta ammoda ti timekna.+ 5 Saandanto a pulos suroten ti ganggannaet no di ket itarayanda,+ agsipud ta saanda nga ammo ti timek dagiti ganggannaet.”+ 6 Ni Jesus sinaona kadakuada daytoy a panangidilig; ngem saanda nga ammo no ania ti kaipapanan ti bambanag a sasawenna kadakuada.+

7 Gapuna kinuna manen ni Jesus: “Pudno unay kunak kadakayo, Siak ti ruangan+ dagiti karnero. 8 Amin dagidiay immay a mangsandi kaniak mannanakawda ken managsamsam;+ ngem saan a nagimdeng kadakuada dagiti karnero.+ 9 Siak ti ruangan;+ siasinoman a sumrek babaen kaniak maisalakanto, ket sumrek ken rummuarto ket makasarak iti pagaraban.+ 10 Ti mannanakaw+ saan nga umay malaksid no agtakaw ken pumatay ken mangdadael.+ Immayak tapno maaddaanda iti biag ket siwawadwad a maaddaanda iti dayta. 11 Siak ti nasayaat a pastor;+ ti nasayaat a pastor isukona ti kararuana maigapu kadagiti karnero.+ 12 Ti patangtangdanan+ a tao, a saan a pastor ken saan a makinkukua kadagiti karnero, makitana nga um-umay ti lobo ket baybay-anna dagiti karnero ket agtalaw—ket rabsuten ida ti lobo ken warawaraenna ida+— 13 agsipud ta maysa a patangtangdanan+ a tao ken saan a maseknan kadagiti karnero.+ 14 Siak ti nasayaat a pastor, ket am-ammok dagiti karnerok+ ket dagiti karnerok am-ammodak,+ 15 no kasano a ti Ama am-ammonak ken am-ammok ti Ama;+ ket isukok ti kararuak maigapu kadagiti karnero.+

16 “Ket addaanak iti sabsabali a karnero,+ nga awan iti daytoy a pagyaponan;+ masapul met nga iyegko dagidiay, ket imdengandanto ti timekko,+ ket agbalindanto a maymaysa nga arban, maymaysa a pastor.+ 17 Daytoy ti makagapu nga ay-ayatennak ti Ama,+ agsipud ta isukok ti kararuak,+ tapno maawatko manen dayta. 18 Awan ti tao a nangikkat iti dayta manipud kaniak, no di ket isukok dayta iti bukodko a nakem. Addaanak iti autoridad a mangisuko iti dayta, ken addaanak iti autoridad a mangawat manen iti dayta.+ Ti bilin+ maipapan itoy inawatko ken Amak.”

19 Rimsua manen ti panagsusupadi+ iti nagbabaetan dagiti Judio gapu kadagitoy a sasao. 20 Adu kadakuada ti nagkunkuna: “Adda sairona+ ken agmauyong. Apay nga agimdengkayo kenkuana?” 21 Dadduma kunada: “Dagitoy ket saan a sasao ti tao nga adda sairona. Ti sairo kabaelanna kadi a luktan ti matmata dagiti bulsek a tattao?”

22 Iti dayta a tiempo naangay idiay Jerusalem ti piesta ti dedikasion. Panawen idi ti lam-ek, 23 ket magmagna idi ni Jesus idiay templo iti kolonada ni Solomon.+ 24 Gapuna isu linawlaw dagiti Judio ket rinugianda a kunaen kenkuana: “Kasano kabayag a paggaggagarem dagiti kararuami? No sika ti Kristo,+ ibagam kadakami a sipaprangka.”+ 25 Simmungbat kadakuada ni Jesus: “Imbagak kadakayo, ket kaskasdi a saankayo a mamati. Dagiti trabaho nga ar-aramidek iti nagan ni Amak, saksian dagitoy ti maipapan kaniak.+ 26 Ngem saankayo a mamati, agsipud ta saankayo a paset ti karnerok.+ 27 Imdengan dagiti karnerok+ ti timekko, ket am-ammok ida, ket surotendak.+ 28 Ket ipaayak ida iti agnanayon a biag,+ ket nikaanoman saandanto a pulos madadael,+ ket awanto ti asinoman a mangrabsut kadakuada iti imak.+ 29 Ti inted kaniak ni Amak+ ket maysa a banag a dakdakkel ngem ti amin a dadduma a banag,+ ket awan makarabsut kadakuada manipud iti ima ti Ama.+ 30 Siak ken ti Ama maymaysakami.”+

31 Naminsan pay a pimmidut dagiti Judio iti batbato tapno uborenda.+ 32 Simmungbat kadakuada ni Jesus: “Nangipakitaak kadakayo iti adu a nasayaat nga aramid manipud iti Ama. Iti ania kadagidiay nga aramid ti panguboranyo kaniak?” 33 Simmungbat kenkuana dagiti Judio: “Uborendaka, saan a gapu iti nasayaat nga aramid, no di ket gapu iti panagtabbaaw,+ kasta met agsipud ta, nupay maysaka a tao, pagbalinem ta bagim a maysa a dios.”+ 34 Simmungbat kadakuada ni Jesus: “Saan aya nga adda a naisurat iti Lintegyo,+ ‘Kinunak: “Dakayo ket didios”’?+ 35 No inawaganna a ‘didios’+ dagidiay a maibusor kadakuada dimteng ti sao ti Dios, ket kaskasdi a ti Kasuratan saan a mabalin a mawaswas,+ 36 kunaenyo aya kaniak a pinagsanto ti Ama ken imbaonna iti lubong, ‘Agtabtabbaawka,’ agsipud ta kinunak, siak ti Anak ti Dios?+ 37 No diak aramiden dagiti trabaho+ ni Amak, dikay mamati kaniak. 38 Ngem no aramidek ida, uray no saankayo a mamati kaniak, patienyo dagiti aramid,+ tapno maammuanyo ken agtultuloy a maammuanyo a ti Ama naikaykaysa kaniak ken naikaykaysaak iti Ama.”+ 39 Gapuna pinadpadasda manen a kemmegen;+ ngem nakaliklik iti panangkemmegda.+

40 Gapuna napan manen idiay ballasiw ti Jordan iti lugar a nangbabautisaran ni Juan+ idi damo, ket nagyan sadiay. 41 Ket immay kenkuana ti adu a tattao, ket rinugianda a kinuna: “Ni Juan, kinapudnona, saan a nagaramid iti maysa a pagilasinan, ngem pudno amin ti adu a banag a kinuna ni Juan maipapan iti daytoy a tao.”+ 42 Ket adu ti naaddaan iti pammati kenkuana sadiay.+