Juan

18 Idi naisaonan dagitoy a banag, napan ni Jesus agraman dagiti adalanna iti ballasiw ti ayus ti Kidron+ iti kalam-ekna a sadiay adda maysa a minuyongan, ket isu ken dagiti adalanna simrekda iti dayta.+ 2 Ita ni Judas, a mangliput kenkuana, ammona met ti lugar, agsipud ta adu a daras a ni Jesus nakitaripnong sadiay kadagiti adalanna.+ 3 Gapuna innala ni Judas ti bunggoy dagiti soldado ken dagiti opisial ti panguluen a papadi ken dagiti Fariseo ket dimtengda sadiay nga addaan kadagiti aluten ken kadagiti pagsilawan ken ig-igam.+ 4 Ni Jesus, ngarud, yantangay ammona ti amin a bambanag a mapagteng kenkuana,+ rimmuar ket kinunana kadakuada: “Siasino ti sapsapulenyo?” 5 Simmungbatda kenkuana: “Ni Jesus a Nazareno.”+ Kinunana kadakuada: “Siak dayta.” Itan ni Judas, a mangliput kenkuana,+ agtaktakder met idi a kaduada.

6 Nupay kasta, idi kinunana kadakuada: “Siak dayta,” nagsanudda+ ket natumbada iti daga. 7 Gapuna inimtuodna manen kadakuada: “Siasino ti sapsapulenyo?” Kinunada: “Ni Jesus a Nazareno.” 8 Simmungbat ni Jesus: “Imbagak kadakayo a siak dayta. Ngarud, no siak ti sapsapulenyo, bay-anyo dagitoy a mapan”; 9 tapno matungpal ti sao a kinunana: “Kadagidiay nga intedmo kaniak awan ti napukawko nga uray maysa.”+

10 Idin ni Simon Pedro, ta adda kampilanna, inasutna dayta ket kinabilna ti adipen ti nangato a padi ket piningasanna ti makannawan a lapayagna.+ Ti nagan ti adipen ket Malco. 11 Ni Jesus, nupay kasta, kinunana ken Pedro: “Ikabilmo ti kampilan iti kalubanna.+ Ti kopa nga inted kaniak ti Ama, saan aya a maiparbeng unay nga inumek+ dayta?”

12 Idin ti bunggoy dagiti soldado ken ti komandante ti militar ken dagiti opisial dagiti Judio kinemmegda ni Jesus ket pinarautanda, 13 ket impanda nga umuna ken Anas; ta isu katugangan ni Caifas, a nangato a padi iti dayta a tawen.+ 14 Iti kinapudnona, ni Caifas daydiay nangpatigmaan kadagiti Judio a pagimbaganda a ti maysa a tao matay maigapu kadagiti umili.+

15 Ita ni Simon Pedro kasta met ti sabali pay nga adalan simmursurotda ken Jesus.+ Dayta nga adalan ket am-ammo ti nangato a padi, ket simrek a naikuyog ken Jesus iti paraangan ti nangato a padi, 16 ngem sitatakder idi ni Pedro idiay ruar iti ruangan.+ Gapuna daydi sabali nga adalan, nga am-ammo ti nangato a padi, rimmuar ket kinasaona ti agay-aywan ti ruangan ket inserrekna ni Pedro. 17 Ti adipen a babai, nga agay-aywan iti ruangan, ngarud kinunana ken Pedro: “Maysaka kadi met kadagiti adalan daytoy a tao?” Kinunana: “Saan.”+ 18 Itan dagiti adipen ken dagiti opisial agtaktakderda idi iti aglawlaw, ta nangaramidda iti dumardarang a beggang,+ agsipud ta nalam-ek idi, ket nagin-inudoda. Ni Pedro nakipagtaktakder met kadakuada ken nagin-inudo.

19 Ket idin ti panguluen a padi sinaludsodanna ni Jesus maipapan kadagiti adalanna ken maipapan iti sursurona. 20 Simmungbat kenkuana ni Jesus: “Silalatak a nagsaoak iti lubong. Kankanayon a nangisuroak iti sinagoga ken idiay templo,+ a paguurnongan dagiti amin a Judio; ket awan ti sinaok iti nalimed. 21 Apay a saludsodannak? Saludsodam dagidiay nakangngeg no ania ti sinaok kadakuada. Kitaem! Ammo dagitoy no ania ti sinaok.” 22 Kalpasan a naisaona dagitoy a banag, maysa kadagiti opisial a nakamattider tinungpana+ ni Jesus iti rupa ket kinunana: “Kasta kadi ti wagas a panagsungbatmo iti panguluen a padi?” 23 Simmungbat kenkuana ni Jesus: “No di umiso ti panagsaok, saksiam ti maipapan iti dakes; ngem no umiso, apay a kabilennak?” 24 Idin ni Anas pinaipanna a sipaparaut ken Caifas a nangato a padi.+

25 Ita agtaktakder idi ni Simon Pedro ken agin-inudo. Idin kinunada kenkuana: “Saan aya a maysaka met kadagiti adalanna?” Inlibakna dayta ket kinunana: “Saan.”+ 26 Maysa kadagiti adipen ti nangato a padi, a kabagian ti lalaki a ti lapayagna piningasan ni Pedro,+ kinunana: “Saan kadi a nakitaka idiay minuyongan a kaduanaka?” 27 Nupay kasta, inlibak manen ni Pedro dayta; ket dagus a nagtaraok ti maysa a kawitan.+

28 Idin impanda ni Jesus idiay palasio ti gobernador+ manipud ken Caifas. Agsapa itan iti aldaw. Ngem isuda saanda a simrek iti palasio ti gobernador, tapno saanda a matulawan+ no di ket mabalinda a kanen ti paskua. 29 Ngarud ni Pilato rimmuar a napan kadakuada ket kinunana: “Ania a pammabasol ti iyegyo a maibusor iti daytoy a tao?”+ 30 Kas sungbat kinunada kenkuana: “No daytoy a tao saan a managaramid iti dakes, saanmi koma nga inyawat kenka.” 31 Gapuna kinuna kadakuada ni Pilato: “Dakayo a mismo alaenyo ket ukomenyo sigun iti lintegyo.”+ Kinuna kenkuana dagiti Judio: “Saan a nainkalintegan kadakami ti mangpapatay iti asinoman.”+ 32 Kastoy, tapno matungpal ti sao ni Jesus a kinunana tapno ipamatmat no ania a kita nga ipapatay ti naikeddeng a pakatayanna.+

33 Gapuna simrek manen ni Pilato iti palasio ti gobernador ket inayabanna ni Jesus ket kinunana kenkuana: “Sika kadi ti ari dagiti Judio?”+ 34 Simmungbat ni Jesus: “Kunkunaem aya daytoy manipud iti bukodmo a parnuay, wenno ti sabsabali imbagada kenka ti maipapan kaniak?”+ 35 Simmungbat ni Pilato: “Maysaak aya a Judio? Ti bukodmo a nasion ken ti panguluen a papadi inyawatdaka kaniak.+ Ania ti inaramidmo?” 36 Simmungbat ni Jesus:+ “Ti pagariak saan a paset daytoy a lubong.+ No koma ti pagariak paset daytoy a lubong, nakibakal koma dagiti agserserbi kaniak+ tapno saanak a mayawat kadagiti Judio. Ngem, iti kinaagpaysuanna, ti pagariak saan a manipud itoy a gubuayan.” 37 Gapuna kinuna kenkuana ni Pilato: “Ala ket, ngarud, maysaka kadi nga ari?” Simmungbat ni Jesus: “Sika ti agkunkuna a maysaak nga ari.+ Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.+ Tunggal maysa nga adda iti dasig ti kinapudno+ imdenganna ti timekko.”+ 38 Kinuna kenkuana ni Pilato: “Ania ti kinapudno?”

Ket kalpasan a sinaona daytoy, isu rimmuar manen a napan kadagiti Judio ket kinunana kadakuada: “Awan masarakak a biddut kenkuana.+ 39 Mainayon pay, adda kadawyanyo a rebbeng a luk-atak kadakayo ti maysa a tao iti paskua.+ Kayatyo kadi, ngarud, a luk-atak kadakayo ti ari dagiti Judio?” 40 Idin nagpukkawda manen, a kunkunada: “Saan a daytoy a tao, no di ket ni Barabas!” Ita ni Barabas maysa idi a mannanakaw.+