Iisha Jehová naari itiur enentaimtitniuitiaj?

1, 2. Jesuska Jehová naarin ti shiir enentaimtiniaiti urukamtai ainis taji?

Jesuska Jehová naarin ti penker enentaimtiniaiti. Nuik nekaamajnia aintsan Jesuska Jehová naari penker ujukamu ati tusa jakamiayi (Mar. 14:36; Isr. 10:​7-9). Jesuska mil uwi uunt ajas pujamun amuk ni apari tuke uunt ajas pujusat tusa susattawai. Nu turunamtai Jehová naari tuke arantukma atatui (1 Kur. 15:​26-28). Jesús Jehovanun warinkisha turayana nunaka Jehovan anea asa ainis turaiti.

² Jesuska ni apari akupkamu asa ju nunkanam tamiayi (Juaṉ 5:43; 12:13). Ni nemarniuri armiania nuna Jehová naarin tura Jehová urukuit nunasha nekamtikiawarmiayi (Juaṉ 17:​6, 26). Jehová naari pachis aentstikia najanachminian najanamiayi tura chikich aentsnasha Jehová naarin pachis unuiniamiayi (Juaṉ 10:25). Jesús Yuusan ni unuiniamuri armiania nuna seatainiak junis timiayi: “Ame kakaram náarmiji̱a̱i̱ wáinkiarta” tu timiayi (Juaṉ 17:11). Jesuska ni apari naarin ti shiir enentaimtiniuyayi. Ainis asamtaisha chikich aentska Kristu aentsuitji tuiniayatcha urukamtaiya Jehová naari nekainiatsu tura ni naarincha ticha ainia?

3. Ju unuimiateamunmasha wari nekaattaj?

³ Kristu aentstisha Jesús Jehová naarin itiur enentaimtimia aitkiasrik enentaimtustai tusar kakaji (1 Pit. 2:21). Yuusa chichamen etserainiana nuka Jehovanun etserin ainiana nu nekaattaji (Mat. 24:14). Tura iisha Jehová naarisha itiur enentaimtitniuitiaj nusha nekaattaji.

“YUUSKA WINIA NAARUN TAKAKU ARAT TUSA NI IRUNTRAMURIN NAJANAITI”

4. a) Jesús nayaimpiniam wesattuk ajas nin nemar wearmiania nuna waritmia? b) Hechos akankamu 15 nuisha wariniua nekaamniaitiaj?

⁴ Jesús nayaimpiniam wesattuk ajas ni nemar wearmiania nuna junis timiayi: “Yuusa kakarmari sunastatrume tura nujai kakaram ajasrum Jerusalennum, Judeanmasha nuya Samarianmasha tura ashi nunkanam winiaru etserkattarme” tu timiayi (Hech. 1:8 TNM). Jesús ainis tiniu asamtai Yuusa chichamenka aya Israelnuman etserkachartiniuyayi antsu ashi nunkanam etserna asamtai ashi aents Kristu aents ajasarminiuyayi (Mat. 28:​19, 20). Jesuska “winiaru etserkattarme” tu timiayi. Kristu aents ajainiaka ayatek Jesusnankeash etserkartiniuya turutskesha Jehovancha nekaawartiniash armia? Hechos akankamu 15 nui nuna nekaamniaitji.

5. Jesusa unuiniamuri armiania nu tura chikitcha anairamu armiania nusha Jehová naarin shiir enentaimtuinia asar wari tiarmia? (Nakumkamusha iista).

⁵ 49 uwitin judío aentscha Kristu aents ajasartaj tuiniakka warinia turawartiniuya nuna aujmatkatai tusar Jesusa unuiniamuri armiania nu tura chikichcha anairamu armiania nujai iruntrarmiayi. Nu tsawantin iruntrar aujmatainiak pujuiniamun amustatuk ajasmanum Santiago, Jesusa yachi, junis timiayi: “Yuus warinia itiurkait nuna Symeón ujatmakji. Yuuska winia naarun takaku arat tusa ni iruntramurin najanaiti tu timiayi”. Nuyasha Yuusna etserin Amós timiania nuna pachis junis timiayi: “Ashí nuṉkanmaya̱ aents, Israer shuarcha ainia nu winia náarun páchinia nu Winian e̱a̱tkarat tusan túrattajai” tu timiayi (Hech. 15:14 TNM; 15: 15-18). Ainis asamtai Kristu aents ajasartiniuyania nuka aya Jehová nunak nekachartiniuyayi antsu Jehová naarijiai nekaamu artiniuyayi. Tura Kristu aents ajasartiniuyania nuka Jehová naarincha nekamtikiatin armiayi.

6, 7. Jesussha wari urukamtaiya ju nunkanmasha tamia?

⁶ Jesusa naarinkia Jehová uwemtikiartiniaiti tu tamaiti. Ainis asamtai aents uwemprarat tusa Jehová Jesusan akupkamiayi. Jesuska ii tumashrin akikmaktaj tusa jarutramkamiaji (Mat. 20:28). Jesús ii tumashrin akikmakmiania nui Jehová tsankurtampraitji nuyasha tuke iwiaku pujumniaitji (Juan 3:16 TNM).

⁷ Adán Evajainkia Jehovan umirkacharu asar tuke iwiaku pujuarminiaitiat jakarmiayi. Ainis turawaru asarmatai aentstikia uwemtikramu atin utsumnamiayi (Náṉ. 3:​6, 24). Jesús ju nunkanam tamiania nuinkia ayatek ii tumashrin akikmaktaj tusanka tachamiayi antsu nekaska Jehová naarin tsanumpramu asamtai ayampruktaj tusa tamiayi (Náṉ. 3:​4, 5). Jehovaka yajauchia nunaka penke najanchana nuna tura anenkratniuana nuna aentska paant nekaawartiniuyayi. Jesuska Jehová akupkamu asa ashi ni turamujai Jehová naarinkia ti arantukma ati tusa warinkisha turamiayi.

8. Jesusa unuiniamurisha warinia paant nekaawartiniuya?

⁸ Judío aents tura judío aentscha Kristu aents ajainiaka Jehová uwemtikraruyania nuna paant nekaawartin armiayi (Juaṉ 17:3). Jesuska Yuus akupkamuyania aitkiasan Kristu aents armiania nusha Jehová naarin etserin ainia tu nekaamu artiniuyayi. Uwemprartasa wakeruiniakka Jehová naarin ti arantukartiniuyania nunasha nekaawartin armiayi (Hech. 2:​21, 22 TNM). Ainis asamtai Kristu aents ajainiaka Jesusnan tura Jehovanuncha nekaawartin armiayi. Juan akankamu 17 nui amuak junis tawai: “‘Nú shuaran Ame Náarmin nekaawarti tusan jintintiáitjiai tura nu arantcha jintintiáttajai. Núja̱i̱ṉkia Winia anenniuitmena nuka niin atí tura Wisha niin atajai’ tú aujsamiayi Jesús” (Juaṉ 17:26).

“ATUMKA WINIA ETSERNIUITRUME”

9. Kristu aentstisha Jehová naari itiur enentaimtitniuitiaj?

⁹ Kristu aentstikia Jehová naarin ti arantukma ati tusar wakeriniaitji (Mat. 6:​9, 10 TNM). Iikia Jehová naari ti shiir enentaimta asar warinkisha turiniaitji. Iwianch Jehovan tsanumpramiania nuka waitiaiti ainis tau asar tura Jehová naari ti arantukma ati tusar iisha wari turatniuitiaj?

10. Isaías akankamu 42 juarki 44 timianaisha wariniuna aujmatea? (Isayas 43:9; 44:​7-9; nakumkamusha iista).

¹⁰ Isaías papiinium akankamu 42 juarki 44 timianainkia Jehová naari ti arantukma ati tusar iisha wari turatniuitiaj nuna aujmatui. Nuinkia yait nekas Yuussha nuna nekaattsar aujmattsamun aujmatui. Nuinkia yuusaitjiai tuinian Jehová nekas yuusaitkiurmeka watskea iniakmamsakua tu tawai. Nuyasha yuusaitjiai tuiniana nuna junis tawai: Watskea aents nuna wainkiaru tura antukaru ainiana nusha itiatarum tu tawai. Ainis tutaisha tujintianian nuinkia aujmateawai (Isayas 43:9; 44:​7-9 aujsata).

11. Isaías 43:​10-12 TNM nuisha Jehová nin enentaimtuiniana nunasha wari ta?

¹¹ (Isaías 43:​10-12 TNM aujsata). Jehovaka nin enentaimtuiniana nuna atumka winia etserniuitrume tura wikia Yuusaitjiai tu tawai. Tura junasha tawai: “Chíkich yus ¿áminkiait?” tu tawai (Isa. 44:8). Ii najanmajai tura ii chichamujai Jehovaka nekas Yuus ana nu paant nekamtikiamniaitji tura aya ninkia ti arantukma atiniaiti. Iwianch itiurchat amajtamkurincha iikia Jehová anea asar ii iwiakmarincha ni penker iiyana nu turiniaitji. Iikia Jehová naari ti arantukma ati tusar ainis turiniaitji.

12. Isayas 40:​3, 5 nui tana nusha itiur uminkiamia?

¹² Aents Jehová jintin iwiarkatniuyania nuna Isaías timiayi (Isa. 40:3). Nusha itiur uminkiamia? Juanka Jesús Yuus akupkamu tatin asamtai nuna etserkamiania nui uminkiamiayi (Mat. 3:3; Mar. 1:​2-4; Ruk. 3:​3-6). Nuyasha Isaías junis timiayi: “Nuya̱ṉka Uunt Yus ni péṉkeri̱n paant awajsattawai” tu timiayi (Isa. 40:5). Isaías timiania nuka Jesús ju nunkanam tamiania nui Jehová urukuit aitkiasan turimiania nui uminkiamiayi (Juaṉ 12:45).

13. Jesús turamiania aitkiasrik turatai tusar wari turatniuitiaj?

¹³ Iisha Jesusa aintsan Jehovanu etserniuitji tura ni naari penker ujukamu ati tusar wakeriniaitji. Tuma asar Jehová warinia najankait nunanu chikich aents ujau ainiaji. Nuyasha Jesús ni apari naari ti arantukma ati tusa warinia turamia tura uruma nuisha warinia turatta nuna etserkatniuitji (Tur. 1:8). Jesuska Jehovanu etserniuiti. Iisha niya aintsan Jehovanu etserniuitji (Apoc. 1:5 TNM). Iisha Jehová naari itiur enentaimtitniuitiaj?

JEHOVÁ NAARI TI SHIIR ENENTAIMTA ASAR ITIURNIUITIAJ?

14. Salmo 105:3 TNM nui tana aintsan iisha Jehová naari itiur enentaimtiniaitiaj?

¹⁴ Warasmajai Jehová naari etsereaji (Salmo 105:3 TNM aujsata). Jehovaka winia naarun chikich aentsun ujakarat tusa ti wakeriniaiti (Jrm. 9:​23, 24; 1 Kur. 1:31; 2 Kur. 10:17). Jehovaka ii Yuusri asamtai iikia ti shiir enentaimniuitji. Iikia Jehová naari ti arantukma tura penker ujukamu ati tusar wakeriniaitji. Takatnum pujakrisha, unuimiatainiam pujakrisha turutskesha ii irutkamurin pujakrisha nuyanchuka tuinsha pujakrisha natsamtsuk testigo de Jehovayaitjiai titiniaitji. Iwianchkia Jehová naarin etserkarain tusa nakitiawai (Jrm. 11:21; Apoc. 12:17 TNM). Iwianchkia ni aentsrijiai aentska Jehová naarin kajinmatkiarat tusa wakeruiniawai (Jrm. 23:​26, 27). Iikia ni naari shiir enentaimta asar niniu aru arumen etserkatin wakeriniaitji (YKan. 5:11; 89:16).

15. Jehová naari pachisar enentaimtustai tusar wari itiurkatniuitiaj?

¹⁵ Jehová ni naari pachisar enentaimtiniaitji (Juir 2:32; Rom. 10:​13, 14 TNM). Jehová naari pachisar enentaimtustin tamaka ni urukuit nu penker nekatniuitiajnia nuiti, tura nekas yainkratniuiti tusha enentaimsatniuitji. Nuyasha ni yainkiat tusar seatniuitiajnia nuiti (YKan. 20:7; 99:6 TNM; 116:4; 145:18). Nuyasha chikich aents Jehovanu ujainiakur ene enentaimia asar yapajniawar Jehovan umirkarat tusar utsuktiniaitiajnia nuiti (Isa. 12:4; Hech. 2:​21, 38 TNM).

16. Iwianchkia waitriniaiti tu enentaimiu asar wari itiurkatniuitiaj?

¹⁶ Jehová naari ayamprakur itiurchat katsunteaji (San. 5:​10, 11). Iwianchkia waitriniaiti ainis enentaimiu asar ti itiurchat nankaamakrisha Jehovainia kanakchattaji. Job pujumiania nu tsawantin iwianch Jehovan enentaimtuiniana nuna junis timiayi: “Aentska ni iwiakmarin uwemprattsa ni achiakna nuna mash susattawai” tu timiayi (Job 2:4 TNM). Aentska aya penker pujuiniak Jehovanka enentaimtiartatui antsu itiurchat nankaamainiakka ajapa iniaisartatui tu taku iwianch ainis timiayi. Iwianch timiania nuka waitiaiti tu enentaimiu asa Jobka itiurchat nankaamaksha Jehovan tuke umirkamiayi. Iwianch Jehovan iniaisarat tusa warinkisha turakuisha iisha Job turamiania aitkiasrik turamniaitji. Jehovaka ni naarin etserkarat tusa tuke penker waitmaktatji (Juaṉ 17:11).

17. 1 Pítiur 2:12 nui tana aintsan Jehová naarin chikich aents nekaawarat tusar itiurkatniuitiaj?

¹⁷ Jehová naari ti arantiniaitji (Neka. 30:9; Jrm. 7:​8-11). Aentska testigo de Jehovayaitiajnia nuna nekarmainiaji. Ainis asamtai ii wari najaneaj nujai Jehová paant ujukamniaitji nuyanchuka natsan ujukamniaitji (1 Pítiur 2:12 aujsata). Tuma asar ii chichamujai tura ii najanmajai Jehová naari paant awajsattsar wakeraji. Nu turakur tunaartiniaitkiursha Jehová naari chikich aents nekamtikiawartatji.

18. Nekaska Jehová naari paant ujukattsar wakerin asar wari najanniuitiaj? (Nota tana nusha iista).

¹⁸ Nekaska Jehová naari paant ujukatin wakeraji (YKan. 138:2). Iikia Jehová anea asar ni penker iiyana nu najanniuitji. Ainis turakrin aentska wishikramin ainiaji turutskesha kajertamin ainiaji.a Jesuska Jehová naari ti arantukma ati tusa ti waitias jakamiayi. Hebreos 12:​2-4 TNM nui tana aintsan Jesuska “numiniam ajintia natsanmai amajmaitiat” Jehovanka tuke umirkamiayi. Ninkia Jehovan nekaska umirkatniun enentaimmiayi (Mat. 26:39).

19. Ameja Jehová naari itiur enentaimtiniaitiam?

¹⁹ Iikia Jehová naari ti shiir enentaimtaji tura Jehovanu etserin tu nekaamu atinkia ti penker iiyaji. Aents wishikramainiakrincha tura kajertamainiakrincha iikia nui enentaimsar majat enentaimtsuji. Iikia nekaska Jehová naari penker ujukattsar wakeraji. Ainis asamtai iwianch warinkisha turakuisha iikia Jehová naari tuke paant ujukartai. Nuyasha Jesusa aintsan Jehová naari tuke shiir enentaimtusartai.