Le Yɛɛ Naŋ Nɔ yɛ Miŋ Nɔ Siooŋnde le Chɛhowa?

1-2. A mɛɛ Sam 25:​14 dimi yɛ, yɛɛ naŋ nɔ yɛ miŋ tosa le miŋ wa o chaŋyɛi kpɛɛluŋnde niŋ a Chɛhowa?

SULIŊNDA sɔvɛ kuɛɛ mala yɛ naa miŋ manda chaŋyɛi naŋ nɔ a waŋndo ve? Naapum a cho muli maa, wanaa cho o chaŋyɛi kpɛɛluŋnde niŋ nda nɔ ma kaaliaŋ, nduyɛ ma maaliaŋ vellaa velle. Kɛlɛŋgaa kposoŋ bɛɛ a yiyaŋ maa, siooŋnde cho suliŋ sɔviɔɔ opilɛ o mala miŋ nɔ chaŋyɛi kɛndɛi a acheleŋnda wo le. Kɛ bolle Baabuile buŋgɛi hei tɔlnuŋ choo leŋ le dimi maa, te ŋ yeema pɛ miŋ nɔ chaŋyɛi kpɛɛluŋnde a Chɛhowa, ŋ nɔ miŋ nɔ ‘siooŋii nduɛi.’—Nuawɔ Sam 25:​14.

² Mɛɛ mɛɛ naŋ viou Chɛhowa piɛiyo, ŋ nɔ miŋ hiou lachi a siooŋii bɛnda ve nɔɔ le ndu. Kɛ yɛɛ siooŋnde nɔɔ le Mɛlɛka sim yɛ? Vɛɛ naŋ pɛɛku yɛ le siooŋnde nɔɔ le Chɛhowa? Yɛɛ naŋ pɛɛku yɛ Obadaya, Chɛhowada Masa Wanaa Soliaa Lasalaa, a Masaa Chowaasi o ba, te o hiŋ pɛ a siooŋnde nɔɔ le Mɛlɛka okɔɔ?

YƐƐ SIOOŊNDE NƆƆ LE MƐLƐKA SIM YƐ?

3. Tɛɛsiaawɔ nyɛ tosa miŋ nɔ siooŋnde wo, vɛlɛ a mɛɛ siooŋii keŋ manda naa yɛ.

³ Naapum, mi siooŋnde wa naa te ŋ sina pɛ maa suɛi tosa miŋ saŋga tau ve cho naa komal. Siooŋii suu waa nuaa bɛnda, nduyɛ i mala naa miŋ tosa sɔɔŋ a taasi. Te ŋ nɔ pɛ siooŋnde le delɔɔ, mi keŋ tosa ŋ kue o nɛiyo daŋgala le. Siooŋnde le yɔŋulɔŋndo mala naa miŋ fafaŋ sɔɔŋ chuu naa kpundɔɔ woŋ. Te ŋ nɔ pɛ siooŋnde yɔŋii naŋ tɛɛmbuu chaŋyɛi naŋ nɔ a wana naŋ kaala tau wo, mi keŋ mala naa miŋ fafaŋ sɔɔŋ dimioo, ɔɔ tosaa ŋ tɛɛmbuu ndu kɔllo woŋ.

4. Siooŋii suu kuɛɛ Setana yeema yɛ naa miŋ nɔ le Chɛhowa?

⁴ Setana yeema naa miŋ nɔ siooŋii bɛnda le ve le Chɛhowa, nduyɛ o yeema naa vɛlɛ miŋ nɔ yiyaŋ pilɛ Ɛlifaasi ndoo nɔ a Chɛhowa okɔɔ wo maa, wana kɔl tuuwo o cho ni, vɛlɛ maa ŋ tiuba miŋ nɛŋi ndu kɔl te. (Choobu 4:​18, 19) O yeema naa vɛlɛ miŋ nɔ siooŋii bɛnda le ve le Chɛhowa, okoŋ miŋ pɛŋgi ndu piɛiyo. Le hei fafaŋndo, ŋ nɔ miŋ nɔ siooŋii bɛnda ve le Chɛhowa.

5. Yɛɛ siooŋnde nɔɔ le Mɛlɛka sim yɛ?

⁵ Mi wana nɔ siooŋii bɛnda ve le Mɛlɛka wo chɔm kaalaa, nduyɛ o yeema mbo tɛɛmbuu chaŋyɛi kɛndɛi cho nda tɛɛŋ nda ndu ve le. Siooŋii suu waa nuaa Chiisu ndoo nɔ le Chɛhowa ni. (Hibu. 5:​7) Kposoŋ bɛɛ ndoo nɔ siooŋii bɛnda le ve le ndu le. (Aisaya 11:​2, 3) Kɛ ndoo kaala ndu a kɔllo kpou, vɛlɛ ndoo yeema mbo diikuŋ ndu. (Chɔŋ 14:​21, 31) Maa Chiisu, naa bɛɛ nɔ miŋ nɔ bɛɛle yiŋgoloŋndeŋ le Chɛhowa, nduyɛ mi kɔndɔfillo bii naa a sɔɔŋ o tosa woŋ kanifuule, o nɔ kaalaa, taasioo, o cho sakpo, vɛlɛ o nɔ kpaayaa. Ŋ sina vɛlɛ maa, le mɛɛ Chɛhowa kaala naa tau yɛ, mbo buulaŋ a mɛɛ naŋ duau silala ndɔlaŋ o wali niŋ yɛ. Ŋ tiuba miŋ tosa mi Chɛhowa tambu kɔl ɔɔ mbo naŋ kɔl a naa.—Sam 78:​41; Pulɔ. 27:​11.

PƐƐKU LE SIOOŊNDE NƆƆ LE MƐLƐKA

6. Ɔɔ nɛiyo opilɛ o naŋ pɛɛku le siooŋnde nɔɔ le Mɛlɛka wo? (Pulɔwaa 2:​5)

⁶ Naa kpou, ŋ viluŋ a siooŋii Chɛhowɛi le. Ŋ nɔ miŋ pɛɛku le siooŋnde nɔɔ le ndu. (Nuawɔ Pulɔwaa 2:​5.) Nɛiyo opilɛ o naŋ tosa heiyo cho nyɛm o toosiaa woŋ mɛɛndiaŋndo ni. Mɛɛ naŋ cha taasi ndɔɔ, kpaaya ndɔɔ, a kaala yiŋgoloŋ o nɔ le naa wo o nyɛm o toosiaa woŋ niŋ fau, lende koni naŋ nɔ bɛɛle yiŋgoloŋndeŋ le ndu vɛlɛ mi kaala naŋ nɔ le ndu wo chɔɔlu hindɔɔ ni. (Luomaŋ. 1:​20) Mi ndepilɛnɔ pilɛ diolaŋ Adiliɛŋ dimi aa, “Mi kɔndɔfillo bii ya tau te I mɛɛndiaŋ pɛ nyɛm Chɛhowa toosiaa woŋ, mi che mɛɛ kpɛ o nɔ taasioo yɛ. Mi hei tosa mi laalaŋ kɛsɛ maa, o sina nyɛ bɛnda le ya wo.” Mɛɛ o chɔɔlu yiyaŋ a nyɛm Mɛlɛka toosiaa woŋ okɔɔ, mbo dimi aa, “Le yɛɛ mi tosa suɛi tɛɛmbuu chaŋyɛi nii a Chɛhowa wana toosiaa yoomoo wo?” Baa a tiu pa ba ma chua teleŋndo nyɛɛmbɔ o lɔɔ hoo niŋ le yiyaŋndo a nyɛm Chɛhowa toosiaa woŋ okɔɔ? Hei tosaa cho num mala ma nɔ bɛɛle yiŋgoloŋndeŋ le ndu, vɛlɛ ma chɔɔlu ndu kaala.—Sam 111:​2, 3.

7. Vɛɛ piɛileŋ le mala yɛ naa le miŋ nɔ siooŋii bɛnda ve le Chɛhowa?

⁷ Nɛi cheleŋ mala naa le miŋ nɔ siooŋii bɛnda ve le Mɛlɛka wo cho piɛileŋ teleŋ o teleŋ o ndulo ni. Mɛɛ naŋ piɛi fau o ndulo, lende koni o wa wana kpeekpei le naa ni. Teleŋ o teleŋ naŋ nyuna ndu pɛ le mbo luei naa yoomuaŋ le tɔɔndaŋndo biuwɔŋndo, mi keŋ loonuŋ naa maa o nɔ kpaayaa. Te ŋ mel ndu pɛ balikaa le mɛɛ o ke naa Po ndɔɔ yɛ, mi keŋ loonuŋ naa maa o kaala naa tau. Nduyɛ te ŋ nyuna ndu pɛ o piɛileŋ niŋ le mbo mala naa bahawɛiyo opum soli, mi keŋ loonuŋ naa kɛsɛ maa o nɔ taasioo. Mi piɛile waa nuaa mala naa miŋ nɔ bɛɛle yiŋgoloŋndeŋ le ndu, vɛlɛ miŋ kɛɛsiaŋ o kɔl le sɔɔŋ tɛɛmbuu chaŋyɛi nɛi a ndu woŋ fafaŋndo.

8. Yɛɛ naŋ nɔ yɛ miŋ tosa le miŋ hiou lachi a siooŋii bɛnda ve nɔɔ le Mɛlɛka?

⁸ Ŋ tiuba miŋ hiou lachi a siooŋii bɛnda ve nɔɔ le Mɛlɛka, te ŋ wa pɛ Baabuiyo pɛɛkoo, le chɔɔ tamaseliila wɔɔŋndaŋ a la kɛndɛla cho leniŋ ndaŋ. Ŋ pɛɛkuŋndɔ a buɛiyaa Chɛhowaa a ŋiɔɔŋ okɔɔ, a piɛi ndu o laalaŋndo choo wa. Obadaya buɛi Masaa Ehabi wo, a Chɛhowada Masa Wanaa Soliaa Lasalaa. Okoŋ kɔɔli, ŋ cho chɔ nyɛ naŋ pɛɛku o tamasi Masaa Chowaasi wo niŋndo Masaa le Chuda. Mi Masaa hoo kandu sɔɔŋ nɛŋi Chɛhowa kɔllo woŋ tosaa, kɛ o hiu lachi a muŋ tosaa le.

NƆ KƆL SIMULAA MAA OBADAYA

9. Vɛɛ siooŋii Obadaya ndoo nɔ le Chɛhowa ve mala yɛ ndu? (Masaa Bɛnduaa Tasiaa 18:​3-4, 12)

⁹ Teleŋ tase Baabuiyo soo a Obadayab okɔɔ wo, mbo dimi a ndu okɔɔ aa: “Obadaya koŋ yɛ, wana [ndoo nɔ siooŋii Mɛlɛka Yaawɛɛ ve wo] o wa ni.” (Nuawɔ Masaa Bɛnduaa Tasiaa 18:​3-4, 12.) Obadaya ndoo nɔ siooŋii bɛnda ve le Chɛhowa. Vɛɛ keŋ mala yɛ ndu? I tasei, mi i mala ndu mbo wa wana sandu a wana wana nɔla ma tiindaŋ. Le hei, mi masaa handu ndu chiɛi ndɔɔ kpou bolleŋ. (Tuuwɔ Nɛhimaya 7:​2.) Mi siooŋii Obadaya ndoo nɔ le Mɛlɛka ve mala ndu vɛlɛ mbo nɔ kɔl simulaa. I wa bɔɔ suɛi sɔvɛ le mbo nɔ suliŋndo hoo kanifuule, o wa achal a teleŋ Masaa Ehabi Masa dɛnɛwɔɔŋndo wa o Masaleŋ choo wo. Baabuiyo dimi a Ehabi okɔɔ aa: “Mbo tosa yɔŋ wɔɔŋndo mbo hiau masa o masa keeku Isɔluɛi ndu lachi.” (1 Masaa. 16:​30) O faŋaŋ okoŋ kɔɔli, lanɔɔ Masaa Ehabi Chɛsibɛɛ, Baal ndoo sooluu ni. Le hei, mbo kindiŋ o nɛi o nɛi niŋ le wana o wana wa o piɛile tonyaleŋ niŋ, o masɛi kaayii tɔ wa kpeŋgii baluaŋndo ve diyɔɔ. Nduyɛ pɛŋ, mbo dii wanaa ndaa suaa le Mɛlɛka wa a bɔɔbɔɔ. A tonya, Obadaya wa Chɛhowa piɛiyo o teleŋ kala kalaa niŋ.

10. Vɛɛ Obadaya chɔm yɛ maa ndoo nɔ kɔl simulaa tau?

¹⁰ Vɛɛ Obadaya chɔm yɛ maa ndoo nɔ kɔl simulaa tau? Mɛɛ Chɛsibɛɛ kandu wanaa ndaa suaa le Mɛlɛka wa nuuviaa le nda diuwo, mi Obadaya chua ŋwaŋ kɛmɛ, mbo kɔ vioŋ nda o buululaŋ latiɔɔŋ niŋ. “Buuloo hoo ŋwaŋ bele ŋuɛɛnu, buuloo hoo ŋwaŋ bele ŋuɛɛnu. Nduyɛ nyɛdiaa ni mamɛŋ ni,” ndu wa nda kioo ni. (1 Masaa. 18:​13, 14) Mi che bɛɛ Obadaya ndoo nɔ kɔl simulaa, kɛ te Chɛsibɛɛ ndoo sina pɛ a nyɛ o tosa koŋ ndo okɔɔ, o wa ndu diyɔɔ. I cho kpendekele maa naapum Obadaya wa a siooŋnde, nduyɛ ndoo yeema mbo sɔla piɔm te. Kɛ ndoo kaala Chɛhowa a wanaa wa ndu piɛiyo wa, mbo hiau yoomu ndɔɔ.

11. Vɛɛ buɛiyaa Chɛhowaa o palɛi nɛi niŋ cho yɛ maa Obadaya? (Tofa vɛlɛ fotueiyo.)

¹¹ Hau, buɛiyaa Chɛhowaa a bɔɔbɔɔ cho o lɛŋii nda kuuna wali naa ve niŋ. Mi che bɛɛ mi puaapiliaa haa ke masaleŋ bɛɛleŋ, kɛ maa Obadaya, a cho kindiŋndo o nɛi o nɛi niŋ le Chɛhowa kioo nyɛ o bɛnda mbo sɔla wo. Ndu cho ni, piɛiyo ndu a kɔllo kpou. (Maa. 22:​21) A cho chɔmndo maa a nɔ siooŋii bɛnda ve le Mɛlɛka, sanaa a ndu diikɔŋndo mbo hiou waŋnda chieeya. (Walta. 5:​29) A cho hiouwɔɔ lachi a yooŋgu kɛndɔɔ dimioo, vɛlɛ a bɔŋaŋndaŋ biyɔɔ sɔɔsɔɔ. (Maa. 10:​16, 28) Ma kindiŋ o nɛi o nɛi niŋ le mi puaapiliaa a ndepiliaa sɔla nyɛm mala nda le pɛɛkoo a Mɛlɛka okɔɔ woŋ. Ŋ tofaŋndɔ tamasi puaapilɛnɔ pilɛ cho o lɛŋnde ndaa kuuna wali naa o Afilika niŋndeŋ diolaŋ Hɛŋli. A teleŋ koŋ, mbo yɔŋguŋ le chaaŋaa naa laalaŋnda nyɛm mala naa le pɛɛkoo a Mɛlɛka okɔɔ woŋ kioo. Mbo dimi aa: “Siɔmbulaŋ pila ya nɔ ni, kɛ I laalaŋ maa bɛɛle yiŋgoloŋnde ya nɔ le Chɛhowaleŋ le mala ya ni mi nɔ kɔl simulaa le wallo hoo tosaa.” Baa num bɛɛ tiu pa ba ma nɔ kɔl simulaa maa Hɛŋli? A tiuba te a nɔ pɛ siooŋii bɛnda ve le Mɛlɛka.

CHƆM LO LECHOO WO MAA CHƐHOWADA MASA WANAA SOLIAA LASALAA

12. Vɛɛ Chɛhowada Masa Wanaa Soliaa Lasalaa nda laa ndɔ chɔm yɛ lo lechoo wo o Chɛhowa lo?

¹² Chɛhowada Masa Wanaa Soliaa Lasalaa ndoo nɔ siooŋii bɛnda ve le Chɛhowa. Nduyɛ mi keŋ nyindu ndu le mbo chɔm ndu lo lechoo wo, vɛlɛ mbo toolu piɛile tonyaleŋ. Mi hei chɔɔmuŋ kpendekele mɛɛ chua Chɛsibɛɛ wo Atalaya siiŋguŋ ndupila masaa o Chuda niŋ. O kpeekpei niŋ, waŋnda ndaa nɔ sabula kɛndɛlaŋ le siooŋnde nɔɔ le Atalaya. Wana dɛnɛwɔɔŋndo chua hoo wa ni. Ndoo yeema mbo simnuŋ masa laandoo le Chuda. Le hei, mbo kindiŋ o nɛi o nɛi niŋ le chuauwaa nduaa mamaa kpou diuwo. (2 Kolo. 22:​10, 11) Kɛ mi chuauwaa nduaa mamaa kaŋ opilɛ diolaŋ Chowaasi lo yoomu. Chɛhowada nda laa ndɔ Chɛhosiɛba piŋi ndu ni. Mi ndu nda pɔnɔ ndɔ viaŋ poombɔ koŋ, ma lo ndu mandaa haaa mbo chinda. Mi nda ŋiɔɔŋ kpou mala le pulale Deeveleŋ mandaa. Mi Chɛhowada chɔm lo lechoo wo o Chɛhowa lo, o yɔŋ isiooŋ le Atalaya le.—Pulɔ. 29:​25.

13. Mɛɛ Chowaasi fuuluu wɔsilaŋ la ŋɔmmɛu, vɛɛ Chɛhowada chɔm yɛ vɛlɛ lo lechoo wo?

¹³ Mɛɛ Chowaasi fuuluu wɔsilaŋ la ŋɔmmɛu, mi Chɛhowada chɔm vɛlɛ lo lechoo wo o Chɛhowa lo. Mbo tuu le nyɛ tosa. Te ndoo sɔla pɛ batiuwaa, Chowaasi wa simnɔŋ masaa, nduyɛ ndu kpeekpei ndoo nɔ ni mbo wa masaa. Kɛ te ndoo sɔla batiuwaa le, naapum o wa piɔmndo sɔla. A mala Chɛhowaa, mbo sɔla batiuwaa. Mi bolii layuŋguei o Isɔluɛi niŋ, a Livaiya toolu ndu le Chowaasi siiŋguuwo masaa, okoŋ ma dii Atalaya. (2 Kolo. 23:​1-5, 11, 12, 15; 24:​1) Okoŋ kɔɔli, ndu ni, “masa bɛndoo Chowaasi ni, a waŋnda a pilaa kpou, ma yii kpemaa a Mɛlɛka Yaawɛɛ, maa a cho wa wanaa Mɛlɛka Yaawɛɛ wa.” (2 Masaa. 11:​17) Okoŋ, mi Chɛhowada “kɛsi vɛlɛ waŋnda le dio chiɛi Mɛlɛka Yaawɛɛ wo mandaa, le ma tosa maa wana o wana ve o [diandaa] Mɛlɛka Yaawɛɛ o hɔl te, o luei loŋ te.”—2 Kolo. 23:​19.

14. O nɛila kuɛɛ choo nda ke yɛ Chɛhowada bɛɛleŋ mɛɛ o ke Chɛhowa bɛɛleŋ?

¹⁴ O paandoo niŋ, mi Chɛhowa dimi aa: “Ya Mɛlɛka wana ke ya bɛɛleŋndo ndu ya I ke bɛɛleŋ ni.” (1 Saam. 2:​30) Le tamaseliiyo, mbo tosa a sabu ma poonyiaa sɔɔŋ kɛndɛŋ Chɛhowada Masa Wanaa Soliaa Lasalaa o Baabuiyo niŋ, le miŋ pɛɛku ndu o ba. (Luomaŋ. 15:​4) Mɛɛ Chɛhowada vi, mbo sɔla bɛɛle teŋgeŋndeŋ. Ma kumbu ndu o “sɛi nda yuŋgu lemasaa niŋ, o Masaa Deeve lo chiee. Kani fondole, le walta kɛndɛla o tosa o lɛŋnde Isɔluɛileŋ niŋ, nduyɛ a le wali kɛndɛ o tosa le Mɛlɛka, a le chiɛi Mɛlɛkaa wo.”—2 Kolo. 24:​15, 16.

15. Yɛɛ naŋ pɛɛku yɛ o bundɛi Chɛhowada ve niŋ? (Tofa vɛlɛ fotueiyo.)

¹⁵ Bundɛi Chɛhowada ve mala naa kpou, le miŋ nɔ siooŋii bɛnda ve le Mɛlɛka. Bɛnduaa kundaa tual tamasi ndɔɔ kɔɔli, te a wa pɛ nɛilaŋ nuuviaa teleŋ o teleŋ le saa Chɛhowaa mandaa. (Walta. 20:​28) Bɛnduaa yuwɛiya tual tamasi Chɛhowada wo kɔɔli, te a nɔ pɛ siooŋii bɛnda ve le Chɛhowa, vɛlɛ ma chɔm ndu lo lechoo wo. O hei niŋ, o tiuba mbo soliŋ nda kpeku le tuu ndɔɔ peeloo. Pesiŋ bɛɛ Chɛhowa kɛɛ nda soliŋndo kpeku le. Mi Chɛhowa ke Chɛhowada bɛɛleŋ. O nɛi pilɛ koŋ choo, feleŋguaa tual tamasi ndɔɔ kɔɔli, le bɛnduaa yuwɛiya bɛɛleŋ kioo a nda biyɔɔ nyɛkɛndɛi, taama taama a tosa niŋ tau o Mɛlɛka piɛiyo niŋnda. (Pulɔ. 16:​31) I mɛɛlɛi kpɔŋ, naa kpou tiuba miŋ pɛɛku o tamasi bolii layuŋguei a Livaiya kɛsi le Chɛhowada tooloo wo niŋ. Ŋ toolu ‘wanaa cho naa chilaŋ chuaa tɛɛŋnda’ te ŋ diikuŋ nda pɛ.—Hibu. 13:​17.

WA MAA MASAA CHOWAASI LE

16. Mi Masaa Chowaasi kandu sɔɔŋ nɛŋi Chɛhowa kɔllo woŋ tosaa, kɛ mbo mal. O nɛi kuɛɛ choo?

¹⁶ Mi Chɛhowada mala Masaa Chowaasi le mbo wa Masa kɛndɛ. (2 Masaa. 12:​2) Fulamakɔɔlioo wa ni, mi che bɛɛ o wa masa feleŋgɔnɔ, kɛ ndoo yeema nyɛ nɛŋi Chɛhowa kɔllo wo tosaa. Kɛ mɛɛ Chɛhowada sɔla dɔɔ piɔmndo, mi waŋ bɛnduaa Chuda ke Chowaasi sila wɔɔŋndo, nduyɛ mbo yaŋ nda nilaŋ. Yɛɛ wa yɛ fulamakɔɔlioo? Mi ndu a wanaa wa o masale ndɔleŋ niŋnda “muliŋ Asiɛlua a mɛlɛkaa cheleŋnda sooluuwo.” (2 Kolo. 24:​4, 17, 18) Mi Chɛhowa tambu kɔllo tau. A koŋ kpou, mbo “viam wanaa ndaa suaa le ndu wa, le ma kɔ sila waŋnda haa, le ma miiŋgu ndu Mɛlɛka o ibuŋ. . . . Kɛ a yeŋ wanaa suaa le Mɛlɛka wa lani le.” Nduyɛ pɛŋ, a yeŋ vɛlɛ Sɛkalayac po Chɛhowada wo lani le. Sɛkalaya wo hoo, o cho ko wana suaa le Chɛhowa wo a wana soliaa lasalaa le o wa le. Kɛ wanayɛi Chowaasi ve o wa vɛlɛ ni. O faŋaŋ okoŋ kɔɔli, Masaa Chowaasi chɔm balika melaa le yuŋgu Sɛkalaya wo le, mi che bɛɛ nda chiindiaa yoomu ndɔɔ ni teleŋ o wa o pɔmbɔ wo. Nduyɛ mbo tosa ma dii Sɛkalaya.—2 Kolo. 22:​11; 24:​19-22.

17. Fulamakɔɔli kuɛɛ Chowaasi ndoo sɔla yɛ?

¹⁷ Chowaasi hiu lachi a siooŋii bɛnda ve nɔɔ le Chɛhowa le. Le hei, mbo sɔla fulamakɔɔli wɔɔŋndo. Mi Chɛhowa dimi aa: “Wana o wana pɛɛsa ya pɛ, kiɔɔ ya I kɛɛ wana koŋ ni.” (1 Saam. 2:​30) O faŋaŋ okoŋ kɔɔli, mi che bɛɛ sovɛiya Siiliaa ve a bɔɔ le, kɛ ma yam sovɛiya Chuda “a wa sɛlɛ bɛndoo wa,” nduyɛ ma “yɔŋul masaa Chowaasi yɔŋullo pila.” Mɛɛ nda kuɛŋnuŋ, mi buɛi Chowaasi wo dii ndu, le mɛɛ o dii Sɛkalaya yɛ. Le mɛɛ o wa masa dɛnɛwɔɔŋ yɛ, mɛɛ o vi, a kumbu ndu o “sɛi nda buulu lemasaa niŋ te.”—2 Kolo. 24:​23-25.

18. A mɛɛ Chɛluimaya 17:​7, 8 dimi yɛ, vɛɛ naŋ fafaŋ yɛ tamasi Chowaasi wo tolɔɔ kɔɔli?

¹⁸ Yɛɛ naŋ pɛɛku yɛ o tamasi Chowaasi wo niŋ? Mɛɛ Chɛhowada wana wa ndu tooloo wo sɔla piɔmndo, mi Chowaasi yaŋ wanaa simul piɛile tonyaleŋ nda nilaŋ, okoŋ mbo kɛɛ Chɛhowa piɛiyo o laalaŋndo choo. Hei chɔm maa, ŋ nɔ miŋ diikuŋ Chɛhowa le mɛɛ yɔŋgu naa ɔɔ wanaa cheleŋnda o kundaa niŋ cho tamasi kɛndɔɔ kɛsioo yɛ le. Le miŋ wa a kala poŋ o Chɛhowa piɛiyo niŋ, mɛɛ miŋ hiou lachi a chaŋyɛi nɛi kindioo a ndu, sanaa a pɛɛkoo, yiyaŋndo, vɛlɛ a piɛileŋ.—Nuawɔ Chɛluimaya 17:​7, 8; Kolo. 2:​6, 7.

19. Yɛɛ Chɛhowa yeema yɛ naa miŋ tosa?

¹⁹ Chɛhowa dimul naa le miŋ tosa nyɛ naŋ tiuba le wo le. O Ikilisiaatii 12:​13 niŋ, mbo chɔm naa nyɛ o yeema naa miŋ tosa wo. Le dimi aa: [“Nɔ siooŋii Mɛlɛkɛi,] nduyɛ ma tosa nyɛ sawala ndɔlaŋ la dimi le tosaa wo. Nyɛ cho naa kuee naa ŋwaŋnda chiee le tosaa wo ndu cho koŋ ni.” Maa Obadaya nda Chɛhowada, te ŋ nɔ pɛ siooŋii Mɛlɛkɛi, keŋ mala naa miŋ chɔm lo lechoo wo o ndulo mɛɛ mɛɛ tɔɔndaŋndaŋ la komal naa o chilaŋ niŋ. Nyɛ o nyɛ tiuba mbo tɛɛmbuu chaŋyɛi naŋ nɔ a Chɛhowa ve le.