“ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ” တၢ်ဂ့ၢ်ဘျးစဲ

ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ

လါယူၤလံ ၇-၁၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၁

တၢ်ဟ့ၣ်ကူၣ်လၢ တၢ်ဆီဟံၣ်ဆီဃီအဂီၢ်

ဖဲနပာ်တၢ်အဲၣ်တီအခါ နဆၢတဲာ် တၢ်လၢအဘၣ် ကသ့ဒ်လဲၣ်

^၁၃ နကဘၣ် ပာ်တၢ်အဲၣ်တီ ယံာ်ထဲလဲၣ်. တချုးလၢ ပဆၢတဲာ်တၢ်အခါ ပမ့ၢ်တဆိကမိၣ်ထံ တၢ်ဂ့ၢ်လီၤတံၢ်လီၤဆဲးဘၣ်န့ၣ် အါတက့ၢ် တၢ်အိၣ်သး တလဲၤသးဂ့ၤဂ့ၤဘၣ်. (ကတိၤ ၂၁:၅) အဃိ ဖဲနပာ်တၢ်အဲၣ်တီအခါ ဒ်သိး နကသ့ၣ်ညါလိာ်သးဂ့ၢ် ဂ့ၤဂ့ၤအဂီၢ် နကလိၣ်ဘၣ် တၢ်ဆၢကတီၢ် တတီၤဖိ. ဘၣ်ဆၣ် နတဘၣ် ပာ်တၢ်အဲၣ်တီ ယံာ်တလၢစ့ၢ်ကီးဘၣ်. လံာ်စီဆှံ တဲဝဲလၢ “တၢ်လၢ ပှၤမုၢ်လၢ်ဝဲတဖၣ် ကလၢထီၣ်ပှဲၤထီၣ်အဂီၢ် တၢ်ဆၢကတီၢ် မ့ၢ်ယံာ်တလၢန့ၣ် ပှၤသးကဟးဂီၤ.” (ကတိၤ ၁၃:၁၂) တကးဒံးဘၣ် နပာ်တၢ်အဲၣ်တီ မ့ၢ်ယံာ်တလၢန့ၣ် ကကီလၢ နကဟးဆှဲး တၢ်လ့ပစီလၢ နကမၤကမၣ်မုၣ်ကမၣ်ခွါ. (၁ ကရံၣ် ၇:၉) အဃိ လၢနကသးစၢၢ်ဆၢလၢ နကဘၣ်ပာ်တၢ်အဲၣ်တီ ယံာ်ထဲလဲၣ်အလီၢ် သံကွၢ်လီၤနသးလၢ ‘ဒ်သိး ယဆၢတဲာ်တၢ် ကဘၣ်အဂီၢ် ယဘၣ်ဃုသ့ၣ်ညါအါထီၣ် ယတၢ်အဲၣ်တီအဂ့ၢ် လၢအဂၤအိၣ်ဒံးဧါ.’

တၢး၂၀.၀၇ ၃ ¶၃-၅

တဘၣ်ဆိကမိၣ်ဒိၣ်လီၤ နသးတဂ့ၤ

^၃ ယဟိဝၤယွၤ ဒုးအိၣ်ထီၣ်ဝဲ တၢ်ဆီဟံၣ်ဆီဃီ ဒ်သိးနီၢ်ဒီမါဝၤ ကသူၣ်ခုသးခုအဂီၢ်လီၤ. ခီဖျိလၢ အဝဲသ့ၣ်တလၢတပှဲၤဘၣ်အဃိ တၢ်သးတလီၤပလိာ် အိၣ်ထီၣ်ဝဲလီၤ. လၢတၢ်န့ၣ်အဃိ စီၤပီလူးတဲဝဲလၢ ပှၤလၢအဆီဟံၣ်ဆီဃီတဖၣ် ကထံၣ်ဘၣ်ဒီးတၢ်ကီတၢ်ခဲလီၤ. (၁ ကရံၣ်သူး ၇:၂၈) မ့မ့ၢ်လၢ ပှၤတနီၤန့ၣ် တဲအါလိာ်သးဒီး အသးသမူတံၤသကိးထီဘိအဃိ အဝဲသ့ၣ်ဆိကမိၣ်ဝဲလၢ မ့ၢ်တန့ၢ်လိာ်သးလၢ အခီၣ်ထံးခါဘၣ်န့ၣ် ကဂ့ၤကတၢၢ်လီၤ. အဝဲသ့ၣ်မ့ၢ်အိၣ်ဒီး တၢ်ထံၣ်ဒ်ဟီၣ်ခိၣ်အသိးန့ၣ် ကဆိကမိၣ်ဘၣ်လၢ အဝဲသ့ၣ်မ့ၢ်မၤလီၤဖးအသးန့ၣ် မ့ၢ်ကျဲလၢအဂ့ၤကတၢၢ်လီၤ. မ့ၢ်လၢအဝဲသ့ၣ် ကွၢ်လီၤထဲအနီၢ်ကစၢ်သးအဃိ ဆိကမိၣ်ဝဲလၢ အမ့ၢ်မၤလီၤဖးအသးန့ၣ် ကဂ့ၤကတၢၢ်လီၤ.

^၄ တၢ်ဆိကမိၣ်ဒ်သိးဒီး ပတၢ်ဆီဟံၣ်ဆီဃီ တအိၣ်ဒီးတၢ်သးခုဘၣ်န့ၣ် ပကဘၣ်ဟးဆှဲးအီၤလီၤ. ပသ့ၣ်ညါလံာ်စီဆှံတဲဝဲ ကျဲထဲတဘိလၢ ပမၤကတၢၢ်တၢ်ဆီဟံၣ်ဆီဃီသ့န့ၣ် မ့ၢ်ဝဲတၢ်မၤကမၣ်မုၣ်ကမၣ်ခွါလီၤ. (မးသဲ ၅:၃၂) အဃိ ဖဲပထံၣ်ဘၣ်တၢ်ကီတၢ်ခဲ ဒ်စီၤပီလူးပာ်ဖျါထီၣ်ဝဲအသိးန့ၣ် ပတဟ့ၣ်အခွဲးလၢ ပတၢ်ပာ်ထီၣ်ထီသး ကဒိၣ်စိဒီး ဆိကမိၣ်ဘၣ်လၢ ‘မ့ၢ်ယတၢ်ဆီဟံၣ်ဆီဃီအံၤ မၤလၢပှဲၤယတၢ်လိၣ်ဘၣ်တဖၣ်ဧါ. မ့ၢ်ယဒိးန့ၢ်ဘၣ်တၢ်အဲၣ် လၢလၢပှဲၤပှဲၤလံဧါ. ယမ့ၢ်ဟံးန့ၢ်ဒီး ပှၤလၢအဂၤန့ၣ် မ့ၢ်ယတၢ်သးခု ကအိၣ်အါန့ၢ်ဒံးခဲအံၤဧါ.’ ပမ့ၢ်ဆိကမိၣ်အီၤဒ်န့ၣ်န့ၣ် မ့ၢ်ဒၣ်ပကွၢ်လီၤထဲ ပနီၢ်ကစၢ်အဂီၢ် ဒီးတမ့ၢ်လၢပသးသမူတံၤသကိး အဂီၢ်လၢၤဘၣ်. မ့မ့ၢ် ပှၤဟီၣ်ခိၣ်ဖိန့ၣ် ကဟ့ၣ်ကူၣ်နၤလၢ နမ့ၢ်အဲၣ်ဒိး မၤကတၢၢ်ကွံာ် နတၢ်ဆီဟံၣ်ဆီဃီန့ၣ် မၤဟီ, နမ့ၢ်သးခုန့ၣ်ဘၣ်လံ. ဘၣ်ဆၣ် လံာ်စီဆှံတဲဝဲလၢ “သုတကွၢ်တဂၤ လၢအတၢ်ဒၣ်ဝဲ, တဂၤလၢအတၢ်ဒၣ်ဝဲတဂ့ၤ. မ်အကွၢ်တဂၤလၢ ပှၤဂၤအတၢ်, တဂၤလၢပှၤဂၤအတၢ် စ့ၢ်ကီးတက့ၢ်.” (ဖံလံးပံၤ ၂:၄) ယဟိဝၤယွၤ အဲၣ်ဒိးဝဲလၢ နတၢ်ဆီဟံၣ်ဆီဃီ ကအိၣ်ဂၢၢ်ကျၢၤ တမ့ၢ်လၢနကအိၣ် လီၤမုၢ်လီၤဖးအဂီၢ်ဘၣ်. (မးသဲ ၁၉:၆) ယဟိဝၤယွၤအဲၣ်ဒိးလၢ နကပာ်ဆိအတၢ်ဘၣ်သးလၢညါ တမ့ၢ်လၢ နနီၢ်ကစၢ်အဂီၢ်ဘၣ်.

^၅ နီၢ်ဒီမါဝၤန့ၣ် ကြၢးရ့လိာ်အသးလၢ တၢ်အဲၣ်တၢ်ကွံဒီး တၢ်ပာ်ကဲအပူၤလီၤ. (ဖး အ့းဖ့းစူး ၅:၃၃ တက့ၢ်.) လံာ်စီဆှံသိၣ်လိပှၤလၢ ပကဘၣ်သးအိၣ် ဟ့ၣ်တၢ်အါန့ၢ်ဒံး တၢ်လၢပဒိးန့ၢ်ဘၣ်အီၤဒံးလီၤ. (မၤတၢ် ၂၀:၃၅) ဒ်သိးနီၢ်ဒီမါဝၤတဖၣ် ကပာ်ဖျါထီၣ် တၢ်အဲၣ်ဒီး တၢ်ပာ်ကဲလိာ်သးအဂီၢ် အဝဲသ့ၣ်ကဘၣ်အိၣ်ဒီး တၢ်ဂ့ၤတၢ်ဝါမနုၤလဲၣ်. အဝဲသ့ၣ်ကဘၣ်အိၣ်ဒီး တၢ်ဆီၣ်လီၤသးလီၤ. နီၢ်ဒီမါဝၤလၢ အိၣ်ဒီးတၢ်ဆီၣ်လီၤသးန့ၣ် တကွၢ်လီၤထဲ အနီၢ်ကစၢ်အဘျုးဘၣ် ကဃုကွၢ်ဝဲလၢ “ပှၤဂၤအတၢ်ဘျုးတၢ်ဖှိၣ်အဂီၢ်လီၤ.”—၁ ကရံၣ်သူး ၁၀:၂၄, ခ့ခါစှီၤကျိာ်.

တၢး၀၆-E ၉/၁၅ ၂၈ ¶၁၃

“သူၣ်ဖှံသးညီ ဃုာ်ဒီး နမါလၢ အအိၣ်ဒီးနၤလၢ နသးစၢ်ခါ လံၤလံၤ”

^၁၃ ခီဖျိလၢ ပှၤနီၢ်ဒီမိၢ်ဝၤခံဂၤ တရ့လိာ်သး ဂ့ၤဂ့ၤဘၣ်အဃိ တၢ်ကီတၢ်ခဲ မ့ၢ်အိၣ်လၢ အဝဲသ့ၣ် အဘၢၣ်စၢၤန့ၣ် အကဘၣ်မၤဝဲဒ်လဲၣ်. ဒ်သိး အဝဲသ့ၣ် ကမၤဘၣ်ထီၣ် အတၢ်ဂ့ၢ်ကီအဂီၢ် အဝဲသ့ၣ် ကဘၣ်ထဲးဂံၢ်ထဲးဘါ သပှၢ်တၢၢ်. အဒိ အဝဲသ့ၣ် တဲလိာ်အသး တၢ်ကတိၤလၢ အမၤဘၣ်ဒိလိာ်အသး ဒီးလၢခံ ကယီကယီန့ၣ် အညီနုၢ်ထီၣ်ဝဲ. (ကတိၤဒိ ၁၂:၁၈) ဒ်တၢ်မၤလိလၢ အပူၤကွံာ် ပာ်ဖျါထီၣ်ဝဲအသိး တၢ်ကတိၤ ဒ်န့ၣ်တဖၣ်န့ၣ် မၤဘၣ်ဒိတၢ် သ့ဝဲအါမး. လံာ်စီဆှံတဲဝဲလၢ “ပှၤအိၣ်လၢ ပှၢ်မုၢ်ကနၢအပူၤန့ၣ် ဂ့ၤဒိၣ်န့ၢ်ဒံး ပှၤအိၣ်တပူၤဃီဒီး မါလၢအတဲအါတၢ်ဆူၣ် ဒီးအအ့န့တၢ်ဆူၣ်လီၤ.” (ကတိၤဒိ ၂၁:၁၉) အဃိ မါန့ၣ် ကြၢးသံကွၢ်လီၤအသးလၢ ‘ယတၢ်ပာ်သူၣ်ပာ်သး ဒီးတၢ်စံးတၢ်ကတိၤန့ၣ် အမၤတံာ်တာ်ယဝၤအသး လၢအကအိၣ်ဘူးဒီးယၤ အဂီၢ်ဧါ.’ ဒီးလံာ်စီဆှံတဲစ့ၢ်ကီး ဝၤတဖၣ်လၢ “ဆဲးအဲၣ်သုမါ ဒီးတဘၣ်သးဒိၣ်ထီၣ် အဝဲသ့ၣ်တဂ့ၤ.” (ကလီးစဲ ၃:၁၉) နမ့မ့ၢ်ဝၤန့ၣ် သံကွၢ်လီၤနသးလၢ ‘ယမါတူၢ်ဘၣ်လၢ ယတကနၣ်ဃုာ်အီၤဘၣ် ဒီးကကဲထီၣ် တၢ်လ့ပစီလၢ အကဟးဃု ပှၤအသီအဂီၢ်ဧါ.’ ပှၤလၢအအဲၣ်ဘၢမါအဲၣ်ဘၢဝၤန့ၣ် တဲပူၤဖျဲးအသး တသ့နီတမံၤဘၣ်. သနာ်က့ တၢ်ကဲထီၣ်အသး ဒ်န့ၣ်သ့ဝဲအဃိ ပှၤနီၢ်ဒီမါဝၤတဖၣ် အတၢ်ကီတၢ်ခဲမ့ၢ်အိၣ်န့ၣ် အကဘၣ်တဲသကိးတၢ် ပျီပျီ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၁.၁၀ ၁၂ ¶၁၆

ပမၤယွၤလၢအအိၣ်ဒီး “တၢ်သးကညီၤ ထူးထူးတီၤတီၤ” တဂၤအတၢ်မၤ

^၁၆ ခရံာ်ဖိခဲလၢာ်န့ၣ် ကွၢ်လိမၤဒိး ယဟိဝၤယွၤ အတၢ်သးကညီၤလီၤ. ဘၣ်မနုၤအဃိလဲၣ်. မ့ၢ်လၢ ပှၤလၢအတအိၣ်ဒီး တၢ်သးကညီၤလၢ ပှၤဂၤအဖီခိၣ်ဘၣ်န့ၣ် ယဟိဝၤယွၤ တဒိကနၣ်အဝဲသ့ၣ်ဘၣ်. (ဖး ကတိၤဒိ ၂၁:၁၃.) ပဝဲခဲလၢာ်န့ၣ် ပအဲၣ်ဒိးလၢ ယဟိဝၤယွၤကဒိကနၣ် ပတၢ်ထုကဖၣ်အဃိ ပဟးဆှဲးဝဲ တၢ်ပာ်သူၣ်ပာ်သးလၢ တအိၣ်ဒီး တၢ်သးကညီၤဘၣ်တဖၣ်လီၤ. လၢပကဟးဆှဲးဝဲ ပှၤလၢအသးဘၣ်ဒိတဖၣ်အလီၢ်န့ၣ် ပကဘၣ်ဒိကနၣ်န့ၢ် “ပှၤဖှီၣ်ဖိယာ်ဖိအတၢ်ကိး” ထီၣ်ထီဘိလီၤ. အဃိ ပကဂုာ်ကျဲးစၢးအိၣ်မူမၤထွဲ ဒ်လံာ်စီဆှံအတၢ်ဟ့ၣ်ကူၣ် အိၣ်ဝဲအသိးလီၤ. လံာ်စီဆှံတဲဝဲလၢ “ပှၤလၢအတညီနုၢ် ပာ်ဖျါထီၣ် တၢ်သးကညီၤဘၣ်န့ၣ် ဖဲအဘၣ်တၢ်စံၣ်ညီၣ်အီၤအခါ တၢ်တသးကညီၤအီၤဘၣ်.” (ယၤကိာ် ၂:၁၃) လၢတၢ်ဆီၣ်လီၤသးအပူၤ ပမ့ၢ်သ့ၣ်ညါလီၤသးလၢ ပလိၣ်ဘၣ်တၢ်သးကညီၤန့ၣ် ညီလၢပကပာ်ဖျါထီၣ်က့ၤ တၢ်သးကညီၤလၢ ပှၤဂၤအဖီခိၣ်စ့ၢ်ကီး. လီၤဆီဒၣ်တၢ် ဒီပုၢ်ဝဲၢ်လၢအပီၢ်ယၢ်လီၤက့ၤသး ဒီးဟဲက့ၤကဒါလၢ တၢ်အိၣ်ဖှိၣ်ပူၤတဖၣ်န့ၣ် ပအဲၣ်ဒိးပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ်လီၤ.

ijwfq တၢ်ကွဲးဖုၣ် ၅၄

တၢ်မၤကတၢၢ်ကွံာ် တၢ်ဆီဟံၣ်ဆီဃီန့ၣ် ယဟိဝၤပှၤအုၣ်အသးတဖၣ် ထံၣ်ဝဲဒ်လဲၣ်.

ပမၤပိာ်ထွဲ လံာ်စီဆှံ အတၢ်ဟ့ၣ်ကူၣ်လၢ အဘၣ်ဃးဒီး တၢ်ဆီဟံၣ်ဆီဃီဒီး တၢ်မၤကတၢၢ်ကွံာ် တၢ်ဆီဟံၣ်ဆီဃီန့ၣ်လီၤ. ယွၤဒုးအိၣ်ထီၣ် တၢ်ဆီဟံၣ်ဆီဃီန့ၣ် ဒ်သိးပိာ်မုၣ်ဒီး ပိာ်ခွါ ကအိၣ်ဒ်သိးသိး တစိၤသးအဂီၢ်လီၤ. ဘၣ်ဆၣ် တၢ်မၤကတၢၢ်ကွံာ် တၢ်ဆီဟံၣ်ဆီဃီ (divorce) န့ၣ် သ့ဒၣ်ထဲလၢ တၢ်မၤကမၣ်မုၣ်ကမၣ်ခွါအဃိလီၤ.—မၤသဲ ၁၉:၅, , ၆, ၉.

တၢ်ကီတၢ်ခဲမ့ၢ်အိၣ်ထီၣ်လၢ ပှၤနီၢ်ဒီမါဝၤခံဂၤအဘၢၣ်စၢၤန့ၣ် မ့ၢ်ယဟိဝၤပှၤအုၣ်အသးတဖၣ် မၤစၢၤဝဲစ့ၢ်ကီးဧါ.

မ့ၢ်, မၤစၢၤဝဲလၢ ကျဲအါဘိလီၤ–

လံာ်လဲၢ်တဖၣ်. တၢ်ကီတၢ်ခဲမ့ၢ်အိၣ်ထီၣ်လၢ နီၢ်ဒီမါဝၤခံဂၤအဘၢၣ်စၢၤ တုၤဒၣ်လဲာ်ဖျါလၢ အဝဲသ့ၣ်မၤဘၣ်လိာ်က့ၤဝဲ တညီလၢၤဘၣ်န့ၣ် လံာ်လဲၢ်တဖၣ်အံၤ မၤစၢၤအီၤသ့လီၤ. အဒိ, ကွၢ်တၢ်ဂ့ၢ်ဒ်သိးဒီး “Maintaining Commitment in Your Marriage,” “How to Forgive,” and “Rebuilding Trust in a Marriage” လီၤ.

တၢ်အိၣ်ဖှိၣ်ရိဖှိၣ်တဖၣ်. တၢ်အိၣ်ဖှိၣ်ရိဖှိၣ်, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်အပူၤန့ၣ် ပဒိးန့ၢ်ဘၣ် လံာ်စီဆှံ တၢ်ဟ့ၣ်ကူၣ်လၢ ပှၤနီၢ်ဒီမါဝၤတဖၣ်အဂီၢ်လီၤ.

တၢ်အိၣ်ဖှိၣ်သးပှၢ်တဖၣ်. တၢ်အိၣ်ဖှိၣ်သးပှၢ်တဖၣ် သူဝဲလံာ်စီဆှံ အတၢ်ဟံးစုနဲၣ်ကျဲ ဒ်သိးဒီး အ့းဖ့းစူး ၅:၂၂-၂၅ လၢကမၤစၢၤ ပှၤနီၢ်ဒီမါဝၤတဖၣ် အဂီၢ်လီၤ.

ဖဲယဟိဝၤပှၤအုၣ်အသးတဂၤ အဲၣ်ဒိးမၤကတၢၢ်ကွံာ် အတၢ်ဆီဟံၣ်ဆီဃီအခါ လိၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်ဟ့ၣ်အခွဲးဧါ

တလိၣ်ဘၣ်. ပှၤနီၢ်ဒီမါဝၤ မ့ၢ်ဟဲဃ့တၢ်မၤစၢၤလၢ တၢ်အိၣ်ဖှိၣ်သးပှၢ်အအိၣ်န့ၣ် တၢ်အိၣ်ဖှိၣ်သးပှၢ်တဖၣ် ဟ့ၣ်ကူၣ်ဟ့ၣ်ဖးဝဲလၢ လံာ်စီဆှံအပူၤလီၤ. အဝဲသ့ၣ် တအိၣ်ဒီး တၢ်ခွဲးတၢ်ယာ်လၢ ကတဲဝဲပှၤနီၢ်ဒီမါဝၤ ခံဂၤအံၤလၢ ကဘၣ်မၤဒ်အံၤ ဒ်နုၤဘၣ်. (ကလၤတံ ၆:၅) ဘၣ်ဆၣ်, ပှၤတနီၤနီၤ မ့ၢ်ဆၢတဲာ်လီၤအသးလၢ ကမၤကတၢၢ်ကွံာ် အတၢ်ဆီဟံၣ်ဆီဃီ ဒီးမ့တမ့ၢ်လၢ တၢ်မၤကမၣ်မုၣ်ကမၣ်ခွါအဃိဘၣ်န့ၣ် ဒ်လံာ်စီဆှံတၢ်သိၣ်တၢ်သီအိၣ်ဝဲအသိး အဝဲတအိၣ်ဒီး တၢ်ခွဲးတၢ်ယာ်လၢ ကဆီဟံၣ်ဆီဃီလၢ အသီဘၣ်.—၁ တံၤမသ့း ၃:၁, ၅, ၁၂.

တၢ်အိၣ်လီၤဖးန့ၣ် ယဟိဝၤပှၤအုၣ်အသးတဖၣ် ထံၣ်ဝဲဒ်လဲၣ်

လံာ်စီဆှံဟ့ၣ်ဂံၢ်ဟ့ၣ်ဘါဝဲ ပှၤနီၢ်ဒီမါဝၤတဖၣ်လၢ မ့ၢ်ကီသနာ်က့ ကဘၣ်အိၣ်ဒ်သိးသိးလီၤ. (၁ ကရံၣ်သူး ၇:၁၀-၁၆) တၢ်ကီတၢ်ခဲအါဒၣ်တက့ၤန့ၣ် နမၤဘၣ်ဂီၢ်က့ၤအီၤသ့ ခီဖျိ တၢ်ဃ့ဘါထုကဖၣ်လၢ တၢ်သူၣ်ဆူၣ်သးဆူၣ်, မၤထွဲလံာ်စီဆှံတၢ်သိၣ်တၢ်သီ ဒီးပာ်ဖျါထီၣ်တၢ်အဲၣ်တၢ်ကွံလီၤ.—၁ ကရံၣ်သူး ၁၃:၄-၈; ကလၤတံ ၅:၂၂.

ဘၣ်ဆၣ် ခရံာ်ဖိတနီၤနီၤ ဆၢတဲာ်လီၤအသးလၢကအိၣ်လီၤဖးဒီး အသးသမူတံၤသကိး မ့ၢ်လၢ အကွၢ်ဆၢၣ်မဲာ်ဘၣ်တၢ်အိၣ်သး ကီကီခဲခဲ ဒ်လၢလာ်အံၤအသိးလီၤ-

အသးသမူတံၤသကိး တအဲၣ်ဒိးလုၢ်အီၣ်လုၢ်အီ အဟံၣ်ဖိဃီဖိနီတစဲးဘၣ်—၁ တံၤမသ့း ၅:၈.

အသးသမူတံၤသကိး မၤဒၢၣ်မၤဆါအီၤနးနးကလဲာ်—၁ မိၤၡ့ ၆:၁၃.

အသးသမူတံၤသကိး တြီအီၤတုၤဒၣ်လဲာ်ဘူၣ်ထီၣ်ဘါထီၣ် ယဟိဝၤယွၤ တန့ၢ်ဘၣ်. အဒိ, အသးသမူတံၤသကိး မ့ၢ်မၢဆူၣ်အီၤလၢ ကမၤကမၣ် ယွၤအတၢ်သိၣ်တၢ်သီလၢ ကျဲတဘိဘိ ဒီးမၤပျံၤမၤဖုးအီၤဒီး ပှၤလၢအဘၣ်တၢ်မၤပျံၤမၤဖုး အီၤတဂၤက ‘စူၢ်ယွၤ အါန့ၢ်ကစူၢ်ပှၤကညီ’ အဂီၢ်ကျဲအဂၤမ့ၢ်တအိၣ်ဘၣ်န့ၣ် အဝဲမ့ၢ်အဲၣ်ဒိး ဆၢတဲာ်လီၤအသးလၢ ကအိၣ်လီၤဖးန့ၣ်သ့ဝဲလီၤ.—မၤတၢ် ၅:၂၉.

လါယူၤလံ ၁၄-၂၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၂

တၢ်ဟ့ၣ်ကူၣ်လၢ နကကွၢ်လုၢ်ဒိၣ်ထီၣ်ဖိအဂီၢ်

တၢး၂၀.၁၀ ၂၇ ¶၇

ဖဲနဖိဒိၣ်ထီၣ်အခါ မ့ၢ်အဝဲသ့ၣ် ကမၤယဟိဝၤယွၤ အတၢ်မၤဧါ

^၇ နမ့မ့ၢ်ပှၤလၢ အဆီဟံၣ်ဆီဃီ ဒီးလီကီဖိန့ၣ် သံကွၢ်လီၤနသးလၢ ‘မ့ၢ်ယအိၣ်ဒီး တၢ်ဆီၣ်လီၤသး, အဲၣ်ယဟိဝၤယွၤဒီး အကလုၢ်ကထါဧါ. မ့ၢ်ယဟိဝၤယွၤ ဃုထၢယၤလၢ ယကကွၢ်ထွဲ ယဖိလၢ အလုၢ်ဒိၣ်ပှ့ၤဒိၣ် တဖၣ်အံၤဧါ.’ (စံးထီၣ်ပတြၢၤ ၁၂၇:၃, ၄) နမ့မ့ၢ် မိၢ်ပၢ်န့ၣ် သံကွၢ်လီၤနသးလၢ ‘မ့ၢ်ယသိၣ်လိ ယဖိလၢကမၤတၢ် ဆူၣ်ဆူၣ်ဧါ.’ (စံၣ်တဲၤတဲလီၤတၢ် ၃:၁၂, ၁၃) ‘ဟီၣ်ခိၣ်လၢ မုၣ်ကီၤလံၢ်ပၢဝဲအံၤ မ့ၢ်ယဒီသဒၢယဖိလၢ တၢ်လီၤဘၣ်ယိၣ်လၢ နီၢ်ခိဒီးနီၢ်သး လၢအဂ့ၤကတၢၢ်လံဧါ.’ (ကတိၤဒိ ၂၂:၃) နကဒီသဒၢ နဖိလၢ တၢ်ကီတၢ်ခဲ ခဲလၢာ်အပူၤတသ့ဘၣ်. နကမၤဒ်န့ၣ်အဂီၢ် တမ့ၢ်တၢ်လၢအညီဘၣ်. ဒ်သိးအဝဲသ့ၣ်လဲၤခီဖျိ တၢ်ကီတၢ်ခဲလၢ အတၢ်အိၣ်မူပူၤကန့ၢ်အဂီၢ် လၢတၢ်အဲၣ်တၢ်ကွံအပူၤ မၤစၢၤအဝဲသ့ၣ်ဒီး ဆဲးသိၣ်လိအဝဲသ့ၣ်လၢ အကသန့ၤအသးလၢ လံာ်စီဆှံအတၢ်ဟံးစုနဲၣ်ကျဲန့ၣ်တက့ၢ်. (ဖး ကတိၤဒိ ၂:၁-၆ တက့ၢ်.) အဒိ နဘူးနတံၢ် မ့ၢ်တမၤယဟိဝၤယွၤ အတၢ်မၤလၢၤဘၣ်န့ၣ် မၤစၢၤနဖိလၢ ကမၤလိဝဲ ကစၢ်ယွၤကလုၢ်ကထါ ဒ်သိးကသ့ၣ်ညါဝဲလၢ တၢ်သးတီဒီး ယဟိဝၤယွၤန့ၣ် မ့ၢ်တၢ်လၢအရ့ဒိၣ် ထဲလဲၣ်န့ၣ်တက့ၢ်. (စံးထီၣ်ပတြၢၤ ၃၁:၂၃) ဖဲပှၤလၢနအဲၣ်တဂၤ သံအခါ ဒုးနဲၣ်နဖိ လၢလံာ်စီဆှံအဆၢတဖၣ်လၢ ကကဲထီၣ်တၢ်မၤစၢၤ ဒ်သိးလဲၤခီဖျိဝဲ ကန့ၢ်အဂီၢ်တက့ၢ်.—၂ ကရံၣ်သူး ၁:၃, ၄; ၂ တံၤမသ့း ၃:၁၆.

တၢး၁၉.၁၂ ၂၆ ¶ ၁၇-၁၉

မိၢ်ပၢ်သ့ၣ်ဧၢ သိၣ်လိသုဖိတဖၣ်လၢ ကအဲၣ်ယဟိဝၤယွၤ

^၁၇ စးထီၣ်သိၣ်လိနဖိလၢ အနီၢ်ဆံးခါလံၤလံၤတက့ၢ်. မိၢ်ပၢ်တဖၣ် မ့ၢ်စးထီၣ်သိၣ်လိ အဖိတဖၣ် ဒံးဆိန့ၣ် ဒံးဂ့ၤလီၤ. (ကတိၤဒိ ၂၂:၆) ဆိကမိၣ်ကွၢ် စီၤတံၤမသ့း အဒိအတဲာ်တက့ၢ်. ဖဲအနီၢ်ဒိၣ်ထီၣ်အခါ အဝဲလဲၤသကိးတၢ်ဒီး စီၤပီလူးလီၤ. စီၤတံၤမသ့း အမိၢ်နီၢ်အူၤနံက့ၤ ဒီးအဖံနီၢ်လိၤအ့ၣ် သိၣ်လိအီၤ စးထီၣ်လၢအ “မ့ၢ်ဖိဒံဖိသၣ်လံၤလံၤ” လီၤ.—၂ တံၤမသ့း ၁:၅; ၃:၁၅.

^၁၈ ကၠံချီၣ်ဒီးဖံၣ်(စ်) ဒီမါဝၤခံဂၤ လၢအအိၣ်လၢ ကီၢ်ခိၣ်ဒံၤဘီန့ၣ် မၤစၢၤအဖိဃုဂၤလၢာ် ဒ်သိးကအဲၣ်ယဟိဝၤယွၤ ဒီးမၤအတၢ်မၤအဂီၢ်လီၤ. ဒ်သိးအဝဲသ့ၣ် မၤဝဲဒ်န့ၣ်ကန့ၢ်အဂီၢ် တၢ်မနုၤမၤစၢၤအီၤလဲၣ်. အဝဲသ့ၣ် ကွၢ်လိမၤဒိး နီၢ်အူၤနံက့ၤ ဒီးနီၢ်လိၤအ့ၣ်လီၤ. အဝဲသ့ၣ် တဲဝဲလၢ “စးထီၣ်ဖဲပဖိ အိၣ်ဖျဲၣ်ထီၣ်ဝံၤ တယံာ်ဘၣ်န့ၣ် ပသိၣ်က့ၤသီက့ၤ အဝဲသ့ၣ်လၢ ကစၢ်ယွၤ အကလုၢ်ကထါ တုၤအနုာ်လီၤလၢ အဝဲသ့ၣ်အသးအပူၤလီၤ.”—၅ မိၤၡ့ ၆:၆, ၇.

^၁၉ နကဘၣ် “သိၣ်က့ၤသီက့ၤ” နဖိတဖၣ်လၢ ယဟိဝၤယွၤ အကလုၢ်ကထါန့ၣ် အခီပညီ မ့ၢ်မနုၤလဲၣ်. လၢ ၅ မိၤၡ့ ၆:၆, ၇ အပူၤဧ့ၤဘြံၤအတၢ်ကတိၤ လၢအမ့ၢ် “သိၣ်က့ၤသီက့ၤ” န့ၣ်အဲၣ်ဒိးတဲဝဲ “သိၣ်လိဒီး ဒုးသ့ၣ်နီၣ်အီၤ တလီၢ်လီၢ်” လီၤ. ဒ်သိးမိၢ်ပၢ်တဖၣ် မၤဝဲဒ်န့ၣ် ကသ့အဂီၢ် အဝဲသ့ၣ် ကဘၣ်ဟ့ၣ်တၢ်ဆၢကတီၢ် လၢအဖိအဂီၢ်လီၤ. တဘျီတခီၣ် မ့ၢ်လၢမိၢ်ပၢ်တဖၣ်န့ၣ် ဘၣ်က့ၤသိၣ်လိအဖိတဖၣ် တလီၢ်လီၢ်အဃိ အဝဲသ့ၣ် အသးကလီၤဘှံးလီၤ. တၢ်မ့ၢ်ကဲထီၣ်အသး ဒ်အံၤန့ၣ် မိၢ်ပၢ်တဖၣ် ထံၣ်ဝဲတၢ်အိၣ်သးအံၤ ဒ်တၢ်ခွဲးတၢ်ယာ်လၢ ကမၤစၢၤအဖိလၢ ကနၢ်ပၢၢ်ထီၣ် ကစၢ်ယွၤ အကလုၢ်ကထါ ဒီးမၤထွဲအီၤအဂီၢ်သ့လီၤ.

တၢး၀၆-E ၄/၁ ၉ ¶၄

မိၢ်ပၢ်တဖၣ်, ပာ်လီၤတၢ်ဒိတၢ်တဲာ်လၢအဂ့ၤ လၢသုဖိတဖၣ်အဂီၢ်

ဒ်ပသ့ၣ်ညါအသိး တၢ်လၢဖိသၣ်န့ၣ် တမ့ၢ်လၢ အတၢ်ဒိကနၣ် ကအိၣ်ထီဘိဘၣ်. (၁ မိၤၡ့ ၈:၂၁) အဃိ မိၢ်ပၢ်တဖၣ် ကဘၣ်မၤဒ်လဲၣ်. လံာ်စီဆှံ တဲဝဲလၢ “ညီနုၢ်န့ၣ် ဖိသၣ်တဖၣ် အဲၣ်ဒိးဟးမၤကြီတၢ် ဘၣ်ဆၣ် တၢ်သိၣ်က့ၤသီက့ၤ အနီၣ်တီၢ်န့ၣ် ကမၤစၢၤအီၤဒ်သိး အသုတဟးမၤကြီတၢ် တဂ့ၤအဂီၢ်လီၤ.” (ကတိၤဒိ ၂၂:၁၅) ပှၤတနီၤ ဆိကမိၣ်ဝဲလၢ တၢ်ဟံးစုနဲၣ်ကျဲအံၤ ဆူၣ်တလၢ ဒီးဆၢကတီၢ်ခဲအံၤ ပှၤတကြၢး မၤဒ်န့ၣ်လၢၤဘၣ်. နီၢ်ကီၢ်န့ၣ် လံာ်စီဆှံ တတူၢ်လိာ်ဝဲ တၢ်မၤဆူၣ်မၤစိး ဒီးတၢ်မၤအၢမၤသီ နီတမံၤဘၣ်. ဖဲလံာ်စီဆှံတဲဝဲ “နီၣ်တီၢ်” အဲၣ်ဒိးတဲဝဲ မိၢ်ပၢ်အမူဒါလၢ ကသိၣ်က့ၤသီက့ၤအဖိ. တဘျီတခီၣ် အကတီၢ်ဝဲ နီၢ်ကီၢ် သနာ်က့ ထီဘိန့ၣ် အဝဲသ့ၣ် ကဘၣ်သိၣ်က့ၤသီက့ၤ အဖိလၢ တၢ်အဲၣ်တၢ်ကွံပူၤ ဒီးကျဲလၢ အကြၢးဝဲဘၣ်ဝဲ ဒ်သိး အဖိတဖၣ် ကဒိးန့ၢ်ဘၣ်အဘျုးအဂီၢ်.—ဧ့ၤဘြံၤ ၁၂:၇-၁၁.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၁.၀၈ ၂၂ ¶၁၁

သးခုလၢနမၤဘၣ် ယဟိဝၤယွၤအတၢ်မၤတက့ၢ်

^၁၁ ဒ်န့ၣ်အသိး ဖဲပမၤကစၢ်ယွၤအတၢ်မၤ လၢအဂ့ၤကတၢၢ် ဒီးသူတၢ်လၢအအိၣ်ဒီးပှၤ လၢယဟိဝၤယွၤ အတၢ်မၤအဂီၢ်အခါ ပကသးခုအါထီၣ်ဝဲလီၤ. “ဟ့ၣ်တၢ်ဆၢကတီၢ် လၢာ်လၢာ်ဆ့ဆ့” လၢတၢ်စံၣ်တဲၤတဲလီၤတၢ်မၤအပူၤဒီး လၢတၢ်အိၣ်ဖှိၣ်အဂီၢ်တက့ၢ်. (မၤတၢ် ၁၈:၅; ဧ့ၤဘြံၤ ၁၀:၂၄, ၂၅) ကတဲာ်ကတီၤပာ်စၢၤသးဂ့ၤဂ့ၤလၢ နကဟ့ၣ်ထီၣ်တၢ်စံးဆၢလၢ အကဲထီၣ်တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါအဂီၢ်တက့ၢ်. နမ့ၢ်ဒိးန့ၢ်ဘၣ်မူဒါလၢ နွံဖးဖီတၢ်အိၣ်ဖှိၣ်အဂီၢ်န့ၣ် ထံၣ်အီၤလၢအမ့ၢ် တၢ်ခွဲးတၢ်ယာ် လၢနဂီၢ်တက့ၢ်. ပှၤမ့ၢ်မၢ နမၤစၢၤတၢ်တခါခါလၢ တၢ်အိၣ်ဖှိၣ်အပူၤန့ၣ် ကဲထီၣ်ပှၤလၢ ပှၤနာ်န့ၢ်ဝဲသ့ဒီး ပာ်ကဲတၢ်ဆၢကတီၢ်တက့ၢ်. မူဒါလၢ နဒိးန့ၢ်ဘၣ်အီၤန့ၣ် တဘၣ်ဆိကမိၣ်လၢ အရ့တဒိၣ်ဘၣ်န့ၣ်တဂ့ၤ. ဂုာ်ကျဲးစၢး မၤတၢ်ဆူၣ်ဆူၣ် ဒ်သိးနတၢ်သ့တၢ်ဘၣ် ကအါထီၣ်တက့ၢ်. (ကတိၤဒိ ၂၂:၂၉) နမၤတၢ်မ့ၢ်ဆူၣ်လၢ ယဟိဝၤယွၤအဂီၢ်န့ၣ် နတၢ်ရ့လိာ်သးဒီးအီၤ ကဂ့ၤဒိၣ်ထီၣ် ဒီးနကသးခုလီၤ. (ကလၤတံ ၆:၄) ဒီးဖဲပှၤဂၤဒိးန့ၢ်မူဒါလၢ နအဲၣ်ဒိးမၤအခါဒၣ်လဲာ် နကသးခုဃုာ်ဒီးအဝဲသ့ၣ်လီၤ.—ရိမ့ၤ ၁၂:၁၅; ကလၤတံ ၅:၂၆.

ijwyp တၢ်ကွဲးဖုၣ် ၁၀၀

ယမ့ၢ်မၤကမၣ်ဘၣ် ယမိယပါ အတၢ်သီၣ်တၢ်သီန့ၣ် ယကဘၣ်မၤဒ်လဲၣ်.

တၢ်လၢနတကြၢးမၤတဖၣ်

နမိၢ်နပၢ် မ့ၢ်တသ့ၣ်ညါလၢ နမၤကမၣ် အတၢ်သိၣ်တၢ်သီန့ၣ် ဘၣ်သ့ၣ်သ့ၣ် နကအဲၣ်ဒိး ပာ်ခူသူၣ် နတၢ်ကမၣ်.

နမိၢ်နပၢ်မ့ၢ်သ့ၣ်ညါ လၢနမၤကမၣ် အတၢ်သိၣ်တၢ်သီန့ၣ် ဘၣ်သ့ၣ်သ့ၣ် နကအဲၣ်ဒိး တဲပူၤဖျဲးသး မ့တမ့ၢ် ပာ်တၢ်ကမၣ်လၢ ပှၤဂၤအလိၤ.

နတကြၢးမၤဒ်န့ၣ် နီတခါဘၣ်. နမ့ၢ်ပာ်ခူသူၣ်တၢ်ကမၣ် မ့တမ့ၢ် တဲပူၤဖျဲးသးန့ၣ် ပာ်ဖျါထီၣ်ဝဲလၢ နတမ့ၢ် ပှၤလၢ အဒိၣ်တုာ်ခိၣ်ပှဲၤဒံးဘၣ်. ဒီးနမိၢ်နပၢ် ကတူၢ်ဘၣ်လၢ တၢ်လၢနကဘၣ်မၤဂ့ၤထီၣ်န့ၣ် အိၣ်ဒံး.

“နမ့ၢ်တဲလံၣ်တၢ်န့ၣ် တမၤဘၣ်ထီၣ်က့ၤ တၢ်ဂ့ၢ်ကီဘၣ်. လၢခံန့ၣ် တၢ်မ့ၢ်တၢ်တီကဖျါထီၣ် ဒီးနကန့ၢ်ဘၣ် တၢ်သိၣ်ဃီၣ် နးန့ၢ်အလီၢ်ဒံး.”—ဒၤယဲနၤ.

တၢ်လၢနကြၢးမၤအီၤ

အၢၣ်လီၤနတၢ်ကမၣ်. လံာ်စီဆှံတဲဝဲလၢ “ပှၤလၢအပာ်ခူသူၣ် အတၢ်ကမၣ်တဖၣ်န့ၣ် တဘီၣ်ထီၣ်ညီထီၣ်ဘၣ်.” (ကတိၤဒိ ၂၈:၁၃) နမိၢ်နပၢ်သ့ၣ်ညါလၢ နတကဲ ပှၤလၢပှၤပှဲၤဘၣ်. ဘၣ်ဆၣ် အဝဲသ့ၣ် အဲၣ်ဒိးသ့ၣ်ညါလၢ နကတဲတၢ် တီတီလိၤလိၤဧါ, တတဲဧါ.

ဃ့ဝံသးစူၤတၢ်. လံာ်စီဆှံ တဲဝဲလၢ “ရ့လိာ်သးတဂၤဒီးတဂၤလၢ တၢ်ဆီၣ်လီၤသးအပူၤ.” (၁ ပ့းတရူး ၅:၅) ဒ်သိး ပကဃ့ဝံသးစူၤတၢ် ဒီးတတဲပူၤဖျဲးသးအဂီၢ် ပလိၣ်ဘၣ် တၢ်ဆီၣ်လီၤသး.

တူၢ်လိာ် တၢ်သိၣ်က့ၤသီက့ၤ. လံာ်စီဆှံ တဲဝဲလၢ “ဒိကနၣ် တၢ်သိၣ်က့ၤသီက့ၤ.” (ကတိၤဒိ ၈:၃၃) ကဒူးကဒ့ၣ်တၢ်တဂ့ၤ ဒီးမၤထွဲဒ် နမိၢ်နပၢ် ဟ့ၣ်နၤတၢ်ကမၣ်အသိး.

ဂုာ်ကျဲးစၢးဒ်သိး နကဒိးန့ၢ်ဘၣ်က့ၤ အဝဲသ့ၣ်အတၢ်နာ်. လံာ်စီဆှံ တဲဝဲလၢ “ပတုာ်ကွံာ် သုလုၢ်လၢ်သကဲာ်ပဝးလၢ အပူၤကွံာ် လၢအဘၣ်ထွဲဒီး သုတၢ်အိၣ်မူလီၢ်လံၤ.” (အ့းဖ့းစူး ၄:၂၂) ပာ်ဖျါထီၣ် လုၢ်လၢ်သကဲာ်ပဝးလၢအဂ့ၤ ထီဘိ.

တၢ်ဟ့ၣ်ကူၣ်– ဒ်သိး နမိၢ်နပၢ် နာ်န့ၢ်နၤကသ့အဂီၢ် ဂုာ်ကျဲးစၢးအါန့ၢ်အလီၢ်. အဒိ ဖဲနဟးလိာ်ကွဲအခါ နဟဲက့ၤ မ့ၢ်တစဲၤခံဘၣ်ဒၣ်လဲာ်န့ၣ် ဒုးသ့ၣ်ညါဆိ အဝဲသ့ၣ်လၢ နကဟဲက့ၤ အခါဖဲလဲၣ်. နမ့ၢ်မၤဒ်န့ၣ်န့ၣ် လီၤဂာ်ဒ်သိး နပာ်ဖျါထီၣ်န့ၢ် နမိၢ်နပၢ်လၢ နအဲၣ်ဒိး ဒိးန့ၢ်ဘၣ်က့ၤ အဝဲသ့ၣ် အတၢ်နာ်.

လါယူၤလံ ၂၁-၂၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၃

တၢ်ဟ့ၣ်ကူၣ်လၢ ဘၣ်ဃးဒီးသံး

lff တၢ်မၤလိ ၄၃ တၢ်ဂ့ၢ် ၂

ဘၣ်ဃးဒီး တၢ်အီသံးန့ၣ် လံာ်စီဆှံ တဲဝဲဒ်လဲၣ်

တၢ်အီမူၤသံး ဒီးတၢ်အီသံး အါတလၢန့ၣ် ယဟိဝၤယွၤတြီဝဲ. (ကလၤတံ ၅:၂၁) လံာ်စီဆှံ တဲဝဲလၢ “တဘၣ်အိၣ်လၢ ပှၤလၢအအီ စပံးထံအါတလၢအကျါ” တဂ့ၤ. (ကတိၤဒိ ၂၃:၂၀) ပမ့ၢ်အီသံးတဂၤမ့ၢ်ဂ့ၤ, ပမ့ၢ်အီသံးဃုာ်ဒီး ပသကိးတဖၣ်မ့ၢ်ဂ့ၤ ပတဘၣ်အီအီၤ အါတလၢတုၤလၢ ပဆိကမိၣ်ထံတၢ် တသ့လၢၤဘၣ်, ပပၢၤပတၢ်ကတိၤတန့ၢ်ဘၣ် ဒီးပဟးမၤကြီဘၣ်ဖုးတၢ်ဘၣ်. ဒီးပတဘၣ်အီအီၤ တုၤလၢ အမၤဘၣ်ဒိ ပတၢ်အိၣ်ဆူၣ်အိၣ်ချ့ဘၣ်. အဃိ ဖဲပအီသံးအခါ ပအီအီၤ ဖဲအကြၢးမ့ၢ်တသ့ဘၣ်န့ၣ် ပမ့ၢ်တအီ နီတစဲးဘၣ်န့ၣ် ကဂ့ၤဒိၣ်ဝဲ.

တၢး၂၃.၁၂ ၁၄ ¶၄

ဘၣ်ဃးဒီး တၢ်အီသံးန့ၣ် ပကဘၣ်ဆၢတဲာ်တၢ် ဒ်ကစၢ်ယွၤအတၢ်ထံၣ်အသိး

မ့မ့ၢ်လၢ ခရံာ်ဖိတဖၣ်န့ၣ် အတၢ်ဘၣ်တ့ကစၢ် အဲၣ်အဝဲသ့ၣ် ဒီးဟံးစုနဲၣ်ကျဲ အဝဲသ့ၣ်. အဒိ ပတၢ်ဘၣ်တ့ကစၢ် ဟ့ၣ်ပလီၢ်ပှၤ ဘၣ်ဃးဒီး တၢ်ကီတၢ်ခဲလၢ အကဲထီၣ်သး ခီဖျိလၢ တၢ်အီသံးအါတလၢအဃိ. ဖဲကတိၤဒိ ၂၃:၂၉-၃၅ န့ၣ်ပဖးဘၣ် ဘၣ်ဃးဒီး ပှၤအီမူၤသံးတဂၤ ဒီးတၢ်ကီတၢ်ခဲ လၢအထံၣ်ဘၣ်ဝဲတဖၣ်အဂ့ၢ်. ဒီပုၢ်ဝဲၢ်ခွါဒဲနံးယၢၤ လၢအကဲတၢ်အိၣ်ဖှိၣ်သးပှၢ် ဒီးအအိၣ်လၢ ကီၢ်ယူရပၤန့ၣ် အနီၣ်ဘၣ်က့ၤဝဲ အတၢ်အိၣ်မူဖဲ တချုးအကဲထီၣ် ယဟိဝၤပှၤအုၣ်အသး ဒံးဘၣ်အခါ. အတဲဝဲဒ်အံၤ. “လၢညါန့ၣ် ယအီသံးဆူၣ်မး ဒီးယဆၢတဲာ်ကမၣ်ဘၣ်တၢ်ဒီဒူၣ်. အဃိ ယထံၣ်ဘၣ် တၢ်ကီတၢ်ခဲဒီဒူၣ် ဒီးယမ့ၢ်ဆိကမိၣ်ထီၣ်က့ၤ တဘျီဘျီန့ၣ် ယသးတမုာ်ဘၣ်.”

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၇.၀၄ ၃၂ ¶၁၆

နတၢ်သးအိၣ်ဟ့ၣ်တၢ်န့ၣ် မ်အကဲထီၣ် တၢ်စံးထီၣ်ပတြၢၤ ယဟိဝၤယွၤတက့ၢ်

^၁၆ ယဟိဝၤယွၤဟ့ၣ်ပှၤ တၢ်ခွဲးတၢ်ယာ်လီၤဆီလၢ ပကဆီၣ်ထွဲမၤစၢၤ အတၢ်ပၢတၢ်ပြးလီၤ. စးထီၣ်လၢနီၢ်အံၣ်အုဒီးစီၤအၤဒၣ်အစိၤ တုၤလီၤလၢပစိၤခဲအံၤ မုၣ်ကီၤလံၢ်အဲၣ်ဒိးဝဲလၢ ပကထီဒါ ယဟိဝၤယွၤလီၤ. ဖဲပဆီၣ်ထွဲယဟိဝၤယွၤ အတၢ်ပၢအခါ မ့ၢ်ဒၣ်ပပာ်ဖျါထီၣ်န့ၢ်မုၣ်ကီၤလံၢ်လၢ ပအိၣ်လၢယဟိဝၤယွၤအအိၣ်တကပၤလီၤ. ပတၢ်နာ်ဒီးတၢ်သးတီန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကဟ့ၣ်လီၤပသးလၢ ယဟိဝၤယွၤ အတၢ်မၤအဂီၢ်လီၤ. ပမ့ၢ်မၤဒ်န့ၣ်န့ၣ် ကမၤသးခု ယဟိဝၤယွၤအသးလီၤ. (ကတိၤဒိ ၂၃:၁၅, ၁၆) ခီဖျိလၢပဆီၣ်ထွဲမၤစၢၤ ယဟိဝၤယွၤအတၢ်မၤဒီး ဒိကနၣ်အကလုၢ်အဃိ အဝဲစံးဆၢက့ၤ မုၣ်ကီၤလံၢ်အတၢ်ဒုၣ်ဒွဲၣ်သ့ဝဲလီၤ. (ကတိၤဒိ ၂၇:၁၁) တၢ်ဒိကနၣ်န့ၣ် မ့ၢ်တၢ်ဟ့ၣ်လၢအလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ် ဒီးမၤသးခုအီၤလီၤ.

လါယူၤလံ ၂၈–လါအီကူး ၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၄

မၤဆူၣ်ထီၣ် နတၢ်နာ် ဒ်သိးနလဲၤခီဖျိ တၢ်ကီတၢ်ခဲကန့ၢ်အဂီၢ်

တၢး၂၃.၀၇ ၁၈ ¶၁၅

အိၣ်ဂၢၢ်ဆိးကျၢၤ ဒီးတဘၣ် ဒံဝ့ၤဒံဝီၤတဂ့ၤ

^၁၅ မၤလိကစၢ်ယွၤ အကလုၢ်ကထါ ဒီးဆိမိၣ်ထံအီၤ. သ့ၣ်တထူၣ် အဂံၢ်စဲၤလီၤသးမ့ၢ်ယိာ်န့ၣ် အကအိၣ် ဂၢၢ်ဂၢၢ်ကျၢၤကျၢၤ. ဒ်န့ၣ်အသိး ပတၢ်နာ် မ့ၢ်သန့ၤထီၣ်သးလၢ ကစၢ်ယွၤ အကလုၢ်ကထါန့ၣ် ပကအိၣ် ဂၢၢ်ဂၢၢ်ကျၢၤကျၢၤ. တကးဒံးဘၣ် ဖဲသ့ၣ်တထူၣ်ဒိၣ်ထီၣ်အခါ အဂံၢ်ကဟဲအါထီၣ် ဒီးအဂံၢ်ကစဲၤလီၤသးကျၢၤကျၢၤ. ပဝဲစ့ၢ်ကီး ဖဲပမၤလိ ကစၢ်ယွၤ အကလုၢ်ကထါ ဒီးဆိမိၣ်ထံအီၤအခါ ပမၤဂၢၢ်ကျၢၤထီၣ်ပတၢ်နာ် ဒီးပနာ်နီၢ်ကီၢ်လၢ တၢ်လၢကစၢ်ယွၤတဲဝဲန့ၣ် အဘၣ်ကတၢၢ်. (ကလီး ၂:၆, ၇) ဒီးလၢညါ ကစၢ်ယွၤ သိၣ်လိ, ဟံးစုနဲၣ်ကျဲ ဒီးဒီသဒၢအပှၤဂီၢ်မုၢ်ဒ်လဲၣ်န့ၣ် ဆိမိၣ်ထံအီၤ. အဒိ ဖဲဝံယဃ့းစက့လး ထံၣ်ဝဲတၢ်ထံၣ်လၢညါခီ ဘၣ်ဃးဒီး မူခိၣ်ကလူးတဂၤ ထိၣ်ဝဲတၢ်လုၢ်ဟံၣ် လီၤတံၢ်လီၤဆဲးအခါ ဝံယဃ့းစက့လး ကွၢ်ဝဲထံထံ. တၢ်ထံၣ်လၢညါခီအံၤ မၤဆူၣ်ထီၣ် ဝံယဃ့းစက့လးအသး ဒီးပမၤလိဘၣ်စ့ၢ်ကီးလၢ ပကဘၣ်မၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်ဘူၣ်ထီၣ်ဘါထီၣ်စီဆှံ. (ဃ့း ၄၀:၁-၄; ၄၃:၁၀-၁၂) အဃိ ပထံၣ်ဘၣ်လၢ ပမ့ၢ်ဟံန့ၢ်တၢ်ဆၢကတီၢ်လၢ ပကမၤလိ ကစၢ်ယွၤ အကလုၢ်ကထါ ဒီးဆိမိၣ်ထံ တၢ်ဂ့ၢ်လၢအဒိၣ်အယိာ်န့ၣ် ပကန့ၢ်ဘၣ် အဘျုးအါမး.

တၢး၀၉-E ၁၂/၁၅ ၁၈ ¶၁၂-၁၃

ဖဲနထံၣ်ဘၣ် တၢ်ကီတၢ်ခဲအခါ နဆဲးအိၣ်ဒီး တၢ်သးခုသ့

^၁၂ ကတိၤဒိ ၂၄:၁၀ တဲဝဲလၢ “ဖဲတၢ်ကိၢ်တၢ်ဂီၤ အဆၢကတီၢ် နသးဂံၢ်ဘါမ့ၢ်လီၤစၢ်န့ၣ် နဂံၢ်နဘါ တအိၣ်အါအါလၢၤဘၣ်.” ဒီးကတိၤဒိ အဆၢဖိအဂၤတဆၢ တဲစ့ၢ်ကီးဝဲလၢ “မ့မ့ၢ် တၢ်သးအုးန့ၣ် မၤဟးဂီၤ ပှၤသးအဂံၢ်အဘါလီၤ.” (ကတိၤ ၁၅:၁၃) ခရံာ်ဖိတနီၤန့ၣ် အသးဟးဂီၤဝဲ တုၤဒၣ်လဲာ် တမၤနီၢ်ကစၢ် တၢ်မၤလိလံာ်စီဆှံ ဒီးတဆိကမိၣ်ထံ ကစၢ်ယွၤ အကလုၢ်ကထါလၢၤဘၣ်. ဒီးဖဲအဃ့ထုကဖၣ်အခါ အဃ့ဝံၤတၢ်မံၤ ဒီးတရ့ဒီး ဒီပုၢ်ဝဲၢ်မုၣ်ခွါတဖၣ်လၢၤဘၣ်. နမ့ၢ်သးဟးဂီၤဒ်န့ၣ် ဖးယံာ်န့ၣ် အကမၤဘၣ်ဒိနၤ.—ကတိၤ ၁၈:၁, ၁၄.

^၁၃ ဘၣ်ဆၣ် ပမ့ၢ်အိၣ်ဒီး တၢ်ထံၣ်လၢအဂ့ၤန့ၣ် ကမၤစၢၤပှၤဒ်သိး ပကမၤတၢ်လၢ အကမၤသးခုပှၤ. စီၤဒၤဝံး ကွဲးဝဲလၢ “အိ ယကစၢ်ယွၤဧၢ, ယမၤနတၢ်ဘၣ်သးန့ၣ် မၤသးခုယသးဒိၣ်မး.” (စံး ၄၀:၈) လၢပတၢ်အိၣ်မူပူၤ ဖဲတၢ်တဟဲကဲထီၣ်အသး ဒ်ပမုၢ်လၢ်အီၤဘၣ်အခါ ပတကြၢးပာ်ပတုာ် နီၢ်သးအတၢ်ဖံးတၢ်မၤ လၢပမၤညီနုၢ်အီၤတဖၣ်ဘၣ်. ပမ့ၢ်မၤ နီၢ်သးအတၢ်ဖံးတၢ်မၤတဖၣ်န့ၣ် ကမၤသးခုပသး အဃိ ပတၢ်သးအုး ကလီၤမၢ်ကွံာ်. ယဟိဝၤယွၤ တဲဝဲလၢ ပမ့ၢ်ဖးအကလုၢ်ကထါ ဒီးဆိကမိၣ်ထံအီၤ ထီဘိန့ၣ် ပကဒိးန့ၢ်ဘၣ် တၢ်သးခု. (စံး ၁:၁, ၂; ယၤ ၁:၂၅) ပမ့ၢ်ဖးလံာ်စီဆှံ ဒီးထီၣ်တၢ်အိၣ်ဖှိၣ်န့ၣ် ပကနၢ်ဟူဘၣ် “တၢ်ကတိၤလၢ အမုာ်” လၢအကဲထီၣ် တၢ်ဂံၢ်တၢ်ဘါ ဒီးအမၤသးခုပှၤ.—ကတိၤ ၁၂:၂၅; ၁၆:၂၄.

တၢး၂၀.၁၂ ၁၅

ပှၤဖးလံာ်ဖိတဖၣ် အတၢ်သံကွၢ်

ကတိၤဒိ ၂၄:၁၆ တဲဝဲလၢ “ပှၤတီပှၤလိၤလီၤဃံၤနွံဘျီဘၣ်ဆၣ်ဒီး, ကဂဲၤဆၢထၢၣ်က့ၤလီၤ.” လံာ်စီဆှံတဆၢအံၤ အဲၣ်ဒိးတဲဝဲ ပှၤလၢအမၤကမၣ်တၢ် တဘျီဝံၤတဘျီ ဒီးကစၢ်ယွၤပျၢ်ကွံာ် အတၢ်ကမၣ်န့ၣ်ဧါ

လံာ်စီဆှံတဆၢအံၤ တအဲၣ်ဒိးတဲဝဲဒ်န့ၣ်ဘၣ်. လၢတၢ်န့ၣ်အလီၢ် အဲၣ်ဒိးတဲဝဲ ပှၤလၢအအိၣ်ဒီးတၢ်ကီတၢ်ခဲလၢ အမၤကမၣ်ဘၣ်တၢ်တဘျီဝံၤတဘျီ ဘၣ်ဆၣ် အဝဲတဟ့ၣ်အၡူဘၣ် ဒီးဂုာ်ကျဲးစၢးမၤနၢၤက့ၤဝဲလီၤ.

ဒ်သိးပကသ့ၣ်ညါတၢ်ဂ့ၢ်အံၤအဂီၢ် ပကကွၢ်သကိး တၢ်ဂ့ၢ်လၢလံာ်စီဆှံတဆၢအံၤ အဖီခိၣ်ဒီးအဖီလာ်လီၤ. “ပှၤအအၢအသီဧၢ, ခိးခူသူၣ်ထီဒါပှၤတီပှၤလိၤအဟံၣ်တဂ့ၤ. မၤဟးဂီၤအအိၣ်ဘှံးအလီၢ်တဂ့ၤ. အဂ့ၢ်ဒ်အံၤ, ပှၤတီပှၤလိၤလီၤဃံၤနွံဘျီဘၣ်ဆၣ်ဒီး, ကဂဲၤဆၢထၢၣ်က့ၤလီၤ. မ့မ့ၢ်ပှၤတတီတလိၤဘၣ်န့ၣ် အခီၣ်ဘၣ်တိၢ်ဒီး လီၤဃံၤလၢတၢ်ဟးဂီၤအပူၤလီၤ. တုၤနဒုၣ်နဒါလီၤဃံၤဒီး, သးခုတၢ်တဂ့ၤ, ဒီးတုၤအခီၣ်ဘၣ်တိၢ်ဒီး, သူၣ်ဖှံသးညီတဂ့ၤ.”—ကတိၤဒိ ၂၄:၁၅-၁၇.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

lvs တၢ်မၤလိ ၁၀ ¶၁၃-၁၅

တၢ်ဆီဟံၣ်ဆီဃီ—မ့ၢ်ယွၤအတၢ်ဟ့ၣ်

^၁၃ နမ့ၢ်အဲၣ်ဒိး ဆီဟံၣ်ဆီဃီန့ၣ် နကြၢးအိၣ်ကတဲာ်ကတီၤ ဆိပာ်စၢၤနသးလီၤ. ဘၣ်သ့ၣ်သ့ၣ် နကဆိကမိၣ်လၢ နအိၣ်ကတဲာ်ကတီၤဆိပာ်စၢၤ နသးလံ. ဘၣ်ဆၣ် ဒ်သိးနကအိၣ်ကတဲာ်ကတီၤနသးလၢ နကဆီဟံၣ်ဆီဃီအဂီၢ် နကဘၣ်မၤဒ်လဲၣ်န့ၣ် ခဲအံၤပကဃုသ့ၣ်ညါအါထီၣ် ဘၣ်ဃးဒီးတၢ်ဂ့ၢ်အံၤလီၤတံၢ်လီၤဆဲးလီၤ.

^၁၄ လံာ်စီဆှံ ပာ်ဖျါထီၣ်ဝဲလၢ မါဒီးဝၤခံဂၤ အမူဒါလၢ ဟံၣ်ဖိဃီဖိအပူၤန့ၣ် တဒ်သိးလိာ်အသးဘၣ်. လၢတၢ်န့ၣ်အဃိ ပိာ်မုၣ်ဒီး ပိာ်ခွါတဖၣ် ကဘၣ်အိၣ် ကတဲာ်ကတီၤအသး ဒ်လဲၣ်ဒ်လဲၣ်န့ၣ် တဒ်သိးလိာ်အသးဘၣ်. ပိာ်ခွါတဂၤ မ့ၢ်အဲၣ်ဒိးဆီဟံၣ်ဆီဃီန့ၣ် အဝဲကြၢးသံကွၢ်လီၤအသးလၢ မ့ၢ်ယဟံးထီၣ်ဖီၣ်ထီၣ် ဟံၣ်ခိၣ်အမူဒါ န့ၢ်လံဧါ. ယဟိဝၤယွၤအဲၣ်ဒိးဝဲလၢ ဝၤန့ၣ်ကကဟုကယာ်အဖိအမါ ဒီးလုၢ်အီၣ်အဝဲသ့ၣ်လၢ နီၢ်ခိတခီန့ၣ်လီၤ. တကးဒံးဘၣ် တၢ်လၢအရ့ဒိၣ်ကတၢၢ်န့ၣ် ဝၤကဘၣ်တီခိၣ်ရိၤမဲဝဲလၢ အဟံၣ်ဖိဃီဖိတဖၣ် ကဘူၣ်ထီၣ်ဘါထီၣ် ကစၢ်ယွၤအဂီၢ်စ့ၢ်ကီးလီၤ. လံာ်စီဆှံပာ်ဖျါထီၣ်ဝဲလၢ ပိာ်ခွါတဂၤ မ့ၢ်တအံးထွဲကွၢ်ထွဲ အဟံၣ်ဖိဃီဖိန့ၣ်အဝဲ “အၢန့ၢ်ပှၤတနာ်ဘၣ်တၢ်” တဂၤန့ၣ်လီၤ. (၁ တံၤမသ့း ၅:၈) လၢတၢ်န့ၣ်အဃိ နမ့မ့ၢ်ပိာ်ခွါတဂၤလၢ အအဲၣ်ဒိးဆီဟံၣ်ဆီဃီန့ၣ် ဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲ တခါအံၤတက့ၢ်. “ကတဲာ်ကတီၤနတၢ်မၤလၢခိ, ဒီးမၤတၢ်လၢစံာ်ဧိၤပှဲၤဧိၤအပူၤတက့ၢ်. လၢခံက့ၤဒီးသူၣ်ထီၣ်နဟံၣ်တက့ၢ်.” လၢတၢ်န့ၣ်အဃိ တချုးလၢနဆီဟံၣ်ဆီဃီဒံးဘၣ်န့ၣ် နကဘၣ်ဆိကမိၣ်ထံ ဘၣ်ဃးဒီး ယဟိဝၤယွၤအဲၣ်ဒိးလၢ နကကဲထီၣ်ဝၤ ဒ်လဲၣ်တဂၤလဲၣ် ဒီးနကဘၣ်ဂုာ်ကျဲးစၢး ဒ်သိးနကတုၤထီၣ်ထီၣ်ဘးလၢ နကဆီဟံၣ်ဆီဃီအဂီၢ်လီၤ.—ကတိၤဒိ ၂၄:၂၇.

^၁၅ မ့မ့ၢ်ပိာ်မုၣ်တဂၤလၢ အအဲၣ်ဒိးဆီဟံၣ်ဆီဃီန့ၣ် အဝဲကဘၣ်သံကွၢ်လီၤအသးလၢ မ့ၢ်ယဟံးထီၣ်ဖီၣ်ထီၣ် မါဒီးမိၢ်အမူဒါန့ၢ်လံဧါ. လံာ်စီဆှံပတြၢၤဝဲ မါလၢအဂ့ၤတဂၤလၢ အကွၢ်ထွဲအဖိဒီးအဝၤ လၢကျဲအါဘိန့ၣ်လီၤ. (ကတိၤဒိ ၃၁:၁၀-၃၁) မုၢ်မဆါတနံၤညါအံၤ ပိာ်မုၣ်ဒီးပိာ်ခွါအါဂၤ ဆိကမိၣ်ဝဲထဲ ယမ့ၢ်ဆီဟံၣ်ဆီဃီန့ၣ် ယသးသမူတံၤသကိး ကကဲထီၣ်တၢ်မၤစၢၤလၢယဂီၢ်ဒ်လဲၣ်. ဘၣ်ဆၣ် ယဟိဝၤယွၤ အဲၣ်ဒိးလၢပကဆိကမိၣ် ဘၣ်ဃးဒီး ပကဲထီၣ်တၢ်မၤစၢၤလၢ ပသးသမူတံၤသကိးအဂီၢ် ကသ့ဒ်လဲၣ်.

lmd တၢ်ဂ့ၢ်ဘၣ်ထွဲလိာ်သး က တၢ်ဂ့ၢ် ၁၁

ပသးအိၣ်သိၣ်လိ တၢ်မ့ၢ်တၢ်တီ

၁၁. ကစၢ်ယွၤဟ့ၣ်လီၤပှၤ အကလုၢ်ကထါလၢအရ့ဒိၣ်.—၂ တံၤ ၃:၁၆, ၁၇; ၂ ပ့း ၁:၂၀, ၂၁.

လါအီကူး ၄-၁၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၅

တၢ်ဟ့ၣ်ကူၣ်လၢ ကမၤစၢၤပှၤ ဒ်သိးပကတဲတၢ် သ့သ့ဘၣ်ဘၣ်အဂီၢ်

တၢး၁၅ ၁၂/၁ ၁၉ ¶၆-၇

သူနပျ့ၤလၢ တၢ်ကူၣ်သ့တက့ၢ်

^၆ ဘၣ်မနုၤအဃိအရ့ဒိၣ်လၢ ပကဘၣ်သ့ၣ်ညါ တၢ်ဆၢကတီၢ်လၢ ပကြၢးတဲတၢ်န့ၣ်လဲၣ်. ကတိၤဒိ ၂၅:၁၁ စံးဝဲဒ်အံၤ– “တၢ်ကတိၤလၢ ပှၤကတိၤလၢ အကတီၢ်ဒၣ်ဝဲန့ၣ် မၤသးဒ် သၣ်သွံထူ အိၣ်ဝဲလၢတၢ်ဂီၤစ့အပူၤအသိးန့ၣ်လီၤ.” သၣ်သွံထူတဖၣ်န့ၣ် ဃံလၤဝဲဘၣ်ဆၣ် အဝဲသ့ၣ်မ့ၢ်အိၣ်လၢ လီခီစ့အပူၤန့ၣ် ဃံလၤဒိၣ်န့ၢ်ဒံးအလီၢ်လီၤ. ဒ်န့ၣ်အသိး ပအိၣ်ဒီးတၢ်ကတိၤလၢ အမၤမုာ်ထီၣ်ပှၤသးသ့န့ၣ်လီၤ. ဘၣ်ဆၣ်ပမ့ၢ်အိၣ်ခိးဒီး တဲတၢ်လၢအဆၢကတီၢ်လၢ အကြၢးဝဲဘၣ်ဝဲန့ၣ် ပမၤစၢၤပှၤတဂၤအံၤ လၢအဂ့ၤကတၢၢ်ကသ့ဝဲလီၤ. ပမၤတၢ်အံၤကသ့ဒ်လဲၣ်.

^၇ ပမ့ၢ်တဲတၢ်လၢ တၢ်ဆၢကတီၢ်လၢ တကြၢးဝဲဘၣ်ဝဲဘၣ်န့ၣ် ဘၣ်သ့ၣ်သ့ၣ် ပှၤဂၤကနၢ်ပၢၢ်ကမၣ်ပှၤ ဒီးတဒိကနၣ်ပှၤဘၣ်. (ဖး ကတိၤဒိ ၁၅:၂၃ တက့ၢ်.) အဒိ, ဖဲလါမၢ်ၡး ၂၀၁၁ အနံၣ်န့ၣ် ဟီၣ်ခိၣ်ဟူးဒီး စူၢ်နၣ်မံး မၤဟးဂီၤဝဲဝ့ၢ်အါဖျၢၣ်လၢ ကီၢ်ယပၣ်မုၢ်ထီၣ်တခီန့ၣ်လီၤ. လၢတၢ်အံၤအဃိ ပှၤသံဝဲ ၁၅,၀၀၀ ဘျဲၣ်န့ၣ်လီၤ. ယဟိဝၤပှၤအုၣ်အသးတဖၣ် အဘူးအတံၢ် ဒီးအတံၤသကိးတဖၣ် သံကွံာ်ဝဲဘၣ်ဆၣ် အဝဲသ့ၣ်အဲၣ်ဒိးသူဝဲ လံာ်စီဆှံဒီးမၤစၢၤပှၤဂၤလၢ အတၢ်အိၣ်သးလီၤဂာ်ဒီးအဝဲသ့ၣ်န့ၣ်လီၤ. ဘၣ်ဆၣ် အဝဲသ့ၣ်သ့ၣ်ညါဝဲလၢ ပှၤအါဂၤန့ၣ် မ့ၢ်ပှၤဘူးဒးဖိဒီး တသ့ၣ်ညါလံာ်စီဆှံအါအါဘၣ်. လၢတၢ်န့ၣ်အဃိ ဖဲတၢ်ဆၢကတီၢ်အဝဲန့ၣ် ဒီပုၢ်ဝဲၢ်တဖၣ် တတဲဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဂ့ၢ်ဘၣ်. လၢတၢ်န့ၣ်အလီၢ် ဒီပုၢ်ဝဲၢ်တဖၣ်မၤမုာ်ထီၣ်က့ၤအဝဲသ့ၣ်အသးဒီး တဲနၢ်ပၢၢ်အဝဲသ့ၣ်လၢ ဘၣ်မနုၤအဃိ တၢ်နးတၢ်ဖှီၣ်ဘၣ်ဝဲ ပှၤဂ့ၤတဖၣ်လဲၣ်န့ၣ်လီၤ.

တၢး၁၅ ၁၂/၁ ၂၁-၂၂ ¶၁၅-၁၆

သူနပျ့ၤလၢ တၢ်ကူၣ်သ့တက့ၢ်

^၁၅ ပကတဲတၢ်ဒီး ပှၤဂၤဒ်လဲၣ်ဒ်လဲၣ်န့ၣ် အရ့ဒိၣ်ထဲသိးဒီး တၢ်ဂ့ၢ်လၢပကတဲဝဲတဖၣ်လီၤ. ယ့ၣ်ၡူးကတိၤတၢ်လၢ “အဂ့ၤအဘၣ်” န့ၣ်အဲၣ်ဒိးစံးဝဲလၢ အဝဲကတိၤတၢ် ပှဲၤဒီးတၢ်အဲၣ်တၢ်ကွံလီၤ. လၢတၢ်န့ၣ်အဃိ ယ့ၣ်ၡူးမ့ၢ်တဲတၢ်န့ၣ် ပှၤကနၣ်ဝဲမုာ်လီၤ. (လူၤကၣ် ၄:၂၂) ပဝဲစ့ၢ်ကီး ပမ့ၢ်တဲတၢ်လၢ တၢ်အဲၣ်တၢ်ကွံအပူၤန့ၣ် ပှၤအဂၤတဖၣ် ကဒိကနၣ်ပှၤအါထီၣ် ဒီးကတူၢ်လိာ်တၢ်လၢ ပတဲန့ၣ်လီၤ. (ကတိၤဒိ ၂၅:၁၅) ပမ့ၢ်ပာ်ကဲပှၤဂၤ ဒီးနၢ်ပၢၢ်စၢၤအဝဲသ့ၣ် အတၢ်တူၢ်ဘၣ်န့ၣ် ပကတဲတၢ်ဒီးအဝဲသ့ၣ်လၢ တၢ်အဲၣ်တၢ်ကွံအပူၤလီၤ. ယ့ၣ်ၡူးမၤဝဲဒ်န့ၣ်လီၤ. အဒိ ဖဲအဝဲထံၣ်ဘၣ်ဝဲ ပှၤဂီၢ်မုၢ်တဖၣ် ဂုာ်ကျဲးစၢးဒိကနၣ်အီၤ အဆၢကတီၢ်န့ၣ် ယ့ၣ်ၡူးဟ့ၣ်တၢ်ဆၢကတီၢ်လၢ ကသိၣ်လိသီလိအဝဲသ့ၣ်အဂီၢ်န့ၣ်လီၤ. (မၢ်ကူး ၆:၃၄) ဖဲပှၤစံးအၢစံးသီအီၤအခါဒၣ်လဲာ် အဝဲတဒုၣ်ဒွဲၣ်ဆၢက့ၤပှၤဘၣ်.—၁ ပ့းတရူး ၂:၂၃.

^၁၆ ပအဲၣ်ပဟံၣ်ဖီဃီဖိ ဒီးပတံၤသကိးတဖၣ်သနာ်က့ ခီဖျိလၢပသ့ၣ်ညါ အဝဲသ့ၣ်ဂ့ၤဂ့ၤအဃိ ပကသူတၢ်ကတိၤလၢအဆူၣ်သ့ဝဲလီၤ. ဘၣ်သ့ၣ်သ့ၣ် ပကဆိကမိၣ်လၢ ဖဲပတဲတၢ်ဒီးအဝဲသ့ၣ် အဆၢကတီၢ် တလိၣ်ပအိၣ်ဒီး တၢ်ပလီၢ်သူၣ်ပလီၢ်သးဘၣ်. ဘၣ်ဆၣ် ဖဲယ့ၣ်ၡူးတဲတၢ်ဒီး အတံၤသကိးတဖၣ်အခါ အဝဲတသူတၢ်ကတိၤလၢအဆူၣ်နီတဘျီဘၣ်. ဖဲအတံၤသကိး တဲအါလိာ်အသးလၢ မတၤတဂၤကကဲပှၤအဒိၣ်ကတၢၢ်လဲၣ်အခါ ယ့ၣ်ၡူးဘှီက့ၤအဝဲသ့ၣ်လၢ တၢ်အဲၣ်တၢ်ကွံအပူၤလီၤ. ဖဲန့ၣ်အဆၢကတီၢ် ယ့ၣ်ၡူးကိးဖိသၣ်တဂၤဆူအဝဲသ့ၣ်အအိၣ် လၢကမၤစၢၤအဝဲသ့ၣ် ဒ်သိးကဆီတလဲ အတၢ်ဆိကမိၣ်အဂီၢ်လီၤ. (မၢ်ကူး ၉:၃၃-၃၇) တၢ်အိၣ်ဖှိၣ်သးပှၢ်တဖၣ် ကွၢ်လိမၤဒိး ယ့ၣ်ၡူးအဒိအတဲာ်သ့ ခီဖျိလၢ အဝဲသ့ၣ်သိၣ်က့ၤသီက့ၤပှၤဂၤလၢ တၢ်အဲၣ်တၢ်ကွံအပူၤန့ၣ်လီၤ.—ကလၤတံ ၆:၁.

တၢး၁၈.၀၄ ၂၃ ¶၁၀

ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ “ဒံးအါထီၣ်တက့ၢ်”

^၁၀ တၢ်ဟ့ၣ်ဂံၢ်ဟ့ၣ်ဘါပှၤဂၤန့ၣ် တမ့ၢ်ထဲတၢ်အိၣ်ဖှိၣ်သးပှၢ်တဖၣ် အမူဒါဘၣ်. စီၤပီလူးဟ့ၣ်သဆၣ်ထီၣ်ဝဲ ခရံာ်ဖိခဲလၢာ်လၢ ကတဲတၢ်လၢအိၣ်ဒီး “အဘျုးအဖှိၣ်ဒီး . . . မၤထီၣ်မၤထီ” ပှၤဂၤန့ၣ်လီၤ. (အ့းဖ့းစူး ၄:၂၉) ပဝဲတဂၤစုာ်စုာ် ပကဘၣ်ပာ်သူၣ်ပာ်သး ပှၤဂၤအတၢ်လိၣ်ဘၣ်တဖၣ် ဒ်သိးပမၤစၢၤအဝဲသ့ၣ် ကသ့အဂီၢ်လီၤ. စီၤပီလူးကွဲးန့ၢ်ဝဲ ဧ့ၤဘြံၤခရံာ်ဖိတဖၣ်လၢ “ပှၤအစုလၢအလီၤဘျ့, ဒီးအခီၣ်လ့ၢ်ခိၣ်လၢ အဂံၢ်အဘါတအိၣ်ဘၣ်န့ၣ်, မၤဆူၣ်ထီၣ်တက့ၢ်. မၤလိၤကျဲဧိၤကပူၤဧိၤလၢ သုခီၣ်အဂီၢ်, ဒ်သိးပှၤလၢအခီၣ်ဟးဂီၤ အသုတဘၣ်ဃၣ်ကွံာ်အသးတဂ့ၤ, မ့မ့ၢ်ကဘျါက့ၤန့ၣ်တက့ၢ်.” (ဧ့ၤဘြံၤ ၁၂:၁၂, ၁၃) ပဝဲခဲလၢာ် ဃုာ်ဒီးပှၤဖိသၣ်တဖၣ်ဒၣ်လဲာ် ပဟ့ၣ်ဂံၢ်ဟ့ၣ်ဘါလိာ်သး ခီဖျိပတၢ်စံးတၢ်ကတိၤသ့ဝဲလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၃.၀၉ ၁၅ ¶၃

တၢ်သးစူၤန့ၣ် တမ့ၢ်တၢ်ဂံၢ်စၢ်ဘါစၢ် တခါဘၣ်

^၃ တၢ်သးစူၤန့ၣ် အကဲဝဲ တၢ်ဂံၢ်တၢ်ဘါတခါ ဒီးတမ့ၢ် တၢ်ဂံၢ်စၢ်ဘါစၢ် တခါဘၣ်. ဖဲပထံၣ်ဘၣ် တၢ်အိၣ်သးလၢ အမၤတံာ်တာ်ပသးအခါ ပမ့ၢ်အိၣ်ဒီး တၢ်သးစူၤန့ၣ် ပပာ်သးမုာ်မုာ်သ့. ဒီးတၢ်ဂ့ၤတၢ်ဝါလၢအမ့ၢ် တၢ်သးစူၤန့ၣ် အပၣ်ဃုာ်လၢ “သးစီဆှံအတၤသၣ်” အကျါ. (ကလၤ ၅:၂၂, ၂၃) ကြံးအတၢ်ကတိၤ လၢအမ့ၢ် “တၢ်သူၣ်စူၤသးစူၤ” န့ၣ်တဘျီတခီၣ် အဲၣ်ဒိးတဲဝဲ အခီပညီ လီၤဂာ်ဒ်သိးဒီး ကသ့ၣ်မံၤလၢ ပှၤမၤဘှါအီၤတဒု. ထံၣ်တမှံကွၢ်လၢ ကသ့ၣ်မံၤတဒုအံၤ အဘှါဘၣ်ဆၣ် အဂံၢ်အဘါ တစၢ်ဘၣ်. မ့မ့ၢ်ပဝဲ ပှၤဟီၣ်ခိၣ်ဖိမီၤ. ပမၤအိၣ်ထီၣ် တၢ်သးစူၤ ဒီးဆဲးအိၣ်ဒီး တၢ်ဂံၢ်တၢ်ဘါထီဘိ ကသ့ဒ်လဲၣ်. ပမၤလၢ ပနီၢ်ကစၢ်ဂံၢ်ဘါ တသ့ဘၣ်. အဃိ ပကဘၣ်ဃ့ ကစၢ်ယွၤ အသးစီဆှံ ဒီးဃ့အီၤလၢ အကမၤစၢၤပှၤဒ်သိး ပကမၤအိၣ်ထီၣ် တၢ်သးစူၤ. ပထံၣ်ဘၣ် ပှၤအါဂၤ အတၢ်လဲၤခီဖျိ လၢအကဲထီၣ် ပှၤလၢအသးစူၤ အိၣ်ဝဲအါမး. အဒိ ဖဲပှၤဂၤတဲအါတၢ်ဒီး ပဒီပုၢ်ဝဲၢ်မုၣ်ခွါအခါ ပဒီပုၢ်ဝဲၢ်မုၣ်ခွါအါဂၤန့ၣ် ပာ်ဖျါထီၣ် တၢ်သးစူၤ. ဒီးခီဖျိလၢ ပဒီပုၢ်ဝဲၢ်မုၣ်ခွါ အိၣ်ဒီးတၢ်သးစူၤအဃိ ကဲထီၣ်တၢ်အုၣ်သးအဂ့ၤ လၢပှၤအါဂၤအဂီၢ်. (ဖး ၂ တံၤမသ့း ၂:၂၄, ၂၅.) နၤမီၤ နမၤအိၣ်ထီၣ် တၢ်သးစူၤ ကသ့ဒ်လဲၣ်.

တၢး၂၄.၁၁ ၄-၅ ¶၉-၁၂

ပလဲၤခီဖျိ တၢ်တတီတလိၤ ကန့ၢ်အဂီၢ် ပကွၢ်လိ ယ့ၣ်ၡူးကသ့ဒ်လဲၣ်

^၉ ဒ်သိး ပလဲၤခီဖျိ တၢ်တတီတလိၤ ကန့ၢ်အဂီၢ် ယ့ၣ်ၡူးပာ်လီၤန့ၢ်ပှၤ အဒိအတဲာ် ဂ့ၤဒိၣ်မး. ယ့ၣ်ၡူးန့ၣ် အဟံၣ်ဖိဃီဖိ ဒီးပှၤအဂၤ တရ့အီၤတီတီလိၤလိၤဘၣ်. ဒီးအဘူးအတံၢ်လၢ တစူၢ်က့ၤနာ်က့ၤတၢ်တဖၣ်န့ၣ် ဆိကမိၣ်ကမၣ်အီၤ ဒီးတဲအီၤလၢ အပျုၢ်လံ. တကးဒံးဘၣ် တၢ်ဘူၣ်တၢ်ဘါ ခိၣ်နၢ်တဖၣ် တဲအီၤလၢ အမၤသကိးတၢ်ဒီး တၢ်ဝံတၢ်နါ. မ့မ့ၢ်လၢ ရိမ့ၤအသုးဖိတဖၣ်န့ၣ် မၤမဲာ်ဆှးအီၤ, ထိအီၤတီၢ်အီၤ ဒီးလၢခံမၤသံအီၤ. (မၢ် ၃:၂၁, ၂၂; ၁၄:၅၅; ၁၅:၁၆-၂၀, ၃၅-၃၇) ယ့ၣ်ၡူးထံၣ်ဘၣ်ဒီး တၢ်တတီတလိၤအါမး သနာ်က့ အတမၤဆၢက့ၤတၢ် အၢအၢသီသီ နီတဘျီဘၣ်. ပဟံးန့ၢ်တၢ်မၤလိလၢ ယ့ၣ်ၡူးအဒိအတဲာ် ကသ့ဒ်လဲၣ်.

^၁၀ ဖး ၁ ပ့းတရူး ၂:၂၁-၂၃. ဖဲပထံၣ်ဘၣ် တၢ်တတီတလိၤအခါ ပကဘၣ်မၤဒ်လဲၣ်န့ၣ် ယ့ၣ်ၡူး ပာ်လီၤန့ၢ်ပှၤ အဒိအတဲာ်လၢအဂ့ၤ. ယ့ၣ်ၡူးန့ၣ် ဖဲအကြၢးအိၣ်ဘှ့ၣ်အခါ အအိၣ်ဘှ့ၣ် ဒီးဖဲအဘၣ်တဲတၢ်အခါ အတဲတၢ်. (မး ၂၆:၆၂-၆၄) ဒီးယ့ၣ်ၡူးန့ၣ် ပှၤပာ်ဒ့ၣ်ပာ်ကမၣ်အီၤလၢ တၢ်ဂ့ၢ်အါမံၤ ဘၣ်ဆၣ် အတတဲဆၢက့ၤဝဲ ခဲလၢာ်ဘၣ်. (မး ၁၁:၁၉) အမ့ၢ်ဘၣ်တဲတၢ်န့ၣ် အတတဲဆါတၢ် ဒီးအတတဲပျံၤ ပှၤလၢအမၤအၢမၤနးအီၤဘၣ်. ယ့ၣ်ၡူး ပၢၤအသးန့ၢ်ဝဲ ခီဖျိလၢအ “အးလီၤအသးလၢ ပှၤလၢအစံၣ်ညီၣ်တၢ် တီတီလိၤလိၤတဂၤန့ၣ် အစုပူၤ.” ယ့ၣ်ၡူးနာ်ဝဲလၢ ပှၤရ့ဒီးအီၤ တတီတလိၤဘၣ်န့ၣ် ယဟိဝၤယွၤ ထံၣ်ဝဲခဲလၢာ် ဒီးတၢ်ဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤလီၤမၢ်ကွံာ် တၢ်တတီတလိၤ ခဲလၢာ်.

^၁၁ ဖဲပှၤရ့ပှၤ တတီတလိၤအခါ ပကွၢ်လိ ယ့ၣ်ၡူး သ့ခီဖျိ ပပလီၢ်သး ဘၣ်ဃးဒီး တၢ်လၢပတဲ. တၢ်တတီတလိၤ တနီၤလၢ ပထံၣ်ဘၣ်န့ၣ် အကဲဝဲ တၢ်ဂ့ၢ်ဆံးဆံးဖိအဃိ ဒ်သိး တၢ်အိၣ်သး တနးထီၣ်တဂ့ၤအဂီၢ် ပကွၢ်ကပာ်ကွံာ်အီၤသ့ မ့တမ့ၢ် ပအိၣ်ဘှ့ၣ်သ့. (စံၣ် ၃:၇; ယၤ ၁:၁၉, ၂၀) ဒီးတဘျီတခီၣ်န့ၣ် ဖဲပထံၣ်ဘၣ် ပှၤတဂၤ လဲၤခီဖျိဘၣ် တၢ်တတီတလိၤအခါ ပကဘၣ်တဲန့ၢ်တၢ် လၢအဂီၢ်. မ့တမ့ၢ် ဖဲပှၤသံကွၢ်ပှၤ ပတၢ်စူၢ်တၢ်နာ်အခါ ပကဘၣ်တဲတၢ်စ့ၢ်ကီး. (မၤတၢ် ၆:၁, ၂) ဒီးဖဲပတဲတၢ်အခါ ပကဘၣ် ဂုာ်ကျဲးစၢး တဲတၢ်မုာ်မုာ် ဒီးတဲတၢ်လၢတၢ်ပာ်ကဲ.—၁ ပ့း ၃:၁၅.

^၁၂ ပကွၢ်လိယ့ၣ်ၡူး လၢကျဲအဂၤ သ့ခီဖျိ ပအးလီၤ တၢ်ခဲလၢာ်လၢ “ပှၤလၢအစံၣ်ညီၣ်တၢ် တီတီလိၤလိၤတဂၤန့ၣ် အစုပူၤ.” ဖဲပှၤဂၤ ဆိကမိၣ်ကမၣ်ပှၤ မ့တမ့ၢ် တရ့ပှၤ တီတီလိၤလိၤအခါ ပနာ်လၢ ယဟိဝၤယွၤ သ့ၣ်ညါဝဲ တၢ်ကဲထီၣ်သးခဲလၢာ်. ဒီးပသ့ၣ်ညါလၢ အခါမ့ၢ်ဘၣ်န့ၣ် ယဟိဝၤယွၤ ကမၤဂ့ၤထီၣ်က့ၤ တၢ်အိၣ်သးအဃိ မၤစၢၤပှၤလၢ ပကဆဲးအိၣ်ဒီး တၢ်တူၢ်န့ၢ်ခီၣ်ကဲ. ဖဲပထံၣ်ဘၣ် တၢ်တတီတလိၤအခါ ပမ့ၢ်နာ်န့ၢ် ယဟိဝၤယွၤ ဒီးအိၣ်ခိးလၢ အကမၤဘၣ်ဂီၢ်န့ၢ်ပှၤ တၢ်ဂ့ၢ်ကီန့ၣ် ပတဆဲးသးဒိၣ်ထီၣ်တၢ် ဒီးတစၢဃာ် ပှၤတၢ်ကမၣ်ဘၣ်. ပမ့ၢ်ဆဲးသးဒိၣ်ထီၣ်တၢ်န့ၣ် ပကမၤကမၣ်ဘၣ်တၢ်, ပတသးခု အါအါလၢၤဘၣ် ဒီးပတၢ်ရ့လိာ်သးဒီး ယဟိဝၤယွၤ တဂ့ၤလၢၤဘၣ်.—စံး ၃၇:၈.

လါအီကူး ၁၁-၁၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၆

တဘၣ်ရ့ဒီး “ပှၤဟးဂီၤဖိ” တဂ့ၤ

it-2-E ၇၂၉ ¶၆

တၢ်စူၤ

မူခိၣ်ကလံၤသီၣ်ဂီၤ. ကီၢ်တၢ်စံးပာ်န့ၣ် အိၣ်ဝဲဒီး တၢ်ကိၢ်ခါ ဒီးတၢ်ဂိၢ်ခါ. တၢ်ကိၢ်ခါန့ၣ် ပှၤကိးဝဲလၢ တၢ်ယီၤခါ ဒီးတၢ်ဂိၢ်ခါန့ၣ် ပှၤကိးအီၤလၢ တၢ်စူၤခါ သ့ဝဲစ့ၢ်ကီး. (ထိၣ်သတြီၤဒီး စံး ၃၂:၄; တၢ်သးဝံၣ် ၂:၁၁, တၢ်ဂ့ၢ်အဘျဲၣ်) လါအ့ဖြ့ၣ်ထီၣ်တဝာ် တုၤလၢ လါအီးကထိဘၢၣ် ထီၣ်တဝာ်န့ၣ် တၢ်တစူၤကြီကြီဘၣ် ဒီးအမ့ၢ်ဝဲ ပှၤကူးတၢ် အဆၢကတီၢ်. အဃိ ဖျါလၢ တၢ်စူၤလီၤလၢ ပှၤကူးတၢ်အခါန့ၣ် တမ့ၢ်အဆၢကတီၢ် ဒီးအလီၢ်အကျဲဘၣ်. (ကတိၤဒိ ၂၆:၁; ထိၣ်သတြီၤဒီး ၁ မူၤ ၁၂:၁၇-၁၉) ဖဲတၢ်စူၤခါ အဆၢကတီၢ် တၢ်တစူၤထီဘိဘၣ်, တၢ်စူၤတဘျီဘျီ မူခိၣ်ၡဲတဘျီဘျီ. တၢ်စူၤခါန့ၣ် တၢ်ဂိၢ်အဃိ ပှၤမ့ၢ်အိၣ်လၢ တၢ်စူၤကျါန့ၣ် တၢ်ဂိၢ်ဖးဒိၣ်. (ဧ့ ၁၀:၉, ၁၃) အဃိ ပှၤကဘၣ်သးအိၣ်လၢ တၢ်အိၣ်သဒၢအလီၢ်.—ၡါ ၄:၆; ၂၅:၄; ၃၂:၂; ဘး ၂၄:၈.

တၢး၈၇-E ၁၀/၁ ၁၉ ¶၁၂

ပှၤလၢအတူၢ်လိာ် တၢ်သိၣ်က့ၤသီက့ၤန့ၣ် ကဒိးန့ၢ်ဘၣ် တၢ်မုာ်တၢ်ခုၣ်

^၁၂ ကတိၤဒိ ၂၆:၃ တဲဝဲလၢ “နီၣ်ဖျ့န့ၣ် မ့ၢ်ဝဲဒၣ်လၢပှၤကဖျ့ကသ့ၣ်အဂီၢ်, ထးအ့ၣ်န့ၣ် မ့ၢ်ဝဲဒၣ် လၢပှၤကဒုးအ့ၣ်ထီၣ် ကသ့ၣ်ယီၤအဂီၢ် ဒီးနီၣ်တီၢ်န့ၣ် မ့ၢ်ဝဲဒၣ်လၢပှၤကတီၢ် ပှၤဟးဂီၤဖိအပျိၢ် အဂီၢ်လီၤ.” လံာ်စီဆှံ တဆၢအံၤ ပာ်ဖျါထီၣ်န့ၢ်ပှၤလၢ ပှၤတနီၤန့ၣ် ကလိၣ်ဘၣ် တၢ်သိၣ်က့ၤသီက့ၤ လၢအဆူၣ်တစဲး. အဒိ တဘျီတခီၣ်န့ၣ် ယဟိဝၤယွၤ ဟ့ၣ်အခွဲးလၢ အပှၤဂီၢ်မုၢ် အံၣ်စရ့လးဖိတဖၣ် ကထံၣ်ဘၣ် တၢ်ကီတၢ်ခဲ ခီဖျိ တၢ်လၢ အဝဲသ့ၣ်မၤဝဲအဃိ. လံာ်စီဆှံတဲဝဲလၢ “အဝဲသ့ၣ် ထီဒါက့ၤ ကစၢ်ယွၤ အတၢ်ကတိၤ ဒီးအဝဲသ့ၣ် တပာ်ကဲ တၢ်ထီကတၢၢ်တဂၤ အတၢ်ဟ့ၣ်ကူၣ်ဘၣ် . . . အဃိ ကစၢ်ယွၤ ပျဲတၢ်ကီတၢ်ခဲ ဘၣ်အဝဲသ့ၣ် ဒ်သိးအဝဲသ့ၣ် ကဆီၣ်လီၤအသးအဂီၢ် ဒီးအဝဲသ့ၣ် လီၤဃံၢ်ဒီး ပှၤလၢကမၤစၢၤအဝဲသ့ၣ် တအိၣ်နီတဂၤဘၣ်. ဖဲအဝဲသ့ၣ် ဘၣ်နးဘၣ်ဖှီၣ်အခါ အဝဲသ့ၣ် ကိးထီၣ် ယဟိဝၤယွၤ လၢတၢ်မၤစၢၤအဂီၢ်လီၤ. ဒီးကစၢ်ယွၤ မၤပူၤဖျဲး အဝဲသ့ၣ်လၢ တၢ်နးတၢ်ဖှီၣ်အပူၤလီၤ.” (စံးထီၣ်ပတြၢၤ ၁၀၇:၁၁-၁၃) မ့မ့ၢ် ပှၤတနီၤန့ၣ် အဒိးန့ၢ်ဘၣ် တၢ်သိၣ်က့ၤသီက့ၤအါမး ဘၣ်ဆၣ် အတဒိကနၣ်ဝဲဘၣ် ဒီးအခိၣ်ကိၤဝဲ တုၤဒၣ်လဲာ် ပှၤမၤစၢၤအီၤ တသ့လၢၤဘၣ်. အဃိ ကတိၤဒိ ၂၉:၁ တဲဝဲလၢ “ဖဲပှၤသိၣ်က့ၤသီက့ၤ ပှၤတဂၤ အါဘျီဝံၤဒီး အခိၣ်မ့ၢ်ကိၤဒံးန့ၣ် အဝဲကဟးဂီၤကွံာ် သတူၢ်ကလာ် ဒီးအပူၤဖျဲး တသ့လၢၤဘၣ်.”

it-2-E ၁၉၁ ¶၄

ပှၤခီၣ်ဟးဂီၤ

ပှၤသူအီၤ ဒ်တၢ်ကတိၤဒိ. စီၤပၤၡလိၤမိၤ တဲဝဲလၢ “ပှၤလၢအအးလီၤ မူဒါလၢ ပှၤဟးဂီၤဖိတဂၤ အစုပူၤန့ၣ် လီၤဂာ်ဒ်သိးဒီး ပှၤတဂၤန့ၣ် မၤဟးဂီၤ အနီၢ်ကစၢ်အခီၣ် ဒီးမၤဘၣ်ဒိလီၤအသးလီၤ.” ပှၤတဂၤ မ့ၢ်အးလီၤ အတၢ်မၤလၢ ပှၤဟးဂီၤဖိ အစုပူၤန့ၣ် လီၤဂာ်ဒ်သိး အမၤဟးဂီၤ အနီၢ်ကစၢ် အတၢ်ရဲၣ်တၢ်ကျဲၤ ဒီးအတၢ်မၤ တကဲထီၣ်လိၣ်ထီၣ် နီတစဲးဘၣ်.—ကတိၤ ၂၆:၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၃.၀၉ ၁၉ ¶၁၈

တၢ်သးစူၤန့ၣ် တမ့ၢ်တၢ်ဂံၢ်စၢ်ဘါစၢ် တခါဘၣ်

^၁၈ ပတဲပၠးပှၤဂၤ ပတၢ်နာ်အဂ့ၢ်ၡဲၡဲ ဝံၤဒီးတၢ်လၢပတဲန့ၣ် အဝဲသ့ၣ်မ့ၢ်နာ်ဝဲလံ သနာ်က့ တဘျီတခီၣ်န့ၣ် ပှၤတနီၤ တဘၣ်သးတူၢ်လိာ်ဝဲ တၢ်လၢပတဲဒံးဘၣ်. ဘၣ်ဆၣ် ပမ့ၢ်တဲဖျါထီၣ် ပတၢ်နာ် သ့သ့ဘၣ်ဘၣ် လၢတၢ်သးစူၤအပူၤ ဒီးတဲတၢ်မုာ်မုာ်န့ၣ် ကကဲဘျုး ဖးအါညါ. (ဖး ကလီးစဲ ၄:၆.) ပတဲပၠးပှၤဂၤလၢ ပတၢ်နာ်အဂ့ၢ်န့ၣ် အလီၤဂာ်ဒ်သိးဒီး ပလိၣ်ကွဲ တၢ်ကွံာ်ဘီၤလိ. ဖဲပလိၣ်ကွဲအခါ ပကွံာ်ဘီၤလိ ကဖီလီဖိသ့ မ့တမ့ၢ် ပကွံာ်အီၤဆူၣ်ဆူၣ်သ့. ပမ့ၢ်ကွံာ်ဘီၤလိ ကဖီလီဖိန့ၣ် ပှၤလၢအဂၤတဂၤ ဖီၣ်ဘၣ်ဝဲကညီ ဒီးကဆဲးလိၣ်ကွဲဒီးပှၤ. ဒ်န့ၣ်အသိး ဖဲပတဲတၢ်အခါ ပမ့ၢ်တဲတၢ် သ့သ့ဘၣ်ဘၣ် လၢတၢ်သးစူၤအပူၤ ဒီးတဲတၢ်မုာ်မုာ်န့ၣ် ပှၤကသးအိၣ် ဒိကနၣ်ပှၤ ဒီးကဆဲးတဲတၢ်ဒီးပှၤ. သနာ်က့ ပှၤတဂၤ မ့ၢ်သံကွၢ်ပှၤတၢ် လၢကတဲဆါပှၤ ဒီးအမ့ၢ်ဘၣ်သးတဲအါတၢ်ဒီးပှၤ ဘၣ်ဃးဒီး ပတၢ်စူၢ်တၢ်နာ်အဂ့ၢ်န့ၣ် ပတလိၣ် တဲအါတၢ်ဒီးအဝဲသ့ၣ်ဘၣ်. (ကတိၤ ၂၆:၄) ပှၤဒ်န့ၣ်ဒုကအိၣ်တနီၤ ဘၣ်ဆၣ် ပှၤအါတက့ၢ်န့ၣ် ကနၣ်တၢ်လၢ ပတဲတဖၣ်မုာ်မး.

လါအီကူး ၁၈-၂၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၇

တံၤသကိးနီၢ်ကီၢ်န့ၣ် ကဲဘျုးလၢ ပဂီၢ်ဒ်လဲၣ်

တၢး၁၉.၀၉ ၅ ¶၁၂

ယဟိဝၤယွၤ ပာ်လုၢ်ပာ်ပှ့ၤအခ့အပှၤလၢ အအိၣ်ဒီးတၢ်ဆီၣ်လီၤသးတဖၣ်

^၁၂ ပှၤလၢအအိၣ်ဒီး တၢ်ဆီၣ်လီၤသးန့ၣ် ကပာ်လုၢ်ပာ်ပှ့ၤ ပှၤဂၤအတၢ်ဟ့ၣ်ကူၣ်လီၤ. အဒိ ဆိကမိၣ်ကွၢ်လၢ နလဲၤထီၣ်တၢ်အိၣ်ဖှိၣ် ဒီးဖဲနဟးတဲတၢ်ဒီး ပှၤတဘျုးဂၤဝံၤအလီၢ်ခံ ပှၤတဂၤ လဲၤကိးနၤလၢ တၢ်ကပၤ ဒီးတဲဘၣ်နၤလၢ နမဲကဆူးန့ၣ် အိၣ်ဒီးတၢ်အီၣ်တမံၤမံၤလီၤ. နကမဲာ်ဆှး ဘၣ်ဆၣ် နကစံးဘျုးဘၣ် ပှၤလၢအဟဲတဲနၤတဂၤန့ၣ် သပှၢ်တၢၢ်လီၤ. ဒီးဘၣ်သ့ၣ်သ့ၣ် နကအဲၣ်ဒိး လၢပှၤကဟဲတဲဘၣ်နၤ ဆိန့ၢ်အန့ၢ်ဒံးလီၤ. ဒ်န့ၣ်အသိး ပဒီပုၢ်ဝဲၢ်မုၣ်ခွါလၢ အအိၣ်ဒီးတၢ်သးဒူလၢ အဟ့ၣ်ကူၣ်ပှၤ ဖဲပလိၣ်ဘၣ်အီၤ အဆၢကတီၢ်န့ၣ် ပကြၢးစံးဘျုးစံးဖှိၣ်အီၤ ဒီးပတထံၣ်အီၤဒ် ပဒုၣ်ပဒါအသိးဘၣ်. ပထံၣ်အီၤဒ် ပတံၤသကိးအသိးလီၤ.—ဖး ကတိၤဒိ ၂၇:၅, ၆ တက့ၢ်; ကလၤတံ ၄:၁၆.

it-2-E ၄၉၁ ¶၃

ပှၤလၢပဃၢၤ

လံာ်ကတိၤဒိ တဲဝဲလၢ “တဘၣ်ပာ်တ့ၢ်ကွံာ် နသကိး မ့တမ့ၢ် နပၢ်အသကိးတဂ့ၤ. ဖဲနဘၣ်ကီဘၣ်ခဲအနံၤန့ၣ် တဘၣ်လဲၤလၢ နဒီပုၢ်ဝဲၢ်ခွါ အဟံၣ်တဂ့ၤ. ပှၤလၢနဃၢၤ လၢအအိၣ်ဘူးဒီးနၤန့ၣ် ဂ့ၤဒိၣ်န့ၢ်ဒံး နဒီပုၢ်ဝဲၢ်ခွါလၢ အအိၣ်ဖးယံၤလီၤ.” (ကတိၤ ၂၇:၁၀) ဖျါလၢ ပှၤကွဲးလံာ်စီဆှံတဂၤအံၤ အဲၣ်ဒိးတဲဝဲလၢ ဘၣ်သ့ၣ်သ့ၣ် ဖဲပထံၣ်ဘၣ် တၢ်ကီတၢ်ခဲအခါ ပဘူးပတံၢ် ဒီးပဒီပုၢ်ဝဲၢ်တဖၣ် မ့ၢ်အိၣ်ယံၤဒီးပှၤန့ၣ် အဝဲသ့ၣ် ဟဲမၤစၢၤပှၤ တညီဘၣ်. ဘၣ်ဆၣ် ပမ့ၢ်အိၣ်ဒီး တံၤသကိး တံၢ်နီၢ်လၢ ပနာ်န့ၢ်အီၤသ့န့ၣ် ပဃ့တၢ်မၤစၢၤ လၢအအိၣ်သ့အဃိ ပကြၢးပာ်လုၢ်ပာ်ပှ့ၤအီၤ.

တၢး၂၃.၀၉ ၁၀ ¶၇

သးစၢ်သ့ၣ်ဧၢ နဘၣ်သးအိၣ်ဒီး တၢ်အိၣ်မူဒ်လဲၣ်

^၇ ပန့ၢ်ဘၣ် တၢ်မၤလိလၢ စီၤယိၤအၣ်အအိၣ်လၢ ပကဘၣ်ဃုထၢ ပသကိးလၢ အအဲၣ်ယဟိဝၤယွၤ ဒီးသကိးလၢ အဘၣ်သးမၤသးခု ယဟိဝၤယွၤအသး. ပသကိးလၢ အအဲၣ်ယဟိဝၤယွၤန့ၣ် ကမၤစၢၤပှၤလၢ ပကဆၢတဲာ် တၢ်လၢအဘၣ်. ပှၤလၢအအဲၣ် ယဟိဝၤယွၤန့ၣ် အသးပှၢ်မ့ၢ်ဂ့ၤ အသးစၢ်မ့ၢ်ဂ့ၤ ပရ့ဒီးအဝဲသ့ၣ်သ့. အဒိ စီၤယိၤအၣ်န့ၣ် အသးစၢ်န့ၢ်ဒံး အသကိးစီၤယဟိၤယဒါ ဖးဒိၣ်ညါ. အဃိ ဖဲနဃုထၢ နသကိးအခါ သံကွၢ်လီၤနသးလၢ ‘ယသကိးတဖၣ်အံၤ ကမၤစၢၤယၤလၢ ယကမၤဂၢၢ်ကျၢၤထီၣ် ယတၢ်နာ် ယဟိဝၤယွၤဧါ. မ့ၢ်အဝဲသ့ၣ် ဆီၣ်ထွဲယၤလၢ ယကအိၣ်မူ ဒ်ယဟိဝၤယွၤ အတၢ်ဘျၢအသိးဧါ. မ့ၢ်အဝဲသ့ၣ် တဲဘၣ်ဃး ယဟိဝၤယွၤအဂ့ၢ် ဒီးတၢ်မ့ၢ်တၢ်တီ အဂ့ၢ်စ့ၢ်ကီးဧါ. မ့ၢ်အဝဲသ့ၣ် အိၣ်မူမၤထွဲ ဒ်ယဟိဝၤယွၤ အတၢ်ဘျၢအသိးဧါ. ဖဲယမၤတၢ် တဘၣ်ဘၣ်အခါ မ့ၢ်အဝဲသ့ၣ် တဲယၤထဲတၢ်လၢ ယဘၣ်သးနၢ်ဟူလီၤဧါ မ့တမ့ၢ် မ့ၢ်အဝဲသ့ၣ် ကဘှီဘၣ်ထီၣ်က့ၤယၤဧါ.’ (ကတိၤ ၂၇:၅, ၆, ၁၇) နီၢ်ကီၢ်န့ၣ် ပှၤလၢအတအဲၣ် ယဟိဝၤယွၤဘၣ်န့ၣ် နတလိၣ်ရ့အီၤ ဘူးဘူးတံၢ်တံၢ်ဘၣ်. ဘၣ်ဆၣ် နမ့ၢ်ရ့ဒီး ပှၤလၢအအဲၣ် ယဟိဝၤယွၤန့ၣ် အဝဲသ့ၣ် ကမၤစၢၤနၤထီဘိ.—ကတိၤ ၁၃:၂၀.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၃.၀၆ ၄ ¶၈

တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်လၢ စီၤကံးဒဧိၣ် အဒိအတဲာ်သ့

^၈ ဟ့ၣ်တၢ်လၤကပီၤခဲလၢာ်လၢ ယဟိဝၤယွၤအအိၣ်. ဖဲစီၤကံးဒဧိၣ် မၤနၢၤ ပှၤမံးဒယၣ်ဖိအခါ အဟ့ၣ်တၢ်လၤကပီၤခဲလၢာ်လၢ ယဟိဝၤယွၤအအိၣ်. (စံၣ်ညီၣ်ကွီၢ် ၈:၂၂, ၂၃) တၢ်အိၣ်ဖှိၣ်သးပှၢ်တဖၣ် ကွၢ်လိ စီၤကံးဒဧိၣ်ကသ့ဒ်လဲၣ်. အဝဲသ့ၣ် ကွၢ်လိစီၤကံးဒဧိၣ်သ့ခီဖျိ ဖဲအမၤတၢ်တမံၤဂ့ၤတမံၤဂ့ၤအခါ အဟ့ၣ် တၢ်လၤကပီၤခဲလၢာ်လၢ ယဟိဝၤယွၤအအိၣ်. (၁ ကရံၣ်သူး ၄:၆, ၇) အဒိ တၢ်အိၣ်ဖှိၣ်သးပှၢ်တဂၤ ပှၤမ့ၢ်ပတြၢၤအီၤလၢ အသိၣ်လိတၢ်ဂ့ၤမးန့ၣ် ဘၣ်သ့ၣ်သ့ၣ် အကတဲက့ၤလၢ တၢ်သိၣ်လိတဖၣ်န့ၣ် အသန့ၤထီၣ်သးလၢ ကစၢ်ယွၤအကလုၢ်ကထါ ဒီးအန့ၢ်ဘၣ်တၢ်သိၣ်လိလၢ ယဟိဝၤယွၤ အတၢ်ကရၢကရိအအိၣ်. တၢ်အိၣ်ဖှိၣ်သးပှၢ်တဖၣ် ကဘၣ်ဆိမိၣ်ထံလၢ ဖဲအဝဲသ့ၣ်သိၣ်လိတၢ်အခါ အဘၣ်သးလၢ ပှၤကပတြၢၤ ယဟိဝၤယွၤဧါ မ့တမ့ၢ် အဘၣ်သးလၢ ပှၤကပတြၢၤအဝဲသ့ၣ်ဧါ. ပကတဲသကီး တၢ်အိၣ်ဖှိၣ်သးပှၢ်ထံမသ့း အတၢ်လဲၤခီဖျိ. ဖဲဒီပုၢ်ဝဲၢ်ခွါထံမသ့း ကဲထီၣ်တၢ်အိၣ်ဖှိၣ်သးပှၢ် သီသီအခါ အဟ့ၣ် ကမျၢၢ်တၢ်စံၣ်တဲၤတဲလီၤမုာ်မး. အတဲဝဲလၢ “ဖဲယစးထီၣ် တၢ်ကတိၤအိးထီၣ်အခါ ယတဲတၢ်ဖးအါ ဒီးယတဲတၢ်အဒိလၢ အပတီၢ်ထီ ဒီးအခီပညီယိာ်မး. အဃိ ပှၤပတြၢၤယၤမၢ်မၢ် ဒီးပှၤသးစၢၢ်ဆၢ အါထီၣ်လၢယၤ. ပှၤတသးစၢၢ်ဆၢ လံာ်စီဆှံ ဒီးယဟိဝၤယွၤ အါအါလၢၤဘၣ်.” လၢခံန့ၣ် ဒီပုၢ်ဝဲၢ်ခွါထံမသ့း သ့ၣ်ညါထီၣ်ဝဲလၢ ဒ်သိးဒီး ပှၤတသးစၢၢ်ဆၢအီၤ အါန့ၢ်ဒံး ပှၤသးစၢၢ်ဆၢ လံာ်စီဆှံဒီးယဟိဝၤယွၤ တဂ့ၤအဂီၢ် အကဘၣ်ဆီတလဲ အတၢ်သိၣ်လိ အကျိၤအကျဲ. (ကတိၤဒိ ၂၇:၂၁) အမၤဝဲဒ်န့ၣ်အဃိ ကဲဘျုးဒ်လဲၣ်. အတဲဝဲလၢ “ခဲအံၤ ဒီပုၢ်ဝဲၢ်မုၣ်ခွါတဖၣ် တဲဘၣ်ယၤလၢ ယတၢ်စံၣ်တဲၤတဲလီၤန့ၣ် မၤစၢၤအဝဲသ့ၣ်လၢ အဝဲသ့ၣ်လဲၤခီဖျိ တၢ်ကီတၢ်ခဲကန့ၢ် ဒီးမၤစၢၤအဝဲသ့ၣ်လၢ အတၢ်ရ့လိာ်သးဒီး ယဟိဝၤယွၤ ကဂ့ၤထီၣ်. အဝဲသ့ၣ်တဲယၤဒ်န့ၣ်အဃိ ယသးခုဒိၣ်န့ၢ်ဒံး အဝဲသ့ၣ်ပတြၢၤယၤ လၢညါဒံး.”

ijwyp-E တၢ်မၤလိ ၇၅

ယသကိး မ့ၢ်မၤဘၣ်ဒိယသးန့ၣ် ယကမၤဒ်လဲၣ်

တၢ်လၢနမၤအီၤသ့တဖၣ်

ဆိကမိၣ်ထံလီၤက့ၤနသး. လံာ်စီဆှံ တဲဝဲလၢ “ပှၤဟးဂီၤဖိ အတၢ်ပနီၣ်န့ၣ် မ့ၢ်ဝဲတၢ်သးထီၣ်တၢ် ဒီးစၢဃာ်တၢ်ကမၣ် အဃိ တဘၣ်သးထီၣ်တၢ် ချ့ချ့တဂ့ၤ.”—စံၣ်တဲၤတဲလီၤတၢ် ၇:၉, တၢ်ဂ့ၢ်အဘျဲၣ်.

သံကွၢ်လီၤနသးလၢ– မ့ၢ်ယကဲပှၤလၢ အသးဘၣ်ဒိ ညီတလၢဧါ. ယဂုာ်ကျဲးစၢး နၢ်ပၢၢ်စၢၤအါထီၣ် ပှၤဂၤအတၢ်ဂံၢ်စၢ်ဘါစၢ် ကသ့ဧါ.—စံၣ်တဲၤတဲလီၤတၢ် ၇:၂၁, ၂၂.

ဆိကမိၣ်ထံ ဘၣ်ဃး နမ့ၢ်ပျၢ်တၢ်ကမၣ်န့ၣ် ကကဲဘျုးဒ်လဲၣ်. လံာ်စီဆှံ တဲဝဲလၢ “ဖဲအကွၢ်ကပာ်ကွံာ် တၢ်ကမၣ်အခါ အမ့ၢ်တၢ်ဃံတၢ်လၤတမံၤလီၤ.”—ကတိၤဒိ ၁၉:၁၁.

သံကွၢ်လီၤနသးလၢ– တၢ်ဂ့ၢ်တခါအံၤ မ့ၢ်အရ့ဒိၣ် နီၢ်ကီၢ်ဧါ. ဒ်သိး တၢ်ဃူတၢ်ဖိး ကအိၣ်အဂီၢ် ယကွၢ်ကပာ်ကွံာ်အီၤ ကသ့ဧါ.—ကလီးစဲ ၃:၁၃.

အိၣ်ကွၢ်လၢ ပှၤဂၤအလီၢ်. လံာ်စီဆှံ တဲဝဲလၢ “တဘၣ်ကွၢ်လီၤထဲလၢ သုနီၢ်ကစၢ် အဘျုးတဂ့ၤ. ဆိကမိၣ်န့ၢ်တၢ်လၢ ပှၤဂၤအဂီၢ် စ့ၢ်ကီးတက့ၢ်.”—ဖံလံးပံၤ ၂:၄.

သံကွၢ်လီၤနသးလၢ– ယမ့ၢ်ကဲဘၣ်ဖုးအီၤန့ၣ် ယကတူၢ်ဘၣ်ဒ်လဲၣ်.—ဖံလံးပံၤ ၂:၃.

လါအီကူး ၂၅-၃၁

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၈

ပှၤအၢပှၤသီ ဒီးပှၤတီပှၤလိၤန့ၣ် လီၤဆီလိာ်အသး ဒ်လဲၣ်

တၢး၉၃-E ၅/၁၅ ၂၆ ¶၂

နဒိကနၣ် ယဟိဝၤယွၤ လၢနသးဒီဖျၢၣ်ဧါ

“ပှၤတီပှၤလိၤန့ၣ် အသးဒူဝဲ ဒ်သိးဒီးခ့ယုၢ်လီၤ.” (ကတိၤဒိ ၂၈:၁) ပှၤတီပှၤလိၤတဖၣ်န့ၣ် အိၣ်ဒီးတၢ်နာ်, သန့ၤအသးလၢ ကစၢ်ယွၤ အကလုၢ်ကထါ ဒီးနာ်န့ၢ်ဝဲ. ဒီးတၢ်လီၤဘၣ်ယိၣ်မ့ၢ်အိၣ်ဘၣ်ဆၣ် အဝဲသ့ၣ် ဆဲးမၤကစၢ်ယွၤ အတၢ်မၤလၢ တၢ်သးဒူအပူၤ.

it-2-E ၁၁၃၉ ¶၃

တၢ်နၢ်ပၢၢ်

ပှၤလၢအဃၣ်ကွံာ်အသး လၢကစၢ်ယွၤအအိၣ်. ပှၤလၢအကမၤကမၣ်တၢ်တဂၤန့ၣ် ဖဲအကဆၢတဲာ်တၢ် တမံၤမံၤ မ့တမ့ၢ် မၤတၢ်တမံၤမံၤအခါ အဝဲတဆိကမိၣ်ထံ ကစၢ်ယွၤ အတၢ်ဘၣ်သးလၢၤဘၣ်. (ယိၤဘး ၃၄:၂၇) ပှၤဒ်န့ၣ်တဂၤန့ၣ် လူၤဘၣ်အသး ဒီးအတအိၣ်ဒီး တၢ်သ့ၣ်ညါနၢ်ပၢၢ်လၢၤဘၣ်. (စံး ၃၆:၁-၄) အမ့ၢ်တဲလၢ အဘူၣ်ထီၣ်ဘါထီၣ် ကစၢ်ယွၤနာ်က့ အပာ်ဒိၣ် ပှၤဟီၣ်ခိၣ်ဖိ အတၢ်ထံၣ် အါန့ၢ်ဒံး ကစၢ်ယွၤ အတၢ်သိၣ်တၢ်သီ. (ယၡါယၤ ၁၉:၁၃, ၁၄) အတၢ်သကဲာ်ပဝးလၢ အလီၤရၢၢ်န့ၣ် အထံၣ်ဝဲလၢ တမ့ၢ်တၢ်နီတမံၤဘၣ်, အပာ်ဝဲဒ် “တၢ်လိာ်ကွဲ” လၢအကမၤမုာ်အသး ဒီးတဲပူၤဖျဲးအသး. (ကတိၤ ၁၀:၂၃) တၢ်ဂ့ၢ်လၢ အတဲပူၤဖျဲးအသးတဖၣ်န့ၣ် ပာ်ဖျါလၢ အဝဲ ပဲာ်ထံနီၤဖးတၢ်တသ့ဘၣ် ဒီးတအိၣ်ဒီး တၢ်ကူၣ်သ့ဘၣ်. ဒီးအဆိကမိၣ်ဝဲလၢ ကစၢ်ယွၤ တထံၣ်တၢ်ကမၣ် လၢအမၤဝဲတဖၣ် ဒီးတဟံးအီၤအရ့ဘၣ်. (စံး ၉၄:၄-၁၀; ၡါ ၂၉:၁၅, ၁၆; ယံး ၁၀:၂၁) အတၢ်အိၣ်မူ ဒီးအတၢ်မၤတဖၣ်န့ၣ် ပာ်ဖျါထီၣ်လၢ အဆိမိၣ်လၢ “ယဟိဝၤယွၤ တအိၣ်ဘၣ်.” (စံး ၁၄:၁-၃) အဝဲတပျဲလၢ ကစၢ်ယွၤ ကဟံးစုနဲၣ်ကျဲအီၤဘၣ်အဃိ အပဲာ်ထံနီၤဖးတၢ်, ထိၣ်ထံတယာ်တၢ်တသ့ ဂ့ၤဂ့ၤဘၣ်အဃိ ဆၢတဲာ်တၢ်လၢ အဘၣ်တသ့ဘၣ်.—ကတိၤ ၂၈:၅.

it-1-E ၁၂၁၁ ¶၄

တၢ်သးတီ

ပှၤမ့ၢ်တသန့ၤလီၤသးလၢ နီၢ်ကစၢ်ဘၣ် ဒီးပှၤမ့ၢ် သန့ၤသးလၢ ယဟိဝၤယွၤ ဒီးအတၢ်စိတၢ်ကမီၤ ဒီးနာ်န့ၢ်အီၤန့ၣ် ပှၤဆဲးအိၣ်ဒီး တၢ်သးတီသ့. (စံး ၂၅:၂၁) ကစၢ်ယွၤ အၢၣ်လီၤဝဲလၢ အကကဲ “ကတီၤ” ဒီး “တၢ်ဒီသဒၢ” လၢပှၤလၢအလဲၤတၢ်လၢ တၢ်သးတီပူၤအဂီၢ်. (ကတိၤ ၂:၆-၈; ၁၀:၂၉; စံး ၄၁:၁၂) အဝဲသ့ၣ် သးစၢၢ်ဆၢလၢ ကဒိးန့ၢ်ဘၣ် ကစၢ်ယွၤ အတၢ်ဘၣ်သးထီဘိအဃိ အဝဲသ့ၣ် အိၣ်ဒီးတၢ်သးခု လၢအတၢ်အိၣ်မူပူၤ တကးဒံးဘၣ် အမၤစၢၤအီၤဒ်သိး အကလဲၤတုၤလၢ အဖီတၢၣ် ဂ့ၤဂ့ၤဘၣ်ဘၣ်. (စံး ၂၆:၁-၃; ကတိၤ ၁၁:၅; ၂၈:၁၈) စီၤယိၤဘး ထံၣ်ဝဲလၢ ပှၤလၢအတၢ်ကမၣ်တအိၣ်ဘၣ်တဖၣ် ထံၣ်ဘၣ်တၢ်ကီတၢ်ခဲ ခီဖျိလၢ ပှၤအၢပှၤသီတဖၣ် အတၢ်ဒိၣ်စိဒိၣ်ကမီၤအဃိ ဒီးအဝဲသ့ၣ် ဘၣ်သံဃုာ်ဒီးပှၤအၢပှၤသီတဖၣ်. အဃိ စီၤယိၤဘး အသးဟးဂီၤ. ဘၣ်ဆၣ် ကစၢ်ယွၤဒုးနာ်န့ၢ်အီၤလၢ ကစၢ်ယွၤ သ့ၣ်ညါဝဲ တၢ်လၢပှၤတၢ်ကမၣ် တအိၣ်ဘၣ်တဖၣ် လဲၤခီဖျိဘၣ်ဝဲ ဒီးအကဟ့ၣ်အဝဲသ့ၣ် အတၢ်န့ၢ်သါ, တၢ်အိၣ်မူလၢ အမုာ်အခုၣ်လၢခါဆူညါ ဒီးတၢ်လၢအဂ့ၤတဖၣ်. (ဘး ၉:၂၀-၂၂; စံး ၃၇:၁၈, ၁၉, ၃၇; ၈၄:၁၁; ကတိၤ ၂၈:၁၀) ပမ့ၢ်ကွၢ် စီၤယိၤဘး အတၢ်အိၣ်သးန့ၣ် ပသ့ၣ်ညါဘၣ်လၢ ပှၤလၢအအိၣ်ဒီး တၢ်သးတီန့ၣ် အလုၢ်အပှ့ၤ ဒီးအလၤကပီၤ အိၣ်အါန့ၢ်ဒံး ပှၤလၢအထူးအတီၤဒံး. (ကတိၤ ၁၉:၁; ၂၈:၆) ဖိလၢအအိၣ်ဒီး မိၢ်ပၢ်လၢအအိၣ်ဒီး တၢ်သးတီန့ၣ် အကဒိးန့ၢ်ဘၣ်တၢ်သးခု. မ့ၢ်လၢ အကဒိးန့ၢ်ဘၣ်အဘျုးလၢ အပၢ်အဒိအတဲာ်လၢအဂ့ၤ, အမံၤဂ့ၤသၣ်ဂ့ၤ ဒီးအလၤကပီၤအဃိ.—ကတိၤ ၂၀:၇.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၄.၀၇ ၁၉ ¶၁၉

ဒ်သိး နတမၤကမၣ်ဘၣ်တၢ် တဂ့ၤအဂီၢ် အိၣ်ပလီၢ်သးထီဘိ

^၁၉ ပမ့ၢ်အိၣ်ဒီး တၢ်ဂံၢ်စၢ်ဘါစၢ် တမံၤမံၤလၢ ပမၤလီၤမၢ်ကွံာ်အီၤ ခဲလၢာ်ခဲဆ့ တန့ၢ်ဘၣ်န့ၣ် ဒ်သိး ပတမၤကမၣ်ဘၣ်တၢ် တဂ့ၤအဂီၢ် ပကဘၣ်မၤဒ်လဲၣ်. ပကဘၣ် မၤထွဲ ယ့ၣ်ၡူးအတၢ်ဟ့ၣ်ကူၣ် လၢအမ့ၢ် ပကဘၣ် “ဆိးသီ” ဒီးအိၣ်ပလီၢ်သးလၢ ကတြီဆၢကွံာ် တၢ်လ့ပစီထီဘိ. ဒီးပမ့ၢ်တူၢ်ဘၣ်လၢ ပတြီဆၢကွံာ် တၢ်လ့ပစီ န့ၢ်လံသနာ်က့ ပကဘၣ်ဟးဆှဲး တၢ်အိၣ်သးလၢ ကထိၣ်ဟူးထိၣ်ဂဲၤထီၣ်ပှၤလၢ ပကမၤကမၣ်တၢ်. (၁ ကရံၣ် ၁၀:၁၂) ကတိၤဒိ ၂၈:၁၄ တဲဝဲလၢ “ပှၤလၢအပလီၢ်အသးထီဘိန့ၣ် ကသးခုဝဲ.” အဃိ ဒ်သိး နကဆဲးတြီဆၢကွံာ် နတၢ်ဂံၢ်စၢ်ဘါစၢ်အဂီၢ် ဆဲးမၤတၢ်လၢ အမၤစၢၤတ့ၢ်နၤထီဘိ.—၂ ပ့း ၃:၁၄.