LLAPAN LEYINA KAQ Watchtower
Watchtower
LLAPAN LEYINA KAQ
Quechua (Ancash)
  • BIBLIA
  • RURAYÄMUNQÄKUNA
  • REUNIONKUNA
  • mwbr24 Enëru pägk. 1-11
  • Cristiänunö Kawakunapaq y Yachatsikunapaq Reunionchö Yachakunapaq këkunata leyishun

Këchöqa manam videu kantsu

Imanöparaq manam kë videu kichakämushqatsu.

  • Cristiänunö Kawakunapaq y Yachatsikunapaq Reunionchö Yachakunapaq këkunata leyishun
  • Cristiänunö Kawakunapaq y Yachatsikunapaq reunionchö yachakunapaq këkunata leyishun 2024
  • Subtïtulukuna
  • ENËRU 1-7
  • ENËRU 8-14
  • ENËRU 15-21
  • ENËRU 22-28
  • 29 DE ENËRUPITA 4 DE FEBRËRUYAQ
  • FEBRËRU 5-11
  • FEBRËRU 12-18
  • FEBRËRU 19-25
  • 26 DE FEBRËRUPITA 3 DE MARZUYAQ
Cristiänunö Kawakunapaq y Yachatsikunapaq reunionchö yachakunapaq këkunata leyishun 2024
mwbr24 Enëru pägk. 1-11

Cristiänunö Kawakunapaq y Yachatsikunapaq Reunionchö Yachakunapaq këkunata leyishun

© 2023 Watch Tower Bible and Tract Society of Pennsylvania

ENËRU 1-7

BIBLIAPITA ALLI YACHAKUNAPAQ | JOB 32, 33

¿lmanötan alläpa llakishqa këkaqkunata yanapashwan?

it-1-S päg. 796

Elihü

Elihüqa llapantam igualpa rikaq, y manam pitapis alabaparqantsu. Y pëpis Jobnölla allpapita rurashqa kanqanta y pëtapis Llapanta Puëdeq Teyta Dios kamashqa kanqantam nirqan. Manam Jobta mantsakätsita munarqantsu, tsëpa rantinqa, jutimpa parlaparmi alli amïgu kanqanta rikätsirqan y manam Elifaznö, Bildadnö y Zofarnötsu lluta parlaparqan (Job 32:21, 22; 33:1, 6).

w14 15/6 päg. 25 pärrk. 8-10

¿Jehovä rikanqannöku dëbilkunata rikëkantsik?

8 Itsa cristiänu mayintsikkunaqa dëbil tikrayashqa, japallankunalla Diosta sirwiyanqanchö imëkapa pasarnin y alläpa llakikïwan qeshyarnin. Tsëta entiendinqantsikmi yanapamäshun pëkunata yanapanapaq. Itsa noqantsikpis pëkunanö imëllapis tsëpa pasashun. Tsëmi israelïtakuna Dios Äninqan Patsaman manaraq yëkuyaptin Jehovä yarpätsirqan, sufrikaq israelïta mayinkunawan ‘chukru shonqu’ mana kayänampaq, porqui pëkunapis Egiptuchöqa waktsa y dëbilmi kayarqan. Jehoväqa, waktsa këkaqkunata y dëbilkunata yanapayänantam munarqan (Deut. 15:7, 11; Lev. 25:35-38).

9 Problëmakunapa pasayaptin juzganantsikpa rantinmi, Diospa kaqchö yanapanantsik (Job 33:6, 7; Mat. 7:1). Pensarishun, juk nuna accidentäkuriptin hospitalman grävita chäratsiyaptinqa, ¿doctorkunaqa kikin culpayoq kanqantatsuraq puntata musyëta munayanman o rastsuraq atiendiyanman? Awmi, masqa precisan ras atiendiyänan y jampiyänanmi. Tsënöllam, cristiänu mayintsik imëka problëmayoq karnin dëbil tikrakuriptimpis, Diospa kaqchö yanapanantsik masqa precisan (leyi 1 Tesalonicensis 5:14).

10 Cristiänu mayintsikkuna imëkakunapa pasayaqta rikarqa, itsa dëbil kayanqanta pensashwan, peru rasumpa kaqchöqa alläpa sinchi markäkïyoqmi (yärakuyyoqmi) kayan. Tantiyarinallapaq, atskaq panikunam, Jehoväta sirwiyanqanrëkur familiankuna chikikäyaptimpis aguantar këkäyan. Wakin mamakunanam wamrankunawan reunionkunaman mana faltëta ëwayan. Y wakin jövinkunanam, jövin mayinkuna escuëlachö burlakïkäyaptimpis alli sinchikur aguantayan. Këkuna rurananqa manam fäciltsu, peru pëkunaqa Jehoväta kuyarmi tsë llapanta rurayan. Tsëwanmi cläru rikantsik dëbilnö rikakurnimpis, markäkïninkunachöqa alli sinchi këkäyanqanta (Sant. 2:5).   

w20.03 päg. 23 pärrk. 17, 18

¿Imë y imanötan parlakushwan?

17 Abrahanpa kastan Elihüpis Jobtaqa watukarqanmi. Pëqa Jobwan kiman nunakuna parlayaptinqa upällallam wiyakurqan. Tsënö shumaq wiyakunqanrëkurmi, Job pensëninta cambianampaq yachëllapa parlaparqan (Job 33:1, 6, 17). Elihüqa manam kikinta ni wakin nunakunata alabayänantatsu munarqan, pëqa Jehoväta imëpis alabayänantam munarqan (Job 32:21, 22; 37:23, 24). Tsëmi Elihüpitaqa yachakuntsik, imë parlanapaq kaqta y imë upällalla kakunapaq kaqta (Sant. 1:19). Këqa yachatsimantsik, pitapis yachëllapa parlapar yanapanapaqmi. Tsënöpa Jehovällata alabayänampaq.

18 Jehovä Diosnintsiktaqa agradecikuntsik Palabran Bibliachö, imë y imanö parlakunapaq yachatsimanqantsikpitam. Rey Salomonmi Dios yanapaptin kënö qellqarqan: “Shumaq käyïkur tiempunchö parlashqëkiqa qellëwan adornashqa qori manzänanömi këkan” (Prov. 25:11). Wakinkunata shumaq wiyakushqa y alli pensëkur parlapashqaqa, parlakuynintsikqa shumaqmi kanqa. Yarpäshun shumaq parlapakuynintsikwanqa yanapakuyta puëdintsikmi, tsëtaqa parlakuy gustamashqa o mana gustamashqapis rurëta puëdintsikmi. Tsënö rurashqam Jehoväpis kushikunqa (Prov. 23:15; Efes. 4:29). Awmi, kë llapampitam Jehovä Diosta agradecikuntsik.

Imakunata yachakunqantsik

w13 15/1 päg. 19 pärr. 10

Jehoväman witita ama dejëtsu

10 Jina shumaq rikakunqantsikman yarpachakïqa allillam. Tsënö kaptimpis, manam imëkanöpapis chakwanyëpita o awkinyëpita librakëta procuranantsiktsu, porque rasumpa kaqchöqa edäyashqa kënintsikmi rikätsikun poqushqa, respetashqa y shonquntsikchö shumaq kanqantsikta. Biblia ninqanman pensarishun, kënömi nin: “Yulaq aqtsaqa kuyëllapaq corönam alli kaq nänichö karninqa” (Prov. 16:31). Jehoväpaqqa más precisan imanö nuna kanqantsikmi, jina tsënöllam noqantsikpis pensashwan (lei 1 Pedru 3:3, 4). Tsënö këkaptinqa, ¿allitsuraq kanman shumaq këta munarlla peligroso operacionkunata o tratamientokunata rurakunqantsikqa? Ëka edäyoq kashqapis o shumaqllan mana kashqapis ‘Jehoväpa kushikïninmi’ shumaqyätsimantsik (Neh. 8:10). Mushoq Patsallachömi alli saludyoq y joven jövenlla kuyëllapaq kashun (Job 33:25; Is. 33:24). Tsëkamayaqqa, yachaq kënintsik y markäkoq o yärakoq kanqantsikmi yanapamäshun puëdinqantsikmannö Jehoväpa lädonchö këkänapaq (1 Tim. 4:8).

ENËRU 8-14

BIBLIAPITA ALLI YACHAKUNAPAQ | JOB 34, 35

¿Alli nunakunallataku mana allikuna pasan?

wp19.1 päg. 8 pärr. 2

¿Imanötaq Diosqa?

Diosqa imëpis alli kaqllatam ruran. Awmi, Llapanta Puëdeq Diosqa manam imanöpapis mana allita rurantsu (Job 34:10). Salmusta escribeq nunam nirqan, Diosqa “rurayanqanmannö markakunata juzganqanta” (Salmus 67:4). Shonquntsikchö imanö kanqantsikta musyarmi rikanqanllapitatsu juzgamäshun, tsëpa rantinqa, rasumpa kaqta imëpis musyarmi ruranqantsikmannö juzgamäshun (1 Samuel 16:7). Jina Diosnintsikqa kë Patsachö mana alli rurayanqankunata rikëkanmi, y tsënö mana alli ruraqkunata ichikllachöna ushakätsinampaqmi änikushqa (Proverbius 2:22).

w17.04 päg. 11 pärr. 5

¿Imakunataq ushakanqa Diospa Gobiernun chämuptin?

5 ¿Imatataq Jehovä ruranqa? Kanan witsanqa, mana alli nunakunatam tiempunkuna qoykan rurëninkunata jaqiyänampaq (Isaïas 55:7). Ichikllachöna mana alli nunakuna ushakäyänampaq pishikaptimpis, Diosqa manam pëkunata juzgashqaraqtsu. Peru ¿imataq pasakunqa alläpa jatun sufrimientu qallanqanyaq mana alli rurëninkunata jaqita mana munaq y mana cäsukoqkunata yanapëkaq nunakunawanqa? Diosqa änikushqa pëkunata ushakäratsinampaqmi (leyi Salmus 37:10). Kanan witsan nunakunaqa, mana alli rurëninkunata pakëtam yachakuyashqa y manam tsënöllaqa castïguta chaskiyantsu (Job 21:7, 9). Peru Bibliaqa kënömi nimantsik: “Diospa nawinkunaqa, nunakuna imanö kawëkäyanqanta, y llapan rurëninkunatam rikëkan. Manam paqas ni pasëpa ampiraq kantsu mana alli kaqta ruraq nunakuna tsëman escapakuyänampaq” (Job 34:21, 22). Tsëmi Jehoväpitaqa pipis escapakïta puëdintsu. Pëqa mana alli nunakunapa llapan rurëninkunatam rikëkan. Armagedon guërra ushariptinqa, mananam masqa kë mana alli nunakunata rikäshunnatsu, porqui chipyëpam ushakäyanqa (Salmus 37:12-15).

w21.05 päg. 7 pärrk. 19, 20

Jesusta qatinëkipita ama imapis michäshïtsu

19 ¿Kanan witsampis tsënöku pasakun? Awmi. Mëtsikaqmi, polïticaman mana mëtikushqam cölerakuyan. Eleccion kaptin votanantsiktam munayan. Peru noqantsikqa musyantsikmi, juk nunapaq votarqa, Gobernamaqnintsiktanö mana chaskinqantsikta Jehovä pensanampaq kaqta (1 Sam. 8:4-7). Y itsa tsë nunakunaqa, hospitalkunata y escuëlakunata ruranapaq o wakin nunakunata yanapanapaq kaqta nimashwan. Kanan witsan problëmakunata mana altsarnin Diospita yachatsikurnin kashqam, nunakunaqa mana allipa rikämantsik.

20 ¿Imatan yanapashunki mana qelanäkurinëkipaq? (Leyi Mateu 7:21-23). Yarpäshun, Diospita yachatsikunapaq Jesus mandamanqantsiktam mas puntaman churanantsik (Mat. 28:19, 20). Kanan witsan gobiernukuna mana alli kayanqanman y nunakuna niyanqanmanqa, ama yarparäkushuntsu. Jehoväpa testïgunkunaqa, nunakunata kuyantsikmi y problëmankunamanmi yarpachakuntsik. Tsënö kaptimpis, Diospa Gobiernumpita yachatsinqantsik y Jehoväwan alli kayänampaq yanapanqantsik mas alli kanqantam yarpantsik.

Imakunata yachakunqantsik

w17.04 päg. 28 pärr. 3

¿Imanötaq Jehoväta alabashwan?

3 Elihü jutiyoq Jövinqa, kiman watukaq nunakuna Jobwan parlayanqantam wiyëkarqan. Pëkuna parlar ushariyaptinnam, Jehoväpita Jobta kënö tapurqan: “Alli kaqta ruranqëkipitaqa, ¿imatataq pëqa jorqan, o imatataq pëqa qampita chaskin?” (Job 35:7). Tsëqa, ¿Diosta sirwinapaq kallpachakunqantsik imapaqpis mana välinqantaku Elihüqa nikarqan? Manam. Jehoväqa tsë kiman nunakunataqa piñaparqanmi, peru Elihütaqa manam. Porqui Elihüqa nikarqan adoranataraq Jehovä mana wananqantam. Rasumpa kaqchöqa, Jehoväqa noqantsikpita manam imatapis wanantsu. Y ruranqantsikkunawanqa manam mas kapoqyoq o mas puëdeq tikrarintsu. Porqui imatapis rurëta yachanqantsik y imanö kënintsikqa Diosnintsikpitam shamun, y pëqa imanö utilizanqantsiktam rikëkan.

ENËRU 15-21

BIBLIAPITA ALLI YACHAKUNAPAQ | JOB 36, 37

Manana wanurnin kawanapaq Diosnintsik änimanqantsikmanqa, ¿imanirtan confiakushwan?

w22.12 pägk. 2, 3 pärrk. 3, 4

Mana wanuypam kawakushun

Musyantsikmi Jehoväqa imëyaqpis kawatsimënintsikta puëdinqanta. ¿Imanirtan següru këkantsik? Pëlla kawatsimaqnintsik kaptin y imëyaqpis kawaq Dios kaptinmi (Sal. 36:9). Juk ishkë versïculukunata leyirishun Jehoväqa imëpitapis y imëyaqpis kawaq Dios kanqanta musyanapaq. Salmus 90:2 textuchömi nimantsik Jehoväqa, “imëpitapis y imëyaqpis” kawaq Dios kanqanta. Tsënöllam, Salmus librupa 102 capïtulunchöpis nimantsik (leyi Salmus 102:12, 24, 27). Y Jehoväpaq parlarmi Habacucpis kënö nirqan: “Teyta Jehovä, qamqa mana ushakaqmi kanki. Teyta Dios, qamqa limpiu Diosmi kanki y manam imëpis ushakankitsu” (Hab. 1:12).

Qampaqqa, ¿sasaraqku o ajaraqku “imëyaqpis mana wanushpa kawaq Dios kanqanta” creinëki? (Is. 40:28). Wakinkunapaqpis tsëta creiyänanqa manam fäciltsu. Elihü jutiyoq nunam, Diospaq kënö nirqan: “Ëka wata kawanqantapis manam musyëta puëdintsiktsu” (Job 36:26). Peru mana creinqantsikpitaqa, manam nita puëdintsiktsu imapis mana kanqanta. Këllaman pensarishun: manam musyantsiktsu luz imanö funcionanqanta, peru mana musyarpis, luz kanqantaqa creintsikmi. Tsënöllam, nunakunaqa entiendiyantsu Jehovä imë kawar qallanqanta ni imëyaq kawanampaq kaqta. Peru ¿tsëta mana entiendirtsuraq Diosqa manam imëyaqpis kawëta puëdintsu nishwan? Manam. Mana entiendishqapis, Diosqa imëyaqpis kawëta puëdinmi (Rom. 11:33-36). Kamamaqnintsik Diosqa, ciëluchö llapan rikanqantsikkuna, Intipis o Rupaypis y estrëllakunapis manaraq kaptinmi kawarqanna. Tsëmi Bibliachöqa kënö nimantsik: “Teyta Diosqa poderninwanmi patsata kamashqa”. Y kënöpis ninmi: “Ciëlukunata[m] mashtashqa” (Jer. 51:15; Hëch. 17:24). Kananqa rikärishun imëyaqpis kawatsimënintsikta Diosnintsik puëdinqanta.

w20.05 päg. 22 pärr. 6

Diospa qarëninkunapita agradecikushun

6 Intipita o Rupaypita kë Patsa alli sitiuman churashqa kaptinmi, Patsachöqa yaku kan. Ichik mas amänunchö kaptinqa, limpuchi yaku tsakirinman y Patsa alläpa achachaptinchi ni imapis kanmantsu. Y ichiklla mas karuchö kaptinqa, entëru Patsachi raju o rapi tikrarinman. Alli tantiyëkur Patsata Jehovä churashqa kaptinmi, Patsachö yakuqa ushakantsu. ¿Imanötan tsëqa? Inti o Rupay qoñötsiptinmi llapan yaku pukutëman tikrarin. Cada watam Inti o Rupayqa yakuta qoñötsir atska pukutëman tikratsin. Tsëpitanam ciëlupita tamyamur o rashtarnin lamarman o qochakunam yapë kutin. Yakuwan tsënö pasanqanmi musyatsimantsik, Jehovä yachaq y puëdeq kanqanta (Job 36:27, 28; Ecl. 1:7).

w22.10 päg. 28 pärr. 16

Diosnintsik änimanqantsikta imëpis shuyarëkäshun

16 Mana wanuypa imëyaqpis kawakunapaq Diosnintsik änimanqantsikqa, shumaq qarëmi. Tsënö kawakunantsik tiempu chäramunantaqa alläpam shuyarëkantsik, y Diosnintsikqa cumplimunqam. Änikunqankunata shuyaranqantsikqa, barcuta tsaraq anclanömi. Tsëmi yanapamantsik mana allikunapa pasanqantsik höra y nunakuna chikimashqa alli tsarakunapaq, y wanuytapis mana mantsanapaq. Tsënöllam shuyaranqantsikqa peqantsikta o umantsikta tsapaq cascu cuenta. Tsëmi yanapamantsik Jehoväta cäsukur alli kaqllata ruranapaq, mana allikunaman mana pensanapaq y mana ruranapaq. Änikunqankunata Bibliachö leyirmi musyantsik Diosnintsik kuyamanqantsikta, y tsëmi yanapamantsik pëta kuyanapaq. Awmi, Diosnintsik änikunqankunata shuyarëkanqantsikqa alläpam yanapamantsik.

Imakunata yachakunqantsik

it-1-S päg. 519

Imapis pasakunqanta imanö musyayanqan

Bibliachö willakunqan markakunachö nunakunaqa imëka formapam ima noticiatapis musyatsikuyaq. Markankunachö o juk nacionkunachö imapis pasanqankunataqa shimillapam willakuyaq (2Sa 3:17, 19; Job 37:20). Viajaqkunaqa mikuyta o imatapis rantiyänan sitiukunachö, animalninkunata yakütsiyänan sitiukunachö y posadakuyanqan markakunachömi karu markakunachö imapis pasakunqanta willakuyaq. Palestïna markapaqa mëtsë nacionpita nunakunam viajar pasayaq, tsëmi tsëchö täraq nunakunaqa raslla o saslla musyariyaq juk nacionkunachö imakuna pasëkanqanta, peru Asia, Africa y Euröpachöqa manam tsënötsu pasaq. Markankunachö o juk nacionkunachö imapis pasakunqanta willakuyanqantaqa rantikuyanqan pläzakunachömi masqa wiyayaq.

ENËRU 22-28

BIBLIAPITA ALLI YACHAKUNAPAQ | JOB 38, 39

Jehovä kamanqankunata rikänëkipaq kallpachakuy

w21.08 päg. 9 pärr. 7

¿Imëkatapis Jehovä altsamunantaku shuyarëkantsik?

7 Patsata Jehovä imanö kamanqampaq parlarmi, Bibliachöqa “ima tamäñu” kanampaq, ‘ima jananchö’ kanampaq y “maestra rumita” cimientunman churashqa kanqampaq willakun (Job 38:5, 6). Jina imëka kamanqankunata rikänampaqpis tiempuntam patsätsirqan (Gen. 1:10, 12). Pensarintsikku, ¿Jehovä imëkata kamaqta rikarnin angelkuna imanö kayanqanta? Alläpachi kushikuyarqan, tsëchi llapampis alabar “qotsuyarqan” o cantayarqan (Job 38:7). ¿Imatataq këpita yachakuntsik? Mëtsika waranqa watakunachöraq Patsata, estrëllakunata y imëka kawaq animalkunata Jehovä kamanqantam. Y llapan kamanqanta rikärirqa, “alläpa alli kanqantam rikarqan” (Gen. 1:31).

w20.08 päg. 14 pärr. 2

Wanushqakuna kawariyämunqanchöqa, ¿Diospa imanö kënintan rikakun?

2 Puntataqa, tsurin Jesustam Jehovä kamarqan. Tsëpitanam Jesuspa yanapakuyninwan llapan rikanqantsikta y angelkunatapis kamarqan (Col. 1:16). Awmi, Jesusqa kushishqam Teytanta yanaparqan (Prov. 8:30). Jehoväwan Jesus ciëlutawan Patsata kamayaptinqa, ¿imanöraq angelkuna sientikuyarqan? “Alläpa kushikuyarqan” ninmi Bibliaqa. Tsënö kushishqaqa kayarqan nunakunata y imëkata Teyta Dios kamar ushanqanyaqchi (Job 38:7; Prov. 8:31). Jehovä llapan kamanqankunachömi kuyakoq y yachaq kanqantaqa rikantsik (Sal. 104:24; Rom. 1:20).

w23.03 päg. 17 pärr. 8

Jehoväta maslla reqishun kamanqankunata rikarnin

8 Jehoväqa confiakuypaqmi. Jehoväwan parlanqanmi Jobtaqa yanaparqan pëman mas confiakunampaq (Job 32:2; 40:6-8). Jehoväqa estrëllakunapaq, pukutëpaq, räyukunapaq, chukaru törupaq y cawallupaqmi Jobta parlaparqan (Job 38:32-35; 39:9, 19, 20). Tsëkunapaq parlapaptinmi, Jobqa Diosnintsik poderösu kanqanllatatsu cuentata qokurqan, sinöqa kuyakoq y yachaq kanqantapis entiendirqanmi. Jehoväwan tsënö parlayanqanmi yanaparqan pëman mas confiakunampaq (Job 42:1-6). Tsënöllam noqantsiktapis yanapamäshun, Jehovä kamanqankunaman pensashqaqa alläpa yachaq y poderösu kanqanta musyanapaq. Jehoväqa imëka problëmantsikkunatapis ushakätsita puëdinmi. Tsëkunaman pensarmi, Jehovä Diosnintsikman maslla confiakushun.

Imakunata yachakunqantsik

w12 15/7 päg. 8 pärr. 6

Jehovämi rasumpa libretaqa katsimantsik

Jehoväqa kuyamarnintsik y cuidamarnintsikmi imakunata mana ruranapaq kaqta nimarquntsik. Këllaman yarpärishun, pëqa imëka juk iman cuentatam Patsaman juk kallpata churashqa, tsëmi imëkatapis Patsallachö katsin, tsë kallpa mana kaptinqa imapis vientollachöchi purikïkanman. Patsachö tsë kallpa kanqampaqqa manam pipis piñakuntsu ni llakikuntsu, tsëpa rantinqa o trukanqa alläpam agradecikuntsik y musyantsikmi kushishqa kawakunapaq alläpa precisanqanta. Tsënöllam jina, alli rurëkunapaq Jehoväpa leyninkunapis Cristupa ‘chipyëpa alli kaq leyninchö’ rikakan, tsëkunaqa kushishqa kawakunantsikpaqmi yanapamantsik.

29 DE ENËRUPITA 4 DE FEBRËRUYAQ

BIBLIAPITA ALLI YACHAKUNAPAQ | JOB 40-42

Job pasanqankunapitaqa, ¿imatataq yachakuntsik?

w10 1/10 päg. 11 pärrk. 4-6

‘¿Piraq Jehová yarpanqancunata tantiyanman?’

4 Jehová imatapis ruranqanman yarparqa, ama kënö waknö ruranman karqan nirqa parlashuntsu. Juzgakoq kanqantsikta Dios yarparmi Salmo 50:21 textota qellqatsirqan: “Qamnö kanqätam pensarirqëki”. Y 175 watam pasarishqa huk yachaq nuna kë textopaq kënö ninqan: “Nunakunaqa Diosta juzgayan kikinkuna ley churayashqanwanmi, y alli kanqantam pensayan. Y pëkunaqa niyan tsë leyqa kikinkunapaq y Diospaqpis kanqantam”.

5 Alleqmi yarpänantsik pensënintsikkuna Dios imanö kanqanta qonqaratsimänata. ¿Imanirtaq tsëqa alläpa preciso? Bibliapita yachakurninmi tarintsik Jehoväpa rurëninkunata. Pero mana musyaq y hutsasapa kënintsikchömi, wakin rurëninkuna mana alli kanqantanö rikärishwan. Israelïtakunapis Jehová mana allipa rikëkanqantam pensar qallëkuyarqan. Rikärishun Jehová ninqanta: “Qamkunam kënö niyanki: ‘Jehoväqa mana allitam rurëkan’. Kanan wiyaramë Israel marka. ¿Mana allitaku rurëkä? ¿Manaku qamkuna mana allita rurëkäyanki?” (Eze. 18:25).

6 Nunakunapa pensëninmannö Jehoväta mana juzganapaqqa, yarpänantsikmi llapanta mana musyanqantsikta y höraqa imatapis llutanmampa tanteanqantsikta. Tsëtam Job yachakurqan. Alläpa llakikïkunapa pasarmi, kikimpa llakikïninllaman yarpararnin cuentata qokurqantsu más precisaq kaqkunata. Tsënö kaptimpis, Jehovämi kuyëpa yanaparqan tsë pasakunqankunata huknöpa rikänampaq. Qanchis chunkapitapis más tapukïkunata Jehová ruraptinmi, Jobqa ima nïtapis puëderqantsu, tsë llapanmi rikätsirqan alläpa ichiklla musyënin kanqanta. Pero Jobqa humildem karqan, y huknöpanam pensar qallëkurqan (lei Job 42:1-6).

w17.06 päg. 25 pärr. 12

Mas precisaq kaqtaqa ama qonqashuntsu

12 Tsëläya sufrishqa këkaptin Jobta tsënö parlaparninqa, ¿Jehoväqa mana allipaku tratëkarqan? Manam, y Jobpis manam tsëtatsu pensarqan. Tsëläya sufrishqa këkarnimpis, ima precisaq kanqantam cuentata qokurirqan. Tsëmi kënö nirqan: “Parlanqäta qonqëkullë, peqämampis allpata y uchpata winarmi rasumpa arrepentikü”. Awmi, Jehovä parlapanqanqa Jobta alläpam yanaparqan y shoqarqan (Job 42:1-6). Jina Elihü jutiyoq juk jövinpis Jobtaqa parlapashqanam karqan (Job 32:5-10). Consejayanqanta Job shumaq chaskikunqantaqa Jehovä rikarqanmi, tsëmi pëllata sirwinqampita kushikunqanta nirqan (Job 42:7, 8).

w22.06 päg. 25 pärrk. 17, 18

“TEYTA DIOSLLAMAN imëpis markäkuyë”

17 Jehoväta sirweq nunakunapitaqa manam Jobllatsu imëka mana allikunapa pasar alli tsarakurqan. Hebreu cristiänukunapaq Pablu cartakunqanchömi, Diosta sirwiyanqanchö tsënö tsarakoq nunakunaqa “imëka pukutënöraq” mëtsikaq kayanqanta nirqan (Heb. 12:1). Imëka mana allikunapa pasarpis, llapankunam Jehoväta sirwir sïguiyarqan (Heb. 11:36-40). ¿Envänuku karqan tsënö tsarakuyänampaq kallpachakuyanqanqa? Manam. Dios änikunqankunapita llapanta cumplikaqtaqa manam rikäyarqantsu, tsënö karpis, pëman confiakuytaqa manam dejayarqantsu. Y Jehoväpa rikëninchö alli këkäyanqanta y änikunqankuna rasumpa cumplikänampaq kaqtam següru këkäyarqan (Heb. 11:4, 5). Pëkuna imanö tsarakuyanqanman pensanqantsikqa, Jehoväman confiakur sïguinapaqmi yanapamantsik.

18 Kë munduqa mas mana allimanmi chäkuykan (2 Tim. 3:13). Y Satanasqa, Diosta sirweqkunatam pruëbaman churarnin sïguikan. Shamoq tiempuchö ima pasakunan kaptimpis, ‘kawëkaq Diosman markäkunqantsikrëkur’ puëdinqantsikmannö Jehoväta sirwir sïguikäshun (1 Tim. 4:10). Tsë llapan pruëbakunata Job pasariptin, “shonqupita patsë kuyakoq y ankupäkoq kanqanta” Jehovä rikätsishqa kanqanta yarpäshun (Sant. 5:11). “Shonqupita patsë asheqninkunata” bendicinqanta yarparnin, Jobnölla Jehoväta mana dejëpa sirwir sïguishun (leyi Hebrëus 11:6).

Imakunata yachakunqantsik

it-1-S päg. 377 pärr. 5

Burlakuyaptin

Jobqa pëpita alläpa burlakuyaptimpis manam Jehoväta sirwita dejarqantsu. Peru tsënö karpis, mana allitam pensarqan y parlarqan, tsëmi corregiyarqan. Elihümi Jobpaq kënö nirqan: “Manam ni pï nunapis Jobnöqa, yakuta upoq cuenta penqakatsishqa këta ashintsu” (Job 34:7). Jobqa imëpis allita ruranqanta rikätsikuyta munarmi imëkata parlarqan. Diosnintsik ni imëpis mana allita mana ruranqanta rikätsikunampa rantinmi, masqa yarpachakurqan kikin allichö quedanampaq (Job 35:2; 36:24). Jobqa pensarqan tsë kiman “amïgunkuna” pëpita burlakuykäyanqantam y manam cuentata qokurqantsu Diospita burlakuykäyanqanta. Tsëmi tsë burlakuyanqanqa pëpaqqa karqan imëka yakunö. Yakuta kushishqa upoq cuentam burlakuyanqankunata chaskikurqan. Peru Teyta Diosmi Jobta nirqan tsë burlakoqkunaqa kikin Jehoväpita burlakushqa kayanqanta (Job 42:7). Tsënöllam pasakurqan israelïtakunawampis. Juk nuna gobernantikuna kanampaq mañakuyaptinmi Jehoväqa willakoqnin Samuelta kënö nirqan: “Manam qamtatsu despreciëkäyäshunki, sinöqa noqatam, pëkunaqa manam munayantsu gobernantinkuna kanäta” (1Sa 8:7). Jesuspis discïpulunkunatam kënö nirqan: “Qatimaqnïkuna kayaptikim llapan nacionpita nunakuna chikiyäshunki” (Mt 24:9). Tsëkunata cuentachö katsiyanqanmi Teyta Diospa sirweqninkunataqa burlakuyaptimpis alli tsarakuyänampaq yanapanqa (Lü 6:22, 23).

FEBRËRU 5-11

BIBLIAPITA ALLI YACHAKUNAPAQ | SALMUS 1-4

Diospa Gobiernunta yanapashun

w21.09 päg. 15 pärr. 8

‘Më tsë nacionkunatam kuyuratsishaq’

8 Diospa Gobiernumpita willakunqantsiktaqa, mana allipam nunakuna rikäyan (leyi Salmus 2:1-3). Llapan nacionkunam piñashqa këkäyan. Manam Jehovä churanqan reyta cäsukuyta munayantsu. Manam Diospa Gobiernumpita willakunqantsikta alli noticiatanötsu rikäyan. Tsëmi wakin gobiernukunaqa, Diospita yachatsikunantsikta michäkuyashqa. Diosta sirwiyanqanta mëtsikaq nirpis, nacionkunata gobernaqkunaqa manam puëdeq këninkunata ni autoridäyoq këta dejëta munayantsu. Jesus kawanqan witsanchönöllam, sirweqninkunata sufritsir Jehoväpa Akrashqampa contran churakäyan (Hëch. 4:25-28).

w16.04 päg. 24 pärr. 11

Nunakunapa rurëninkunaman ama mëtikushuntsu

11 Kapamanqantsikkuna noqantsikpaq alläpa precisaptin. Qellëta o kapamanqantsikkunata precisaqpaq churashqaqa mas fäcilmi kanqa pimampis qaqärinapaq. Rikärishun juk pasakunqanta. Maläui nacionchömi 1970 wata pasariptin, polïticaman mana qaqëta munayanqanrëkur atska Testïgukuna imëkankunata jaqiyänan karqan. Ruth jutiyoq panim willakurqan, wakinkunaqa kayäpunqankunata jaqita mana puëdiyanqanta. Tsëmi juk nacionpita qeshpir ëwaqkunapa campamentunchöna këkarpis, wakinkunaqa wayinkunata kutikuyänanrëkur polïticaman qaqar qallëkuyarqan. Peru mëtsikaqmi wallkalla qellëwan kawayänan o llapanta oqrayänan kaptimpis, pimampis mana qaqashpa alleq tsarakuyarqan (Hebrëus 10:34, NM).

Imakunata yachakunqantsik

it-2-S pägk. 1085, 1086

Ichisaq päja

Tsënö nirqa, cebädata o trïguta trillariyaptin quedaq mas ichisaq kaq päjapaqmi parlëkan. Tsënö päjapaq Bibliachö parlarqa imatapis entienditsikuyta munarmi parlan. Tsënö kaptimpis, trïguta y cebädata unë tiempuchö imanö trillayanqanta musyanapaqmi yanapamantsik. Trillayaptin ërachö quedaq mas ichisaq päjakunaqa manam imapaqpis sirweqnatsu, tsëmi Bibliachö tsënö päjapaq parlarqa imapis mana sirweqpaq parlëkan. Rakishqa y ushakatsishqa kanampaq kaqtam rikätsikun.

Trïguta o cebädata trillariyaqtinqa llapan qaranmi qotukar yarqoq, tsëpitanam wawyayaptin o wayrayaptin tsë llapan yarqoqta polvutanö vientu apakoq y ërachöqa gränullanam quedareq. Tsënö kaqllam Jehoväqa contran churakashqakunata sirweqninkunapita rakinqanta, y mana alli ruraq nunakunata y pëpa contran churakaq gobiernukunata ushakätsinqa (Job 21:18; Sl 1:4; 35:5; Isa 17:13; 29:5; 41:15; Os 13:3). Diospa Gobiernunqa ichisaq päjatanömi chikeqninkunata ushakätsinqa (Da 2:35).

Ichisaq päjataqa juntëkurmi mana sirwiptin rupatsiyaq, tsënöpa montonarëkaq gränuman vientu mana kutitsinampaq. Tsënöllam bautizakoq Juanpis, mana allita ruraq religiösukunata Jesus ushakätsinampaq kaqta willakurqan. Jesusqa trillarmi trïguta juntanqa y ‘päjantanam upitsita mana puëdiyanqan ninawan ushakätsinqa’ (Mt 3:7-12; Lü 3:17).

FEBRËRU 12-18

BIBLIAPITA ALLI YACHAKUNAPAQ | SALMUS 5-7

Jukkuna mana allita rurayaptimpis Jehoväta sirwita dejashuntsu

w21.03 päg. 15 pärrk. 7, 8

¿Imatatan ruranantsik Bibliata leyinqantsik mas yanapamänapaq?

7 ¿Confiakunqëki amïguyki o mëqan familiëkillapis llakitsishurqunkiku? Tsënö kaptinqa, rey Davidpa tsurin Absalonpita yachakunqëkim yanapashunki. Pëmi papäninta traicionarqan y pëpa rantin rey këta munarqan (2 Sam. 15:5-14, 31; 18:6-14).

8 1) Diosmanmi mañakunantsik. Bibliachö Davidpaq manaraq willakunqanta leyirnin, puntataqa pipis llakitsimanqantsikpita imanö këkanqantsikta Jehoväta willashun (Sal. 6:6-9). Y tsëpitaqa, tsë problëmata altsanapaq consëjukunata tarinantsikpaq, pëta mañakushun.

w20.07 pägk. 8, 9 pärrk. 3, 4

¿Rasumpa yachatsikuyta katsintsikku?

3 Cristiänu mayintsikkuna kuyakoq kayaptinllatsu manam Teyta Diosman markäkoq y yärakoqqa kanantsik. Këllaman pensari; ¿imaraq pasanman juk cristiänu, creikoqkunata rikaq wawqi y llapan tiempunwan yachatsikoq wawqi pani mana allita rurëkuyaptin? Y ¿imataraq rurashwan pillapis mana alli nimashqa o Teyta Diospa contran parlayaptin? ¿Imataraq rurashwan tsënö pasaptin? ¿Jehovätatsuraq dejarishwan? Alli markäkïyoq o yärakuyyoq kanapaqqa Jehovä Diostam kuyanantsik y manam jukkuna rurayanqantatsu qatinantsik. Wakinkuna imanö kayanqampita y imata rurayanqampita kushikurllatsu manam markäkïyoq o yärakuyyoqqa kashun, sinöqa Jehovä Diospita Bibliachö alli yachakunqantsikpitam (Rom. 12:2).

4 Rasumpa kaq yachatsikuyta wakinkuna “kushishqa” chaskikurpis, mana allikunapa pasar dejariyänampaq kaqtam Jesusqa nirqan (leyi Mateu 13:3-6, 20, 21). Itsa Jesusta qatirqa bendicionkunata chaskir kushishqa kayänampaq kaqllaman pensayarqan y mana allikunapa pasarnin imata rurayänampaq kaqmanqa pensayarqantsu (Mat. 16:24). Peru kanan witsampis manam libritsu kantsik imëka problëmakunapitaqa, tsëmi mana pensanqantsik höra imallapis pasaramashwan (Sal. 6:6; Ecl. 9:11).

Imakunata yachakunqantsik

it-2-S päg. 1005

Sepultüra

Apostol Pabluqa Salmus 5:9 textuchö ninqantam Romänus 3:13 textuchö ninqanta qellqarqan. Tsë textuchömi mana allita ruraq y parlaq nunakunapa shiminta igualatsirqan ayata pampayänan uchkutawan. Sepultürachöqa nunakunapa ayanmi feyu asyar y ismur ushakan, tsënöllam mana alli nunakunapa shiminchöqa alläpa feyu palabrakunalla imëpis këkan (rikäri Mt 15:18-20).

FEBRËRU 19-25

BIBLIAPITA ALLI YACHAKUNAPAQ | SALMUS 8-10

“Alabashqëki[m] Teyta Jehovä”

w21.08 päg. 3 pärr. 6

Yanapakunapaq Jehovä permitimanqantsikta valorashun

6 Jehoväqa Shumaq Patsatam noqantsikpaq ruramushqa. Adantawan Ëvata manaraq kamarmi, Jehoväqa nunakunapaq juk Shumaq Patsata rurarqan (Job 38:4-6; Jer. 10:12). Alläpa alli y kuyakoq karmi, kushishqa kawakunapaq imëkata kamarqan (Sal. 104:14, 15, 24). Jehoväqa, kamanqankunaman höra höra pensarmi “alli kanqanta” rikarqan (Gen. 1:10, 12, 31). Nunakuna alläpa väliyanqantaqa rikätsikurqan, kamanqankunata rikäyänampaq churarmi (Sal. 8:6). Diosqa, nunakuna jutsannaq këman chärir llapan kamanqankunata cuidarnin imëyaqpis kushishqa kayänantam munan. ¿Jehovä tsëta änimanqantsikpita mana qonqëtaku agradecikuntsik?

w20.05 päg. 23 pärr. 10

Diospa qarëninkunapita agradecikushun

10 Parlëta yachanqantsikpitaqa, ¿imanötan agradecikushwan? Imapis kikinlla rurakashqa kanqanman creeq nunakunata, Diosnintsiklla llapanta kamashqa kanqanta yachatsirninmi (Sal. 9:1; 1 Pëd. 3:15). Imëkapis kikinlla rurakashqa kanqanta creeqkunaqa, Patsata y llapan kawaqtapis Teyta Dios mana kamashqanta creinatam munayan. Tsëmi Biblia y kë revistaqa ciëluchö Teytantsikta defendinapaq yanapamäshun. Y ciëluta y Patsata Jehovä Diosnintsiklla kamashqa kanqanta yachatsikunapaqpis yanapamäshunmi (Sal. 102:25; Is. 40:25, 26).

w22.04 päg. 7 pärr. 13

¿Wakinkuna yachakuyanmanku imanö parlakunqëkipita?

13 Kushishqa cantë. Yarpë, reunionkunachöqa cantantsik, Jehoväta alabëta munarmi. Panintsik Sära imata ruranqanta rikärishun. Shumaq mana cantanqanta nirpis, pëqa cantarninmi Jehoväta alabëta munan. Tsëmi preparakurqa, reunionchö cantanapaq cancionkunata yachakun y reunionchö yachakunampaq kaqtawanmi tsë cancionpa letrankuna imachö igualanqanta rikan. Pëmi kënö nin: “Tsë palabrakunaman pensarqa, manam alli o mana alli cantëkanqämantsu yarpachakü”.

Imakunata yachakunqantsik

it-1-S päg. 649

Dëdu

Bibliachömi nin “dëdunwan” o “dëdunkunawan” ishkë palta rumikunachö chunka mandamientukunata Dios qellqanqanta, milagrukunata ruranqanta y ciëluta kamanqanta (Ex 31:18; Dt 9:10; Ex 8:18, 19; Sl 8:3, nöta). Genesis libruchömi kënö nin: “Teyta Diospa poderninmi yaku jananchö wakpa këpa kuyukuykarqan” (Ge 1:2). Tsëmi Genesis libruta leyirnin cuentata qokuntsik imatapis Teyta Dios dëdunwan ruranqampaq Bibliachö parlarqa, santu espïritumpaq parlëkanqanta. Griëgu idiömachö qellqayanqan librukunachömi tsëta mas cläru entienditsikun. Mateu libruchömi nin Jesusqa Diospa santu espïritunwan demoniukunata qarqunqanta, peru Lücas libruchöqa nin “Diospa dëdunwan” tsëta ruranqantam (Mt 12:28; Lü 11:20, nöta).

26 DE FEBRËRUPITA 3 DE MARZUYAQ

BIBLIAPITA ALLI YACHAKUNAPAQ | SALMUS 11-15

Shumaq Patsachö yamë kawakunapaq kaqman pensë

w06-S 15/5 päg. 18 pärr. 3

Salmus librupita yachakunapaq

11:3. Gobiernukuna mandakuyanqan leykunata nunakuna mana cäsukuyaptinqa manam tranquïlu kawakuy ni justicia kannatsu. Tsënö pasakuptinqa, “allita ruraq nunaqa” Teyta Diosmanmi llapan shonqunwan confiakunan (Salmus 11:4-7).

wp16.4 päg. 11

¿Ushakanqatsuraq maqanakï y mana alli rurëkuna?

Bibliam änikun ichikllachöna entëru Patsapita mana allikunata Dios ushakäratsinampaq kaqta. Pëmi nin, mana alli ruraqkunaqa ‘juiciu junaqpaq y mana alli ruraq nunakuna ushakäyänan hörapaq’ këkäyanqanta (2 Pëdru 3:5-7, NM). Mananam pipis nuna mayinta sufritsinqanatsu. Peru ¿imanirtaq següru këkantsik Dios mana alli rurëkunata y maqanakïkunata ushakätsita munanqanta?

Bibliaqa nin, ‘maqakoqkunata, maqakïta munar qayapäkoqkunata’ Jehovä pasëpa chikinqantam (Salmu 11:5). Kamakoqnintsikqa yamë kawakïta y alli kaq rurëtam alläpa kuyan (Salmu 33:5; 37:28). Tsëmi següru kantsik mana alli rurëkuna y maqanakïkuna chipyëpa ushakänampaq kaqta.

w17.08 päg. 6 pärr. 15

¿Puëdintsikku pacienciawan shuyarëta?

15 Salmus 13 textuchömi Davidqa chusku kutipa Jehoväta tapurqan, pasëkanqan problëmakuna imëyaq kanampaq kaqta. Peru ¿imataq yanaparqan pasëkanqan problëmakuna altsakänanta pacienciawan shuyaränampaq? Kikinmi kënö nirqan: “Noqaqa alläpa alli kënikimanmi confiakü; salvacionnikita rikarmi shonqü kushikunqa. Noqaqa cantarmi Jehoväta alabashaq, porqui pëqa alläpam bendicimashqa” (Sal. 13:5, 6, nota). Jehovä alläpa kuyakoq kanqanmanmi Davidqa markäkurqan. Kushishqam shuyararqan problëmankunata Jehovä ushakäratsinan junaqta. Jinamampis, puntakunata imanö yanapanqanmanmi pensarqan. Awmi, Davidqa musyarqanmi pacienciawan shuyarëqa allipaq kanqanta.

kr-S päg. 236 pärr. 16

Teyta Diospa Gobiernunmi kë Patsachö voluntäninta ruramunqa

16 Yamënam kawakushun. Isaïas 11:6-9 textuchö ninqanqa shamoq tiempuchömi llapan cumplikanqa. Ollqupis, warmipis y wamrakunapis mëchö karpis segürunam sientikuyanqa. Manam chukaru animalkuna ni nunakunapis imanamäshunnatsu. Mëchö karpis o mëpa ëwarpis wayintsikchönömi següru sientikushun. Mayukunachö, qochakunachö y lamarkunachöpis nadëtam puëdishun; jirkakunapa y pampakunapam cörrishun. Y paqaspapis manam imatapis mantsashunnatsu. Ezequiel 34:25 textu ninqanmi cumplikanqa, Teyta Diosta sirweqkunaqa ‘jirkakunachöpis segürum kawayanqa y monti kuchunkunachöpis segürum punuyanqa’.

Imakunata yachakunqantsik

w13 15/9 päg. 20 pärr. 12

¿Jukläya nunanaku kantsik?

12 Kanan witsampis, apostul Pablu parlanqan nunakunapa tiempunchönöllam kawëkantsik. Pëkunaqa itsa pensayan Dios mandakunqannö kawëqa kanan witsanqa mana precisanqantana. Mëtsikaq profesorkuna y teytakunam munayanqannö imatapis rurakuyänampaq wamrakunata yachatsiyan. Pëkunaqa pensayan imëkapis tiempuyoqlla kanqantam. Hasta Diosman creeqkunapis munayanqannömi imatapis rurakuyan y Dios mandakunqankunata wiyakïqa mana precisanqantam pensayan (Sal. 14:1). Tsënö pensëqa cristiänukunapaq pasëpa mana allim. Mäkoq mäkoqlla mana karninqa, Diospa markan yachatsimanqantsikkunatam wiyakushunnatsu o itsa imata consejamanqantsikkunapita quejakur qallëkushun. O itsa, kushikïkuna asuntupaq, Internetpaq o estudiu asuntupaq consejamashqa mana allitanö rikar qallëkushun.

    Llapan publicacionkuna Quechua Ancash (1993-2025)
    Cuentëkita wichqë
    Cuentëkiman yëkuy
    • Quechua (Ancash)
    • Pimampis apatsi
    • Patsätsi
    • Copyright © 2025 Watch Tower Bible and Tract Society of Pennsylvania
    • Utilizänëkipaq conträtu
    • Willakunqëkikunata imanö utilizäyanqä
    • Configuración de privacidad
    • JW.ORG
    • Cuentëkiman yëkuy
    Pimampis apatsi