Jinsi Yehova Anavyojibu Sala Zetu

1-2. Huenda tukajiuliza swali gani kuhusu sala zetu?

JE, UMEWAHI kujiuliza ikiwa kweli Yehova anajibu sala zako? Ikiwa ndivyo, huko peke yako. Ndugu na dada wengi wamejiuliza swali hilo, hasa wanapokabiliana na hali ngumu. Ikiwa tunateseka, huenda ikiwa vigumu zaidi kwetu kutambua jinsi Yehova anavyojibu sala zetu.

² Acheni tuchunguze kwa nini tunaweza kuwa na uhakika kwamba Yehova anajibu sala za waabudu wake. (1 Yoh. 5:15) Pia, tutachunguza maswali haya: Kwa nini wakati mwingine huenda ikaonekana kwamba Yehova hajibu sala zetu? Yehova anajibu sala kwa njia gani leo?

HUENDA YEHOVA ASIJIBU KWA NJIA TUNAYOTARAJIA

3. Kwa nini Yehova anataka tusali kwake?

³ Maandiko yanatuhakikishia kwamba Yehova anatupenda sana na kwamba sisi ni wenye thamani kwake. (Hag. 2:7; 1 Yoh. 4:10) Ndiyo sababu anatukaribisha tumwombe msaada kupitia sala. (1 Pet. 5:6, 7) Anataka kutusaidia tuendelee kuwa karibu naye na tufanikiwe kuvumilia hali ngumu tunazokabili.

4. Tunajuaje kwamba Yehova hujibu sala za waabudu wake? (Tazama pia picha.)

⁴ Katika Biblia, mara nyingi tunasoma kwamba Yehova alijibu sala za waabudu wake. Je, unaweza kufikiria mfano wowote? Mfikirie Mfalme Daudi. Alikabili maadui wengi hatari katika maisha yake yote, na mara nyingi alitafuta msaada wa Yehova kupitia sala. Pindi moja, alimsihi hivi: “Ee Yehova, isikie sala yangu; sikiliza sihi yangu ya kuomba msaada. Nijibu katika uaminifu wako na katika uadilifu wako.” (Zab. 143:1) Yehova alijibu sala ya Daudi kwa kumkomboa. (1 Sam. 19:10, 18-20; 2 Sam. 5:17-25) Daudi angeweza kusema hivi kwa uhakika: “Yehova yuko karibu na wote wanaomwitia.” Sisi pia tunaweza kuwa na uhakika huo.​—Zab. 145:18.

5. Je, zamani sala za waabudu wa Yehova zilijibiwa sikuzote kwa njia ambayo walitarajia? Toa mfano. (Tazama pia picha.)

⁵ Huenda Yehova asijibu sala zetu kwa njia tunayotarajia. Ndivyo ilivyokuwa kwa mtume Paulo. Alimwomba Mungu amwondolee “mwiba katika mwili.” Katika pindi tatu, Paulo alisali kihususa kuhusu tatizo hilo gumu. Je, Yehova alijibu sala hizo? Ndiyo, lakini kwa njia ambayo Paulo hakutarajia. Badala ya kuondoa tatizo hilo, Yehova alimpa nguvu alizohitaji ili aendelee kumtumikia kwa uaminifu.​—2 Kor. 12:7-10.

6. Kwa nini huenda wakati mwingine ikaonekana kwamba Yehova hajibu sala zetu?

⁶ Wakati mwingine, huenda sisi pia tukapata jibu lililo tofauti na lile tulilotarajia. Tunaweza kuwa na uhakika kwamba Yehova anajua kihususa njia bora ya kutusaidia. Hata anaweza “kufanya kwa wingi zaidi kupita mambo yote tunayoomba au tunayofikiri.” (Efe. 3:20) Kwa sababu hiyo, huenda akajibu sala zetu wakati au kwa njia ambayo hatukutarajia.

7. Kwa nini huenda tukahitaji kubadili jambo tunaloomba katika sala? Toa mfano.

⁷ Huenda tukahitaji kubadili jambo tunaloomba katika sala tunapotambua waziwazi zaidi mapenzi ya Yehova. Fikiria mfano wa Martin Poetzinger. Muda mfupi baada ya kufunga ndoa, Ndugu Poetzinger alifungwa gerezani katika kambi ya mateso ya Wanazi. Mwanzoni, alimwomba Yehova amweke huru kutoka katika kambi ya mateso ili aweze kumtunza mke wake na arudi kwenye kazi ya kuhubiri. Hata hivyo, baada ya majuma mawili hakuona dalili yoyote kwamba Yehova alikuwa akifungua njia ya kumweka huru. Basi, akaanza kusali hivi: “Tafadhali Yehova, nionyeshe jambo ambalo unataka nifanye.” Kisha akaanza kufikiria mambo ambayo akina ndugu walikuwa wakipitia katika kambi hiyo. Wengi walikuwa na wasiwasi mwingi kuhusu wake zao na watoto wao. Kisha Ndugu Poetzinger akasali hivi: “Asante Yehova kwa mgawo wangu mpya. Nisaidie kuwaimarisha na kuwatia moyo ndugu zangu.” Alitumia miaka tisa iliyofuata katika kambi akifanya kazi hiyo!

8. Tunapaswa kukumbuka jambo gani muhimu tunaposali?

⁸ Tunapaswa kukumbuka kwamba Yehova ana kusudi, na atalitimiza kulingana na ratiba yake aliyoweka. Kusudi hilo linatia ndani kuondoa kabisa matatizo yote yanayosababisha mateso mengi leo—matatizo kama vile misiba ya asili, magonjwa, na kifo. Yehova atatimiza kusudi lake kupitia Ufalme wake. (Dan. 2:44; Ufu. 21:3, 4) Hata hivyo, kabla ya wakati huo kufika, Yehova amemruhusu Shetani atawale ulimwengu huu.b (Yoh. 12:31; Ufu. 12:9) Ikiwa Yehova angetatua matatizo ya wanadamu sasa, huenda ingeonekana kwamba utawala wa Shetani una mafanikio. Basi, ingawa tunalazimika kusubiri hadi Yehova atimize baadhi ya ahadi, hilo halimaanishi kwamba ametuacha bila msaada. Acheni tuchunguze baadhi ya njia ambazo Yehova anatusaidia.

NJIA AMBAZO YEHOVA HUJIBU SALA LEO

9. Yehova anaweza kutusaidiaje tunapohitaji kufanya maamuzi? Toa mfano.

⁹ Anatupatia hekima. Yehova ametuahidi kwamba atatupatia hekima tunayohitaji ili tufanye maamuzi mazuri. Tunahitaji hasa hekima kutoka kwa Mungu tunapofanya maamuzi ambayo yataathiri maisha yetu yote, kama vile uamuzi wa kuendelea kuwa waseja au kufunga ndoa. (Yak. 1:5) Fikiria mfano wa dada mseja anayeitwa Maria.c Alikuwa akitumikia kwa furaha akiwa painia wa kawaida alipokutana na ndugu fulani. Anasema hivi: “Urafiki wetu ulipoendelea kusitawi, ndivyo hisia kati yetu zilivyozidi kuwa na nguvu. Nilijua kwamba nilihitaji kufanya uamuzi. Nilisali mara nyingi sana kuhusu jambo hilo. Nilihitaji mwongozo wa Yehova, lakini pia nilijua kwamba Yehova hangenifanyia uamuzi huo.” Maria anahisi kwamba Yehova alijibu sala yake ya kuomba hekima. Jinsi gani? Alipokuwa akifanya utafiti katika machapisho yetu, alipata makala hususa ambazo zilimsaidia kupata majibu ya maswali yake. Pia, alisikiliza ushauri wenye hekima kutoka kwa mama yake, ambaye ni Mkristo mwaminifu. Ushauri huo ulimsaidia Maria kuchanganua hisia zake. Mwishowe alifanya uamuzi wenye hekima.

10. Kulingana na Wafilipi 4:13, Yehova atafanya nini ili kuwasaidia waabudu wake? Toa mfano. (Tazama pia picha.)

¹⁰ Anatupatia nguvu za kuvumilia. Kama vile alivyomsaidia mtume Paulo, Yehova atatupatia nguvu tunazohitaji ili tuvumilie majaribu yetu. (Soma Wafilipi 4:13.) Fikiria jinsi Yehova alivyomsaidia ndugu anayeitwa Benjamin avumilie hali mbalimbali ngumu. Kwa miaka mingi alipokuwa kijana, Benjamin na familia yao waliishi katika kambi za wakimbizi huko Afrika. Benjamin anasema hivi: “Sikuzote nilisali kwa Yehova nikimwomba anipe nguvu za kufanya mambo yanayomfurahisha. Yehova alijibu sala zangu kwa kunipa amani ya akili, ujasiri wa kuendelea kuhubiri, na machapisho yaliyonisaidia kuendelea kuwa na nguvu kiroho.” Anaongezea hivi: “Kusoma masimulizi ya maisha ya Mashahidi wengine na kujifunza jinsi Yehova alivyowasaidia kuvumilia, kuliimarisha azimio langu la kuendelea kuwa mwaminifu.”

11-12. Huenda Yehova akaamua kuwatumiaje ndugu na dada zetu ili kujibu sala zetu? (Tazama pia picha.)

¹¹ Anatumia ndugu na dada zetu ili kutusaidia. Usiku kabla ya kutoa uhai wake uwe dhabihu, Yesu alisali kwa bidii. Alimsihi Yehova amwondolee shutuma ya kuonwa kuwa mkufuru. Badala ya kufanya hivyo, Yehova alimsaidia Yesu kwa kumtuma malaika ili amwimarishe Yesu. (Luka 22:42, 43) Njia nyingine ambayo huenda Yehova akatusaidia ni wakati tunapotiwa moyo kwa kupigiwa simu au kutembelewa na mmoja wa ndugu au dada zetu. Sisi sote tunaweza kutafuta fursa za kuwapa “neno jema” waabudu wenzetu.​—Met. 12:25.

¹² Fikiria jambo ambalo dada anayeitwa Miriam alijionea. Majuma kadhaa baada ya mume wake kufa, Miriam alikuwa nyumbani peke yake, akiwa amekata tamaa na kushuka moyo. Hakuweza kuacha kulia na alihitaji mtu wa kuzungumza naye. Anasema hivi: “Sikuwa na nguvu ya kumpigia mtu yeyote simu, hivyo nilisali kwa Yehova. Nilipokuwa bado ninalia na kusali, nilipigiwa simu. Ilitoka kwa mzee wa kutaniko, rafiki mpendwa.” Mzee huyo na mke wake walimfariji Miriam. Miriam anasadiki kwamba Yehova alimchochea ndugu huyo kupiga simu.

13. Toa mfano wa jinsi Yehova anavyoweza kuwatumia watu wasiomwabudu kujibu sala zetu.

¹³ Huenda akawatumia watu wasiomwabudu ili kutusaidia. (Met. 21:1) Nyakati nyingine, Yehova hujibu sala za watu wake kwa kuwachochea watu wasiomwabudu wawasaidie waabudu wake. Kwa mfano, alimchochea Mfalme Artashasta amruhusu Nehemia arudi Yerusalemu ili asaidie katika kazi ya kujenga upya jiji. (Neh. 2:3-6) Leo pia, Yehova anaweza kuwachochea watu ambao hawamwabudu watusaidie tunapohitaji msaada.

14. Ni jambo gani ambalo limekutia moyo kuhusiana na simulizi la Soo Hing? (Tazama pia picha.)

¹⁴ Dada anayeitwa Soo Hing anahisi kwamba Yehova alimsaidia kupitia daktari wake. Mwanaye anasumbuliwa na matatizo mbalimbali ya akili. Mwanaye alipopata aksidenti mbaya, Soo Hing na mume wake waliacha kazi ili wamtunze mwana wao. Matokeo ni kwamba walipata matatizo ya kifedha. Soo Hing anasema alihisi kwamba hangeweza kuvumilia mkazo wowote zaidi. Alimmiminia Yehova moyo wake, akimwomba msaada. Daktari wao aliamua kutafuta njia ya kuwasaidia. Matokeo ni kwamba walipata msaada kutoka serikalini na nyumba ya gharama nafuu. Baadaye, Soo Hing alisema hivi: “Tuliuona mkono wa Yehova ukitusaidia katika hali hiyo. Kwa kweli, Yeye ni ‘Msikiaji wa sala.’”​—Zab. 65:2.

TUNAHITAJI IMANI ILI KUTAFUTA NA KUKUBALI JINSI YEHOVA ANAVYOTUJIBU

15. Ni nini kilichomsaidia dada mmoja kutambua sala zake zilikuwa zikijibiwa?

¹⁵ Kwa kawaida, sala zetu hazijibiwi kwa njia ya kustaajabisha. Lakini majibu tunayopata yanatupatia hasa jambo tunalohitaji ili kuendelea kuwa washikamanifu kwa Baba yetu wa mbinguni. Basi, uwe macho kutambua jinsi Yehova anavyojibu sala zako. Dada anayeitwa Yoko alihisi kwamba Yehova hakuwa akijibu sala zake, lakini akaanza kuweka orodha ya mambo ambayo alikuwa akimwomba Yehova. Baada ya muda kupita, alichunguza mambo ambayo alikuwa ameandika kwenye kitabu chake na akatambua kwamba Yehova amekuwa akijibu nyingi kati ya sala alizotoa, hata baadhi ya sala ambazo alikuwa amesahau. Mara kwa mara, tunahitaji kutua na kutafakari jinsi Yehova anavyojibu sala zetu.​—Zab. 66:19, 20.

16. Tunawezaje kuonyesha imani inapohusu sala? (Waebrania 11:6)

¹⁶ Tunaonyesha imani si kwa kusali tu kwa Yehova, bali pia kwa kukubali njia yoyote anayotumia kujibu sala zetu. (Soma Waebrania 11:6.) Fikiria mfano wa Mike na Chrissy, mke wake. Walikuwa na lengo la kutumikia Betheli. Mike anasema hivi: “Tulijaza ombi tukiwa wenzi wa ndoa kwa miaka mingi, na kusali kwa Yehova tena na tena kuhusu lengo hilo, lakini hatukualikwa.” Mike na Chrissy waliendelea kuwa na uhakika kwamba Yehova alijua njia bora ambayo angewatumia katika utumishi wake. Waliendelea kufanya yote waliyoweza, wakitumikia wakiwa mapainia wa kawaida katika eneo lenye uhitaji na kusaidia katika ujenzi wa majengo ya kitheokrasi. Leo, wanatumikia katika kazi ya kuzungukia makutaniko. Mike anasema hivi: “Yehova hajajibu sala zetu kila mara kwa njia tuliyotarajia, lakini amezijibu na kwa njia bora zaidi kuliko tulivyowazia.”

17-18. Kulingana na Zaburi 86:6, 7, tunaweza kuwa na uhakika gani?

¹⁷ Soma Zaburi 86:6, 7. Mtunga zaburi Daudi alikuwa na uhakika kwamba Yehova alisikiliza na kujibu sala zake. Wewe pia unaweza kuwa na uhakika huo. Mifano iliyozungumziwa kwenye makala hii, inatuhakikishia kwamba Yehova anaweza kutupatia hekima na nguvu tunazohitaji ili kuvumilia. Huenda akawatumia ndugu na dada zetu au watu ambao kwa sasa hawamwabudu ili kutusaidia kwa njia fulani.

¹⁸ Ingawa huenda Yehova asijibu sala zetu kila mara kwa njia tuliyotarajia, tunajua kwamba atazijibu. Atatuandalia kile hasa tunachohitaji na kwa wakati hususa tunapokihitaji. Basi, endelea kusali ukiwa na imani na uhakika kwamba Yehova atakutunza sasa na kwamba “[atatosheleza] tamaa ya kila kitu kilicho hai” katika ulimwengu mpya unaokuja.​—Zab. 145:16.