ʼE Maʼuli Te Folafola ʼa Sehova
Ko He ʼu Puani ʼAoga ʼo Te Lua Koga ʼo Te ʼu Pesalemo
ʼI TOTATOU ʼuhiga kaugana ʼa Sehova, ʼe tou ʼiloʼi ʼe hoko mai anai he ʼu ʼahiʼahi kiā tatou. Neʼe tohi fēnei e te ʼapositolo ko Paulo: “Ko nātou fuli ʼaē ʼe fia pipiki ki te ʼAtua ʼi te lototahi mo Kilisito Sesu ʼe fakatagaʼi anai mo nātou.” (2 Timoteo 3:12, MN ) Koteā anai ka tokoni mai kiā tatou ke tou ʼutakiʼi te ʼu ʼahiʼahi pea mo te ʼu fakataga, moʼo fakahā ai tatatou agatonu ki te ʼAtua?
ʼE foaki mai te tokoni ʼaia ʼi te lua koga ʼo te tohi ʼo te ʼu pesalemo. ʼE fakahā mai ʼi te ʼu Pesalemo 42 ki te 72, kapau ʼe tou fia mālo ʼi te ʼu ʼahiʼahi, pea ʼe tonu ke tou falala kātoa kiā Sehova pea mo tou fakatalitali ke ina hāofaki tatou. ʼE ko he ʼu ako maʼuhiga kiā tatou! Ko te logo ʼaē ʼe tuʼu ʼi te Lua Koga ʼo te ʼu Pesalemo, ohage pe ko te ʼu tohi fuli ʼo te Folafola ʼa te ʼAtua, ʼe “mauli . . . pea e gaue,” māʼia foki mo te temi nei.—Hepeleo 4:12.
KO SEHOVA ʼE KO TOTATOU ‘HOLAʼAGA PEA MO TOTATOU MĀLOHIʼAGA’
Ko te tagata Levite neʼe ʼaunofo. ʼI tana mamahi ʼi tana mole lava ʼalu ʼaē ki te sagatualio ʼo Sehova ke ʼatolasio ai, neʼe ina fakafimālieʼi ia ia ʼo ina ʼui fēnei: “He koʼe ʼe ke lotomamahi, Ê toku nefesi, pea he koʼe ʼe ke hoha iā te au? ʼAtalitali ki te ʼAtua.” (Pesalemo 42:5, 11; 43:5) Ko te hā putuputu ʼo te vaega ʼaenī, ʼe ina fakapipiki tahi te ʼu vaega ʼo te ʼu Pesalemo 42 mo te 43, ko he palalau fakatuketuke pe e tahi. Ko te Pesalemo 44 ʼe ko he kole maʼa te Puleʼaga ʼo Suta—ko te puleʼaga ʼaia neʼe tau mo te mamahi, lagi ʼi tona ʼamanaki ʼohofiʼi e te kau Asilia ʼi te temi ʼo te Hau ko Esekiasi.
Ko te Pesalemo 45, ko he hiva ʼo ʼuhiga mo te ʼohoana ʼo te hau, ʼe ko he fakakikite ʼo te Hau Faka Mesianike. Ko te ʼu pesalemo e tolu ʼaē ʼe hoa kiai, ʼe ʼui ai ko Sehova ʼe “ko he holaʼaga pea mo he mālohiʼaga,” “ko te Hau lahi ki te kele kātoa,” pea mo “he tauʼaluga pau.” (Pesalemo 46:1; 47:2; 48:3) ʼE fakahā fakalelei ʼi te Pesalemo 49 ʼe mole ʼi ai he tagata “ ʼe feala anai ʼi he temi ke ina totogi he tēhina.” (Pesalemo 49:7) ʼE lau ko te ʼu foha ʼo Kole ʼaē neʼe nātou tohi te ʼu ʼuluaki pesalemo e valu ʼo te lua koga. Ko te hiva pesalemo, ia te Pesalemo 50, neʼe tohi e Asafe.
Te ʼu Tali Ki Te ʼu Fehuʼi Faka Tohi-Tapu:
44:19—Neʼe koteā “te nofoʼaga ʼo te ʼu kuli vao”? Neʼe lagi manatuʼi e te tagata fai pesalemo ia te koga meʼa tau, ʼaē neʼe liliu ai te hahaʼi mate ko he meʼa kai ʼa te ʼu kuli vao.
45:13, 14—Ko ai “te ʼofafine ʼo te hau” ʼaē “ka ʼaumai anai ki te hau”? Ko te ʼofafine ʼo te “Hau ʼo te heʼegata,” ia Sehova ʼAtua. (Apokalipesi 15:3, MN ) ʼE ina fakatātā ia te kokelekasio ʼaē kua faka kolōliaʼi ʼo te toko 144 000 kau Kilisitiano, ʼaē neʼe vavae e Sehova ko tana fānau, ʼo ina fakanofo ia nātou ʼaki tona laumālie. (Loma 8:16) Ko te “ ʼofafine” ʼaia ʼo Sehova, ʼaē “kua teuteu o hage he finemui ohoana nee teuteu ki tona ohoana,” ʼe ʼaumai anai ki tona hoa—ia te Hau Faka Mesianike.—Apokalipesi 21:2.
45:14b, 15—Ko ai ʼaē ʼe fakatā e “te ʼu tāupoʼou”? ʼE ko te “toe hahaʼi tokolahi” ʼo te kau ʼatolasio moʼoni, ʼaē ʼe nātou fakatahi pea mo lagolago ki te toe ʼo te kau Kilisitiano fakanofo. Mai te ʼaluʼaga ʼaē ʼe nātou ‘fakalaka maʼuli ʼi te mamahi lahi,’ ʼe nātou nonofo anai ʼi te kele mokā fakaʼosi te fai ʼohoana ʼa te Hau Faka Mesianike ʼi te lagi. (Apokalipesi 7:9, 13, 14, MN ) ʼI te lakaga ʼaia ʼe nātou fonu anai “ ʼi te fiafia mo te fakafiafia.”
45:16—ʼE faka ʼuhiga feafeaʼi anai tanatou liliu ʼaē ko he ʼu foha kae mole ko he ʼu kui ʼa te hau? ʼI te tupu ʼa Sesu ʼi te kele, neʼe ʼi ai tana ʼu kui fakakelekele. ʼE nātou liliu anai ko tona ʼu foha mokā ina fakatuʼuake anai ia nātou mai te mate lolotoga te ʼu Taʼu e Afe ʼo Tana ʼAfio Hau. Ko ʼihi iā nātou ʼe nātou kau anai iā nātou ʼaē ka fakanofo “ko te ʼu tama ʼaliki ʼi te kele kātoa.”
50:2—He koʼe ʼe fakahigoaʼi ia Selusalemi “ko te kātoa ʼo te taulekaleka”? ʼE mole fakahigoaʼi feiā tupu ko tona taulekaleka. Neʼe tupu te taulekaleka ʼaupito ʼo Selusalemi ʼuhi ko tona fakaʼaogaʼi e Sehova, pea ko te kolōlia ʼaē neʼe hilifaki kiai, ʼe ko tona filifili ʼaē e Sehova ke fakatuʼu ai tona fale lotu pea ʼe ko te taulaga ʼo te ʼu hau ʼaē neʼe ina fakanofo.
Te ʼu Puani ʼe Tou Lava Tāʼofi:
42:1-3. Ohage ko te fakaʼamu ʼa te tia fafine ki he moʼi vai, neʼe toe feiā pe mo te fakaʼamu ʼa te tagata Levite kiā Sehova. Neʼe ʼiloga te lotomamahi ʼaupito ʼa te tagata ʼaia ʼi tana mole kei lava ʼatolasio kiā Sehova ʼi Tona sagatualio, ‘neʼe kua maʼuli pe ʼi te ʼaho mo te po ki tona ʼu loʼimata’—neʼe mole kei fia kai. ʼE mole tonu koa la ke tou fakafetaʼi lahi ʼi tatatou lava atolasio fakatahi mo ʼotatou tēhina kiā Sehova?
42:4, 5, 11; 43:3-5. Kapau ʼe hoko he ʼaluʼaga faka temi ʼe mole feala hatatou fakatahi ai mo te kokelekasio, ʼe tou maʼu anai he lotomālohi mo kapau ʼe tou manatuʼi ia te ʼu fiafia ʼaē neʼe tou maʼu ʼi tatatou fakatahi mo te kokelekasio. Logola ʼi te kamata, ʼe lagi tou lotomamahi ʼaupito anai ʼi tatatou tō kehe, kae ʼe ina toe fakamanatuʼi mai ko te ʼAtua ʼe ko totatou holaʼaga pea ʼe tonu ke tou fakatalitali ki ai ke ina faka ʼāteainaʼi tatou.
46:1-3. Logola he faʼahiga malaʼia ʼe hoko kiā tatou, kae ʼe tonu ke tou falala mālohi “ko te ʼAtua ʼe ko he holaʼaga pea mo he mālohiʼaga maʼa tatou.”
50:16-19. Ko ʼaē ʼe palalau fakakākā pea mo ina fai tuʼumaʼu he ʼu meʼa ʼe kovi, ʼe mole feala ke ina fakafofoga te ʼAtua.
50:20. ʼE mole tou fia talanoa anai ʼo ʼuhiga mo te ʼu hala ʼa ʼihi, kae ʼe tou lītuʼa anai kiai.—Kolose 3:13.
“FAKATALITALI FAKALOGOLOGO KI TE ʼATUA, Ê TOKU NEFESI”
Ko te koga ʼaenī ʼo te ʼu pesalemo ʼe kamata ʼaki te faikole fakamalotoloto ʼa Tavite ʼi tana ʼosi agahala mo Pati-Sepa. ʼE fakahā e te ʼu Pesalemo 52 ki te 57, ʼe hāofaki anai e Sehova ia nātou ʼaē ʼe tuku tanatou kavega kiā te ia pea mo fakatalitali ke ina hāofaki nātou. Ohage ko tona fakahā ʼi te ʼu Pesalemo 58 ki te 64, lolotoga tona ʼu mamahi fuli, neʼe fakaliliu e Tavite ia Sehova ko tona holaʼaga. Neʼe ina hivaʼi fēnei: “ ʼIo, fakatalitali fakalogologo ki te ʼAtua, Ê toku nefesi, koteʼuhi ʼe haʼu taku falala mai iā te ia.”—Pesalemo 62:5.
Ko te fakakaumeʼa lelei mo totatou Hāofakiʼaga ʼe tonu ke ina uga tatou ke tou “fai he ʼu hiva ki te kolōlia ʼo tona huafa.” (Pesalemo 66:2) ʼE vikiʼi ia Sehova ʼi te Pesalemo 65, ʼe ko he ʼAtua ʼe ina foaki lahi, pea ʼi te Pesalemo 67 mo te 68, ʼe ko te ʼAtua ʼo te hāofaki, pea ʼi te Pesalemo 70 mo te 71 ʼe ko he ʼAtua ʼe ina hāofaki.
Te ʼu Tali Ki Te ʼu Fehuʼi Faka Tohi-Tapu:
51:12—Ko te “lotolelei” ʼo ʼai ʼaē neʼe kole e Tavite ke lagolago age ki ai? ʼE mole faka ʼuhiga ʼi henī ki te loto lelei ʼa Sehova ke tokoni kiā Tavite, peʼe ko te laumālie maʼoniʼoni ʼa Sehova, kae ʼe ko te lotolelei totonu ʼa Tavite—ia tana manatu. ʼE ina kole ki te ʼAtua ke tuku age kiā ia te fia fai ʼo te meʼa ʼaē ʼe lelei.
53:1—He koʼe ʼe ʼui “ ʼe vale” te tagata ʼaē ʼe mole faka tui ki te maʼuli moʼoni ʼa ʼAtua? ʼE mole faka ʼuhiga ʼi henī te kupu vale ki he tahi ʼe mole ʼi ai hana fakakaukau. ʼE ʼiloga te vale ʼo te taʼi tagata ʼaia ʼi tana fai ia te ʼu aga heʼe ʼaoga, ohage ko tona fakamatalatala iā Pesalemo 53:1-4.
58:3-5—ʼE faka ʼuhiga feafeaʼi te ʼui ʼaē ko te kau agakovi ʼe nātou hage ko he gata? Ko te ʼu loi ʼaē ʼe nātou fakamatala ʼo ʼuhiga mo ʼihi ʼe hage ko te kafo kona ʼo te gata. ʼE nātou ʼulihi te matagafua ʼo te hahaʼi ʼaē ʼe nātou fasituʼu ki ai. “Ohage ko te gata ʼaē ʼe ina māpunuʼi tona taliga,” ʼe feiā mo te kau agakovi ʼaē ʼe mole nātou fia logo ki honatou takitaki peʼe ko tonatou fakatonutonuʼi.
58:7—Koteā te faka ʼuhiga ʼo te ʼui ʼaē ko te kau agakovi “ ʼe nātou pulinoa ohage ko te pulinoa ʼo te ʼu vai”? Neʼe lagi manatu ia Tavite ki te ʼu vai ʼi ʼihi liuʼa ʼi te Kele ʼo Te Fakapapau. Logola ʼe hake vave te vai mokā hoko he puvai ʼi te ʼu taʼi malaʼe ʼaia, kae ʼe toe vave mo tona hifo pea mo pulinoa ai. Neʼe faikole ia Tavite ke pulihi vave ia te kau agakovi.
68:13—Neʼe feafeaʼi ia “te ʼu kapakau ʼo te lupe ʼaē neʼe ʼaofi siliva pea ko ʼona fuluʼi kapakau ʼe lanu ʼaulo fuluʼi hega pea mo legalega”? Ko ʼihi lupe lanu nefunefu, ʼe gigila tanatou tahi ʼu fuluʼi kapakau. Ko tonatou ʼu fuluʼi kapakau ʼe tapa gigila tupu ko te laʼā. Neʼe lagi fakatatau e Tavite ia te kau solia ʼaē ʼe liliu mālo mai he tau, ki te taʼi lupe ʼaia—ʼe lele mālohi pea ʼe tapa gigila. ʼE ʼui e ʼihi tagata popoto, ko te fakamatalatala ʼaia ʼe lagi faka ʼuhiga ki he meʼa neʼe faʼu nima, ko he fakapale, ʼaē neʼe nātou toʼo ohage ko honatou koloā mai te ʼu fenua ʼaē neʼe nātou mālo ai ʼi te tau. Logola peʼe koteā te faka ʼuhiga totonu ʼo tana ʼu palalau, kae neʼe manatu ia Tavite ke faka fealagia age e Sehova ke mālo tana hahaʼi ʼi tonatou ʼu fili.
68:18—Neʼe ko ai ia ‘te ʼu meʼa ʼofa ʼaia ʼaē ko ni ʼu tagata’? Neʼe toʼo te ʼu tagata ʼaia mai te kau pilisoni ʼaē neʼe puke lolotoga te tauʼi ʼo te Kele ʼo Te Fakapapau. Ki muli age neʼe hinoʼi te ʼu tagata ʼaia ke tokoni ki te gāue ʼa te kau Levite.—Esitalasi 8:20.
68:30—Koteā te faka ʼuhiga ʼo te kole ʼaē ke “tautea te manu fekai ʼo te ʼu kaho”? ʼI tana fakatātā te ʼu fili ʼo te hahaʼi ʼa Sehova ki he ʼu manu fekai, neʼe kole e Tavite ki te ʼAtua ke ina tautea ia nātou, peʼe ke ina fakavaivaiʼi tonatou mālohi ʼaē moʼo fakamamahiʼi.
69:23—Koteā te faka ʼuhiga ʼo te ʼui ʼaē ke ‘ina faka lūmaʼea te ʼu hui ʼalaga ʼo te ʼu fili’? Ko te ʼu ua ʼi te ʼu faʼahi ʼo te hui ʼalaga ʼe maʼuhiga ki te ʼu gāue kinakina, ohage ko te hiki pea mo te ʼamo ʼo he ʼu meʼa mamafa. Ko he ʼu hui ʼalaga ʼaē ʼe lūmaʼea, ʼe faka ʼuhiga ki te kua vaivai. Neʼe kole e Tavite ke toʼo te mālohi ʼo tona ʼu fili.
Te ʼu Puani ʼe Tou Lava Tāʼofi:
51:1-4, 17. Ka kita agahala ʼe mole fakamaʼua ai ke kita mamaʼo mai ia Sehova ʼAtua. Kapau ʼe tou fakahemala, ʼe tou lava falala ʼe manavaʼofa mai anai.
51:5, 7-10. Ka tou agahala, ʼe tou tagi kiā Sehova ke fakamolemole mai totatou ʼuhiga agahala. ʼE tonu foki ke tou toe faikole age ki ai ke ina fakamaʼa ia tatou, mo toe fakaloto mālohiʼi tatou, mo tokoni mai ki te pulihi ʼi totatou loto ia te ʼu ʼuhiga agahala, pea mo foaki mai he laumālie fīmālie.
51:18. Ko te ʼu agahala ʼa Tavite neʼe fua kovi ki te maʼuli ʼo te fenua kātoa. Koia neʼe ina kole ai ki te ʼAtua ke finegaloʼofa ki Sione. Ka tou fai he agahala mamafa, ʼe tau ʼulihi te huafa ʼo Sehova pea mo te kokelekasio. ʼE tonu ke tou faikole ki te ʼAtua ke ina fakatokatoka te kovi ʼaē neʼe tupu ʼuhi ko tatou.
52:8. ʼE feala ke tou “hage ko he fuʼu oliveto matalelei ʼi te ʼapi ʼo te ʼAtua”—ʼo ōvi kiā Sehova pea mo lagolago mālohi ki tana gāue—ʼo tou talagafua kiā ia pea mo tali lelei tana akonaki.—Hepeleo 12:5, 6.
55:4, 5, 12-14, 16-18. Neʼe lotomamahi ʼaupito ia Tavite ʼi te agatuʼu ʼo tona foha totonu ko Apisalone pea mo te lītuʼa ki ai ʼo Ahitofele, tana tagata fai tokoni ʼaē neʼe falala ki ai. Kae neʼe mole tupu ai he vaivai ʼo te falala ʼa Tavite kiā Sehova. ʼE mole tonu ke tou faka fealagia ki he ʼu lotomamahi ke nātou fakavaivaiʼi tatatou falala ki te ʼAtua.
55:22. E feafeaʼi tatatou lī tatatou kavega kiā Sehova? ʼE tou fai fēnei: (1) ʼo tou fakahā age ki ai ʼi te faikole ia te meʼa ʼaē ʼe tou hoha ai, (2) ʼo tou falala ki te takitaki pea mo te lagolago ʼa tana Folafola pea mo tana kautahi, pea mo (3) tou fai te meʼa ʼaē ʼe tou fealagia moʼo fakamaʼamaʼa te ʼaluʼaga ʼaia.—Tāʼaga Lea 3:5, 6; 11:14; 15:22; Filipe 4:6, 7.
56:8. ʼE mole mahino pe ia Sehova ki te ʼaluʼaga ʼaē ʼe tau mo tatou, kae ʼe toe mahino pe foki ki tona malave ki totatou loto.
62:11. ʼE mole ʼaoga ia ki te ʼAtua ia he mālohi mai tuʼa. Ko ia totonu te matapuna ʼo te mālohi. ‘Ko te mālohi ʼe ʼa ʼana ia.’
63:3. Ko “te lotoʼofa [ʼo te ʼAtua] ʼe lelei age ia ʼi te maʼuli,” koteʼuhi kapau ʼe mole maʼu te kalitātē ʼaia, pea mole ʼi ai he ʼuhiga ʼo te maʼuli. Koia ʼe ko he aga fakapotopoto hatatou fakakaumeʼa mo Sehova.
63:6. Ko te ʼala pōʼuli ʼe ko he temi lelei ʼaia ki te metitāsio —mokā ʼe mole logoaʼa pea mokā ʼe mole ʼi ai he meʼa ʼe ina fakaleluʼi kita.
64:2-4. Ko he fai fatufatu ʼe feala ke ina maumauʼi he matagafua ʼo he tahi neʼe mole ina fai he meʼa ʼe kovi. ʼAua naʼa tou fakalogo ki te taʼi fai fatufatu ʼaia peʼe tou kau ki tona fakamatala.
69:4. Moʼo taupau ia te tokalelei, ʼe lagi lelei anai ʼi ʼihi temi ke tou “toe maliu mai” ʼo fai fakalelei, tatau aipe peʼe hage kiā tatou ʼe mole tou hala.
70:1-5. Ko Sehova ʼe logo ki tatatou ʼu tagi ke foimo tokoni mai. (1 Tesalonika 5:17; Sakopo 1:13; 2 Petelo 2:9) ʼE lagi tuku anai e Sehova ke hoholo atu ia he ʼahiʼahi, kae ʼe ina foaki mai anai ia te agapoto ke tou maʼu he puleʼaki ʼo ʼuhiga mo te ʼaluʼaga ʼaia pea mo te mālohi moʼona kātakiʼi. ʼE mole ina tuku anai ke ʼahiʼahiʼi ia tatou ʼo fakalaka ʼi te ʼu meʼa ʼaē ʼe tou lavaʼi.—1 Kolonito 10:13; Hepeleo 10:36; Sakopo 1:5-8.
71:5, 17. Neʼe fakatuputupu e Tavite ia te faʼafai pea mo te mālohi he neʼe falala kiā Sehova ʼi tona temi tūpulaga—ʼi muʼa atu la ia kae heʼeki ina tauʼi ia te tagata Filisitini lahi ko Koliate. (1 Samuele 17:34-37) ʼE lelei ke falala ia te kau tūpulaga kiā Sehova ʼi te ʼu gāue fuli ʼe nātou fai.
“KE FAKAFONU E TONA KOLŌLIA IA TE KELE KĀTOA”
Ko te hiva fakaʼosi ʼo te lua koga ʼo te ʼu pesalemo, ia te Pesalemo 72, ʼe fakamatala ai te temi pule ʼo Salomone, ko he fakakikite ʼaia ʼo te ʼu ʼaluʼaga ʼaē ka hoko anai ʼi te ʼafio ʼo te Mesia. ʼE ko he ʼu tapuakina fakaofoofo ʼaē ʼe fakamatala ʼi henī—kua lahi te tokalelei, kua pulihi ia te maʼuli taʼomia pea mo te agamālohi, kua mahu te meʼa kai ʼi te kele! ʼE tou kau anai koa iā nātou ʼaē ka nātou maʼu ia te ʼu tapuakina ʼaia pea mo ʼihi tapuakina mai te Puleʼaga? ʼE tou lava kau kiā nātou ʼaia, mo kapau ohage ko te tagata fai pesalemo ʼe tou fiafia ʼi te fakatalitali kiā Sehova, ʼo tou fakaʼaogaʼi ia Sehova ko totatou holaʼaga pea mo totatou mālohiʼaga.
“Kua fakaʼosi te ʼu faikole ʼa Tavite” ʼaki te ʼu palalau ʼaenī: “Ke vikiʼi ia Sehova ʼAtua, te ʼAtua ʼo Iselaele, heʼe ko ia tokotahi pe ʼe ina fai te ʼu gāue fakaofoofo. Pea ke vikiʼi tona huafa fakakolōlia ʼo talu ai, pea ke fakafonu e tona kolōlia ia te kele kātoa. Ameni pea mo Ameni.” (Pesalemo 72:18-20) ʼOfa pe ke tou fakavikiviki mo totatou loto kātoa ia Sehova pea mo vikiʼi tona huafa faka kolōlia.
[Paki ʼo te pasina 29]
ʼE koutou ʼiloʼi koa peʼe ko ai ʼaē ʼe fakatātā ki “te ʼofafine ʼo te hau”?
[Paki ʼo te pasina 30]
ʼE fakahigoaʼi ia Selusalemi “ko te kātoa ʼo te taulekaleka.” ʼE koutou ʼiloʼi pe koʼe ʼe fakahigoaʼi feiā?