Juli

Iusih Jesus Bapakna alu sempurna. Emaka banci sipelajari uga cara rukur ras perasan Bapakna arah kai si ikataken Jesus ras si ilakokenna, termasuk arah kerina mukjizatna. (Joh. 14:9) Kai si banci sipelajari arah piga-piga mukjizat si iban Jesus? Keleng kel ate Jesus ras Bapakna man banta. Perban lit kekelengen bas Jesus, ibanna mukjizat guna nampati kalak si sangana susah. Bas sada paksa, lit dua kalak si pentang mindo penampat man Jesus. (Mat. 20:​30-34) Perban “mekuah ate” Jesus, ipepalemna kalak e. Bas ayat e, kata Junani si iterjemahken “mekuah ate” ncidahken maka banci gejapken Jesus uga suina akap kalak e. Banci bage perasan Jesus perban keleng atena kalak e. Perasan e pe ngiahken ia mere pangan man kalak si melihe ras mpepalem kalak si sakit kusta. (Mat. 15:32; Mrk. 1:41) Payo, tek kita maka Jahwe Dibata si “perkuah” ras anakNa tuhu-tuhu engkelengi kita janah gejapkenna kesusahenta. (Luk. 1:78; 1 Pet. 5:7) Jahwe ras Jesus pasti lanai sabar ndungi kerina masalah si lit bas doni enda! w23.04 3 par. 4-5

Bas doni Setan enda, melala kel perukuren si la sesuai ras Pustaka. Gelah la kita terpengaruh, ula sibaca ras sibegiken kerna si e. Tapi nggit kita mbaca ras ngukuri isi Pustaka gelah perukurenta sesuai ras sura-sura Dibata. Gelah la terpengaruh perukuren doni enda, banci ka kita ratur pulung ras erberita. Adi silakoken si e, erjanji Jahwe maka labo pediatNa kita ngadapi godan lebihen asangken gegehta. (1 Kor. 10:​12, 13) Kerina kita perlu terus ertoto man Jahwe gelah banci tetap setia bas wari-wari pendungi si susah enda. Ate Jahwe ‘situriken min isi pusuhta man baNa’ arah toto. (Ms. 62:8) Pujilah Jahwe janah kataken bujur nandangi kerina si enggo lakokenNa. Pindolah penampatNa gelah pang kam erberita. Pindolah gelah sampatiNa kam ngadapi masalah ras nulak godan. Ula pediat kai pe ras ise pe si erban kam lanai ertoto alu ratur. w23.05 7 par. 17-18

Engkai maka reh kita ku perpulungen? Si utamana eme guna muji Jahwe. (Ms. 26:12; 111:1) Selain si e, sipegegehi ateta sada ras si debanna bas masa si sulit enda. (1 Tes. 5:11) Sanga siangkat tanta ras sibereken komentarta, enggo silakoken si e duana. Tapi sanga mere komentar ateta, banci saja mbiar kita mere komentar, ntah rusur ateta mere komentar tapi la kita rusur itunjuk bagi siarapken. Uga carata ngadapi situasi e? Ikataken rasul Paulus maka arus ‘sipegegehi sada ras si debanna.’ Adi situriken kinitekenta arah komentarta amin pe sederhana, si e banci mpegegehi kiniteken turang seninata. Adi siinget kerna si e, la kita mbiarsa mereken komentar. Janah, amin pe la rusur kita itunjuk, banci tetap meriah ukurta perban lit kesempaten man turang senina si deban guna mere komentar.—1 Pet. 3:8. w23.04 20 par. 1-3

Enggo iban raja sada pengumumen. Kalak Jahudi si enggo itaban i Babilon kira-kira 70 tahun dekahna, banci mulih ku kutana, Israel. (Esa. 1:​2-4) Jahwe ngenca si banci erban si e terjadi, perban biasana Babilon la pernah mbebasken kalak si itabanna. (Jes. 14:​4, 17) Tapi paksa si e, Babilon enggo italuken janah ikataken penguasa si mbaru maka kalak Jahudi banci lawes. Emaka tiap kalak Jahudi, khususna kepala keluarga, arus erban keputusen eme: nadingken Babilon ntah tetap tading i je. Banci saja labo nukah erban keputusen e. Enterem kalak Jahudi si enggo metua banci saja la ngasup ngelakoken perdalanen e. Enterem arah kalak Jahudi pe lahir bas Babilon. Kalak e la pernah tading bas ingan si deban. Menurut kalak e, Israel eme kuta nini bulangna. Selain si e, piga-piga kalak Jahudi enggo jadi kalak bayak bas Babilon. Enggo nyaman rumahna i je janah lit ka bisnisna. Emaka, mesera kap kalak e nadingken si e janah pindah ku ingan si la itandaina. w23.05 14 par. 1-2

Iahken Kata Dibata kita guna terus mpebelin sipat megenggeng, perkuah, ras kekelengen. Lukas 21:19 ngataken, “Adi megenggeng kena pasti kena tetap nggeluh.” Kolose 3:12 ngataken, “Pakelah . . . kekelengen.” Selain si e, 1 Tesalonika 4:​9, 10 ngataken, “Enggo ajari Dibata kena engkelengi sada ras si debanna. . . . Tapi pindoken kami, teruslah lakoken kena e janah reh tutusna bas ndalankenca.” Kerina ayat-ayat e itulis man murid-murid Jesus si enggo ncidahken sipat megenggeng, perkuah, ras kekelengen. Tapi arus terus pebelin kalak e sipat-sipat e. Kita pe arus bage. Guna nampati kam, perdiateken uga kalak Kristen bas abad pertama ncidahken sipat-sipat e. Kenca si e, perdiateken ka uga kam banci ngusih kalak e, janah buktiken maka kam enggo ersikap ngadapi kiniseran si mbelin. Si e kerina banci pagi nampati kam sanga terjadi kiniseran si mbelin. Paksa si e pagi pasti ertekad kam guna terus megenggeng. w23.07 3 par. 4, 8

La soal kita ipilih ku surga ntah pe ‘biri-biri si deban,’ perlu kita tetap erdalan bas “Dalan si Badia.” Perban e banci nampati kita terus nembah Jahwe gundari bage pe pagi sanga bereken Kerajan Dibata pasu-pasu si luar biasa bas doni enda. (Joh. 10:16) Mulai tahun 1919, jutan dilaki, diberu, ras anak-anak enggo nadingken Babilon si Mbelin eme agama palsu sebelang doni, janah mulai kalak e erdalan bas dalan e. Mbarenda, agui Jahwe kerina si banci ngambati kalak Jahudi ndarat arah Babilon. (Jes. 57:14) Uga kerna “Dalan si Badia” bas jaman gundari? Ratusen tahun sope tahun 1919, enggo igunaken Jahwe kalak si ngergai gelarNa mbersihken dalan guna ndarat arah Babilon si Mbelin. (Bandingken Jesaya 40:3.) Pendahin si ilakoken kalak e erban kalak si bujur banci ndarat arah Babilon si Mbelin janah nembah Jahwe radu ras umatNa. w23.05 15-16 par. 8-9

Ate Jahwe meriah min ukurta ngelayani Ia janah arah pusuhta nari. (2 Kor. 9:7) Emaka, adi la lit sura-surata ndatken cita-citata, perlu nge tetap siusahaken ndatkenca? Ue, perlu. Cuba ukuri usihen arah Rasul Paulus. Bagenda nina, “Kupekpeki dagingku, kujadiken bagi budak.” (1 Kor. 9:​25-27) Ipaksa Paulus dirina ngelakoken peraten Jahwe amin pe la lit sura-surana ngelakokenca. Meriah nge ukur Jahwe ngidah kai si ilakoken Paulus e? Ue, pasti. Ipasu-pasuNa ka usaha Paulus e. (2 Tim. 4:​7, 8) Bage ka pe, meriah ukur Jahwe sanga siusahaken ndatken cita-citata amin pe sangana la lit sura-surata guna ndatkenca. Engkai? Perban itehNa maka amin pe labo lalap meriah siakap ngelakoken kegiaten e, tehNa maka silakoken e perban keleng ateta Ia. Bali bagi Jahwe enggo masu-masu Paulus, pasti pasu-pasuNa ka kita. (Ms. 126:5) Sanga sigejapken pasu-pasu Jahwe, banci saja mulai teriahken kita ndatken cita-citata. w23.05 29 par. 9-10

Ipeseri Rasul Paulus kalak si la selamat ngelewati wari Jahwe bagi kalak si sangana medem. Amin pe mbue si terjadi i sekeliling kalak e janah waktu terus erdalan, tapi la isadari kalak e. La teh kalak e sanga terjadi kejadin si penting janah la lakoken kalak e kai pe. Payo, buen kalak si gundari medem secara rohani. (Rom. 11:8) La kalak e ermediate amin pe mbue bukti si ncidahken maka kita nggeluh bas “wari-wari pendungi” janah kiniseran si mbelin enggo nandangi reh. (2 Pet. 3:​3, 4) Kita la bagi kalak e, siteh maka arah wari ku wari, reh deherna me wari Jahwe e. Emaka reh pentingna man banta guna tetap sadar secara rohani. (1 Tes. 5:6) Arus kita tetap tenang janah rukur alu mehuli. Engkai? Perban adi banci kita rukur alu mehuli, la kita terlibat bas masalah politik ras sosial si lit gundari. Erkiteken wari Jahwe enggo ndeher, reh belinna tekanen guna terlibat bas masalah-masalah si bage. Tapi la perlu kita mbiar. Kesah si badia Dibata banci nampati kita gelah tetap tenang janah rukur alu mehuli. Alu bage, banci siban keputusen si pentar.—Luk. 12:​11, 12. w23.06 10 par. 6-7

Kai nge si ingetndu sanga begindu gelar Simson? Banci saja ingetndu kalak si seh kel gegehna. Si e memang payo. Tapi, pernah iban Simson keputusen si la mehuli si erban susah kel akapna. Amin pe bage, si iperdiateken Jahwe eme kesetian Simson janah ipastikenNa gelah usihenna icatat bas Pustaka guna kita. Ipake Jahwe Simson guna ngelakoken perbahanen si luar biasa bas nampati Israel, bangsa pilihen Jahwe. Ratusen tahun kenca Simson mate, itegu-tegu Jahwe Rasul Paulus alu kesah si badia guna nulisken gelar Simson bas daftar kalak si mbelin kel kinitekenna. (Heb. 11:​32-34) Usihen arah Simson banci mpegegehi kita. Iandalkenna Jahwe, terlebih bas situasi si mesera. Adi erlajar kita arah Simson ras arah usihenna, e banci mpegegehi kita. w23.09 2 par. 1-2

Banci sipebelin sipat megenggeng adi ratur kita ertoto man Jahwe ras situriken kerina masalahta man baNa. (1 Tes. 5:17) Banci saja labo mberat masalah si sangana adapindu. Amin pe bage, daramindu nge petunjuk Jahwe sanga latih ukurndu, bingung kam, ntah pe latihsa kapndu? Adi mulai gundari nari ratur kam ertoto mindo penampat man Dibata amin pe masalahndu la mberat, lanai kam ragu mindo penampat sanga adapindu masalah si terbelinen bas wari si pepagi. Paksa si e pagi, tek me kam maka teh Jahwe ndigan ras uga cara si mehulina nampati kam. (Ms. 27:​1, 3) Adi mulai gundari nari megenggeng kita ngadapi kesusahen, mbelin kemungkinenna banci kita megenggeng bas kiniseran si mbelin. (Rom. 5:3) Enterem turang senina si enggo mbuktiken maka adi megenggeng kalak e ngadapi sada masalah, si e banci nampati kalak e megenggeng ngadapi masalah si nandangi reh. Engkai? Perban tiap megenggeng kalak e, reh tekna ia maka merhat Jahwe nampati kalak e.—Jak. 1:​2-4. w23.07 3 par. 7-8

Perban Jahwe meteruk ukur ras perkuah, e erban Ia masuk akal. SipatNa si meteruk ukur teridah sanga kernepkenNa ateNa kalak jahat i Sodom. Arah malekat-malekatNa, iperentahken Jahwe gelah kiam Lut ku pegunungen. Tapi mbiar Lut ku je. Ipindona man Jahwe gelah ia ras keluargana banci kiam ku Soar, sada kota si kitik si nandangi ikernepken Jahwe. Situhuna, banci nge ipaksa Jahwe Lut ndalanken perentahNa. Tapi, ibegikenNa pemindon Lut e janah la kernepkenNa kota e. (Kej. 19:​18-22) Puluhen tahun kenca si e, iutus Jahwe Nabi Juna guna ngumumken pengkernepen kota Niniwe ras kalak jahat si lit i je. Tapi sanga robah kalak Niniwe, mekuah ate Jahwe janah la surung kernepkenNa kota e.—Jun. 3:​1, 10; 4:​10, 11. w23.07 21 par. 5

Kai si banci sipelajari kerna contoh si la mehuli arah Joas? Ia bali bagi batang kayu si la megegeh uratna janah arus itongket. Kenca mate Joyada, tempa-tempa lanai lit si nongket ntah pe si ndukung ia. Emaka sanga lit pengaruh arah kalak si murtad si bali bagi angin si meter, ndabuh me Joas. Arah je nari, banci sidat pelajaren maka perasan mbiar man Dibata la banci bergantung man turang seninata, termasuk man keluargata. Gelah banci tetap paguh hubungenta ras Jahwe, arus siusahaken mpebelin kekelengenta ras pengerganta man Jahwe. Guna ngelakoken si e, arus ratur kita mbaca Pustaka, ngukurisa, ras ertoto. (Jer. 17:​7, 8; Kol. 2:​6, 7) Situhuna labo mbue si ipindo Jahwe arah kita. PemindonNa banci isimpulken arah kata-kata bas Pengerana 12:​13, si ngataken, “Mbiarlah man Dibata si benar janah patuhilah perentah-perentahNa, sebap e me tanggung jawap kerina manusia.” Adi mbiar kita man Dibata, pasti ngasup kita ngadapi ujin bas wari si pepagi janah tetap setia. La lit si banci ncedai pertemanenta ras Jahwe. w23.06 18-19 par. 17-19

Jaminen si lit bas ayat 5 istimewa kel perban bas buku Ketangkasen, Jahwe ngerana bas telu kejadin ngenca, janah enda me salah sadana. Perdiateken maka jaminen e imulai alu kata-kata, “Ngerana Ia si kundul bas tahta e.” (Ket. 21:5a) Emaka, si mereken jaminen e, labo malekat si megegeh, labo ka Jesus si enggo ipekeke, tapi Jahwe. Janah ingetlah, Jahwe “la banci erbual.” (Tit. 1:2) E ertina kai si ikatakenNa seterusna bas Ketangkasen 21:​5, 6 tuhu-tuhu terteki. Kenca si e, nina Jahwe, “Nenlah!” Kata Junani si iterjemahken jadi “nenlah,” rusur iulihi bas buku Ketangkasen. Kai kin si ikataken Dibata seterusna? Nina, “Kuban kerina jadi mbaru.” Memang, perubahen si ijanjiken Jahwe e terjadi pagi bas masa depan. Tapi tehNa maka janji e pasti terjadi. Emaka ngerana Ia tempa-tempa janji e enggo terjadi.—Jes. 46:10. w23.11 3-4 par. 7-8

Rasul Petrus terus erjuang ngadapi mbue denga kelemahenna. Contohna, sanga begina kata-kata Jesus maka isiksa pagi Jesus janah mate sesuai ras nubuat Pustaka, ikataken Petrus maka si e labo pagi terjadi. (Mrk. 8:​31-33) Petrus ras rasul-rasul si deban pe rusur erdebat kerna ise si mbelinna. (Mrk. 9:​33, 34) Bas berngi sope Jesus mate, retap iban Petrus cuping sekalak dilaki. (Joh. 18:10) Bas berngi e ka, lit telu kali ipersokenna Jesus perban mbiar ia man jelma. (Mrk. 14:​66-72) Si e erban tangis kel Petrus. Labo itadingken Jesus rasulna si sangana kitik ukur e. Kenca Jesus ipekeke, iberekenna kesempaten man Petrus guna mbuktiken kekelengenna man Jesus. Pindokenna man Petrus guna mpermakani biri-birina alu meteruk ukur. (Joh. 21:​15-17) Nggit Petrus ngelakoken si e. Sanga wari Pentakosta, Petrus sangana i Jerusalem radu ras kalak si tangtangna ilantik kesah si badia. w23.09 22 par. 6-7

Iahken Rasul Petrus pertua-pertua, nina, “Permakanilah rarasen biri-biri Dibata.” (1 Pet. 5:​1-4) Kam pertua-pertua, teh kami maka keleng atendu turang senina janah merhat kam mpermakani kalak e. Tapi, mon-mon banci saja sibuksa kapndu kam ntah pe latihsa kapndu, emaka la banci lakokenndu tugas e. Kai si banci nampati kam? Turikenlah kekuatirenndu man Jahwe. Bagenda itulis Petrus, “Adi lit si ngelayani, andalkennalah gegeh si bereken Dibata.” (1 Pet. 4:11) Banci saja adapi turang seninandu masalah si la banci tuhu-tuhu idungi gundari. Banci saja, la kapndu banci mbue si lakokenndu guna nampati kalak e. Tapi ingetlah maka Jesus Kristus, “kepala permakan,” banci nampati kalak e gundari ras bas doni si mbaru pagi. Si ipindo Dibata man pertua-pertua eme engkelengi turang seninana, mpermakani kalak e, ras jadi “usihen man rarasen.” w23.09 29-30 par. 13-14

Arus situlak perukuren jelma. Adi siikutken perukuren jelma, e banci erban kita lanai patuh man undang-undang Jahwe ras patokenNa. (1 Kor. 3:19) Biasana, “kepentaren doni enda” erban kalak ngikutken sura-sura si salah. Piga-piga kalak Kristen bas Pergamon ras Tiatira enggo ipengaruhi perukuren kalak si lit i sekelilingna, si la bersih lagu langkahna ras nembah berhala. Ipersingeti Jesus duana runggun e alu tegas perban la segat ate kalak e perbahanen seks si salah. (Ket. 2:​14, 20) Gundari pe kalak si lit i sekelilingta rusaha mpengaruhi perukurenta gelah sialoken perukuren si salah. Banci saja ikataken keluargata ras teman-temanta maka kita kakusa janah labo perlu kerina sipatuhi undang-undang Jahwe. Contohna, banci saja ikataken kalak e, ‘Adi e kin sura-surandu, lakoken saja,’ ntah, ‘Patoken Pustaka enggo ketadingen jaman.’ Mon-mon, banci saja lenga siakap bias petunjuk si bere Jahwe man banta. Banci saja tergoda kita erban kai si “lebihen asangken si tertulis.”—1 Kor. 4:6. w23.07 16 par. 10-11

Maria, mamak Jesus, lenga erjabu. Tapi, ikataken man bana maka ia nandangi hamil. Lenga pernah ipebelinna anak, tapi arus ipebelinna sekalak anak dilaki si nandangi jadi Mesias. Selain si e, uga nge nina njelasken kerina e man tunangenna, Jusup? Pasti kuatir kel Maria janah perlu ia gegeh arah Jahwe. (Luk. 1:​26-33) Uga Maria ndatken gegeh? Daramina penampat arah kalak si deban. Contohna, pindona gelah bereken Gabriel terbuen informasi kerna tugasna. (Luk. 1:34) La ndekah kenca si e, lawes ia ku “daerah pegunungen” si lit i Juda guna ndahi kade-kadena Elisabet. Ipuji Elisabet Maria janah alu penegu-negu Jahwe, ipesehna sada nubuat si mpegegehi kerna bayi si lit bas beltek Maria. (Luk. 1:​39-45) Ikataken Maria maka enggo ‘cidahken Jahwe kuasaNa alu tanNa.’ (Luk. 1:​46-51) Ipegegehi Jahwe Maria arah Gabriel ras Elisabet. w23.10 14-15 par. 10-12

I antara murid-murid Kristus, lit 144.000 kalak si ipilih ku surga janah banci gejapken kalak e hubungen si istimewa ras Jahwe. Ngelayani pagi kalak e selaku imam-imam i surga radu ras Jesus. (Ket. 14:1) Ingan si Badia arah kemah ingan ersembah nggambarken keadan kalak Kristen si ipilih ku surga si enggo iangkat Dibata jadi anakNa sanga kalak e i doni denga. (Rom. 8:​15-17) Ingan Sibadiana arah kemah ingan ersembah nggambarken surga, eme ingan Jahwe. “Tirai” si misahken Ingan si Badia ras Ingan Sibadiana nggambarken daging Jesus. Sanga Jesus jadi jelma denga, la ia banci masuk ku surga ras ngelayani jadi Imam si Mbelin bas rumah pertoton rohani. Alu mereken dagingna si sempurna jadi korban persembahen man kerina jelma, ibuka Jesus me dalan guna nggeluh i surga man kerina kalak Kristen si ipilih ku surga. Kalak e pe arus nadingken dagingna guna ngaloken upahna i surga.—Heb. 10:​19, 20; 1 Kor. 15:50. w23.10 28 par. 13

Gideon tetap tenang sanga ipandangi kalak Eperaim ia. (Hak. 8:​1-3) La ia merawa man kalak e. Teridah ia meteruk ukur perban nggit ia megiken kalak e jungut-jungut janah mehuli rananna man kalak e. Emaka, kalak Eperaim e pe reh tenangna. Bali bagi Gideon, pertua-pertua si pentar pe perlu begikenna sanga ia ipandangi janah aloina min alu lembut. (Jak. 3:13) Alu bage, banci ijaga kalak e perdamen bas runggun. Sanga Gideon ipuji perban berhasil ia naluken kalak Midian, berekenna pujin e man Jahwe. (Hak. 8:​22, 23) Uga pertua-pertua banci ngusih Gideon? Banci ikataken kalak e maka Jahwe me si erban kalak e berhasil. (1 Kor. 4:​6, 7) Contohna, adi ipuji turang senina sekalak pertua perban beluh ia ngajar, banci katakenna maka banci bage ibanna perban pelatihen arah organisasi Jahwe. Ntah banci katakenna maka si e terjadi perban sumber pengajarenna eme Kata Dibata. Perlu ukuri pertua-pertua carana ngajar gelah ula ia si ipuji kalak. w23.06 4 par. 7-8

Adi lenga lalap ijawap totota, banci siukuri penungkunen enda, ‘Enggo nge benar si kutotoken e?’ Biasana, siakap enggo siteh kai si mehulina man banta. Tapi, banci saja pemindonta e labo ndekah erguna man banta. Sanga lit masalah, banci saja ertoto kita mindo jalan keluar si bagi ukurta. Tapi banci saja lit jalan keluar si terulin asangken si e. Selain si e, piga-piga pemindonta banci saja la sesuai ras peraten Jahwe. (1 Joh. 5:14) Contohna, cuba ukuri kerna orang tua si mindo gelah ijaga Jahwe anakna tetap bas kebenaren. Pemindon kalak e situhuna masuk akal. Tapi, labo ipaksa Jahwe ise pe guna ngelayani Ia. Ate Jahwe kerina min kita, termasuk anakta, milih guna ngelayani Ia. (Ul. 10:​12, 13; 30:​19, 20) Emaka orang tua, pangen pindondu man Jahwe gelah sampatiNa kam ngajari anakndu janah banci kena ku pusuhna. Alu bage, tersuruh ukurna engkelengi Jahwe ras jadi temanNa.—Kua. 22:6; Ep. 6:4. w23.11 21 par. 5; 23 par. 12

Menurut sada referensi Pustaka, kata “ngapuli” si igunaken Paulus ertina “cinder i deher sekalak jelma guna mpegegehi ia sanga mberat masalahna.” Emaka, sanga siapuli turang seninata paksa ia susah, tempa-tempa sisampati ia cinder mulihi ras terus erdalan bas dalan si nuju ku kegeluhen. Tiap siapuli turang seninata, sicidahken maka keleng ateta ia. (2 Kor. 7:​6, 7, 13) Mbelin kel hubungenna sipat perkuah ras mereken pengapul. Kalak si perkuah pasti teriahken ia ngapuli janah nampati kalak si sangana susah. Emaka gelah banci siapuli kalak si deban, arus lit bas kita sipat perkuah. Cuba perdiateken kai nina Paulus kerna perkuah ate Jahwe ras pengapul si iberekenNa. Ikataken Paulus maka Jahwe e “Bapak si perkuah ras lembut, bage pe Dibata sumber kerina pengapul.”—2 Kor. 1:3. w23.11 9-10 par. 8-10

Kerina pengikut Kristus memang pasti ngadapi kiniseran. Contohna, itulis Rasul Paulus man kalak Kristen i Tesalonika, ‘Sanga kami ras kena denga, enggo rusur kataken kami maka sinanami pagi kiniseran, janah e me si terjadi.’ (1 Tes. 3:4) Itulis Paulus ka man kalak Kristen i Korinti bagenda, “O turang senina, ate kami gelah teh kena kerna kiniseran si nanami kami . . . seh maka lanai akap kami lit arapen kami nggeluh.” (2 Kor. 1:8; 11:​23-27) Kalak Kristen bas jaman si gundari pe pasti ngenanami kesusahen. (2 Tim. 3:12) Perban erkiniteken man Jesus janah jadi pengikutna, banci saja kasar perbahanen teman ntah pe keluargandu man bandu. Ntah, lit nge masalahndu bas ingan erdahin perban jujur kam bas kai pe? (Heb. 13:18) Lit nge masalah si adapindu arah pemerentah perban nceritaken arapenndu man kalak si deban? La soal kesusahen kai pe si sangana adapindu, ikataken Paulus maka banci kita ermeriah ukur. w23.12 10-11 par. 9-10

Melala kesusahen si adapi Jakup. Dua anak Jakup eme Simeon ras Lewi ngelakoken kesalahen si mbelin si ncedai gelar keluargana ras gelar Jahwe. Selain si e, diberu Jakup si keleng kel atena eme Rahel, mate sanga ngelahirken anak si peduaken. Perban lit kelihen si mekelek, arus pindah Jakup ku Mesir amin pe ia enggo metua. (Kej. 35:​16-19; 37:28; 45:​9-11, 28) Amin pe erbage-bage kesusahen iadapi Jakup, tetap ia tek man Jahwe ras janji-janjiNa. Emaka ibuktiken Jahwe maka jadi ateNa ngidah Jakup. Contohna, iban Jahwe melala erta Jakup. Selain si e, cuba bayangken uga perasan Jakup sanga jumpa ia mulihi ras Jusup, anakna si akapna enggo mate. Pasti ngata bujur Jakup man Jahwe. Banci Jakup megenggeng ngadapi kerina kesusahenna perban rembak ia ras Jahwe. (Kej. 30:43; 32:​9, 10; 46:​28-30) Payo, adi rembak kita ras Jahwe, kita pe banci megenggeng ngadapi erbage-bage kesusahen si la isangka-sangka. w23.04 15 par. 6-7

Masmur 23 eme lagu si itulis Daud. Bas lagu e, iturikenna maka tek kel ia keleng ate Jahwe man bana janah iperdiatekenNa ia. Ituriken Daud uga rembakna hubungenna ras Jahwe, ilebuhna Jahwe Permakanna. Aman akap Daud itegu-tegu Jahwe janah tuhu-tuhu iandalkenna Ia. Iteh Daud maka banci gejapkenna kekelengen Jahwe tiap wari bas segedang geluhna. Kai si erban Daud tek kel kerna si e? Banci bage perasan Daud perban lalap ibereken Jahwe kerina keperlunna. Daud pe rembak ras Jahwe janah tehna maka keleng ate Jahwe ia. E me sebapna kai pe pagi si terjadi, tek ia maka lalap pagi bereken Jahwe keperlunna. Kiniteken Daud man Jahwe erban ia la kuatir, meriah ukurna, janah puas akapna.—Ms. 16:11. w24.01 28-29 par. 12-13

Mulai Perang Doni II, umat Jahwe bas melala negri enggo bebas erberita janah mejile kel hasilna. Gundari, anggota Badan Pinpinen terus ndarami petunjuk arah Kristus. Ate kalak e petunjuk si iberekenna sesuai ras perukuren Dibata ras Kristus. Igunaken kalak e pertua keliling ras pertua-pertua mere petunjuk man runggun-runggun. Pertua-pertua si ipilih ku surga ras kerina pertua si debanna si lit bas runggun lit bas ‘tan kanan’ Kristus. (Ket. 2:1) Memang, pertua-pertua e la sempurna janah banna kesalahen bali bagi Musa, Josua, ras rasul-rasul bas jaman si mbarenda. (Bil. 20:12; Jos. 9:​14, 15; Rom. 3:23) Tapi, siteh maka Kristus me si mereken petunjuk man budak si setia bage pe pertua si ilantik, janah terus pagi lakokenna si e. Emaka, banci kita tek kel man petunjuk si ibereken Kristus arah kalak si ilantik guna minpin kita. w24.02 23 par. 13-14

Salah sada carata erban meriah ukur Jahwe eme alu ncakapken kerna Ia. Arah kata-katata banci teridah maka keleng ateta Ia ras ngata bujur kita man baNa. Sanga bas pelayanen, perlu siinget maka tujun utamata eme nampati kalak rembak ras Bapakta Jahwe si perkeleng janah tuhu-tuhu nandai Ia, bali bagi kita. (Jak. 4:8) Meriah ka ukurta ncidahken man kalak uga Pustaka nuriken kerna Jahwe ras sipat-sipatNa si mehuli. Contohna, kerna kekelengenNa, keadilenNa, kepentarenNa, ras kuasaNa. Banci ka sipuji Jahwe ras siban meriah ukurNa adi siusahaken ngusih Ia. Sanga silakoken e, beda kita ras kalak si lit bas doni si jahat enda. Banci saja perdiateken kalak kita perban si e janah merhat ia metehsa engkai maka kita bage. (Mat. 5:​14-16) Sanga ngerana kita ras kalak e, banci sijelasken engkai maka kita beda ras kalak si deban. Alu bage, kalak si meteruk ukur nggit nandai Dibatata. Payo, adi sipuji Jahwe alu cara-cara si ndai, siban me meriah ukurNa.—1 Tim. 2:​3, 4. w24.02 10 par. 7

Gelah jadi dilaki Kristen si dewasa, perlu pelajari kena piga-piga keterampilen si erguna. E banci nampati kena ndalanken tanggung jawap bas runggun alu mehuli. Banci ka dat kena dahin guna ncukupi keperlun kena ras keluarga kena, janah mehuli hubungen kena ras kalak si deban. Contohna, mbaca ras nulis alu mehuli. Ikataken Pustaka maka sekalak dilaki si ermeriah ukur ras berhasil eme kalak si banna waktuna tiap wari guna mbaca ras ngukuri Kata Dibata. (Ms. 1:​1-3) Alu mbaca Pustaka tiap wari, reh bagesna angkaina cara rukur Jahwe janah e nampati ia rukur alu mehuli ras tehna ndalanken Kata Dibata alu mehuli. (Kua. 1:​3, 4) Turang seninata perlu penampat arah dilaki-dilaki si beluh ngajar ras mereken nasehat arah Pustaka. Adi banci kena mbaca ras nulis alu mehuli, banci persiapken kena khotbah ras komentar si erguna janah mpegegehi kiniteken. Banci ka ban kena cataten si erguna si banci nampati kena mpegegehi kiniteken kena ras kalak si deban. w23.12 26-27 par. 9-11

Sanga mbiar kam, cuba ukuri kai pagi si ilakoken Jahwe bas masa depan sanga Setan enggo ikernepken. Bas pertemuan regional tahun 2014, lit sada adegan si ncidahken sekalak perbapan ras keluargana sangana mbahas kira-kira uga nge isi 2 Timotius 3:​1-5 adi ayat e ncakapken kerna Pardis: “Meriah kel pagi bas doni si mbaru. Kerina kalak sikeleng-kelengen, meriah kapna ngelakoken kegiaten rohani, meteh bana, meteruk ukur, nggit muji Dibata, patuh man orang tua, nggit ngata bujur, setia, keleng atena keluargana, la mekeng, lalap cakapkenna si mehuli kerna kalak si deban, ngasup nguasai diri, lembut, ngena atena si mehuli, terteki, nggit talu, pentingen kapna kalak si deban asangken dirina, keleng atena Dibata labo kesenangen, janah tutus atena nembah Dibata. Tetaplah ndeher ras kalak si bage.” Rusur nge bahasndu ras keluargandu ntah pe ras turang senina kerna kegeluhen bas doni si mbaru pagi? w24.01 6 par. 13-14

Pasti meriah kel ukurta perban ikataken bas Pustaka, “Meriah ukur Jahwe ngidah umatNa.” (Ms. 149:4) Tapi mon-mon, piga-piga arah kita pernah kitik ukurna, janah bagenda ia rukur, ‘Ngena nge ate Jahwe ngidah aku?’ Bas jaman Pustaka pe, enterem umat Jahwe si bage perasanna. (1 Sam. 1:​6-10; Jop 29:​2, 4; Ms. 51:11) I bas Pustaka, jelas ituriken maka manusia si la sempurna banci ndatken ngena ate Jahwe, ntah pe erban meriah ukurNa. Uga carana? Arus kita erkiniteken man Jesus Kristus janah iperidiken. (Joh. 3:16) Alu bage, sicidahken man jelma si enterem maka enggo ertobat kita arah dosa-dosata, janah enggo erjanji kita man Dibata guna ngelakoken peratenNa. (Perb. 2:38; 3:19) Meriah ukur Jahwe adi silakoken si e ndai kerina, gelah banci kita jadi temanNa si rembak. Adi terus silakoken si mehulina guna nepati janjita sanga mbaktiken diri man Jahwe, ngena ate Jahwe kita janah anggapNa kita temanNa si rembak.—Ms. 25:14. w24.03 26 par. 1-2

Banci siusih murid-murid bas abad pertama alu terus erberita amin pe ilarang pemerentah. Tek kita maka pasti sampati Jahwe kita gelah terus erberita. Emaka, banci kita ertoto mindo sipat perpang ras kepentaren. Sipindolah penampat man Jahwe sanga ngadapi masalah. Enterem arah kita si arus ngadapi erbage-bage masalah, bagi penakit, masalah mental, mate kalak si keleng ateta, masalah keluarga, ras si debanna. Selain si e, perban pandemi ras perang, reh serana siakap ngadapi masalah e ndai. Kai si banci silakoken? Siturikenlah isi pusuhta man Jahwe. Siceritaken uga situasita man baNa bali bagi sanga kita cerita man teman kompakta. Teklah kita pasti ‘ertindak pagi Jahwe guna kita.’ (Ms. 37:​3, 5) Banci kita ‘megenggeng ngadapi kiniseran’ adi terus kita ertoto. (Rom. 12:12) Iteh Jahwe kai si iadapi umatNa janah “begikenNa sora kalak e mindo penampat.”—Ms. 145:​18, 19. w23.05 5-6 par. 12-15

Sanga siban ateta keputusen si penting, perlu sidarami “kai peraten Jahwe.” Kenca si e, siban keputusen si sesuai ras peratenNa e. (Ep. 5:17) Adi sidarami prinsip-prinsip Pustaka si cocok ras situasita, situhuna sanga sidarami uga kin perukuren Dibata kerna si e. Adi siikutken prinsip-prinsipNa, siban me keputusen si mehuli. Musuhta Setan eme “si jahat,” ibanna atena kita seh kel sibukna ngayaki kai si lit bas doni enda, si erban lanai lit waktuta ngelayani Dibata. (1 Joh. 5:19) Banci saja lit kalak Kristen si nukah kel tergoda ngayaki sen, pendidiken, ntah pe pendahin si erban ia la ndatken melala kesempaten guna ngelayani Jahwe. Adi e si terjadi, situhuna ia enggo terpengaruh perukuren doni enda. Memang kerina e labo salah. Tapi, ula min e jadi si pentingna bas geluhta. w24.03 24 par. 16-17