Sedü-hati

Arufuda lumuti meha dandu le lariñagubei Hesusu kei le ladügübei, íbini dan le ladügün milaguru, ábanmeme lan ligaburi lisaminan luma Lúguchi ani ábanmeme lan giñe ligaburi hasandiragun houngua (Huan 14:9). Ka larufudahabei milaguru burí ligía woun? Weiri lan wínsiñe dandu lun Hesusu kei lun Lúguchi. Arufuda lumuti meha Hesusu línsiñehabu lau layusuruni lubafu lun lawalidaguagüdüniña gürigia lídangiñe hasufurirun. Aban weyu, aba meha hagúarahan bián marihintiña lárigi amuriaha luma lun líderaguniña (Mat. 20:30-34). Ariñagati abahüdaguni “aba [lan] hagudemedagun lun Hesusu” ani aba lan ladügün lun harihin. Dimurei güriegu le ásügürawagüdübei ya kei “aba hagudemedagun lun”, yúsuati lun layanuhóun luagu aban óunwenbu igarigu le asandirúbei tidan anigi lau larihíniwa hasufurirun amu. Lanarime giñe gudemehabu ligía, le ñǘbuinbei lídangiñe ínsiñehabuni, ínchahabalin Hesusu lun meha líchugun heigin ha lamabaña luma lun lareidaguagüdün aban gürigia le meha gawagubei lépüra (Mat. 15:32; Mar. 1:41). Ligía chouru wabalin aban lan Bungiu le gudemehabuti Heowá, weiri lan wínsiñe lun Liráü ani gáriti houn biángubei hagía harihiniwa asufurira (Luk. 1:78; 1 Fe. 5:7). Busentiña tídangiñe sun hanigi lun hagumuchun lau turobuli burí le úmabei hagagibudagua gürigia. w23.04 páh. 3 pár. 4, 5

Mosu wadügüni sun wayaraati lun wadisedun luéi saminaü wuribati le kamanibei lidan ubóu le lábugiñebei lubafu Satanási. Lun wóunigiruni wasaminan luma lun wabuinchagüdüni lau saminaü buiti, mosu waliihanu luma waturiahanu Bíbülia, woudin adamuridagua, ñüdün wagíame apurichiha. Füramaseti Heowá woun mígirunbei lan lun wóuchawagun lóugiñe le wayaraabei awanda (1 Ko. 10:12, 13). Lun úaragua wamá lun Heowá lidan lagumuhóun dan hénrenguti le, mosu wéiritima lan wafurieidun lun uguñe weyu sügǘ lau lidan amu dan. Busenti Heowá lun wafurieidun lun lau sun wemenigin (Sal. 62:8). Alawaha huméi Heowá ani ru humá seremei lun luagu sun le ladügübei. Amuriaha humá ganigi luma lun hapurichihan luma lun líchugun erei hun lun hagagibudagun luma turobuli luma lun mábürühan humá lidoun óuchawaguni le ñǘbuinti. Mígira humá lun ñein lan somu katei le eberesehatün luéi hafurieidun lun Heowá. w23.05 páh. 7 pár. 17, 18

Ka uagu woudin adamuridagua? Ladügatima busén wamá walawahani Heowá (Sal. 26:12; 111:1). Ídehati giñe lun wíchugun gurasu wámagua lidan dan hénrenguti le (1 Tesa. 5:11). Ibiha wamuti biángubei katei le dan le wíchugun óunabagülei lidan burí adamuridaguni. Le turobulibei, anihein lan dan hénrengu lan woun ladüga weiri lan wanufude darí lun mabusenrun wamá wiñuruni wáhabu o wéiriya lan wabusenrun wíchugun óunabagülei ani díseguati lichugún chansi ligía woun. Ka gayaraabei líderaguniwa agagibudagua luma sügǘ burí le? Ariñaga lumuti meha apostolu Pábulu kaba lan un wetenira, ariñagati: “Ru wamá gurasu houn wíbirigu”. Anhein gabaroun wamá gayara lan wíchugun gurasu houn amu íbini lau wíchugun aban liraüraü óunabagülei le arufudubalin wafiñen, manarimebei wanufudedun wiñuruni wáhabu. Anhein siñá lubéi wíchuguni sun óunabagülei le hamuga wabusenrubei wíchugun, gúndaabadiwa lau warihin gachansin hamá amu lun hadügüni (1 Fe. 3:8). w23.04 páh. 20 pár. 1-3

Léibaaguña meha ñunsu luagu gayaraahali lan hagiribudun huríu hageiroun lárigiñe 70 irumu hau adaürǘwa Babilónia! (Ésüd. 1:2-4). Heowarügüñein meha gayara ladügün lun lasuseredun aban katei ítarati, lugundun, méchuntiña meha babilóniana ígiragüdaña gürigia ha hadaürübaña (Isa. 14:4, 17). Keiti ábürügüdüwaali lan meha Babilónia, ruti iseri urúei gumadi lun hígirawagüdün huríu lun gayara lan hagiribudun hageiroun. Mosu meha harihini sun huríu, hátima hachügüdina iduheñu, kaba lan hadüga: háfuridun Babilóniagiñe o herederun ñein. Másiñati meha hénrengu lan houn lun hasubudiruni ka lan lunbei hadügüni. Añahein meha hádangiñe, derebuguhaña meha lun hadügüni wéiyaasu migifeti ani hénrenguti ligía. Kei méhati Babilónia lan hágurahoua hiibe-agei huríu, ligíarügüñein meha fulasu hasubudira ani ariha hamuti meha Ísüraeli kéirügü hageira hagüchagu. Luéigiñe amu oubaü, genegeti meha añahein lan hádangiñe ibihaaña harisidun Babilónia. Ligíati, másiñati meha hénrengubei lan houn lun hígirunu tubuidun haban o hani bísinisi lun houdin awinwanda lidan aban fulasu le ibidiñeti houn. w23.05 páh. 14 pár. 1, 2

Ínchaha tumutiwa Lererun Bungiu lun wáfaagun lúntima wawandun, warufudun gudemehabu luma ínsiñeni. Ariñagati Lúkasi 21:19: “Anhaün deregüdagumeme, hibihubei ibagari magumuchaditi”. Lariñaga Kolosana 3:12: “Abagarida humá keisi lánigu, lau gudemehabu”. Ánheinti 1 Tesalónikana 4:9, 10, ariñagati: “Arufudahaali Bungiu guánarügü hun lun hínsiñegua humá húmawagua; [ . . . ]. Lau sun lira, niduheñu, ayumuraguatiwa hun lúntima laganwoundun hínsiñehabu”. Lau sun houn lan meha kristiánugu ha arufudaaña awanduni, gudemehabu luma ínsiñeni labürüdǘwa dimurei burí le, mosu meha hasigirun áfaagua lun ítarameme hamá. Ligiaméme giñe lunbei wadügüni. Ariha huméi ida liña lan meha habihini furumiñetiña kristiánugu igaburi le luma ida luba lan háyeihaniña. Lídehaba lira lun aranseñu humá lubá saragu asufuriruni. Ligíati, danme le lagumeserun saragu asufuriruni, subudihalime hun ida luba lan hawandun ani aranseñu huba lun hadügüni. w23.07 páh. 3, 4 pár. 4, 8

Meberesenga anhein hádangiñetiwa lubéi kristiánugu anuadirúaaña o hádangiñe wamá “amu mudún”, lunti wakipuragun woungua lidan “émeri sagüráuti” le ídanbei wáhuduragua lun Heowá lidan darangilaü luma úarani uguñe weyu ani le lunbei lanügübadiwa lidoun Larúeihan Bungiu le ñeinba lubéi wibiha saragu abinirúni ámuñegü (Huan 10:16). Lúmagiñe irumu 1919, háfuriduña saragu míñunu wügüriña, würiña hama irahüñü tídangiñe Babilónia to Wéiriboun, lidan amu dimurei, tídangiñe sun relihión to mámaboun inarünitu, ani gumeseeña éibuga luéigiñe émeri le sagüráubei. Dan meha le háfuridunbei huríu Babilóniagiñe, adügati meha Heowá lun lagidarúniwa, lídangiñe hémeri, sun le gayaraabei leberesehaniña (Isa. 57:14). Adüga lumuti san ligiaméme lidan “émeri sagüráuti” le lídanbei wadaani? Anha. Saragu san irumu lubaragiñe 1919, gumeseti meha Heowá ayusura wügüriña ha hínsiñehabutiña lun lun harumadahani üma le (ariha huméi giñe Isaíasi 40:3). Ídehati meha wadagimanu le hadügübei lun úa lan ni kata eberesehatiña gürigia ha harumabaña anigi lidan háfuridun tídangiñe Babilónia to Wéiriboun lun hebelurun lidoun áhuduraguni lun Bungiu, le ñein lubéi úarani luma darangilaü. w23.05 páh. 15, 16 pár. 8, 9

Busenti Heowá weseriwidun lun lau ugundani luma tídangiñe sun wanigi (2 Ko. 9:7). Ligíati, ka uagu lunti lubéi wáfaagun lun wibihini le wabusenrubei wadügün lidan weseriwidun lun Heowá anhein henren lubéi woun adügei? Samina wamá luagun likesin apostolu Pábulu. Ariñagati meha: “Bei numuti núgubu, fosunéi lun laganbunina” (1 Ko. 9:25-27). Fósuguati meha Pábulu lungua lun ladügüni le lagurabubei Heowá lúmagiñe íbini dan le michaahóun lan lun. Gúndaati meha san Heowá lau leseriwidun apostolu Pábulu lun? Anha, ítara liña. Ani ruti afayeiruahaü lun luagu lubuidun wadagimanu le ladügübei (2 Tim. 4:7, 8). Gúndaati giñe Heowá dan le larihini wáfaagun lun wibihini le wabusenrubei wadügün lidan weseriwidun lun, íbini dan michaahóun lan woun. Ka uagu? Íbini mínsiñe lan dasi ligía woun, adüga wamuti ladüga ínsiñeni le wasandirubei luagu Heowá. Biní lumuti meha Heowá Pábulu ani labinirubadiwa giñe ánhawa áfaagua (Sal. 126:5). Ani danme warihini labiniruni Heowá áfaaguni le wadügübei, másiñati ladügüba lan katei le lun busén wamá wagunfulirun lau le lunbei wadügüni. w23.05 páh. 29 pár. 9, 10

Ariñagati meha apostolu Pábulu ítara haña lan ha lúnbaña hagünrinchawagun lidan luéyuri Heowá kei gürigia ha arumugubaña. Dan le larumuguña lan aban gürigia, míchuti fe luagu le asuseredubei geyegu lau ni luagu lásügürün dan. Míchugunti giñe fe luagu lisudinin somu sügǘ ani siñati lóunabun kei lubéi. Ligiaméme asuseredubei houn hiibe-agei gürigia uguñe weyu lidan katei le luáguti Bungiu: harumuguña (Rom. 11:8). Meberesentiña lau burí katei le arufudubalin wawinwanduña lan lidan “lagumuhóun dan” ani yarafaali lan óunwenbu asufuriruni (2 Fe. 3:3, 4). Ánheinti wagía, subudi wamuti súdinitimahali lan adundehani le ichugúbei woun lun agagudúañu wamá eibu lásügürün dan (1 Tesa. 5:6). Ligíati, lunti darangilu wamá, derebugumeme wagíame. Ka uagu? Ladüga ménrengun lan wádaragun wougua lidoun katei lánina polítika o lánina ubóu. Lanwoun lira, éibutima ayarafadeina lan luéyuri Heowá, wéiritimabei hadügüdarun gürigia wawagu lun wádaragun woungua lidoun burí katei le. Lau sun lira, moun lumuti wadiheridun luagu ida luba lan wóunabun ladüga líderagubadiwa lani Bungiu sífiri sandu asandira darangilaü luma iderebugu luma lun buidu lan wanúadirun (Luk. 12:11, 12). w23.06 páh. 10 pár. 6, 7

Ka ñǘbuinbei hichügüwagun dan le haganbun luagu Sansón? Chóuruti aba lan hasaminarun luagu meha lanarime erei le luágubei. Inarüni aban lan meha wügüri héreti. Gama lumoun, adügati meha aban óunwenbu charati le uágubei seru lan lafayeihan. Lau sun lira, aba meha letenirun Heowá lun afiñeni le larufudubei lidan sun libagari ani adügati lun labürüdǘn lani hénpulu tidan Bíbülia lun wafurendeirun lídangiñe. Yusu lumuti meha Heowá Sansón lun ladügün katei hanarime buriti luagu hafulesein ísüraelina ha lumutuniña. Saragu sígulu lárigiñe lounwen Sansón, adügati meha Heowá lun labürüdüni apostolu Pábulu liri tidan lísüta hani gürigia ha meha wéiribei hafiñen (Ebü. 11:32-34). Ragüti meha Sansón luagu Heowá, íbini dan le hénrengu lan meha le gádanbalin. Seriwi láamuga lani hénpulu lun líchugun saragu dǘgüdaguaü woun ani arufudaha ligíame katei huuti woun. w23.09 páh. 2 pár. 1, 2

Líderagubadiwa gabügürügua lan wadaarunu wanigi lun Heowá lúntima wawandun (1 Tesa. 5:17). Íbini mama lan hásügürüña guentó lídangiñe aban óuchawaguni le hénrenguti, áluaha humuti san ladundehan Heowá dan le gañi humá, ibidiñe lan hun kaba lan hadüga o buchá lan huagu? Anhein hechu hubéi afurieida lun Heowá lun líderagunün agagibudagua luma turobuli le úmati hadunragua luagu weyu, másuhanbadün lun hadügüni ligiaméme danme le hadunragun luma turobuli le wéinamutimati. Chouru hubéi subudi lani Heowá buidu buidu ida luba lan líderagunün luma ídaba lan ladügei (Sal. 27:1, 3). Danme laduurun saragu asufuriruni ámuñegü, gayaraabei wawanduni anhein furendeihadiwa lubéi awandei óuchawaguni lúmagiñe guentó (Rom. 5:3). Ka uagu wariñagei le? Ladüga ariha hamaali saragu íbirigu houngua sagü lan hawandun aban lénrengunga ábatima lan derebugu lan hafiñen lun hawanduni le lunbei liabin. Dan le hawandun aban óuchawaguni lau lídehan Heowá, aba laganwoundun hafiñen luagu busén lan Heowá líderaguniña. Seremei afiñeni le, gayara lubéi hawandun danya le hadunragun luma amu lénrengunga (Sant. 1:2-4). w23.07 páh. 3, 4 pár. 7, 8

Aban Bungiu le gunfuranda lumutiña amu Heowá ladüga ǘnabugu lan ani gudemehabu ligía. Kei hénpulu, arufudati meha ǘnabuguni dan le lagünrinchaguaaña lubéi salufuritiña ha meha awinwandubaña Sodoma. Adügati lun hariñagun lani ánheligu lun Lotu, le lubúein, lunti lan lanurahan luagun wübü. Kei méhati hanufude lubéi Lotu lun lidin ñeinhin, aba layumuragun lun Heowá lun líchugun üma lun lun lidin hau liduheñu Sóarün, aban liraüraü uburugu le yebe lunbei lagünrinchaguni Bungiu. Lau sun gayara lan hamuga meha lafosuruni Heowá Lotu lun ladügüni le ariñawagúbei lun, madügün lumuti. Ánharügüti lun le lamuriahabei Lotu luma, íbini meha adüga lan lira lun siñaali lanme lagünrinchaguni uburugu Sóarü (Agu. 19:18-22). Saragu sígulu lárigiñe, arufudati Heowá aban gudemehabu ítarati houn lílana Níniwe. Óunaha lumuti Heowá profeta Honasi ariñaga houn lagünrinchaguaaña lan lau sun haburugute ladüga wuribani le ñeinbei. Gama lumoun, dan le hasakürihanbei gürigia hagía, aba feruduna lániña (Hon. 3:1, 10; 4:10, 11). w23.07 páh. 21 pár. 5

Ka wafurendeirubei lídangiñe le asuseredubei lun Hoasi? Ítara kei megei tan aban tídibu baruru tagüdahóun lau wewe lun méiguadun tan, ítara liña meha giñe megei lani urúei Hoasi lídehan aban máisturu, Hoyadá, fádiri le íñutimabei. Dan le lóunwenbei fádiri le, aba lagumeserun agarabaaguni lun áhuduraguni le inarüniti, ani aba lábürühan Hoasi lidoun. Arufudahati sügǘ le aban katei súdiniti woun: siñati inebebei lan Heowá woun ladügarügü adüga hamani wábirigu hama waduheñu ani íderagua hamawa lun wadügüni. Lun derebugu lan wafiñen, mosu waganwoundagüdüni ínsiñeni luma inebesei le wasandirubei luagu Heowá, lau waturiahanu Lererun, wararamagun asaminara luagu le waliihabei luma lau gabügürügua lan wafurieidun (Her. 17:7, 8; Kol. 2:6, 7). Mamuriahanti Heowá wama lun wadügün katei le siñá wamuti adüga. Le labusenrubei wámagiñe, dariwati lidan Apurichihati 12:13, le ñein lubéi lariñaga: “Ruba inebesei lun Bungiu, gúnfulibei lugumadin lugundun ligía lunbei hadügüni gürigia”. Ánhawa arufuda inebesei luagu Heowá, gayaraabei wagagibudagun luma furumiñeguarügü lénrengunga le úmati wadunragua ani gayaraabei úaragua wamá. Úabei adügüti lun weferidiruni wamadagua luma Heowá. w23.06 páh. 19 pár. 17-19

Ichouruni le líchugubei Bungiu woun, gumeseti lau dimurei le: “Ábati lariñagun Bungiu” (Aruf. 21:5a). Espechaliti dimurei le, lugundun ligía ábanbei lídangiñe ǘrüwa wéiyaasu le ídanbei layanuha Heowá lidan arufudúni le larihibei Huan. Ligíati, mama aban ánheli gabafuti ni Hesusu íchugubalin ichouruni le woun, Heowá guánarügü íchugubalin. Adügati le lúntima wafiñerun luagu dimurei le lariñagubei Heowá lárigiñe, ladüga ligía “Bungiu, le meyeehanbei” (Titu 1:2). Gayaraati lubeiti wafiñerun sunsuinagubei luagu dimurei le adarirúbei lidan Arufudúni 21:5, 6. Samina wamá guentó luagun dimurei “Arihabá”. Gíbeti wéiyaasu láfuachun dimurei güriegu le tidan líburu to gíriboun Arufudúni. Ka áfuachubei lárigiñe dimurei le? Dimurei le lariñagubei Bungiu: “Adüga numuti sun katei iserime”. Íbini layanuhaña lan Heowá luagu asansiruni le lunbei ladügüni ámuñegü, wéiriti lichourun lagunfuliruba lan darí lun layanuhan luagu kamá hamuga adüga laali (Isa. 46:10). w23.11 páh. 3, 4 pár. 7, 8

Mosu meha lasigirun apostolu Féduru ageindagua luma lidebilin. Ariha wamá fiu hénpulu. Dan meha le lafuranguagüdünbalin Hesusu mosu lan lasufurirun ani hilá ligía lun lagunfulirun profesía le tídanbei Bíbülia, aba meha ladeinhan Féduru lun (Mar. 8:31-33). Asigenehati meha giñe Féduru saragu wéiyaasu hama ha híbiri apostolugu luagu ka lan hádangiñe wéirigutimabei (Mar. 9:33, 34). Ani guñoun lubaragiñebei lounwen Hesusu, aba meha lábürühan Féduru luagun aban wügüri ani aba láchuguni larigei (Huan 18:10). Gúñounmeme ligía, aba lanufudedun Féduru ani ǘrüwañein wéiyaasu leyeedagun lau Hesusu, le lumada (Mar. 14:66-72). Lagumuhóun, aba layahuahan lau igarigu. Manügün lumuti meha Hesusu Féduru kei aban gürigia le máraninaali luáguti. Lárigiñebei láguyugun, ruti Hesusu chansi lun apostolu le lun larufuduni lun hínsiñe lan lun. Aba lagunbirahani lun lóunigiruniña lánigu (Huan 21:15-17). Ani aba lagundaarun Féduru lau dasi le. Ligía ñeinñein lubéi meha Herusalén lidan fedu Pentekosutesi ani ligía meha ábanbei hádangiñe furumiñetiña kristiánugu ha anuadirúbaña lau sífiri sandu. w23.09 páh. 22 pár. 6, 7

Ariñagati meha apostolu Féduru houn amu wéiyaaña lidan afiñeni: “Góunigi humaña lirahüñü Bungiu” (1 Fe. 5:1-4). Subudi wamuti hínsiñe hamá hábirigu wéiyaaña lidan afiñeni houn ani busén hamá habisidahaniña lun híchugun dǘgüdaguaü houn. Gama lumoun, másiñati anihein lan dan sandigua hamá houngua siñá lan hagunfuliruni dasi le ladüga beresegu hamá saragu o buchá lan hawagu. Anhein ligía lubéi gádanbalün, ka gayaraabei hadügüni? Abahüdaha huméi lun Heowá ida liña lan hasandiragun hungua. Abürühati Féduru: “Le eseriwiduti, adügaléi lau sun erei le líchugubei Bungiu lun” (1 Fe. 4:11). Háfuga hásügürüña lan híbirigu lídangiñe turobuli le máraninati lidan ubóu le le lábugiñebei lubafu Mafia. Ani haritagua huméi gayara lan ladügün Hesukrístu, “hóuniri mudún le tímatimaati”, saragu katei hawagu íbirigu sügǘ lau le hiyaraabei adüga, dandu guentó keime lidan iseri ubóu. Le lagurabubei Heowá hámagiñe wéiyaaña lidan afiñeni lun hínsiñe hamá hábirigu houn, lun hóunigiruniña luma lun aban hamá “hénpulu buiti houn”. w23.09 páh. 30 pár. 14

Mosu wóunigiragun woungua luéi warabachun luagun ligaburi hasaminarun gürigia ha lílana ubóu le, lugundun gayaraabei ladügün lira lun wíchuguni wanagan luagun Heowá luma lun wadüraaguni lilurudun (1 Ko. 3:19). Liibe-agei dan, ádaha lumutiwa “lichú aau le lánina ubóu le” lun maganbadi wamá lun Heowá. Ariha waméi meha le asuseredubei lidan damuriguaü le Pérügamubei luma le Tiatirabei. Añahein meha kristiánugu ñein ha ígiraguagüdübaña houngua lun échuni le meha geyegubei hau, kéiburi magíaguni luma láhudurawagun houn guáriua. Ererehati meha Hesusu lun bián damuriguaü le ladüga hánharun lun magíaguni ligía (Aruf. 2:14, 20). Uguñe weyu, másiñati hadügüdarun gürigia wawagu lun wáyeihani ligaburi hasaminan. Másiñati hínchahaniwa waduheñu o amu wasubudiragun lun wíchugun ugundani wóuniwagua luma lun wadüraaguni lilurudun Heowá. Háfuga hariñagun woun mariban lan lira o mahuudunhaali lan lúrudu le tídanbei Bíbülia. Anihein dan gayara lan wasaminarun memeni lan adundehani le burí líchugubei Heowá woun ani aba wabusenrun woudin “yagürounméme luéi le bürüwañubei” (1 Ko. 4:6). w23.07 páh. 16 pár. 10, 11

Mégeitu meha María to lúguchu Hesusu erei lugundun ibidiñegili meha luáguti hagüriahóun irahüñü tun, ani tuguyaba meha agüriahei irahü le meha lunbei Mesíasibei lan danme laweiridun. Keiti marounrungiru lan meha luma ni aban wügüri lidan tibagari, ida luba méhati tafuranguagüdüni lun Hosé le tadari dageinañoun lan (Luk. 1:26-33). Halíagiñe tibiha María erei? Amuriahatu meha ídemuei hama amu. Ánheli Gabüriéli aban hádangiñe. Amuriahatu luma lun líchugun lanwoun ariñahani tun luáguti dasi meha le lunbei tagunfuliruni (Luk. 1:34). Fiu dan lárigiñe, aba tadügün aban limigifen wéiyaasu “lidoun aban uburugu le labadinaguabei burí wübü Hudéa” lun tidin bisidoun Isawéli to tiduhe, to ariñaguboun tun biní laaru lan Bungiu lau lídehan lani sífiri sandu. Íridatu giñe Isawéli aban profesía luáguti irahü le lunbei tagaraüdüni María lun tíchugun gurasu tun (Luk. 1:39-45). Ligía tariñagunbei María luagu Heowá: “Adügaali óunwenbu burí katei lau lubafu” (Luk. 1:46-51). Yusu lumuti meha Heowá ánheli Gabüriéli tuma Isawéli lun híchugun gurasu tun María. w23.10 páh. 14, 15 pár. 10-12

Añahein 144,000 kristiánugu ha anuadirúaaña lau sífiri sandu ani espechaliti hamadagua luma Heowá. Heseriwiduba sun hagía kei fádirigu sielu úara luma Hesusu (Aruf. 14:1). Sun añahagua lan ya ubouagu, aba lanügüniña Bungiu keisi lirahüñü lau lídehan lani sífiri sandu. Yúsuati meha rumu Sánduti le meha tídanbei sanduariu keisi hénpulu lun layanuhóun luagu umadaguaü espechaliti le hánibei luma Bungiu (Rom. 8:15-17). Ánheinti rumu le Sándutimabei tidan sanduariu, sielu, le ñein lubéi lawinwanda Heowá, mini lubéi. Ánhounti “belu” o korutína to afanreinraguagüdübalin rumu le Sándubei luéi le Sándutimabei, lúgubu Hesusu dan meha le ya lubéi ubouagu, mini lubéi. Siñati meha lebelurun Hesusu lau úgubu ligía sielun kei Fádiri le íñutimabei lidan iseri aransehani le ladügübei Bungiu lun láhudurawagun lun. Lau lederegeruni Hesusu lúgubu keisi sákürifisiu luagu hafulesein gürigia, dará lumuti üma houn sun kristiánugu anuadirúaaña lun hawinwandun sielu. Lun gayara lan heresibiruni kristiánugu anuadirúaaña ha hafayeiruaha sielu, mosu giñe hígiruni úgubu le hawagubei guentó (Ebü. 10:19, 20; 1 Ko. 15:50). w23.10 páh. 28 pár. 13

Dan meha le hayanuhanbei fiu wügüriña éfürainna wuriba luagu Hedeón, kipu lumuti lidarangilan (Ali. 8:1-3). Lubaragiñe lagañidun, arufudati ǘnabuguni ani aganba lumutiña. Lauti layanuhan houn lau areini, adügati lun lásügürün hagañi. Ítara haña wéiyaaña lidan afiñeni ha chúbaña aau kei meha Hedeón. Dan le layanuhóun wuriba luagu le hadügübei, rútiña arigei lun le ariñawagúbei houn ani óunabatiña lau darangilaü (Sant. 3:13). Lau hadügüni lira, ídehatiña lun ñein lan darangilaü lidan damuriguaü. Dan le layanuhóunbei buidu luagu Hedeón ladüga lagañeiruniña madianna, aba líchuguni uéiriguni lun Heowá (Ali. 8:22, 23). Ida luba háyeihani wéiyaaña lidan afiñeni Hedeón? Lau híchuguni uéiriguni lun Heowá dan le habihin somu katei (1 Ko. 4:6, 7). Kei burí dan le lariñawagún lun aban wéiyaali lidan afiñeni buidu lan ligaburi larufudahan, gayaraati lóunabun tídangiñeti lan Lererun Bungiu le larufudahabei ani súngubei lan wagía furendeitiwa saragu lídangiñe le tarufudahabei lóundarun Heowá. Buídubei lun hálügüdagun wéiyaaña lidan afiñeni houngua, kada átiri dan, anhein ru lubéi ligaburi harufudahan uéiriguni lun Heowá o uéiriguni hóuniwagua. w23.06 páh. 4 pár. 7, 8

Anhein mounabúngili lubéi furíei le wadügübei lun Heowá, gayaraati wálügüdagun woungua: “Le san lúgubu megei nani le namuriahabei?”. Liibe-agei dan, saminatiwa subudi wamani ka lan katei buídutimabei woun ani másiñati mámaba lan le wamuriahabei anüga buiti woun lau lásügürün dan. Háfuga wafurieiduña lan lun laranserun ítaga turobuli lidan ítaga igaburi ani másiñati anihein lan amu igaburi le buídutimati lun laranserun turobuli ligía. Gayaraati giñe anihein lan lídangiñe lan katei le wamuriahabei, múaranti luma lugundan Heowá (1 Huan 5:14). Samina wamá hawagun agübürigu ha amuriahabaña luma Heowá lun ladügün lun lasigirun hasaani lidan inarüni. Genegeti mariban lan le hamuriahabei agübürigu ha. Lau sun lira, mafosuti Heowá ni aban lun leseriwidun lun. Le labusenrubei, lun sun lan wagía, íbini wasaanigu, lun wáhuduragun lun ladüga ligía lan wabusenrubei wadügün (2 Lur. 10:12, 13; 30:19, 20). Ligíati, ka hamuga lunbei hamuriahani agübürigu luma Heowá? Buídutimabei lun hamuriahani luma lun líderaguniña lun hachülürün tidoun lanigi hasaani gayara láamuga línsiñedun Heowá lun irahü ligía busén ligíame gamadagua lan luma (Ari. 22:6; Efe. 6:4). w23.11 páh. 21 pár. 5; páh. 23 pár. 12

Ka san uagu wariñaga lau lan wíchugun gurasu houn warufuda ínsiñeni houn? Afuranguagüdatu aban líburu to ayanuhaboun tuagu Bíbülia, dimurei lan güriegu le layusurubei Pábulu lun layanuhan luagu “gurasu”, mini lan, “lerederun gürigia rara lóubagiñe aban amu lun líchugun gurasu lun dan le lagagibudagun gürigia ligía luma óuchawaguni le hénrenguti”. Ligíati, dan le wíchugun gurasu lun aban íbiri le asufurirubei, wíderaguñein lun lasigirun éibuga lidan émeri le anügübei lidoun ibagari. Sagü wíchugun gurasu lun aban íbiri o tun aban íbiri warufuduñein houn hínsiñe hamá woun (2 Ko. 7:6, 7, 13). Úarati wasandirun gudemehabu luma wíchugun gurasu. Ka uagu wariñagei katei le? Ladüga dan le lasandirun aban gürigia gudemehabu luagu aban gürigia le asufurirubei, busenti líchugun gurasu lun luma lun ladügün somu katei lun líderaguni. Ligíati, furumiñe, aba wasandirun gudemehabu ani lárigiñe, ínchaha lumutiwa gudemehabu ligía lun wíchugun gurasu. Ligiaméme giñe lasandirubei Heowá. Afuranguagüdati Pábulu gudemehabu lan le lasandirubei Bungiu hawagu gürigia ligía lan ínchahabalin lun líchugun gurasu houn. Ariñagati luagu Heowá: “Ligía Wáguchibei le gudemehabubei woun; ani aranseñu liña lun líchugun gurasu woun súnwandan” (2 Ko. 1:3). w23.11 páh. 9, 10 pár. 8-10

Sun kristiánugu subudi wamuti luagu wagagibudaguba lan luma sügǘ hénrenguti. Samina wamá luagun le meha lariñagubei apostolu Pábulu houn kristiánugu ha Tesalónikabaña: “Dan meha le awanhagua lan huma, ariñagatiwa meha hun luagu lunti lan wáfagun asufuriruni, ani ítara liña lasuseredun, kei hasubudiruni” (1 Tesa. 3:4). Abürühati giñe houn kristiánugu ha Korintubaña: “Busentiwa lun hasubudirun luagu saragu lénrengunga le wasufurirubei [ . . . ]. Haritaguatiwa yebe luagu wóunweguba lan” (2 Ko. 1:8; 11:23-27). Inarünimémegili dimurei le uguñe weyu. Subudi wamuti, wagía kristiánugu, wásügürüba lan lídangiñe lénrengunga (2 Tim. 3:12). Lúmagiñe hagumeserun afiñera luagu Hesusu luma hasigirun afalarei, másiñati adügaaña lan humadagu o hiduheñu bula hau o óusera hamaadün lan wuriba. Gaturobulinhaadün san lidan huádigimari ladüga haruma lan higaburi ani úaragua hugía lidan sun katei? (Ebü. 13:18). Gagibuguaadün san luma éibaahouni hámagiñe gumadimatiña ladüga hayanuhan houn amu luagu hemenigin? Meberesenga lénrengunga le úmabei wagagibudagua, ariñagati Pábulu lunti lan wagundaarun. w23.12 páh. 10, 11 pár. 9, 10

Gagibuguati meha Hakobu luma saragu turobuli. Kéiburi dan le híchugunbei bián hádangiñe lirahüñü —Simeón luma Lewí— busiganu houn liduheñu lau le hadügüni le wuribabei ani dasei haméi liri Heowá. Lanwoun lira, aba meha tounwen Rakeli, lani weiriou würi tótima hínsiñeboun lun, dan le tágurahanbalin libiaman hasaani. Adügati giñe aban lanarime ümi lun láguyun Hakobu Ehiptun lau sun meha derebuguhali lan (Agu. 35:16-19; 37:28; 45:9-11, 28). Íbini ítara, meferidirun lumuti meha Hakobu lafiñen luagu Heowá ni luagu le füramase lubéi lun. Ani furanguti larufuduni Heowá gunda lan meha lau Hakobu, lugundun ídehati lun lagibedun lúmati. Ani chóuruti weiri lan meha leteingiruni Hakobu Bungiu dan le ladügünbei lunya ladunragun luma Hosé, lisaani le yebe ru laalibei kei hilaali luagu saragu irumu. Awanda lumuti meha Hakobu sun lénrengunga le ladüga weiri lan lubuidun lumadagua luma Heowá (Agu. 30:43; 32:9, 10; 46:28-30). Wagía sun, gayaraabei giñe buidu lan lidin woun lidan wagagibudagun luma turobuli le magurabúnti anhein weiri lubéi lubuidun wamadagua luma Heowá. w23.04 páh. 15 pár. 6, 7

Lidan Sálumu 23, ariñagati meha Dawidi chouru lani góunigi lani Heowá ladüga hínsiñe lan lun. Ariñagati ñein luagu Heowá lan Lúniribei, ani ayanuhati giñe luagu ida liña lan lumadagua luma. Chóuruti meha lasandiragun Dawidi lungua ladüga subudi lani Heowá lan adundehabalin. Ani rabati luagun sunsuinagubei. Subudi lumuti meha larufudubei lan Heowá línsiñehabu lun sagü weyu lidan libagari. Ariha waméi ka lan uagu lariñaga lau saragu ichouruni afiñe lan luagu Bungiu. Sandiguati meha Dawidi lungua luagu lóunigiruñein lan Heowá buidu buidu, lugundun súnwandan meha líchuguni Heowá le lemegeirubei lun. Subudi lumuti meha giñe gayara lan gamadagua lan luma Bungiu ani gunda lan Bungiu lau. Ligíati chouru lubalin Dawidi, meberesenga lan le asusereduti, Heowaba lan ariha lau lun ua lan ni kata lemegeirun. Afiñeti meha wéiritima lan ínsiñeni le lasandirubei Heowá luagu sügǘ lau lidiheri ani adügati katei le lun lasandiragun lungua gúndaañu (Sal. 16:11). w24.01 páh. 29 pár. 12, 13

Lúmagiñe lagumuchun Libiaman Wuribu Wéiriti, gayaraahali meha hapurichihan lubúeingu Heowá maturobulinga lidan saragu fulasu ubouagu. Ani guentó, subudi hamaali saragu gürigia Heowá ani lapurichihóuña uganu buiti lidan sun Ubóu. Añahagua lílana Musu Úaraguati afalarei ladundehan Kristu uguñe weyu. Adüga hamuti sun hayaraati lun úara lan adundehani le híchugubei, dandu luma lisaminan Heowá kei luma lisaminan Hesusu. Ani adügatiña lun hachülüragüdüni óunigirutiña sirkuitu hama wéiyaaña lidan afiñeni adundehani le houn lílana burí damuriguaü. Lídanñanu lúhabu Kristu le lóunwenren wéiyaaña lidan afiñeni ha hádangiñebaña kristiánugu anuadirúaaña, —íbini ha híbiri wéiyaaña— (Aruf. 2:1). Kei sun lubéi gürigia charatiña, anihein dan hachararuba lan wügüriña burí ha, ítara kei meha lasuseredun lun Moisesi, lun Hosué luma houn apostolugu (1 Lur. 20:12; Hos. 9:14, 15; Rom. 3:23). Íbini ítara, subudi wamuti ladundehañein lan Hesusu musu úaraguati hama wéiyaaña lidan afiñeni buidu buidu. Ligíati, gébunati wafiñerun luagu adundehani le líchugubei woun hámagiñe íbirigu ha. w24.02 páh. 23, 24 pár. 13, 14

Alawaha wamuti Heowá dan le wayanuhan luagu lau ínsiñeni luma eteingiruni. Dan le wapurichihan, busentiwa lun línsiñedun Heowá houn gürigia kei línsiñe woun (Sant. 4:8). Hínsiñeti woun lun wayusurunu Bíbülia lun warufuduni houn gürigia anihein lan lubuidun burí igaburi luagu Heowá, kéiburi línsiñehabu, liricha, lichú lau luma lubafu. Alawaha wamuti giñe Heowá dan wadügüni sun wayaraati lun wáyeihani. Dánmeti le harihini gürigia lubuidun wagaburi, gayaraati hálügüdagun houngua ka lan adügübei lun amu wamá hawéi ha híbiri gürigia (Mat. 5:14-16). Másiñati líchuguba lan lira chansi woun lun wafuranguagüdüni wafiñen houn. Lídehabati lira lun busén hamá gürigia ha harumabaña anigi hafurendeirun luagu Bungiu. Dan le walawahani Heowá lidan burí igaburi le, gúndaagüda wamutu lanigi (1 Tim. 2:3, 4). w24.02 páh. 10 pár. 7

Lun aban ban kristiánu le buiti, mégeitibu bafurendeirun somu iarani le lunbei lahuudun bun. Líderagubadibu lira lun bagunfulirun lau dasi le ichugúti bun lidan damuriguaü luma lun badarirun wadagimanu lun banuriagun bungua hau sun tílana huban luma lun badurarun lidan. Líderagunibu giñe lun buidu lan banaagun bungua hama amu. Kéiburi bafurendeirun aliiha luma abürüha buidu. Ariñagatu Bíbülia gunda lan ani buidu ligía lidin lun gürigia le aliihabarun Lererun Bungiu sagü weyu ani ráramagua ligía asaminara luagun le laliihabei (Sal. 1:1-3). Ligíaba íderaguabu lun basubudiruni ka lan lisaminanbei Heowá, lun basaminarun furangu ani lau lichú aau (Ari. 1:3, 4). Sun íbirigu, dandu wügüriña kei würiña, áluahatiña adundehani tídangiñeti Bíbülia hámagiñe wügüriña ha garufudahaditiña. Anhein galiiradi bubéi ani gabürüdadi amürü, gayaraabei baranserun yanu luma óunabagülei le buiti ani le gayaraabei bederebudagüdüni hafiñen amu. Luagu amu oubaü, gayaraabei babürühani puntu le hínsiñetimabei bun lun bederebudagüdüni bafiñen luma lun bíchugun dǘgüdaguaü houn amu íbirigu. w23.12 páh. 26, 27 pár. 9-11

Danme le hasandirun anufudei, samina humá luagun le lunbei ladügüni Heowá ámuñegü danme le úaali Satanási. Lidan adamurini wéiriti le adügǘbei lidan irumu 2014, arufudúati aban sügǘ le ídanbei larihúa aban íbiri ayanuha hama liduheñu luagu kaba lan hariñaga luagu 2 Timotéu 3:1-5, lun hamuga aban lan profesía luáguti ibagari lidan Paraísu, anihánba yebe waliiha lidan: “Lidan iseri ubóu, harufuduba gürigia ínsiñeni houn gürigia háledigu, hínsiñebei katei lánina Bungiu houn, mapantanbaña ani ǘnabugubaña, híchuguba uéiriguni lun Bungiu, gaganbadibaña houn hagübürigu, geteingiradibaña ani úaraguabaña, hínsiñebaña haduheñu houn, aranseñu haba lun hebelurun lidan úarani hama amu, hayanuhaba súnwandan buidu hawagu amu, hárügüdaguba houngua, darangilubei hagaburi, hínsiñebei le buídubei houn, gayaraabei lafiñerúniwa hawagu ani richaguabaña, hínsiñebei Bungiu houn sügǘ luéi háluahani hagundan guánarügü ani gúnfulibaña tídangiñe sun hanigi luma Bungiu. Óundaraba hamá gürigia hagía súnwandan”. Héchutiwa san ayanuha hama waduheñu o hama wábirigu luagu ida luba lan ibagari lídanme iseri ubóu? w24.01 páh. 6 pár. 13, 14

Ma lubuidun wasubudiruni gunda lan Heowá hau lumutuniña! (Sal. 149:4). Íbini ítara, másiñati añahein lan íbirigu eferidiruti haguraasun ani aba hasaminarun: “Lau sun inarüni lan luagu gunda lan Heowá hau lubúeingu keisi sétanu, gúndaati funa san nau?”. Añahein meha lubúeingu Heowá ha lánina binadu dan ha meha únbaña hénrengu lan hafiñerun luagu gunda lan Heowá hau (1 Sam. 1:6-10; Hob. 29:2, 4; Sal. 51:11). Furanguti tariñaguni Bíbülia íbini lan chará wamá gayara lan lagundaarun Heowá wau. Kati lunbei wadügüni? Warufuduni afiñe wamá luagu Hesukrístu ani badisei wagíame (Huan 3:16). Ítara liña warufuduni hagibugiñe sun gürigia asakürihaadiwa lan tídangiñe sun wanigi luagu figóu le wadügübei ani füramasehaadiwa lan lun Bungiu wadügübei lan lugundan (Adü. 2:38; 3:19). Wéiriti lugundan Heowá dan le wádaruni pasu le lun lumadagu wamá. Ánhawa áfaagua buidu lun wagunfuliruni le füramase wabéi lun Heowá, lagundaaruba wau ani gamadaguabei wama (Sal. 25:14). w24.03 páh. 26 pár. 1, 2

Gayaraati wáyeihaniña disipulugu hagüra lau wasigirun apurichiha íbini dan le maha hamá gumadimatiña lun wadügüni. Afiñetiwa luagu líderagubadiwa lan Heowá agunfulirei wani ministeriu, ligíati, amuriaha wamá dandu lichú aau kei ganigi luma, íbini lun wagagibudagun luma turobuli. Saragu wádangiñe, wasufuriruña ladüga wegeburihaña lan, weibaahóuña lan, wagagibudaguña lan luma lénrengunga o turobuli hama iduheñu o katei líbeina lira. Adügaali giñe sandi galugurahati luma burí wuribu lúntima laganwoundun turobuli burí le. Ligíati, dará humóun hanigi lun Heowá danme le hafurieidun lun. Ayanuha humá luma ítara kei hayanuhan luma aban besi humada. Gayaraati hachoururuni líderagubadün lan Heowá (Sal. 37:3, 5). Huuti wafurieidun súnwandan dan le wagagibudaguña lan luma turobuli (Rom. 12:12). Subudi lumuti Heowá ka lan hásügürübei lubúeingu ani aganba lumutiña “ha agúahabaña luagu” amuriaha ídemuei (Sal. 145:18, 19). w23.05 páh. 5, 6 pár. 12-15

Dan le lunti lan wanúadirun aban katei súdiniti, lunti wasubudiruni “ka lan lugundanbei Wabureme” Heowá, ñéingiñemeti, gayaraahalime wadügüni le lunbei wadügüni (Efe. 5:17). Dan le wáfaagun lun wadarirun adundehani tídangiñeti Bíbülia le lunbei lahuudun woun lidan le gádanbaliwa, wóuchuña wasubudiruni ka lan lasaminarubei Heowá luagu katei ligía. Dan le wafalaruni adundehani burí ligía, gayaraabei wanúadirun buidu. Hínsiñeti hamuga lun “Mafia” larihiniwa beresegu lidan katei le lánina ubóu le darí lun madaani wamá lun weseriwidun lun Bungiu (1 Huan 5:19). Gayaraati hamuga ménrengun lan woun wáluahan seinsu, waturiahan o wíchuguni wadagimanu furumiñe lubaragiñe waganwoundagüdüni weseriwidun lun Heowá. Anhein hamuga wadüga lira, ábanbei hamuga seini luagu wáyeihañein lan ligaburi lisaminan ubóu le. Lau sun mama lan aban katei wuribati seinsu, waturiahan o wawadigimaridun, moun lumuti wíchuguni lidan furumiñeti lúgaaru lidan wabagari. w24.03 páh. 24, 25 pár. 16, 17