Julho

Thuulelani ira vyothene vyaonga liye thitho vyodabwi-avyee, vyatoothonyi-edha pama mwemo munothuulela Babee thitho munovwela liye. (Ju. 14:9) Ninofunjedhavo n’ni va vyodambwi-a viirile Yesu?. Yesu na Babee tanonidhiveliwana maningi. Angali vailamboi, Yesu atoothonyi-edha ira unodhiveliwana atu vo-indi-edha basa kopolodhee dhodabwi-a vokami-a atu orucheya. Vahora inango atu ambili o-oona tatomkuwela ira aakami-e. (Mat. 20:30-34) Onani ira Yesu “namwasa wa tangaranga,” atoaili-a. Ninga mu-indi-edheliwe basa lembali, madhu a Igiriki tathapuleliwe ira “namwasa watangaranga,” anoonga vya tangaranga dhilukulu dhedho mutu dhinokaana liye kumela vathi varima. Tangaranga dhedhi, dhathonyi-edha dhivelo tiedho dham’mwiri-idhe Yesu ira adyi-e atu andhala thitho ili-a atu avikutwe. (Mat. 15:32; Mrk. 1:41) Kaninokaikela ira Yohova Nlungu “watangaranga dhilukulu,” thitho Mwanee Yesu, tanonidhiveliwana maningi thitho tanokuzeya maningi taniona nigumanangana nyarwa. (Luk. 1:78; 1 Pe. 5:7) Yohova na Yesu, mbofunechecha mali-a nyarwa dhothene dhedho atu dhinogumanana aliwa! w23.04 3 ¶4-5

Ninofwanela thitho iranga vyongo vinanikami-e rambela mathulelo amakundo othakala enao ali ovweya muilambo ya Satanila. Leri no funjedha Bibilya unooda nikami-a ira nithuulelenga vyongo vyapama. Dhowa migumanoni thitho laba basa lolaleela unooda nikami-a thitho vunela mathuulelwi-u. Naira e-no Yohova unonilanyedha ira kanarumeli-e ira niwesedhiwe fiyedha vevo va-anaode i-yo vilela. (1 Ak. 10:12, 13) I-yo othene ninofwanela lobelanga maningi kwaranya wale ira nikaleve ororomeleya malambo omari-ala. Yohova unofuna ira nim’mwadelanga vili rimani mwi-u nalobelanga. (Sal. 62:8) Mumtitimi-enga Yohova thitho mumsimbenga namwasa wa vyongo vyothene vinoira liye. Mumvepenga ira aukami-eni kala olimba rima volaleela. Mumvepenga mosembezela ira aukami-eni limbanana nyarwa iliyothene thitho vyowesedha vilivyothene vinagumanena nyo. Kamurumeli-e ira yongo iliyothene venango mutu uliothene auimwanani-eni lobela wa Yohova hora dhothene. w23.05 7 ¶17-18

Mwasiwa ngwan’ni ninodhowecha migumanoni? Mwasa nlukulu, ndi msimba Yohova. (Sal. 26:12; 111:1) Thitho ninodhowa migumanoni naifunelo yoi nilimbi-anenga vahora yoruchila. (1 At. 5:11) Navenyathi-a dhandha li-u nowakula, ninokwakwaneli-edha vifunelo vili vi. Mbwenye vamwasa owakula vamigumanoni, ninooda gumanana nyarwa. Ninooda ovanga wakula venango funechechanga wakula, mbwenye a-va-iwa ngari yowakula ninga mwemo mwafunela i-yo. N’nga ninaire a-vi vanyarwa dhedhi? Rumiwi Paulo atoonga ira nithuulelenga maningi “vyolimbi-ana.” Nazindiyela ira atu enango tanooda limbi-iwa masiki namadhu oyeva othonyi-edha iroromelo yi-u, kaninaove wakula. Thitho angalive ira kaninakaena ngari yowakula vakwikwi na vakwikwi, ninooda kala osangalala ira atu enango pingoni, tatokaana ngari yowakula.—1 Pe. 3:8. w23.04 20 ¶1-3

Vali vangaongiwile milanyu yoi Ayuda enao tali adhaari wa vyawa 70 wu Babulo, tangaodile welela waniwa wu Israeli. (Eza. 1:2-4) Yohova yeka ngwenuo aode iri-a ira vyevi viodeye. Mwasiwa ngoi Ababulo katathathula adhaari. (Esa. 14:4, 17) Mbwenye sidadi la Babulo lali lingagonji-iwile thitho mwene mpya avolowile atoawandela Ayuda ira anooda kumamo. Namwasa wa vyevi, Muyuda uliothene simbwasimbwa miru ya mabanja, yafuneela sakula vyoira ira takume wu Babulo venango kabe. Mbwenye sakula vyoira vamwasula kwaali okweya. Ayuda enango tali oulula maningi moi vingakanle vyorucha wenda ulendo oruchula. Thitho Ayuda anjinji tabaliwile wu Babulo thitho tali ta-anakaathivo tatamo nlilothene. Ee-no waaliwa, wu Israeli wali waniwa wa anamabaliwa. Ayuda enango vyongo vyanoawendela pama wu Babulo, ee-no vingakadhi vyorucha i-ya nyumba dhiwa dhapama thitho manegosiiwa nodhowa makalanga muilambo yailendo. w23.05 14 ¶1-2

Bibilya linonilimbi-a ira ninofwanela dhowanave kala ovilela, atangaranga na audhivela. Va lemba la Luk. 21:19 vanoonga ira: “Akala ira nyo munovilela, munodha fwanya ingumi.” Va lemba la Akolose 3:12 vanoonga ira: “Mukale atangaranga.” Va lemba la 1 Atezalonika 4:9, 10 vanoonga ira: “Nlungu unoofunji-ani dhiveliwana unango na fwee . . . Mbwenye ninoukumbanyedhani abali ira mudhowenave irangana e-no mowenjedheleya.” Maverso othene enala talembele anamafunjedha enao tali tangathonyi-edhe wale ira tali ovilela, atangaranga na audhivela. Mbwenye aliwa tanoofuneela dhowanave thonyi-edha makalelwala. I-yo thitho ninofwanela irana vimbo-ive. Ira niode irana vyevi, ninothapanya mwemo Makristau oroma mwathonyi-edhile aliwa makalelo apama enala. Vasogolove ninodha ona mwemo munasazi-edhele i-yo, thitho mwemo munathonyi-edhele i-yo ira nitokozeela nyarwa ilukulu. Vanofuna dharoma nyarwa ilukulu, munodha kala ira mutofunjedha khalelo lovilela thitho munodha kala okozeya vilela. w23.07 3 ¶4, 8

Akala nili ozoziwa venango “amabila enango,” ninofwanela dhowanave wenda va “ndhila yochena” namwasa oi inonikami-a kalave mu paradaizo wauzimu thitho inodha nikami-a fwanya maraeli-o anofuna ndhana Mwene sogolou. (Ju. 10:16) Romela mu yawa ya 1919 CE. Alombwana, naa-iyana thitho a-ima mamiliyau manjinji takadhi takumanga mu Babulu lukulu, enao ali mareligiau othene onama, tatoroma wenda vandhila yopipirisila. Wa Ayuda enao takuma wu Babulo, Yohova atoonechecha ira utoakumi-edha vyongo vyothene vyogwegweducha. (Esa. 57:14) N’nga a-vi vya “ndhila yochena” ya malamboano? Wa vyawa vinjinji ya-anafiye yawa ya 1919, Yohova atoo-indi-edha basa alombwana enao tamlemeza ira tasaka-edhe ndhila yokumela wu Babulo nlukulu. (Mufwanafwani-edhe na Esaya 40:3.) Aliwa tatoolaba basa yofuneya yosaka-edha ndhila yauzimu thitho vyevi vyatookami-a atu amathuulelo apama ira takume mu Babulo lukulu no volowa mu paradaizo wauzimu, weo uli lambela waimbarimbari wali uweli-edhiwanga. w23.05 15-16 ¶8-9

Yohova unofuna ira nimlabelenga mosangalala thitho mofunechecha. (2 Ak. 9:7) N’nga ninofwanela dhilimbi-edha dhowanave kwakwaneli-edha vifunelo vinangovyee vyauzimu angalive ira kanina rima ofunechecha ira vyevyo? Kathuulelani ifwanafwani-o ya rumiwi Paulo. Liye aongile ira: “Ndhinokoma manungwanga noasogolera ninga dhaari.” (1 Ak. 9:25-27) Paulo anoovikanyi-edha irana vyofanelela angalive ira anoona ira kaafuna irana vyevyo. N’nga Yohova anoosangalala na vyevyo vyaira paulo vomlambela? Ee. Thitho liye atomraeli-a namwasa wa thindhilee. (2 Ti. 4:7, 8) Mofwanafwana na vyevi, Yohova unosangalala anionanga nidhilimbi-edhanga kwakwaneli-edha ifunelwi-u angalive ira kanina rima ofunechecha irana vyevyo. Liye unosangalala namwasa oi unoidhiwa ira masiki ira kai hora dhothene vevo vanoira i-yo vyongovyo namwasa oi vinonisangalali-a, ninoira namwasa oi ninomdhiveliwana. Ninga mwemo Yohova mwaraeli-idhe liye Paulo na i-yene thitho unodha niraeli-a namwasa wathindhi li-u. (Sal. 126:5) Thitho naonanga mwemo Yohova munoniraeli-edha liye ninooda kaana rima ofunechecha. w23.05 29 ¶9-10

Rumiwi Paulo atoafwanafwani-edha atu ta-anofuna dhavulumuwa vadambo la Yohova naatu enao tanogona. Aliwa katinoidhiwa vyongo vinoireya venango hora yaviranga. Ee-no katinazindiyele vyongo vyofuneya vyevyo vinoireya venango iravo yongo. Malamboano atu anjinji tanaagona mwauzimu. (Aro. 11:8) Aliwa katinororomela umboni oi ninokala “mumalambo omari-a” thitho ira nyarwa ilukulu inodha roma vachineneeva. (2 Pe. 3:3, 4) Mbwenye i-yo dambo nlilothene ninozindiyela ira malangi-o oi nikale methove, mbofuneya maningi. (1 At. 5:6) Ninofwanela kaana mathuulelo opwaseya thitho o-otekenyeya,mwasiwa ngwan’ni? Kaana mathuulelo enala, unooda nikami-a ira na-avolowelenga vyandale venago vyoireya vya vailamboi. Vevo dambo la Yohova vanowandamela aliwa ninooda kanyi-edhiwa maningi ira niirengana vyongo ninga vyevi. Mbwenye kaninofwanela kumbanyanga ira ninaire a-vi nagumanana vyongo ninga vyevi. Zimu wa Nlungu unodha nikami-a kaana mathuulelo opwaseya thitho kala atu osakula vyongo mwazelu.—Luk. 12:11, 12. w23.06 10 ¶6-7

N’nga chini inodha mathuuleloni mwinyu mwavwa dhina loi Samisoni? Pyooneelatu ira munothuulela vya mutu wakopolo maningi. Vyevyo pyaimbarimbari. Mbwenye vahora inango Samisoni atosakula vyongo modaweya, vyevyo vyatom’dhi-edha nyarwa. Mbwenye, Yohova anothuulela vyongo vinjinji vyairile Samisoni vomlabela mororomeleya thitho atovilemba Bibilyani ira vinikami-e. Yohova ato-indi-edha basa Samisoni voira vyongo vyodabwi-a namwasa ofuna kami-a Aisraeli enao tali atwee. Vangavirile vyawa vinjinji Samisoni angakwide Yohova atovudhelela rumiwi Paulo ira alembe dhina la Samisoni mugulu laatu enao tathonyi-edhile iroromelo. (Aeb. 11:32-34) Ifwanafwani-o ya Samisoni inooda nilimbi-a. Liye anom’nyindela Yohova masiki vahora yorucha maningi. Funjedha ifwanafwani-o ya Samisoni unooda nilimbi-a. w23.09 2 ¶1-2

Ninooda dhowanave kala ovilela akala hora dhothene ninolobela kumela vathi va rima thitho m’mwandelamo Yohova vyokumbanya vi-u. (1 At. 5:17) Venango nyo vachineneeva kamunogumanana vyowesedha vilukulu. N’nga munomvepa Yohova ira ausogolelengani hora iliyothene yeniyo isukwalile nyo, dhodhomi-eya mathuulelo venango pingeya? Akala hora dhothene munomvepecha Nlungu ira aukami-eni va nyarwa dhinyu dhothene, kamunodha kaikela mvepa ira aukami-eni mwadha gumanana nyarwa dhilukulu sogolou. Thitho munodha kala osikimizela ira Yohova unoidhiwa pama hora yeniyo inaukami-eni liye thitho mwemo munairele liye vyevyo. (Sal. 27:1, 3) Vinodha kala vyo-orucha vilela vyowesedha vilukulu akala va-eni ninovilela vyowesedha. (Aro. 5:3) N’nga mwasiwa ngwan’ni ninoonga e-no? Abali anjinji tatoona ira vilela vyowesedha vyaguman’nena aliwa, vyatoakami-a ira tavilele thitho vyowesedha vyasogolo. Vyevi vitoakami-a ira taroromelenga maningi ira Yohova ngokozeya akami-a. Vyo-arelavovyee pyoi, iroromelwiwa inoakami-a ira taodenga vilela vyowesedha vyo-arela.—Yak. 1:2-4. w23.07 3 ¶7-8

Dhiyevi-a thitho riya rima unoiri-a ira Yohova akale ololela. Mofwanafwani-a, Yohova atoothonyi-edha ira ngodhiyevi-a vevo vafuna liye upa atu othakala mu Sodomu. Vo-indi-edha basa angelwee, Yohova atom’mwandela Loti ira atawele tatamo n’nango la myango. Mbwenye Loti atoova thitho kaadhowile. Ee-no atom’sembezela Yohova ira liye vambo-i na banjalee tatawele wu Zowari, sidadi ling’ono lelo lafuna nongiwa. Yohova angaodile m’mwandela Loti ira a-arele malangi-o amva-idhe liye mbwenye kaairilena vyevyo. Malomwee, atorumela vyevyo vyamvepile Loti angalive ira vyevi vyatoiri-a ira a-anonge sidadi la Zowari. (Mar. 19:18-22) Vangavirile vyawa vinjinji, Yohova atothonyi-edha tangarangadhee waatu a sidadi la Ninive. Yohova atom’mwandela Yona ira amamwadhe milanyu yoi sidadi lothakala la Ninive linonongiwa. Mbwenye Yohova angaoni ira atu a sidadinimo tatoochinyuwa, atoavwela tangaranga thitho kaapide.—Yon. 3:1, 10; 4:10, 11. w23.07 21 ¶5

N’nga ninofunjedhavon’ni vaifwanafwani-o ya Yehoasi? Liye ali ninga imwiri yo-okaana michichi yodhowa wathi maningi inonyindela imwiri inango ira iimele pama. Ee-no Yehoyada wenuo ali ninga imwiri yeniyo yanyindela liye angakwide, Yehoasi atoroma vuruwana atu opanduwa thitho atokala o-ororomeleya wa Yohova. Vyevi vinothonyi-edha pama ira kaninofwanela nyindelanga ifwanafwani-o yapama ya Makristau afwi-u, masiki ya abali-u ira nim’movenga Nlungu. Ira nidhowenave kala vauxamwali olimba na Yohova, na i-yene thitho vaokene ninofwanela mdhiveliwangana thitho mlemeza maningi vofunjedha madhwee hora dhothene, voathuulela modi-a thitho lobela. (Jer. 17:7, 8; Ako. 2:6, 7) Yohova kanofuna vyongo vinjinji wa i-yo. Vinofuna liye vitolembiwa va lemba la Namalaleya 12:13, vevo vanoonga ira: “Ova Nlungwaa waimbarimbari nolokota malamulwee namwasa oi vyevi ndi vyevyo mutu vinofwanela liye irana.” Naovanga Nlungu, ninooda vilela nyarwa dhedho dhinagumanane i-yo nokalave olimba. Kavali yongo yeyo inaode dodomi-a uxamwali-u na Yohova. w23.06 19 ¶17-19

Versu 5 liromile na madhu oonga ira: “Nlungu ukaathidhe vapandoni wa Umwene unoonga ira.” (Apk. 21:5a) Yen’na ndi imbo-i mwa hora dhiraru vevo Yohova vyaongile liye ekene m’masompenya mubukhu la Apokalipse. Ee-no, Yohova unasikimizela ekene, a-kala dhela mwa ngelo wakopolo venango Yesu. Likundo leli linothonyi-edha ira madhu o-arelao mbonyindeleya maningi. Mwasiwa ngwan’ni ninoonga e-no? Namwasa oi Yohova “kanonama.” (Tit. 1:2) Vyevi vinothonyi-edha ira vinoleri i-yo va Apokalipse 21:5, 6 pyonyindeleya maningi. Dhoweni nitapanyeni madhu oonga ira: “Kaonani!” Madhu Aigiriki athapuleliwile ira “kaonani!” anoromoliwa moweli-edha weli-edha mubukhu la Apokalipse. N’nga madhu o-arelao anoonga vyan’ni? Nlungu unoonga ira: “Vyongo vyothene vinosaka-edha miyo ndi vipya.” Pyaimbarimbari ira Yohova unoonga vyongo vipya vinofuna dhaireya sogolou, mbwenye wa liye vyevi vyali vyo-okaikeli-a voi unoonga ninga vinaaireya.—Esa. 46:10. w23.11 3-4 ¶7-8

Rumiwi Pedru anodawi-ave vyongo vinango. Kathuulelani vifwanafwani-o vyoyevavi. Vahora inango liye atom’sumulula Yesu angaongile ira unodha gumanana nyarwa thitho wukwa ira akwakwaneli-edhe ulosi wa Bibilyani. (Mrk. 8:31-33) Pedru naarumiwi enango tanookangana thitho moweli-edha weli-edha vamwasa okala ndimuwa vari viwa. (Mrk. 9:33, 34) Nama-iyu omari-a Yesu a-anaphiwe Pedru atoogwanda libaru la mutu mwinango. (Ju. 18:10) Nama-iyunimwiwa liye atoova thitho atom’konda Yesu fendo taaru. (Mrk. 14:66-72) Vyevi vyatoiri-a ira Pedru ale novwa upha rimani maningi. Yesu kaa-iidhe m’dhiveliwana rumiweula wenuo afookile maningi namwasa wa vyongo vyadawi-idhe liye. Yesu atom’vepa Pedru ira akale odhiyevi-a nokumbiza mabilee. (Ju. 21:15-17) Pedru atoorumela irana vyevi. Ee-no va dambo la petekoste liye ali wu Yerusalemu thitho ali mugulu laatu oroma zoziwa na zimu ochena. w23.09 22 ¶6-7

Rumiwi Pedru atolimbi-a andimuwa afwee ira: “Mukumbizenga gulu la mabila a Nlungu.” (Pe. 5:1-4) Akala muli ndimuwa wavapingoni, ninoidhiwa ira munodhiveliwana abali na arongolinyu thitho munofuna asamalela. Mbwenye, hora dhinango munooda onanga ira munokalecha opingeya maningi venango mutochenyela maningi voi kamunaode kwakwaneli-edha izo inyu. Vyairee e-no, n’nga munaire a-vi? Mum’mwadelenga Yohova vyokumbanyi-a vinyu vyothene. Pedru atolemba ira: “Mutu uliothene unom’labela alabele monyidela kopolo dhinovelela Nlungu.” (1 Pe. 4:11) Abali na arongolinyu anooda gumanana nyarwa dhedho dha-anamale va e-ni. Mbwenye muthuulelenga ira “namakumbiza nlukulu,” wenuo uli Yesu Kristu, unooda akami-a kwaranya mutu uliothene. Liye unooda akami-a va ee-ni thitho muilambo ipya. Nlungu unofuna ira andimuwa avapingoni tadhiveliwengana abaliwa, asamalela thitho kala “vifwanafwani-o wa gulu la mabila.” w23.09 29-30 ¶13-14

Ninofwanela rambela tukulela mathuulelo aatu naonanga vyongo motukulela zelu dhaatu, ninooda i-ya a-rela makundo a Yohova. (1 Ak. 3:19) Hora dhinjinji “zelu dhailamboi” dhinoiri-a ira atu ta-avwelenga Nlungu. Makristau enango au Pegamo na Tiyatira, tatoroma ona myasa yoonga lambela vifwano thitho vyamararuo ninga mwemo atu anjinji amatatamonimo mwaonela aliwa. Yesu atosumulula mwakopolo mipingo yen’na, namwasa opwaza kalelo la mararuo. (Apk. 2:14, 20) Malamboano thitho ninokanyi-edhiwa na ilamboi ira nionenga vyongo modaweya. Abali-u aututuni venango afwi-u tanooda nikanyi-edha venango nilimbi-a ira niire vyongo vyevyo vinairi-e ira ni-iyachi m’vwela Yohova. Mofwanafwani-a, aliwa tanooda niwandela ira kai vyodaweya irana vyongo vinofuna i-yo thitho ira makundo a Bibilyani amakalelo apama mbawale. Hora dhinango ninooda ona ira malangi-o anoniva-a Yohova mbo-okami-a. Venango thitho ninofiyedhela wesedhiwa ira “niire vyongo kwaranya vyolembiwa.”—1 Ak. 4:6. w23.07 16 ¶10-11

Mariya mmee wa Yesu anofuneela limbi-iwa. Liye kaali vabanjani, mbwenye ngeluo atom’mwandela ira unodha kaana wise. Liye ali a-analelevo mwana, mbwenye anofuneya m’samalela mwana afuna dhakala Mesiya. Voi liye kaagonathidhevo na lombwana, n’nga am’mwandele a-vi Yosefe wenuo adedi-edhela kala vabanjani na liye? (Luk. 1:26-33) N’nga Mariya afwaidhe a-vi kopolo? Liye anonyindela atu enango ira taode m’kami-a. Mofwanafwani-a, atom’vepa Gabirieli ira am’mwandelemo vyongo vinjinji vyokuza urumiwiwo. (Luk. 1:34) Vasogolovee liye atodhowa wa balee mwinango dhinalee Elizabeti wenuo akalecha “tatamu la myango” yau Yuda. Elizabeti atom’simba Mariya thitho movudheleliwa na Yohova, atom’mwandelamo ulosi okuza mwana afuna dhabaliwa. (Luk. 1:39-45) Mariya atoonga ira Yohova “utom’mwirela vyakopolo na dhandhalee.” (Luk. 1:46-51) Yohova atom’va-a kopolo Mariya vo-indi-edha basa Gabirieli na Elizabeti. w23.10 14-15 ¶10-12

Anamafunjedha oyeva a Kristu ozoziwa na zimu ochena, tali vauxamwali wavakundu na Yohova. Atu okwakwana 144.000 anodha labanga ninga alimbo velela sembe dhulu vambo-i na Yesu. (Apk. 14:1) Limburo lochena la sasa linoimelela ira aliwa tatotukuliwa kala a-ima auzimu a Nlungu vahora ili aliwa vailambo yavathi. (Aro. 8:15-17) Limburo lochena mokwaranyi-a la sasani, linoimelela dhulu weo unokala Yohova. “Nguwo” yeniyo ya-iyani-a limburo lochena na limburo lochena mokwaranyi-a, inoimelela manungo a Yesu enao ali ninga yobarela yom’muimwanani-a dhowa dhulu malabanga ninga ndimuwa waalimbo velela sembe wavadhulu mukachisi wauzimu. Yesu angavelenle manungwee vyali liye vailamboi ninga sembe yoombolana atu, atoodhula ndhila yoi Makristau othene ozoziwa tamakaena ingumi dhulu. Aliwa tanofuneela i-yachi manungwiwa vailambo yavathi ira tamawachele yotuva dhulu.—Aeb. 10:19, 20; 1 Ak. 15:5 w23.10 28 ¶13

Gidiyoni anoidhiwa ira anoodawi-a vyongo thitho vyevi vyatom’mwiri-a ira aode wakula mopwaseya vevo alombwana au Efuraimu vyam’momba aliwa landu. (Ana. 8:1-3) Liye kaarumenle monyanyuwa. Liye atoothonyi-edha ira ali odhiyevi-a voavuruwana thitho aongana moriya rima, vyevi vyatoiri-a ira mirima yaatwao iode kurudheya. Andimuwa avapingoni azelu tanomsazi-edha Gidiyoni vovuruwana mopwaseya thitho wakula mokurudheya taombiwanga landu. (Yak. 3:13) Tairangana vyevi, tanokami-a ira pingoni mukale rendele. Vevo atu vyaromile aliwa mtitimi-a Gidiyoni namwasa oganyali kondo yolimbanana Amidiyani, liye atoakami-a atwao ira tavelelenga titimi-olo wa Yohova. (Ana. 8:22, 23) N’nga abali tana vizo tanasazi-edhe a-vi ifwanafwani-o ya Gidiyoni? Aliwa anofwanela velela titimi-o wa Yohova namwasa wa vyongo viirile aliwa. (1 Ak. 4:6, 7) Mofwanafwani-a, akala ndimuwa wavapingoni unaasimbiwa namwasa wa dodoliso lofunji-a lina liye, unooda akami-a atwao ira tathuulelenga weo ukumele makundo anofunji-a liye enao ali madhu a Nlungu venango mafunji-edho enao gulu la Yohova linovelela aliwa. Hora dhothene andimuwa avapingoni, tanofwanela dhisakasaka ira taone akala tanoiri-a atu enango asimbanga venango msimba Yohova. w23.06 4 ¶7-8

Akala vinovepha i-yo kavinoireya, ninofwanela vifuka, ‘N’nga vinovepha miyovi pyofwanelela?’ Hora dhinjinji atu anothuulela ira anoidhiwa vyevyo vili vyofwanelela waaliwa. Mbwenye vinovepha i-yo hora dhinango vinooda kala vyo-okami-a maningi. Nalobelelanga nyarwa inangoyee, vanooda kala ndhila yaphama yomali-edha nyarwa yo-iyana na yeniyo inovepha i-yo. Thitho vyongo vinango vinavephe i-yo vinooda kala vyo-iyana na mwemo munofuna Yohova. (1 Ju. 5:14) Mofwanafwani-a, Kathuulelani vya anamabala tavepile Yohova ira mwaniuo adhowenave kala mwaudhivela. Mbwenye vyaphile aliwavyo vinooneya ira kavyali vyofwanelela. Yohova kanokanyi-edha mutu uliwethene ira am’lambelenga. Unofuna ira mutu uliwethene asakulenga ekene m’lambela thangani-avo thitho naa-imene. (Dot. 10:12, 13; 30:19, 20) Malo mwavyevyo, anamabala anofwanela m’vepha Yohova ira aakami-e ira taafiyenga varimani taafunji-anga a-imiwa na ifunelo yoi tam’dhiveliwengana Yohova thitho kala vauxamwali olimba na liye.—San. 22:6; Aef. 6:4. w23.11 21 ¶5; 23 ¶12

Dhoweni nioneni ndhila imbo-i iongiwile mundima ivirilila, mwemo munathonyi-edhe i-yo ira ninodhiveliwana atu enango. Ninotapanya vyevyo vyaongile rumiwi Paulo ira: “Mudhowenave didili-ana.” Mwasiwa ngwan’ni didili-a atu enango unothonyi-edha ira nitokaana udhivela? Bukhu n’nango loonga madhu a Bibilyani laongile ira madhu oi “didili-ana” enao rumiwi Paulo a-indi-edhele liye basa anothapulela “kala vaduzi na mutu unogumanana nyarwa ilukulu ira mum’limbi-e.” Ee-no nam’didili-anga Kristau fwi-u wenuo ugumanena nyarwa, ninom’kami-a ira avilele nodhowanave wenda vandhila yodhowa mawachela ingumi yo-omala. Hora iliyothene inom’didili-a i-yo bali venango rongola, ninothonyi-edha ira ninowadhiveliwana Makristau afwi-u. (2 Ak. 7:6, 7, 13) Didili-a atu enango unovwelana na tangaranga. Mwasiwa ngwan’ni ninoonga ee-no? Namwasa oi rima wa tangaranga ngwenuo unom’limbi-a mutu ira adidili-enga atu enango noakami-a. Ee-no, yoroma kukaana tangaranga nodidili-a atu enango. Paulo atovwelani-a tangaranga dha Nlungu nodidili-a atu enango. Rumiwi Paulo atoonga ira Yohova ngu “Baba wa tangaranga dhilukulu thitho Nlungu wenuo unonididili-a va nyarwa iliyothene.”—2 Ak. 1:3. w23.11 9-10 ¶8-10

Anama-arela othene Akristu tanodedi-edhela dhagumanana nyarwa. Kathuulelani vyevyo vyam’muireele rumiwi Paulo valembela liye Makristau awu Tezalonika, liye aongile ira: “Vyali i-yo vambo-i nanyo, nanouwandelelanitu ira ninodha gumanana nyarwa ninga mwemo munoidhiwela nyo. Vyauwandelani i-yovyo pievyodi vinoireya.” (1 At. 3:4) Thitho wa Makristau awu Korito, liye atoalembela ira: “Abali, ninofuna ira muidhiwe nyarwa dhinogumanana i-yo. . . . Kanana idedi-edho yoi ninodhakaana okoka ingumi.” (2 Ak. 1:8; 11:23-27) Malamboano Makristau tanogumanana nyarwa dhinangodhee. (2 Ti. 3:12) Namwasa wairoromelo thitho okala nama-arela wa Yesu abalinyu na axamwalinyu tanooda uoni-ani nyarwa. N’nga munogumanana nyarwa basani namwasa odhilimbi-edha ira vyongo moona rima? (Aeb. 13:18) N’nga munoruni-iwa naandimuwa andimuwa amaguverno namwasa owandelanga atu enango vyaidedi-edho inyu? Masiki nigumanena nyarwa dhoi-avi, Paulo atoonga ira ninofwanela kala osangalala. w23.12 10-11 ¶9-10

Yakobo atovilela nyarwa dhinjinji. Ambili mwa a-ima a Yakobo, Simiyoni na Levi tatoiri-a manyadho banja liwa thitho tatonyozi-a dhina la Yohova. Wenjedhela vevo i-yana odhiveliwiwa wa Yakobo, Rakele, atokwa vabala liye mwaniwa wanambili. Thitho na mwasa wa ndhala ilukulu, Yakobo atokanyi-edheya thamela wu Iguputu angali oulula. (Mar. 35:16-19; 37:28; 45:9-11, 28) Va vyothene vyam’mwireele Yakobo, kaa-iidhe roromeleya wa Yohova thitho vyolanyedha vyee. Yohova atomthonyi-edha ira unosangalala na liye. Mofwanafwani-a, Yohova atomraeli-a Yakobo vomva-a fuma injinji. Thitho kathuulelani mwemo mwasimbele liye Yohova angagumanena mwanee Yosefe wenuo athuulela liye ira utokwa. Yakobo atooda vilela nyarwa namwasa okala vauxamwali wapama na Yohova. (Mar. 30:43; 32:9, 10; 46:28-30) I-yo thitho nakala vauxamwali wapama na Yohova ninooda vilela nyarwa dho-odedi-edhela dhedho dhinogumanana i-yo. w23.04 15 ¶6-7

Davide, wenuo alembile Salimo 23, atoothonyi-edha ira kaakaikela ira Yohova unom’dhiveliwana maningi. Liye atoonga vyoonga uxamwalee olimba wenuo walivo vari va liye na Yohova wenuo ali Namakumbizee. Davide avivwa ira ali obareleya namwasa oi anoorumeli-a ira Yohova am’sogolelenga thitho anom’nyindela va yongo iliyothene. Davide anoidhiwa ira Yohova unodham’thonyi-edha udhivela va ingumee yothene. Mwasiwa ngwan’ni liye kaakaikela vyevi navang’onovene? Davide anoona ira Yohova unom’samalela namwasa oi hora dhothene anom’va-a vyongo vyafuneela liye. Anoidhiwa ira Yohova ngufwee thitho ira anoosangalala na liye. Ngumwasee liye kaakaikela ira masiki agumanena nyarwa dhoi a-vi, Yohova unodha dhowanave m’samalela. Voi Davide anoororomela maningi ira Yohova unom’dhiveliwana thitho unodha m’samalela, vyevi vyatom’kami-a ira a-akhumbanyenga mbwenye asangalalenga.—Sal. 16:11. w24.01 29 ¶12-13

Romela vahora ya kondo yanambili ya vailambo yothene, atu a Yohova muvilambo vinjinji takadhi talambanga basa yolaleela mo-ododomi-iwa. Thitho basali likadhi liwendanga phama maningi. Malamboano, abali a Gulu Lotonga anaadhowanave nyindela malangi-o okumela wa Kristu. Aliwa anofuna ira malangi-o anovelela aliwa wa abali takalenga ovwelana na vinofuna Nlungu. Aliwa ano-indi-edha basa anamaing’anela isa na andimuwa avapingoni ira tavelelenga phama malangi-o mipingoni. Andimuwa avapingo ni ozoziwa tali “wu dhandha lodyana” la Kristu. (Apk. 2:1) Pyaimbarimbari ira andimuwa avapingoni othene kai olongomana thitho anodawi-echa vyongo. Mose na Yoswa, naaliwene thitho tanoodawi-a vyongo, ninga mwemo mwairecha arumiwi. (Num. 20:12; Yos. 9:14, 15; Aro. 3:23) Mbwenye Kristu unosogolela dhaari ororomeleya na andimuwa avapingoni, thitho unodhowanave irana vyevi. Ee-no, nitokaana myasa yokwakwanela yoniiri-a roromelanga malangi-o anoniva-a Yesu dhela mwaatu asakule liye ira tanisogolelenga. w24.02 23-24 ¶13-14

Malamboano ninooda m’sangalali-a Yohova, voonga vya liye vothonyi-edha ira ninom’simba thitho m’dhiveliwana. Nalaleelanga, ninothuulela ira ifunelwi-u ilukulu kukami-a atu kala vauxamwali na Yohova noakami-a ira naaliwene tam’monenga ira ngu Babiwa waudhivela. (Yak. 4:8) Ninosangalala maningi nathonyi-edha atu enango vyevyo vinoonga Bibilya vyokuza Yohova ira, ngwaudhivela, walongomano, wazelu, wakopolo thitho utokaana makalelo enango aphama. Ninom’titimi-a Yohova nom’sangalali-a navilimbi-edhanga m’sazi-edha. Nairangana vyevi, ninokala o-iyana maningi naatu ailambo yothakalila. Atu enango anooda onanga ira nili o-iyana thitho anongodabwa mwasee ukalele i-yo o-iyana naaliwa. (Mat. 5:14-16) Ee-no nairanga naaliwa vyongo vambo-i dambo na dambo, ninooda awandela mwasee unoirela i-yo vyongo mo-iyana naaliwa. Vyo-arelavovyee vinodha kala vyoi atu ana rima waphama anodha roma kopeya na Nlungwi-u. Nam’titimi-anga Yohova mundhila dhedhi, ninosangalali-a rimee 1 Ti. 2:3, 4 . w24.02 10 ¶7

Ira mukhale Kristau olimba mwauzimu, munofwanela funjedha madodoliso enango anaukhami-eni vaingumi inyu. Dodoliso lelo linooda ukhami-ani ira mukwakwaneli-edhe phama vizo vinyu mwari mwapingo, mulembiwe basa lelo linaukhami-eni fwanya vyofuneela vyavaingumini thitho muvwelanenga naatu enango. Mwaifwanafwani-o mufunjedhenga leri nolemba phama. Bibilya linoonga ira mutu wenuo unoleri madhu a Nlungu dambo na dambo noathuulelanga modi-a unokhala osangalala thitho vyongo vinommwendela phama. (Sal. 1:1-3) Mutu aleringa Bibilya dambo nlilothene, unoidhiwa mathuulelo a Yohova thitho vyevyo vinodha mkami-a ira athuulelenga phama no-arelanga makhundo a Bibilyani. (Sang. 1:3, 4) Abali naarongoli-u anofuna khami-iwa naatu oidhiwa funji-a thitho velela malangi-o okhumela Bibilyani. Akhala munoidhiwa leri nolemba phama, munooda khozeela mwasinyu na vyowakula vinyu ira viode limbi-a iroromelo ya abali naarongola pingoni. Munooda lemba makhundo okhami-a vahora inofunjedha nyo Bibilya wavamwekene, vuruwana myasa yapingo, ya gumano waisa na ya gawo. Makhundwala anodha limbi-a iroromelwinyu thitho limbi-a iroromelo yaatu enango. w23.12 26-27 ¶9-11

Mwaovanga, muthuulelenga vyongo vinofuna dhaira Yohova sogolou Satana adhakhumi-iwavo. Vagumano wa gawo wa 2014, vatookala ifwanafwani-o. Muifwanafwani-oyo, baba anootapanya na banjalee mwemo lemba la 2 Timoteo 3:1-5 munavweele aliwa nadhakhala Paradaizoni. Tatoolileri ira: “Muilambo ipya inodha kala hora yavakhundu thitho yosangalali-a. Voi atu anodha kala odhiveliwana afwiwa, odhiveliwana m’lambela Yohova, odhiyevi-a, opwaseya, osimba Nlungu, ovwela anamabaliwa, osimba, ororomeleya, odhiveliwana abaliwa, ofuna vwelana na afwiwa, oonga vyongo vyapama waafwiwa, odhikondi-a, okhurudheya, odhiveliwana vyapama, onyindeleya, odhiveliwana atu enango, o-odhigweli-a thitho o-ogaya, odhiveliwana Nlungu malo modhiveliwana vyosangalali-a, thitho odhivelela wa Nlungu. Atu othene enala kwaa-iye.” N’nga munotapanyecha banjanimwinyu venango naafwinyu mwemo munofuna dhakalela ingumi muilambo ipya. w24.01 6 ¶13-14

Pyolimbi-a idhiwa ira Yohova unosangalala naatwee othene ninga gulu. Bibilya linoonga ira: “Yohova unosangalala naatwee.” (Sal. 149:4) Mbweye hora dhinango atu enango anokaikela novifukanga ira, ‘N’nga Yohova unosangalala na miyo vamekene?’ Anjinji mwaarumiwi ororomeleya a Yohova awalelene hora dhinango tanoorucheya na mathuulelo enala. (1 Sa. 1:6-10; Yob. 29:2, 4; Sal. 51:11) Bibilya linothonyi-edha ira atu enao oi kai olongomana, anooda m’sangalali-a Yohova. N’nga ninairena a-vi vyevi? Ninofwanela m’roromela Yesu Kristu nobadiziwa. (Ju. 3:16) Naira ee-no ninothonyi-edha vochena ira nitochinyuwa vyodawa vi-u thitho nitolanyedha ira ninongo irana vyongo vinofuna Nlungu. (May. 2:38; 3:19) Yohova unosangalala aniona niirangana vyevi naifunelo yoi nikale vauxamwali olimba na liye. Yohova unosangalala na i-yo thitho unoniona ira nili afwee avarimani nadhowanave iranga vyongo vyothene vinaode i-yo, vokwakwaneli-edha vyalanyedhile i-yo vahora yavivelela i-yo.—Sal. 25:14. w24.03 26 ¶1-2

Ninooda asazi-edhela akala andimuwa andimuwa aanamatonga tatokondi-a basa li-u lolaleela. Mukale onyindela ira Yohova unodha ukami-ani ira mulabenga pama urumiwinyu. Mulobelenga nom’vepa ira mukale olimba rima na azelu. Anjinji a i-yo ninogumanana nyarwa dhokuza manungwi-u, mathuulelo odaweya, wukwa waatu anoadhiveliwana i-yo, nyarwa dha banjani, oni-iwa nyarwa venango nyarwa dhinango. Thitho vyongo ninga sau na kondo vitoiri-a ira vikale vyorucha maningi limbanana nyarwadhi. Mulobelenga wa Yohova kumela vathi varima. Mum’mwandelemo vinoireya vaingumi yinyu ninga mule munoirela nyo na fwinyu wavarimani. Muroromelenga ira Yohova “unodha iravo yongo.” ( Sal. 37:3, 5) Limbi-edha lobela unooda nikami-a “vilela nyarwa.” (Aro. 12:12) Yohova unoidhiwa vyongo vyothene vinoireela arumiwee thitho unovwa “kuwa wiwa ovepa kami-iwa.—Sal. 145:18, 19. w23.05 5-6 ¶12-15

Nafunanga sakula vyoira va myasa milukulu, ninofwanela “zindiyela ifunelo ya Yohova,” noiranga vyongo movwelana na vyevyo. (Aef. 5:17) Nazindiyela makundo a Bibilyani ovwelana na mwemo mukalele vyongo wa-iyo, vinokala ira nitofwanya mathuulelo a Yohova vamwasuo. Ee-no na-indi-edhanga basa makundwao ninosakula vyoira mwazelu. Satana wenuo uli mwidani-u “othakala,” unofuna ira nikalenga opingeya na vyongo vya ilamboi naifunelo yoi na-akaengana hora yom’labela Nlungu. Pyo-orucha ira Kristau a-elenga vasogolo fuma, mafunji-edho avadhulu venango basa malo mom’labela Yohova. (1 Ju. 5:19) Vyaira e-no, mutuo unokala ira utoroma thuulela ninga atu ailamboi. Pyaimbarimbari ira vyongo vyevi vaokene baa-i kai vyodaweya, mbwenye kavinofwanela kalanga valimburo loroma vaingumii-u. w24.03 24 ¶16-17