प्रेषितहरूका कार्य
१३ एन्टिओकको स्थानीय मण्डलीमा भविष्यवक्ता अनि शिक्षकहरू थिए।+ ती थिए: बर्णाबास, नाइजर भनिने सिमियोन, साइरेनीका लुसियस, प्रान्तीय शासक हेरोदका सहपाठी मनेन र सावल। २ उनीहरूले यहोवा* परमेश्वरको उपासना गर्दै अनि उपवास बस्दै गरेको बेला पवित्र शक्तिले भन्यो: “बर्णाबास र सावललाई+ मैले जुन काम गर्न बोलाएको हुँ,+ त्यसको लागि तिनीहरूलाई मेरो निम्ति अलग पार।” ३ अनि उपवास बसेपछि र प्रार्थना गरेपछि उनीहरूले बर्णाबास र सावलमाथि आफ्नो हात राखे अनि तिनीहरूलाई पठाए।
४ त्यसैले पवित्र शक्तिद्वारा पठाइएका यी मानिसहरू सिल्युसिया झरे अनि त्यहाँबाट समुद्री यात्रा गरेर साइप्रस गए। ५ सलामिस पुगेपछि तिनीहरूले यहुदीहरूका सभाघरहरूमा परमेश्वरको वचन प्रचार गर्न थाले। तिनीहरूसित युहन्ना पनि थिए, जसले तिनीहरूको सेवा गर्थे।+
६ पूरै टापुमा प्रचार गर्दै पाफोस पुगेपछि तिनीहरूले बार-येसु नाम गरेका यहुदीलाई भेटे, जो तान्त्रिक अनि झूटा भविष्यवक्ता थिए। ७ उनी प्रान्तीय राज्यपाल* सर्गियस पौलसकहाँ काम गर्थे। सर्गियस पौलस बुद्धिमान् मानिस थिए। तिनले बर्णाबास अनि सावललाई आफूकहाँ बोलाए किनकि तिनी परमेश्वरको वचन सुन्न उत्सुक थिए। ८ तर तान्त्रिक इलुमासले (‘इलुमास’ नामको अनुवाद गर्दा अर्थ हुन्छ, तान्त्रिक) तिनीहरूको विरोध गर्न थाले अनि प्रान्तीय राज्यपाललाई प्रभुमाथि विश्वास गर्नदेखि रोक्न खोजे। ९ तर सावल, जसलाई पावल पनि भनिन्छ, तिनले पवित्र शक्तिले भरिएर उनलाई एकटक लगाएर हेरे १० र भने: “ए हरकिसिमको झूट अनि खराबीले भरिएको मानिस, तँ दियाबलको छोरो+ अनि हरेक न्यायोचित कामको शत्रु होस्। के तँ यहोवा* परमेश्वरको सही मार्गलाई बङ्ग्याउन छोड्दैनस्? ११ अब हेर्, तँमाथि यहोवा* परमेश्वरको हात परेको छ। तँ अन्धो हुनेछस् र केही समय तैँले घामको उज्यालो देख्नेछैनस्।” नभन्दै उनको आँखामा बाक्लो कुहिरो लागेर उनलाई अन्धकारले छोप्यो र उनी आफ्नो हात समातेर डोऱ्याइदिने मानिस खोज्दै छामछाम-छुमछुम गर्न थाले। १२ यो देखेर प्रान्तीय राज्यपालले प्रभुमा विश्वास गरे किनकि यहोवा* परमेश्वरको विषयमा सुनेर तिनी दङ्ग परेका थिए।
१३ तब पावल र तिनका साथीहरू पाफोसबाट जहाज चढेर पाम्फिलियाको पर्गा पुगे। तर युहन्ना+ तिनीहरूलाई छोडेर यरुसलेम फर्के।+ १४ तिनीहरूचाहिँ पर्गाबाट पिसिदियाको एन्टिओक गए र विश्रामदिनमा* सभाघरभित्र गएर बसे।+ १५ तब मोसाको व्यवस्था र भविष्यवक्ताहरूको पुस्तक जनसमक्ष पढ्ने काम सिद्धिएपछि+ सभाघरका पदाधिकारीहरूले पावल र बर्णाबासलाई यस्तो आग्रह गरे: “भाइहरू हो, यदि तपाईँहरूसित मानिसहरूका निम्ति प्रोत्साहनका दुई-चार शब्द छन् भने कृपया सुनाउनुहोस्।” १६ तब पावल खडा भए अनि हातले सबैलाई शान्त हुने इसारा गर्दै यसो भने:
“हे इस्राएलीहरू अनि परमेश्वरको भय मान्ने अरू मानिसहरू हो, मेरो कुरा सुन्नुहोस्। १७ इस्राएलीहरूका परमेश्वरले हाम्रा पुर्खाहरूलाई रोज्नुभयो र तिनीहरू मिश्र देशमा प्रवासी भएर बसेको बेला उहाँले तिनीहरूलाई उच्च पार्नुभयो र आफ्नो पराक्रमी बाहुलीले त्यहाँबाट निकालेर ल्याउनुभयो।+ १८ अनि लगभग ४० वर्षसम्म उहाँले निर्जनभूमिमा तिनीहरूलाई सहनुभयो।+ १९ कनान देशका सात जातिलाई नाश गरेपछि उहाँले इस्राएलीहरूलाई त्यहाँको जमिन पैतृक सम्पत्तिको रूपमा दिनुभयो।+ २० यी सबै कुरा ४५० वर्षको दौडान भएका थिए।
“त्यसपछि भविष्यवक्ता समुएलको दिनसम्म उहाँले तिनीहरूलाई न्यायकर्ताहरू दिनुभयो।+ २१ तर त्यसपछि तिनीहरूले राजा मागे।+ त्यसैले परमेश्वरले किसका छोरा साउललाई रोज्नुभयो, जो बिन्यामिनको कुलका थिए+ र तिनलाई ४० वर्षसम्म तिनीहरूको राजा बनाउनुभयो। २२ तिनलाई पदच्युत गरेपछि उहाँले दाउदलाई तिनीहरूको राजा बनाउनुभयो,+ जसको विषयमा उहाँ आफैले यस्तो साक्षी दिनुभयो: ‘मैले यिसैको छोरा+ दाउदलाई भेट्टाएको छु। ऊ मलाई मन पर्ने मानिस+ हो र मैले इच्छा गरेको सबै कुरा उसले पूरा गर्नेछ।’ २३ यिनै मानिसको सन्तानबाट परमेश्वरले आफ्नो प्रतिज्ञाबमोजिम इस्राएलीहरूलाई एक जना उद्धारक अर्थात् येसु दिनुभयो।+ २४ उहाँ आउनुभन्दा अघि युहन्नाले सबै इस्राएलीलाई आफ्ना पापहरूको निम्ति पश्चात्ताप गर्न र त्यसको प्रतीकस्वरूप बप्तिस्मा गर्न प्रचार गरेका थिए।+ २५ तर आफ्नो सेवाको अन्ततिर युहन्ना तिनीहरूलाई यसरी सोध्ने गर्थे: ‘तिमीहरू मलाई को भन्ठान्छौ? म उहाँ होइनँ। तर हेर, एक जना आउँदै हुनुहुन्छ, जसको खुट्टाको जुत्ता फुकाल्न समेत म लायकको छैनँ।’+
२६ “हे भाइहरू, अब्राहामका सन्तान अनि परमेश्वरको भय मान्ने अरू मानिसहरू हो, उद्धारको यो वचन परमेश्वरले हामीकहाँ पठाउनुभएको छ।+ २७ तर यरुसलेमका बासिन्दाहरूले अनि तिनीहरूका शासकहरूले उहाँलाई चिनेनन्। बरु उहाँको विषयमा फैसला गर्दा उल्टै तिनीहरूले भविष्यवक्ताहरूका ती वचन पूरा गरे,+ जुन हरेक विश्रामदिनमा ठूलो स्वरले पढ्ने गरिन्छ। २८ मृत्युदण्ड दिन योग्य कुनै कुरा तिनीहरूले उहाँमा फेला पारेनन्+ तैपनि उहाँलाई मृत्युदण्ड दिन तिनीहरूले पिलातससित माग गरे।+ २९ यसरी उहाँको विषयमा लेखिएका सबै कुरा तिनीहरूले पूरा गरिसकेपछि उहाँलाई खम्बाबाट* तल झारे अनि चिहानमा लगेर राखे।+ ३० तर परमेश्वरले उहाँलाई मृत्युबाट ब्युँताउनुभयो।+ ३१ अनि धेरै दिनसम्म उहाँ ती मानिसहरूसामु देखा परिरहनुभयो, जो उहाँसित गालिलबाट यरुसलेम गएका थिए। तिनीहरूले अहिले उहाँको विषयमा मानिसहरूलाई साक्षी दिइरहेका छन्।+
३२ “त्यसैले हाम्रा पुर्खाहरूसित गरिएको प्रतिज्ञासित सम्बन्धित सुसमाचार हामी तपाईँहरूलाई सुनाउँदै छौँ। ३३ येसुलाई फेरि जीवित पारेर परमेश्वरले तिनीहरूका सन्तान अर्थात् हाम्रो निम्ति त्यस प्रतिज्ञाको हरेक पक्ष पूरा गर्नुभएको छ,+ जस्तो दोस्रो भजनमा पनि लेखिएको छ: ‘तिमी मेरो छोरा हौ। म आज तिम्रो बुबा बनेको छु।’+ ३४ परमेश्वरले उहाँलाई मृत्युबाट फेरि जीवित पार्नुभयो र उहाँलाई कहिल्यै कुहिन नदिने निश्चय गर्नुभयो, जुन उहाँले भन्नुभएको यो वचनबाट पनि प्रस्ट हुन्छ: ‘म तिमीहरूलाई मैले दाउदलाई प्रतिज्ञा गरेको अटल प्रेम* देखाउनेछु। यो प्रतिज्ञा भरोसायोग्य छ।’+ ३५ तसर्थ अर्को भजनमा उहाँ यसो पनि भन्नुहुन्छ: ‘तपाईँले आफ्नो वफादार जनलाई कुहिन दिनुहुनेछैन।’+ ३६ एकातर्फ जहाँसम्म दाउदको कुरा छ, तिनले आफ्नो जीवनभर परमेश्वरको सेवा गरे* अनि मृत्युको चिर निद्रामा परे। तिनी आफ्ना पुर्खाहरूसित गाडिए र तिनी कुहिनुपऱ्यो।+ ३७ तर अर्कोतर्फ जसलाई परमेश्वरले ब्युँताउनुभयो, उहाँ भने कुहिनु परेन।+
३८ “त्यसैले हे भाइहरू हो, तपाईँहरूलाई यो कुरा थाह होस्, यही येसुद्वारा पापको क्षमा पाउन सकिन्छ भनेर हामी तपाईँहरूलाई प्रचार गर्दै छौँ।+ ३९ अनि ज-जसले येसुमाथि विश्वास गर्छन्, तिनीहरू सबै मोसाको व्यवस्थाले+ निर्दोष साबित गर्न नसकेका कुराहरूबाट निर्दोष साबित हुनेछन्+ भनेर पनि हामी प्रचार गर्दै छौँ। ४० त्यसैले होसियार हुनुहोस् नत्र त भविष्यवक्ताहरूको पुस्तकमा लेखिएको यो वचन तपाईँहरूमाथि आइपर्नेछ: ४१ ‘हे खिसी गर्नेहरू हो, मेरो काम हेर अनि अचम्म मान र नाश भइजाओ किनकि तिमीहरूको पालामा म यस्तो काम गर्दै छु, जुन कामको विषयमा कसैले सविस्तार बतायो भने पनि तिमीहरूले कदापि पत्याउनेछैनौ।’”+
४२ तिनीहरू सभाघरबाट बाहिर निस्किरहेको बेला मानिसहरूले अर्को विश्रामदिनमा ती कुराहरू फेरि सुनाइदिन बिन्ती गरे। ४३ सभाघरको सभा विसर्जन भएपछि धेरै यहुदीका साथै धर्म परिवर्तन गरेर यहुदी भएकाहरू, जसले परमेश्वरको उपासना गर्थे, उनीहरू पनि पावल र बर्णाबासको पछि लागे। तब तिनीहरूले ती मानिसहरूसित कुराकानी गरे र परमेश्वरको असीम अनुग्रह पाउन योग्य भइरहन प्रोत्साहन दिए।+
४४ अर्को विश्रामदिनमा यहोवा* परमेश्वरको वचन सुन्न लगभग पूरै सहर उर्लिएर आयो। ४५ मानिसहरूको भीड देखेर यहुदीहरू डाहले भरिए अनि पावलले भनेका कुराहरूको खण्डन गरेर तिनीहरूले तिनको कुराको निन्दा गर्न थाले।+ ४६ तब पावल र बर्णाबासले साहसी भएर तिनीहरूलाई यसो भने: “परमेश्वरको वचन सर्वप्रथम तपाईँहरूलाई सुनाउनु आवश्यक थियो।+ तर तपाईँहरू त्यसलाई इन्कार गर्दै हुनुहुन्छ र आफैलाई अनन्त जीवन पाउन अयोग्य साबित गर्दै हुनुहुन्छ। त्यसैले हेर्नुहोस्, अब हामी अन्यजातिका मानिसहरूकहाँ जाँदै छौँ।+ ४७ किनकि यहोवा* परमेश्वरले हामीलाई यस्तो आज्ञा दिनुभएको छ, ‘मानिसहरूको उद्धार गर्ने मेरो माध्यमबारे पृथ्वीको कुनाकुनासम्म गएर घोषणा गर्न मैले तिमीलाई जातिजातिका मानिसहरूका लागि ज्योति नियुक्त गरेको छु।’”+
४८ यो कुरा सुनेर अन्यजातिका मानिसहरू रमाए अनि यहोवा* परमेश्वरको वचनको प्रशंसा गर्न थाले। साथै ज-जससित अनन्त जीवन पाउन लायकको उचित मनसाय थियो, तिनीहरू सबैले प्रभुमा विश्वास गरे। ४९ यसबाहेक यहोवा* परमेश्वरको वचन पूरै देशभरि फैलँदै गयो। ५० तर यहुदीहरूले परमेश्वरको उपासना गर्ने गण्यमान्य स्त्रीहरू अनि सहरका मुख्य-मुख्य पुरुषहरूलाई भड्काए। उनीहरूले पावल र बर्णाबासको खेदो गरे+ अनि तिनीहरूलाई सहरबाहिर धपाए। ५१ त्यसैले तिनीहरूले आफ्नो पैतालाको धुलो टकटक्याए*+ अनि आइकोनियम गए। ५२ अनि चेलाहरू रमाहट+ र पवित्र शक्तिले भरिपूर्ण भइरहे।