Roma

8 KARE rava atura e akaapa i teianei i te aronga i roto ia Iesu Mesia, ko tei aru i ta te Vaerua ra, kare i ta te kopapa.

2 Kua akaora mai oki te ture a te Vaerua ora i roto i te Mesia ra ia Iesu iaku, i te ture ra o te kino e te mate.

3 Te mea kare rava i tika i te ture ra no te mea e apikepike to te ture i te tangata nei, kua tika rava akenei ïa i te Atua i te tono anga mai i tana Tamaiti mei te tangata kino nei te tu, e ei tarangaara oki, kua akamate aia i te kino i roto i te tangata nei:

4 Kia tika te tuatua-tika a te ture i roto ia tatou nei, ko tei kore i aru i ta te kopapa, i ta te Vaerua ra.

5 Te aronga oki i tau i ta te kopapa nei, te akono ra i ta te kopapa; kareka te aronga i tau i ta te Vaerua ra te akono ra ia i ta te Vaerua.

6 Ko te akono oki i ta te kopapa nei, ko te mate ïa; kareka ko te akono i ta te Vaerua ra, ko te ora ïa e te au.

7 No te mea, ko taua anoano o te kopapa nei, e mea tau kore ïa i te Atua; kare oki te reira e kauraro i te ture a te Atua, kare oki e tika kia pera.

8 E teianei, te aronga i tau i ta te kopapa ra, kare rava te Atua e mareka mai ia ratou.

9 Kare ra kotou i tau i ta te kopapa ra, te tau nei ra i ta te Vaerua, me noo tika te Vaerua o te Atua i roto ia kotou. Te ngere ra tetai tangata i te Vaerua o te Mesia ra, kare ïa aia i te tangata nona.

10 E tei roto te Mesia ia kotou ra, te ora nei ïa te vaerua i te tuatua-tika, kua mate tikai ra te kopapa i te ara.

11 Te noo ra tona Vaerua i roto ia kotou to tei akatu ia Iesu mei te mate maira, ko tei akatu i te Mesia mei te mate maira, nana katoa ïa e akaora i to kotou au kopapa mate ra i tona Vaerua i noo i roto ia kotou na.

12 E teianei, e te au taeake ra, e kai ou tatou, kare ra i ta te kopapa, ka akono atu ei tatou i ta te kopapa ra.

13 Kia akono oki kotou i ta te kopapa ra, ka mate ïa kotou: kia tamate ra kotou i ta te kopapa ra i te Vaerua, ka ora ïa kotou.

14 Ko te aronga katoa oki i aratakiia e te Vaerua o te Atua ra, e tamariki anake ïa ratou na te Atua.

15 Kare oki te vaerua tuikaa tei rauka ia kotou kia mataku akaou; ko te Vaerua akatamariki ra tei rauka ia kotou, i karangaʼi oki tatou e, E Aba, e taku Metua.

16 Ko te Vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua:

17 E e tamariki ra, e aronga tuanga ïa; e aronga tuanga i te Atua ra, e aronga tuanga tatou e te Mesia; te mate kapipiti nei oki tatou ma ia katoa, kia akakakā kapipitiia ma ia katoa oki.

18 Te karanga nei oki au e, kare teianei au mate ravarai e tau kia arite atu i te kakā e akakiteia mai ia tatou nei.

19 Te anoano maata o te au mea angaia nei ma te arōrō, te tatari nei ïa i te akakite angaia mai i te tamariki a te Atua:

20 (Kua akariroia oki te au mea angaia nei ei puapinga kore ua, kare ra i te mea anoano, nana ra, na tei akariro ra;)

21 Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.

22 Kua kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā.

23 Kare oki e ko ratou anake ra, ko tatou katoa nei, ko tei rauka te ua mua o te Vaerua ra, ko tatou uaorai tei ngunguru ki roto ia tatou uaorai, i te tatari anga i te akatamariki anga mai, koia oki te akaora anga i to tatou nei kopapa.

24 Ka ora oki tatou i te tatari: ko te tatari i akaraia ra, kare ïa i te tatari: ko ta te tangata oki i kite ra, eaa ua e tau ei kia tatari atu i te reira?

25 I tatari ra tatou i tei kore i kitea e tatou, te manako nei oki tatou i te reira ma te manatu kore.

26 Te tauturu katoa mai nei oki te Vaerua i to tatou apikepike: kare oki tatou i kite meitaki i te mea e tau kia pure tatou: na te Vaerua uaorai e pati i ta tatou ma te ngunguru e kore e tika kia tuatua ra.

27 Kua kite ra aia, ko tei kimi matatio i te ngakau ra, i to te Vaerua anoano, ko tei pati i ta te aronga tapu ra, i tei tau i to te Atua ra anoano.

28 Kua kite oki tatou e te akatupu nei te au mea ravarai i te meitaki no te aronga i anoano i te Atua, no te aronga i karangaia mai i te akakoroanga nana ra.

29 Ko tana i kite i muatangana, ko tana katoa ïa i akono mamao ua, kia akatauia mei tana Tamaiti ra te tu, kia riro aia ei tama mua i te au taeake ra e manganui ra:

30 Ko tana oki i akono mamao ua ra, ko tana katoa ïa i tuatua maira: ko tana oki i tuatua maira, ko tana katoa ïa i akatika: ko tana oki i akatika ra, ko tana katoa ïa i akakakā.

31 Ka akapeea oki tatou i teia au tuatua? No tatou te Atua ra, ka tika iaai kia māro mai?

32 Ko tei kore oki i akaperepere i tana uaorai Tamaiti, ko tei tuku ua mai iaia no tatou katoa nei, eaa oki aia e kore ei e oronga katoa mai i te au mea ravarai no tatou?

33 Naai e tuku mai i te tapepeanga i tei ikiia e te Atua ra? Na te Atua aina, na te akatika mai?

34 Naai e akaapa mai? Na te Mesia aina na tei mate ra; e kua tu akaou akenei ki runga, e tei te rima katau o te Atua ra, te pati ra i ta tatou?

35 Na te aa tatou e akataka ke atu i te aroa o te Mesia ra? Na te maki aina? e na te tumatetenga aina? e na te takinga-kino aina? e na te pongi aina? e na te apinga kore aina? e na te pini aina? e na te koke aina?

36 (Mei tei tataia ra e, “Noou ra matou i taiaʼi i te au rā katoa ra; kua akonoia mei te mamoe no te mate ra.”)

37 Kare, ka riro ra te re i taua au mea katoa nei ia tatou i tei aroa mai ia tatou nei.

38 Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu,

39 Kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.