Akapuapinga Atu i ta Tatou Pure

1. Eaa ta Iehova e pati maira i tona aronga akamori kia rave? (Akara katoa i te tutu.)

KA AERE tatou kiaai no te pumaana e te arataki anga? Kua kite tatou i te pauanga. Ka aere tatou ki te Atua ko Iehova na roto i te pure. Te pati maira a Iehova ia tatou kia pure kiaia. Inangaro aia kia pure putuputu tatou—e “auraka e tukutuku i te pure.” (1 Tesa. 5:17) Ka aere ua tatou kiaia na roto i te pure e kia rauka tana arataki anga no te oraanga. (Mase. 3:5, 6) No te mea e Atua oronga ua aia, kare a Iehova e kotinga i ta tatou pure me pure tatou kiaia.

2. Eaa ta tatou ka uriuri i teia atikara?

² Akaperepere tatou i te akameitakianga o te pure. Inara, penei te ngatā ra kia rauka te tuatau no te pure. Penei te anoanoia ra tatou kia akapuapinga atu i ta tatou pure. Ae, ka kitea te akamaroiroi anga e te arataki anga i roto i te au Tuatua Tapu. I teia atikara, ka uriuri tatou akapeea me akanoo i tetai tuatau no te pure na te akara matatio anga i to Iesu akaraanga. Ka uriuri katoa tatou akapeea me akapuapinga atu i ta tatou pure na te akara anga i te au tumu manako puapinga e rima.

AKANOO A IESU I TETAI TUATAU NO TE PURE

3. Eaa ta Iesu i mārama no te pure?

³ Kua kite a Iesu e te akaperepere ra a Iehova i te pure. I mua ake ka aere mai ei ki te enua, kua kite aia i tona Metua te pauanga i te pure a te au tane e te au vaine tiratiratu. Ei akaraanga, tei te pae a Iesu i tona Metua te pau anga Aia i te au pure ngakau tae a Hana, Davida, e Elia, e te vai atura. (1 Samu. 1:10, 11, 20; 1 Ari. 19:4-6; Sala. 32:5) No reira a Iesu i apii ei i tana au pipi kia pure putuputu ma te irinaki!​—Mata. 7:7-11.

4. Eaa ta tatou ka apii mai mei ta Iesu au pure?

⁴ Na roto i tana uaorai au pure kia Iehova, kua akanoo a Iesu i te akaraanga no tana au pipi. I roto i tana angaanga tutu aere, kua pure putuputu a Iesu. Kua akanoo aia i te tuatau no te pure no te mea e angaanga ua ana aia e kua koropini te tangata iaia. (Mare. 6:31, 45, 46) Kua tu vave aia i te maiata no te pure i te ngai koia anake. (Mare. 1:35) I tetai atianga, kua pure aia i te po katoa i mua ake ka tuku ei i tetai iki anga puapinga. (Luka 6:12, 13) Kua pure putuputu a Iesu i te po i mua ake ka mate ei e kua akamou ki runga i te akaoti anga i tetai angaanga puapinga i te enua nei.​—Mata. 26:39, 42, 44.

5. Akapeea tatou me aru i to Iesu akaraanga me pure?

⁵ Te apii maira to Iesu akaraanga e noatu e maata ta tatou angaanga, ka anoanoia tatou kia akanoo i tetai tuatau no te pure. Mei ia Iesu, ka anoanoia tatou kia taporoporo i te tuatau no te pure—kia ara vave i te maiata me kore i te aiai po. Me pera tatou, te akameitaki ra tatou ia Iehova no teia apinga aroa. Kua maara i tetai tuaine ko Lynne te kite anga aia i te mataora o te pure. Maara iaia, “Te kite anga au e ka rauka iaku i te tuatua kia Iehova i tetai ua atu taime, kua tauturu te reira iaku kia riro Aia ei Oa piri mou noku e kia akapuapinga atu i taku pure.” Kare e ekoko e mei tera katoa tatou. Ka uriuri tatou e rima manako ka tuku ki roto i ta tatou pure.

E RIMA MANAKO PUAPINGA NO TE PURE

6. Ia Apokalupo 4:10, 11, eaa tei tau no Iehova anake?

⁶ Akapaapaa ia Iehova. I roto i tetai orama umere, kua kite te apotetoro ko Ioane e 24 aronga taito i te rangi e akamori ra ia Iehova. Kua akapaapaa ratou i te Atua, ma te āriki anga ‘e tau iaia te kakā, te akangateitei, e te mana.’ (E tatau ia Apokalupo 4:10, 11.) E maata katoa ta te au angera tiratiratu tumu no te akapaapaa e te akangateitei ia Iehova. Tei te rangi ratou i te pae iaia e kua kite meitaki i tona tu. Te kite ra ratou i tona au tu i roto i tana e rave ra. Ia ratou e akara atura ia Iehova e rave angaanga ra, kua akakeuia ratou kia akapaapaa iaia.​—Iobu 38:4-7.

7. Eaa ta tatou ka akapaapaa ia Iehova?

⁷ Ka inangaro katoa tatou i te akapaapaa ia Iehova i roto i ta tatou pure, te akakite anga i to tatou aroa e te akaperepere iaia. Ia tatou e tatau ra e te apii ra i te Pipiria, e akara i to Iehova au tu taau e reka ra. (Iobu 37:23; Roma 11:33) E oti e akakite kia Iehova toou manako. Ka akapaapaa katoa tatou ia Iehova no tei tauturu mai ia tatou e te ngutuare pae vaerua. Te akono ua maira aia ma te paruru ia tatou.​—1 Samu. 1:27; 2:1, 2.

8. Eaa tetai au tumu ka akameitaki tatou ia Iehova? (1 Tesa. 5:18)

⁸ Akameitaki ia Iehova. E maata te au tumu kia akameitaki ia Iehova na roto i te pure. (E tatau ia 1 Tesalonia 5:18.) Ka akameitaki tatou iaia no tetai ua atu mea meitaki; no reira mai oki te au mea memeitaki ravarai. (Iako. 1:17) Ei akaraanga, ka akameitaki tatou i te manea o te enua e te au mea tei angaia. Ka akameitaki katoa tatou i te oraanga, te ngutuare tangata, te au taeake, e te manakonakoanga. Ka akameitaki tatou ia Iehova no tona pirianga oa akaperepere.

9. Eaa tatou ka akameitaki ua ai ia Iehova?

⁹ Penei ka anoanoia tatou kia akamanako i te au tumu no te akameitaki ua ia Iehova. Te noo nei tatou i roto i tetai ao akameitaki kore. Kua akamou ua te tangata ki runga i ta ratou e inangaro ra kare kia akameitaki i ta ratou i rauka. Me tupu te reira, ka riro ta tatou pure ei mea patipati ua. Ka anoanoia tatou kia akameitaki ua i ta Iehova i rave no tatou.​—Luka 6:45.

10. Akapeea te tu akameitaki o tetai tuaine te tauturu anga iaia kia akakoromaki? (Akara katoa i te tutu.)

¹⁰ Ka tauturu te tu akameitaki ia tatou kia akakoromaki i te au manamanata. Akamanako ana i te tua o Kyung-sook, i roto i te makatini Te Punanga Tiaki o Tianuare 15, 2015. Kua tu aia i te maki cancer kino o te ate mama. “Kua manamanata tikai au,” i nana ei. “Manako au kua ngere au i te au mea ravarai, e kua mataku.” Eaa tei tauturu iaia? Karanga aia, i te au po ravarai i mua ake ka moe ei, ka aere aia ki te taʼua runga o te are e kua pure maata e rima apinga no te akameitaki i te reira rā. Kua akapumaana teia iaia e kua akakite i tona akaperepere ia Iehova. Kua kite aia akapeea a Iehova te akamaroiroi anga i tona au tavini tiratiratu i roto i te manamanata, e kua kite mai aia e maata atu te akameitakianga i te manamanata. Mei ia Kyung-sook, e maata te tumu kia akameitaki ia Iehova, noatu to tatou manamanata. Na te akameitakianga iaia na roto i te pure, ka rauka te akakoromaki e te rekareka.

11. Eaa te au pipi a Iesu ka ngakau toa ai te oki anga a Iesu ki te rangi?

¹¹ Pati kia Iehova no te ngakau toa i te tutu aere. I mua ake ka oki ei ki te rangi, kua akamaara a Iesu i tana au pipi no ta ratou angaanga kia tutu aere no runga iaia “i Ierusalema nei, e Iudea katoa oki e pini ua ake, e Samaria.” (Anga. 1:8; Luka 24:46-48) I muri poto ake, kua opu te au arataki ngati Iuda i te nga apotetoro ko Petero e Ioane e kua apai ia raua ki mua i te Sunederi, e kua akaue kia akamutu raua i te tutu aere, tapeka atura ia raua. (Anga. 4:18, 21) Akapeea a Petero e Ioane te ariu anga atu?

12. Ia Angaanga 4:29, 31, eaa ta te au pipi i rave?

¹² No te takinokino anga a te au arataki ngati Iuda, karanga a Petero e Ioane: “E mea tika i te Atua kia akarongo atu ia kotou auraka te Atua, ka akamaara io ïa kotou. Kare oki matou e tika kia kore e tuatua i ta matou i akara akenei, e ta matou i akarongo akenei.” (Anga. 4:19, 20) Te tukuia anga a Petero e Ioane kia aere, kua pure raua kia Iehova ma te akamou ki runga i tona anoano. Pure raua: “E akamaroiroi mai i to au tavini kia tuatua ua i taau tuatua ma te mataku kore.” Kua pau a Iehova i te reira pure ngakau tae.​—E tatau ia Angaanga 4:29, 31.

13. Eaa te apiianga mei te akaraanga o Jin-hyuk?

¹³ Ka aru tatou i te akaraanga o te nga pipi na te tutu aere ua atu anga noatu me akaue mai te kavamani kia akamutu. Akamanako i te akaraanga o Jin-hyuk, e taeake tei tapekaia no tei vai takake. Kua tukuia aia kia akono i te au mouauri e utunga pakari ta ratou, inara kare aia i akatikaia kia tuatua kia ratou no tetai mea ke pera te Pipiria. Kua pure aia kia rauka te tu ngakau toa e te maru kia tutu aere i te au taime ravarai. (Anga. 5:29) Karanga aia: “Kua pau mai a Iehova i taku pure na te akangakau toa anga iaku ma te pakari kia rave i te au apii Pipiria e rima miniti i roto i te au pia areauri. E oti, ka tata reta au i te po e ka oake atu i te reira ki te au mouauri i tera mai rā.” Ka papu katoa ia tatou e ka tauturu a Iehova i ta tatou tutu aere. Mei ia Jin-hyuk, ka pure tatou no te tu ngakau toa e te pakari.

14. Eaa te ka tauturu ia tatou kia akakoromaki i te manamanata? (Salamo 37:3, 5)

¹⁴ Pati tauturu kia Iehova kia akakoromaki i te manamanata. E manganui ia tatou e akakoromaki nei i te au manamanata i te pae kopapa e te manako ngakau, kua takake te akaperepere, tupu te ngutuare ngatā, tupu te takinokino, e te vai atura. E kua riro te au maki kino e te au tamaki ei akangatā atu i te reira. E riringi i toou ngakau kia Iehova. E akakite i toou turanga kiaia mei tetai oa piri mou. Kia pumaana ‘e na Iehova e tauturu ia koe.’​—E tatau ia Salamo 37:3, 5.

15. Akapeea te pure me tauturu ia tatou kia ‘akakoromaki i te manamanata’? Oronga mai i tetai akaraanga.

¹⁵ Na te aruaru anga i te pure ka rauka ia tatou te ‘akakoromaki i te manamanata.’ (Roma 12:12) Kua kite a Iehova i ta tona aronga akamori e akakoromaki ra—“ka akarongo mai aia i ta ratou kapiki.” (Sala. 145:18, 19) Kua kite a Kristie i teia, e painia e 29-ona-mataiti. Ma te manako koreia kua tupu te au maki kino kiaia. Tupu atura te maki taitaia kiaia. I muri mai, kua tu tona mama i tetai maki e ka mate. Karanga a Kristie: “Kua pure akatenga au kia Iehova kia akamaroiroi mai iaku i te au rā ravarai. Kua tauta au i te aru i tetai oraanga pae vaerua na te aere anga ki te au uipaanga e te rave i taku apii.” Karanga aia: “Na te pure i tauturu iaku i toku tuatau tumatetenga. Kua kite au e te vai ua ra a Iehova i te pae iaku, e kua akapumaana mai iaku. Noatu kare toku au manamanata pae kopapa i kore ana, kua pau mai a Iehova i taku pure na te oronga anga mai i te ʼau e te ngakau maru.” Auraka rava tatou e akangaropoina e “kua kite [a Iehova] i te akaora i te aronga akono i te Atua i roto i te timataanga.”​—2 Pete. 2:9.

16. Eaa tatou ka anoano ei i ta Iehova tauturu kia patoi i te timata anga?

¹⁶ Pati tauturu kia Iehova kia patoi i te timata anga. Ei aronga apa ua, e timataia ana tatou kia rave i te tarevake. Te tauta nei a Satani i te timata ia tatou. Tetai ravenga, na te takino anga i to tatou manako na roto i te tamataora tau kore. Ka riro te reira ei akaviivii i to tatou manako—e au mea te ka akaviivii i te tangata e ka taki atu ki te ara kino.—Mare. 7:21-23; Iako. 1:14, 15.

17. Akapeea tatou me angaanga kia patoi i te timata anga? (Akara katoa i te tutu.)

¹⁷ Ka inangaro tatou i ta Iehova tauturu kia patoi i te timata anga kia kore e rave i te tarevake. Kua taiku a Iesu i teia patianga i roto i teia pure: “Auraka e akaruke ia matou kia timataia mai, e akaora ra ia matou i te kino.” (Mata. 6:13) Ka inangaro a Iehova i te tauturu ia tatou, inara, e pati tatou i tana tauturu. E aru katoa tatou i ta tatou pure. Auraka e tatau e e akarongo ki te au manako tarevake tei matauia i teianei ao i roto i ta Satani akatereanga. (Sala. 97:10) Ka akamanako tatou i te au manako meitaki na te tatau anga e te apii anga i te Pipiria. Na te aere anga ki te au uipaanga e te tutu aere ka paruru te reira i to tatou manako. E kua taputou mai a Iehova e kare rava aia e vaoo ia tatou kia timata kinoia.—1 Kori. 10:12, 13.

18. No te pure, eaa ta tatou ka anoanoia kia rave?

¹⁸ Ka anoanoia tatou tataki tai kia pure kia vai tiratiratu kia Iehova i teia au rā openga e te ngatā. E akanoo i tetai tuatau i te au rā no te pure ma te ngakau tae. Ka inangaro a Iehova kia ‘riringi i to tatou ngakau ki mua iaia’ na roto i te pure. (Sala. 62:8) E akapaapaa ia Iehova ma te akameitaki iaia no te au mea tana i rave. E pati tauturu kiaia kia rauka te ngakau toa no te tutu aere. E pati akatenga no te tauturu kia akakoromaki i te au manamanata e te patoi i tetai ua atu timata anga. Auraka e tuku i tetai apinga me kore tangata kia tāpū i taau pure putuputu kia Iehova. Akapeea ra a Iehova me pau mai i ta tatou pure? Ka uriuri tatou i teia uianga puapinga i te atikara ka aru mai.