Мэк тути придэл зор, кай ту уӷодис лэ Иеговасти

1. Со можэт тэ авэл по ди кай лэ Иеговастирэ служытеля?

САР дэ драго по ди, кай лэ Иеговасти чалёл лэско народо. Андэ Библия ԥэнэнпэ, кай о Иегова радуийпэ, кала диқэл пэ пэстирэ мануша (Пс. 149:4). Но дэкала варико можэт тэ гиндой: «Ай мэ уӷодно лэ Иеговасти?». Андэ Библия ԥэнэнпэ пала бут мануша, савэ на парашэнас тэ служын лэ Дэвлэсти. Но дэкала лэндэ тожэ сас гиндоря, через савэ вонэ умэкэнас и вас (1 Сам. 1:6—10; Иов 29:2, 4; Пс. 51:11).

2. Со трэбуй тэ стерас, кай тэ авас уӷодни лэ Иеговасти?

² Анда Библия драго дицол, кай и найидиальни мануша моӷут тэ уӷодин лэ Иеговасти. Со трэбуй тэ стерэл о мануш, кай кадя тэ авэл? Во трэбуй тэ патял андо Исус Христос и тэ болдёл (Иоан. 3:16). Када сыкавэла, кай во каисайля андэ пэстирэ бэзэха и дя алав лэ Дэвлэсти тэ терэл кода, со лэсти чалёл (Дила 2:38; 3:19). Лэ Иеговасти фартэ драго по ди, кала о мануш пашол каринг лэстэ. Если амэ зритярас пэско алав, саво дям лэ Иеговасти, кай тэ жувас важ лэстэ, тоди амэ лэсти уӷодни, и во диқэл пар мэндэ, сар пэ пэстирэ пашутнэ друӷоря (Пс. 25:14).

3. Савэ трин вопросоря амэ роздиқаса?

³ Васо дэсавэ моӷут тэ гиндон, кай вонэ на терэн кода, со лэндар аштярэл о Иегова? Сар о Дэл сыкавэл амэнди, кай амэ уӷодисарас лэсти? Со доԥэнэн, кай во амэнца довольно?

ВАСО ДЭСАВЭ НА ДОПАТЯН, КАЙ ВОНЭ УӶОДНИ ЛЭ ИЕГОВАСТИ

4, 5. Со можэт тэ подритярэл лэ манушэн, савэ гиндон, кай нисо на ашэн?

⁴ Дэсавэ с децтва гиндон пала пэстэ, кай вонэ нисо на ашэн (Пс. 88:15). О ԥрал Адриа́но ԥэнэн: «Скати мэ пэс сэрав, мэ вся и время гиндосаравас, кай мэ нисаво и мандар нинай нисаво толко. Кала мэ сымас цынёнё, мэ мангаваспэ, кай мэрнэ чаче тэ жувэн андо раё пэ ԥув. Но мэ гиндосаравас, кай екжэно мэ када на ашав». О То́ни, савэстэ и родителя най лэ Иеговастирэ свидетеля, ԥэнэн: «О дад и дэй никала на ԥэнэнас манди, кай любин ман и кай абурон манца. Со бы мэ тэ на терав, када вся и время сас мало. Тэ уӷодис лэнди сас нэвозможно».

⁵ Если амэнди здэлпэ, кай амэндар нинай нисаво лашымос, трэбуй упалэ и упалэ тэ ԥэнас пэсти, кай о Иегова кадя на гиндой пала амэндэ. Важ кода кай во екжэно пэрво ԥэндя, кай камэл тэ дружый амэнца (Иоан. 6:44). Возможно, амэ дажэ на дополас, савэ амэ дэ лашэ. Но о Иегова диқэл амаро ди (1 Сам. 16:7; 2 Лет. 6:30). И если во ԥэнэн, кай любий амэн и кай амэ ашас када, тоди амэ трэбуй тэ патяс кадэлэсти (1 Иоан. 3:19, 20).

6. Со сас по ди кай о апостало Павло через и бэзэха, савэ во стердя дэлмут?

⁶ Жы каринг кода сар тэ уӷанэн лэ Дэвлэско чачимос, дэсавэ витерэнас кацави дила, пала сави лэнди идоси лажаво (1 Пёт. 4:3). Дажэ лэ христианонэн, савэ кандэн лэ Иеговас, можэт тэ цырдэл тэ терэн о найлашымос, и вонэ кадэлэса боринпэ. Ԥэнэн тути тиро ди: «Ту найлашо сан»? Тоди, возможно, тут подритярэла о гиндо, кай кацаво по ди сас и кай авэр лэ Иеговастирэ служытеля, савэ лэсти чалёнас. Например, о апостало Павло умэкэлас и вас через кода, кай во шылияспэ и лэстэ варисо на вижалас тэ стерэл. Важ када во пэр пэстэ ԥэнэнас, кай во бибахтало мануш (Римо 7:24). Да, о Павло каисайля андэ пэстирэ бэзэха и болделя. Но во всаек гиндояс пала пэстэ, кай во «само цыкно анда апосталоря» и само баро ӷрешнико (1 Кр. 15:9; 1 Тим. 1:15).

7. Пала со важно тэ сэрас, если амэ стердям бэзэх?

⁷ Амаро небесно Дад дя алав, кай простия кодэлэн, ко каийпэ (Пс. 86:5). Важ када, если амэндэ па чачимастэ дуқал оди пала кода, со амэ стердям, амэ можэм тэ патяс: раз во ԥэндя, кай простисардя, вижал, кадя и исин (Клс. 2:13).

8, 9. Сар тэ улас и гиндоря, кай кода, со амэ терас важ о Иегова, када мало?

⁸ Всаворэ амэ камас тэ служысарас лэ Иеговасти анда вся о зор. Но дэсавэнди здэлпэ, кай кода, со вонэ терэн важ о Иегова, — када мало и кай лэндэ никала на вижала тэ авэн уӷодни лэсти. И ԥэй, савя ақарэн Ама́нда, росԥэнэн: «Часто мэ гиндосарав кадя: тэ отдав лэ Иеговасти со май лашо — када тэ отдав лэсти вся май бут и май бут. Дэкала мэ став англа пэстэ цэли, савэ най па мэрно зор, и вижав анда мурцы, кай лэн тэ домардював. Ай кала мандэ када на вижал, мэ гиндосарав, кай мандар нинай нисаво толко, и манди здэлпэ, кай о Иегова диқэл пэр мандэ кадя жэ».

⁹ Если амэнди здэлпэ, кай кода, со амэ терас важ о Иегова, када мало, со поможыя амэнди тэ улас кацавэ гиндоря? Сэрэн, кай во най черезчур строӷо Дэл и най кацаво, кай лэсти никала и нисоса на уӷодиса. Во никала на аштярэл амэндар, со най па амаро зор. Кала амэ терас важ лэстэ кода, со можэм, во лошавэл. Кадяжэ погиндон пала авэр лэ Дэвлэстирэ служытеля, савэ служынас лэ Иеговасти анда вся зор. Например, о Павло. Во бут бэрша служыяс лэ Иеговасти и пристолас вся пэско зор андэ кадэя дила. Во мардя тыщи километров андо дром и стердя, кай тэ авэн бут нэвэ собрании. Но дэкала андэ лэстири жызня варисо парудёлас, и во ужэ нэ моӷ тэ росԥэнэн пала Дэл кадя жэ бут, сар варикала. Сыкавэлас када, кай во на уӷодий лэ Иеговасти? Най. О Павло терэлас, со моӷ, и о Дэл лэс блаӷословияс (Дила 28:30, 31). Кадя жэ можно тэ ԥэнас и пала амэндэ. Дэкала амэ ласа тэ терас май набут, ай дэкала май бут. Но ӷлавно важ о Иегова — най скати амэ терас, ай васо амэ служысарас лэсти. Ай акана давайте уӷанаса, сар во сыкавэл амэнди, кай амэ уӷодисарас лэсти.

САР О ДЭЛ СЫКАВЭЛ, КАЙ АМЭ УӶОДИСАРАС ЛЭСТИ?

10. Через со о Иегова ԥэнэн, кай амэ уӷодни лэсти? (Иоано 16:27).

¹⁰ Библия. Лэ Иеговасти чалёл тэ ԥэнэн пэстирэ служытелёнэнди, кай во любий и цэнуий лэн. Андэ Библия пистромэ дуй случаёря, кала о Иегова ԥэндя по Исусо, кай во лэско любимо Шаво, савэсти во дэл пэстири блаӷословения (Матф. 3:17; 17:5). Камлоп ту тэ ашунэс кацавэ татэ алава лэ Иеговастар? Адес во на дэл дума амэнца ворта. Но во терэл када через и Библия. Андэр латэ запистромэ лэ Исусостирэ алава, савэ во ԥэнэнас лэ учениконэнди. Кала амэ адиносарас лэн, амэ кабута ашунас, сар о Иегова ԥэнэн амэнди, кай амэ уӷодни лэсти. (Проадинон Иоано 16:27.) О Исусо вся и время андярэлас пэс кадя, сар лэско Дад. Лэстирэ ученикоря сас найидиальни, но вонэ на парашэнас тэ служын лэ Иеговасти. О Исусо драго пала лэндэ дэлас дума и хвалияс лэн. Важ када, кала амэ адиносарас, сар о Исусо дэлас дума пэстирэ учениконэнца, амэ можэм пэсти прецтавить, кай кадэла алава о Иегова ԥэнэн амэнди (Иоан. 15:9, 15).

11. Васо, кала исин ԥаримос, када на сыкавэл, кай о Иегова амэндар одбанделя? (Иаково 1:12).

¹¹ О Иегова поможый. О Иегова вся и время дэл амэнди зор. Например, во заботийпэ пала кода, кай амэндэ тэ авэл вся, со трэбуй важ и жызня. Но андэ кодэя жэ время во на улэл амэндар о ԥаримос. Амэндэ можэт тэ терэлпэ бида, кадя жэ сар кай о Иово (Иов 1:8—11). О ԥаримос на сыкавэл, кай о Иегова амэндар одбанделя. Наоборот, андэ кацави время амэндэ исин возможность тэ сыкавас, сар дэ фартэ амэ любисарас лэ Дэвлэс и патяс лэсти. (Проадинон Иаково 1:12.) Андэ амаро ԥаримос амэ можэм тэ уӷанас май драго лэ Иеговас. Во поможый амэнди вся тэ виритярас.

12. Сости амэн сытярэл кода, со сас андэ жызня кай о Дима?

¹² Уӷанам пала кода, со сас андэ жызня кай о ԥрал Дима. Еқвар во ашэляпэ бибутяко и нэви нащи арақэлас. Во ришысардя май бут тэ служый лэ Иеговасти. Кадя во камэлас тэ сыкавэл, кай всаворэ одеса патял лэсти. Но жанас шона, ай и бути на сас. Ӷэт май интя о Дима фартэ занасвайля кадя, кай дажэ нэ моӷ тэ ущел. Во ля тэ гиндой, кай во найлашо хулай и дад и кай лэстар нинай нисаво толко. Во ля тэ пэрэжывает, кай во на уӷодий лэ Иеговасти. Еқвар вэчэром каринг лэстэ поджыля лэстири бэята и дя лэсти листочко, пэ саво сас пистромэ и алава анда Исайя 30:15: «Тумаро зор андэ кода, кай тэ ашэнпэ спокойни и тэ сыкавэн, кай патян». Вой стодя о листочко ригатар пэ кровать и ԥэндя: «Дадуся, кала тути ӷрусно, гиндосар пала када». О Дима поля, кай о Иегова диқэлас пала лэско ери. Лэндэ сас, со тэ хан, андэр со тэ утидэнпэ и кай тэ жувэн. Во ԥэнэн: «Вся, со трэбуй сас мэ тэ терав, — када тэ ашавпэ спокойно и тэ патяв лэ Иеговасти». Если тумэндэ андэ жызня кадя жэ, сар кай о Дима, патян лэ Иеговасти. Во поможыя тумэнди и дэла зор вся тэ виритярэн.

13. Через кастэ о Иегова можэт тэ сыкавэл, кай амэ уӷодни лэсти?

¹³ Амаро христианско ери. О Иегова через и ԥрала и ԥэя ԥэнэн, кай амэ уӷодни лэсти. Например, во побудий варикас андар лэндэ вовремя тэ ԥэнэн амэнди лашэ алава. И ԥэй, сави жувэл андэ Азия, поля када пар пэстэ. Вой хасардя и бути и фартэ занасвайля. Потом лако хулай тердя баро бэзэх и будэр на служыяс сар барэдэр ԥрал андэ собрания. Вой ԥэнэн: «Мэ на полавас, васо андэ мэрни жызня тердяпэ кацаво. Можэт, мэ стердэм варисо, кай о Иегова парашэля ман тэ блаӷословий?» И ԥэй мангэлас лэ Иеговас тэ сыкавэл, кай вой уӷодно лэсти. Сар во лати атветил? Вой ԥэнэн: «И барэдэр ԥрала подритярэнас ман и ԥэнэнас, кай о Иегова ман любий». Через дэсави время вой поля, кай лати упалэ трэбуй помощь лэ Иеговастар и ԥэндя лэсти пала када. Вой росԥэнэн: «Андэ кодэва жэ дес мэ получисардэм письмо лэ ԥралэндар и лэ ԥэяндар анда собрания. Кала мэ адиносаравас лэндирэ татэ алава, мэ полэм, кай о Иегова ашунэл ман». Сар дицол анда кадэва случаё, часто о Иегова сыкавэл, кай амэ уӷодни лэсти, через варикастирэ лашэ алава (Пс. 10:17).

14. Сар о Иегова сыкавэл, кай амэ лэсти уӷодни?

¹⁴ Сар инке о Иегова можэт тэ сыкавэл, кай амэ уӷодисарас лэсти? Во можэт тэ стерэл кадя, кай варико анда ԥрала или ԥэя вовремя тэ дэн амэнди совето. Например, андо пэрво вико лэ Дэвлэско свынто зор побудисардя лэ Павлос тэ пистрой лэ ԥралэнди и лэ ԥэянди 14 письморя. Андэ кадэла письморя во ворта, но андэ кодэя жэ время ковлэс, дя лэнди советоря. Васо о Иегова дя лэ Павлости кацаво гиндо? О Иегова — лашо Дад. Во любий пэстирэ бэятонэн и важ када сытярэл лэн (Прит. 3:11, 12). Важ када, кала амэнди па Библия дэн совето, трэбуй тэ лошавас, ай най тэ умэкас и вас. Если амэнди дэн совето, када сыкавэл, кай амэ уӷодисарас лэ Иеговасти (Евр. 12:6). Ай со инке доԥэнэн, кай о Иегова любий амэн и кай амэ уӷодни лэсти?

СО ИНКЕ ДОԤЭНЭН, КАЙ АМЭ УӶОДИСАРАС ЛЭ ИЕГОВАСТИ

15. Со сыкавэл, кала о Иегова дэл амэнди пэско свынто зор?

¹⁵ О Иегова дэл пэско свынто зор кодэлэнди, ко уӷодий лэсти (Матф. 12:18). Можно тэ пушас пэстар: «Дицол, кай пэ мэрно характеро влияет лэ Дэвлэско свынто зор?». Например, кала сыстос пэс кодэлэса, саво ту санас, кала уӷанглян о чачимос, погиндосар, саво ту акана. Ашэлян ту май терпеливо чи най? Кала ту домэкэс, кай по тиро характеро тэ влияет лэ Дэвлэско свынто зор, ту лэса май фартэ тэ патяс, кай уӷодис лэ Иеговасти. (Диқэн и рамка «Лашымос лэ Дэвлэстирэ зорэстар».)

16. Касти о Иегова дя тэ росԥэнэн и лащи новость и со тутэ по ди кадэлэстар? (1 Фесалоники 2:4).

¹⁶ Кодэлэнди, ко уӷодно лэ Иеговасти, во дя тэ росԥэнэн и лащи новость. (Проадинон 1 Фесалоники 2:4.) Давайте уӷанаса, сар када поля ек ԥэй, савя ақарэн Джо́селин. Еқвар тэсара вой ущеля совсем би зорэско. Вой ԥэнэн: «Мэ нисо нэ моӷла тэ терав. Но мэ сымас пианеро и ужэ доԥэнделэм тэ жав андэ служэния. Важ када мэ манглэмпэ и лэм тэ тидавпэ». Андэ кодэя тэсара и Джоселин дя дума ла жувляса, савя ақарэн Мэри. Вой сас фартэ приятно манушни. И Мэри соӷласисайля тэ изучает и Библия. Прожылэ дэсавэ шона, и вой ԥэндя, кай, кала и Джоселин постучисардя андэ латирэ двэри, андэ кадэва маменто вой мангэласпэ лэ Дэвлэсти пала помощь. Кала и Джоселин гиндой пала када, вой ԥэнэн: «Мандэ сас андо ди кацаво, кабута о Иегова ԥэндя: „Ту уӷодис манди!“». Канешно, амэ най вся и время ласа тэ диқас кацавэ манушэн андэ служэния. Но если амэ росԥэнас пала Дэл анда вся оди, тоди можэм тэ патяс, кай амэ уӷодисарас лэ Иеговасти.

17. Со поля и Вика, кала розмышляла пала выкупо? (Псалом 5:12).

¹⁷ О Иегова через о выкупо простий кодэлэн, ко уӷодий лэсти (1 Тим. 2:5, 6). Но возможно, тиро ди отԥэндёл тэ патял, кай ту уӷодно лэ Дэвлэсти, хоть ту ужэ и болделян. Сэр, кай най вся и время амэ можэм тэ патяс амарэ одести, но амэ вся и время можэм тэ патяс лэ Иеговасти. Если о мануш патял андо выкупо, о Иегова диқэл пэр лэстэ кадя, кай во уӷодно лэсти. Во дэл алав, кай лэла лэс тэ блаӷословий (проадинон Псалом 5:12; Римо 3:26). Акэ, со сас андэ жызня кай и Вика. Еқвар вой розмышляла пала выкупо и поля ек гиндо. Вой ԥэнэн: «О Иегова фартэ терпеливо каринг мандэ... Мэ кабута лэсти ԥэнавас: „Тири любовь най пэ скати дэ бари, ай о выкупо тирэ Шавэско на дохутилэл, кай тэ простинпэ мэрнэ бэзэха“». И Вика прижангля, кай о выкупо — када подарко лэ Иеговастар лично лати. Вой поля, кай о Иегова фартэ ла любий. Если и амэ ласа тэ розмышляем пала выкупо, тоди диқаса, кай о Иегова глаба и пала амэндэ и кай амэ уӷодни лэсти.

18. Андэр со амэ можэм тэ авас уверени, если любисарас пэстирэ небеснонэ Дадэс?

¹⁸ Сар бы амэ тэ на старысавас тэ прилас и советоря анда кадэя статья, дэкала амэ всаек ласа тэ умэкас и вас и ласа тэ на допатяс, кай уӷодисарас лэ Иеговасти. Если кацаво терэлапэ, сэр, кай важ о Дэл куч тири любовь (Иак. 1:12). Важ када старысав тэ пашос каринг о Иегова и тэ шос сама, сар во сыкавэл, кай ту уӷодис лэсти. Никала на бистэр, кай во «най дур кажнонэстар андар мэндэ» (Дила 17:27).