July

Sengwe le sengwe se Jesu a neng a se bua le se a neng a se dira, go akaretsa le dikgakgamatso tsotlhe tse a di dirileng, di ne di bontsha tsela e Rraagwe a akanyang ka yone le e a ikutlwang ka yone. (Joh. 14:9) Re ithuta eng mo dikgakgamatsong tse Jesu a ileng a di dira? Gore Jesu le Rraagwe ba re rata thata. Fa Jesu a ne a le mo lefatsheng, o ne a bontsha gore o rata batho ka go dirisa maatla a gagwe go thusa ba ba neng ba boga. Nako nngwe banna ba ba foufetseng ba ne ba mo kopa gore a ba fodise. (Math. 20:30-34) Ela tlhoko gore Jesu “o ne a ba tlhomogela pelo” a bo a ba fodisa. Lefoko la Segerika le le ranotsweng e le “o ne a ba tlhomogela pelo,” le kaya kutlwelobotlhoko e e tseneletseng. Kutlwelobotlhoko eo e ne e bontsha gore Jesu o rata batho, e bile e ne ya mo tlhotlheletsa gore a fepe ba ba tshwerweng ke tlala a bo a fodise motho yo o nang le lepero. (Math. 15:32; Mar. 1:41) Re ka tlhatswega pelo gore Jehofa, Modimo yo o “pelotlhomogi thata,” le Morwawe ba re rata thata e bile ba utlwa botlhoko fa re boga. (Luke 1:78; 1 Pet. 5:7) Ba swegaswega pelo go fedisa dilo tsotlhe tse di utlwisang batho botlhoko. w23.04 3 ¶4-5

Gape ga re a tshwanela go bala kgotsa go reetsa dilo tse di sa siamang tse batho ba lefatshe leno le le bosula ba di ratang. Fa re bala Baebele le go e ithuta, re tla kgona go akanya ka dilo tse di siameng. Go ya dipokanong le go ya tshimong, le gone go ka re thusa gore re nne re akanya ka dilo tse di siameng. Jehofa ga a kitla a re letla gore re welwe ke diteko tse re ka se kgoneng go di itshokela. (1 Bakor. 10:12, 13) Mongwe le mongwe wa rona o tshwanetse go rapela thata gore a kgone go tswelela a ikanyega mo go Jehofa mo malatsing ano a bofelo. Jehofa o batla gore re ‘mo tshololele se se mo dipelong tsa rona.’ (Pes. 62:8) Baka Jehofa o bo o mo lebogele sengwe le sengwe se a go direlang sone. Mo kope gore a go thuse gore o nne pelokgale fa o rera. Gape o mo kope gore a go thuse go itshokela mathata ape fela a o ka tswang o na le one le gore o se ka wa ineela fa o raelwa. O se ka wa letla ope kgotsa sepe se dira gore o palelwe ke go rapela Jehofa ka metlha. w23.05 7 ¶17-18

Goreng re ya dipokanong? Gore re ye go baka Jehofa. (Pes. 26:12; 111:1) Gape re ya dipokanong gore re kgone go kgothatsana mo nakong eno e e thata. (1 Bathes. 5:11) Fa re araba, re baka Jehofa e bile re kgothatsa ba bangwe. Le fa go ntse jalo, fa re tshwanelwa ke go araba re ka lebana le dikgwetlho dingwe. Re ka nna ra tshoga, kgotsa re ka tswa re batla go araba mme bakaulengwe ba sa re neye tshono ya go araba gantsi jaaka re batla. Ke eng se se ka re thusang? Moaposetoloi Paulo o ne a re re tshwanetse go ‘kgothatsana.’ Fa re gopola gore re ka kgothatsa ba bangwe fa re araba dikarabo tse dikhutshwane e bile di le motlhofo, seo se ka re thusa gore re se ka ra tshoga. Mme fa re sa newe tshono ya go araba gantsi, re itumelela gore ba bangwe mo phuthegong ba tla nna le tshono ya go araba.​—1 Pet. 3:8. w23.04 20 ¶1-3

Kgosi e ne ya dira kitsiso ya gore Bajuda ba ba neng ba feditse dingwaga di le 70 e le batshwarwa kwa Babelona, ba ne ba ka boela kwa nageng ya bone kwa Iseraele. (Esera 1:2-4) Jehofa ke ene fela a neng a ka dira gore seno se kgonege. Bababelona ba ne ba sa golole batshwarwa. (Isa. 14:4, 17) Le fa go ntse jalo, motse wa Babelona o ne o fentswe, mme kgosi e e neng e sa tswa go tlhomiwa e ne ya bolelela Bajuda gore ba ka boela gae. Mojuda mongwe le mongwe, segolobogolo ditlhogo tsa malapa, ba ne ba tshwanetse go dira tshwetso ya gore a ba tla boela kwa Iseraele kgotsa ba tla tswelela ba nna kwa Babelona. Go ka tswa go ne go se motlhofo go dira tshwetso eo. Bajuda bangwe ba ne ba setse ba tsofetse, ka jalo ba ne ba ka se kgone go tsaya loeto loo lo loleele. Mo godimo ga moo, Bajuda ba le bantsi ba ne ba tsholetswe kwa Babelona. Ka jalo, ba ka tswa ba ne ba tsaya gore Babelona ke legae la bone, mme Iseraele ke legae la borrabonemogolo. Bajuda bangwe ba ne ba humile, mme go ne go ka nna thata gore ba tlogele matlo a bone a mantle kgotsa dikgwebo tsa bone, ba bo ba ya kwa lefatsheng le ba sa le itseng. w23.05 14 ¶1-2

Lefoko la Modimo le re kgothaletsa gore re nne le boitshoko, bopelotlhomogi le lorato. Luke 21:19 e a re: “Lo tla boloka matshelo a lona fa lo ka tswelela lo itshokile.” Bakolosa 3:12 e a re: “Nnang le . . . bopelotlhomogi.” Bathesalonika wa ntlha 4:9, 10 yone e a re: “Modimo o lo ruta gore lo ratane. . . . Mme bakaulengwe, re lo kgothaletsa gore lo tswelele lo ratana le go feta.” Ditemana tseno di ne di kwalelwa Bakeresete ba ba neng ba setse ba bontshitse gore ba na le dinonofo tseno, mme ba ne ba tshwanetse go tswelela ba bontsha gore ba na le tsone. Le rona re tshwanetse go dira jalo. Go sekaseka gore Bakeresete ba bogologolo ba ne ba bontsha dinonofo tseno jang, go tla go thusa. Go tswa foo, leka go bona gore o ka ba etsa jang. Fa o dira jalo, o tla bo o bontsha gore o ipaakanyetsa pitlagano e kgolo. Fa o ithuta go itshokela mathata gone jaanong, o tla kgona go itshoka ka nako ya pitlagano e kgolo. w23.07 3 ¶4, 8

Le fa re ka tswa re le batlodiwa kgotsa re le ba “dinku tse dingwe,” re tshwanetse go tswelela re tsamaya mo ‘Tseleng ya Boitshepo.’ Go dira jalo, go tla re thusa gore re tswelele re obamela Jehofa gone jaanong, le mo nakong e e tlang fa Bogosi jwa gagwe bo dira lefatshe paradaise. (Joh. 10:16) Fa e sa le go tloga ka 1919, banna, basadi le bana ba le bantsi ba tswile mo Babelona yo Mogolo, e leng mmusomogolo wa bodumedi jwa maaka, mme jaanong ba tsamaya mo tseleng eno ya tshwantshetso. Fa Bajuda ba ne ba tswa kwa Babelona, Jehofa o ne a netefatsa gore ga go na dikgoreletsi dipe mo tseleng ya bone. (Isa. 57:14) A Jehofa o ne a tlosa dikgoreletsi le mo ‘Tseleng ya Boitshepo’ ya mo motlheng wa rona? Go ntse jalo. Dingwaga di le dintsi pele ga 1919, Jehofa o ile a dirisa banna bangwe ba ba neng ba mo rata gore ba thuse batho go tswa mo Babelona yo Mogolo. (Bapisa le Isaia 40:3.) Ba ile ba dira tiro ya botlhokwa e moragonyana e neng e tla thusa batho ba ba siameng gore ba tswe mo bodumeding jwa maaka mme ba obamele Jehofa le batho ba gagwe. w23.05 15-16 ¶8-9

Jehofa o batla gore re mo direle ka go rata e bile re itumetse. (2 Bakor. 9:7) Ka jalo, a re tshwanetse go tswelela re dira ka natla gore re fitlhelele mokgele o re o ipeetseng le fa re se na keletso ya go dira jalo? Akanya ka se Paulo a ileng a se bua. O ile a re: “Ke laola mmele wa me ke bo ke o tshwara jaaka motlhanka.” (1 Bakor. 9:25-27) Paulo o ne a dira ka natla go dira se Jehofa a se batlang le fa ka dinako tse dingwe a ne a se na keletso ya go dira jalo. A Jehofa o ne a itumelela se Paulo a neng a mo direla sone? Ee o ne a se itumelela, e bile o ile a mo segofatsa. (2 Tim. 4:7, 8) Jehofa o a itumela fa a re bona re dira ka natla go fitlhelela mekgele ya rona le fa re se na keletso ya go dira jalo. O a itumela ka gonne o a itse gore le fa re se na keletso ya go dira se a batlang gore re se dire, re se dira ka gonne re mo rata. O tla re segofatsa fela jaaka a ile a segofatsa Paulo. (Pes. 126:5) Fa re lemoga gore Jehofa o a re segofatsa, re ka nna ra simolola go nna le keletso ya go fitlhelela mokgele o re ipeetseng one. w23.05 29 ¶9-10

Moaposetoloi Paulo o ile a tshwantsha batho ba ba se kitlang ba falola letsatsi la ga Jehofa le batho ba ba robetseng. Fa motho a robetse, ga a bone se se diregang e bile ga a lemoge le gore nako e a tsamaya. Ka jalo fa go direga sengwe sa botlhokwa, ga a kgone go bona e bile ga a kgone go dira sepe. Batho ba le bantsi gompieno ba tshwana le batho ba ba robetseng. (Bar. 11:8) Ga ba dumele dilo tse di bontshang gore re tshela mo “malatsing a bofelo” le gore pitlagano e kgolo e gaufi. (2 Pet. 3:3, 4) Rona re a itse gore letsatsi leo le gaufi thata, ka jalo go botlhokwa gore re nne re ipaakantse. (1 Bathes. 5:6) Mme gone, goreng re tshwanetse go akanyetsa dilo sentle mme re se ka ra tseega maikutlo? Go dira jalo go tla re thusa gore re se ka ra tsaya letlhakore mo dikgannyeng tsa dipolotiki, le gore re se ka ra leka go lwela gore go dirwe diphetogo. Fa letsatsi la ga Jehofa le ntse le atamela, batho ba tla nna ba leka go re pateletsa gore re tseye letlhakore mo dikgannyeng tseno. Mme gone, ga re tlhoke go tlhobaela ka gore re tlile go dira eng ka nako eo. Moya wa Modimo o tla re thusa gore re se ka ra tseega maikutlo, re akanyetse dilo sentle e bile re dire ditshwetso tse di siameng.​—Luke 12:11, 12. w23.06 10 ¶6-7

O akanya eng fa go buiwa ka Samesone? Gongwe o akanya ka monna yo o nonofileng e bile a na le maatla. Go ntse jalo, o ne a nonofile. Mme o ne a dira tshwetso nngwe e e sa siamang e e neng ya mmakela mathata. Le fa go ntse jalo, selo sa botlhokwa mo go Jehofa e ne e le dilo tse dintle tse a neng a mo direla tsone. E bile o ne a dira gore pego ya gagwe e kwalwe mo Baebeleng gore e re tswele mosola. Jehofa o ne a dirisa Samesone go thusa Baiseraele. Dingwaga di le dintsintsi Samesone a sena go tlhokafala, Jehofa o ile a tlhotlheletsa moaposetoloi Paulo gore a mo umake fa a ne a bua ka batho bangwe ba ba neng ba na le tumelo e e nonofileng. (Baheb. 11:32-34) Pego ya ga Samesone e ka re kgothatsa. O ne a tshepa Jehofa, tota le fa go ne go le thata. Re ka ithuta go le gontsi mo go Samesone e bile pego ya gagwe e ka re kgothatsa. w23.09 2 ¶1-2

Go rapela Jehofa ka metlha re mmolelela dilo tse di re tshwenyang le gone go tla re thusa gore re kgone go itshoka. (1 Bathes. 5:17) O ka tswa o se na mathata a a kalo gone jaanong. Mme gone, a o kopa Jehofa gore a go thuse fa o utlwile botlhoko, o gateletswe mo maikutlong kgotsa o sa itse gore o dire eng? Fa o itlwaeditse go kopa Jehofa gore a go thuse fa o na le mathata, go tla nna motlhofo gore o dire jalo mo nakong e e tlang fa o na le mathata a a boima. Ka nako eo o tla bo o tlhatswegile pelo gore Jehofa o a itse gore o tshwanetse go go thusa leng le gore o tla go thusa jang. (Pes. 27:1, 3) Fa re tswelela re itshokile gone jaanong fa re na le mathata, re tla kgona go itshoka ka nako ya pitlagano e kgolo. (Bar. 5:3) Goreng re rialo? Bakaulengwe le bokgaitsadi ba le bantsi ba re go itshokela teko nngwe e e rileng go ba thusa gore ba itshokele teko e e latelang. Fa Jehofa a ba thusa go itshokela diteko, tumelo ya bone e nonofa le go feta. Mme go nna le tumelo go ba thusa gore ba tswelele ba itshokile.​—Jak. 1:2-4. w23.07 3 ¶7-8

Jehofa o kgona go fetofetoga le maemo ka gonne o boikokobetso e bile o pelotlhomogi. Ka sekai, o ne a bontsha gore o boikokobetso fa a ne a batla go fedisa batho ba ba bosula ba kwa Sodoma. O ne a dirisa baengele go laela Lote gore a tshabele kwa dithabeng. Lote o ne a sa batle go ya koo, ka jalo o ile a kopa gore ene le ba lelapa la gagwe ba tshabele kwa motsaneng o o bidiwang Soare o Jehofa a neng a ikaeletse go o senya. Jehofa a ka bo a ile a pateletsa Lote gore a dire se a neng a re a se dire. Mme ga a ka a dira jalo, go na le moo o ile a letla Lote gore a tshabele kwa Soare, mme ga a ka a senya motsana oo. (Gen. 19:18-22) Dingwaga di le dintsi morago ga moo, Jehofa o ile a tlhomogela baagi ba Ninife pelo. O ile a romela moporofeti Jona gore a ye go bolelela batho ba ba bosula ba kwa Ninife gore o tlile go ba senya le motse wa bone. Mme fa Baninife ba ne ba ikwatlhaya, Jehofa o ne a ba tlhomogela pelo, a bo a sa dire se a neng a ikaeletse go se dira.​—Jona 3:1, 10; 4:10, 11. w23.07 21 ¶5

Re ka ithuta eng mo go se se ileng sa diragalela Jehoashe? Fa Jehoiada yo a ileng a mo thusa go dira se se siameng a sena go tlhokafala, Jehoashe o ne a simolola go reetsa batho ba ba neng ba tlhanogetse Jehofa, mme le ene o ne a tlhanogela Jehofa. Seno se re bontsha gore ga re a tshwanela go ikobela Jehofa fela ka gonne ba malapa a rona kgotsa bangwe mo phuthegong ba mo ikobela. Gore re tswelele re atamalane le Jehofa, re tshwanetse go ithuta, go akanyetsa kwa teng le go rapela. Fa re dira jalo, re tla rata Jehofa e bile re tla mo tlotla. (Jer. 17:7, 8; Bakol. 2:6, 7) Jehofa ga a kope gore re dire dilo tse dintsintsi. O re kopa fela gore re dire se se tlhalosiwang mo go Moreri 12:13 e e reng: “Boifa Modimo wa boammaaruri mme o boloke ditaelo tsa gagwe, ka gonne seno ke sotlhe se motho a tshwanetseng go se dira.” Fa re boifa Jehofa, re tla tswelela re ikanyega mo go ene le fa go ka direga eng. Ga go na sepe se se ka senyang botsala jwa rona le Jehofa. w23.06 19 ¶17-19

Temana 5 e simolola jaana: “Ene yo o ntseng mo setulong sa bogosi o ne a re.” (Tshen. 21:5a) Mafoko ano a botlhokwa ka gonne a re bontsha gore se Jehofa a tlileng go se bua, o se bua ka boene, ga a dirise moengele kgotsa Jesu. E re ka e le Jehofa a buang, re ka tlhatswega pelo gore mafoko a a mo go Tshenolo 21:5, 6 a tlile go diragala ka gonne Jehofa ga ‘a ake.’ (Tito 1:2) Ka puo ya Segerika, mo go Tshenolo 21:5 Jehofa o simolola ka go re, “Bona!” Lefoko leno le tlhaga makgetlo a le mantsi mo bukeng ya Tshenolo ka Segerika. Fa Jehofa a sena go re, “Bona!” o ne a re: “Ke dira dilo tsotlhe disha.” Ke boammaaruri gore Jehofa o tlile go baakanya dilo mo nakong e e tlang, mme o bua jaaka e kete o a di baakanya gone jaanong, ka gonne o a itse gore o tlile go dira se a se solofeditseng.​—Isa. 46:10. w23.11 3-4 ¶7-8

Le fa moaposetoloi Petere a ne a itumeletse masego ao, o ne a sa ntse a lwantshana le makoa mangwe. Ka sekai, fa Jesu a ne a tlhalosetsa barutwa ba gagwe gore o ne a tla utlwisiwa botlhoko a bo a swa jaaka go boleletswe pele mo Baebeleng, Petere o ne a mo kgalemela a bo a mmolelela gore seo ga se kitla se mo diragalela. (Mar. 8:31-33) Gape Petere le baaposetoloi ba bangwe ba ne ba nna ba ngangisana ka gore ke mang yo mogolo. (Mar. 9:33, 34) E bile mo bosigong jwa pele Jesu a bolawa, Petere o ile a kgaola monna mongwe tsebe. (Joh. 18:10) Mo go jone bosigo joo, Petere o ne a welwa ke letshogo a bo a itatola Jesu ka makgetlo a le mararo. (Mar. 14:66-72) Go tswa foo, o ne a thubega ka selelo. Jesu ga a ka a latlha Petere ka gonne a kgobegile marapo. Fa a sena go tsosiwa, o ne a letla Petere gore a bontshe gore o sa ntse a mo rata. Ka jalo, o ne a mo naya maikarabelo a gore a dise dinku tsa gagwe. (Joh. 21:15-17) Petere o ile a dira se Jesu a neng a kopa gore a se dire. Petere e ne e le mongwe wa barutwa ba ba neng ba tlodiwa ka moya o o boitshepo kwa Jerusalema ka letsatsi la Pentekosete. w23.09 22 ¶6-7

Moaposetoloi Petere o ne a bolelela bagolwanemmogo le ene gore ba ‘dise letsomane.’ (1 Pet. 5:1-4) Fa e le gore o mogolwane, re a itse gore o rata bakaulengwe le bokgaitsadi ba gago e bile o batla go ba kgothatsa. Le fa go ntse jalo, ka dinako dingwe o ka ikutlwa o lapile e bile o sa kgone go dira maikarabelo a gago. Fa e le gore go ntse jalo, kopa Jehofa gore a go thuse mme o mmolelele gore o batla go kgothatsa bakaulengwe le bokgaitsadi ba gago. Petere o ne a re: “Fa mongwe a bua, a a bue jaaka e kete o bua ditaelo tse di tswang kwa Modimong; fa mongwe a direla, a a direle a ikaegile ka nonofo e Modimo a e mo nayang.” (1 Pet. 4:11) Mathata mangwe a bakaulengwe le bokgaitsadi ba lebanang le one, a ka nna a se ka a fela gone jaanong. Mme gone, nna o gopotse gore “modisa yo mogolo” e bong Jesu Keresete, o tla ba thusa gone jaanong le kwa lefatsheng le lesha. Ka jalo, Jehofa o batla gore bagolwane ba rate bakaulengwe ba bone, ba ba kgothatse le gore e nne “dikao mo letsomaneng.” w23.09 29-30 ¶13-14

Ga re a tshwanela go tshepa dikakanyo tsa batho ba ba nyatsang melao ya ga Jehofa. Fa re akanya ka tsela e batho ba ba nyatsang melao ya ga Jehofa ba akanyang ka yone, le rona re ka nna ra simolola go e nyatsa. (1 Bakor. 3:19) Gantsi “botlhale jwa lefatshe leno” bo dira gore batho ba se ka ba ikobela Modimo. Bakeresete bangwe ba kwa Peregamo le Thiatira ba ile ba simolola go itshwara jaaka batho ba ba neng ba nna mo metseng eo, ba ba neng ba obamela medingwana e bile ba sa itshware sentle. Jesu o ile a kgalema Bakeresete ba diphuthego tseo tse pedi ka gonne ba ne ba letlelela boitsholo jo bo sa siamang jwa tlhakanelodikobo. (Tshen. 2:14, 20) Batho ba re tshelang le bone ba ba sa ikobeleng Jehofa ba ka nna ba leka go dira gore re akanye jaaka bone. Ka sekai, ba malapa a rona kgotsa batho bangwe ba re tlwaelaneng le bone ba ka nna ba re re gagamatsa dilo kgotsa ba leka go re tlhotlheletsa go tlola melao ya ga Jehofa. Ba ka nna ba re go itshwara sentle ga go thuse ka sepe le gore melao ya Modimo e siilwe ke nako. Ka dinako tse dingwe re ka nna ra akanya gore Jehofa o re naya ditaelo tse di sa utlwaleng sentle. Re ka nna ra bo ra raelesega go “ya ka kwa ga dilo tse di kwadilweng.”​—1 Bakor. 4:6. w23.07 16 ¶10-11

Marea o ne a tshwanetse go nna pelokgale. Moengele o ne a mmolelela gore o tla ima. Seo se tshwanetse sa bo se ile sa mo tshwenya tota ka gonne o ne a ise a nyalwe. Sengwe gape se se ka tswang se ne se mo tshwenya ke gore o ne a se na bana, ka jalo a ka tswa a ne a ipotsa gore a o tla kgona go tlhokomela ngwana yoo yo e neng e tla nna Mesia. Mo godimo ga moo, Marea o ne a tlile go nyalwa ke Josefa. Ka jalo, a Josefa o ne a tla mo dumela fa a mo tlhalosetsa gore go tlile jang gore a ime, kgotsa a o ne a tla tsaya gore o mmaya bobi mo matlhong? (Luke 1:26-33) Marea o ile a kgona go dira kabelo e Jehofa a neng a mo neile yone ka gonne o ile a kopa thuso mo bathong ba bangwe. Jehofa o ile a dirisa Gabariele le Elisabetha go mo thusa. Ka sekai, Marea o ile a botsa Gabariele dipotso dingwe ka kabelo e a neng a e neilwe. (Luke 1:34) Morago ga moo, o ne a etela Elisabetha kwa Juda mme Elisabetha o ile a mo akgola, e bile o ile a bua boporofeti jo bo kgothatsang ka ngwana yo Marea a neng a tlile go mo tshola. (Luke 1:39-45) Marea o ne a re Jehofa “o dirile ditiro tse di maatla ka lebogo la gagwe.”​—Luke 1:46-51. w23.10 14-15 ¶10-12

Bakeresete ba le 144 000 ba ba tloditsweng ka moya o o boitshepo ba atamalane le Jehofa ka tsela e e kgethegileng, e bile Baebele e a re e tla nna baperesiti le Jesu kwa legodimong. (Tshen. 14:1) Phaposi e e bidiwang Boitshepo e tshwantshetsa gore Modimo o ba itseetse gore e nne bana ba gagwe fa ba sa ntse ba le mo lefatsheng. (Bar. 8:15-17) Phaposi e e bidiwang Boitshepo Jwa Maitshepo yone e tshwantshetsa legodimo, kwa Jehofa a nnang teng. “Sesiro” se se neng se kgaoganya Boitshepo le Boitshepo Jwa Maitshepo se tshwantshetsa mmele wa ga Jesu fa a ne a le mo lefatsheng. Fa fela a na le mmele oo, o ne a ka se kgone go tsena kwa legodimong gore e nne Moperesiti yo Mogolo mo tempeleng ya ga Jehofa ya tshwantshetso. Ka jalo o ile a ntsha mmele oo setlhabelo, mme fa a sena go tsosiwa o ne a kgona go tsena kwa legodimong mme batlodiwa le bone ba ne ba kgona go tsena. Le fa go ntse jalo, ba tshwanetse go swa pele.​—Baheb. 10:19, 20; 1 Bakor. 15:50. w23.10 28 ¶13

Gidione ga a ka a galefa fa Baeferaime ba mo tshwaya diphoso. (Baatlh. 8:1-3) O ile a bontsha gore o boikokobetso ka gonne o ile a ba reetsa a bo a ba araba a le bonolo, mme seo se ile sa ba reba bogale. Bagolwane ba ka etsa Gidione ka go reetsa fa ba bangwe ba ba tshwaya diphoso ba bo ba ba araba ba le bonolo. (Jak. 3:13) Fa ba dira jalo, go nna le kagiso mo phuthegong. Fa batho ba ne ba tlotlomatsa Gidione ka gonne a fentse Bamidiana, o ne a re Jehofa ke ene a tshwanetseng go tlotlomadiwa. (Baatlh. 8:22, 23) Bagolwane ba ka etsa Gidione jang? Fa ba kgona go dira dilo dingwe, ba ka dira gore Jehofa e nne ene a tlotlomadiwang. (1 Bakor. 4:6, 7) Ka sekai, fa mogolwane a akgolwa ka gonne a ruta monate, a ka nna a re Lefoko la Modimo ke lone le le re rutang kgotsa phuthego ya ga Jehofa ke yone e e re katisang. Bagolwane ba tshwanetse go ipotsa gore a tsela e ba rutang ka yone e tlotlomatsa Jehofa kgotsa e tlotlomatsa bone. w23.06 4 ¶7-8

Fa go lebega e kete Jehofa ga a arabe dithapelo tsa rona, re tshwanetse go ipotsa go re, ‘A ke rapelela selo se se siameng?’ Go le gantsi re akanya gore re a itse gore re tlhoka eng, mme ka dinako tse dingwe ga go a nna jalo. Ka sekai, re ka nna ra rapelela gore bothata bongwe jo re nang le jone bo rarabologe ka tsela e e rileng, mme gone go na le tsela e nngwe gape ya go bo rarabolola. Kgotsa re ka nna ra rapelela sengwe se se sa dumalaneng le thato ya ga Jehofa. (1 Joh. 5:14) Ka sekai, akanya ka batsadi ba ba kopang Jehofa gore a se ka a letla ngwana wa bone gore a tlogele phuthego. Go ka lebega e kete ba rapelela selo se se siameng. Le fa go ntse jalo, ba tshwanetse go nna ba gopotse gore Jehofa ga a pateletse ope gore a mo direle. O batla gore rotlhe re itlhophele go mo direla, go akaretsa le bana ba rona. (Dute. 10:12, 13; 30:19, 20) Ka jalo, batsadi bao ba ka kopa Jehofa gore a segofatse maiteko a ba a dirang a go ruta ngwana wa bone gore a rate Jehofa le gore a atamalane le ene.​—Diane 22:6; Baef. 6:4. w23.11 21 ¶5; 23 ¶12

Goreng re ka re fa re gomotsa ba bangwe re bontsha gore re a ba rata? Go ya ka buka nngwe e e tlhalosang Baebele, lefoko go “gomotsa” le Paulo a le dirisitseng, le kaya “go ema gaufi le motho yo o nang le mathata gore o mo kgothatse.” Ka jalo fa re gomotsa mokaulengwe kgotsa kgaitsadi yo o nang le mathata, re mo thusa gore a tswelele a direla Jehofa ka boikanyegi. Nna o gopotse gore nako le nako fa o gomotsa mokaulengwe kgotsa kgaitsadi, o bontsha gore o a mo rata. (2 Bakor. 7:6, 7, 13) Go tlhomogela ba bangwe pelo le go ba gomotsa ke diya thoteng di bapile. Goreng re rialo? Fa motho a tlhomogela yo mongwe pelo fa a mmona a boga, o dira sotlhe se a ka se kgonang go mo gomotsa le go mo thusa. Ka jalo, go tlhomogela batho ba bangwe pelo go dira gore re ba gomotse. Re kgona go bona seo mo tseleng e Paulo a ileng a tlhalosa Jehofa ka yone. A re Jehofa ke “Rara yo o kutlwelobotlhoko le Modimo yo o re gomotsang ka ditsela tsotlhe.”​—2 Bakor. 1:3. w23.11 9-10 ¶8-10

Balatedi botlhe ba ga Keresete ba tshwanetse go lebelela gore ba tla welwa ke mathata. Moaposetoloi Paulo le ene o ile a nna le mathata. Ka sekai, o ile a raya Bakeresete ba kwa Thesalonika a re: “Fa re ne re na le lona, re ne re tle re lo bolelele gore re tlile go tlelwa ke dipitlagano, mme fela jaaka lo itse, seo se ne sa direga.” (1 Bathes. 3:4) Gape o ne a raya Bakeresete ba kwa Korintha a re: “Re batla go lo bolelela ka mathata a re neng ra nna le one . . . Re ne re sa itse gore a re tla tshela kgotsa nnyaa.” (2 Bakor. 1:8; 11:23-27) Le rona gompieno re ka nna le mathata a a tshwanang le ano. (2 Tim. 3:12) Fa o dumela mo go Jesu e bile o le molatedi wa gagwe ditsala le ba masika ba ka nna ba se ka ba go tshwara sentle. Kgotsa gongwe mothapi wa gago le batho ba o berekang le bone ba go thatafaletsa botshelo ka gonne o ikanyega. (Baheb. 13:18) A puso e go thibela go bolelela ba bangwe ka se o se dumelang? Le fa re ka tswa re kopana le mathata afe, Paulo a re re tshwanetse go itumela. w23.12 10-11 ¶9-10

Jakobe o ile a nna le mathata a mantsi. Simeone le Lefi ba ile ba tsenya ba lelapa la bone matlho ba bo ba gogagoga leina la Modimo mo seretseng. Mo godimo ga moo, mosadi yo Jakobe a neng a mo rata thata e bong Ragele, o ile a tlhokafala fa a ne a tshola ngwana wa bone wa bobedi. Go tswa foo, go ile ga nna le leuba. Ka jalo, Jakobe o ile a patelesega go fudugela kwa Egepeto a setse a tsofetse. (Gen. 35:16-19; 37:28; 45:9-11, 28) Le fa Jakobe a ile a nna le mathata a le mantsi, o ile a tswelela a na le tumelo e bile a tshepa gore Jehofa o tlile go mo segofatsa. Mme Jehofa o ile a bontsha Jakobe gore o a mo rata. Ka sekai, Jehofa o ile a dira gore a hume. Gape Jakobe o tshwanetse a bo a ne a itumetse tota fa a kopana le Josefa e re ka a ne a akanya gore ke kgale a sule. Jakobe o ile a kgona go itshokela mathata otlhe a gagwe ka gonne o ne a atamalane le Jehofa. (Gen. 30:43; 32:9, 10; 46:28-30) Le rona re ka kgona go itshokela mathata fa re tswelela re atamalane le Jehofa. w23.04 15 ¶6-7

Mo go Pesalema 23, Dafide o bua a tlhatswegile pelo gore Jehofa o a mo rata e bile o a mo tlhokomela. O tlhalosa tsela e ene le Jehofa ba atamalaneng ka yone e bile o mmitsa Modisa wa gagwe. Dafide o ne a tshepa Jehofa e bile ka dinako tsotlhe o ne a ikutlwa a sireletsegile fa a latela kaelo ya gagwe. O ne a itse gore Jehofa o a mo rata le gore o tla tswelela a mo rata botshelo jwa gagwe jotlhe. Ke eng se se neng se dira gore Dafide a tlhatswege pelo gore Jehofa o a mo rata? Dafide o ne a itse gore Jehofa o a mo tlhokomela ka gonne o ne a mo naya sengwe le sengwe se a se tlhokang. Gape Dafide o ne a itse gore Jehofa ke tsala ya gagwe le gore o a mo rata. Ka jalo, o ne a tlhatswegile pelo gore le fa a ka diragalelwa ke eng mo botshelong, Jehofa o tla mo naya se a se tlhokang. E re ka Dafide a ne a itse gore Jehofa o a mo rata le gore o a mo tlhokomela, o ne a sa tlhobaele. O ne a nna a itumetse e bile a kgotsofetse.​—Pes. 16:11. w24.01 29 ¶12-13

Fa e sa le go tloga ka nako ya Ntwa ya Bobedi ya Lefatshe, batho ba ga Jehofa ba ntse ba rera ka kgololesego mo dinageng di le dintsi mme seo se thusitse batho ba le bantsi gore ba itse Jehofa. Bakaulengwe ba Setlhopha se se Laolang ba ikobela kaelo ya ga Jesu. Ba batla gore go bonale gore ditaelo tse ba di nayang bakaulengwe le bokgaitsadi di tswa kwa go Jehofa le Jesu. Ba dirisa balebedi ba potologo le bagolwane go kaela diphuthego. Tota e bile, Baebele e a re bagolwane ba mo seatleng sa ga Jesu sa moja. (Tshen. 2:1) Gone ke nnete gore bagolwane ba dira diphoso fela jaaka Moshe, Joshua le baaposetoloi le bone ba ne ba di dira. (Dipa. 20:12; Josh. 9:14, 15; Bar. 3:23) Le fa go ntse jalo, re tshwanetse go nna re gopotse gore Jesu o kaela motlhanka yo o boikanyego le yo o botlhale le bagolwane, e bile o tla tswelela a dira jalo. Ka jalo re tshwanetse go ikobela kaelo e a re nayang yone a dirisa banna bano. w24.02 23-24 ¶13-14

Jehofa o a itumela fa re bua ka ene ka tsela e e bontshang gore re a mo rata, le fa re lebogela sengwe le sengwe se a re direlang sone. Fa re rerela batho, re tshwanetse go nna re gopotse gore boikaelelo jwa rona ke go ba thusa gore ba atamalane le Jehofa, le gore ba mo rate fela jaaka re mo rata. (Jak. 4:8) Re itumelela go ba bontsha gore Baebele e a re Jehofa o lorato, o rata tshiamiso, o botlhale, o na le maatla le dinonofo tse dingwe tse dintle. Gape re baka Jehofa fa re leka ka natla go mo etsa. Fa re dira jalo, batho bangwe ba tla lemoga gore ga re tshwane le batho ba lefatshe leno le le bosula, ba bo ba ipotsa dipotso. (Math. 5:14-16) Seno se ka re naya tshono ya gore re ba tlhalosetse gore ke eng fa re tshela ka tsela e re tshelang ka yone, mme ba ba ratang boammaaruri ba ka nna ba kgatlhegela go ithuta ka Modimo. Fa re baka Jehofa ka ditsela tseno, o a itumela.​—1 Tim. 2:3, 4. w24.02 10 ¶7

O tshwanetse go nna le bokgoni bongwe jo bo rileng gore o kgone go nna mokaulengwe yo o tlhomang sekao. Bokgoni joo bo tla go thusa gore o kgone go dira maikarabelo mangwe mo phuthegong, o nne le lotseno gore o itlhokomele le ba lelapa la gago le gore o dirisane sentle le batho ba bangwe. Ka sekai, ithute go bala le go kwala. Baebele e a re motho yo o balang Lefoko la Modimo letsatsi le letsatsi e bile a akanyetsa kwa teng ka lone, o tla itumela e bile o tla atlega. (Pes. 1:1-3) Fa monna a bala Baebele letsatsi le letsatsi, o tla itse gore ke eng se se itumedisang Jehofa, mme seo se tla mo thusa gore a dirise se a se ithutang. (Diane 1:3, 4) Bakaulengwe le bokgaitsadi ba tlhoka bakaulengwe ba ba kgonang go ba ruta le go ba gakolola ba dirisa Baebele. Fa o itse go bala le go kwala, o tla kgona go baakanyetsa dipuo le dikakgelo tse di tla tswelang ba bangwe mosola le tse di tla nonotshang tumelo ya bone. Gape o tla kgona go kwala dintlha tse di tla nonotshang tumelo ya gago, e bile di tla go thusa gore o kgothatse ba bangwe. w23.12 26-27 ¶9-11

Fa e le gore go na le sengwe se se dirang gore o boife, akanyetsa kwa teng ka se Jehofa a tlileng go re direla sone mo nakong e e tlang fa Satane a seyo. Pontsho nngwe e e ileng ya dirwa kwa kopanong ya tikologo ya 2014, e ile ya bontsha rre a tlotla le ba lelapa la gagwe ka 2 Timotheo 3:1-5, mme a fetotse mafoko a yone go bontsha gore botshelo bo tla bo bo ntse jang kwa Paradaiseng. O ne a re: “Kwa lefatsheng le lesha re tla bo re itumetse. Gonne batho e tla nna ba ba ratang ba bangwe, ba ba ratang boammaaruri, ba ba boingotlo, ba ba seng mabela, ba ba bakang Modimo, ba ba utlwang batsadi, ba ba lebogang, ba ba ikanyegang, ba ba ratang ba malapa a bone, ba ba dirang tumalano, ba ba buang sentle ka ba bangwe, ba ba nang le boikgapo, ba ba bonolo, ba ba ratang se se molemo, ba ba tshepegang, ba ba reetsang, ba ba boikokobetso, ba ba ratang Modimo go na le go rata menate, ba ba ineetseng mo Modimong ka peloyotlhe, mme bano o ba ngaparele.” A o a tle o tlotle le ba lelapa la gago le bakaulengwe le bokgaitsadi ka gore botshelo bo tla bo bo ntse jang kwa lefatsheng le lesha? w24.01 6 ¶13-14

Baebele e a re: “Jehofa o itumelela batho ba gagwe.” (Pes. 149:4) Ruri mafoko ano a a kgothatsa ka gonne a re netefaletsa gore Jehofa o amogela batho ba gagwe. Le fa go ntse jalo, ka dinako dingwe bangwe ba a tle ba kgobege marapo ba bo ba akanya gore Jehofa ga a ba amogele. Batlhanka bangwe ba ga Jehofa ba mo nakong e e fetileng le bone ba ne ba tle ba ikutlwe jalo. (1 Sam. 1:6-10; Jobe 29:2, 4; Pes. 51:11) Baebele e a re fa re dumela mo go Jesu Keresete re bo re kolobediwa, Jehofa o tla re amogela. (Joh. 3:16) Fa re kolobediwa, re bontsha ba bangwe gore re ikwatlhaetse maleo a rona le gore re solofeditse Modimo gore re tla dira thato ya gagwe. (Dit. 2:38; 3:19) Jehofa o a itumela fa re dira jalo. Fa re dira sotlhe se ka re kgonang gore re tswelele re mo direla, o a re amogela e bile re nna ditsala tsa gagwe.​—Pes. 25:14. w24.03 26 ¶1-2

Le rona re ka etsa Petere le Johane ka go tswelela re rera le fa puso e re laela gore re tlogele go rera. Re ka tlhatswega pelo gore Jehofa o tla re thusa gore re kgone go rera. Ka jalo, re tshwanetse go kopa Jehofa gore a re neye bopelokgale le botlhale le gore a re thuse go itshoka fa re na le mathata. Bontsi jwa rona re a lwala, re kgobegile marapo, re tlhokafalelwa ke batho ba re ba ratang, re a bogisiwa e bile re na le mathata a mangwe. Mme malwetse a leroborobo le dintwa di dirile gore go nne thata go itshokela mathata ao. Bolelela Jehofa gore o ikutlwa jang. Bua le ene fela jaaka o ne o ka bua le tsala ya gago. Se belaele gore Jehofa “o tla go thusa.” (Pes. 37:3, 5) Fa re nna re rapela re tla kgona go ‘itshoka fa re na le mathata.’ (Bar. 12:12) Jehofa o itse mathata a batlhanka ba gagwe ba a itshoketseng e bile o “utlwa selelo sa bone sa go kopa thuso.”​—Pes. 145:18, 19. w23.05 5-6 ¶12-15

Fa re dira ditshwetso tsa botlhokwa, re tshwanetse go leka go bona gore ke eng “se Jehofa a batlang gore re se dire” re bo re se dira. (Baef. 5:17) Fa re dirisa melaometheo ya Baebele fa re dira ditshwetso, re a bo re bontsha gore re batla kaelo ya ga Jehofa. Fa re dira jalo re tla kgona go dira ditshwetso tse di siameng. Satane o batla gore re tlhome mogopolo thata mo dilong tsa lefatshe leno gore re se ka ra nna le nako ya go direla Jehofa. (1 Joh. 5:19) Mokeresete a ka nna a tlhoma mogopolo mo dilong tse di jaaka madi, thutego kgotsa tiro go na le gore a leke go direla Jehofa mo go oketsegileng. Fa a dira jalo, o tla bo a bontsha gore o simolotse go akanya jaaka batho ba lefatshe leno ba ba sa direleng Jehofa. Gone ke boammaaruri gore dilo tseno ga di phoso, mme gone ga di a tshwanela go nna botlhokwa thata mo go rona. w24.03 24 ¶16-17