Sigcine

Ukuqhuba Izifundo ZeBhayibhile Ezinenkqubela

Esi sihlomelo sihlanganisa iingongoma eziyintloko kungcelele lwamanqaku okuqhuba izifundo zeBhayibhile ezinenkqubela avela kuBulungiseleli Bethu BoBukumkani. Nikhuthazwa nonke ukuba nisigcine esi sihlomelo nize nibhekisele kuso xa niqhuba izifundo zeBhayibhile. Ukongezelela, kusenokubalaseliswa iingongoma ezikwesi sihlomelo ebudeni beentlanganiso zenkonzo yasentsimini, yaye umveleli wenkonzo usenokusisebenzisa kwiintetho zakhe xa etyelele izazulu.

Icandelo 1: Siyintoni Isifundo SeBhayibhile?

Ukuba nixubusha ngeBhayibhile rhoqo, kwanokuba lixesha elincinane, nisebenzisa iBhayibhile nempapasho enconyelweyo, uqhuba isifundo seBhayibhile. Unokusifaka kwingxelo yenyanga emva kokuba siqhutywe izihlandlo ezibini nasemva kokuba sele umbonisile loo mntu indlela esiqhutywa ngayo isifundo yaye naxa uqinisekile ukuba siza kuqhubeka.—km-XO 7/04 iphe. 1.

Iimpapasho Ezinconyelweyo

◼ Yintoni UThixo Ayifunayo Kuthi?

◼ Ulwazi Olukhokelela Kubomi Obungunaphakade

◼ Nqula Okuphela KoThixo Oyinyaniso

◼ Unako Ukuba Ngumhlobo KaThixo! inokusetyenziswa ukufunda nabantu abangafundanga kangako okanye abangakwaziyo ukufunda.

Icandelo 2: Ukulungiselela Ukuqhuba Isifundo

Kufuneka inkcazelo siyidlulisele ngendlela echukumis’ intliziyo yomfundi. Oku kufuna ukuba silungiselele kakuhle sicinga ngalowo simfundelayo.—km-XO 8/04 iphe. 1.

Indlela Yokulungiselela

◼ Hlolisisa umxholo weso sahluko, imixholwana kwakunye nemifanekiso.

◼ Fumana iimpendulo zemibuzo ebhaliweyo, ukrwele kuphela amagama namabinzana aziintloko.

◼ Gqiba ngezibhalo oza kuzifunda xa sele uqhuba isifundo. Bhala amanqaku amafutshane kudini lwephepha elo.

◼ Lungiselela impinda emfutshane ngeengongoma eziyintloko.

Isifundo Sivisisanise Neentswelo Zomfundi

◼ Sithandazele isifundo neentswelo zaso.

◼ Cinga ngeengongoma ekuza kuba nzima ngesifundo ukuba siziqonde okanye sizamkele.

◼ Zibuze: Yintoni ekufuneka siyiqonde okanye sisebenzele kuyo ukuze senze inkqubela ngokomoya? Ndinokuyifikelela njani intliziyo yaso?

◼ Maxa wambi, lungiselela umzekeliso, ingcaciso okanye ungcelele lwemibuzo eya kunceda isifundo siqonde intsingiselo yengongoma ethile okanye yesibhalo esithile.

Icandelo 3: Ukuzisebenzisa Kakuhle IZibhalo

Injongo yokuba siqhube izifundo zeBhayibhile “kukwenza abafundi” ngokunceda abantu baqonde baza bamkele iimfundiso zeLizwi likaThixo kwaye bazisebenzise ebomini babo. (Mat. 28:19, 20; 1 Tes. 2:13) Ngexa yoko, isifundo sifanele sisekelwe eZibhalweni.—km-XO 11/04 iphe. 4.

Fundisa NgeLizwi LikaThixo

◼ Sibonise isifundo sakho indlela yokufumana iindinyana kwiBhayibhile yaso.

◼ Tyhila uze ufunde iindinyana eziseBhayibhileni ezixhasa iimfundiso zethu.

◼ Buza imibuzo. Kunokuba uchazele isifundo sakho iindinyana zeBhayibhile, mayibe siso esikuchazelayo.

◼ Senze sibe lula. Musa ukuzama ukucacisa isolotya ngalinye lesibhalo. Chaza oko kufunekayo kuphela ukuze ucacise loo ngongoma ixutyushwayo.

◼ Mbonise indlela esisebenza ngayo. Sincede isifundo sibone indlela ezisebenza ngayo iindinyana zeBhayibhile kubomi baso.

Icandelo 4: Ukufundisa Isifundo Ukulungiselela

Isifundo esilungiselela kusengaphambili, sikrwelele iimpendulo size siphendule ngamazwi aso sifanele senze inkqubela ngokukhawuleza. Ngoko ke, sakuba siqalisiwe isifundo, lungiselela isahluko kunye naso ukuze usifundise ukulungiselela. Kwinkoliso yezifundo, kuya kuba kuhle ukulungiselela nazo isahluko sonke okanye isifundo siphela.—km-XO 12/04 iphe. 1.

Ukukrwelela Iimpendulo Nokubhala Amanqaku

◼ Sichazele indlela yokufumana iimpendulo ezingqalileyo zemibuzo.

◼ Bonisa isifundo umbhalo wakho waloo ncwadi niyifundayo okrwelele kuyo amagama okanye mabinzana aziintloko.

◼ Sincede isifundo sibone ukuba isibhalo ngasinye esibonisiweyo sixhasa ingongoma esesiqendwini, uze usibonise nendlela yokubhala amanqaku eludinini lwempapasho.

Ushwankathelo Nempinda

◼ Sichazele isifundo ukuba singawuqonda umbandela ngokukhangela umxholo wesahluko, umxholwana nemifanekiso ngaphambi kokuba siqalise ukulungiselela.

◼ Sikhuthaze ukuba sishwankathele iingongoma eziziintloko xa sigqiba ukulungiselela.

Icandelo 5: Ukuqonda Umbandela Ofanele Uwugubungele

Ubungakanani bombandela onokuxutyushwa buya kuxhomekeka kwiimeko zomfundisi nesifundo.—km-XO 1/05 iphe. 1.

Yakha Ukholo Olomeleleyo

◼ Kubaluleke ngakumbi ukunceda isifundo siwuqonde kakuhle umbandela okwiLizwi likaThixo kunokugubungela umbandela omninzi ngexesha nje elifutshane.

◼ Chitha ixesha elaneleyo ukuze uncede isifundo siqonde size samkele oko sikufundayo.

◼ Yiba nexesha elaneleyo ukuze uxubushe iingongoma ezizintloko nezibhalo ezisekelwe kuzo ezo mfundiso.

Bambelela Emxholweni

◼ Ukuba isifundo sithanda ukuthetha ngeengxaki zaso, unokusicela ukuba nizixubushe emva kwesifundo.

◼ Musa ukuthetha kakhulu ebudeni besifundo. Ingongoma esecaleni okanye amava mawasikelwe umda ukuze angasiphazamisi isifundo ekufumaneni ulwazi oluchanileyo lweemfundiso ezisisiseko zeBhayibhile.

Icandelo 6: Xa Isifundo Sinombuzo

Sakuba siqalisiwe isifundo seBhayibhile, kudla ngokuba kuhle ukuxubusha iimfundiso zeBhayibhile ngendlela eyondeleleneyo kunokuba usuke kulo mxholo uye kulowa. Loo nto inceda isifundo sakho ukuba sibe nesiseko solwazi oluchanileyo kwaye senze inkqubela ngokomoya.—km-XO 2/05 iphe. 8.

Sebenzisa Ukuqonda

◼ Imibuzo enento yokwenza naloo mbandela uxutyushwayo inokuphendulwa ngoko nangoko.

◼ Imibuzo engenanto yakwenza nombandela okanye efuna kwenziwe uphando inokuxutyushwa ngelinye ixesha. Kusenokuba luncedo ukuyibhala phantsi imibuzo enjalo.

◼ Xa isifundo sikufumanisa kunzima ukwamkela imfundiso ethile, khangela ezinye iimpapasho ezingena nzulu kuloo mbandela.

◼ Ukuba isifundo asiyamkeli nangoko, wubekele elinye ixesha loo mbandela uze uqhubeke nesifundo.

Zeyise

◼ Ukuba akuyazi impendulo yombuzo, lumkela ukuveza izimvo zakho.

◼ Fundisa isifundo indlela yokwenza uphando.

Icandelo 7: Ukuthandaza Xa Uqhuba Isifundo

Ukuze izifundo zeBhayibhile zenze inkqubela ngokomoya, kufuneka intsikelelo kaYehova. Ngoko ke, kufanelekile ukuba isifundo sivulwe size sivalwe ngomthandazo.—km-XO 3/05 iphe. 4.

Indlela Yokusiqalisa Ngomthandazo

◼ Xa sifundela abantu abatyekele elunqulweni, sinokuthandaza kwisihlandlo sokuqala sifundela loo mntu.

◼ Kwabanye abantu, kusenokufuneka sizibonele ukuba singaqalisa nini ukusivula ngomthandazo isifundo.

◼ Sinokusebenzisa INdumiso 25:4, 5 neyoku-1 kaYohane 5:14 ukuze sichaze isizathu sokuba kufuneka sithandaze.

◼ Sinokusebenzisa uYohane 15:16 ukuze sibonise ukuba sifanele sithandaze kuYehova egameni likaYesu Kristu.

Oko Kufanele Kuqukwe Emthandazweni

◼ Kufanelekile ukudumisa uYehova njengoMthombo wale mfundiso.

◼ Quka mazwi abonisa umdla wokwenene esinawo kuloo mntu simfundelayo

◼ Chaza uxabiso onalo ngentlangano ayisebenzisayo uYehova.

◼ Cela uYehova asikelele imigudu eyenziwa sisifundo ekusebenziseni oko sikufundayo.

Icandelo 8: Ukwalathisa Izifundo Kwintlangano

Usukelo lwethu xa siqhuba izifundo zeBhayibhile asikokuzifundisa inkcazelo engeemfundiso kuphela kodwa nokuzinceda zibe yinxalenye yebandla lamaKristu. Ziphe imizuzu embalwa veki nganye yokuxubusha ingongoma ethile ngentlangano kaYehova—km-XO 4/05 iphe. 8.

Iintlanganiso Zebandla

◼ Chaza intlanganiso nganye yebandla. Zimemele kwintlanganiso kwakutyelelo lwakho lokuqala oqhuba ngalo isifundo.

◼ Balaselisa iingongoma eziye zaxutyushwa kwiintlanganiso.

◼ Khulisa ihlombe ngeSikhumbuzo, iindibano notyelelo lomveleli wesiphaluka.

◼ Sebenzisa imifanekiso ekwiimpapasho zethu ukuzinceda ukuba zibone oko kwenziwa apho.

◼ Zikhuthaze ukuba zifunde incwadana enemifanekiso ethi AmaNgqina kaYehova—Angoobani? Yintoni Ayikholelwayo?

Sebenzisa Iividiyo Ukuze Wakhe Uxabiso

◼ Jehovah’s Witnesses—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Icandelo 9: Ukuxhobisa Izifundo Ukuba Zishumayele Ngokungacwangciswanga

Njengoko abantu esibafundelayo beqalisa ukuba nokholo kwizinto abazifundayo, abakwazi ukungathethi ngazo.—km-XO 5/05 iphe. 1.

Zikhuthaze Ukuba Zishumayele

◼ Ngaba kukho abahlobo namalungu entsapho esinokuwamema ukuba abekho xa nifunda?

◼ Ngaba bakho abantu abasebenza naso, esifunda nabo esikolweni okanye abanye abantu esibaziyo abanomdla?

Zikhuthaze Zixelele Abantu Ngeenkolelo Zazo

◼ Kwiingongoma ezithile kwisifundo senu, sibuze: “Unokuyisebenzisa njani iBhayibhile ukuze ucacisele intsapho yakho ngale nyaniso?”

◼ Nceda isifundo siyiqonde imfuneko yokuba nentlonelo nobubele xa sithetha nabanye ngoThixo nangeenjongo zakhe.

◼ Incwadana enemifanekiso ethi AmaNgqina KaYehova—Angoobani? Yintoni Ayikholelwayo? inokusetyenziswa zizifundo ukunceda abahlobo namalungu entsapho aqonde iinkolelo nemisebenzi yethu esekelwe eBhayibhileni.

Icandelo 10: Ukuqeqesha Izifundo Ukuba Zishumayele Kwindlu Ngendlu

Xa abadala begqibe kwelokuba isifundo seBhayibhile siyakufanelekela ukuba ngumvakalisi ongabhaptizwanga, sinokuqalisa ukuya nebandla entsimini.—km-XO 6/05 iphe. 1.

Ukulungiselela Kunye

◼ Mbonise umvakalisi omtsha apho anokufumana khona iintshumayelo ezicetyisiweyo.

◼ Khetha intshumayelo elula nesebenzayo entsimini yasekuhlaleni.

◼ Mkhuthaze ukuba asebenzise iBhayibhile entsimini.

◼ Qheliselani kunye. Mbonise ukuba angazisingatha njani iindlela abantu abadla ngokusabela ngazo.

Ukushumayela Kunye

◼ Isifundo masiphulaphule indlela wena oyibeka ngayo loo ntshumayelo niyilungiselele kunye.

◼ Sicingele isifundo sakho ukuba ubuntu baso bunjani nobuchule esinabo. Kwezinye iimeko kusenokuba kuhle ukuba sibe nenxaxheba encinane kwintshumayelo.

◼ Nceda umvakalisi osemtsha abe nenxaxheba rhoqo entsimini.

Icandelo 11: Ukunceda Abafundi Benze Amabuyelo

Makulungiselelwe utyelelo olulandelayo kwakwisihlandlo sokuqala. Khuthaza ukuba sibe nomdla wokwenene kubantu esithetha nabo. Qhubeka usiqeqeshela ukuba simvumele umninimzi ukuba athethe oko kusentliziyweni, simphulaphule, size sinikele ingqalelo kwizinto ezimxhalabisayo.—km-XO 7/05 iphe. 1.

Ukulungiselela Ukubuyela

◼ Phindani nihlolisise oko bekuxutyushwa kutyelelo lokuqala, uze ubonise isifundo indlela yokukhetha umbandela oya kubangel’ umdla kumninimzi.

◼ Lungiselelani intshumayelo emfutshane esebenzisa iSibhalo sibe sinye esikwisiqendu sempapasho efundwayo.

◼ Lungiselelani umbuzo esiza kuwuphakamisa xa siqukumbela ingxubusho.

Zingisa Ekubuyeleni Kwabanomdla

◼ Sikhuthaze isifundo ukuba sibuyele ngokukhawuleza kubo bonke abanomdla.

◼ Nceda isifundo sikuncekelele ukubuyela kwabo kunzima ukubafumana.

◼ Sibonise indlela yokulungiselela ukubuyela, yaye sisiqonde isizathu sokugcina isithembiso sokubuyela.

Icandelo 12: Ukunceda Izifundo Ziqalise Zize Ziqhube Izifundo ZeBhayibhile

Kubalulekile ukuba uxelise uYesu ngokumisela umzekelo omhle entsimini. Njengoko isifundo sibona indlela okhokela ngayo entsimini, siya kuqonda ukuba eyona njongo yokwenza amabuyelo kukuqalisa izifundo zeBhayibhile.—km-XO 8/05 iphe. 1.

Ukucela Ukuqhubela Umntu Isifundo SeBhayibhile

◼ Akudli ngakuba yimfuneko ukuba sichaze ilungiselelo lesifundo ngokweenkcukacha.

◼ Ngokufuthi kuhle ukumbonisa indlela esiqhutywa ngayo isifundo usebenzisa isiqendu esinye okanye ezibini kuloo ncwadi niza kuyifunda.

◼ Yenzani impinda nize niqhelisele amanye amacebiso okuqalisa izifundo zeBhayibhile.—km-XO 8/05 iphe. 8; km-XO 1/02 iphe. 6.

Ukunceda Izifundo Zibe Ngabafundisi

◼ Khuthaza izifundo ukuba zibhalise kwiSikolo Sobulungiseleli Sobuthixo.

◼ Lungiselela ukuba lo mvakalisi mtsha ahambe nawe xa usiya kuqhuba ezinye izifundo zeBhayibhile asenokuba negalelo elingephi kuzo.