Ximotemachi Jehová kuali mitsita

1. ¿Tlake uelis moiljuisej se keskij toTeotsij itekipanojkauaj?

TLAUEL tiyolpakij kema tijmatij Jehová “kipantia pakilistli ipan itlakauaj” (Sal. 149:4). Maske tijmatij nopa, kemantika sekij uelis moyolkokosej uan moiljuisej: “Maske Jehová kuali kiita itlanechikol, ¿nojkia kuali nechita na?”. Miakej toTeotsij itekipanojkauaj katli uejkajkia itstoyaj nojkia motlatsintokijkej tlaj toTeotsij kuali kinitayaya (1 Sam. 1:6-10; Job 29:2, 4; Sal. 51:11).

2. ¿Ajkia inijuantij kuali kinita Jehová?

² Biblia kiijtoua maske titlajtlakolejkej, Jehová kena uelis kuali techitas. Pero, ¿tlake moneki tijchiuasej? Moneki tijnextisej titlaneltokaj ipan Jesús uan timoatsonpoliuiltisej (Juan 3:16). Kiampa tijnextisej ininixpa sekinok, nelia timoyolkueptokej uan tijtenkauilijkej Jehová nochipa tijtekipanosej (Hech. 2:38; 3:19). Jehová tlauel yolpaki kema kiampa tijchiuaj pampa tijnekij tielisej iuampoyouaj. Tlaj tijchiuaj kampeka tijchiuasej tlen tijtenkauilijkej kema timotemaktilijkej, Jehová kuali techitas uan tielisej iuampoyouaj (Sal. 25:14).

3. ¿Tlake tlajtlanili tijnankilisej ipan ni tlamachtili?

³ Uajka, ¿kenke kemantika sekij moiljuiaj Jehová amo kuali kinita? ¿Kenijkatsa Jehová kinextia yolpaki ika tlen tijchiuaj? ¿Uan tlake techpaleuis ma timotemachikaj Jehová kuali techita?

¿KENKE SEKIJ MOILJUIAJ JEHOVÁ AMO KUALI KINITA?

4, 5. ¿Ipan tlake uelis timotemachisej tlaj timoiljuiaj amo topati?

⁴ Miakej tlen tojuantij uelis pejki amo timopatiitaj desde kema tieliyayaj tikonemej (Sal. 88:15). Se toikni katli itoka Adrián, kiijtoua: “Nochipa nimoiljuijtok amo tleno nopati. Nikilnamiki kema nieliyaya niokichpil, nikiljuiyaya Jehová ma kinpaleui nochampoyouaj itstosej ipan Xochimili, pero na nimoiljuiyaya amo kinamikiyaya niitstos nopaya.” Tony kiijtoua kenijkatsa kiiskaltijkej itatauaj, katli amo kitekipanouayayaj Jehová: “Amo kema nechiljuijkej tlaj kuali nechitayayaj yon tlaj nechikneliyayaj. Kichijkej ma nijyolmati amo kema ueliskia nikinyolpakiltis”.

⁵ Tlaj kemantika timoiljuiaj amo tleno topati, ma tikilnamikikaj Jehová kichijki ma tiitstokaj ipan itlanechikol (Juan 6:44). Ya kiita nopa kuajkuali tlamantli tlen tijnextiaj maske tojuantij amo tikitaj, uan kimati kenijkatsa nelnelia tielij (1 Sam. 16:7; 2 Crón. 6:30). Yeka, ma tijneltokakaj kema Jehová techiljuia techpatiita (1 Juan 3:19, 20).

6. ¿Kenijkatsa kiyolmatiyaya Pablo kema moiljuiyaya ipan ya?

⁶ Uelis se keskij tlen tojuantij tlauel timotlajtlakoltiaj pampa tijchijkej tlen amo kuali kema ayamo tijtekipanouayayaj Jehová (1 Ped. 4:3). Se keskij katli miak xiuitl kuali kitekipanojtokej Jehová, uelis nojua ouij kimatij amo kichiuasej tlen kinyoltilana. Uan ta, ¿nojkia kiampa mitspano? Tlaj kena, uelis mitsyolchikauas tijmatis sekij toTeotsij itekipanojkauaj nojkia kiampa kinpanok. Apóstol Pablo tlauel moyolkokouayaya kema kiitayaya amo nochipa ueliyaya kichiua tlen kuali (Rom. 7:24). Maske ya moyolkueptoya uan moatsonpoliuiltijtoya, nojua moiljuiyaya eliyaya “tlen más pilsiltsi tlen nochi” apóstoles uan nojkia kiijtok ya más tlajtlakolchijtoya que sekinok (1 Cor. 15:9; 1 Tim. 1:15).

7. ¿Ipan tlake uelis timotemachisej tlaj ya timoyolkuepkej?

⁷ ToTata Jehová kiijtojtok techtlapojpoljuis tlaj timoyolkuepaj (Sal. 86:5). Yeka, tlaj ya timoyolkuepkej ika nochi toyolo, ma timotemachikaj ya techtlapojpoljuik (Col. 2:13).

8, 9. ¿Tlake techpaleuis tlaj timoiljuiaj amo kema uelis tijyolpakiltisej Jehová?

⁸ Nochi tijnekij tijtekipanosej Jehová ika nochi toyolo. Pero uelis sekij moiljuiaj amo kema uelis kichiuasej nochi tlen Jehová kipaktia uan kiampa kuali kinitas. Se tosiuaikni katli itoka Amanda, kiijtoua: “Ajachika nimoiljuia nijmakas Jehová tlen más kuali kiijtosneki nijchiuas miak tlamantli. Yeka, nimochiualtia nijchiuas tlen amo niueli. Uan kema amo kiampa nijchiua, nimoiljuia Jehová amo kuali nechita pampa na kiampa nimoita”.

⁹ ¿Tlake techpaleuis tlaj timoiljuiaj amo kema uelis tijyolpakiltisej Jehová? Ma tikilnamikikaj ya amo techchiualtis ma tijchiuakaj tlen amo tiuelij. Jehová tlauel kipatiita nochi tlen tijchiuaj pampa tijnekij tijtekipanosej, maske uelis amo tiuelij tijchiuaj miak tlamantli. Nojkia ma timoiljuikaj ipan se keskij toTeotsij itekipanojkauaj tlen Biblia kiijtoua kitekipanojkej Jehová ika nochi ininyolo. Se neskayotl, Pablo chikauak tlatekipanok uan miak xiuitl nejnenki uejka, kiampa tlapaleuik ma mochiua miak tlanechikoli. Pero teipa mopatlak kej itstoya uan ayokmo uelki tlajtolmoyaua kej achtouia. ¿Nopa kichijki Jehová ayokmo kuali ma kiita? Amo, Pablo nojua kichijki kampeka uan Jehová nojua kiteochijki (Hech. 28:30, 31). Tojuantij nojkia amo nochipa uelis tijtekipanosej Jehová kej achtouia, pero ya tlauel kipatiita kema tijchiuaj ika nochi toyolo. Ma tikitakaj se keski tlamantli tlen ika Jehová kinextia kuali techita.

¿KENIJKATSA JEHOVÁ KINEXTIA YOLPAKI IKA TLEN TIJCHIUAJ?

10. ¿Ika tlake tlamantli kinextia Jehová kuali techita? (Juan 16:27).

¹⁰ Ika Biblia. Jehová kipaktia itekipanojkauaj ma kimatikaj ya tlauel kiniknelia uan kuali kinita. Ipan Biblia kiijtoua Jehová ompa kiiljuik Jesús ya eliyaya iKone katli tlauel kiikneliyaya uan kuali kiitayaya (Mat. 3:17; 17:5). ¿Mitspaktiskia Jehová ma mitsiljui yolpaki ika tlen tijchiua? Maske ya amo techualnojnotsa desde iluikak, kena kichiua ika Biblia. Kema tikitaj Jesús kinnojnotski itokilijkauaj ika miak tlaiknelili, tijmatij Jehová kejuak nojkia kiampa techiljuia (xijpoua Juan 16:27). Jesús kuali kinextik kenijkatsa eliyaya iTata. Yeka, kema tijpouaj Jesús kiniljuiyaya itokilijkauaj kinikneliyaya maske mokuapolouayayaj, tijmatij kejuak Jehová nojkia kiampa techiljuia (Juan 15:9, 15).

11. ¿Kenke amo kinamiki timoiljuisej Jehová ayokmo kuali techita kema tikixnamikij tlaouijkayotl? (Santiago 1:12).

¹¹ Ika tlen kichiua. Jehová kineki techpaleuis, yeka techmaka tlen ika timopanoltisej. Pero kemantika kikaua ma tikixnamikikaj se keski tlaouijkayotl, kej kipanok Job (Job 1:8-11). Kema tikixnamikisej se tlaouijkayotl amo ma timoiljuikaj Jehová ayokmo kuali techita, más kuali, ma tijnextikaj tlauel tikikneliaj uan timotemachiaj ipan ya (xijpoua Santiago 1:12). Kiampa, kema tikixnamikisej tlaouijkayotl, tikitasej kenijkatsa Jehová tlauel techiknelia uan techpaleuia ma tikijiyouikaj tlen techpano.

12. ¿Tlake techmachtia tlen kipanok Dimitri?

¹² Ma tikitakaj tlen kipanok Dimitri, se toikni katli eua Asia. Ya ayokmo kipixki tekitl. Kema panok miak metstli uan amo kiasiyaya seyok tekitl, mosentlalik más tlajtolmoyauas pampa kinekiyaya kinextis motemachiyaya ipan Jehová. Pero nojua panok miak metstli uan amo kipantiyaya tekitl. Teipa, pejki mokokoua uan monekiyaya san uetstos ipan icama. Teipa pejki moiljuia amo eliyaya se kuali tetaj yon se kuali teueue, uan moiljuik Jehová uelis ayokmo kuali kiitayaya. Se youali, ipilsiuapil kikixtik ipan amatl tlen kiijtoua Isaías 30:15: “Intla inmotemachisej ipan na uan axinmolinisej, inkipiasej chikaualistli”. Teipa, kimakak itata nopa amatl uan kiiljuik: “Pa, kema timokuesojtos, xikilnamiki ni texto”. Dimitri kiitak Jehová kinpaleuijtoya, yeka ichampoyouaj nojua kipixtoyaj tlen mokentisej, tlen kikuasej uan kampa itstosej. Kiijtok: “Monekiyaya amo tlauel nimoyolkuesos uan nimotemachis ipan noDios”. Tlaj ta nojkia tikixnamiktok se tlaouijkayotl, ximotemachi Jehová mitsiknelia uan mitspaleuis tikijiyouis.

13. ¿Ika tlake seyok tlamantli Jehová kinextia kuali techita?

¹³ Ika toikniuaj. Jehová uelis kinyololinis toikniuaj ma techyolchikauakaj kema más moneki. Kiampa kipanok se tosiuaikni tlen Asia. Ya ayokmo kipixki tekitl uan pejki tlauel mokokoua. Teipa iueue kichijki se ueyi tlajtlakoli uan ayokmo elki ueuejtlakatl. Tosiuaikni tlauel motetsoptoya, yeka kiijtok: “Amo nijmatiyaya kenke kiampa nechpanoyaya. Nimoiljuiyaya uelis nijchijtoya tlen amo kuali uan Jehová ayokmo kuali nechitayaya”. Uajka kiiljuik Jehová ma kinextili tlaj nojua kiikneliyaya, uan ya kena kinankilik. ¿Kenijkatsa kinankilik? Ya kiijtoua: “Ueuejtlakamej kamanaltikej nouaya uan nechpaleuijkej ma nikita Jehová nojua nechikneliyaya”. Teipa, kiiljuik Jehová sampa ma kipaleui. ¿Tlake panok? Ya kiijtoua: “Ipan nopa tonali, nijselik se amatlajkuiloli tlen kiijkuilojtoyaj miakej toikniuaj tlen notlanechikol, kampa kiijtouayayaj tlauel nechikneliaj. Kema nijpojki, nikitak Jehová kena nechtlakakilijtoya”. Kej tikitaj, Jehová kinextia kuali techita, kema sekinok techyolchikauaj ika se kuali tlajtoli (Sal. 10:17).

14. ¿Kenke kema toikniuaj techtlajtolmakaj kinextia Jehová kuali techita?

¹⁴ Jehová nojkia uelis kinextis kuali techita kema toikniuaj techtlajtolmakaj. Se neskayotl, ipan achtoui siglo Jehová kitekiuik apóstol Pablo para ma kiijkuilo 14 amatlajkuiloli kampa chikauak kintlajtolmakak toikniuaj pero nojkia kinextik kiniknelia. ¿Kenke Jehová kiiljuik Pablo ma kintlajtolmaka toikniuaj? Pampa ya kuali iyolo, techiknelia, uan techtlalnamiktia “keja se tetaj kixitlaua ikone tlen tlauel kiiknelia” (Prov. 3:11, 12). Yeka, tlaj se akajya techtlajtolmaka ika Biblia, amo ma timoiljuikaj Jehová ayokmo kuali techita, pampa nopa kinextia nojua techiknelia (Heb. 12:6). ¿Tlake sekinok tlamantli kinextia Jehová kuali techita?

SEKINOK TLAMANTLI TLEN IKA JEHOVÁ KINEXTIA KUALI TECHITA

15. ¿Ajkia inijuantij Jehová kinmaka ichikaualis, uan ipan tlake uelis timotemachisej?

¹⁵ Jehová kinmaka ichikaualis katli kuali kinita (Mat. 12:18). Ueliskia timotlatsintokisej: “¿Nijnextia ipan nonemilis nopa kuajkuali tlamantli tlen ichikaualis Dios?”. ¿Nama más tijpia moyolo pampa tijtekipanoua Jehová? Kema tikitas más tijnextia nopa kuajkuali tlamantli tlen ichikaualis Dios kichiua ma tijnextikaj ipan tonemilis, más timotemachis Jehová kuali mitsita. (Xikita nopa recuadro “Kema tijpiaj Itonal Toteko. . . ”).

16. Kej kiijtoua 1 Tesalonicenses 2:4, ¿ajkia kintekiuia Jehová para ma tlajtolmoyauakaj? ¿Uan tlake tijyolmati kema tijmati nopa tlamantli?

¹⁶ Jehová kinkaua ma kimoyauakaj nopa kuali tlamachtili katli kuali kinita (xijpoua 1 Tesalonicenses 2:4). Ma tikitakaj kenijkatsa se tosiuaikni katli itoka Jocelyn kiampa kiitak. Se tonali, ya tlauel mokuesojtoya. Ya kiijtoua: “Nijmatiyaya amo nijpiayaya chikaualistli para nijchiuas yon se tlamantli. Pero nimochijtoya precursora uan nopa tonali monekiyaya nitlajtolmoyauas. Nimomaijtok uan niajki nitlajtolmoyauato”. Ipan nopa tonali, Jocelyn kamanaltik iuaya Mary, se siuatl katli kuali kitlakakilik uan kinejki momachtis Biblia. Kema panok se keski metstli Mary kiijtok ipan nopa tonali kema Jocelyn yajki ichaj, ya kitlajtlanijtoya Dios ma kipaleui. ¿Tlake kiyekok Jocelyn? Ya kiijtoua: “Nijmatki kejuak Jehová nechiljuiyaya: ‘Na kuali nimitsita’”. Maske amo nochi maseualmej kuali techtlakakiliaj kema titlajtolmoyauaj, uelis timotemachisej Jehová yolpaki kema kiita tijchiuaj kampeka tikiniljuisej sekinok nopa kuali tlamachtili.

17. Sanse kej Vicky, ¿kenijkatsa techpaleuis tlaj timoyoliljuiaj ipan Jesús imikilis? (Salmo 5:12).

¹⁷ Jehová kintlapojpoljuia ika Jesús imikilis katli kuali kinita (1 Tim. 2:5, 6). ¿Uan tlaj ouij tijmatij tijneltokasej Jehová kuali techita maske titlaneltokaj ipan Jesús imikilis uan ya timoatsonpoliuiltijkej? Ma tikilnamikikaj amo nochipa uelis timotemachisej ipan toyolo, pero kena uelis nochipa timotemachisej ipan Jehová. Ya kinita xitlauakej katli motemachiaj ipan Jesús imikilis uan kiijtojtok kinteochiuas (xijpoua Salmo 5:12; Rom. 3:26). Se tosiuaikni katli itoka Vicky tlauel kipaleuik kema moyoliljuik ipan Jesús imikilis. Maske kimatiyaya ouij kineltokas Jehová kiikneliyaya, teipa kiitak kena kiikneliyaya, ya kiijtoua: “ToTeotsij kipixtoya iyolo nouaya [ . . . ]. Uan na kejuak nikiljuiyaya: ‘Motlaiknelil amo uelis nechpaleuis. Maske moKone motemaktilik amo uelis tinechtlapojpoljuis’”. Tlaj tijchiuasej kej Vicky uan timoyoliljuisej ipan Jesús imikilis, nojkia tikitasej Jehová techiknelia uan timotemachisej ya kuali techita.

18. ¿Ipan tlake uelis timotemachisej tlaj nochipa tikiknelijtosej Jehová?

¹⁸ Maske tijchiuasej kampeka tijchiuasej tlen tijyekojkej ipan ni tlamachtili, kemantika uelis nojua timokuesosej uan timotlajtlanisej tlaj Jehová kuali techita. Tlaj ta kiampa mitspano, xikilnamiki Jehová kuali kinita katli nochipa kinextiaj kiikneliaj (Sant. 1:12). Yeka, nojua xijnechkaui Jehová uan xijchiua kampeka tikitas tlen kinextia ya yolpaki ika tlen tijchiua. Uan amo kema xikilkaua “ya amo uejka itstok” (Hech. 17:27).