यर्मिया
९ मेरो शिर पानीले भरिएको कुवा
र मेरो आँखा पानीको धारा भएको भए,+
मरिगएका मेरा मानिसहरूको निम्ति
म दिनरात रोएर बस्ने थिएँ।
२ निर्जनभूमिमा यात्रुहरू बास बस्ने ठाउँ भइदिएको भए,
म मेरा मानिसहरूलाई चटक्कै छोडेर त्यहीँ जाने थिएँ।
किनकि तिनीहरू सबै व्यभिचार* गर्छन्;+
तिनीहरू सबै छली छन्।
३ ताँदो चढाइएको धनु काँड हान्न तयार भएझैँ तिनीहरूको जिब्रो झूट बोल्न सधैँ तयार रहन्छ।
तिनीहरूको देश वफादारीले होइन, छलले भरिएको छ।+
“तिनीहरू एकपछि अर्को दुष्ट काम गर्छन्,
मेरो कुरामा तिनीहरू पटक्कै ध्यान दिँदैनन्,”+ यहोवा घोषणा गर्नुहुन्छ।
४ “तिमीहरू सबै आफ्नो छिमेकीदेखि होसियार बस
अनि आफ्नै दाजुभाइलाई समेत भरोसा नगर।
किनकि तिमीहरूका दाजुभाइ सबै धोकेबाज हुन्+
अनि तिमीहरूका सबै छिमेकीले एकअर्काको निन्दा गर्छन्।+
५ प्रत्येकले आफ्नो छिमेकीसित छल गरिरहेको छ,
सत्य बोल्ने कोही छैन।
तिनीहरूको जिब्रो झूट बोल्न सिपालु भइसकेको छ।+
तिनीहरू खराब काम गर्दागर्दै थकित हुन्छन्।
६ तिमी छलछामले घेरिएका छौ।
ती मानिसहरू झूट बोल्छन् र मलाई चिन्न इन्कार गर्छन्,” यहोवा घोषणा गर्नुहुन्छ।
७ त्यसकारण सेनाहरूका यहोवा यसो भन्नुहुन्छ:
“म तिनीहरूलाई खार्नेछु र जाँच्नेछु,+
मेरा मानिसहरूकी छोरीलाई* त्यसबाहेक म के गर्न सक्छु र?
८ तिनीहरूको जिब्रो घातक काँडजस्तै छ, जसले छली कुरा गर्छ।
तिनीहरू मुखले चाहिँ आफ्नो छिमेकीलाई शान्तिको कामना गर्छन्
तर भित्रभित्रै त्यस छिमेकीलाई फसाउन पासो थाप्छन्।”
९ यहोवा घोषणा गर्नुहुन्छ, “तिनीहरूको यस्तो कुकर्मको लागि के म तिनीहरूलाई दोषी नठहराऊँ?
यस्तो घिनलाग्दो काम गर्ने राष्ट्रसित के म बदला नलिऊँ?+
१० पर्वतहरूको निम्ति म रुनेछु र शोक गर्नेछु,
निर्जनभूमिमा भएका चरनहरू सम्झेर म शोकगीत गाउनेछु
किनकि ती उजाड भएका छन् र कोही पनि त्यहाँबाट हिँड्दैन,
त्यहाँ गाईवस्तुको आवाज सुनिँदैन।
जङ्गली जनावर र आकाशका चराचुरुङ्गी त्यहाँबाट भागिसके।+
११ म यरुसलेमलाई ढुङ्गाको थुप्रो+ र स्यालको ओडार बनाउनेछु,+
यहुदाका सहरहरूलाई म उजाड पार्नेछु र त्यहाँ कोही पनि बस्नेछैन।+
१२ यी सब हुनुको कारण बुझ्ने समझदार मानिस को छ?
यो कुरा अरूलाई बताऊ भनी यहोवाले कसलाई यी कुराहरू बुझाउनुभएको छ?
देश किन नाश हुँदै छ?
कोही पनि हिँड्न नसक्ने उजाड ठाउँझैँ
यो देश किन सुकेर जाँदै छ?”
१३ यहोवाले जवाफ दिनुभयो: “तिनीहरूले मेरो व्यवस्थालाई* तिरस्कार गरेकोले र त्यसअनुसार नचली मेरो आज्ञा उल्लङ्घन गरेकोले यस्तो भएको हो। १४ अनि हठी हुँदै तिनीहरूले आफ्नै मनको कुरा सुने+ र तिनीहरूका पितापुर्खाले सिकाएझैँ बाआल देवताको मूर्तिलाई पुज्न थाले।+ १५ त्यसकारण सेनाहरूका यहोवा, इस्राएलका परमेश्वर यसो भन्नुहुन्छ, ‘म यी मानिसहरूलाई तीतेपाती खान लगाउनेछु र विष हालेको पानी पिउन लगाउनेछु।+ १६ म तिनीहरूलाई तिनीहरू र तिनीहरूका पितापुर्खाले कहिल्यै थाह नपाएका जातिहरूको बीचमा तितरबितर पार्नेछु+ अनि तिनीहरू नाश नहोउन्जेल तिनीहरूको पछिपछि तरबार पठाउनेछु।’+
१७ सेनाहरूका यहोवा यसो भन्नुहुन्छ,
‘समझ चलाऊ।
शोकगीत गाउने स्त्रीहरूलाई भेला गर,+
जो-जो सिपालु छन्, ती स्त्रीहरूलाई बोलाऊ,
१८ तिनीहरू चाँडै आऊन् र हाम्रो निम्ति विलाप गरून्
र हाम्रो आँखाबाट बरबर आँसु झरोस्
अनि आँखाको डिलबाट तरर्र आँसु बगोस्।+
१९ सियोनबाट यस्तो विलापको गीत सुनिँदै छ:+
“हामी कत्ति नराम्ररी नष्ट भयौँ!
हामी साह्रै लाजमा पऱ्यौँ!
किनकि हामीले आफ्नो देश छोड्नुपरेको छ र तिनीहरूले हाम्रा घरहरू तहसनहस पारिदिएका छन्।”+
२० हे स्त्रीहरू हो, यहोवाको वचन सुन।
उहाँले बोल्नुभएको कुरा तिमीहरूको कानमा परोस्।
आफ्ना छोरीहरूलाई विलापको गीत सिकाओ
र एकअर्कालाई यो शोकगीत सिकाओ।+
२१ मृत्यु हाम्रा झ्यालहरूबाट उक्लेर आएको छ;
केटाकेटीलाई सडकबाट
र जवान मानिसहरूलाई चोकबाट उठाएर लैजान
त्यो हाम्रो सुरक्षित किल्लाहरूभित्र पसेको छ।’+
२२ तिमीले यसो भन्नू, ‘यहोवा घोषणा गर्नुहुन्छ:
“मानिसहरूका लास जमिनमा मलसरि पस्रिरहनेछन्,
बाली काटेपछिको बिटासरि पस्रिरहनेछन्,
तिनीहरूलाई उठाउने कोही हुनेछैन।”’”+
२३ यहोवा यसो भन्नुहुन्छ:
“बुद्धिमान् मानिसले आफ्नो बुद्धिमा घमन्ड नगरोस्;+
बलवान् मानिसले आफ्नो बलमा घमन्ड नगरोस्;
धनी मानिसले आफ्नो धनमा घमन्ड नगरोस्।”+
२४ “बरु घमन्ड गर्नेले मेरो ज्ञान लिएकोमा र मलाई चिनेकोमा घमन्ड गरोस्+
अनि यस पृथ्वीमा अटल प्रेम, न्याय र धार्मिकता देखाउने यहोवाबारे थाह पाएकोमा घमन्ड गरोस्+
किनकि म यी नै कुराहरूमा प्रसन्न हुन्छु,”+ यहोवा घोषणा गर्नुहुन्छ।
२५ यहोवा घोषणा गर्नुहुन्छ, “हेर, यस्तो समय आउँदै छ, जब म ती मानिसहरूलाई दण्ड दिनेछु जो खतना* भएर पनि नभएकाहरूजस्ता छन्।+ २६ मिश्र,+ यहुदा,+ एदोम,+ अम्मोन+ र मोआबमा बस्नेहरू+ अनि मरुभूमिमा बस्नेहरू, जसले कन्चटनेरको कपाल खौरेका छन्,+ तिनीहरूलाई दण्ड दिनेछु किनकि यी जातिहरूको खतना भएको छैन अनि इस्राएलको घरानाको पनि हृदयको खतना भएको छैन।”+