Djulayi

Yesu ekonkheja luweme maganizo ya Atata ŵake pa vinthu vonse venzelaŵila komasoti kuchita, kupamikijapo vodabwisa vechichita, vamene viwonesha maganizo komasoti mwakumvwila Atata ŵake. (Yoh. 14:9) Kansi tingaphunzilepo chinji kufumila pa vodabwisa va Yesu? Yesu na Atata ŵake otikonda ngako. Penze pano pa chalo, Yesu ewonesha kuti okonda ngako ŵanthu mwa kukatishila ntchito mphamvu zake zodabwisa kuti asilije mavuto ŵawo. Pa nthawe iyakine, analume aŵili asalola eŵilikija kuli yove kuti aŵayavye. (Mat. 20:30-34) Onani kuti Yesu “ekatiwa na chifundo” tetyo eŵapojeka. Mawu amene akatishiliwa ntchito pano, amene mu Chigiriki omasuliliwa kuti “kukatiwa na chifundo” otanthauza chifundo chikulu chamene chuchitikila nkati mwa muŵili. Chifundo chikulu chotetyo, niye chichitisha Yesu kuwonesha chikondi kuli ŵanthu ndipo chemuchitishasoti kulyesha anjala na kupojeka amankhutu. (Mat. 15:32; Mko. 1:41) Tufunikalini kukaikila kuti Yehova, wamene ni Mulungu wa “chifundo chikulu,” komasoti Mwana wake otikonda ngako ndipo akumvwa chisoni keno tuvutika. (Luk. 1:78; 1 Pet. 5:7) Ove ofunishisha ngako kuchosa mavuto onse amene otamanisha ŵanthu! Nsanja yophunzila 04.2023 pedji 3 ndim. 4-5

Tingachitepo kanthu kuti tipewe kukopeka na maganizo ophoniyeka komasoti maganizo amene ali paliponse mu chalo ichi chiipa cha Satana. Tingazuje maganizo ŵasu na vinthu viweme tikoŵelenga nophunzila Baibolo. Kupezeka pamisonkhano komasoti kukata nawo ntchito yolalikila kuzatetezesoti maganizo ŵasu ku vinthu viipa. Yehova naye elonjeza kuti azalolelini kuti tiyesewe kufwika patingaleke kwanisha kupilila. (1 Ako. 10:12, 13) Aliyense wa sewo ofunikila kupemphela ngako kwa Yehova kupambana kale yonse, kuti apitilije kunkhala wokhulupilika kwa Yehova m’masiku ŵano osilijila amene ni ovuta. Yehova ofuna kuti ‘tikomukhutulila vamuntima mwasu’ m’pemphelo. (Sal. 62:8) Mukotamanda Yehova nomutembeja pa vonse vawachita. Mukomusenga kuti akokuyavyani kunkhala wotang’a ntima mu utumiki. Mukomusenga kuti akokuyavyani kulimbana na vuto iliyonse komasoti kupewa mayeselo aliwonse ŵamungakumane nawo. Osati mukolola kuti chilichonse kapena munthu aliyense akukangisheni kupemphela kwa Yehova nthawe zonse. Nsanja yophunzila 05.2023 pedji 7 ndim. 17-18

Ndaŵa yanji tupezeka pa misonkhano ya mpingo? Chifukwa chikulu, ni kutamanda Yehova. (Sal. 26:12; 111:1) Tusonkhanasoti kuti tikolimbikisana mu nthawe ino yovuta. (1 Ates. 5:11) Tuyavya pokwanilisha volinga vamene ivi tikapanamika kwanja yasu noyankha pa misonkhano. Koma pali vinthu vamene vingachitishe kuti kuyankha nthawe ziyakine kunkhale kovuta. Tingankhale na nkhaŵa poyankha, payakine tingankhale ofunishisha kuti tipeleke ndemanga zinyinji koma nthawe ziyakine osogoja angotilatalini kaŵili-kaŵili monga mwatingafunile sewo. Kansi n’chinji chingatiyavye kulimbana na mavuto amene aŵa? ntumwi Paulo enena kuti tufunika kuganizila ngako za ‘kulimbikisana.’ Tizachitelini wowa ngako kupanamika kwanja yasu tikokumbukila kuti tingalimbikise ayakine olo na mawu osavuta owonesha chikhulupililo chasu. Ndipo olo keno tulatiwalini kaŵili-kaŵili kuti tiyankhe, tingankhale mphela osangalala poziŵa kuti ayakine mu mpingo ali na mwayi wopeleka ndemanga.—1 Pet. 3:8. Nsanja yophunzila 04.2023 pedji 20 ndim. 1-3

Mfumu yenze ilengezelatu! Ayuda amene enze ku ukapolo ku Babulo kwa vyaka 70, enze na ufulu wojokela ku chalo cha kwawo ku Isilaeli. (Ezara 1:2-4) Ni Yehova yeka wamene sembe ekwanilisha mawu amene aŵa. Ndaŵa yanji tinganene tetyo? Babulo sembe aliyeŵamasule akapolo ŵake. (Yes. 14:4, 17) Koma Babulo enze egonjesewa, ndipo wolamulila wanyowani euja Ayuda kuti angachokemo Muyuda aliyense makamaka mitu ya mabanja, enzefunika kupanga chosankha: Kufuma ku Babulo olo kunkhala kwamene uko. Chosankha chamene icho payakine chenzelini chipepu. Anyinji enze ekalamba ngako mwakuti sembe aliye kwanishe kuyenda ulwendo utali wamene uyo. Komasoti chifukwa chakuti Ayuda anyinji evyalikila ku Babulo, yenze dela tyala yamene iyo yenzeziŵa. Ove enzewonalini kuti ku Isilaeli ni kwawo koma enzewona kuti ni chalo chenzenkhala makolo ŵawo. Vuwoneka kuti Ayuda ayakine vinthu venzeŵayendela bwino ngako ku Babulo, payakine n’chifukwa chake evutika kusiya ng’anda zawo ziweme komasoti mabizinesi ŵawo na kuyankhala m’chalo chachilwendo. Nsanja yophunzila 05.2023 pedji 14 ndim. 1-2

Mawu a Mulungu otilimbikisa kupitilija kupilila, kunkhala achifundo, komasoti achikondi. Lemba ya Luka 21:19 yunena kuti: “Keno mwewo muzapilile muzafwane moyo.” Lemba ya Akolose 3:12 yunena kuti: “Vwalani chifundo . . . chikulu.” Komasoti lemba ya 1 Atesalonika 4:9, 10 yunena kuti: “Mulungu okuphunzisani kukondana. . . . Koma tukulimbikisani abale kuti mupitilije kuchita tetyo kupambana mwamuchitila.” Mavesi onse amene aŵa elembelewa ophunzila amene enzewonesha kale kupilila, chifundo, komasoti chikondi. Koma olo n’tetyo, ove enzefunikila kupitilija kukulisha minkhalidwe yamene iyi. Nase tipitilijesoti kuchita chimozi-mozi. Pofuna kutiyavya mwatingachitile vamene ivi, tiwone mwamene Akhilisitu oyambilila ewonesha minkhalidwe amene aŵa payeka-payeka. Pavuli pake, muwone mwamungaŵakonkhejele ophunzila amene awo, komasoti monga vokonkhapo vake, nowonesha kuti nise okonzekela kufwika kwa chisauso chikulu, chisauso chikulu chikezeyamba muzankhale kuti mwaphunzila kale kupilila, ndipo muzankhale osimikija mtima kupitilija kupilila. Nsanja yophunzila 07.2023 pedji 3 ndim. 4, 8

Keno nise ozozewa olo a “mbelele ziyakine,” tufunika kupitilija kuyenda mu “Nsewu Utuŵa.” Vamene ivi vitiyavye kupitilija kulambila Yehova palipano komasoti kusogolo Ufumu wa Mulungu ukazaleta vinthu viweme ngako pano pachalo. (Yoh. 10:16) Kuyambila m’chaka cha 1919 C.E., ŵanthu mamiliyoni anyinji analume, anakazi, komasoti ŵana, ankhala ofuma mu Babulo Nkulu, wamene ni ufumu wapachalo chonse wa chipembezo chawenye, noyamba kuyenda pa nsewu ukulu wophiphilisila wamene uyu. Pamene Ayuda pechifuma ku Babulo, Yehova ewoneshesha kuti mavuto achosewa. (Yes. 57:14) Tyani ponena za “Nsewu Utuŵa” wa masiku ŵano? Vyaka vinyinji chikaliyefwika chaka cha 1919, Yehova eyamba kukatishila ntchito ŵanthu amene enzemulemekeza ngako kuyavya ayakine kuti afume mu Babulo Nkulu. (Yelekezelani na Yesaya 40:3) Ove ekata ntchito yofunika yowamya—nsewu wauzimu—kuti pavuli pake ŵanthu a mitima iweme afume mu Babulo Nkulu, noloŵa mu paladaiso, wauzimu mwamene kulambila kutuŵa kwa Yehova kwenze kwiwejeleshewa. Nsanja yophunzila 05.2023 pedji 15-16 ndim. 8-9

Yehova ofuna kuti tikomutumikila mosangalala komasoti mofunishisha. (2 Ako. 9:7) Lomba kansi tufunikila kupitilija mphela kuyeja-yeja kukwanilisha cholinga chauzimu olo kuti tufunalini? Ganizilani chisanzo cha ntumwi Paulo. Yove enena kuti: “Nu niyata muŵili wangu nousogolela monga kapolo.” (1 Ako. 9:25-27, ftn.) Olo kuti nthawe ziyakine ntumwi Paulo enzenkhala lini na ntima wofunishisha kuchita venzefuna, enzelikakamija kuchita vamene ivo. Kansi Yehova enzesangalala na utumiki wa Paulo? Eye! Ndipo Yehova emudalisa chifukwa cha khama yake. (2 Tim. 4:7, 8) Molingana na vamene ivi, Yehova osangalala akawona kuti tuyeja-yeja kukwanilisha cholinga chasu olo pa nthawe yatisafunishisha kuchita vamene ivo. Yove osangalala chifukwa olo kuti ni nthawe zonselini patingosangalala na utumiki wamene uyo, yove oziŵa kuti tuchita vamene ivi chifukwa tumukonda. Monga mwechichitila Yehova kudalisa Paulo, yove azatidalise nase chifukwa cha khama yasu. (Sal. 126:5) Ndipo patufwana madaliso a Yehova, tingayambesoti kunkhala ofunishisha. Nsanja yophunzila 05.2023 pedji 29 ndim. 9-10

Ntumwi Paulo eyelekezela ŵanthu amene azapulumukelini pa nsiku ya Yehova na ŵanthu ŵala amene aliyone. Ove oziŵalini chilichonse pa nkhani ya vinthu vili ŵazenguluke komasoti mwayupitila nthawe. Tetyo, chinthu chiyakine chofunika chikachitika ove oziŵalini ndipo angachitepolini kanthu. Ŵanthu anyinji masiku ŵano ali yone mwauzimu. (Alo. 11:8) Ove aliye chidwi na umboni uwonesha kuti tunkhala “mmasiku osilijila” komasoti kuti chisauso chikulu chifwike lombapano. (2 Pet. 3:3, 4) Koma nsiku iliyonse chunkhala chinthu chofunika ngako kuli sewo kupitilija kunkhala menso. (1 Ates. 5:6) Tetyo tufunika kupitilija kunkhala odekha komasoti onkhazikika. Ndaŵa yanji? Tufunika kuchita vamene ivi kuti osati tiloŵelele mu nkhani za ndale olo minkhalidwe iipa ya masiku ŵano. Mzimu wofunishisha kunkhala na mbali mu vochitika monga ni vamene ivi upitilije kukula-kula nsiku ya Yehova payuvyendela. Koma olo n’tetyo, tufunikilalini kudela nkhaŵa za mwati tizachitile pa vochitika monga ni vamene ivo. Mzimu wa Mulungu uzatiyavye kunkhala odekha komasoti onkhazikika m’maganizo nopanga vosankha mwa nzelu.—Luk. 12:11, 12. Nsanja yophunzila 06.2023 pedji 10 ndim. 6-7

Kansi n’chinji chuwela m’maganizo mwanu mukamvwa zina yakuti Samisoni? Payakine muganizila za mwanalume wamphamvu ngako. Vamene ivi n’vachendi. Koma Samisoni ephoniyesha vinthu viyakine ndipo ekumana na mavuto. Koma olo n’tetyo, Yehova eika maganizo ŵake pa vonse venzechita Samisoni pomutumikila, ndipo Mulungu elemba chisanzo cha kukhulupilika kwa Samisoni m’Baibolo kuti tiphunzilepo kanthu. Yehova ekatishila ntchito Samisoni pochita vinthu vodabwisa pofuna kuyavya Aisilaeli ntundu wake wosankhiwa. Papita vyaka vinyinji kufumila pechimwalila Samisoni, Yehova eujila ntumwi Paulo kuti alembe zina ya Samisoni pa mndandanda wa ŵanthu amene enze okhulupilika ngako. (Ahe. 11:32-34) Chisanzo cha Samisoni chingatitang’ishe. Yove enzedalila Yehova olo panthawe yovuta. Takambilana vatingaphunzile kuli Samisoni komasoti mwamene chisanzo chake mwachingatitang’ishile. Nsanja yophunzila 09.2023 pedji 2 ndim. 1-2

Tingankhale opilila ngako mwa kumuuja nkhaŵa zasu Yehova nthawe na nthawe, komasoti mofumila pansi pa ntima wasu. (1 Ates. 5:17) Payakine mwewo palipano mukumanalini na chiyeso chikulu. Koma olo ntetyo, kansi mwewo musakila-sakila malangizo a Yehova nthawe iliyonse mukakhumudwa olo kusokonezeka maganizo kapena kusila nzelu? Keno mwewo nthawe zonse musenga Mulungu wasu kuti akuyavyeni pa mavuto ŵanu palipano, muzawaye-waye lini kuchita vamene ivo mukazakumana na mavuto akulu kusogolo. Mukachita tetyo, muzankhale osimikijila kuti yove oziŵa nthawe iweme yangakuyavyileni, komasoti mwangachitile vamene ivo. (Sal. 27:1, 3) Tingakwanishe kupilila chisauso chikulu chamene chikuza kusogolo keno tupilila mayeselo masiku ŵano. (Alo. 5:3) Ndaŵa yanji tunena tetyo? Abale anyinji awona kuti vuto iliyonse yoyesa chikhulupililo chawo yechipilila kuvuli, iŵayavya kuti apilile vuto iyakine. Kupilila kweŵayavya kutang’isha chikhulupililo chawo chakuti Yehova ni wokonzeka kuŵayavya. Ndipo chifukwa chakuti ove ali na chikhulupililo mwa Yehova, angakwanishe kupilila mayeselo ayakine.—Yako. 1:2-4. Nsanja yophunzila 07.2023 pedji 3 ndim. 7-8

Kulichefya komasoti chifundo vumuchitisha Yehova kunkhala wololela. Mwachisanzo, kulichefya kwa Yehova kwiwonekela pa nthawe yamene yove penzefuna kuwononga ŵanthu aipa amu Sodomu. Kupitila muli angelo ŵake, Yehova elangiza munthu wolungama Loti kuti athaŵile ku dela yamalupili. Loti echita wowa kuti athaŵile kwamene uko. Tetyo, yove epapatila Yehova kuti amulole yove pamozi na banja yake kuti athaŵile ku Zowari, tauni itontho yamene nayo yenze isankhiwa kuti iwonongewe. Yehova sembe emukakamija Loti kuti akonkheje Malangizo ŵechimupasa. Koma mmalo mwake, yove emvwila vechimusenga Loti olo kuti vamene ivo venzetanthauza kuti osati awononge tauni ya Zowari. (Gen. 19:18-22) Pavuli pa vyaka vinyinji, Yehova ewonesha chifundo kuli ŵanthu aku Nineve. Yove etumija mneneli Yona, kuti akauje ŵanthu aipa aku Nineve kuti ove pamozi na tauni yawo azawonongewe. Koma ŵanthu aku Nineve pechilapa, Yehova eŵamvwila chisoni, ndipo aliye wononge tauni yamene iyo.—Yon. 3:1, 10; 4:10, 11. Nsanja yophunzila 07.2023 pedji 21 ndim. 5

Kansi tuphunzila chinji kufumila pa chisanzo cha Yehoasi? Yove enze monga ni chimuti cha miju yosakata chamene chingapone nthawe iliyonse. Pavuli pakuti munthu wamene enzemuyavya Yehoyada wamwalila, Yehoasi eyamba kumvwila ŵanthu ampatuko yove enkhala munthu wosakhulupilika kwa Yehova. Chisanzo chamene ichi chuwonesha kuti sewo tufunikalini kumvwila Mulungu pa chifukwa tyala chakuti banja yasu komasoti ŵanthu ayakine mumpingo otipasa chisanzo chiweme. Kuti tipitilije kunkhala pa ushamwali na Yehova, tufunika kukulisha chikondi chasu nomulemekeza, nophunzila nthawe zonse, kuganizila vatuphunzila komasoti kupemphela. (Yer. 17:7, 8; Akol. 2:6, 7) Yehova otisengalini kuti tikochita vinyinji. Vakufuna yove vafotokozewa mwachidule pa Mlaliki 12:13, pamene ponena kuti: “Yopa Mulungu wachendi nosunga malamulo ŵake chifukwa vamene ivi niye vakufunikila kuchita munthu.” Tikoyopa Mulungu, tizakwanishe kulimbana bwino-bwino na mayeselo akusogolo nopitilija kunkhala okhulupilika kwa Yehova mosasamala kanthu kuti tingakumane na votyani kusogolo. Paliye chikuti chizakwanishe kuwononga ushamwali wasu na Yehova. Nsanja yophunzila 06.2023 pedji 19 ndim. 17-19

Vesi 5, yuyamba na mawu akuti: “Mulungu wamene alinkhezi pa m’pando wachifumu enena kuti.” (Chiv. 21:5a) Mawu amene aŵa ni apadela chifukwa ali m’gulu ya maulwendo tyala atatu amene Yehova ŵechilaŵila m’mesomphenya a m’buku ya chivumbuluso. Tetyo, Mulungu aliyelaŵile mawu osimikijila amene aŵa kupitila muli mngelo wamphamvu, kapena muli Yesu, koma Yehova eŵalaŵila yeka kufumila kululu! Mfundo yamene iyi yuwonesha kuti sewo tufunika kukhulupilila mawu okonkhapo amene ŵakulaŵila yove pavuli pake. Ndaŵa yanji tunena tetyo? Chifukwa chakuti Yehova “otalalini wenye.” (Tito 1:2) Tetyo, mawu ŵatuŵelenga pa Chivumbulutso 21:5, 6 azakwanilishiwe chendi. Tiyeni tilaŵijane mawu akuti “Loleshani!” Mawu Achigiriki amene ŵechimasulila kuti “loleshani!” ekatishiliwa ntchito moweleja-weleja m’buku ya Chivumbuluso. Kansi n’chinji chakulaŵila Mulungu pavuli pake? Mulungu onena kuti: “Nupanga vinthu vonse kunkhala vanyowani.” Onani kuti Yehova enena kuti “Nupanga vinthu vonse kunkhala vanyowani,” yove aliyenene kuti “Nizapange vinthu vonse kunkhala vanyowani.” Yehova olaŵila za kuchinja kwa vinthu kusogolo, koma kuli yove lonjezo yamene iyi ni ngayo-ngayo, mwakuti oilaŵila monga kuti yakwanilishiwa kale.—Yes. 46:10. Nsanja yophunzila 11.2023 pedji 3-4 ndim. 7-8

Ntumwi Petulo akalilimbana mphela na vofoka vake. Ganizilani vochitika ivi. Yesu penzefotokoza mwakuti azatamanile na kufwa pokwanilisha ulosi wa m’Baibolo, Petulo emuzuzula. (Mko. 8:31-33) Moweleja-weleja, Petulo na atumwi ayakine, enzekangana za wamene enze nkulu ngako pakati pawo. (Mko. 9:33, 34) Usiku wosilijila wakuti Yesu apayiwe, Petulo mosaganiza luweme etenda kwatu ya munthu muyakine. (Yoh. 18:10) Usiku umo na umo wamene uyo, Petulo echita wowa ndipo ekana katatu kuti omuziŵalini nshamwali wake Yesu. (Mko. 14:66-72) Vamene ivi vimuchitisha Petulo kuti alile momvwisha chisoni. Yesu aliyemusiye ntumwi wake wamene uyu panthawe yenze wokhumudwa ngako. Yesu pechiushiwa emupasa mwayi Petulo kuti asimikijile keno enzemukonda. Yesu euja Petulo kuti akomutumikila molichefya posamalila mbelele zake. (Yoh. 21:15-17) Petulo evomela na ntima wonse. Yove enze ku Yerusalemu pa pentekosite, ndipo enze mu gulu ya ŵanthu oyambilila kuzozewa na mzimu utuŵa. Nsanja yophunzila 09.2023 pedji 22 ndim. 6-7

Ntumwi Petulo elangiza akulu ayake kuti, “ŵetelani gulu ya mbelele za Mulungu.” (1 Pet. 5:1-4) Keno nimwe nkulu, tuziŵa kuti mukonda enekwanu na azilongosi ŵanu ndipo mufuna kuŵasogolela. Koma olo n’tetyo, nthawe ziyakine mungawone kuti munkhala bize kapena oŵeŵa ngako mwakuti mungakwanishelini kukata ntchito yamene iyi. Kansi mungachite tyani? Mutulileni Yehova nkhaŵa zanu. Petulo elemba kuti: “Ngati muyakine otumikila, atumikile modalila mphamvu yakupeleka Mulungu.” (1 Pet. 4:11) Enekwanu na azilongosi ŵanu angankhale kuti okumana na mavuto amene angasililetu lini muli chino chalo chiipa chatilimo. Koma kumbukilani kuti “nchiŵeta nkulu” Yesu Khilisitu angakwanishe kuŵayavya kupambana mwamungachitile mwewo. Yove angachite vamene ivi palipano komasoti n’chalo chanyowani. Chakusenga tyala Mulungu kuli akulu n’chakuti ove akokonda enekwawo, kuŵasogolela, komasoti kuti “ankhale visanzo kuli gulu ya mbelele.” Nsanja yophunzila 09.2023 pedji 29-30 ndim. 13-14

Tufunika kupewa kukatishila ntchito maganizo a ŵanthu amene olemekezalini malamulo a Yehova. Keno sewo tingoganiza monga ni mwakuganizila ŵanthu amene olemekezalini malamulo a Yehova, nase soti tingayambe kunyalanyaza Yehova komasoti malamulo ŵake. (1 Ako. 3:19) “Nzelu za ichi chalo” kanyinji-kanyinji zunkhala zokatijana na vilako-lako va muŵili. Akhilisitu ayakine oŵelengeka aku Pegamu komasoti ku Tiatira, etolelako maganizo a ŵanthu a munthawe yawo amene enze avigololo komasoti olambila mafano. Yesu epeleka malangizo amphanvu kuli mipingo yonse iŵili yamene iyi chifukwa chakuti ove enzelekelela minkhalidwe yavigololo. (Chiv. 2:14, 20) Masiku ŵano, tukumana na viyeso vamene vingatichitishe kuti tikowona vinthu mophoniyeka. Ŵanthu ŵatuziŵana nawo angayeje kutichitisha kuganiza kuti nise oyumisha vinthu ngako, komasoti kuti tufunikila kufwayako malamulo a Yehova. Mwachisanzo, ove anganene kuti ni chinthulini chofunika kupitilija kunkhala na minkhalidwe iweme, komasoti kuti mfundo za m’Baibolo za minkhalidwe iweme n’zakalekale ngako. Nthawe ziyakine, tingaganize kuti malangizo ŵakutipasa Yehova ni osamvwika luweme. Nthawe ziyakinesoti sewo tingayesewe kuti ‘tipitilile vinthu vililembewe.’—1 Ako. 4:6. Nsanja yophunzila 07.2023 pedji 16 ndim. 10-11

Mariya amayi ŵake a Yesu enzefunika kutang’ishiwa. Yove enzelini pabanja; koma olo n’tetyo, yove enzeyembekela kunkhala na vumo. Mariya enze akaliyelelapo mwana aliyense, koma yove enzefunikila kulela mwana wamene enzeyembekezela kunkhala Mesiya. Lomba pakuti ove enze akaliyeyonanapo, kansi Mariya sembe eifotokoza tyani nkhani yamene iyi kuli chibwenzi chake Yosefe? (Luk. 1:26-33) Kansi Mariya elondela tyani mphamvu nzenzefunikila? Yove esakila thandizo kuli ayakine. Mwachisanzo, yove esenga Gabirieli kuti amufotokozele vinyinji vokhuza utumiki wamene uyo. (Luk. 1:34) Pakaliye pita nthawe ikulu, yove epanga ulwendo woluta “kudela ya malupili” ya Yuda kuyawona mkwake Elizabeti. Elizabeti emutang’isha ngako Mariya ndipo moujiliwa na Yehova yove elaŵila ulosi wokhuza mwana wa Mariya wamane enze akali mmala. (Luk. 1:39-45) Mariya enena kuti Yehova “wachita vamphamvu na kwanja yake.” (Luk. 1:46-51) Yehova emutang’isha Mariya kupitila muli Gabirieli komasoti Elizabeti. Nsanja yophunzila 10.2023 pedji 14-15 ndim. 10-12

Ophunzila oŵelengeka a Khilisitu ankhala ozozewa na mzimu wa Mulungu, ndipo ove osangalala chifukwa chonkhala pa ushamwali na Yehova. Ŵanthu okwana 144.000 azatumikile monga ansembe kululu pamozi na Yesu. (Chiv. 14:1) Malo atuŵa a m’chihema opanamila kuvyalika kwawo koyamba kwa pano pachalo monga ŵana a Mulungu. (Alo. 8:15-17) Malo atuŵa ngako am’chihema opanamila kululu kwakunkhala Yehova. “Chinyula” chamene chenzesiyanisha malo atuŵa na malo atuŵa ngako, chupanamila muŵili wa nyama wa Yesu wamene wenzechitisha kuti vinkhale vosakwanishika kuloŵa kululu monga Nkulu wa ansembe wa kachisi wauzimu. Mwa kupeleka muŵili wake monga nsembe yowombola mitundu ya ŵanthu, Yesu esegula muliyango wakululu kuli Akhilisitu ozozewa. Nawo Akhilisitu ozozewa ofunikila soti kupeleka miŵili yawo kuti akalondele mphaso yawo kululu.—Ahe. 10:19, 20; 1 Ako. 15:50. Nsanja yophunzila 10.2023 pedji 28 ndim. 13

Gidiyoni eyankha mofasa a fuko ya Efuraimu penzemukalipila. (Ower. 8:1-3) Yove aliyeyankhe mokalipa. Yove ewonesha kuti enzewolichefya pomvwishila nkhaŵa zawo komasoti polaŵila nawo mowama ntima. Vamene ivi vichitisha kuti ove ankhajike mitima pansi. Akulu a nzelu okonkheja Gidiyoni pomvwishila mosamala komasoti pochita vinthu mofasa akozuzuliwa. (Yako. 3:13) Vamene ivi vuyavya kuti mu mpingo munkhale ntendele. Gidiyoni pechipasiwa ulemu chifukwa chogonjesa Amidiyani, yove epeleka ulemelelo wonse kwa Yehova. (Ower. 8:22, 23) Kansi analume osogolela angamukonkheje tyani Gidiyoni? Ove angapeleke ulemelelo wonse kwa Yehova pa vakwanisha kuchita. (1 Ako. 4:6, 7) Mwachisanzo, keno nkulu otembejewa chifukwa cha luso yake yophunzisa, angayavye ŵanthu kuti akoganizila ngako kwakufumila malangizo, Mawu a Mulungu, olo maphunzilo ŵatulondela m’gulu ya Yehova. Nthawe ziyakine akulu angachite vinthu vamene vingankhale monga ni kulifunila ulemelelo ove ŵeka. Nsanja yophunzila 06.2023 pedji 4 ndim. 7-8

Keno tuyankhiwalini pa vinthu vatusenga m’mapemphelo ŵasu, tingachite luweme kulikonsha kuti, ‘kansi nupemphelela vinthu voyenelela?’ Kanyinji-kanyinji, sewo tingoganiza kuti vinthu vatunena m’mapemphelo ŵasu niyevatufunikila chendi. Koma vingachitike kuti vinthu vatupemphelela vingatipindulile lini. Keno tankhala tusenga Mulungu kuti atiyavye pa vuto iyakine, payakine pangankhale njila iweme yoisilijila kupambana yatingoganizila sewo. Ndipo vinthu viyakine vatusenga vingankhale vosakatijana na chifunilo cha Mulungu. (1 Yoh. 5:14) Mwachisanzo, ganizilani chisanzo cha makolo. Ove enzesenga Yehova kuti ayavye mwana wawo kuti osati azaleke choonadi. Kusenga vamene ivi n’kosayenelela. Kuyangijila pamene apo, Yehova okakamijalini aliyense wa sewo kuti akomutumikila. Yove ofuna kuti sewo tonse kupamikijapo ŵana ŵasu tikochita kusankha kumulambila. (Deut. 10:12, 13; 30:19, 20) Koma mmalo mwake, makolo angasenge Yehova kuti aŵayavye kuphunzisa luweme ŵana ŵawo kuti akokonda Yehova nonkhala naye pa ushamwali.—Miy. 22:6; Aife. 6:4. Nsanja yophunzila 11.2023 pedji 21 ndim. 5; pedji 23 ndim. 12

Ndaŵa yanji kulimbikisa ayakine ninjila yofunika ngako yowoneshela chikondi? Mokatijana na mweinenela lifalensi iyakine ya Baibolo, mawu ŵechikatishila ntchito Paulo akuti “kulimbikisana” otanthauza “kupanama pafupi na munthu wamene okumana na mavuto akulu ngako kuti umulimbikise.” Tetyo, keno tutonthojana tuyavya okhulupilila ayasu amene okumana na mavuto kuti apitilije kuyenda pa njila ya kumoyo. Ndipo nthawe iliyonse yatutonthoja nkwasu tumuwonesha kuti tumukonda. (2 Ako. 7:6, 7, 13) Kumvwa chifundo na kulimbikisa ayakine ni vinthu viŵili vokatijana. Mwanjila yotyani? Chifundo chuchitisha munthu kulimbikisa muyake noyeja-yeja kumuyavya keno okumana na mavuto. Tetyo, kumvwa chifundo kutilimbikisa kuyavya ayakine. Paulo efotokoza kuti chifundo cha Yehova kuli ŵanthu chumuchitisha kuti akoŵayavya akakumana na mavuto. Paulo enena kuti Yehova ni “Atata achifundo chikulu na Mulungu wamene otitonthoja m’njila iliyonse”.—2 Ako. 1:3. Nsanja yophunzila 11.2023 pedji 9-10 ndim. 8-10

Nkhani niyakuti ophunzila onse a Khilisitu angayembekezele kukumana na masauso. Ganizilani chisanzo cha ntumwi Paulo. Yove euja Akhilisitu aku Tesalonika kuti: “Petenze namwe pamozi tenzekuujilantuni kuti tizafunikile kukumana na masauso, ndipo mwavachitikila umu niyesoti mwamuziŵila namwe.” (1 Ates. 3:4) Komasoti kuli Akhilisitu aku Kolinto yove enena kuti: “Tufunalini kuti munkhale osaziŵa za masauso amene ŵetikumana nawo . . . Mwakuti tenzevesoti chiyembekezo chakuti tinkhale na moyo.” (2 Ako. 1:8; 11:23-27) Nawosoti Akhilisitu a masiku ŵano angayembekezele kukumana na chisauso mwanjila ziyakine. (2 Tim. 3:12) chifukwa chokhulupilila Yesu na kumukonkheja Azishamwali olo enekwanu payakine angokunyozani. Kapena ove angokuchitilani nkhanza. Kansi ntima wofuna kuchita vinthu vonse mwachilungamo wachitisha kuti mukokumana na mavuto kuntchito? (Ahe. 13:18) Kansi boma yukushushani chifukwa choujako ayakine za chiyembekezo chanu? Koma olo n’tetyo, mosasamala kanthu za ntundu wa chisauso chatingakumane nacho, Paulo enena kuti tufunikila kunkhala osangalala. Nsanja yophunzila 12.2023 pedji 10-11 ndim. 9-10

Yakobo epilila mavuto anyinji. Aŵili mwa ŵana analume a Yakobo, Simiyoni na Levi, enyozesha banja yawo komasoti zina ya Yehova. Kuyangijila pamene apo, Rakele mwanakazi wake wokondewa, echifwa penzevyala mwana wake wachiŵili. Komasoti chifukwa cha njala ikulu, Yakobo ekakamijika kufulukila ku Iguputo pa ukalamba wake. (Gen. 34:30; 35:16-19; 37:28; 45:9-11, 28) Olo kuti venze tetyo, Yakobo aliyeleke kukhulupilila Yehova komasoti malonjezo ŵake. Pasogolo pake, Yehova ewonesha kuti enzemukonda Yakobo. Mwachisanzo, Yehova emudalisa Yakobo pomupasa chuma. Komasoti Yakobo etembeja ngako Yehova pechiwonanasoti na mwana wake Yosefe—enzeganiza kuti emwalila kale-kale! Ushamwali uweme wenze nawo Yakobo na Yehova wichitisha kuti akwanishe kulimbana bwino-bwino na mavuto ŵake. (Gen. 30:43; 32:9, 10; 46:28-30) Tikapitilija kunkhala pa ushamwali uweme na Yehova, nase tingakwanishe kulimbana na mayeselo ŵetenzeleka yembekezela. Nsanja yophunzila 04.2023 pedji 15 ndim. 6-7

Buku ya Salimo 23 ni nyimbo yamene yuwonesha mwakutikondela Yehova komasoti mwakutisamalilila mwachikondi. Davide wamene niye elemba Salimo yamene iyi ofotokoza za kutang’a kwa ushamwali wa pakati pa yove na nchiŵeta wake Yehova. Davide enzelimvwa kunkhala wotetezeka chifukwa cholola kuti Yehova akomusogolela, ndipo yove enzemudalila na ntima wake wonse. Davide enzeziŵa kuti Yehova akomuwonesha chikondi nsiku iliyonse. Kansi n’chinji chimuyavya kunkhala na chidalilo chikulu teti? Davide enzewona kuti osamaliliwa luweme chifukwa chakuti Yehova nthawe zonse enzemupasa chilichonse chenzefunikila. Davide enzeziŵasoti kuti Yehova ni nshamwali wake komasoti kuti yove enzesangalala naye. Chifukwa cha vamene ivi yove enze na chidalilo chakuti mosasamala kanthu za vinthu vingamuchitikile kusogolo Yehova azapitilije kumupasa vonse vakufunikila. Chifukwa chakuti Davide enzekhulupilila kuti Yehova enzemukonda komasoti kumusamalila, venzemuyavya kuti osati akodela nkhawa, mmalo mwake akonkhala wosangalala na wokhutila.—Sal. 16:11. Nsanja yophunzila 01.2024 pedji 29 ndim. 12-13

Pa nthawe ya Nkhondo yachiŵili yapa chalo chonse, ŵanthu a Yehova enzekata ntchito yolalikila mwaufulu m’vyalo vinyinji. Kulaŵila chendi, ŵanthu anyinji amuziŵa Yehova, ndipo atumiki a Mulungu okata ntchito yolalikila pa chalo chonse. Masiku ŵano, akwasu am’Bungwe yutonga opitilija kudalila Khilisitu kuti akoŵasogolela. Ove ofuna kuti malangizo ŵakupeleka kuli akwasu, akowonesha nzelu zofumila kululu. Komasoti akwasu amene aŵa okatishila ntchito opanamila dela na akulu popeleka malangizo kumipingo. Akulu osankhiwa na Mulungu ali “kukwanja ngayo” ya Khilisitu. (Chiv. 2:1) N’chendi kuti akulu amene aŵa aliye ungwilo ndipo ophoniyesha vinthu viyakine. Mose na Yoswa enzephoniyesha vinthu nthawe ziyakine, n’chimozi-mozisoti na atumwi. (Num. 20:12; Yos. 9:14, 15; Alo. 3:23) Koma pali umboni wowoneka luweme wakuti Yesu niye osogolela kapolo wokhulupilika komasoti akulu osankhiwa, ndipo apitilije kuchita vamene ivi. Tetyo, sewo tili na vifukwa viweme ngako vokhulupilila malangizo ŵatulondela kufumila kuli ŵanthu ŵawasankha Mulungu kuti akotisogolela. Nsanja yophunzila 02.2024 pedji 23-24 ndim. 13-14

Nase tingatamande Yehova polaŵila vokhuza yove mowama ntima, motembeja, komasoti mwachikondi. Tikankhala muutumiki, tikokumbukila kuti cholinga chasu chikulu ni kuyavya ŵanthu kunkhala paushamwali uweme na Yehova, noŵayavya kuziŵa kuti yove ni tata wawo wachikondi. Sewo tusangalala kuyavya ŵanthu kupitila m’Baibolo kuziŵa kuti Yehova ni Mulungu wachikondi, wachilungamo, wanzelu, wamphavu, komasoti kuti ali na minkhalidwe iyakine iweme. (Yako. 4:8) Njila iyakine yatingatamandile Yehova nochita vinthu vomukondwelesha, ni kuchita vonse vatingakwanishe kuti tikomukonkheja. Keno tuchita vamene ivi ayakine angafwike poziŵa kuti sewo nise osiyana na ŵanthu ayakine amuli chino chalo chiipa. (Mat. 5:14-16) Patuchita nawo vinthu viyakine va nsiku na nsiku, nthawe ziyakine tingankhale na mwayi woŵafotokozela chifukwa chake nise osiyana na ŵanthu ayakine. Monga vokonkhapo vake, ŵanthu ayakine a mitima iweme angankhale na chidwi chikulu chofuna kuphunzila vokhuza Mulungu wasu. Keno sewo tutamanda Yehova mwanjila yamene iyi, ntima wake ukondwela.—1 Tim. 2:3, 4. Nsanja yophunzila 02.2024 pedji 10 ndim. 7

kuti munkhale Nkhilisitu wotang’a mwauzimu, mwewo mufunikila kukulisha maluso amene angakuyavyeni pamoyo wanu wa nsiku na nsiku. Vamene ivi vingakuyavyeni kulondela maudindo mumpingo, kufwana ntchito nonkhalisha pa ntchito yamene iyo vamene vizakuyavyeni kufwana vofunikila pamoyo wanu na wa ŵanthu am’banja mwanu, komasoti kunkhala pa ushamwali uweme na ŵanthu ayakine. Mwachisanzo, kuŵelenga komasoti kulemba luweme. Baibolo yunena kuti munthu wosangalala komasoti wamene vinthu vumuyendela luweme, opatula nthawe yoŵelenga Mawu a Mulungu noŵaganizila. (Sal. 1:1-3) Mwa kuŵelenga Baibolo nsiku iliyonse, yove angaziŵe luweme mwakuganizila Yehova, nowona mwangakatishile ntchito Malemba pamoyo wake. (Miy. 1:3, 4) Abale na alongo ŵasu, odalila analume aluso kuti akoŵapasa malangizo ofumila m’Baibolo. Mwewo mukakwanisha kuŵelenga nolemba luweme, mungolaŵila nkhani nopeleka ndemanga zotang’isha chikhulupililo. Zizakuyavyeni kutang’isha chikhulupililo chanu komasoti cha ŵanthu ayakine. Nsanja yophunzila 12.2023 pedji 26-27 ndim. 9-11

Mukayamba kuchita wowa, mukoganizila vinthu vati azachite Yehova kusogolo. Ganizilani mwati muzamvwile Satana akezechosewa, Chisanzo chapa nsonkhano wachigawo wa 2014, chifotokoza vatingachite poganizila za chiyembekezo chasu. Tata wa mu chisanzo chamene icho, ekambilana na banja yake mwatingaipindamulile lemba ya 2 Timoteyo 3:1-5 ponena za vinthu vativizachitike m’Paladaiso ponena kuti: “Masiku am’chalo chanyowani izankhale nthawe yokodwelesha ngako. Pakuti ŵanthu azankhale okonda ayawo, okonda chuma chauzimu, olichefya, otamanda Mulungu, omvwila makolo, otembeja, okhulupilika, okonda achibale ŵawo, okatijana na ayawo, olaŵilila ayawo viweme, olilesha, ofasa, okonda viweme, odalilika, akumvwa va ayawo, osalitumba, osameka, okonda Mulungu mmalo mokonda vosangalasa, olipeleka kwa Mulungu na ntima wonse: Ŵanthu amene awo ankhale ayako apantima.” Kansi mwewo mukambilanako na ŵanthu am’banja mwanu olo okhulupilila ayanu vokhuza mwati uzankhalile moyo mu chalo chanyowani? Nsanja yophunzila 01.2024 pedji 6 ndim. 13-14

N’votang’isha ngako kuziŵa kuti Yehova okondwela na ŵanthu ŵake monga gulu! Baibolo yunena kuti: “Yehova osangalala na ŵanthu ŵake.” (Sal. 149:4) Koma olo n’tetyo, nthawe ziyakine ŵanthu okhumudwa ndipo olikonsha kuti, ‘Kansi newo paneka nine wofunika kwa Yehova?’ Kufumila kale-kale, atumiki okhulupilika a Yehova olimbana na maganizo olingana na amene aŵa nthawe ziyakine. (1 Sam. 1:6-10; Yobu 29:2, 4; Sal. 51:11) Baibolo yuwonesha luweme kuti ŵanthu aliye ungwilo angakwanishe kumukondwelesha Yehova nonkhala ovomelejeka kuli yove. Kansi tingachite tyani vamene ivi? Tufunika kuwonesha chikhulupililo mwa Yesu Khilisitu nobatizika. (Yoh. 3:16) Tikochita vamene ivi tuwonesha patuŵa kuti talapa machimo ŵasu ndipo tulonjeza kuti tikochita chifunilo cha Mulungu. (Mach. 2:38; 3:19) Yehova osangalala ngako sewo tikachita vamene ivi pofuna kuti tivwendele ngako kuli yove. Keno tuchita vonse vatingakwanishe kuti tikwanilishe lumbilo yasu, tizankhale ŵanthu ovomelejeka pamenso pa Yehova ndipo tizankhale naye paushamwali wotang’a.—Sal. 25:14. Nsanja yophunzila 03.2024 pedji 26 ndim. 1-2

Sewo tingakonkheje ophunzila amene aŵa mwa kupitilija kulalikila olo kuti akulu-akulu aboma atilamula kuti tileke. Nase tingankhale na chidalilo chakuti Yehova azatiyavye kukwanilisha utumiki wasu. Tingapemphele posenga kuti tinkhale otang’a ntima na anzelu. Anyinji a sewo tukumana na mavuto akuthupi olo a m’maganizo, imfwa ya okondewa ŵasu, mavuto a m’banja, kutamanishiwa olo mavuto ayakine. Ndipo vinthu monga mulili na nkhondo vachitisha anyinji mwa mavuto amene aŵa kunkhala ovuta kuŵapilila. Muujeni Yehova mwamumvwila. Muujeni za vuto yanu monga ni mwamungaujile shamwali wanu wapantima. Mukonkhala osimikijila kuti Yehova “azachitepo kanthu.” (Sal. 37:3, 5) Kupemphela monkhazikika kuzatiyavye ‘kupilila chisauso.’ (Alo. 12:12) Yehova oziŵa vakukumana navo atumiki ŵake—‘yove akumvwa kulila kwawo kosenga thandizo.’—Sal. 145:18, 19. Nsanja yophunzila 05.2023 pedji 5-6 ndim. 12-15

Tikafuna kupanga chosankha pa nkhani iyakine yofunika ngako, tufunika kumvwisha “chifunilo cha Yehova” pavuli pake nochita vinthu mokatijana na vakufuna yove. (Aife. 5:17) Tikafwana mfundo iyakine m’Baibolo yamene yukatijana na mwavilili vinthu pa moyo wasu vunkhala monga taziŵa mwakuganizila Mulungu pankhani yamene iyo. Komasoti keno tukatishila ntchito mfundo za Yehova pa moyo wasu, tupanga vosankha viweme. “Mdyelekezi” kapena kuti mdani wasu Satana, ofuna kuti tikonkhala bize na vochitika va muli chino chalo chiipa nosoŵa nthawe yatingakatishile ntchito pochita vinyinji potumikila Yehova. (1 Yoh. 5:19) Mosaziŵa, Nkhilisitu angaike maganizo ŵake pa ndalama, maphunzilo, komasoti ntchito, mmalo moganizila ngako za mipata yamene ilipo kuti achite vinyinji potumikila Yehova. Nkhilisitu akayamba kuchita vamene ivi, ungankhale umboni wowonesha kuti wayamba kuganiza monga ni ŵanthu amuli chino chalo. N’chendi kuti ndalama, maphunzilo, komasoti chuma, n’vinthu lini viipa. Koma sewo tufunika kupewa kuika vinthu vamene ivi pa malo oyamba pa moyo wasu. Nsanja yophunzila 03.2024 pedji 24 ndim. 16-17