Ditshupiso Tsa Bukana ya Seboka sa Bophelo le Tshebeletso
© 2025 Watch Tower Bible and Tract Society of Pennsylvania
LA 7-13 JULY
MATLOTLO A TSWANG BIBELENG DIPROVERBIA 21
Melaomotheo e ka o Thusang Hore o be le Lenyalo le Thabileng
w03 10/15 4 ¶5
O ka Etsa Diqeto Tse Bohlale Jwang?
Ho bonolo hore diqeto tse etswang ka lepotlapotla di se ke tsa eba bohlale. Diproverbia 21:5 e a lemosa e re: “Ka sebele merero ya ya kgothetseng e tlisa molemo, empa ka sebele e mong le e mong ya lepotlapotla o leba bohloking.” Ka mohlala, batjha ba nkehileng ke lerato ba lokela ho ipha nako e lekaneng pele ba tiisa kamano ya bona ka lenyalo. Ho seng jwalo, ba ka nna ba bona nnete ya seo William Congreve, mongodi wa ditshwantshiso wa Lenyesemane wa lekgolong la bo18 la dilemo a ileng a se bolela ha a re: “Ha re potlakela ho kena lenyalong re ka nna ra llela metsotso ha morao.”
g 7/08 7 ¶2
Ka Moo o ka Etsang Hore Lenyalo la Hao le Atlehe
Bontsha boikokobetso. ‘O se etse letho ka lebaka la ho rata dikgang kapa ka lebaka la ho ipoledisa, empa ka ho ikokobetsa kelellong o nke hore ba bang ba o phahametse.’ (Bafilipi 2:3) Dikgohlano tse ngata di hlahiswa ke hobane ka boikgohomoso banyalani ba leka ho beha balekane ba bona molato ka mathata a teng ho ena le hore ka boikokobetso ba batle ditsela tsa hore ba nolofalletsane bophelo. Boikokobetso bo ka o thusa hore o se ke wa tsitlella hore ke wena ya nepileng ha ho eba le ho se dumellane.
w06 9/15 28 ¶13
“O Thabe le Mosadi wa Botjha ba Hao”
13 Ho thweng haeba mathata a lenyalo a bakwa ke tsela eo banyalani ba tshwaranang ka yona? Ho hlokahala boiteko hore ba fumane se ka rarollang mathata ao. Ka mohlala, ho ka etsahala hore ebe monna le mosadi ba tlwaetse ho kgarumelana. (Diproverbia 12:18) Jwalo ka ha ho boletswe sehloohong se fetileng, sena se ka senya lenyalo. Maele a Bibele a re: “Ho molemo ho dula lefeelleng ho feta ho dula le mosadi ya ratang dikgang ha mmoho le kgalefo.” (Diproverbia 21:19) Haeba o mosadi lenyalong la mofuta ona, ipotse, ‘Na botho ba ka bo thatafaletsa monna wa ka ho ipha nako ya ho ba le nna?’ Bibele e re ho banna: “Le nne le rate basadi ba lona mme le se ke la ba halefela ka matla.” (Bakolose 3:19) Haeba o monna, ipotse, ‘Na ke hlokomoloha mosadi wa ka, mme ka hoo ke mo kenya tekong ya hore a batle kgothatso ho batho ba bang?’ Ho sa tsotellehe boemo le ha e le bofe, ha ho na lebaka le ka etsang hore motho a kopanele diphate ka ntle ho lenyalo. Ka lebaka leo, nnete ya hore tlokotsi e jwalo e ka etsahala, ke lebaka le letle la hore banyalani ba lokolohe ha ba buisana ka mathata a bona.
Matlotlo a Patilweng
w05 1/15 17 ¶9
Dilelekela Tsa Mmuso wa Modimo di a Phethahala
9 Jesu ha e sa le motho feela tjee ya palameng petsana ya esele, empa hona jwale ke Morena ya matla. O hlaloswa e le ya palameng pere e tshwantshetsang ntwa ka Bibeleng. (Diproverbia 21:31) Tshenolo 6:2 e re: “Bonang! pere e tshweu; ya e palameng o ne a ena le seqha; a fuwa moqhaka, mme a tloha e le ya hlolang le hore a phethe tlholo ya hae.” Ho feta moo, mopesaleme Davida o ile a ngola tjena mabapi le Jesu: “Jehova o tla romela molamu wa matla a hao ho tswa Sione, a re: ‘Qala ho busa hara dira tsa hao.’ ”—Pesaleme ya 110:2.
LA 14-20 JULY
MATLOTLO A TSWANG BIBELENG DIPROVERBIA 22
Melaomotheo e Sebetsang Bakeng sa ho Hodisa Bana
Na Bana ba Hao ba Tla Tswela Pele ho Sebeletsa Modimo le ha ba se ba Hodile?
7 Haeba le banyalani ba batlang bana ipotseng dipotso tse latelang: ‘Na re ikokobeditse mme re rata Jehova le Lentswe la hae? Na Jehova o ne a ka kgetha rona hore re hodise ngwana?’ (Pes. 127:3, 4) Haeba o motswadi ipotse: ‘Na ke ruta bana ba ka hore ho bohlokwa ho sebetsa ka thata?’ (Moek. 3:12, 13) ‘Na ke etsa sohle seo nka se kgonang ho sireletsa bana ba ka dinthong tse kotsi lefatsheng lena la Satane?’ (Diprov. 22:3) O ka tswela pele o ba ruta hore na ba ka sebetsana jwang le mathata bophelong ka hore ba tshepe keletso e tswang Lentsweng la Modimo. (Bala Diproverbia 2:1-6.) Ka mohlala, haeba e mong wa leloko a kgaotsa ho sebeletsa Jehova thusa bana ba hao ho ithuta Lentswe la Modimo le hore na ke hobaneng ha e le ha bohlokwa ho dula ba tshepahala ho Modimo. (Pes. 31:23) Haeba motho eo le mo ratang a ka hlokahala bontsha bana ba hao ditemana tse ka ba thusang ho hlola bohloko ba ho shwelwa mme ba fumane kgotso.—2 Bakor. 1:3, 4; 2 Tim. 3:16.
Batswadi ba Lokela ho Thusa Bana ba Bona ho Rata Jehova
17 Kwetlisa ngwana ha e sa le lesea. Ho molemo ho kwetlisa bana ha ba sa le banyane ho fapana le ha ba se ba hodile. (Liprov. 22:6) Nahana ka Timothea eo a ileng a tsamaya le moapostola Pauluse ha e sa le motjha. Mme wa hae Eunise le nkgono wa hae Loise, ba ile ba mo kwetlisa “ho tloha boseyeng.”—2 Tim. 1:5; 3:15.
18 Banyalani ba bang ba dulang Côte d’Ivoire, e leng Jean-Claude le Peace, ba ile ba kgona ho hodisa bana ba bona ba tsheletseng hore ba rate Jehova le ho mo sebeletsa. Ebe ba ile ba thuswa keng hore ba atlehe? Ba ile ba latela mohlala wa Eunise le Loise. Ba re: “Re ile ra ruta bana ba rona Lentswe la Modimo ho tloha ha e sa le masea.”—Deut. 6:6, 7.
19 Ho ruta bana ba hao Lentswe la Modimo ho bolelang? Ho ya ka Deuteronoma 6:7, lentswe la Seheberu “ho ruta” le bolela “ho ruta ka ho phetapheta.” E le hore batswadi ba etse sena, ba lokela ho qeta nako e ngata le bana ba bona. Ka dinako tse ding batswadi ba ka nna ba nyahamiswa ke ho bolella ngwana ntho e le nngwe hangata. Le ha ho le jwalo, ba lokela ho nka sena e le monyetla wa ho thusa bana ba bona ho utlwisisa Lentswe la Modimo le ho le sebedisa bophelong ba bona.
w06 4/1 9 ¶4
Batswadi—Le be Mehlala e Metle ho Bana ba Lona
Bonneteng, bana ke bana, mme ba bang ba manganga ebile ba rata ho itaela. (Genese 8:21) Ebe batswadi ba ka etsang? Bibele e re: “Bowatla bo tlameletswe pelong ya moshanyana; thupa ya tayo e tla bo suthisetsa hole le yena.” (Diproverbia 22:15) Batho ba bang ba nka hore ho shapa ngwana ke ho mo sotla ebile ha ho amohelehe. Ha e le hantle, Bibele ha e dumelle mabifi le tshwaro e mpe ya mofuta ofe kapa ofe. “Thupa,” le hoja ka dinako tse ding e akarelletsa ho shapa, e emela bolaodi ba motswadi bo sebediswang ka tiyo empa e le ka lerato le ka tshwanelo hobane motswadi a amehile ka katleho ya ka ho sa feleng ya ngwana.—Baheberu 12:7-11.
Matlotlo a Patilweng
Eba le Thabo e Tliswang ke ho Sebeletsa Jehova
11 Ka ho tshwanang, re ka eketsa thabo ya rona ka hore re amehe ka mosebetsi le ha e le ofe oo re o fuweng tshebeletsong ya Jehova. Ka hoo, “tshwareha ka matla haholo” mosebetsing wa boboledi mme o sebetse ka thata ka phuthehong. (Dik. 18:5; Baheb. 10:24, 25) Lokisetsa hantle e le hore o fane ka dikarabo tse matlafatsang ha o le dibokeng. Nka ka ho teba mosebetsi o mong le o mong oo o fuwang dibokeng tsa hara beke. Haeba o kopuwa hore o etse mosebetsi o itseng ka phuthehong tshepahala mme o o etse ka nako. O se ke wa nahana hore mosebetsi oo o o fuwang ha o bohlokwa haholo mme o tla o senyetsa nako. Leka ka matla ho ntlafatsa bokgoni ba hao. (Diprov. 22:29) Ha o leka ka hohle ho sebeletsa Jehova ka thata, o tla thaba le ho feta ebile o tla atleha tshebeletsong ya hae. (Bagal. 6:4) Ho tla boela ho be bonolo hore o thabe le batho ba bang haeba ba fuwa mosebetsi oo o neng o ka rata ho o etsa.—Bar. 12:15; Bagal. 5:26.
LA 21-27 JULY
MATLOTLO A TSWANG BIBELENG DIPROVERBIA 23
Melaomotheo e ka Thusang Haeba re Kgetha ho Nwa Jwala
w04 12/1 19 ¶5-6
Eba le Pono e Loketseng ka Tshebediso ya Dino Tse Tahang
5 Ho thweng haeba motho a nwa empa a le hlokolosi hore a se ke a nwa ho fihlela a bonahala hore o tahilwe? Batho ba bang ha ba bonahale hakaalo hore ba tahilwe esita le ka mora hore ba nwe haholo. Le ha ho le jwalo, ho nahana hore tlwaelo e jwalo ha e na kotsi ehlile ke ho ithetsa. (Jeremia 17:9) Hanyane ka hanyane, butlebutle, motho a ka iphumana a se a itshetlehile ka dino tse tahang ebe o fetoha ‘lekgoba la veine e ngata.’ (Tite 2:3) Ha a bua ka bohato ba ho fetoha lekgoba la tahi, mongodi Caroline Knapp o re: “Ho fetoha lekgoba la tahi ho etsahala butle, hanyane ka hanyane, ka mokgwa o poteletseng le o sa bonahaleng hantle.” Ho nwa ho feta tekano ke leraba le bolayang.
6 Hape nahana ka temoso ya Jesu: “Ikeleng hloko hore le ka mohla dipelo tsa lona di se ke tsa imelwa ke ho ja ho tlola le ho nwa haholo le matshwenyeho a bophelo, mme ka tshohanyetso letsatsi leo la eba hodima lona hanghang jwalo ka leraba. Etswe le tla tla hodima bohle ba dulang hodima lefatshe lohle.” (Luka 21:34, 35) Ha ho hlokahale hore motho ya nwang a be a tahwe pele a qala ho otsela le ho ba botswa nameng le moyeng. Ho thweng haeba letsatsi la Jehova le mo fumana a le boemong boo?
it-1-E 656
Botahwa
Ha bo a Dumellwa ka Bibeleng. Ho nwa haholo hoo motho a ka bang a tahwa ho thibetswe ka Bibeleng. Mongodi wa buka ya Diproverbia o buile ka tsela e hlakileng le e pakwang le ke borasaense ka diphello tse bakwang ke ho nwa jwala haholo. O ile a re: “Ke mang ya nang le bomadimabe? Ke mang ya sulafaletsweng? Ke mang ya dikgang? Ke mang ya dikomang? Ke mang ya nang le maqeba ntle ho lebaka? Ke mang ya mahlo a lerootho? Ke ya dulelang ho nwa veine nako e telele, ya ntseng a batla veine e tswakilweng. O se ke wa sheba mmala o mofubedu wa veine, Ha e shebahala e le monate ka koping e lelemela ha monate. Hobane qetellong e loma jwalo ka noha, e ntsha tjhefo jwalo ka marabe [bo ka etsa hore motho a kule mmeleng (ka mohlala, bo senya sebete) le kelellong (bo baka delirium tremens e leng dihorisi) mme bo ka ba ba bolaya motho]. Mahlo a hao a tla bona dintho tse sa tlwaelehang [jwala bo ama karolo e kgolo ya boko ebe bo a bo hatella. Motho o qala ho etsa dintho tse sa tlwaelehang, o bona le ho bua dintho tse siyo.], pelo ya hao yona e tla bua dintho tse tswileng tseleng [o bua dintho tseo a ikwalletseng ka tsona ha a sa nwa].”—Pr 23:29-33; Hos 4:11; Mat 15:18, 19.
Mongodi o tswela pele ho hlalosa phihlelo ya letahwa ka tsela ena: “O tla ba jwalo ka motho ya robetseng bohareng ba lewatle [o ferekane hoo o qetellang o sa bone hore na ho ntse ho etsahalang pela hao], o be jwalo ka motho ya robetseng hodimo palong e tshehetsang seile ya sekepe [boemong bona bophelo ba letahwa bo kotsing, a ka otlwa ke seterouku, a lwana le ho etsa dintho tse ding tse kotsi]. ‘Ba ntjhapile empa ha ke a utlwa bohloko; ba nkotlile empa ha ke hopole le ho hopola [letahwa le bua le le leng; le sa tsebe hore na ho etsahalang, le sa utlwe le ditlamorao tsa botahwa ba lona]. Ke tla tsoha neng? Ke hloka veine e nngwe hape [ha a lokela ho robala e le hore a hlaphohelwe, o tswela pele ho batla ho nwa].’ ” E tla ba mofutsana ka lebaka la ho senya tjhelete e ngata jwaleng hape e tla ba motho ya ke keng a tsheptjwa ka lebaka la hore ha a kgone ho phetha mosebetsi oo a o fuweng.—Pr 23:20, 21, 34, 35.
Matlotlo a Patilweng
w04 11/1 31 ¶2
Dipotso Tse Tswang ho Babadi
Ka mohlala, botenya e ka nna ya eba pontsho ya bonyollo, empa hase ka mehla ho leng jwalo. Motho a ka nna a nona haholo ka lebaka la bolwetse. Lefutso le lona le ka nna la baka botenya. Hape re lokela ho hopola hore botenya ke ntho e amang mmele, ha bonyollo bona e le se ka kelellong. Botenya bo hlaloswa e le “boemo bo kgethollwang ka ho ba le mafura a mangata haholo mmeleng,” empa bonyollo ke meharo kapa ho ikgotsofatsa ka tsela e feteletseng. Ka hoo, bonyollo ha bo lemohuwe ka boima ba motho ba mmele, empa bo lemohuwa ka boikutlo boo motho a nang le bona ka dijo. Motho a ka nna a ba le boima bo itekanetseng ba mmele kapa mohlomong a be mosesaane empa e le monyollo. Ho feta moo, seo ho nkwang hore ke boima kapa sebopeho se loketseng sa mmele se fapana haholo ho ya ka dibaka
LA 28 JULY–LA 3 AUGUST
MATLOTLO A TSWANG BIBELENG DIPROVERBIA 24
Dula o Itokiseditse Mathata
it-2-E 610 ¶8
Ho Hloriswa
Bakreste le bona ba ananela moputso o tliswang ke ho mamella. Ha Jesu a bua ka moputso ona o ile a re: “Ho thaba ba hlorisitsweng ka lebaka la ho loka Ka ha Mmuso wa mahodimo ke wa bona.” (Mat 5:10) Ba matlafatswa ke ho tseba ka tshepo ya tsoho le Eo e leng Mofani wa yona. Sena se etsa hore ba dule ba tshepahalla Jehova le ha batho ba ba hlorisang ba ba tshosa ka lefu. Tumelo ya bona ho seo lefu la Jesu le se finyeletseng e entse hore ba se ke ba hlola ba tshaba lefu le sehloho. (Heb 2:14, 15) Ho bohlokwa hore Mokreste a lokise tsela ya hae ya ho nahana e le hore a dule a e na le tumelo e tla mo thusa hore a mamelle le ha a hanyetswa. “Dulang le nahana ka tsela e tshwanang le eo Kreste Jesu a neng a nahana ka yona. . . . o ile a ikokobetsa mme a mamela ho fihlela a shwa, a shwela palong.” (Baf 2:5-8) “O ile a mamella ha a ne a bolaelwa palong [Jesu] ebile ha aa ka a swabela ho tlotlollwa hobane o ne a tseba hore o tla thaba ka moso.”—Heb 12:2; sheba le 2Ko 12:10; 2Th 1:4; 1Pe 2:21-23.
w09 12/15 18 ¶12-13
Dula O Thabile Nakong ya Mathata
12 Diproverbia 24:10 e re: “Na o iponahaditse o nyahame letsatsing la mahlomola? Matla a hao a tla fokola.” Maele a mang wona a re: “Ka lebaka la bohloko ba pelo ho na le moya o hlomohileng.” (Diprov. 15:13) Bakreste ba bang ba nnile ba nyahama hoo ba ileng ba kgaotsa ho bala Bibele boinotshing le ho nahanisisa ka Lentswe la Modimo. Dithapelo tsa bona ba di etsa ho phetha molao feela, mme ba bile ba ikarola ho barapedimmoho le bona. Ho hlakile hore ho ka ba kotsi hore motho a dule a nyahame.—Diprov. 18:1, 14
13 Ka lehlakoreng le leng, ho ba le maikutlo a nepahetseng ho tla re thusa hore re tsepamise dikelello dinthong tse re thabisang. Davida o ile a ngola a re: “Ke thabetse ho etsa thato ya hao, Modimo wa ka.” (Pes. 40:8) Ha dintho di sa tsamaye hantle bophelong ba rona, ha re a lokela ho kgaotsa mokgwa wa rona o motle wa borapedi. Ha e le hantle, ntho e ka etsang hore re lwantshe ho hlonama ke hore re etse dintho tse re thabisang. Jehova o re bolella hore re ka thaba ha re bala Lentswe la hae re bile re le hlahloba ka mehla. (Pes. 1:1, 2; Jak. 1:25) Mangolong a Halalelang le dibokeng tsa Bokreste, re fumana “dipolelo tse kgahlehang” tse ka re hlasimollang tsa ba tsa etsa hore dipelo tsa rona di thabe.—Diprov. 12:25; 16:24.
Dipotso Tse Tswang Ho Babadi
Diproverbia 24:16 e re: “Ya lokileng a ka nna a wa esita le ka makgetlo a supileng.” Na temana ena e bua ka motho ya etsang sebe ka makgetlo empa Modimo a mo tshwarela?
Ha e le hantle temana ena ha e bue ka motho eo. Ho ena le hoo, temana ena e bua ka motho ya nang le mathata a mangata mme a a mamella.
Ka hoo Diproverbia 24:16 ha e bue ka ho etsa sebe empa e bua ka motho ya dulang a na le mathata. Lefatsheng leo re phelang ho lona hona jwale motho ya lokileng a ka nna a kula kapa a ba le mathata a mang. Ba boholong pusong ba ka nna ba mo hlorisa ka lebaka la tumelo ya hae. Empa a ka tshepa hore Modimo o tla mo tshehetsa, a mo thuse hore a mamelle le ho hlola mathata ao. Nahana ka moo o ileng wa bona ha Jehova a thusa bahlanka ba hae ka teng. Bibele e re kgodisa hore “Jehova o tshehetsa bohle ba wang, o phahamisa bohle ba inameng.”—Pes. 41:1-3; 145:14-19.
Matlotlo a Patilweng
w09 10/15 12
Dipotso Tse Tswang ho Babadi
Mehleng ya ha ho ne ho ngolwa Bibele, haeba monna a ne a batla ho ‘haha lelapa’ ka hore a nyale o ne a lokela ho ipotsa, ‘Na ke loketse hore nka hlokomela ka ba ka phedisa mosadi le bana le ha e le bafe bao re ka nnang ra ba le bona?’ Pele a qala lelapa, o ne a ena le mosebetsi oo a lokelang ho o etsa, e leng wa ho hlokomela masimo a hae kapa dijalo. Ka hoo, Today’s English Version e fetolela temana ena ka ho hlaka e re: “O se ke wa haha ntlo ya hao wa ba wa theha lelapa ho fihlela ha masimo a hao a lokile, mme o kgodisehile hore o ka fumana seo o tla phela ka sona.” Na molaomotheo o tshwanang wa sebetsa kajeno?
E. Monna ya batlang ho nyala o lokela ho lokisetsa boikarabelo boo hantle. Haeba a sa kule, o tla tlameha ho sebetsa. Le ha ho le jwalo, mosebetsi o thata wa monna wa hore a hlokomele lelapa la hae, ha wa lokela ho fella feela tabeng ya ho lokisetsa dintho tse bonahalang. Lentswe la Modimo le bontsha hore monna ya sa hlokomeleng lelapa la hae nameng, maikutlong le moyeng o mobe le ho feta ya se nang tumelo! (1 Tim. 5:8) Ka hoo, mohlankana ya lokisetsang ho nyala le ho ba le lelapa a ka ipotsa dipotso tse kang tsena: ‘Na ke se ke itokisitse ka ho lekaneng hore ke hlokomele lelapa ka dintho tse bonahalang? Na ke se ke loketse hore nka etella lelapa pele borapeding? Na ke tla phetha boikarabelo ba ho kgannela mosadi wa ka le bana ba ka thuto ya ka mehla ya Bibele?’ Ka sebele Lentswe la Modimo le hatisa hore boikarabelo boo ke ba bohlokwa.—Deut. 6:6-8; Baef. 6:4.
Ka hoo, mohlankana ya batlang mosadi o lokela ho nahana ka hloko ka molaomotheo o ho Diproverbia 24:27. Ka tsela e tshwanang, ke hantle hore morwetsana le yena a ipotse hore na ebe o se a loketse boikarabelo ba ho ba mosadi le ho ba mme. Banyalani ba batjha ba ka ipotsa dipotso tse tshwanang ha ba nahana ka boikarabelo ba ho hodisa bana. (Luka 14:28) Ho phela ka tataiso eo e buduletsweng ho ka thusa batho ba Modimo hore ba qobe masisapelo le hore ba phele bophelo bo kgotsofatsang ba lelapa.
LA 4-10 AUGUST
MATLOTLO A TSWANG BIBELENG DIPROVERBIA 25
Melaomotheo e re Thusang Hore re Bue Dintho Tse Hahang
w15 12/15 19 ¶6-7
Ela Hloko Tsela eo o Buang ka Yona
6 Ke hobaneng ha e le ha bohlokwa ho kgetha nako e loketseng ya ho bua? Diproverbia 25:11 e re: “Lentswe le builweng ka nako e nepahetseng le jwalo ka diapole tsa kgauta ka dijaneng tse betlilweng tsa silevera.” Diapole tsa kgauta di ntle, empa di ka ba ntle le ho feta ha di le ka sejaneng sa silevera. Ka ho tshwanang, re ka ba le ntlha ya bohlokwa eo re batlang ho e bolella motho e mong. Empa re ka thusa motho eo le ho feta haeba re kgetha nako e loketseng ya ho bua. Re ka etsa see jwang?
7 Haeba re bua ka nako e fosahetseng, batho ba ka nna ba se ke ba utlwisisa seo re se buang kapa hona ho re mamela. (Bala Diproverbia 15:23.) Ka mohlala, ka March 2011, metse e mengata e karolong e ka botjhabela ya Japane e ile ya senngwa ke tshisinyeho ya lefatshe le tsunami. Batho ba fetang 15 000 ba ile ba shwa. Le hoja Dipaki Tsa Jehova tse ngata le tsona di ne di lahlehetswe ke ba malapa le metswalle, di ne di batla ho tshedisa ba bang ka Bibele. Empa di ne di tseba hore boholo ba batho bao ke Mabuddha mme ha ba tsebe Bibele hakaalo. Ka hoo, ho ena le hore bara ba bo rona ba ba bolelle ka tsoho, ba ile ba ba tshedisa, ba ba hlalosetsa hore na ke hobaneng ha batho ba lokileng ba hlahelwa ke dintho tse bohloko.
w15 12/15 21 ¶15-16
Ela Hloko Tsela eo o Buang ka Yona
15 Tsela eo re buang le ba bang ka yona ke ya bohlokwa. Batho ba ne ba thabela ho mamela Jesu hobane o ne a bua le bona ka tsela e mosa. (Luka 4:22) Ha re bua le batho ka tsela e mosa, ba ka nna ba thabela ho re mamela mme ba amohela seo re se buang. (Diproverbia 25:15) Re tla nolofallwa ho bua le batho ka tsela e mosa haeba re ba hlompha re bile re nahanela maikutlo a bona. Ke sona seo Jesu a ileng a se etsa. Ka mohlala, ha a bona bongata bo ikitlaelletsa ho mo mamela, o ile a ithaopela ho qeta nako a bo ruta. (Mareka 6:34) Esita le ha batho ba mo hlapaola, Jesu ha a ka a iphetetsa ka ho ba hlapaola.—1 Petrose 2:23.
16 Le hoja re rata ba malapa a rona le metswalle, re ka nna ra bua le bona ka tsela e hlokang mosa hobane re ba tlwaetse. Re ka nna ra nka hore ha ho hlokahale hore re be hlokolosi ha re bua le bona. Empa ha ho mohla Jesu a kileng a kgahlapetsa barutuwa ba hae. Ha barutuwa ba bang ba ngangisana ka hore na ke mang e moholo hara bona, o ile a ba kgalemela ka mosa mme a ba etsetsa mohlala ka ngwana e monyenyane ho ba thusa hore ba lokise tsela eo ba nahanang ka yona. (Mareka 9:33-37) Baholo ba ka etsisa mohlala wa Jesu ka hore ba eletse ba bang ka mosa.—Bagalata 6:1.
w95 4/1 17 ¶8
Susumeletsanang Leratong le Mesebetsing e Molemo—Ka ho Etsa Jwang?
8 Ha re sebeletsa Modimo wa rona, kaofela ha rona re ka susumetsana ka mohlala oo re o behang. Jesu ka sebele o ile a susumetsa bamamedi ba hae. O ne a rata mosebetsi wa tshebeletso ya Bokreste mme o ile a phahamisa tshebeletso. O itse e ne e tshwana le dijo ho yena. (Johanne 4:34; Baroma 11:13) Tjheseho e jwalo e ka tshwaetsanwa. Na le wena o ka etsa hore ka ho tshwanang thabo ya hao tshebeletsong e bonahale? Le hoja ka hloko o qoba mokgwa wa ho bua ka boithoriso, abelana diphihlelo tsa hao tse monate le ba bang ka phuthehong. Ha o mema ba bang hore ba sebetse le wena, bona haeba o ka ba thusa ho fumana thabo ya sebele ha ba bua le ba bang ka mmopi wa rona e Moholo, Jehova.—Diproverbia 25:25.
Matlotlo a Patilweng
it-2-E 399
Bonolo
Motho o ba bonolo hobane a e na le tumelo ho bile ho e na le moo matla a hae a tswang teng. Ke motho ya kgonang ho ikemela ya ke keng a lahliswa mekgwa ya hae e metle habonolo. Dintho tse etsang hore motho a se ke a ba bonolo ke ho ikgalala, ho ferekana, ho hloka tumelo le tshepo le ho batla ntho e itseng ka matla. Motho ya seng bonolo o hlaloswa ke maele a latelang: “Motho ya sa kgoneng ho laola bohale ba hae o jwalo ka motse oo marako a wona a heleditsweng.” (Pr 25:28) Ho ka ba bonolo hore a etse dintho tse mpe hoo a ka susumeletseha ho di etsa.
LA 11-17 AUGUST
MATLOTLO A TSWANG BIBELENG DIPROVERBIA 26
Tsamaella Hole le “Motho ya se Nang Kelello”
it-2-E 729 ¶6
Pula
Dinako tsa selemo. Hlabula le mariha e ne e le dinako tse pedi tsa selemo tse ka sehloohong Naheng e Tshepisitsweng mme ka nepo di ne di nkuwa e le nako ya komello le ya pula. (Bapisa le Ps 32:4; Sef 2:11, ftn.) Ho tloha mahareng a April ho ya mahareng a October pula e na hanyenyane mme ena e ba yona nako ya ho kotula. Diproverbia 26:1 e bontsha hore nakong ya kotulo, ho ne ho sa lebellwa hore pula e ne. (Bapisa le 1Sa 12:17-19.) Nakong ya selemo ha ho lebelletswe hore pula e ne, ha se ka mehla e nang. Matsatsing a mang le sa le bohweng ba ntja. Ka ha ka nako eo ho a bata le pula ya teng e bata haholo. (Esd 10:9, 13) Ka hona, ho hlokahala matlo a futhumetseng.—Esa 4:6; 25:4; 32:2; Job 24:8.
w87 10/1 19 ¶12
Tayo e Kotudisa Tholwana ya Kgotso
12 Ho batho ba bang ho hlokahala mehato e matla haholwanyane, jwalo ka ha Diproverbia 26:3 e bontsha: “Pere e lokelwa ke phafa, le esele ke tomo; mokokotlo wa lehlanya le wona o lokelwa ke thupa.” Ka dinako tse ding Jehova o ile a tlohella setjhaba sa hae sa Iseraele hore se hatellwe ke dikgathatso tseo se itliseditseng tsona: “E re ka ha ba nnile ba eba manganga ditabeng tsa Modimo, ba nyedisa keletso ya Mookamedi ya phahameng; ke moo a kokobeditseng dipelo tsa bona tlasa bohloko; ba imelwa, ba sa thuswe ke motho. Ba howa ho Jehova matswalong a bona, a ba lopolla ditsielehong tsa bona.” (Pesamele ya 107:11-13) Le ha ho le jwalo, mawatla a mang a ile a ithatafatsa hore a ka fihlelwa ke taeo e phekolang ya mofuta ofe kapa ofe: “Motho ya ntseng a kgalemelwa hangata, mme a itshatalatsa molala, o tla robeha hanghang, ho se le sehlare.”—Diproverbia 29:1.
it-2-E 191 ¶4
Ho Holofala
Ka moo maele a sebedisitsweng. Morena Solomone ya bohlale o ile a re “Ya siyang ditaba matsohong a motho ya se nang kelello o tshwana le motho ya pomang maoto a hae mme a itematsa [e leng se ka etsang hore a holofale]. Ka nnete motho ya fang motho ya se nang kelello mosebetsi ho tshwana le ha a ithunya leotong. O tla bona ha mosebetsi wohle oo a neng a batla hore o etswe o fella moyeng.—Pr 26:6.
Matlotlo a Patilweng
it-1-E 846
Lewatla
Haeba o araba lewatla ‘ho ya ka bothoto ba lona’ ka sepheo sa ho ngangisa le lona le wena o ba lewatla jwalo ka lona. Maele a reng: “O se ke wa araba motho ya se nang kelello ho ya ka bothoto ba hae” a re thusa hore re se ke ra fetoha mawatla. Ka lehlakoreng le leng Diproverbia 26:4, 5 e bontsha hore ho araba lewatla ‘ho ya ka bothoto ba lona’ ka sepheo sa ho utlwisisa hore na ke hobaneng le etsa dikgang, ho le bontsha hore mabaka a lona ha a utlwahale le hore ditaba tsa lona di ka ba ka tsela e fapaneng le eo lona le di bonang ka yona, ho ka le thusa.
LA 18-24 AUGUST
MATLOTLO A TSWANG BIBELENG DIPROVERBIA 27
Metswalle ya Nnete e re Thusa Jwang?
Jehova o Nka Bahlanka ba Hae ba Ikokobeditseng e le ba Bohlokwa
12 Motho ya ikokobeditseng o thabela keletso. Ka mohlala, a ko nahane o le dibokeng, ka mora hore o bue le batho ba mmalwa, e mong wa bona o o bitsetsa ka thoko mme o o bolella hore o na le dijo menong. Ha ho pelaelo hore o tla ikutlwa o swabile. Empa na o ke ke wa thabela hore ebe o o bolelletse? Ha e le hantle, o ka ba wa lakatsa eka ho ka be ho ena le motho ya ileng a o bolella e sale pele. Ka ho tshwanang, re lokela ho bontsha boikokobetso haeba mora kapa moradi wa bo rona a re fa keletso. Re lokela ho nka motho eo a re rata eseng a re hloile.—Bala Diproverbia 27:5, 6; Bagal. 4:16.
it-2-E 491 ¶3
Moahisani
Buka ya Diproverbia re thusa ho bona bohlokwa ba ho ba le motho eo re llelang ho yena ha ho le thata ha e re: “O se ke wa furalla motswalle wa hao kapa motswalle wa ntate wa hao. Hape ha o hlahelwa ke koduwa, o se ke wa ya ha ngwaneno. Moahisani ya haufi o molemo ho feta ngwaneno ya hole.” (Pr 27:10) Seo mongodi wa temana ena a se bolelang ke hore, ke ha bohlokwa ho ba le motswalle ya haufi eo re ka kopang thuso ho yena ho ena le ho tshepela ho ngwanabo rona ya hole ya ka nnang a se ke a fumaneha ho fana ka thuso ka nako e loketseng jwalo ka motswalle ya haufi.
Batjha, le Batla Bophelo bo Jwang?
7 Ntho e nngwe eo re ithutang yona diqetong tse fosahetseng tseo Joase a ileng a di etsa ke hore re lokela ho kgetha metswalle e ratang Jehova ebile e ikemiseditse ho mo thabisa. Metswalle e jwalo e tla re thusa ho etsa dintho tse nepahetseng. Re ka ba metswalle le batho ba baholo kapa ba banyenyane ho rona. Hopola hore Joase o ne a le monyenyane haholo ho motswalle wa hae Jehojada. Ha o kgetha metswalle ipotse dipotso tsena: ‘Na e nthusa ho ba le kamano e matla le Jehova? Na e nthusa ho mamela melao le melaomotheo ya Modimo? Na e bua ka Jehova le ka dintho tsa bohlokwa tseo a re rutang tsona? Na e mamela melao le melaomotheo ya Modimo? Na e mpolella dintho tseo nka thabelang ho di utlwa feela kapa na e ba le sebete sa ho nkeletsa ha ke kgeloha?’ (Diprov. 27:5, 6, 17) Ho hlakile hore haeba metswalle ya hao e sa rate Jehova, ha o e hloke. Empa haeba metswalle ya hao e rata Jehova, o se ke wa e tlohela hobane e tla ba le tshusumetso e ntle ho wena.—Diprov. 13:20.
Matlotlo a Patilweng
w06 9/15 19 ¶12
Dintlhakgolo Tsa Buka ya Diproverbia
27:21. Ho roriswa ho ka senola seo re leng sona. Re bontsha boikokobetso ha thoriso e re susumelletsa ho dumela hore re seo re leng sona ka lebaka la Jehova mme e re kgothalletsa ho tswela pele re mo sebeletsa. Re bontsha boikgohomoso haeba ha re roriswa re nahana hore re phahame.
LA 25-31 AUGUST
MATLOTLO A TSWANG BIBELENG DIPROVERBIA 28
Phapang Pakeng Tsa Motho ya Kgopo le ya Lokileng
w93 5/15 26 ¶2
Na o Latela Jehova Kahohle?
“BA LOKILENG ba iketlile jwalo ka tau e ntjha.” (Diproverbia 28:1) Ba bontsha tumelo, ba itshetleha ka Lentswe la Modimo ka tshepo, mme ka sebete ba tswela pele tshebeletsong ya Jehova ho sa tsotellehe kotsi efe kapa efe.
it-2-E 1139 ¶3
Ho ba le Kutlwisiso
Ba furallang Mmopi. Ha motho a tlola melao ya Modimo o qalella ho mo nka e se wa bohlokwa ha a etsa diqeto. (Job 34:27) Motho ya jwalo o dumella pelo ya hae hore e mo foufatse ebe o etsa dintho tse fosahetseng. (Ps 36:1-4) Le hoja motho enwa a re o sebeletsa Modimo, o kgetha ho mamela batho ho ena le ho mamela Modimo. (Esa 29:13, 14) O emela boitshwaro ba hae bo fosahetseng ka hore empa feela e le “papadi.” (Pr 10:23) O qala ho kgeloha, eba motho ya se nang kutlwisiso le ya fanang ka mabaka a sa utlwahaleng ho isa boholeng ba hore a nahane hore Modimo ha bone dintho tse fosahetseng tseo a di etsang jwalo ka ha eka matla a Modimo a ho lemoha a hlolehile. (Ps 94:4-10; Esa 29:15, 16; Jer 10:21) Diketso le boitshwaro ba hae di re o re “Jehova ha a yo” (Ps 14:1-3) mme ka lebaka leo o a mo lebala. Ka lebaka la ho se tataiswe ke melaomotheo e lokileng, ha be le kahlolo e molemo, ha bone dintho ka tsela e nepahetseng, ha kgone ho ba sedi le ho etsa diqeto tse nepahetseng.—Pr 28:5.
it-1-E 1211 ¶4
Botshepehi
Re ka kgona ho tshepahala haeba re sa tshepa matla a rona empa re tshepile Jehova le matla a Hae a pholosang. (Ps 25:21) Modimo o tshepisa hore e tla ba “thebe” le “tshireletso” ya bohle ba tshepahalang. (Pr 2:6-8; 10:29; Ps 41:12) Ho ameha ha bona ka ho amohelwa ke Jehova ho etsa hore ba phele ka kgotso e leng se etsang hore ho be bonolo ho bona hore ba finyelle pakane ya bona ya ho batla ho amohelwa ke Jehova. (Ps 26:1-3; Pr 11:5; 28:18) Le hoja Jobo nakong eo a neng a ferekane a ileng a re ba lokileng ba ka utlwa bohloko ba ba ba bolawa ke batho ba kgopo, Jehova o re kgodisa hore o bona dintho tse etsahallang batho ba se nang molato mme o tshepisa hore lefa la bona e tla ba le sa feleng, ba tla phela ka kgotso le ho loka nakong e tlang. (Job 9:20-22; Ps 37:18, 19, 37; 84:11; Pr 28:10) Tlaleho ya Jobo e a bontsha hore ho molemo ho ba motho ya tshepahalang ho feta ho ba morui hobane ha motho a tshepahala, e eba motho wa bohlokwa le ya hlomphehang. (Pr 19:1; 28:6) Bana ba lehlohonolo la ho ba le batswadi ba tshepahalang ba a thaba (Pr 20:7), ba thabela botumo bo botle boo batswadi ba bona ba ba sietseng bona
Matlotlo a Patilweng
w01 12/1 11 ¶3
O ka Qoba Lefu la Moya la ho Ema ha Pelo
Ho itshepa ho tlola. Batho ba bangata ba ileng ba hlaselwa ke lefu la ho ema ha pelo ba ne ba kgodisehile ka ho feletseng hore ba phela hantle nakwana pele dipelo tsa bona di ema. Hangata motho o ne a qhela kapa a tsheha taba ya ho hlahlojwa ke ngaka a nka hore ha ho hlokahale ho hang. Ka ho tshwanang, ba bang ba ka nna ba nahana hore ka ha e bile Bakreste ka nako e telele, ha ho letho le ka ba hlahelang. Ba ka nna ba hlokomoloha ho hlahlojwa kapa ho itlhahloba moyeng ho fihlela ba welwa ke tlokotsi. Ho hotle ho hopola keletso e molemo e fanweng ke moapostola Pauluse ya hore re se ke ra itshepa ho tlola, e reng: “Ya nahanang hore o eme a ke a hlokomele hore a se ke a wa.” Ke bohlale hore re dumele hore ha re a phethahala le hore re itlhahlobe moyeng nako le nako.—1 Bakorinthe 10:12; Diproverbia 28:14.