July

Jesuh nih a tuahmi khuaruahhar thil i telin a chimmi le a tuahmi dihlak ah a Pa ruahnak le intuarnak kha tling tein aa zohchunh. (Johan 14:9) Jesuh tuahmi khuaruahhar thil in zeidah kan cawn khawh? Jesuh le a Pa nih a kan dawt tuk. Vawleicung a um lioah Jesuh nih sifah harnak a tongmi pawl bawmh awkah khuaruahhar a simi a ṭhawnnak a hmannak thawngin mi pawl a dawt hna kha a langhter. Voikhat cu mitcaw pahnih nih bawmhnak an hal. (Matt. 20:30-34) Jesuh nih “a zaangfah hna” i a damter hna ti kha i cinken. Hika ah a hmanmi “zaangfah” timi Greek biafang nih kan chunglei in a rami zaangfahnak taktak kha a chim duhmi a si. Dawtnak langhternak a simi cu bantuk zaangfahnak nih Jesuh kha a rawl ṭammi pawl dangh awk le thinghmui zawtnak a ngeimi pawl damter awk zongah a forh. (Matt. 15:32; Mar. 1:41) “Zaangfah thiammi” Jehovah Pathian le a Fapa nih a kan dawt tuk i sifah harnak kan ton tikah an lung a fak ti kha kan zumh khawh. (Luka 1:78; 1 Pet. 5:7) Cucaah minung tonmi ṭhatlonak hna an hloh lai caan kha an i ngaih tuk. w23.04 3 ¶4-5

Cun kan thlacam ning zongin kan nun a hau. Satan vawlei ah a laar tukmi, a ṭha lomi ruahnak a kan ngeihter khomi carelnak le ngaihnak kha a si khawh chungin hrial awkah kan i zuam a hau. Baibal relnak le hlathlainak thawngin kan lungthin chungah a ṭhami ruahnak kha kan khahter khawh. Pumhnak le phungchim rian ah i telnak nih kan ruahnak zong a kilven lai. Cun Jehovah nih kan inkhawh leng tiangin lemsoinak kaan tonter hna lai lo ti zong in bia aa kam. (1 Kor. 10:12, 13) Harnak caan a simi ni hmanung bik caan ah Jehovah cungah zumhfek tein kan um peng nakhnga a hlan nakin thla kan cam chinchin a hau. Jehovah nih thlacamnak in ‘kan harnak vialte kha chim dih’ hna seh ti a kan duh. (Salm 62:8) Jehovah kha thangṭhat law a tuahmi thil viate caah lawmhnak bia chim. Cun ralṭha tein phung na chim khawh nakhnga bawmhnak hal. Na ton khawhmi zei bantuk harnak paoh inkhawh awk le lemsoinak hna doh khawh awkah Jehovah sinah bawmhnak hal. Jehovah sinah hmaan tein thlacamnak kha ahohmanh asiloah zeithil hmanh i dawnhter hlah. w23.05 7 ¶17-18

Zeicah Khrihfabu pumhnak ah kan i pumh? A bik in cun Jehovah thangṭhat awkah a si. (Salm 26:12; 111:1) Cun harnak caan ah pakhat le pakhat thazaang kan i pek khawh nakhnga ca zongah a si. (1 Thes. 5:11) Pumhnak ah kan kut kan thlir i a phi kan pek tikah mah thil pahnih kha kan tuahmi a si. Asinain a phi kan pek tikah zuamcawhnak kan tong kho. A phi pek awkah ṭihnak kan ngei kho. Asiloah a phi tampi pek kan duh ko nain kan duh tlukin atu le atu a kan hal men lai lo. Mah bantuk zuamcawhnak hna kha zeitindah kan tawnghtham khawh? Lamkaltu Paul nih ‘pakhat le pakhat i forhnak’ ah lungthin kan pek awk a si tiah a ti. Kan zumhnak langhter awkah a sawhsawh tein a phi kan pekmi hmanh nih midang thazaang a ngeihter khawh hna ti kha kan i cinken ahcun kut thlir awkah ṭihnak kan ngei ti lai lo. Atu le atu a kan hal lo hmanhah Khrihfabu i unau dang nih a phi peknak caanṭha an hmuhmi cungah kan i lawm kho.—1 Pet. 3:8. w23.04 20 ¶1-3

Siangpahrang nih thawngthanhnak pakhat a tuah. Babilon ah kum 70 chung sal ah a taangmi Judah mi hna cu an ram Israel ah kir ṭhan dingin luatnak an hmu. (Ezra 1:2-4) Mah cu Jehovah bawmhnak thawng lawng in a si khomi a si. Babilon mi hna nih sal in an tlaihmi hna kha an thlah bal ti hna lo. (Isa. 14:4, 17) Asinain Babilon khua cu tei a si tikah an uktu thar nih Judah mi kha an ram ah kir dingin a fial hna. Judah mikip nih a hleiin chungkharlu hna nih Babilon in kan chuak lai maw, chuak lai lo timi he aa tlaiin biakhiahnak an tuah a herh. Pakhat cio caah mah biakhiahnak tuah cu a fawi lai lo. Mi tampi cu mah khual lamhlat kal awkah an tar tuk cang men lai. Cun Judah mi tam deuh cu Babilon khua ah a chuakmi an si caah an ram kong cu an hna lawng in an rak theihmi a si men lai. An caah Israel ram cu an pupa hna ram a si men lai. Judah mi cheukhat cu Babilon ram ah an khuasak a ṭha tuk, cucaah a nuam tukmi an inn le an rian pawl kaltak in an theih theng lomi ram ah i ṭhial ding cu an caah a har men lai. w23.05 14 ¶1-2

Baibal nih inkhawhnak, zaangfahnak le dawtnak kha ṭhanchoter peng awkah tha a kan pek. Luka 21:19 ah hitin a ti: “Zeitikhmanh ah nan lung dong hlah u, zeicahtiah hitihin pei nan nunnak cu nan khamh lai cu.” Kolose 3:12 ah hitin a ti: “Zaangfahnak . . . kha nan i aih awk a si.” Cun 1 Thesalon 4:9, 10 zong ah hitin a ti: “Pathian nih pakhat le pakhat nan i dawt awk a si tiah aan cawnpiak hna. . . . Cucaah cun u le nau hna, cunak tam deuh in tuah rih awkah kan in nawl hna.” Mah Baibal caang dihlak cu inkhawhnak, zaangfahnak le dawtnak a langhtermi zultu hna sinah ṭialmi a si. Asinain mah sining hna kha an langhter peng a hau. Kannih zong cutin kan tuah ve awk a si. Nangmah bawmh awkah hmasa Khrihfa hna nih mah sining hna zeitindah an langhter ti kha na ruah khawh. Cun mah zultu pawl zeitindah naa zohchunh khawh hna ti kha na hngalh lai i le harnak nganpi caah timhcia na si kha na langhter khawh lai. Harnak nganpi aa thawk tikah inkhawhnak ngeih khawh ning kha na hngalh lai i inkhawhnak ngeih peng ding in bia na khiah lai. w23.07 3 ¶4; 4 ¶8

Chiti thuhmi kan si ah, “tuudang” kan si ah “Thiannak Lam” cung ah kan kal peng a hau. Mah nih atu le hmailei ah Pathian Pennak nih vawleicung ah khuaruahhar thil hna a chuahter tikah Jehovah biak peng dingin a kan bawmh lai caah a si. (Johan 10:16) AD 1919 thawk in pa, nu le ngakchia aa telmi mi nuai tampi cu vawleicung i a hmaan lomi biaknak uktu a simi A Liannganmi Babilon in an chuak i mah langhternak lam cung ah an hun kal. Judah mi pawl Babilon in a chuak tikah an lam ah dawnkhantu a simi thil pawl hloh a simi kha Jehovah nih a hmuh. (Isa. 57:14) Tuchan i “Thiannak Lam” he aa tlaiin tah zeitin? 1919 tiang kumzabu tampi cungah Jehovah nih A Liannganmi Babilon in chuak khawh awkah lam sersiam dingin Pathian a ṭih i a upatmi pa pawl kha a hman hna. (Isaiah 40:3 he tahchunh.) Annih nih lungthin ṭha a ngeimi hna kha A Liannganmi Babilon in an chuah khawh nakhnga le Pathian nih a dirh ṭhanmi a thiangmi biaknak thlaraulei paradis ah an lut khawh nakhnga thlaraulei lam timhtuahnak rian kha an ṭuan. w23.05 15-16 ¶8-9

Jehovah nih nuam tein le lungtho tein a rian ṭuanter a kan duh. (2 Kor. 9:7) Cu bantuk lungput kan ngeih lo ahcun thlaraulei hmuitinh phanh awkah zeicah kan i zuam peng awk a si? Lamkaltu Paul kong kha ruathmanh. Hitin a ti: “Ka pum cu ka hrem i fek tein ka uk.” (1 Kor. 9:25-27) Paul cu Jehovah nih tuahter a duhmi thil tuah duhnak lungput a ngeih lo tik hmanh ah cutin tuah awkah amahle amah kha aa hrem. Jehovah nih Paul tuahsernak kha a cohlang maw? A cohlan! Mah lengah Paul aa zuamnak cung ah Jehovah nih laksawng a pek. (2 Tim. 4:7, 8) Tuah duhnak kan ngeih lo caan hmanh ah kan hmuitinh phanh kan i zuammi kha Jehovah nih a hmuh tikah aa lawm tuk. Mah tuahsernak kha kan huam caah kan tuahmi a si zungzal men lai lo nain amah kan dawt caah kan tuahmi a si ti kha a hngalh i aa lawm tuk. Jehovah nih Paul thluachuah a pek bantukin kannih zong kan i zuamnak cungah thluachuah a kan pek ve lai. (Salm 126:5) Jehovah thluachuah kan hmuh tikah tuah duhnak lungput hmanh kan hun ngei men lai. w23.05 29 ¶9-10

Lamkaltu Paul nih Jehovah ni ah luatnak a hmu lo dingmi kha aa hngilhmi he a tahchunh hna. Annih nih an pawngkam ah a cangmi asiloah a caan a liammi kha an hngal lo. Cucaah a biapimi thil a can tikah an hngal lo i a leh zong an lehrulh kho lo. Tuchan i mi tampi cu thlaraulei ah aa hngilhmi bantuk an si. (Rom 11:8) “Ni hmanung bik caan” ah kan nung ti le a rauhhlan ah harnak nganpi a ra cang lai ti a langhtermi thil hna kha an zum lo. (2 Pet. 3:3, 4) Asinain nifatin hliphlau tein um peng cu a biapi chinchinmi a si. (1 Thes. 5:6) Cucaah lungdai te le fek tein kan um peng a hau. Zeicah? Tuchan i ramkhel lei asiloah zatlang nun he aa tlaimi kongkau hna ah kan i tel nakhnga lo caah a si. Jehovah ni kan naih chin bantuk in mah kongkau hna ah khatlei khatlei ṭan ding in hneknak kan tong kho men. Asinain zeitindah kan lehrulh lai timi kong ah lungretheih a hau lo. Pathian thlarau nih lungdai tein le fek tein um peng awk le a ṭhami biakhiahnak tuah awkah a kan bawmh khawh.—Luka 12:11, 12. w23.06 10 ¶6-7

Samson timi min na theih tikah na lung ah zeidah a chuak? A ṭhawng tukmi pa tiah na ruah colh ko lai. Mah cu a hmaanmi a si. Asinain Samson nih a ṭhalomi a biakhiahnak ruang ah harnak tampi a rak tong. Cutin a si ko nain Samson nih amah biak awkah a tuahmi thil dihlak cung ah Jehovah nih lungthin a pek. Cun kanmah ṭhathnemhnak caah Pathian nih Samson zumhfehnak kong kha Baibal ah a ṭialter hna. Jehovah nih Samson kha a thimmi Israel miphun bawmh awk le khuaruahhar thil hna liim awkah a hman. Samson a thih hnu kum zabu tampi hnu ah Jehovah nih zumhnak ah zohchunhawk ṭha a simi hna cazin ah Samson min zong telh ding in lamkaltu Paul kha thaw a rak chuahhnawh. (Heb. 11:32-34) Samson kong nih thazaang a kan pek khawh. A harmi thil sining hmanh ah Samson nih Jehovah kha aa bochan. Samson kong in thazaang a pemi a dang a ṭha tukmi kong hna zong kan cawn khawh. w23.09 2 ¶1-2

Kan lungchung ah a ummi vialte kha Jehovah kan chimh i atu le atu thla kan camnak thawng in inkhawhnak kan ngei kho. (1 Thes. 5:17) Atu ah a fakmi harnak cu na tong men lai lo. Asinain na lung a dongh tik, na lung a buai tik asiloah zei tuah awk na hngalh lo tikah Jehovah sinah bawmhnak hal in thla na cam maw? Atu ah na tonmi harnak hmetete caah nifatin Pathian sinah bawmhnak na hal i hmaan tein thla na cam ahcun hmailei ah a nganmi zuamcawhnak na ton tikah cutin tuah awkah naa cungcang ti lai lo. Zeitik ah dah ka bawmh lai i zeidah ka tuahpiak lai ti kha Pathian nih a hngalh ti kha na zumh lai. (Salm 27:1, 3) Atu ah kan tonmi harnak hna kha kan inkhawh ahcun hmailei ah a ra dingmi harnak nganpi zong ah inkhawhnak kan ngei deuh lai. (Rom 5:3) Zeicah cutin kan chim khawh? A har tukmi sining hna kan inkhawhmi nih a dang harnak hna kha inkhawh awkah a kan bawmh tiah unau tampi nih an ti. Jehovah bawmhnak thawng in harnak hna an inkhawh tikah Jehovah nih bawmh a kan duh ti kha an zumh deuh ve. Cun Jehovah an zumh caah a dang an tonmi harnak hna kha an inkhawh.—Jeim 1:2-4. w23.07 3-4 ¶7-8

Toidornak le zaangfahnak nih Jehovah kha a tlarimi si awkah a forh. Tahchunhnak ah, Jehovah nih zeitluk in dah aa toidor ti kha Sodom khua i miṭhalo pawl a hrawh hnik hna lioah a rak langhter. A vancungmi hmang in Jehovah nih miding Lot kha tlang ah zam ding in lamhruainak a pek. Lot nih cuka hmun i zam kha a rak ṭih. Cucaah Lot nih Jehovah nih hrawh ding in biakhiahnak a tuah cangmi Zoar khua hmete ah amah le a chungkhar kha zam ding in a rak nawl. Jehovah nih Lot kha ka lamhruainak ning in zul tiah nawl a pek khawh ko. Asinain Lot kha Zoar khua ah kal ding in a awnh i mah khua kha a rak hrawk lo. (Gen. 19:18-22) Kumzabu tampi hnuah Jehovah nih Nineveh khuami hna cung ah zaangfahnak a rak langhter. Jehovah nih profet Jonah kha Nineveh khua le a chung ummi miṭhalo pawl a hrawh hna lainak kong thanh awkah a rak thlah. Asinain Nineveh khuami pawl an i ngaihchih tikah Jehovah nih a ngaihthiam hna i mah khua kha a rak hrawk ṭhan lo.—Jonah 3:1, 10; 4:10, 11. w23.07 21 ¶5

Jehoash kong in zeidah kan cawn khawh? Anih cu thingtung aa hngatchan i fek tein hram aa sih lomi thingkung bantuk a si. Amah a bawmtu Jehoiada a thih hnuah Jehoash nih zumhpialmi pawl bia kha a hun ngaih i Jehovah cung ah zumhfek tein a rak um ti lo. Mah tahchunhnak nih Pathian nawl kan ngaihmi cu kan chungkharmi i tel in zumtukhat unau pawl nih kan caah zohchunhawk ṭha an chiah ruang ca men ah a si awk a si lo ti kha a langhter. Thlaraulei ah fek tein kan um peng khawh nakhnga hmaan tein hlathlainak tuah, ṭha tein ruah le thlacamnak thawng in Pathian kan dawtnak le kan upatnak kha kan fehter peng a hau. (Jer. 17:7, 8; Kol. 2:6, 7) Jehovah nih kan sinin tampi a kan hal lo. Jehovah nih a kan halmi kong kha Phungchimtu 12:13 ah hitin a ti: “Pathian cu ṭih law a nawlbia kha zul hna, zeicahtiah minung cu hi nawlbia hna tuah awk caah hin pei rak ser a si cu.” Pathian kha kan ṭih ahcun hmailei ah zei thil kan ton hmanh ah Jehovah cung ah zumhfek tein kan um kho peng lai. Jehovah he kan i hawikomhnak kha zei thil hmanh nih a hrawk kho lai lo. w23.06 19 ¶17-19

Caang 5nak ah “bawiṭhutdan i a ṭhumi nih cun” tiin a thawk. (Biat. 21:5a) Mah bia cu Jehovah theng nih Biathlam cauk ah a chimmi bia pathum lak ah pakhat a si. Cucaah mah bia aamah a khaangtu cu a ṭhawngmi vancungmi le a tho ṭhanmi Jesuh si loin amah Jehovah theng kha a si. Mah nih a dang a chim dingmi bia zong zumh khawh a si hrimhrim ti kha a langhter. Zeicah? Jehovah cu “lih a chim kho lomi” a si caah a si. (Tit. 1:2) Cucaah Biathlam 21:5, 6 ah a langhtermi bia cu a tling hrimhrim lai ti kha kan zumh khawh. Jehovah nih hitin a ti: “Atu cu thil vialte kha a thar in ka ser dih cang hna.” Mah cu hmailei ah a tuah dingmi kong kha a chimmi a si. Asinain a biakam cu a tling hrimhrim lai ti kha a fian tuk caah ka ser dih cang hna tiah a ti.—Isa. 46:10. w23.11 3-4 ¶7-8

Lamkaltu Peter nih a derthawmnak kha a doh peng rih. Tahchunhnak cheukhat in zohhmanh hna u sih. Baibal chimchungbia ning in Jesuh nih sifah harnak in buin ka thi lai timi kong a chim lioah Peter nih a rak mawhchiat. (Mar. 8:31-33) Peter le a dang zultu pawl cu ahodah a ngan bik timi kong ah atu le atu bia an rak i al. (Mar. 9:33, 34) Jesuh a thih lai zan ah Peter nih pa pakhat i a hnakhaw kha pet lak in a rak tuk. (Johan 18:10) Asinain mah zan ah Peter cu ṭihnak a ngei i a hawi Jesuh kha ka hngal lo tiah voithum tiang a rak i pheh. (Mar. 14:66-72) A hnuah Peter cu fakpi in a ṭap. Jesuh nih a lungre a thei tukmi a zultu Peter kha a rak hlaw lo. A thawh ṭhan hnuah a dawt peng rih ti langhter awkah Peter kha caanṭha a pek. Jesuh nih toidor tein a tuu pawl zohkhenh awkah rian a pek. (Johan 21:15-17) Peter cu Jesuh chimmi ning in tuah awkah timhcia tein a um. Cucaah Pentekos ni ah Peter cu Jerusalem ah a phan i a hmasa bik thiang thlarau in chiti thuhmi hna lak ah aa tel ve. w23.09 22 ¶6-7

Lamkaltu Peter nih a ṭuanṭi hawi Khrihfa upa pawl kha “Pathian nih an pekmi hna tuurun a khaltu kha si u” tiah tha a pek hna. (1 Pet. 5:1-4) Khrihfa upa na si ahcun unau pawl na dawt hna i bawmh na duh hna ti kha kan hngalh. Asinain na rian a tam tuk ca asiloah na tha a bat tuk caah mah rian kha tling tein ka ṭuan kho lo tiah na ruah caan a um kho men. Zeidah na tuah khawh? Na lungre theihnak kong kha Jehovah sinah chim. Peter nih hitin a ti: “Rian a ṭuanmi nih Pathian pekmi thazaang khan ṭuan u.” (1 Pet. 4:11) Unau pawl nih an tonmi thil cu hi vawlei ah tling tein tawnghtham khawh lomi buaibainak hna an si kho men. Asinain nangmah nakin “tuukhal bawi bik” Jesuh Khrih nih ṭha deuh in a bawmh khawh hna ti kha philhhlah. Atu ah siseh, vawlei thar ah siseh aan bawmh khawh. Pathian nih Khrihfa upa pawl kha an unau pawl dawt awk, zohkhenh awk le an tuu pawl caah ‘zohchunh’ awk ṭha chiah awkah a hal hna. w23.09 29-30 ¶13-14

Minung ruahnak i bochan kha kan hrial awk a si. Minung hmuhnak in thil kan hmuh ahcun Jehovah le a sangmi a phunglam kha zei rel loin kan um kho. (1 Kor. 3:19) ‘Vawlei fimnak’ nih mi kha an pumsa duhnak ning in thil a tuahter tawn hna. An ziaza a rawkral i siasal a biami, an pawngkammi hna nih Pergamum le Tiatira Khrihfabu i Khrihfa cheukhat kha an iap hna. Nupa sualnak an tuah caah Jesuh nih mah Khrihfabu pahnih kha fakpi in a rak chimhhrinh hna. (Biat. 2:14, 20) Tuchan zong ah cu bantuk a ṭha lomi ruahnak kan cohlan nakhnga hneknak kan tong kho. Kan chungkharmi le kan theih hngalhmi hna nih a hlei hluat tuk in dingrep aa tlaihmi nan si i Jehovah nawlbia kha nan buar awk a si tiah an kan hnek men lai. Tahchunhnak ah, ziazalei ah thiang tein um peng cu a biapimi a si lo i ziazalei phunglam he aa tlaiin Baibal nih a chimmi cu chan nih a kaltak cang tiah an kan ti khawh men. A caan ah Jehovah nih a kan pekmi lamhruainak cu a za lo tiah kan ruah men lai. Cucaah “phung leng lonh” ding hmanh in lemsoinak kan tong men lai.—1 Kor. 4:6. w23.07 16 ¶10-11

Jesuh nu Mary nih thazaang a ngeih a hau. Vancungmi Gabriel nih a biapimi rian a pek lioah zeitluk in dah a lungre a theih lai ti kha ruathmanh. Va a ngei rih lo nain fa a pawi cang lai. Nau a ngei bal lo nain atu ahcun Messiah a si dingmi ngakchia kha a zohkhenh a hau cang. Nupa sinak a tuah bal lo nain fa ka pawi cang tiah an i hammi Josef kha a chimh a hau. Mah cu a caah a har tuk lai. (Luka 1:26-33) Mary nih zeitindah thazaang kha a hmuh? Midang sinah bawmhnak a hal hna. Tahchunhnak ah, pek a simi rian kong he aa tlaiin a dang lamhruainak pek awkah Gabriel kha a hal. (Luka 1:34) Mah hnu tlawmpal ah a chungkhat Elizabeth tlawn ding in Judah “tlangram i a ummi khua pakhat ah” a kal. Elizabeth nih Mary kha a thangṭhat. Mary nih a hrin rih lomi a fapa kong he aa tlaiin thazaang a pemi chimchungbia chim awkah Jehovah nih Elizabeth kha a hman. (Luka 1:39-45) Jehovah nih “a ṭhawngmi a ban kha a samh” tiah Mary nih a ti. (Luka 1:46-51) Jehovah nih Gabriel le Elizabeth hmang in Mary kha thazaang a rak pek. w23.10 14-15 ¶10-12

Pa zeizat timi rikhiahmi Khrih zultu hna cu thiang thlarau in chiti thuh an si i Jehovah he a hleikhunmi pehtlaihnak an ngei. 144,000 cu Jesuh he vancung ah tlangbawi ṭuan ding in rian pek an si. (Biat. 14:1) Puan biakinn i Hmun Thiang khaan nih vawleicung ah an um lio a si ko nain Pathian nih a fapale ah a cantermi hna thil sining kha a aiawh. (Rom 8:15-17) Puan biakinn i Hmun Thiang Bik khaan nih Jehovah a umnak vancung kha a aiawh. Hmun Thiang le Hmun Thiang Bik khaan i “puanzar” nih Jesuh taksa pum kha a aiawh. Taksa pum a si lioah Jesuh cu thlaraulei biakinn i Tlangbawi Ngan Bik in vancung ah a kai kho lo. Minung caah a taksa pum a peknak thawng in chiti thuhmi Khrihfa dihlak caah vancung kainak lam a awnter. Chiti thuhmi hna zong nih vancung laksawng an hmuh khawh nakhnga an taksa pum kha an hlawt a hau.—Heb. 10:19, 20; 1 Kor. 15:50. w23.10 28 ¶13

Gideon nih Efraim mi pawl nih an soisel tikah nem tein a rak lehrulh hna. (Biac. 8:1-3) Thinhung in a lehrulh hna lo. A lung a nemmi a si kha an chimmi bia ṭha tein a ngaihnak thawng in le nem tein a chawnhbiak hnanak thawng in a rak langhter. Mah nih an lung a daihter. Fimnak a ngeimi Khrihfa upa pawl nih soisel an si tikah nem tein an lehrulh i an bia ṭha tein an ngaihpiak hnanak thawng in Gideon kha an i zohchun. (Jeim 3:13) Mah nih Khrihfabu ah daihnak a umter. Midian mi pawl a tei hna ruang ah mi nih an thangṭhat tikah Gideon nih Jehovah kha lungthin a pek colh. (Biac. 8:22, 23) Rian pekmi unaupa hna nih Gideon kha zeitindah an i zohchunh khawh? An liimmi rian caah Jehovah kha an thangṭhat khawh. (1 Kor. 4:6, 7) Tahchunhnak ah, Khrihfa upa pakhat cu a cawnpiak ning he aa tlaiin thangṭhat a si ahcun cawnpiaknak hrampi a simi Baibal asiloah Jehovah bupi sinin a hmuhmi lamhruainak cung ah lungthin a pek khawh colh. A caan ah Khrihfa upa pawl nih anmah le anmah cung ah a hleihluat tuk in lungthin kan i pe maw, pe lo ti kha an ruah awk a si. w23.06 4 ¶7-8

Kan thlacammi leh kan si lo ahcun kanmah le kanmah hitin bia kan i hal kho: ‘A hmaanmi thil caah thla ka cam maw?’ Kanmah caah a ṭha bikmi cu kanmah nih kan hngalh tiah kan ruah tawn. Asinain kan halmi thil nih caan saupi a kan ṭhathnemh men lai lo. Buaibainak pakhat he aa tlaiin thla kan cam ahcun kanmah kan tawnghthammi nakin a ṭha deuhmi tawnghtham ning a um kho men. A caan ah kan halmi cu Jehovah duh ning he aa tlak lomi a si men lai. (1 Johan 5:14) Tahchunhnak ah, an fale biatak chung ah an um peng nakhnga Jehovah sinah thla an cammi nulepa kong kha ruathmanh. Mah cu aa tlakmi a lo kho men. Asinain Jehovah nih amah biak awkah ahohmanh a kan hnek lo. Kan fale i telin kan dihlak in amah biak awkah i thim hna seh ti a kan duh. (Deut. 10:12, 13; 30:19, 20) Cucaah nulepa nih an fale kha Jehovah dawt awk le amah hawi si awkah ṭha tein an cawnpiak khawh hna nakhnga kan bawm ti tu in Jehovah sinah thla an cam awk a si.—Ptb. 22:6; Efe. 6:4. w23.11 21 ¶5; 23 ¶12

Midang hnemh cu dawtnak langhter awkah zeicah a biapimi lam a si? Baibal cherhchanhmi cauk pakhat ning in Paul hmanmi “hnemh” timi bia nih “harnak a tongmi pawng ah dir in hnemh” kha a chim duhmi a si. Cucaah harnak a tongmi unau pakhat kan hnemh tikah zumhfek tein Jehovah a biak peng khawh nakhnga kan bawmhmi a si. Cun unau pakhatkhat kan hnemh hna fatin kan dawt hna ti kan langhtermi zong a si. (2 Kor. 7:6, 7, 13) Zaangfahnak le hnemhnak cu aa pehtlaimi a si. Zei ti lam in dah? Zaangfahnak a ngeimi pakhat nih midang kha hnemh a duh hna i anmah bawmh awkah thil cheukhat tuah a duh. Cucaah zaangfahnak kan ngeih hmasa lawng ah midang kha kan hnemh khawh hna lai. Midang cung ah Jehovah zaangfahnak a ngeihmi nih midang hnemh ding in a forh ning kong kha Paul nih a fianter. Paul nih Jehovah kha “zaangfahnak in a khatmi kan Pa, zeizong vialte ah a kan bawmtu” tiah a ti.—2 Kor. 1:3. w23.11 9-10 ¶8-10

Khrih zultu dihlak nih harnak kan tong lai tiah kan i ruahchan khawh. Lamkaltu Paul kong kha ruathmanh. Thessalon khuami hna sinah hitin a ti: “Nan sin i kan um lioah khan a hlankanpi in hremnak kan ing te lai tiah kan rak in chimhchung hna i nan hngalh bantuk in cu bantuk te cun nan cung ah a hung tlung taktak.” (1 Thes. 3:4) Cun Korin khuami hna sinah hitin a ti: “Kan cung i an kan khinhmi thil kha rak rit tuk, rak ngan tuk kaw, nun lai hmanh kan i ruah lo.” (2 Kor. 1:8; 11:23-27) Tuchan Khrihfa hna zong nih harnak cheukhat kan tong lai tiah an i ruahchan khawh. (2 Tim. 3:12) Jesuh na zumh i a hnu na zulh caah na hawile le na rualchan pawl nih puarhrangpi in an in pehtlaih men lai. Zei thil paoh ah ding fel tein na um caah na rianṭuannak ah harnak na tong maw? (Heb. 13:18) Midang sinah naa ruahchannak kong na chim caah cozahlei in ralchanhnak na tong maw? Asinain Paul nih zei bantuk harnak kan ton hmanh ah kan i lawmh peng awk a si tiah a ti. w23.12 10-11 ¶9-10

Jakob cu harnak tampi a tong. Jakob fapale pahnih Simeon le Levi nih an chungkhar min le Jehovah min kha an rak chiatter. Mah lengah Jakob nih a dawt tukmi a nupi Rachel cu a pahnihnak fa a ngeih lioah a rak thi. A fak tukmi mangṭam ruangah Jakob cu a tar hnuah Izipt ram ah a rak i ṭhial. (Gen. 35:16-19; 37:28; 45:9-11, 28) Buaibainak tampi lakah Jakob nih Jehovah le a biakam cung a zumhnak kha a hlaw bal lo. Cucaah Jehovah nih Jakob cungah mithmai ṭha a rak langhter. Tahchunhnak ah, Jakob cu Jehovah nih thilri chawva tampi a pek. A luancia kum tampi lioah a thi cang tiah a rak ruahmi a fapa Josef he an i ton ṭhan tikah Jakob cu Jehovah cungah zeitluk in dah aa lawmh lai ti khi ruathmanh! Jehovah he pehtlaihnak ṭha a ngeih caah a tonmi harnak hna kha a inkhawh. (Gen. 30:43; 32:9, 10; 46:28-30) Jehovah he pehtlaihnak ṭha kan ngeih peng ahcun kan i ruahchan lomi harnak hna kan ton hmanhah hlawhtling tein kan tei khawh lai. w23.04 15 ¶6-7

David nih Salm 23 ah Jehovah nih a dawt i a zohkhenh ti a zumhnak kong kha a langhter. Jehovah he an kar ah pehtlaihnak ṭha an ngeihmi kong kha a langhter i Jehovah kha ka tuukhal tiah a auh. Jehovah kha lam aa hruaiter i tling tein aa bochan caah ka him timi ruahnak a ngei. Jehovah nih a nun chung a cung ah dawtnak a langhter lai ti kha a hngalh. Zeinihdah cu bantuk zumhnak a ngeihter? A herhmi a pek zungzal caah David nih Jehovah nih a ka zohkhenh timi ruahnak a ngei. Jehovah he a ṭhami pehtlaihnak a ngei i a mithmai ṭha zong a hmu. Cucaah hmailei ah zei thil a ton hmanh ah Jehovah nih ka herhmi vialte a ka pek dih lai ti kha a zumh. Jehovah nih a ka dawt i a ka zohkhenh lai ti kha a zumh caah mah nih thinphan canah nuam te le lungsi hnangam tein um awkah a bawmh.—Salm 16:11. w24.01 29 ¶12-13

Vawlei Ralpi II thawk in Jehovah miphun pawl nih ram tampi ah zalong tein phung an hun chim khawh. Cucaah mi tampi nih Jehovah kong kha an hun hngalh. Tuchan i Uktu Bu pawl zong nih Khrih lamhruainak kha an i bochan peng rih. Jehovah le Jesuh nih lamhruainak an pekmi hna kha hngalh awkah an i zuam. Cun peng zohkhenhtu le Khrihfa upa pawl hmang in Khrihfabu kha lamhruainak an pek hna. Chiti thuhmi Khrihfa upa dihlak cu Khrih “orhlei kut” ah an um. (Biat. 2:1) Mah Khrihfa upa hna cu mitling lo le palhnak a tuahmi an si. Moses, Joshua le lamkaltu pawl zong a caan ah palhnak an rak tuah. (Nam. 20:12; Josh. 9:14, 15; Rom 3:23) Asinain zumhawk a tlakmi le a fimmi sal le rian pekmi Khrihfa upa pawl cu Khrih nih ṭha tein lamhruainak a pek hna ti kha fiang tein kan hmuh khawh. Cucaah hruaitu pawl hmang in Khrih nih lam a kan hruai ti zumh awkah a ruang tampi kan ngei. w24.02 23-24 ¶13-14

Tuchan zong ah Jehovah kan dawtnak le a cung ah kan i lawmhnak kong kan chimnak thawng in Jehovah kha kan thangṭhat khawh. Phung kan chim tikah kan hmuitinh cu mi nih Jehovah he an i naih nakhnga le dawtnak a ngeimi kan Pa kong he aa tlaiin kanmah bantuk in an ruah ve nakhnga bawmh kha a si. (Jeim 4:8) Cucaah Jehovah dawtnak, dinnak, ṭhawnnak le a dang a ṭha tukmi a sining hna Baibal ah zeitindah a langhter ti kha mi sinah lungtho tein kan hmuhsak hna. Kan si khawh chung in amah kan i zohchunhnak thawng in Jehovah kha kan thangṭhat i a lung kan lawmhter. Cutin kan tuah ahcun mi nih hi vawlei ṭha lo i mi pawl he kan i thleidan kha an hmuh lai i a ruang kha hngalh an hun duh lai. (Matt. 5:14-16) Cun kan i pehtlaihmi hna sinah cutin kan tuahnak a ruang kha kan chimh khawh hna. A phichuak cu lungthin ṭha a ngeimi hna kha Pathian sinah a hnuh hna lai. Mah lam hna in kan thangṭhat tikah Jehovah cu aa lawm.—1 Tim. 2:3, 4. w24.02 10 ¶7

Khrihfa patling si awkah hman awk a tlakmi thiamnak cawn a hau lai. Mah nih Khrihfabu ah rian ṭuan khawh awk, nangmah asiloah na chungkhar pawcawmnak caah vawlei lei rian ṭuan khawh awk le midang he a ṭhami pehtlaihnak ngeih awkah aan bawmh lai. Tahchunhnak ah ṭha tein ca rel thiam awk le ṭial thiam awkah cawng. Baibal ah aa nuammi le a hlawh a tlingmi pa nih cun nifatin Pathian Bia relnak le a relmi kong ruahnak ah a caan a pek tiah a ti. (Salm 1:1-3 rel.) Nifatin Baibal relnak thawng in Jehovah ruahning kha a hun hngalh lai. Mah nih ṭha tein khuaruah thiam awkah a bawmh lai. (Ptb. 1:3, 4) Unau pawl nih cawnpiak a thiammi le Baibal in ruahnak cheuhnak a pe khomi unaupa pawl kha an i bochan hna. Ṭha tein ca rel le ṭial na thiam ahcun a ṭha tukmi le zumhnak a fehtermi phungchimnak le a phi hna kha naa timhtuah khawh lai. Cun ṭha tein naa ṭialmi nih na zumhnak fehter awk le midang thazaang pek khawh awk zong ah aan bawmh lai. w23.12 26-27 ¶9-11

Ṭihnak na ngeih ahcun hmailei ah Satan a um ti lai lo caan le Jehovah nih thil a tuah dingmi kong kha ruat. 2014 pengkomh civui hmuhsaknak pakhat ah pa pakhat nih a chungkhar pawl kha 2 Timote 3:1-5 ah a langhtermi kong cu Paradis kong chimchungmi a si ahcun zei tluk in dah aa thleidan lai ti kha a ruah hna. Hitin a ti: “Vawlei thar cu a nuam tukmi hi bantuk caan hi a si lai. Midang zawn a ruat lomi, a hak a kau lomi, aa porhlaw lomi, lung a nemmi, nulepa nawl a ngaimi, lawmh a hngalmi, biaknak a upatmi, zaangfahnak a ngeimi, zawnruahnak a ngeimi, midang caah ṭhatnak bia a chim zungzalmi, midang duhnak a zulmi, ṭih a nung lomi, ṭhatnak a duhmi, hawile cung ah dawtnak a ngeimi, duhpaoh in khua a sa lomi, aa toidormi, nuamhnak nakin Pathian a duh deuhmi le biaknak a ṭanh taktakmi an si lai.” Nang tah na chungkhar asiloah zumtukhat unau pawl he vawlei thar nunnak zeidah a lawh lai ti kha nan i ruah bal hna maw? w24.01 6 ¶13-14

Jehovah cu a miphun pawl cung ah a lung a tling ti hngalh cu zeitluk in dah hnemtu a si. Baibal nih hitin a ti: “Jehovah nih a miphun kha a dawt hna.” (Salm 149:4, NWT) Asinain a caan ah mi cheukhat nih ‘Jehovah cu kan cung ah a lung a tling taktak hnga maw?’ tiah an ruah caah an lung a dong. Baibal chan lio ah Jehovah a biami zumhfekmi tampi zong a caan ah cu bantuk ruahnak an ngei ve. (1 Sam. 1:6-10; Job 29:2, 4; Salm 51:11) Baibal ah a tlinglomi minung nih Jehovah mithmai ṭha an hmuh khawh tiah fiang tein a langhter. Zeitindah a si khawh? Jesuh Khrih kan zumh kha kan langhter i tipil kan in a hau. (Johan 3:16) Mah cu kan sualnak kan i ngaichih i a duhnak tuah awkah Pathian sin ah bia kan i kam ti kha zapi hmai ah kan langhtermi a si. (Lam. 2:38; 3:19) Amah he a ṭhami pehtlaihnak ngeih awkah cutin kan tuah tikah Jehovah cu aa lawm tuk. Pumpeknak biakam ning in nun awkah kan si khawh chung in kan i zuam chung paoh cu Jehovah cu kan cung ah a lung a tling i a hawikom in a kan hmuh.—Salm 25:14. w24.03 26 ¶1-2

Vawlei nawlngeitu pawl nih an kan thlauh hmanhah phung kan chim pengnak thawngin zultu pawl kha kan i zohchunh khawh hna. Kannih zong Jehovah nih phungchim rian liim ding in a kan bawmh lai ti kha kan zumh khawh. Cucaah ralṭhatnak le fimnak caah thla kan cam khawh ve. Harnak inkhawh awkah Jehovah sinah bawmhnak hal. Kan lak i tam deuh cu pumsalei asiloah lungthinlei zuamcawhnak, dawtmi thihtaknak, chungkhar harsatnak, hremnak asiloah a dang buaibainak hna kan tong. Pulrai le raldohnak ti bantuk thil sining nih mah zuamcawhnak hna kha inkhawh awkah a harter chin. Na intuarnak kong kha a dikthliar in Jehovah sinah chim. Na hawikom ṭha sinah bia na chim bantukin na sining kha chim. Jehovah nih “aan bawmh lai” ti kha zum. (Salm 37:3, 5) Teima tein thlacamnak nih “harnak” inkhawh awkah a kan bawmh lai. (Rom 12:12) Jehovah nih amah a biami hna nih an tonmi thil kha a hngalh i “an aunak kha a theih.”—Salm 145:18, 19. w23.05 5-6 ¶12-15

A biapimi biakhiahnak tuah a herh tikah “Bawipa nih tuah hna seh ti” a kan duhmi kha kan hngalh a hau. (Efe. 5:17) Kan sining he aa pehtlaimi Baibal phunglam kan kawlmi cu Pathian ruahnak hngalh awkah kan i zuammi a si. Pathian phunglam kan zulh ahcun a ṭhami biakhiahnak kan tuah khawh lai. “Mi ṭha lo pa” a simi kan ral Satan nih Pathian rian ṭuan awkah a caan ngeih lo tiang in hi vawlei thil tuahnak ah an rian tam hna seh ti a kan duh. (1 Johan 5:19) Cucaah mi pakhat nih lam tampi in a ṭuan khawhmi Jehovah rian ṭuan can ah tangka, fimcawnnak le rian tu kha biapi ah a hun chiah khawh. Cutin a tuah ahcun vawlei ruahnak a hun ngei ti a langhtermi a si. Mah thil hna cu a palhmi an si lo nain kan nunnak ah mah kha pakhatnak ah kan chiah awk a si lo. w24.03 24 ¶16-17