Penerang ke Bup Kereja Pengidup enggau Pengawa Kristian
© 2025 Watch Tower Bible and Tract Society of Pennsylvania
7-13 JULAI
RETA ARI BUP KUDUS JAKU-DALAM 21
Jaku Lalau ti Bepenemu-Dalam Kena Tikah ti Lantang
w03-E 10/15 4 ¶5
Baka Ni Nuan Ulih Ngaga Pemutus ti Manah?
Pemutus ke digaga enggau berumban kesuah iya ulih berubah enggau jampat nyadi siti pemutus ti enda manah. Jaku-Dalam 21:5 nangkan: “Pelan ke digaga orang ke rajin tentu deka mujur, tang orang ke beguai-guai ngereja utai deka nyadi miskin.” Ambika chunto, bala remaja ti keran deka kawin patut ngena awak ti chukup berunding dulu sebedau ngaga pemutus nya. Enti sida enda ngereja tu, sida engka ngasaika pemendar utai ti dipadah William Congreve, siku penulis drama English ba pun abad ke-18: “Enti kitai berumban kawin, maya kitai bisi awak berundingka nya dudi hari, kitai engka nesalka pemutus nya.”
Anang Ngumbai Diri Pama Agi Ari ti Patut
3 Jehovah deka laki bini berasai lantang ba tikah sida. Taja pia, ketegal enda sempurna, penanggul ulih nyadi ba tikah. Ke amat Paul bisi nulis, orang ke jadi melaki-bini deka dituntung penusah. (1 Kor. 7:28) Sekeda orang engka suah belaya enggau kaling pengidup sida empu, sereta ngumbai diri enda ulih idup begulai. Enti sida nitihka runding dunya, sida deka ngenuluka pengelantang ba diri empu lalu ngumbai sarak nya chara ti pemadu manah.
4 Kitai anang ngumbai tikah kitai enda mujur. Kitai nemu Bup Kudus semina ngemendarka sarak enti seiku ari kaling pengidup butang. (Mat. 5:32) Nya alai, lebuh bisi penanggul ba tikah, anang nejuka ati ti sumbung ngasuh kitai berunding: ‘Aku ngasaika enda dikeibuhka sereta enda dikerinduka kaling aku. Engka manah agi aku ngiga orang bukai.’ Enti kitai berunding baka nya, reti nya kitai berundingka diri empu sereta enda berundingka kaling pengidup kitai. Orang ba dunya deka nuan ngumbai sarak nya enda salah. Pia mega sida meransang nuan nitihka ati diri lalu ngereja utai ti ngasuh nuan gaga ati. Tang Bup Kudus ngasuh kitai: “Anang semina berundingka diri empu aja, tang berunding mega ke orang bukai.” (Plp. 2:4) Jehovah deka nuan negapka tikah nuan, ukai sarak. (Mat. 19:6) Iya deka ke nuan berundingka asai ati Iya, ukai berundingka asai ati diri.
5 Laki bini patut rindu sereta bebasaka pangan diri. (Bacha Epesus 5:33.) Bup Kudus ngajar kitai, meri manah agi ari ke nerima. (SKR. 20:35) Nama kualiti ke ulih nulung laki bini ngayanka pengerindu sereta basa? Iya nya baruh ati. Laki bini ke baruh ati enda berundingka diri empu, tang “berundingka” kaling pengidup sida.—1 Kor. 10:24.
w06-E 9/15 28 ¶13
“Lantang Ati Diau enggau Bini ke enggau Nuan Jadi”
13 Baka ni enti tikah napi penanggul ketegal chara laki bini ngintu pangan diri? Kena mutarka penanggul tu, nya begunaka usaha. Ambika chunto, laki bini engka suah ngena jaku ti enda manah ngagai pangan diri, lalu tu udah nyadi utai ti biasa ba tikah seduai iya. (Jaku-Dalam 12:18) Baka ke dipadah ba artikel ke sebedau tu, utai ke baka tu ulih mai kesan ti enda manah ngagai tikah. Siti ayat Bup Kudus madahka: “Manah agi diau ba menua puang, ari ke diau begulai enggau bini ke udu kutap-kutap sereta jampat ringat.” (Jaku-Dalam 21:19) Enti nuan siku bini ba tikah ke baka nya, tanya meh diri empu: “Kati ulah aku ngasuh laki aku tusah begulai enggau aku?” Bup Kudus madahka tu ngagai bala laki: “Kita ke laki, terus meh rinduka bini kita, lalu anang balat ringat ngagai sida.” (Kolosi 3:19) Enti nuan siku laki, tanya meh diri empu: “Kati aku enda ngayanka penyayau ngagai bini aku, nyentukka bini aku ngiga penyayau ari orang bukai?” Endang amat, tu ukai siti alasan ke ngemendarka sesiku orang ngereja pengawa butang. Tang, utai ke baka tu ulih nyadi. Nya alai, manah enti laki bini berandauka utai tu secara terus terang.
Penemu Bup Kudus ti Berega
Kitai Nyembah Petara Ketegal “Pemesai Pengasih Iya”
16 Semua orang Kristian bebendar deka neladan pengasih Jehovah. Nama kebuah? Siti kebuah nya, Jehovah enggai mendingka sampi orang ti enggai nunjukka pengasih ngagai orang bukai. (Bacha Jaku Dalam 21:13.) Semua kitai tentu enggai Jehovah nulak sampi kitai. Nya alai, kitai enggai kasar enggau orang ke begunaka pengasih. Lebuh seiku menyadi Kristian benung napi pemerinsa lalu deka madahka asai ati iya ti tusah nya, kitai enda tau enda “mendingka sabak” orang nya. Sama mega, kitai deka ingatka ayat tu: “Iya enda ngayanka pengasih ngagai orang ke enda ngayanka pengasih ngagai orang bukai.” (Jas. 2:13) Enti kitai belemati enggau dalam pemesai pengasih ke diguna kitai, kitai mega deka diperansang nunjukka pengasih. Kelebih agi, kitai deka nunjukka pengasih lebuh orang ke bedosa ti udah nesal ati pulai baru ngagai eklisia.
14-20 JULAI
RETA ARI BUP KUDUS JAKU-DALAM 22
Jaku Lalau ti Bepenemu-Dalam lebuh Ngemesaika Anak
Kati Anak Nuan Nyembah Jehovah enti Sida Udah Besai?
7 Enti nuan udah kawin sereta deka bisi anak, tanya diri empu: ‘Kati aku orang ke baruh ati ke rinduka Jehovah sereta Jaku Iya? Kati Jehovah arapka aku megai tanggung pengawa nyadi apai indai?’ (Mas. 127:3, 4) Enti nuan apai indai, tanya diri empu: ‘Kati aku ngajar anak aku bagas gawa?’ (P-jar. 3:12, 13) ‘Kati aku enggau naka ulih nyaga anak aku ari utai ti tau nganu ba dunya Sitan?’ (J-lam. 22:3) Nuan enda ulih nyaga anak nuan ari semua penanggul ke deka ditapi sida. Tang nuan ulih nulung sida bepanggai ba Bup Kudus lebuh napi penanggul. (Bacha Jaku Dalam 2:1-6.) Ambika chunto, enti diri sebilik nuan badu nyembah Jehovah, tulung anak nuan meda ari Bup Kudus kebuah iya patut tetap ati ngagai Jehovah. (Mas. 31:23) Tauka enti orang ke dikesayauka nuan udah nadai, tunjuk ayat Bup Kudus ngagai anak nuan ke ulih nulung sida mutarka asai ati ti tusah sereta bulih pengelantang.—2 Kor. 1:3, 4; 2 Tim. 3:16.
Apai Indai—Latih Anak Kita Rinduka Jehovah
17 Latih anak kenyau ari agi mit. Endang manah enti apai indai ngelatih anak sida tumu agi. (J-lam. 22:6) Peratika chunto Timoti. Lebuh iya udah besai, iya begulai nginjil enggau Paul ngagai endur bukai. Indai iya Eunis, enggau ini iya Lois, ngelatih iya kenyau ari iya agi mit.—2 Tim. 1:5; 3:15.
18 Bisi sepasang agi laki bini ari Côte d’Ivoire ke benama Jean-Claude enggau Peace. Seduai iya ulih ngemesaika enam iku anak seduai iya rinduka Jehovah lalu deka nyembah Iya. Nama nulung seduai iya mujur ngelatih anak? Seduai iya nitihka teladan Eunis enggau Lois. Ku seduai iya madah: “Kami ngajar anak Bup Kudus kenyau ari sida agi mit, enda lama pengudah sida ada.”—U-dat. 6:6, 7.
19 Nama reti “ngajar” anak nuan Bup Kudus? Ba bup Ulang Adat 6:7, leka jaku “ngajar” dalam jaku Hebrew mai reti “nandu” utai ke diajar. Ngambika ulih ngereja tu, apai indai patut ngatur jam ngajar anak enggau tetap. Kadang-kadang, apai indai engka berasai enda diperansang laban sida patut nandu utai ke diajar ngagai anak sida. Taja pia, apai indai ulih ngena peluang tu nulung anak sida meretika Bup Kudus lalu nitihka utai ti udah dipelajar.
w06-E 4/1 9 ¶4
Apai Indai—Nyadi meh Teladan ti Manah ke Anak Nuan
Endang amat, sekeda anak mit engka bingking, indah tusah deka ninga jaku. (Pemungkal 8:21) Nama ulih digaga apai indai? Bup Kudus madahka: “Anak mit endang selalu deka ngereja utai ti beli, tang rutan ulih muai pemeli nya.” (Jaku-Dalam 22:15) Sekeda orang ngumbai jaku lalau tu kelalu kasar sereta enda ulih dikena agi. Kebendar iya, Bup Kudus nulak ulah ti kasar sereta sebarang penderaan. Kekadang leka jaku “rutan” mai reti amat-amat dirutan. Tang tu mega ngambarka kuasa tauka hak apai indai kena ngemetulka bala anak enggau tegas, tang ba maya ti sama sida ngereja nya enggau bepengerindu sereta enggau lengkas. Kebuah apai indai ngereja tu ketegal sida ibuhka bala anak.—Hebrew 12:7-11.
Penemu Bup Kudus ti Berega
Gaga Ati enggau Pengawa ke Ulih Digaga Nuan ke Jehovah
11 Pia mega, kitai ulih gaga agi ati lebuh kitai bebendar ngereja pengawa ke diberi ngagai kitai dalam gerempung Jehovah. Mengkang kisuk meh ba pengawa nginjil, lalu bebendar gawa ba eklisia. (SKR. 18:5; Heb. 10:24, 25) Besedia enggau manah sebedau begempuru ngambika ulih meri saut ti meransang. Lebuh nuan diberi begian ba gempuru tengan minggu, kereja meh nya enggau manah. Enti nuan dipinta nulung ngereja pengawa ba eklisia, tembuka pengawa nya ba maya ti ditetapka lalu nunjukka diri ulih dikearapka. Anang ngumbai pengawa ke diberi ngagai nuan nya nadai reti sereta tau dikereja pia-pia aja. Uji enggau naka ulih ngemansangka pengelandik nuan. (J-lam. 22:29) Majak nuan bebendar gawa ke Jehovah, rapat agi kaul nuan enggau Iya sereta gaga agi ati nuan. (Gal. 6:4) Enggau nya, nuan senang agi gaga ati lebuh orang bukai nerima pengawa ke dikinginka nuan.—Rom. 12:15; Gal. 5:26.
21-27 JULAI
RETA ARI BUP KUDUS JAKU-DALAM 23
Prinsip ti Bepenemu-Dalam pasal Ai Bisa
w04-E 12/1 19 ¶5-6
Ngembuan Runding ti Seimbang pasal Ai Bisa
5 Baka ni enti sesiku orang udu ngirup ai bisa, tang bejimat ngambika enda dipeda mabuk? Sekeda orang ulih ngirup mayuh ai bisa tang enda berupai mabuk. Taja pia, orang ke suah ngereja utai tu lalu ngumbai nya enda bahaya, kebendar iya benung nipu diri empu. (Jeremiah 17:9) Nyau kelama, sida engka deka bepanggai ba ai bisa lalu nyadi “gian ngirup mayuh [ai bisa].” (Titus 2:3) Bekaul enggau proses nyadi orang ke gian ngirup ai bisa, siku pengarang ke benama Caroline Knapp madahka: “Proses nya nyadi enggau belubah-lubah, sereta tanpa disedari.” Au, kelalu balat ngirup ai bisa nya panjuk ke amat bahaya!
6 Peratika mega jaku tangkan Jesus: “Bejimat kita enggaika ati kita kelalu balat ditekan ketegal kelalu bendar makai enggau ngirup sereta irauka pengidup, nyentukka hari nya ngenyit ninggang kita baka panjuk. Laban hari nya deka ninggang semua orang ke diau ba serata dunya.” (Luke 21:34, 35) Sesiku orang ulih ngelu pala sereta lembau, ba fisikal sereta pengarap, indah sebedau iya ngirup nyentukka mabuk. Nyadi, baka ni enti hari Jehovah datai lalu tetemuka iya baka nya?
Titihka Runding Petara pasal Ai Bisa
4 Tang kitai bisi iring ti manah ari Petara ke ngaga kitai. Ambika chunto, Iya udah madahka kitai empas iya enti kitai udu ngirup. Kitai engka bisi macha ba Jaku-Dalam 23:29-35 pasal siku orang ke pengirup sereta sekeda penanggul ke nyadi ketegal nya. Daniel, siku tuai gempuru ba Eropah, ngenang baru pengidup iya sebedau iya belajar pasal Jehovah. Ku iya: “Suba, aku udu ngirup ai bisa, lalu nya ngujungka aku ngaga pemutus ti enda manah. Ketegal nya, mayuh utai ti enda manah nyadi ba aku. Lalu lebuh aku ngenangka nya baru, aku agi berasai tusah ati.”
Penemu Bup Kudus ti Berega
‘Beli Pemendar, lalu Anang Nyual Iya’
4 Bacha Jaku Dalam 23:23. Kitai patut bebendar belajarka pemendar ari Bup Kudus. Kitai engka ngelengkaka utai bukai ngambika bulih pemendar. Lalu pengudah ‘meli pemendar,’ iya nya, belajarka pemendar, kitai enda tau enda bejimat ngambika enda ‘nyual iya,’ iya nya, ninggalka pemendar. Baka ni kitai ‘meli’ pemendar ari Bup Kudus? Berapa rega iya? Saut ngagai dua iti tanya tu deka nulung kitai ngumbai pemendar nya berega agi lalu enggai ninggalka iya. Kitai deka meretika kebuah pemendar ari Jehovah nya jauh berega ari utai bukai.
5 Utai ti dikumbai pechuma ukai reti nya nuan enda ibuh ngereja sebarang utai kena ngulihka iya. Leka jaku “beli” dalam jaku Hebrew ke disalin ba Jaku Dalam 23:23 ulih mega mai reti “bulih.” Kedua-dua leka jaku tu nunjukka orang patut bebendar tauka ngelengkaka utai bukai ngambika bulih utai ti dikumbai iya berega. Ngambika nemu baka ni kitai ulih meli pemendar, uji gambarka: Ba makit orang bisi meri buah pisang pechuma. Kati buah pisang nya ulih datai kediri ba atas mija kitai? Enda. Kitai patut ngagai makit lalu mai pisang nya pulai. Nya alai taja pan buah pisang nya pechuma, kita patut bebendar ngulihka sida. Pia mega, kitai enda begunaka duit belajarka pemendar. Tang kitai enda tau enda bebendar ngulihka pemendar lalu bisi utai ke patut dilengkaka.
28 JULAI–3 OGOS
RETA ARI BUP KUDUS JAKU-DALAM 24
Tegapka Pengarap Nuan ngambika Ulih Napi Situasi ti Tusah
“Kita Patut Tegap, Enda Bekinsit”
15 Belajar sereta belematika Jaku Petara. Siti pun kayu ulih bediri tegap enti iya bisi urat ti dalam. Nyadi enti kitai bisi pengarap ti tegap ba Jehovah, kitai ulih mengkang bediri tegap. Lebuh pun kayu nya majak besai, urat iya deka majak dalam sereta ngerembai enggau jauh agi. Lebuh kitai belajar sereta belemati, kitai deka negapka agi pengarap kitai sereta yakin agi chara Petara nya chara ti pemadu manah. (Kol. 2:6, 7) Perundingka chara Jehovah ngiring, ngelalau, sereta nyaga nembiak Iya kelia. Ambika chunto, ba siti genera, Esekiel beratika siku melikat enggau bejimat nyukat Rumah Sembiang. Genera tu negapka agi pengarap Esekiel, lalu tu ngajar kitai sekeda utai ti praktikal pasal chara kitai ulih ngetanka standard Jehovah bekaul enggau sembah ti tuchi. (Esk. 40:1-4; 43:10-12) Kitai mega bulih penguntung lebuh kitai ngena awak belajar sereta belematika utai ti dalam agi ba Jaku Petara.
w09-E 12/15 18 ¶12-13
Mengkang Gaga Ati taja pan Napi Penanggul
12 Ayat Bup Kudus madahka: “Enti nuan asa ati lebuh dituntung penusah, pengering nuan deka kurang.” (J-lam. 24:10) Siti agi ayat Bup Kudus madahka: “Ati ti gaga ngasuh mua tuchum, tang ati ti pedis ngasuh putus asa.” (J-lam. 15:13) Sekeda orang Kristian balat asa ati nyentukka sida badu agi macha Bup Kudus sereta belematika Jaku Petara. Sida enda agi bebendar besampi ari ati, lalu sida engka ngenyauhka diri ari bala menyadi Kristian. Nyadi, enti kitai mengkang asa ati, nya amat bahaya.—J-lam. 18:1, 14.
13 Taja pia, ngembuan runding ti positif ulih nulung kitai befokus ba utai ba pengidup ti ngagaka ati sereta ngelantangka ati kitai. David nulis: ‘Naka meh pengerindu ati aku ngereja peneka Nuan, O Petara aku!’ (Mas. 40:8) Lebuh utai ti enda manah nyadi ba pengidup kitai, anang meh ngetu ngereja pengawa rohani. Kebendar iya, ngereja pengawa ke ngagaka ati nya ubat ke nulung kitai mutarka asai tusah ati. Jehovah madah, kitai ulih tetemuka pengaga ati enggau pengelantang lebuh kitai seruran macha sereta belematika Jaku Iya. (Mas. 1:1, 2; Jas. 1:25) Ari Bup Kudus enggau gempuru Kristian, kitai nerima “jaku ti ngelantangka ati,” ke ulih ngeringka kitai sereta ngasuh ati kitai gaga.—J-lam. 12:25; 16:24.
Tanya Ari Pemacha
Jaku Dalam 24:16 madah: “Orang ke lurus ati nyangka rebah tujuh kali, lalu sida angkat baru.” Kati ayat tu dituju ngagai orang ke suah ngereja dosa tang udah nya diampunka Petara?
Kebendar iya, ukai baka nya. Ayat tu dituju ngagai orang ke rebah ketegal ditinggang mayuh penanggul, tang ulih angkat baru laban iya mujur tan napi penanggul nya.
Nya alai kitai ulih nyimpulka leka jaku “rebah” ba Jaku Dalam 24:16 ukai ditujuka ngereja dosa. Tang dituju ngagai penanggul ke ditapi kitai baka penanggul ba pengerai, diperinsa perintah mensia tauka penanggul bukai. Tang kitai ulih arapka Petara nyukung sereta nulung kitai mujur napi penanggul nya. Nama kebuah? Laban “[Jehovah] nulung orang ke dituntung penusah. Iya ngangkatka orang ke udah rebah.”—Mas. 145:14-19; 41:1-3.
Penemu Bup Kudus ti Berega
Pengawa Melaki-bini—Pemeri Ari Petara
13 Enti nuan deka kawin, perundingka tanya tu, “Kati aku amat udah sedia?” Aram kitai ngiga saut ke tanya tu.
14 Bup Kudus madahka lelaki enggau indu bisi tanggung pengawa ti enda sebaka. Enti nuan seiku lelaki, nuan patut nentuka diri udah sedia nyadi tuai bilik. Jehovah deka laki nyediaka utai ti diguna bini enggau bala anak sereta nyaga emosi sida. Tang beguna agi, laki enda tau enda ngiring diri sebilik nyembah Jehovah. Bup Kudus nerangka lelaki ti enda nyaga ruang bilik iya, “jai agi ari orang ke enda arap.” (1 Timoti 5:8) Nya alai, enti nuan deka kawin, perundingka jaku lalau Bup Kudus tu: “Sediaka pengawa nuan di luar, sediaka umai nuan; udah nya baru nuan nirika rumah.” Reti iya, sebedau nuan kawin, tentuka nuan ulih megai tanggung pengawa ti diberi Jehovah.—Jaku Dalam 24:27.
15 Enti nuan seiku indu, nuan patut nentuka diri udah sedia megai tanggung pengawa nyadi bini sereta indai. Bup Kudus bisi nerangka baka ni bini ti manah nyaga laki sereta anak iya. (Jaku Dalam 31:10-31) Kemayaharitu, mayuh orang semina berundingka utai ke dikingin ari kaling sida. Tang Jehovah deka kitai berundingka utai ke ulih diberi kitai ngagai kaling pengidup.
4-10 OGOS
RETA ARI BUP KUDUS JAKU-DALAM 25
Prinsip ke Ulih Nulung Kitai Bejaku enggau Manah
Ngena Kuasa Dilah enggau Manah
6 Nama kebuah nya beguna milih maya ti ngena endur bejaku? Jaku-Dalam 25:11 madahka: “Penemu ti terang disebut sebaka enggau emas ti disangkumka enggau pirak.” Emas endang utai ti manah, tang iya engka manah agi enti disengkaum enggau perak. Pia mega, kitai engka bisi utai manah ti deka dipadahka ngagai orang bukai. Tang enti kitai milih maya ti ngena endur bejaku, kitai ulih nulung orang nya enggau mayuh agi. Baka ni kitai ulih ngereja tu?
7 Enti kitai bejaku ba maya ti salah, orang engka enda meretika tauka enggai nerima utai ti disebut kitai. (Bacha Jaku-Dalam 15:23.) Chunto, kena bulan Mac 2011, tanah berenyang enggau tsunami udah ngerusakka mayuh nengeri ba timur menua Jipun. Lebih ari 15,000 iku orang udah mati. Mayuh ari bala Saksi-Saksi Jehovah udah lenyau diri sebilik sereta bala kawan. Taja pia, sida deka ngena Bup Kudus nulung orang bukai ke napi penusah ti sama. Tang sida nemu mayuh ari orang nya megai pengarap Buddha, lalu nemu mimit aja pasal Bup Kudus. Ari ke madah ngagai orang pasal peluang pengangkat ari mati, bala menyadi Kristian kitai ngelantangka ati sida sereta nerangka kebuah penusah besai nya nyadi ba orang ke manah.
Ngena Kuasa Dilah enggau Manah
15 Chara kitai bejaku enggau orang bukai mega patut dikemeratka. Orang rindu mendingka Jesus laban iya bejaku enggau chara ti ‘manah,’ tauka nelap. (Luk. 4:22) Lebuh kitai bejaku enggau chara ke nelap, orang deka rindu agi mending sereta nerima utai ti disebut kitai. (J-lam. 25:15) Kitai ulih bejaku enggau orang bukai enggau chara ti nelap, enti kitai bebasaka sida sereta ibuhka asai ati sida. Nya meh digaga Jesus. Chunto, lebuh iya meda orang mayuh bebendar deka mendingka iya, iya balat gaga ati ulih meri awak begulai enggau sida sereta ngajar sida. (Mrk. 6:34) Indah lebuh orang ngeleseka Jesus, iya enda malas sida.—1 Pet. 2:23.
16 Taja pan kitai sayauka diri sebilik sereta bala kawan, tang kitai engka nyebut utai ke enda manah ngagai sida laban kitai ngelala sida. Kitai engka ngumbai kitai enda patut bejimat lebuh kitai bejaku enggau sida. Tang Jesus enda kala nyebut utai ke enda manah, lebuh iya bejaku enggau bala kawan iya. Lebuh sekeda ari sida bekelikuhka pasal sapa ke pemadu besai, iya ngemetulka sida enggau chara ti nelap. Iya ngena seiku anak mit nyadika chunto kena nulung sida ngubah chara sida berunding. (Mrk. 9:33-37) Bala tuai gempuru ulih neladan Jesus, lebuh sida meri jaku lalau enggau nelap ngagai orang bukai.—Gal. 6:1.
“Bebendar Agi” Meransang Pangan Diri
10 Ukai semina bala tuai gempuru aja ke patut meransang orang bukai. Paul ngasuh semua orang Kristian ngena “jaku ti manah kena ngemansangka pengarap orang, ba maya ti patut, ngambika jaku nya meri berekat” ngagai orang ke ninga. (Eps. 4:29) Tiap iku kitai patut nemu utai ke diguna orang bukai ngambika ulih nulung sida. Paul nulis surat nuju orang Kristian ke ngena jaku Hebrew: “Nya alai, kedarka jari kita ti lelak, lalu keringka patung kita ti lemi, lalu gaga jalai kita rurus, ngambika kaki ti lemi enda selau, tang digeraika.” (Heb. 12:12, 13) Semua kitai ulih ngering sereta meransang pangan diri ngena jaku, taja pan kitai agi biak.
Penemu Bup Kudus ti Berega
Kena meh Jam Nuan enggau Badas
3 Bisi siti agi utai ke ulih ngachau awak kitai enggau Jehovah. Ambika chunto, kitai tentu begunaka awak endur belelak. Utai ke digaga kitai maya belelak nya engka manah. Tang enti kitai ngena kelalu mayuh jam ba pengawa nya, kitai engka nadai entu awak endur nyembah Jehovah. Kebendar iya, bisi agi pengawa bukai ke enda salah. Tang enti kitai enda bejimat, jam ke dikena ba pengawa nya ulih ngachau awak kitai enggau Jehovah.—J-lam. 25:27; 1 Tim. 4:8.
11-17 OGOS
RETA ARI BUP KUDUS JAKU-DALAM 26
Seliahka Diri ari “Orang ti Beli”
it-2-E 729 ¶6
Ujan
Musin. Ba Menua ti Udah Disemaya bisi dua iti musin ti utama. Siti nya musin panas tauka ulih dikumbai musin rangkai, lalu siti da agi musin chelap tauka ulih dikumbai musin ujan. (Banding Ms 32:4; Pdai 2:11) Kira ari tengan bulan April nyentuk ngagai tengan bulan Oktober mimit aja ujan. Jarang bisi ujan ba timpuh tu alai pengawa ngetau dipejalaika. Jaku-Dalam 26:1 nunjukka ujan maya musin ngetau amat nyelai. (Banding 1Sa 12:17-19.) Maya musin ujan, ujan enda nurun ninting hari. Bisi maya iya, mua hari manah. Ketegal maya nya musin chelap, enti tekenaka ujan, nya ulih ngasuh orang berasai amat chelap nyentukka getar-getar. (Ezr 10:9, 13) Nyadi, endur ti ulih ngelindung sida ari berasai chelap amat berega.—Isa 4:6; 25:4; 32:2; Jop 24:8.
w87-E 10/1 19 ¶12
Ketegal Disiplin, Pemaik Diulih
12 Sekeda orang engka patut dilalau enggau keras agi. Baka ke dipadah ba Jaku-Dalam 26:3: “Penyipat ke kuda, kekang ke keledai, lalu rutan ke orang ti beli.” Kekadang, Jehovah nejuka orang bansa Israel ditinggang penusah ke datai ari pemeli sida empu. Bup Kudus madahka: ‘Sida udah angkat ngelaban pesan Petara ti Pemadu Bekuasa lalu udah nulak ajar Iya. Sida nyau lembut tulang laban bebendar gawa. Sida rebah, lalu nadai orang nulung. Udah nya lebuh sida kena laban penusah, sida ngangauka Jehovah, lalu Iya ngelepaska sida ari penusah sida.’ (Masmur 107:11-13) Taja pia, sekeda orang ke beli ke kieh nyentukka nadai jaku lalau pan ke ulih nulung sida. Bup Kudus madahka: “Taja pan dirara bekali-kali tang orang nya agi ga degil, iya deka ngenyit dianchurka lalu enda ulih ditulung agi.”—Jaku-Dalam 29:1.
it-2-E 191 ¶4
Timpang Kaki
Sebagai jaku sempama. Raja Solomon ti bepenemu-dalam madahka: “Orang ke ngandalka orang ke beli ngereja sesiti pengawa, baka orang ke ngelumpuhka kaki diri [ke ulih ngasuh iya timpang] lalu ngemediska diri empu.” Au, orang ke ngandalka orang ke beli kena ngereja sebarang pengawa kebendar iya benung ngelumpuhka diri empu. Iya tentu deka meda pengawa ke diperambu iya gagal, lalu tu deka ngerugika iya empu.—Jlam 26:6.
Penemu Bup Kudus ti Berega
Kita ke Nembiak, Tegapka Meh Pengarap Kita
16 Kingatka, kitai enggai bekelikuh enggau orang. Kitai deka sida rindu berandau enggau kitai sereta belajarka Bup Kudus. Nya alai, tanya sida enggau bebasa, udah nya dingaka sida enggau bejimat. Lebuh nuan madahka utai ti dipechaya nuan ngagai orang, padahka nya enggau bebasa, kelebih agi enti orang nya tuai agi ari nuan. Enti nuan bebasaka orang bukai, sida mega deka bebasaka nuan. Lalu sida deka alit ati laban nuan udah berundingka enggau dalam pasal utai ti dipechaya nuan taja pan nuan agi biak. Endang amat, enti orang semina deka bekelikuh tauka ngeleseka nuan, nuan tau enda ibuh nyaut iya.—J-lam. 26:4.
18-24 OGOS
RETA ARI BUP KUDUS JAKU-DALAM 27
Penguntung ke Diulih ari Kaban ti Bendar
Jehovah Rinduka Nembiak Iya ti Baruh Ati
12 Orang ke baruh ati beterima kasihka jaku lalau ke diberi. Ambika chunto: Gambarka nuan ba palan gempuru. Sepengudah berandau enggau beberapa iku menyadi, seiku ari sida narit nuan ke tisi lalu belalai madahka bisi pemakai lekat ba ngeli nuan. Nuan tentu berasai malu lebuh iya munyi nya. Taja pia, nuan beterima kasih ngagai iya. Indah, nuan ngarapka iya tumu agi madah ngagai nuan! Pia mega, kitai patut baruh ati lalu beterima kasih lebuh menyadi Kristian meri kitai jaku lalau. Kitai ngumbai iya bakih kitai, ukai munsuh.—Bacha Jaku Dalam 27:5, 6; Gal. 4:16.
it-2-E 491 ¶3
Kaban ti Rapat
Tang bup Jaku-Dalam meransang kitai ngambika pechaya sereta arapka siku kaban ti rapat, lalu ngiga iya ba maya kitai begunaka tulung. Jaku-Dalam nya madahka: “Anang enda ibuhka kaban nuan tauka kaban apai nuan, lalu anang tama ngagai rumah menyadi kandung nuan lebuh nuan bisi penusah; kaban ti rapat [sha·khenʹ] manah agi ari menyadi kandung diri ti jauh.” (Jlam 27:10) Ba ayat tu, reti ku penulis nya, siku kaban ti rapat amat berega sereta ulih dikeandalka lebuh kitai begunaka tulung, lebih agi ari menyadi kandung. Enti sema menyadi kandung nya diau ba endur ti jauh, iya engka enda entu ulih nulung baka ke ulih dikereja kaban ti rapat.
Bala Nembiak—Pengidup ti Baka Ni ke Deka Dikembuan Nuan?
7 Joas ngaga pemutus ti enda manah lebuh iya milih bala kaban. Nya alai, kitai belajar, kitai patut milih kaban ti manah, iya nya sida ke rinduka Jehovah sereta deka ngasuh Iya gaga ati. Bala kaban ke baka tu nulung kitai ngereja utai ti manah. Kitai ulih bekaban enggau sida ke tuai agi tauka biak agi ari kitai. Ingat meh, Joas jauh biak agi ari kaban iya, Jehoiada. Lebuh nuan deka milih bala kaban, tanya diri empu: ‘Ulih sida nulung aku negapka pengarap aku ngagai Jehovah? Kati sida bebendar deka ngasika Jehovah, lalu meransang aku ngereja utai ti sama? Kati sida bisi bejaku pasal Jehovah enggau utai ke dipelajarka sida ari Bup Kudus? Kati sida meri aku jaku lalau lebuh aku begunaka nya?’ (J-lam. 27:5, 6, 17) Seliahka meh ari bekaban enggau sida ke enda rinduka Jehovah. Tang, enti bala kaban nuan rinduka Jehovah, anang sekali-kali ninggalka sida laban sida deka seruran nulung nuan.—J-lam. 13:20.
Penemu Bup Kudus ti Berega
Kingatka meh, Jehovah Endang ‘Petara ti Idup’
9 Lebuh kitai napi penguji, kitai patut betumpu ba utai ti pemadu penting. Sitan madahka, lebuh kitai napi penanggul, kitai deka ninggalka Jehovah. Nyadi, reaksi kitai lebuh ditinggang penanggul mai kesan ngagai asai ati Jehovah. (Jop 1:10, 11; bacha Jaku-Dalam 27:11.) Lebuh kitai mengkang tetap ati ngagai Jehovah taja pan napi penanggul, kitai nunjukka diri rinduka Jehovah, lalu kitai ulih nunjukka Sitan nya pemula. Kati nuan benung napi sakal ari perintah, napi penanggul ba ekonomi, orang ba endur alai nuan nginjil enda ngayanka minat ngagai pesan ke dibai nuan, tauka nuan benung napi penanggul ke bukai? Enti pia, ingat meh, nuan bisi peluang ngena situasi nuan ngagaka ati Jehovah. Kingatka mega, Jehovah enda sekali-kali nejuka nuan napi penguji ke enda ulih ditatka nuan. (1 Kor. 10:13) Iya tentu deka meri nuan pengering kena betan.
25-31 OGOS
RETA ARI BUP KUDUS JAKU-DALAM 28
Bida entara Orang ke Jai enggau Orang ke Lurus
w93-E 5/15 26 ¶2
Kati Nuan Nitihka Jehovah enggau Pengabis Ati?
“ORANG ke lurus berani baka singa.” (Jaku-Dalam 28:1) Sida ngayanka pengarap, enggau andal bepanggai ba Jaku Petara, sereta enggau berani ngereja pengawa ke Jehovah taja pan napi utai ti bahaya.
it-2-E 1139 ¶3
Nemu Meretika Utai
Sida ke limpang ari Pun penemu. Orang ke berengkah ngereja penyalah belubah-lubah enda bepanggai ba Petara lebuh ngaga pemutus tauka pelan. (Jop 34:27) Orang ke baka nya nejuka ati iya ngasuh iya enda meda penyalah diri lalu lenyau penemu. (Ms 36:1-4) Taja pan iya madah iya nyembah Petara, tang iya ngenuluka sereta rindu agi ke runding mensia, ukai runding Petara. (Isa 29:13, 14) Iya meri mayuh alasan lalu madah, pengawa iya ti ngemaluka baka “utai ke dimain” aja. (Jlam 10:23) Runding iya majak limpang sereta beli, nyentukka iya ngumbai Petara enda nemu tauka enda ulih meda penyalah iya, baka ke Petara enda agi nemu berunding. (Ms 94:4-10; Isa 29:15, 16; Jer 10:21) Ari ulah iya, iya baka ke madah: ‘Jehovah endang sigi nadai!’ (Ms 14:1-3) lalu enda ibuhka Iya. Ketegal orang nya enda nitihka prinsip Petara, iya enda ulih meretika utai enggau manah, meda sesiti pekara enggau terang, berundingka semua utai ke bisi kaul, sereta ngaga pemutus ti manah.—Jlam 28:5.
it-1-E 1211 ¶4
Setia
Ngambika ulih setia ngagai Jehovah, sesiku orang patut arap sereta pechayaka Jehovah enggau kuasa Iya, ukai bepanggai ba pengering diri empu. (Ms 25:21) Petara besemaya Iya deka nyadi “terabai” sereta “ngelindung” orang ke setia. (Jlam 2:6-8; 10:29; Ms 41:12) Ketegal sida seruran deka ngelantangka ati Jehovah, pengidup sida nyadi stabil, lalu tu nulung sida nitihka jalai ti lurus ngambika ulih nyapai juluk ati sida. (Ms 26:1-3; Jlam 11:5; 28:18) Taja pia, baka ke diperatika Jop, orang ke nadai bepenyalah engka napi pemerinsa ketegal di baruh kuasa pemerintah ti jai lalu engka mati enggau orang ti jai. Utai tu ngasuh Jop balat irau. Tang Jehovah ngasuh kitai andal, Iya beratika pengidup orang ke enda bepenyalah, lalu besemaya deka nyaga orang nya, meri iya pengidup ti lantang jemah ila, sereta ngupah iya. (Jop 9:20-22; Ms 37:18, 19, 37; 84:11; Jlam 28:10) Baka Jop, sesiku orang deka dipebasa ukai ketegal pengaya, tang ketegal ulah iya ti setia. (Jlam 19:1; 28:6) Bala anak ke bisi apai indai ke baka nya deka lantang ati (Jlam 20:7), laban sida ngembuan pesaka ti berega nengah teladan pengidup apai sida, lalu gaga ati enggau reputasi ti manah sereta basa ti diterima apai sida.
Penemu Bup Kudus ti Berega
Mengkang Bejaga ngambika Enda Alah laban Penguji
19 Nama ulih digaga kitai enti kitai agi bisi pengelemi ke tusah deka diputarka? Ngambika pengelemi nya enda ngujungka kitai bedosa, kitai mesti nitihka jaku lalau Jesus, iya nya: “Anang ngetu bejaga.” Enti kitai enda ngetu bejaga, tu deka nulung kitai nyaga diri ari penguji. Indah ba maya kitai ngasaika diri kering, kitai patut terus nyeliahka situasi ke ulih ngujungka kitai diuji. (1 Kor. 10:12) Terus ngereja utai ke udah nulung nuan ngelaban pengelemi nya. “Uji meh enggau bebendar” ngambika nuan ulih mengkang bejaga.—2 Pet. 3:14.