Maefese

5 Hakulicwalo, mu likanyise Mulimu, sina bana ba ba latwa, 2 mi mu zwelepili ku zamaya mwa lilato, sina Kreste ni yena ha naa mi latile mi a toboha bupilo bwa hae kabakala mina sina nubu ni sitabelo, sina munko o munati ku Mulimu.

3 Buhule ni mufuta kaufela wa masila kamba mukwañuli, nihaiba feela ku bulelwa li si ke za bulelwa mwahalaa mina, sina mo ku swanehela batu ba ba kenile; 4 nihaiba muzamao o swabisa kamba lipulelo za bukuba kamba lisheha la ze swabisa, zona lika ze sa swaneli, li si ke za bulelwa mwahalaa mina, kono ku fitiswe buitumelo. 5 Kakuli mwa ziba, mi mu itemuhezi kuli, ha ku na lihule kamba mutu ya masila kamba wa mukwañuli—ili nto ye talusa ku ba mulapeli wa milimu ya maswaniso—ya ka yola saanda ni se sikana mwa Mubuso wa Kreste ni wa Mulimu.

6 Mu si ke mwa pumiwa ki mutu ka manzwi a si na tuso, kakuli ki kabakala ze cwalo buhali bwa Mulimu ha bu tahela bana ba ba sa utwi. 7 Hakulicwalo mu si ke mwa swalisana ni bona; 8 kakuli ne mu li lififi sapili, kono cwale se mu li liseli ka swalisano ya mina ni Mulena. Mu zwelepili ku zamaya sina bana ba liseli, 9 kakuli muselo wa liseli u kopanyeleza mufuta kaufela wa bunde ni ku luka ni niti. 10 Mu zwelepili ku batisisa se si lumelelwa ku Mulena; 11 mi mu tuhele ku swalisana ni bona mwa misebezi ye si na tuso ya lififi, kono mu i yanehe fa ngandaleza ka mo i inezi luli. 12 Kakuli lika ze ba eza kwa mukunda za swabisa nihaiba feela ku li bulela. 13 Cwale lika kaufela ze sweli ku yanehiwa fa ngandaleza li bonahazwa ki liseli, kakuli kaufela ze bonahazwa li na ni liseli. 14 Kabakaleo ku izwe: “Zuha, wena ya lobezi, mi u zwe kwa bafu, mi Kreste u ka ku monyehela.”

15 Hakulicwalo mu tokomele hahulu mo mu zamaela kuli ha mu zamayi sina likuba kono sina ba ba butali, 16 mu nze mu itusisa hande nako ya mina, kakuli mazazi e lu pila ku ona a maswe. 17 Kabakaleo mu tuhele kutokwa kutwisiso, kono mu zwelepili ku lemuha tato ya Jehova kuli ki ifi. 18 Hape mu si ke mwa kolwa waine, ye tahiseza mutu ku eza lika mutakafululele, kono mu zwelepili ku tala moya. 19 Mu ikambote ka lisamu, ka litumbo ku Mulimu, ni ka lipina za kwa moya, mu nze mu opela ni ku lumbeka Jehova ka lipina mwa lipilu za mina, 20 kamita mu nze mu fitisa buitumelo ku Mulimu ni Ndataa luna kabakala lika kaufela za lu ezelize, ka libizo la Mulenaa luna Jesu Kreste.

21 Mu ipeye yo muñwi kwatasaa yo muñwi ka ku saba Kreste. 22 Haike basali ba ipeye kwatasaa baana ba bona sina mo ba ezeza ku Mulena, 23 kakuli muuna ki toho ya musalaa hae sina Kreste ha li toho ya puteho, mi ki yena mupilisi wa mubili wo. 24 Mane sina puteho ha i ipeya kwatasaa Kreste, basali ni bona ba swanela ku ipeya cwalo kwatasaa baana ba bona mwa lika kaufela. 25 Baana, mu zwelepili ku lata basali ba mina, sina Kreste ni yena ha naa latile puteho mi a toboha bupilo bwa hae bakeñisa yona, 26 kuli a kone ku i kenisa, a i twekise ka ku i tapisa ka mezi a linzwi la Mulimu, 27 kuli a tahise puteho fapilaa hae ka kanya ya yona, i si na koli kamba fo ku kokonyani kamba nto ye swana ni lika zeo, kono kuli i be ye kenile ni ye sa nyazahali.

28 Kamukwaocwalo baana ba swanela ku lata basali ba bona sina mo ba latela mibili ya bona. Ya lata musalaa hae wa itata ili yena, 29 kakuli haisali ha ku na mutu ya kile a toya mubili wa hae; kono wa u fepa ni ku u katelwa, sina Kreste mwa ezeza puteho, 30 kakuli lu lilama za mubili wa hae. 31 “Kabakaleo muuna u ka siya ndatahe ni mahe mi u ka pila ni musalaa hae, mi bubeli bwa bona ba ka ba nama i liñwi.” 32 Kunutu ye kenile ki ye tuna. Cwale ni bulela za Kreste ni puteho. 33 Nihakulicwalo, yo muñwi ni yo muñwi wa mina a late musalaa hae ka mwa itatela; mi musali yena u swanela ku ba ni likute le lituna ku muunaa hae.