Tyina Siovaa Ekutala Uhambukwa

1. Olusoke patyi ovanthu va Huku pamwe vakala nalo?

TYITUPAMEKA omutima okunoñgonoka okuti Siovaa uhambukilwa ovanthu vae aveho. Ombimbiliya yati: “Siovaa uhambukilwa ovanthu vae.” (Ovii. 149:4) Mahi no ngootyo, vamwe pamwe nkhele vasoya avelipulu ñgaa: ‘Okuti naame ñgaa tyina Siovaa anthala uhambukwa umwe?’ Novanthu ovanyingi va Siovaa vapopiwa m’Ombimbiliya pamwe otyo vakalele ngootyo. — 1 Sam. 1:​6-10; Som. 29:​2, 4; Ovii. 51:11.

2. Ovalie Siovaa atala umwe ñgaa ahambukwa?

² Ombimbiliya yetyipopia umwe nawa okuti namphila ovanthu ovakwankhali, mahi no ngootyo Siovaa upondola okuvehambukilwa. Oityi tuna okulinga opo tyina Siovaa etutala ahambukwe? Tuna okuyumba onthumbi mu Sesusi Kilisitu atumbatisalwa. (Swau 3:16) Pokumbatisalwa tupopila ovanthu okuti twelivela ononkhali twalingaile, pahe twapopila Siovaa okuti matulingi vala etyi ahanda. (Ovil. 2:38; 3:19) Siovaa uhambukwa tyina etutala twelipakula tukale omapanga ae. Tyina tulikwatehila tulinge etyi twapopile pokulipakula, Siovaa uhambukwa ututi, tumapanga ae. — Ovii. 25:14.

3. Oityi matyipopiwa monthele ei?

³ Oityi vamwe vasokela okuti tyina Siovaa evetala kahambukwa-le? Oityi Siovaa alinga tyilekesa okuti tyina etutala uhambukwa? Oityi omunthu wa Huku ena okulinga ayumbe-ko onthumbi okuti tyina Huku emutala uhambukwa?

OITYI VAMWE VASOKELA OKUTI TYINA SIOVAA EVETALA KAHAMBUKWA?

4-5. Oityi tyitutulisa omutima namphila pamwe tulitala ngoti katusilivila-ale?

⁴ Ovanyingi pwoonthwe, nkhele tya pouna apa uli mwene utehela vala ñgana welitomba-le vala, ngoti kusilivila-le. (Ovii. 88:15) Omukwendye umwe utiwa o Adrián wati: “Nkhele vala nekulile tyina ndyilitala vala ñgana ngoti hisilivila-le. Pweetyi ndyimututu, pamwe ankho ndyilikwambela andyiti, vakwetu meumbo vapondola umwe okukakala Mouye omupe, mahi ame hihiwamo-ale.” Umwe utiwa o Tony wekulila meumbo mwehena ou ulilongesa wati: “Nkhele nali ovo tate petupu-vo onthiki vatile tukuhole, evi ulinga vituhambukiswa. Otyo pahe atyinthwala vala kokusoka okuti petupu-ale etyi ndyilinga tyivehambukiswa.”

⁵ Ine pamwe tyina ulitala ñgana ngoti kusilivila, wahalimbweko okuti mwene o Siovaa wekweeta no kwe. (Swau 6:44) Siovaa wii etyi tyili komutima wetu, utala oviwa mwoonthwe, oviwa umwe noonthwe mwene pamwe twahamono-ale. (1 Sam. 16:7; 2 Ehi. 6:30) Naina tuyumbei-ko onthumbi, tyina Siovaa amati ndyimuhole unene, wapopia umwe otyili tyae. — 1 Swau 3:​19, 20.

6. Oñgeni Paulu akalele etyi asoka kovivi alingaile?

⁶ Vamwe pweetyi twehenenoñgonoke otyili, twalingaile ovipuka vimwe viti umwe na tyina tuvisoka, tulivela vala onombei. (1 Pet. 4:3) Vamwe namphila tuli-ale nokulingila Siovaa, mahi no ngootyo tulwa nomutima wahanda vala okututwala kokulinga etyi tyapenga. Okuti noove otyo una-tyo otyo, omutima wove ukalela vala okukuvela onombei? Ine otyo una-tyo otyo, matyikupameka unene okunoñgonoka okuti na vakwenyi vafenda Siovaa navo vakondyaile-ale nomalusoke ngoo. Umwe omutumwa Paulu watile etyi asoka kovipuka ovivi pamwe viya komutima wae ati: “Ame naina himunthu-ale!” (Loma 7:24) Paulu welivelele umwe ononkhali alingaile ambatisalwa. Mahi no ngootyo nthiki umwe watile: “Ame povatumwa, ame mututu watyo,” kokulinga ononkhali “nevilapo umwe. “ — 1 Kol. 15:9; 1 Tim. 1:15.

7. Oityi tuna okuhinangela tyina twamasoko kononkhali twalingaile kohale?

⁷ Tate yetu wo keulu wapopia okuti ine tulivela metweevela. (Ovii. 86:5) Naina, ine tulivela umwe tyotyotyili, tuyumbei-ko onthumbi yokuti etyi apopia mondaka yae, otyili umwe wetweevela-le. — Kolo. 2:13.

8-9. Oityi tuna okulinga tulipole olusoke lwokuti kamatutyivili-ale okulinga evi Siovaa mahambukilwa?

⁸ Atuho twahanda umwe okuundapa vali unene movilinga vya Siovaa. Mahi vamwe tyina velitala ñgaa, ngoti kavetyivili-ale okulinga etyi tyaviuka, tyihambukiswa Siovaa. Omufikwena umwe utiwa o Amanda wati: “Ame apeho ndyisoka okuti opo ndyityimone umwe ndyikahi nokuundapa unene movilinga vya Siovaa, ndyina okututumba unene. Pamwe ndyitutumbila vala notyipuka ndyiete okuti himetyivili-ale. Ya tyina nehetyivilile umwe andyisoko okuti Siovaa wanumana, wakala vala ngeetyi naame nakala.”

⁹ Oityi tuna okulinga tulipole olusoke lwokuti kamatutyivili-ale okulinga evi Siovaa mahambukilwa? Siovaa ketuti ngaliti pano una vala okulinga etyi, nii vala ketwiiti etyi onthwe twehevili. Uhambukwa tyina etutala tuli umwe nokulikwatehila tulinge etyi tuvila. Soka ku vamwe vapopiwa m’Ombimbiliya vaundapele unene movilinga vya Siovaa. Soka ku Paulu. Waundapele unene movilinga vya Siovaa, waendele ovilongo ovinyingi, ya pamwe aile otyo asapo umwe omawaneno. Mahi pena omuvo akwatelwe ehetyivili vali okweenda-enda akaivise. Okuti pahe ngootyo Huku ankho kemuhambukililwe vali? Au. Watwaileko vala okulinga etyi evila ya Siovaa emuyambe. (Ovil. 28:​30, 31) Noonthwe haityo ñgoo, matuti umwe pamwe atutyivili okuundapa unene movilinga vya Siovaa, mahi pamwe atwehetyivili. Etyi Siovaa esuka natyo otyetyi tyitutwala kokulinga ovilinga viae. Pahe matutale ovipuka vimwe Siovaa alinga alekese okuti tyina etutala uhambukwa.

OITYI SIOVAA ALINGA TYILEKESA OKUTI TYINA ETUTALA UHAMBUKWA?

10. Oityi tuna okulinga ‘twiive’ Siovaa uti ove unthyambukiswa? (Swau 16:27)

¹⁰ Wetwavela Ombimbiliya. Siovaa apeho ulinga ovipuka vilekesa okuti uhole ovanthu vae. Ombimbiliya ipopia okuti wetyilingile tuvali, wapopilile Sesusi okuti ‘ndyikuhole unthyambukiswa.’ (Mat. 3:17; 17:5) Noove uhanda okwiiva Siovaa okupopila okuti tyina ekutala uhambukwa? Hono Siovaa kapopi noonthwe otyo tumwivite, mahi upopila noonthwe m’Ombimbiliya. Matwiivi ondaka ya Siovaa iti ove ndyikutala ndyihambukwa, putyina tutanga onondaka mba Sesusi mono Evandyeliu. (Tanga Swau 16:27.) Sesusi wahetekelele umwe nawa Tate yae. Tyina tutanga onondaka Sesusi apopilile ovalongwa vae okuti ndyimuhambukilwa ongatyina o Siovaa uli nokutupopila okuti ame ndyimuhambukilwa. — Swau 15:​9, 15.

11. Oityi tutila okumona ononkhumbi katyilekesa okuti Siovaa ketuhambukilwa? (Tiaku 1:12)

¹¹ Utwavela etyi twakamba. Siovaa apeho utukwatesako, utwavela okulia, nomuvalo, novipuka ovikwavo vali twesukisa. Pamwe ulinga ngeetyi alingile pu Sombe, ketuyakulila kononkhumbi mbutumonekela. (Som. 1:​8-11) Okumona ononkhumbi katyilekesa okuti Siovaa tyina etutala kahambukwa. Ononkhumbi mbutwavela omphitilo yokulekesa okuti tuhole Siovaa nomutima wetu auho, ya tumuyumba onthumbi. (Tanga Tiaku 1:12.) Mononkhumbi omo tutyimonena okuti Siovaa ketuyeke, ututekula nawa, utwavela ononkhono tutyivile okukoleleya.

12. Oityi tulilongesila ku Dmitrii?

¹² Tala etyi tyalingile omukulu umwe ukala ko Asia utiwa o Dmitrii. Wapolelwe movilinga akala onohanyi ononyingi tyihaundapa. Asoko ati mwene ndyiyumbe vala onthumbi mu Siovaa, momuvo nkhele nehena ovilinga ndyiundape vala unene movilinga vya Huku. Akala umwe onohanyi ononyingi otyo ovilinga viahamoneka. Etyi pakala avele, avele umwe unene tyokukala vala moula. Ahimbika okusoka okuti tyafwa pahe Siovaa kemuhambukilwa vali, no mokutiwa vala omukulu weumbo, pahe katele-mo vali. Nthiki imwe kongulohi okana kae okamukainthu akahoneka pokamukanda onondaka mba Isaiya 30:15 mbokwati: “Ononkhono mamumbupolo vala mokutula omutima, no mokuyumba-ko onthumbi.” Okana oko akatwala okamukanda oo ku he akati: “Tate tyina wamatale kuliivite nawa, soka kotesitu ei.” Dmitrii etyimono okuti Siovaa uli nokumukwatesako, vena okulia, vena ovikutu, vena eumbo apa valala. Wati: “Otyipuka ankho ndyina okulinga, okutula omutima andyiyumbu onthumbi mu Huku yange.” Ine noove una ovitateka ngoovio, yumba-ko onthumbi, Siovaa kamekuyeke mekutekula, mekukwatesako otyivili okukoleleya.

13. Ovalie Siovaa atuma tutyimone okuti tyina etutala uhambukwa?

¹³ Wetwaavela vakwetu tufenda navo. Siovaa utuma vakwetu tufenda navo tutyimone okuti tyina etutala uhambukwa. Pamwe upondola okutuma vakwetu vetupopile otyipuka ankho twesukisa umwe okwiiva. Omuhikwena umwe ukala ko Asia, nae otyo amwene otyo. Pena pomuvo umwe akalele novitateka ovinyingi: Wapolelwe movilinga, avele, omulume wae alingi onkhali ahakala vali omukulu wewaneno. Otyipuka otyo atyimutokotesa omutwe. Wati: “Andyisoko andyiti oityi ovipuka evi vianthumbukilila vala aviho ñgaa, nkhwali ndyina tyimwe nalinga tyapenga, pahe Siovaa kanthyambukililwe vali.” Aiti Siovaa emulingile-vo vala tyimwe matyilekesa okuti nkhele umuhambukilwa. Oityi Siovaa alingile? Omuhikwena oo wati: “Ovakulu vewaneno avatomphola naame, avamphopila ovipuka vilekesa okuti Siovaa unthyole.” Etyi pakala aiti Siovaa emukwateseko. Wati: “Monthiki yatyo umwe naita Siovaa ankhwateseko, andyitambula omukanda watunda ku vakwetu vomewaneno, etyi natanga onondaka mbupameka vakwetu vanthyonekela, andyityimono umwe okuti Siovaa wendyiva.” Naina pamwe Siovaa utuma vakwetu tufenda navo opo alekese okuti tyina etutala uhambukwa. — Ovii. 10:17.

14. Oityi vali Siovaa alinga tyilekesa okuti tyina etutala uhambukwa?

¹⁴ Siovaa ulekesa okuti utuhambukilwa mokutuma vakwetu vetupakaile-mo tyina pamwe tyesukisa umwe. Potyita tyo tete Siovaa watumine Paulu ahonekele vakwavo momawaneno omikanda vina 14. Momikanda ovio pamwe Paulu waviyulile umwe vakwavo, mahi apopi nolwembia. Oityi Siovaa atuminine Paulu aviyule vakwavo? Siovaa Tate yetu wolwembia, ‘uviyula vana ehole.’ (Omih. 3:​11, 12) Naina ine nthiki imwe uviyulwa, mahi ou wekuviyula etyi apopia wetyipola m’Ombimbiliya, otyo tyilekesa okuti Siovaa ukuhambukilwa, hakuti ukuyele. (Hemb. 12:6) Oityi vali Siovaa alinga tyilekesa okuti tyina etutala uhambukwa?

OITYI VALI SIOVAA ALINGA ALEKEKSE OKUTI UTUHAMBIKILWA?

15. Ovalie Siovaa apa omphepo yae ikola, ya otyo tyilekesa-tyi?

¹⁵ Siovaa upa omphepo yae ikola vana ahambukilwa. (Mat. 12:18) Tupondola okulipula ñgana: ‘Okuti kotyinyango tyomphepo ikola kuna tyimwe naame ndyina-tyo?’ Tyina ulitala, pahetyino wapwa vali elundo tyipona pweetyi wahimbika okunoñgonoka Siovaa? Naina, ine utala una umwe nokutyivila okukala notyinyango tyomphepo ikola ya Huku, otyo tyilekesa okuti tyina Siovaa ekutala uhambukwa! — Tala okakasa kati: “Otyinyango Tyomphepo Ikola.”

16. Ovalie Siovaa apa otyilinga tyokwivisa oviwa ovipe? (1 Ova Tesalonika 2:4)

¹⁶ Siovaa wapa otyilinga tyokwivisa oviwa ovipe vana ahambukilwa. (Tanga 1 Ova Tesalonika 2:4.) Tala oñgeni omufikwena umwe utiwa o Jocelyn apolele ouwa kokulongesa vakwavo. Nthiki umwe Jocelyn wapinduka-po waponwa vala. Wati: “Monthiki yatyo oyo tyina ndyilitehela ñgana ngoti ndyitupu-ale etyi ndyipondola okwavela vakwetu. Pomuvo watyo opo ankho ndyimukokoli-ndyila, ankho ndyiivisa ononthiki ambuho. Monthiki yatyo oyo, andyilikwambela andyiende movilinga viokwivisa.” Jocelyn pokwaya movilinga viokwivisa, atomphola nomukulu umwe utiwa o Maliya, etavela okulongeswa Ombimbiliya. Etyi palamba onohanyi mbumwe, Maliya apopi okuti onthiki Jocelyn eya peumbo liae, ngootyo ankho waita-le ku Siovaa emukwatesako. Etyi Jocelyn asoka umwe kotyipuka otyo, ati: “Tyankhalesa ngatyina uti o Siovaa uya nokumphopila okuti, ‘ove unthyambukiswa.’” Tyili ha aveho mavetavela tyina tuveivisa. Mahi Siovaa uhambukwa tyina atala tuli nokulinga atyiho tuvila tupopile vakwetu oviwa ovipe.

17. Oityi tulilongesila ku Vicky? (Oviimbo 5:12)

¹⁷ Otyilikutila tyeyovo, Siovaa wetyilingila umwe vana ati tyina evetala uhambukwa. (1 Tim. 2:​5, 6) Mahi pahe matulingi ñgeni ine tuti naapa twambatisalwa-le tuyumba onthumbi motyilikutila, otyo nkhele omutima ututwala vala kokuti Siovaa ketuhambukilwa-le? Katupondola okuyumba vala onthumbi apeho momutima wetu, mahi tuna okuyumba onthumbi mu Siovaa. Tyina Siovaa atala ovanthu vayumba onthumbi motyilikutila tyeyovo uveti onondingaviwa, ya wati meveyambe. (Tanga Oviimbo 5:12; Loma 3:26) Okusoka kotyilikutila tyeyovo otyo tyakwatesileko umwe utiwa o Vicky. Etyi nthiki imwe Vicky asoka umwe nawa-nawa kotyilikutila tyeyovo, ati: “Siovaa wapwa elundo wankhevelela kohale. . . . Tyotyili, ankho ongatyina ndyikahi nokumupopila okuti: ‘Olwembia lwove kaluhi. Otyilikutila Tyomona wove katyituuka pala okweevela ononkhali mbange.’” Etyi asoka kotyali otyo twalingwa tyokupewa otyilikutila tyeyovo, etyimono okuti Siovaa umuhole. Noonthwe matutyimono vala okuti Siovaa utuhole, utuhambukilwa, tyina tusoka nawa kotyilikutila.

18. Oityi Tate yetu Siovaa malingi ine onthwe katumuyeke-po?

¹⁸ Pamwe molikwatehila umwe ulinge etyi tyapopiwa monthele ei, mahi no ngootyo tyina ukatehela wasoya usoka vala okuti Siovaa tyina ekutala kahambukwa-le. Ine ukatehela otyo wasoka ngootyo, wahalimbweko okuti Siovaa uhambukilwa “ava vemuhole vehemuyeke.” (Tia. 1:12) Naina twalako okufwena ku Siovaa otyo utala umwe nawa ovipuka alinga vilekesa okuti tyina ekutala uhambukwa. Wahalimbweko okuti, Siovaa “keli kokule nomunthu nawike pwoonthwe.” — Ovil. 17:27.