Wii khene mer unser kepeete ferpesere?

1. Was tuut Yeehoowa sayn aanpeeter in laate se mache? (Kuk aach tas pilt.)

FER weem khene mer troost un oryentiirung ferlange? Meyer wise xon ti antwort. Meyer khene tsu Yeehoowa Kot peete un tee laat uns in kraat tas mache. Tee wil hon tas mer ofts tsu tëm peete — yaa, “imer peete”. (1 The. 5:17) Meyer khene fray fer Kot peete un tëm sayn oryentiirung ferlange fer yeete situatsyoon fon unser leepe. (Xpr. 3:5, 6) Wayl Yeehoowa krooshërtslich mit sayn tsayt is, khene mer tsu tëm peete soo ofts wii mer wole.

2. Was tuun mer in tiise artikel siin?

² Meyer sin aarich petanklich tsu Yeehoowa weeche tas kexenk fom kepeet. Awer es khan xweyer sin tsayt fer se peete fine, wayl mer imer fiil se tuun hon. Im xtant xpiire mer aach tas mer mise unser kepeete ferpesere. Tsum klik, tuut ti Piipel uns fiil uf muute un oryentiirunge kepe. In tiise artikel, tuun mer Yeesus sayn payxpiil noo kuke un lërne wii tsayt hoole fer se peete. Meyer siin aach wii mer unser kepeete ferpesere khene. Too tefoer, lërne mer 5 wichtiche sache woo mer khene in unser kepeete tepay tuun.

YEESUS HOT TSAYT FER SE PEETE KEHOOL

3. Was wust Yeesus iwer tas kepeet?

³ Yeesus wust tas unser kepeete aarich wichtich fer Yeehoowa sin. Fiile yoore eep eyer tsu te eyert khom is, hot Yeesus tëm sayn Fater kesiin ti eerliche kepeete fon troye mëner un fraae antworte — wii, tsum payxpiil, Ana, Eliias un Tawi sayns. (1 Sam. 1:10, 11, 20; 1 Khe. 19:4-6; Psal. 32:5) Tes weeche hot Yeesus sayn tisipele in kelërnt ofts peete un tas mit sicherheet mache. (Mat. 7:7-11)

4. Was fer unerxiitliche tinge khene mer mit Yeesus sayn kepeete lërne?

⁴ Yeesus sayn aychne kepeete hon een payxpiil fer sayn tisipele kelos. Torich sayn tiinst, hot Yeesus ofts kepeet. Tee must tsayt hoole fer se peete, wayl tee hat fiil se tuun un es waare imer fiile layt pay tëm. (Mar. 6:31, 45, 46) Tas eyer khent aleen sin fer se peete, is eyer frii uf kextii. (Mar. 1:35) Un ferweenichst een mool, hot eyer ti kans nacht kepeet foer een wichtich ëntxlus mache. (Luk. 6:12, 13) Un Yeesus hot noo un noo kepeet in te nacht eep eyer kextorep is — kraat foer tas xweyerste teel fon sayn flicht too uf te eyert erfiile. (Mat. 26:39, 42, 44)

5. Wii khene mer Yeesus noo mache?

⁵ Was lërne mer mit Yeesus sayn payxpiil? Aach wën mer fiil se tuun hon, mise mer tsayt hoole fer se peete. Fer tas hin kriin, im xtant mise mer een pisye friier uf xtaye orer een pisye xpeeter xloofe keen. Soo tsayche mer tsu Yeehoowa tas mer weyert kepe fer tiise ekstra kexenk. Een xwester, woo Lynne heest, erinert sich wii petanklich se waar wii se kelërnt hot iwer te priwilëj fer se peete. Tii saat: “Wii ich kelërnt hon tas ich khont uf kwalkee xtun fer Yeehoowa peete, tas hot mich uf kemuut tëm wii een tichte fraaynt siin. Un es hot mich aach te wunx kep fer mayn kepeete ferpesere.” Sicher fiile fon uns xpiire sich aach soo. Yets wole mer iwer 5 wichtiche sache xpreche woo mer khene in unser kepeete tepay tuun.

FINEF WICHTICHE SACHE FER SE PEETE

6. Tëm noo Apokalipsis 4:10, 11, was fertiint Yeehoowa?

⁶ Loop Yeehoowa. In een wunerlich wisyoon, hot te aphostel Yoohan 24 elteste im himel kesiin Yeehoowa am aan peete. Tii hon Kot keloopt un hon kesaat tas eyer fertiint “ti hërlichkheet, ti eer un ti macht” kriin. (Lees Apokalipsis 4:10, 11.)b Ti troye engele hon aach fiile uersache fer Yeehoowa loope. Tii sin mit Kot im himel un tuun tëm kuut khëne. Ti engele khene Yeehoowa sayn kwaliteete mërke in was eyer macht. Wën se siin wii Kot sich aan xtelt, sin se uf kemuut tëm loope. (Yoop 38:4-7)

7. Was sin etliche uersache warom mer Yeehoowa loope khene?

⁷ Meyer sole aach Yeehoowa in unser kepeete loope. Meyer khene tas mache wën mer tëm saan warom mer tëm liipe un respektiire. Wëns tuu ti Piipel leese un xtutiire tuust, fersuuch se mërke Yeehoowa sayn kwaliteete woos tuu hauptseechlich kërn host; tan saa fer Yeehoowa wiis tuu tich too triwer xpiirst. (Yoop 37:23; Rom. 11:33) Meyer khene Kot aach loope wayl eyer uns un al unser priiter un xwestere helft; tee tuut uns imer uf phase un xitse. (1 Sam. 1:27; 2:1, 2)

8. Was sin etliche uersache warom mer Yeehoowa tanke khene? (1^te Thesalooniker 5:18)

⁸ Tank Yeehoowa. Meyer hon fiile uersache fer Yeehoowa im kepeet tanke. (Lees 1^te Thesalooniker 5:18.)c Meyer khene tëm tanke weeche ti kuute tinge woo mer hon, wayl yeete kuute kexenk fon tëm khomt. (Tya. 1:17) Tsum payxpiil, meyer khene tëm tanke weeche ti xeen eyert un tëm sayn wunerlich kriatsyoon. Meyer khene aach petanklichkheet tsayche weeche unser leepe, familye, fraaynte un hofnung. Un meyer khene Kot tanke wayl eyer uns lost een ticht fraayntxaft mit tëm hon.

9. Warom mise mer petanklichkheet tsu Kot ëntwikele?

⁹ Meyer mise uns aan xtrenge fer se tenke aan te uersache woo mer hon fer petanklich tsu Yeehoowa sin. Ti welt woo mer leepe is unpetanklich. Xtats petanklichkheet tsayche fer was se xon hon, tuun ti layt sich ofts konsentriire aan was se noch wole. Wën mer aan fange uns soo wii ti layt fon te welt aan xtele, khene unser kepeete ploos een list wëre fon tinge woo mer ferlange. Fer tas net pasiire lose, mise mer wayter petanklichkheet ëntwikele un tii tsayche fer ales was Yeehoowa uns macht. (Luk. 6:45)

10. Wii petanklichkheet tsayche hot een xwester keholef aus hale? (Kuk aach tas pilt.)

¹⁰ Een petanklich aanxtelung khan uns helfe xwiirichkheete aus hale. Kuk mool ti speryens fon te xwester Kyung-sook, woo tsum wise kriit hot tas se een xlim lung kreeps hat.d Tii saat: “Tiise kesuntheet propleem hot mich oone muut kelos. Ich hon kexpiirt tas ich ales ferloer hat un ich hon fiil pang kriit.” Was hot se keholef tas aus hale? Tii saat tas, yeete nacht, eep se xloofe kang is, is se pis tsum tach kang. Tat, hot se een kepeet in hart xtim kemacht fer Yeehoowa tanke weeche 5 tinge woo se torich te taach kriit hat. Tas hot sayn ëngstlichkheet peruycht un hot se uf kemuut sayn liip tsu Yeehoowa tsayche. Tii hot kexpiirt wii Yeehoowa sayn troye tiiner helft wën se propleeme mit mache. Un tii hot aach kemërkt tas, in sayn leepe, hat se mee seechen wii propleeme. Soo wii Kyung-sook, hon mer aach fiile uersache fer petanklich tsu Yeehoowa sin, aach wën mer propleeme mit mache. Yeehoowa im kepeet tanke, helft uns ti propleeme aus hale un in ruu plaype.

11. Noo Yeesus tsurik tsum himel kang is, warom praychte sayn tisipele koraaj hon?

¹¹ Ferlang tsu Yeehoowa koraaj in te preetich aarwayt. Klaych wii Yeesus tsurik tsum himel kang is, hot eyer sayn tisipele fon tëne sayn inxtelung erinert: tsaye iwer tëm kepe “in Yeruusalem, soo wii in kans Yuteea un Samaria, un pis tsum letste ek fon te eyert”. (Aph. 1:8; Luk. 24:46-48) Khorts tëm noo, hon ti yitixe fiirer ti aphostele Pheeter un Yoohan foer tas Sinëtryum kefang kenom. Tii hon se kexikt noo lose se preetiche un hon kesaat tas, wën net, teete se was xlechtes keeche tëne mache. (Aph. 4:18, 21) Wii hon Pheeter un Yoohan sich aan kextelt?

12. Tëm noo Aphostele sayn Kexicht 4:29, 31, was hon ti tisipele kemacht?

¹² Pheeter un Yoohan hon tsu te relichyeese fiirer keantwort: “Richt teyer selepst, eps foer Kot sayn aue richtich weyer aych aan se heere xtats Kot. Awer meyer khene net noo lose se xpreche iwer was mer kesiin un keheert hon.” (Aph. 4:19, 20) Wii Pheeter un Yoohan fray kemacht kep sin, hon ti tisipele hilef tsu Yeehoowa ferlangt fer Tëm sayn wile mache. Tii hon kepeet: “Helf tayn sklaawe tayn wort mit kans koraaj wayter xpreche.” Yeehoowa hot tiise eerliche kepeet keantwort. (Lees Aphostele sayn Kexicht 4:29,e 31.f)

13. Was khene mer fon Jin-hyuk sayn payxpiil lërne?

¹³ Meyer khene ti tisipele noo mache wën mer wayter preetiche soo kaar wën ti autoriteete uns xike noo lose tas mache. Kuk mool tas payxpiil fon Jin-hyuk, eene pruuter woo in kexpërt kep is wayl eyer net im militeer tiine wolt. In te katee, waar eyer in kextelt fer anere inkexpërtner woo in te solitária waare, uf phase. Awer eyer thërft mit tëne xpreche ploos iwer was neetich waar, net iwer ti Piipel. Eyer hot kepeet fer mit koraaj un kexik se preetiche, imer wën eyer een xans hët. (Aph. 5:29) Tee saat: “Yeehoowa hot mayn kepeete keantwort. Tee hot mich koraaj un kluucheet kep fer Piipel xtuutye — woo 5 minute lang waare — aan fange kraat foer te sëla. Tan, oomts, hon ich priife kexrip woo ich khent te neekste taach fer ti inkexpërtner kepe.” Meyer khene aach uns sicher sin tas Yeehoowa uns helfe tuut unser preetich aarwayt mache. Soo wii Jin-hyuk, khene mer koraaj un kluucheet im kepeet ferlange.

14. Was khan tich helfe wëns tuu propleeme mit machst? (Psalm 37:3, 5)

¹⁴ Ferlang Yeehoowa sayn hilef fer ti propleeme aus hale. Fiile fon uns mise aus hale fiisixe orer emotsyonaale propleeme, te toot fon een keliipte, een xweyer situatsyoon in te familye, yachtung orer was aneres. Un tinge soo wii pantemiie un kriiche lose es noch xweyer tiise propleeme aus hale. Soo, mach tayn hërts tsu Yeehoowa uf. Xprech mit tëm wii wëns tuu mit een ticht fraaynt xpreche teest. Say tich sicher tas Yeehoowa tich helfe tuut. (Lees Psalm 37:3,g 5.h)

15. Wii khan tas kepeet uns helfe ‘ti xwiirichkheete aus hale’? Kep een payxpiil.

¹⁵ Wayter peete, tuut uns helfe ‘ti xwiirichkheete aus hale’. (Rom. 12:12) Yeehoowa wees was sayn aanpeeter mit mache; “tee heert wën se tëm ruufe fer hilef kriin”. (Psal. 145:18, 19) Kristie, een pyoneerin woo 29  yoore alt is, hot raus kefun wii tas woer is. Wii se net kewaart hot, hot se aan kefang xlime kesuntheet propleeme hon. Tes weeche is se aarich tiifsinich kep. Xpeeter hot se tsum wise kriit tas sayn mama een krankheet kriit hot woo tsum toot nëme teet. Kristie saat: “Ich hon hërtslich tsu Yeehoowa ferlangt tas eyer mich kraft kepe teet fer yeete taach aus hale. Ich hon fersuucht een kuut kaystlich rutiin hale — imer in te fersamlunge keen un mayn perseenlich xtuutyum mache.” Tii saat noch: “Tas kepeet hot mich keholef ti xweyere tsayte aus hale. Ich wust tas Yeehoowa imer pay mich waar un tas hot mich fiil ketreest. Mayn kesuntheet propleeme hon sich net klaych resolwiirt, awer Yeehoowa hot mayn kepeete keantwort un hot mich inerlich friit un ruu kep.” Wole mer uns nii ferkese: “Yeehoowa wees fon proope fray se mache, tii woo tëm troy sin”. (2 Phe. 2:9)

16. Warom mise mer Yeehoowa sayn hilef hon fer keeche ti fersuuchung khëmpfe?

¹⁶ Ferlang Yeehoowa sayn hilef fer tich fest keeche ti fersuuchung xtele. Wayl mer imperfekt sin, mise mer imer khëmpfe keeche ti fersuuchung fer se mache was ferkheert is. Un Satanaas macht ales was eyer khan fer tiise khampf noch xweyerer lose. Tee fersuucht, tsum payxpiil, unser ketanke fersaue torich ti imoraalix ferkniichung. Soo sorte tinge khene unser khop fol unrayne ketanke lose; tiise unrayne ketanke khene uns unrayn foer Kot lose un tsu xweyere sinte nëme. (Mar. 7:21-23; Tya. 1:14, 15)

17. Noo hilef im kepeet ferlange, was mise mer mache fer uns keeche ti fersuuchung xtele? (Kuk aach tas pilt.)

¹⁷ Meyer mise Yeehoowa sayn hilef hon fer torich ti fersuuchung triwer wech khome. Mërk mool was Yeesus im Fater Unser kepeet ferlangt hot: “Pring uns net in fersuuchung, awer mach uns fom Xlechte fray.” (Mat. 6:13) Yeehoowa wil uns helfe, awer mer mise tëm sayn hilef ferlange un uns aach tëm noo unser kepeete aan xtele. Meyer mise unser pestes mache fer uns wech hale fon te ferkheerte itee woo ti layt in Satanaas sayn welt kërn hon. (Psal. 97:10) Meyer mise ti Piipel leese un xtutiire; tas tuut unser khop fol rayne ketanke lose. In te fersamlunge keen un in te preetich aarwayt xafe tuut unser ketanke aach xitse. Un wën mer tas mache, Yeehoowa ferxprecht net lose tas mer mee fersuucht wëre wii mer aus hale khene. (1 Kor. 10:12, 13)

18. Mit was se tuun hot mit kepeet, was mus yeete eene fon uns mache?

¹⁸ Mee wii noch nii, mus yeete eene fon uns peete fer troy tsu Yeehoowa plaype in tiise xweyere letste taache. Hool tsayt yeete taach fer eerliche kepeete mache. Yeehoowa wil hon tas meyer unser hërts foer tëm im kepeet aus xiite. (Psal. 62:8) Loop un tank Yeehoowa weeche ales was eyer macht. Ferlang tëm sayn hilef fer koraajich in te preetich aarwayt sin. Hal Kot sayn hilef aan fer ti xwiirichkheete aus hale un tich fest keeche ti fersuuchung xtele. Los niks un nimant tich um hale imer tsu Yeehoowa peete. Awer wii meecht Yeehoowa unser kepeete antworte? Im neekste artikel, tuun mer tiise wichtich frooch xtutiire.