Baa Chɛhowa Hini pa Kɔl a Num?

1. Naapum kiisaŋnda yɛɛ wanaa ndaa piɛi Chɛhowa o laalaŋndo choo wa ndaa nɔ yɛ?

I CHO suɛi kɔl dɛɛniaa le sinaa maa, Chɛhowa hini kɔl a wanaa nduaa kpou. Mi Baabuiyo dimi aa: “Mɛlɛka Yaawɛɛ o hini kɔl a wanaa nduaa.” (Sam 149:4) Teleŋndaŋ lapum, mi apum tambu kɔl nduyɛ ma nyunaŋ aa, ‘Baa Chɛhowa hini pa kɔl a ya?’ Mi a bɔɔbɔɔ o sindɔɔ niŋ, a ndaa piɛi Chɛhowa o laalaŋndo choo wa, cha ndi ikala le tiindaŋndo nɔɔ maa Chɛhowa hini kɔl a nda.—1 Saam. 1:​6-10; Choobu 29:​2, 4; Sam 51:11.

2. Nɛɛ yaa Chɛhowa hini yɛ kɔl a nda?

² Baabuiyo chɔm kpendekele maa, wanaa lahakiaa bɛɛ, mi Chɛhowa hini kɔl a nda. Vɛɛ keŋ yɔŋnuŋ yɛ? Ŋ nɔ miŋ dɔu laalaŋndo o Chiisu Kiliti niŋ, nduyɛ miŋ sɔla yiŋɔɔ. (Chɔŋ 3:16) O nɛiyo hoo choo, miŋ chɔm acheleŋnda maa ŋ mulul yɔŋnda naala wɔɔŋndaŋ kɔɔ, vɛlɛ maa ŋ chua buŋgɛi le hɛnaŋ Mɛlɛkaa tosaa. (Walta. 2:38; 3:19) Mi Chɛhowa naŋ kɔl tau a naa te ŋ tosa pɛ sɔɔŋ muŋ le halikpeŋ miŋ wa o chaŋyɛi kpɛɛluŋnde niŋ a ndu. Te ŋ tosa pɛ o naŋ tiuba wo le loo o buŋgɛi naŋ chua le ndu piɛiyo ve choo, o cho naa chua maa chaaŋaa nduaa kpɛɛluŋnda naŋ cho ni.—Sam 25:14.

3. A nyunala yaala kuɛɛ okɔɔ naŋ cho yɛ pɛɛku o buŋgɛi hei niŋ?

³ Le yɛɛ apum yiyaŋ yɛ lepum maa Mɛlɛka hini kɔl a nda le? Vɛɛ Chɛhowa chɔm yɛ maa o hini kɔl a naa? Nduyɛ vɛɛ Kilisiɔŋnɔɔ kindi yɛ tiindaŋ ndɔɔ maa Mɛlɛka hini kɔl a ndu? O buŋgɛi hei niŋ, ŋ cho pɛɛku a nyunala yaalaŋ ndaŋ okɔɔ.

LE YƐƐ APUM YIYAŊ YƐ MAA CHƐHOWA HINI KƆL A NDA LE?

4-5. O yɔŋ bɛɛ miŋ yiyaŋ maa ŋ cho a sɔvɛ le, yɛɛ ke yɛ naa tiindaŋndo?

⁴ Chɔŋ a teleŋ naŋ wa a pɔmbɔ wo, mi naa a bɔɔbɔɔ naŋ yiyaŋ maa ŋ cho a sɔvɛ le. (Sam 88:15) Mi puaapilɛnɔ pilɛ diolaŋ Adiliaŋ dimi aa: “Mi yaa yiyaŋ teleŋ o teleŋ maa I cho o sɔvɛ le. I loonuŋ teleŋ ya wa o pɔmbɔ wo, mi yaa piɛi le mi yuŋgu nuu ndoo luɛi o Kpele Hɛnɛkiɔɔ niŋ. Kɛ yaa yiyaŋ maa, I cho o sɔvɛ le waa loŋ te.” O tonyaa niŋ puaapilɛnɔ pilɛ diolaŋ Toni mandaŋ ni. Mbo dimi aa: “Kani bɛɛ wanaa velu ya wa dimulla maa a kaala ya ɔɔ a naŋ kɔl a ya le. Mi hei tosa mi yiyaŋ maa, pesiŋ bɛɛ I tiuba mi tosa nyɛ nɛŋi nda kɔllo wo le.”

⁵ Naa bɛɛ te o yɔŋ pɛ miŋ nɔ yiyaŋnda waa lende, ŋ nɔ miŋ loonuŋ maa mi Chɛhowa sɔɔŋguu naa ikɛi o nɛi bɛnda a ndu wo choo. (Chɔŋ 6:44) Mbo che o kɛndɛ naŋ tosa wo, mbo hiou pɛŋ mɛɛ naapila cha yɛ. Nduyɛ, o sina nyɛ cho naa o kɔllo. (1 Saam. 16:7; 2 Kolo. 6:30) Lelaŋ, ŋ nɔ miŋ dɔu tiindaŋndo o ndu niŋ te o dimi pɛ maa, wanaa sɔviaa naŋ cho ni.—1 Chɔŋ 3:​19, 20.

6. Vɛɛ Pɔɔl ndoo yiyaŋ yɛ a hakila o tosa o paandoo niŋndaŋ okɔɔ?

⁶ Tuupa miŋ pɛɛku tonyaa, mi naa a bɔɔbɔɔ tosa sɔɔŋ naŋ biinuŋ tɔɔyaŋ le muŋ ndoŋ. (1 Pitɛ 4:3) Naapum, wanaa cheleŋaa bii niŋ Chɛhowa piɛiyo o laalaŋndo choo wa bɛɛ chɔulaba niŋ dialuŋ vilɛiyoŋ. Kɛ num yɛ? Baa mi kɔl numndo pɛɛsa num pa? Te lende i cho ni, mɛɛ i cho suɛi kɔl dɛɛniaa le sinaa maa, buɛiyaa laalaŋaa bii niŋ Chɛhowa piɛiyo o laalaŋndo choo wa bɛɛ, ndaa nɔ yiyaŋnda waa lende. Le tamaseliiyo, mi kiilanɔɔ Pɔɔl ndoo tambu kɔl tau te ndoo yiyaŋ pɛ a biondɔŋnda ndɔlaŋ okɔɔ. (Luomaŋ. 7:24) I cho tonya maa, Pɔɔl ndoo mal niŋ yɔŋ ndɔ wɔɔŋndo, nduyɛ mbo sɔla yiŋɔɔ. A koŋ kpou, mbo dimi a ndupila okɔɔ aa: “O kiilaa tɛɛŋ kpou, ya cho o sɔvɛ tau le ni,” nduyɛ ya hiou hakioo “kɔndɔŋ.”—1 Kɔliŋ. 15:9; 1 Timo. 1:15.

7. Yɛɛ naŋ nɔ yɛ miŋ kɛsiŋ o kɔl a hakila naŋ tosa o paandoo niŋndaŋ okɔɔ?

⁷ Finya naa o choo choo niŋ mɛi lediom maa, o cho naa malɔɔ haki te ŋ wookuŋ pɛ. (Sam 86:5) Lelaŋ, te ŋ kel pɛ suei le haki naŋ tosa wo, ŋ nɔ tiindaŋndo maa o cho diomnde ndɔle mɛyaaleŋ peelu le naa malɔɔ haki.—Kolo. 2:13.

8-9. Vɛɛ naŋ fafaŋ yɛ yiyaŋndo maa ŋ nɔla miŋ tosa tau le miŋ nɛŋi Chɛhowa kɔllo le?

⁸ Naa kpou yeema miŋ piɛi Chɛhowa mɛɛ naŋ tiuba yɛ. Kɛ waŋnda apum yiyaŋ maa, pesiŋ bɛɛ a nɔla ma tosa tau le mbo hini kɔl a nda le. Mi ndepilɛnɔɔ pilɛ diolaŋ Amanda dimi aa: “Teleŋnda bɔɔbɔɔ mi yiyaŋ maa, te I tosa pɛ o ya tiuba wo le Chɛhowa, mɛɛ keŋ sim ni maa, I nɔ mi chɔɔlu tosa tau. Lelaŋ, mi kindiŋ le tosaa tau mbo hiou mɛɛ ya tiuba le tosaa yɛ. Kɛ te I tosa mɛɛ ya tuu le tosaa yɛ le, mi yiyaŋ maa Chɛhowa tambu kɔl a ya mɛɛ mɛɛ ya tambu kɔl a yapila yɛ.”

⁹ Vɛɛ naŋ fafaŋ yɛ yiyaŋndo maa ŋ nɔla miŋ tosa tau le miŋ nɛŋi Chɛhowa kɔllo le? Loonuŋ maa, mi Chɛhowa bii naa bila, nduyɛ o cho naa kɔl le miŋ tosa o naŋ tiuba le tosa le wo le. Mbo chɔm balika melaa le nyɛ o nyɛ naŋ tosa pɛ, te ŋ tosa ndu pɛ a kɔl naa kpou. Yiyaŋndɔ a tamaseliila waŋnda o sindɔɔ niŋ, a ndaa piɛi Chɛhowa a kɔl ndaa kpou wa. Le tamaseliiyo, yiyaŋndɔ a Pɔɔl okɔɔ. Mbo tosa wallo tau le wɔsiŋ bɔɔbɔɔ, nduyɛ mbo kua o tiŋnda vilɛilaŋ niŋ le kundalaŋ kiilaa. Kɛ mɛɛ sɔɔŋ siŋgaŋ o yoomu ndɔɔ niŋ, ndoo tiu lɛ ba le wali pollo tosaa maa paandu le. Baa keŋ sim ni maa Chɛhowa ndoo hini lɛ kɔl a ndu le? Sako. Mbo hiau lachi a nyɛ ndoo tiuba wo tosaa, nduyɛ mi Chɛhowa duau ndu sala. (Walta. 28:​30, 31) O nɛi pilɛ koŋ choo, lepum ŋ tiu lɛ ba le tosaa maa paandu le. Kɛ nyɛ cho o sɔvɛ ndu o hɔllo cho sabu naŋ cho ndu piɛiyo wo ni. Ŋ tofaŋndɔ nɛilaŋ latiŋ la Chɛhowa chɔm maa o hini kɔl a naalaŋ.

VƐƐ CHƐHOWA CHƆM YƐ MAA O HINI KƆL A NAA?

10. Vɛɛ naŋ tuɛi yɛ Chɛhowa naa dimullo maa o hini kɔl a naa? (Chɔŋ 16:27)

¹⁰ O ke naa Diom ndɔɔ Baabuiyo. Mi Chɛhowa nuuviaa nɛilaŋ le wanaa nduaa chɔmndo maa o kaala nda, nduyɛ o naŋ kɔl a nda. Mi Baabuiyo chɔm teleŋndaŋ latiɔɔŋ la Chɛhowa dimul Chiisu maa o kaala ndu, vɛlɛ maa o hini kɔl a ndu laŋ. (Maa. 3:17; 17:5) A yeema pa mi Chɛhowa dimul num maa o hini kɔl a num? O kpeekpei niŋ, Chɛhowa suu hau o naa lo kpendekele le, kɛ mbo soliŋ Baabuiyo kpeku le suɛi o naa lo. Te ŋ veelu pɛ diomnda kaalaa la Chiisu wa buɛiyaa nduaa dimullo laŋ, i wa ko maa Chɛhowa cho diomnda laŋ suɛi o naa lo ni. (Nuawɔ Chɔŋ 16:27.) Mi Chiisu tual suliŋnda kɛndɛla Finya ndɔlaŋ kɔɔli kpou. Lelaŋ, te ŋ veelu pɛ diomndaŋ a mɛɛ Chiisu wa buɛiyaa nduaa dimullo maa o hini kɔl a nda, mi che bɛɛ wanaa lahakiaa nda wa ni yɛ, i wa ko maa Chɛhowa cho diomnda laŋ suɛi o naa lo ni.—Chɔŋ 15:​9, 15.

11. Te simultaŋ la komal naa pɛ, le yɛɛ ŋ nɔ miŋ dimi maa Chɛhowa hini lɛ kɔl a naa le le? (Chemisi 1:12)

¹¹ Sanaa a sɔɔŋ o tosa woŋ. Chɛhowa nɔ yeemɛi kpeekpei le naa malaa miŋ sɔla nyɛm naŋ hauba woŋ. Kɛ lepum, mbo chɛl le mi sɔɔŋ palaŋ komal naa, mɛɛ o tosa a Choobu yɛ. (Choobu 1:​8-11) Te simultaŋ la komal naa pɛ, keŋ chɔm nuaa maa Chɛhowa hini kɔl a naa le le. Kɛ, miŋ sɔla fondaa le Chɛhowa chɔmndo mɛɛ kpɛ naŋ kaala ndu, nduyɛ miŋ duau tiindaŋndo o ndu niŋ yɛ. (Nuawɔ Chemisi 1:12.) Mi hei tosa miŋ che mɛɛ kpɛ o kaala naa, vɛlɛ mbo wa naa tooloo le miŋ hiou lachi a biuwɔŋndo yɛ.

12. Yɛɛ naŋ pɛɛku yɛ o suɛi yɔŋnaŋii Dimitili ve niŋ?

¹² Ŋ tofaŋndɔ tamaselii puaapilɛnɔ pilɛ o Eesiaa niŋ diolaŋ Dimitili. Mi wali ndɔɔ hialuŋ ndu, nduyɛ le paŋguŋ bɔɔbɔɔ o sɔla wali le. Lelaŋ, mbo kɛɛsiaa le mbo tosa tau o wali pollo niŋ, vɛlɛ mbo dɔu tiindaŋndo o Chɛhowa niŋ. Mi paŋguŋ bɔɔbɔɔ hiau kɛ o sɔla wali le. Mbo del a naa, nduyɛ ndoo nɔla lɛ chɔnɔŋ o kpele le. Mbo kandu yiyaŋndo maa, o cho lɛ pɔnɔ kɛndɛ ɔɔ finya kɛndɛ le, vɛlɛ maa Chɛhowa hini lɛ kɔl a ndu le. Ichɔl pilɛ, mi chua ndɔɔ poonyiaa diomnda cho o Aisaya 30:15 niŋndaŋ o yau choo. La dimi aa: “Te la yɔŋnɔŋ pɛ bɛɛŋ, nduyɛ mi la dɔu tiindaŋ nyaa o ya niŋ, la cho kpaayaa sɔla.” Mi chua ndɔɔ kɔ kɛsi yau koŋ o kpele ndɔɔ ikɛi, okoŋ mbo dimul ndu aa: “Kɛkɛ, te a tambu kɔl pɛ, loonuŋ a bolle Baabuileŋ ndeŋ okɔɔ.” Mi Dimitili sina maa, sanaa a mala Chɛhowaa, yuŋgu ndɔɔ nɔ nyɛdiaa, nyɛla chuɛɛnaŋ ndaŋ a naa lɔlaa. Mbo dimi aa: “Nyɛ yaa nɔ mi tosa wo wa hiouwɔɔ lachi a wa bɛɛŋ, vɛlɛ mi dɔu tiindaŋ nuu o Mɛlɛka niŋ ni.” Te a wa pɛ o simul waa nuaa bɛŋgu, nɔ tiindaŋndo maa Chɛhowa buulaŋ a num, nduyɛ o cho num mala ma hiou lachi a biuwɔŋndo.

13. Nɛɛ yaa Chɛhowa soliŋ yɛ kpeku le chɔmndo maa o hini kɔl a naa, nduyɛ vɛɛ o tosa yɛ keŋ?

¹³ Sanaa a puaapiliaa a ndepiliaa naa. Mi Chɛhowa soliŋ puaapiliaa a ndepiliaa kpeku le naa chɔmndo maa o hini kɔl a naa. Le tamaseliiyo, mbo nyindu nda le naa diomnda kɔl dɛɛniaalaŋ dimullo a teleŋ naŋ yeema laŋ ndo. Mi i waa nuaa yɔŋnɔŋ ndepilɛnɔ pilɛ o Eesiaa niŋ a teleŋ o wa o nyɛkindilaa bɛŋgu wo. Mi wali ndɔɔ hialuŋ ndu, nduyɛ mbo del a naa kala kalaa. Okoŋ kɔɔli, mi pɔnɔ ndɔ tosa haki wɔɔŋ wɔɔŋndo nduyɛ o ve lɛ bɛndu kunda le. Mbo dimi aa: “I bii bila le sabu hei wa ya yɔŋnɔŋndo wo le. Mi yiyaŋ maa naapum suɛi wɔɔŋnde ya tosa ni. Lelaŋ, Chɛhowa hini lɛ kɔl a ya le.” Mi ndepilɛnɔ naa nyɔɔlu Chɛhowa le mbo chɔm ndu maa o hini kɔl a ndu. Vɛɛ o tosa yɛ keŋ? Mbo dimi aa, “Mi bɛndu kundaa suaa o ya lo le ya chɔmndo maa Chɛhowa kaala wɔ ya kɛ.” Mɛɛ teleŋ tiŋ hiou, mbo nyuna vɛlɛ Chɛhowa le ndu malaa. Mbo dimi aa: “O paale pilɛle leŋ choo, mi sɔla yauwo puaapiliaa a ndepiliaa o kundaa niŋ o ba. Mɛɛ ya wa veeloo diomnda kɔl dɛɛniaala nda poonyial la laŋ, mi sinaŋ kɛsɛ maa Chɛhowa muli ya diom ni.” A tonya, teleŋnda bɔɔbɔɔ mi Chɛhowa chɔm maa o hini kɔl a naa sanaa a diomnda acheleŋnda dimul naa laŋ.—Sam 10:17.

14. O nɛi cheleŋ kuɛɛ choo Chɛhowa chɔm yɛ maa o hini kɔl a naa?

¹⁴ Mi Chɛhowa chɔm maa o hini kɔl a naa sanaa a chaaŋaa naa laalaŋnda soliŋndo kpeku le naa silaa kioo a teleŋ naŋ yeema ndu wo. Le tamaseliiyo, o wɔsiŋ kɛmɛ tasoŋ niŋ, mi Chɛhowa soliŋ kiilanɔɔ Pɔɔl kpeku le chaaŋaa nduaa laalaŋnda yaulaŋ 14 poonyiallo. O yaula laŋ niŋ, mbo ke puaapiliaa a ndepiliaa nduaa sila kala kalaa o nɛi kaalaa niŋ. Le yɛɛ Chɛhowa dimullɛ Pɔɔl le sila waa lende poonyiaa? Finya kɛndɔɔ Chɛhowa cho ni, nduyɛ mbo sila chuauwaa nduaa ‘o kaala wa le nda miŋgioo o nɛi.’ (Pulɔ. 3:​11, 12) Lelaŋ, te waŋndo ke naa pɛ sila tɔlnuŋ o Baabuiyo choo wo, keŋ sim nuaa maa Chɛhowa tambu kɔl a naa le, kɛ i sim maa o kaala naa tau. (Hibu. 12:6) Ɔɔ nyɛ cheleŋ chɔm maa Chɛhowa hini kɔl a naa wo?

NƐILA NAŊ SINA MAA CHƐHOWA HINI KƆL A NAALAŊ

15. Nɛɛ yaa Chɛhowa ke yɛ nyina ndɔ diandaa, nduyɛ le yɛɛ hei ke yɛ naa tiindaŋndo?

¹⁵ Mi Chɛhowa ke wanaa o hini kɔl a nda wa nyina ndɔ diandaa. (Maa. 12:18) Ŋ nɔ miŋ nyunaŋ aa, ‘Baa mi chɔm pa suliŋnda nyina diandaa Mɛlɛkaa o yoomu nuu niŋ?’ Baa ma biunuŋ pa acheleŋnda mbo hiau teleŋ num oo sina wɔ Chɛhowa le wo? O kpeekpei niŋ, mɛɛ ŋ pɛɛku fau le suliŋnda nyina Mɛlɛkaa chɔmndo, lende koni ŋ chɔɔlu tiindaŋndo nɔ ni maa Chɛhowa hini kɔl a num.—Tofa kɔfoo hoo, “Suliŋnda Nyina Mɛlɛkaa La Cho Laŋ Ni . . . ”

16. Nɛɛ yaa Chɛhowa soliŋ yɛ kpeku le yooŋgu kɛndɔɔ dimioo, nduyɛ vɛɛ keŋ tosa yɛ num ma sinaŋ? (1 Tɛsaloniaŋ 2:4)

¹⁶ Mi Chɛhowa ke wanaa o hini kɔl a nda wa dioo le ma dimi yooŋgu kɛndɔɔ. (Nuawɔ 1 Tɛsaloniaŋ 2:4.) Tofawɔ mɛɛ ndepilɛnɔ pilɛ diolaŋ Choosiliŋ sɔla tɔnɔɔ yɛ, mɛɛ o dimul acheleŋnda yooŋgu kɛndɔɔ. Paale pilɛ, mbo chaŋ idiiyo a kɔl tambɛiyo. Mbo dimi aa, “Mi yiyaŋ maa I nɔ mayoomu le, vɛlɛ maa I cho o sɔvɛ le, mi che bɛɛ I wa kɔɔfaleŋ tosaa. Paaleleŋ kpeekpei yaa kua o wali pollo niŋ ni. Lelaŋ mi piɛi o Chɛhowa lo, nduyɛ mi kua yooŋgu kɛndɔɔ dimioo.” Idii koŋ, mbo chiikaŋ a chua pilɛ diolaŋ Meele. Nduyɛ mi Meele bii ndu nyɛkɛndɛi, okoŋ mbo chɛl le Baabuiyo pɛɛkoo. Mɛɛ paŋgoŋ ŋtiŋ hiou okoŋ kɔɔli, mi Meele dimi maa, o wa piɛileŋ o Mɛlɛka lo le malaa mi Choosiliŋ luaa dio ndɔɔ. Mɛɛ Choosiliŋ yiyaŋ a suɛi yɔŋnaŋnde hei okɔɔ, mbo dimi aa: “Mi sinaŋ naŋ chaa Chɛhowa wa ya dimullo ni aa, ‘I hini kɔl a num.’” I cho tonya maa, o cho waŋnda kpou le yaŋ nilaŋ o yooŋgu kɛndɛ naŋ dimi wo le. Kɛ ŋ nɔ tiindaŋndo maa, mi Chɛhowa naŋ kɔl te ŋ tosa pɛ o naŋ tiuba wo le acheleŋnda yooŋgu kɛndɔɔ dimullo.

17. Yɛɛ ŋ pɛɛku yɛ o nyɛ Viki dimi a sala baŋaa okɔɔ wo niŋ? (Sam 5:12)

¹⁷ Mi Chɛhowa soliŋ sala baŋaa kpeku le wanaa o hini kɔl a nda wa. (1 Timo. 2:​5, 6) Kɛ te o wa yɛ miŋ wa yiyaŋndo maa Chɛhowa hini kɔl a naa le, mi che bɛɛ ŋ dɔu laalaŋndo o sala baŋaa niŋ nduyɛ miŋ sɔla yiŋɔɔ? Loonuŋ maa, ŋ nɔ miŋ tiindaŋ yiyaŋnda naalaŋ teleŋ o teleŋ te, kɛ ŋ nɔ miŋ tiindaŋ Chɛhowa. Mbo che wanaa dɔu laalaŋndo o sala baŋaa niŋnda maa wanaa sakpo ndu o hɔl. Nduyɛ o mɛi lediom le nda dɔwɔɔ sala. (Nuawɔ Sam 5:12; Luomaŋ. 3:26) Mi yiyaŋndo o salaa baŋaa choo mala ndepilɛnɔ pilɛ diolaŋ Viki tau. Paale pilɛ, mɛɛ o wa yiyaŋndo a sala baŋaa okɔɔ, mbo dimi aa: “Chɛhowa biunuŋ ya niŋ le teleŋ vilɛi. Kɛ o dimi niŋ, i wa ko maa dimullo ya cho ndu ni aa: ‘Kaala numndo cho letuu le ya le. Nduyɛ sala soliaŋ Po numndo nɔla mbo kumbu hakila nilaŋ kpou le.’” Mɛɛ o yiyaŋ a sala baŋaa okɔɔ, mbo kandu sinaa maa Chɛhowa kaala ndu. Naa bɛɛ, te ŋ yiyaŋ pɛ a sala baŋaa okɔɔ, keŋ cho naa mala miŋ che maa Chɛhowa kaala naa vɛlɛ maa o hini kɔl a naa.

18. Te ŋ hiou pɛ lachi a Finya naa o choo choo niŋ kaalaa, tiindaŋ yɛɛ naŋ nɔ yɛ miŋ nɔ?

¹⁸ Mi che bɛɛ lepum ŋ cho wa kindiŋndo tau le nyɛ naŋ pɛɛku o buŋgɛi hei niŋndo dɔwɔɔ o wali niŋ, kɛ lepum ŋ cho wa kɔllo tambei, nduyɛ miŋ yiyaŋ maa Chɛhowa hini kɔl a naa le. Te keŋ yɔŋnuŋ pɛ, loonuŋ maa, Chɛhowa hini kɔl a “wanaa cho hiouwɔɔ lachi a ndu kaalaa wa.” (Chemi. 1:12) Lelaŋ, hiou lachi a ndu sɔɔŋguuwo ikɛi kpɛɛluŋ. Nduyɛ, nuuviaa nɛila o chɔm maa o hini kɔl a numndaŋ. Kɛsiŋ o kɔl lɔɔlɔɔ maa, o “cho levil a wana o wana le.”—Walta. 17:27.