July

Isua chuan a thilmak tihte pawh tiamin, a thusawi leh thiltih engkimah a Pa ngaihtuahna leh rilru vei zâwngte chu ṭha famkimin a lantîr a. (Joh. 14:9) Isua thilmak tihte aṭangin eng nge kan zir theih? Isua leh a Pa chuan min hmangaih hle. Leia a awm lai khân, Isua chuan mite a hmangaihzia chu a thilmak tihtheihna hmanga an hrehawm tawrhnate lâk bosakin a lantîr a. Ṭum khat chu mitdel pahnihin ṭanpui tûrin an ngên a. (Mt. 20:30-34) Isua’n anni chu “a khawngaih êm êm” avângin a tidam a ni tih chhinchhiah ang che. Heta “khawngaih êm êm” tia lehlin Grik thu mal hi chhûngril aṭanga khawngaihna nasa tak tihna a ni a. Chutiang khawngaihna nasa tak, hmangaihna târ lanna ni bawk chuan Isua chu rilṭâmte hrai tûr leh phârte tidam tûrin a chêttîr bawk a ni. (Mt. 15:32; Mk. 1:41) “Khawngaihna” Pathian Jehova leh a Fapa chuan min hmangaih hle a, kan hrehawm tawrhnate min tawrhpui tih kan chiang thei a ni. (Lk. 1:78; 1 Pet. 5:7) Anni chuan mihringte tihrehawmtu harsatna zawng zawngte nuai bo chu an nghâkhlel hle! w23.04 3 ¶4-5

Setana khawvêla ngaih dân lâr takte chhiar leh ngaihthlâk pumpelh tûrin theih tâwp kan chhuah thei a. Bible chhiara, zirin kan rilru chu ngaihtuahna ṭhatein kan tikhat thei a ni. Inkhâwmna leh rawngbâwlnaa telna chuan kan ngaihtuahna a vênghim bawk ang. Chu bâkah, Jehova chuan kan tawrh theih bâk thlêmna min tawrhtîr lovang tih min tiam bawk a ni. (1 Kor. 10:12, 13) He ni hnuhnûng hun khirh tak chhûnga Jehova chunga rinawm reng tûr chuan, tûn hma zawng aia nasa lehzuala kan ṭawngṭai a ngai a. Jehova chuan ṭawngṭaia ‘kan thinlung chu a hmaa leihbaw’ tûrin min duh a. (Sâm 62: 8) A thiltih zawng zawngte avângin Jehova fakin, lâwmthu hrilh ang che. Rawngbâwlnaa huaisenna pe tûr chein dîl la. Harsatna eng pawh tuar chhuak thei tûr leh, thlêmna i tawh theih eng pawh do thei tûrin a ṭanpuina ngên ang che. Jehova hnêna ṭawngṭai ziah tûrin eng thil mah, a nih loh leh tu mah indâltîr suh. w23.05 7 ¶17-18

Engvângin nge kohhran inkhâwmnaah kan tel? A chhan bul ber chu Jehova fak tûrin a ni a. (Sâm 26:12; 111:1) Hêng hun khirh tak chhûnga infuih tawn tûr pawhin kan inkhâwm bawk. (1 Thes. 5:11) Bân phara chhânna kan pêk hian chûng thiltum pahnihte chu kan tihlawhtling a ni. Mahse, kan tâna chhânna pêk tiharsa thei thilte a awm a ni. Chhânna pêk kan ngam lo mai thei a, a nih loh leh chhânna pêk chu kan duh hle a; mahse, kan duh anga zingin chhânna pe tûra koh kan ni lo thei. Chûngte chu engtin nge kan hmachhawn theih ang? Tirhkoh Paula chuan “infuih tawn” kan tum tlat tûr a ni tih a sawi a. Kan rinna târ langtu chhânna ho tê pêkna pawhin, mi dangte a tichak thei tih kan hre reng a nih chuan chhânna pêk hlauhna kan nei tlêm lehzual ang. Bân kan phar apianga koh kan nih loh pawhin, kohhrana mi dangte’n chhânna an pêk theih avângin kan hlim thei a ni.—1 Pet. 3:8. w23.04 20 ¶1-3

Thupêk chu chhuah a ni ta! Juda mi Babulona kum 70 vêl sala tâng tawhte chu an ram, Israel rama kîr leh tûrin an zalên ta. (Ezr. 1:2-4) Jehova chauhvin chu thil chu a thlentîr thei a ni. Engvângin nge chutianga kan sawi theih? Babulon mite chuan an salte chu an chhuah ngawt ngai lo va. (Is. 14:4, 17) Mahse, Babulon chu tihtlâwm a ni a, rorêltu thar chuan Juda mite chu an rama an kîr leh theih thu a hrilh a ni. Juda mi zawng zawng a bîk takin chhûngkaw lûte chuan thu tlûkna pawimawh tak an siam a ngai a. Chu chu thu tlûkna siam harsa tak a ni ngei ang. An zînga tam tak chu an upat tawh êm avângin chutianga hla chu an zin thei lo va. Chu bâkah, Juda mi tam zâwk chu Babulona piang an ni a, hmun dangah an la chêng ngai lo. An tân Israel chu an thlahtute ram mai a ni. Juda mi ṭhenkhat chu Babulonah chuan an hausa hle a, an in nuam takte leh an ei zawnnate kalsana, hriat ngai loh rama va awm chu an tân a harsa thei a ni. w23.05 14 ¶1-2

Pathian Thu chuan chhelna, khawngaihna leh hmangaihna nei chho zêl tûrin min fuih a. Luka 21:19 chuan: “In chhelin in nun in chhanhim ang,” tiin a sawi a ni. Kolossa 3:12 chuan: “Lainatna. . . chuan inthuam rawh u,” a ti bawk a. Chu bâkah, 1 Thessalonika 4:9, 10 pawhin: “Inhmangaih tawn tûrin nangmahni ngei Pathian zirtîrin in awm si a. . . . Nasa lehzuala ti zêl tûrin kan ngên a che u,” tiin a sawi bawk. Chûng thute chu chhelna, khawngaihna leh hmangaihna lo lantîr tawh zirtîrte tâna ziah a ni a. Keini pawh chutiang bawk chuan kan nei chhunzawm zêl tûr a ni. Min ṭanpuitu atân Kristian hmasate’n chûng miziate an lantîr dân chu ngaihtuah rawh. Tichuan, chûng zirtîrte kan entawn theih dân leh chumi entawnna aṭanga hrehawm nasa tak atân kan inpeih tih lantîr theih dân kan hria ang a. Chumi hnuah, hrehawm nasa tak a inṭan hunah chhel taka tawrh chhuah dân i hre tawh ang a, chhel taka tawrh zawm zêl i tum nghet tlat bawk ang. w23.07 3 ¶4, 8

Hriak thih kan ni emaw, “berâm dang” kan ni emaw, thlarau lam paradis leh Lalram malsâwmna lo thleng tûrte lama min hruai avângin “Thianghlimna Kawnga” kan kal reng a ngai a. (Joh. 10:16) C.E., kum 1919 aṭang khân, a hmei a pa a pui a pang mi maktaduai têlte chuan khawvêl sakhaw dik lo lalram, Babulon Khaw Ropui chu chhuahsanin chu entîr nei kawng chu an zawh ṭan a. Babulon chhuahsantu Juda mite tân Jehova’n kawnga tlûkna thlen thei thilte a paih bosak a. (Is. 57:14) Tûn laia “Thianghlimna Kawng” chungchâng hi eng nge ni ve? Kum 1919 thlen hma kum zabi tam tak aṭangin, Jehova chuan Pathian ṭihtu mipate chu Babulon Khaw Ropui aṭanga chhuahna kawng buatsaih tûrin a hmang a. (Isaia 40:3 nên khaikhin rawh.) Anni chuan a hnua mi rilru ṭhate’n sakhaw dik lo an chhuahsan theihna tûr leh, a mite ruala Jehova an biak theihna tûrin hna pawimawh tak, thlarau lam kawng buatsaihna hna chu an thawk a ni. w23.05 16 ¶8-9

Pathian Jehova chuan hlim tak leh inhuam taka a rawngbâwl tûrin min duh a. (2 Kor. 9:7) A nih chuan, tihchâkna kan neih loh lai pawhin thlarau lam thiltum hlen tûrin hma kan la zawm zêl ang em? Tirhkoh Paula entawn tûr siam hi lo ngaihtuah ta ila. Ani chuan: “Ka taksa ka tichhel a, ka thuhnuaiah ka dah tawh,” tiin a sawi. (1 Kor. 9:25-27) Paula chuan Pathian Jehova’n ti tûra a duhte tihchâkna a neih loh lai pawhin tih a tum hrâm hrâm a. Paula rawngbâwlna chu Jehova’n a pawm em? Pawm tehrêng mai! Jehova’n a ṭan lâkna chu mal a sâwm a ni. (2 Tim. 4:7, 8) Chutiang chiah chuan, tihchâkna kan neih loh lai pawha hma kan la zawm zêl tih a hmuh hian Pathian Jehova chu a lâwm a. Kan thiltih chu nuam kan tih vânga ti kan ni reng lo tih leh, amah kan hmangaih avânga ti kan ni tih a hriat hian ani chu a lâwm a ni. Pathian Jehova’n Paula mal a sâwm angin, keini pawh kan ṭan lâknaah mal min sâwm ve ngei ang. (Sâm 126:5) Chu bâkah, Jehova malsâwmna kan dawn hian tihchâkna kan nei ṭan leh hial thei a ni. w23.05 29 ¶9-10

Tirhkoh Paula chuan Jehova nîa dam khawchhuak lo tûrte chu muhîlte nên a tehkhin a. Anni chuan an chhehvêla thilthlengte leh hun liam chak dân chu an hre lo. Chuvângin, thilthleng pawimawh takte chu an hriat loh bâkah, chhân lêt nachâng pawh an hre lo a ni. Tûn laia mi a tam zâwkte chu thlarau lamah an muhîl a. (Rom 11:8) Anni chuan ‘ni hnuhnûngah’ kan awm tih leh hrehawm nasa tak chu a lo thleng thuai dâwn tih târ langtu thilthlengte chu an ring lo. (2 Pet. 3:3, 4) Amaherawhchu, kan tân harhvâng taka awm chu a ni têlin a pawimawh telh telh a ni. (1 Thes. 5:6) Engvângin nge rilru fîm leh nghet kan neih a ngaih? Tûn laia politics leh khawtlâng buainatea kan inhnamhnawih loh nân a ni. Jehova nî a hnaih zêl rualin, chûng thiltea ṭan lam nei tûra nawrna chu a nasa telh telh dâwn a. Mahse, chumi kan chhân lêt dân tûr chungchângah kan lungkham a ngai lo. Pathian thlarau chuan rilru fîm leh nghet neia, thu tlûkna fing takte siam thei tûrin min ṭanpui thei a ni.—Lk. 12:11, 12. w23.06 10 ¶6-7

Samsona tih hming i hriat hian i rilruah eng nge lo lang? Mi chak tak a nih dân i ngaihtuah ngei ang. Chu chu a dik a ni. Mahse, Samsona chuan thu tlûkna ṭha lo a siam avânga a rah chhuah ṭha lote a tuar a. Chuti chung pawhin, Jehova chuan Samsona nuna a lo rinawmnate chu en tlatin kan hlâwkpui atân Bible-ah a chuantîr a ni. Jehova chuan Samsona chu a hnam thlan Israel mite ṭanpui tûra thil ropui tak hlen chhuah nân a hmang a. Samsona thih hnu kum zabi tam takah Pathian thlarauva thâwk khumin tirhkoh Paula chuan rinawmna kawnga mi langsârte hming a ziahnaah Samsona hming pawh a telh a ni. (Heb. 11:32-34) Samsona entawn tûr siam chuan min tichak thei a. Dinhmun khirh tak a tawh lai pawhin Pathian Jehova a rinchhan tlat a. A entawn tûr siam aṭangin zir tûr ṭha tak tak kan zir theiin chakna kan hmu thei a ni. w23.09 2 ¶1-2

Kan rilru hahnate chu Jehova hnêna tih tak zeta thlen ziahin chhelna kan nei lehzual thei bawk a. (1 Thes. 5:17) Tûnah fiahna nasa tak i tâwk lo pawh a ni thei. Chutichung pawhin, lunghnualna, rilru chî-aina leh thaw-ipikna i neih apiangin Jehova kaihhruaina i zawng em? Nî tina i tawh buainate hmachhawn thei tûra ṭanpui tûr chein Pathian i pan ṭhîn a nih chuan, nakin huna buaina lian zâwk i hmachhawn hunah pawh chutianga tih chu i hreh lo vang a. Ani chuan nangmah ṭanpui hun tûr dik tak leh ṭanpui dân tûr che a hria tih i chiang ang. (Sâm 27:1, 3) Tûnah fiahnate chhel taka kan tuar chhuak a nih chuan, hrehawm nasa tak a lo thlen hunah pawh chhel takin kan tuar chhuak thei ngei ang. (Rom 5:3) Engvângin nge chutianga kan sawi theih? Unau tam tak chuan fiahnate rinawm taka an lo tawrh chhuahnain buaina dangte chhel taka tuar chhuak tûrin a ṭanpui tih an hria a. An chhelna chuan Jehova chu ṭanpui tûrin a inpeihin, a inhuam reng tih an rinna chu a tinghet lehzual a ni. Chuvângin, rinna chuan fiahna lo awm tûrte tuar chhuak thei tûrin a ṭanpui a ni.—Jak. 1:2-4. w23.07 3 ¶7-8

Jehova inngaihtlâwmna leh khawngaihna chuan a âwm tâwk taka thil ti tûrin a chêttîr a. Entîr nân, Sodom khuaa mi suaksualte a tihboral dâwn khân inngaihtlâwmna a lantîr a ni. A vântirhkohte hmangin mi fel Lota chu tlânga tlânchhe tûrin a hrilh a. Lota chuan chuta tlânchhiat chu a hlau a ni. Jehova tihboral tûr zînga tel, Zoar khaw te tak têa chhûngkuaa tlânchhiat a dîl a. Jehova chuan a hrilh anga thil ti tûrin Lota chu a tilui thei a. Mahse, Lota ngenna chu phalsakin Zoar chu a zuah ta zâwk a ni. (Gen. 19:18-22) Kum za tam tak hnuah, Jehova chuan Ninevi khuaa mite chungah khawngaihna a lantîr a. Zâwlnei Jona chu, chu khua leh a chhûnga chêng mi suaksualte tihboral an nih tûr thu puang tûrin a tîr a. Mahse, Ninevi khuaa mite an inlamlêt chuan Jehova’n anni chu khawngaihin a tiboral ta lo a ni.—Jon. 3:1, 10; 4:10, 11. w23.07 21 ¶5

Joasa chanchin aṭangin eng nge kan zir theih? Ani chu zung kaih nghet lo tak, ban rinchhana ding, thing ang a ni a. Chu ban—Jehoiada—a awm loh hnu chuan, kalpênna thlî chuan Joasa chu a chhêm thlu ta a ni. Hei hian kan chhûngte leh kohhrana mi dangte’n kan tân entawn tûr an siam avâng chauhva Pathian thu awih kan ni tûr a ni lo tih a târ lang chiang hle. Jehova hnaih reng tûr chuan inzirna te, chhût ngunna te, leh ṭawngṭainate nei ziahin amah hmangaihna leh zahna chu kan tithûk tûr a ni. (Jer. 17:7, 8; Kol. 2:6, 7) Jehova chuan kan lakah thil tam tak a phût lo va. A thil phûtte chu Thuhriltu 12:13 chuan: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin a khaikhâwm a ni. Pathian kan ṭih chuan kan tawh tûr fiahnate chu kan hmachhawn thei ang a, kan ding chang thei ang. Chu bâkah, Jehova nêna kan inṭhianna chu eng thil mahin a tichhe thei bawk hek lo vang. w23.06 19 ¶17-19

Pathian thutiam chu: “Lalṭhutphaha ṭhu chuan,” tiin a inṭan a. (Thup. 21:5a) Hei hi Jehova ngeiin Thu Puan bu-a inlârnaahte thu a sawi ṭum thum zînga ṭum khat a ni. Chuvângin, he thutiam nemnghehna hi vântirhkoh thiltithei tak emaw, tho leh Isua emaw ni lovin Jehova ngeiin a pêk a ni a. Chu chuan a dawta thute kan rinngheh theih chhan chu a tichiang lehzual a ni. Engvângin nge? Jehova chu Pathian “dâwt sawi thei lova” a nih vâng a ni a. (Tit. 1:2) He thu hian Thu Puan 21:5, 6-a thute rin tlâkzia a târ lang a ni. “Ngai teh” tih thu mal hi han ngaihtuah teh. “Ngai teh” tih ṭawngkam hi Thu Puan bu-ah vawi eng emaw zât hman a ni a. A chhunzawmnaah Pathianin eng nge a sawi? “Thil engkim ka siam thar e,” tiin a sawi a ni. Jehova chuan nakin huna inthlâkthlengna lo awm tûrte chungchâng a sawina ni mah se, chu thutiam chu a thlen famkimtîr ang tih a chian êm avângin thilthleng tawh angin a sawi a ni.—Is. 46:10. w23.11 3-4 ¶7-8

Tirhkoh Petera chuan a chak lohnate avângin harsatna a la nei reng tho va. Thilthleng ṭhenkhat lo ngaihtuah ta ila. Isua’n Bible hrilh lâwk anga hrehawm tuara a thih tûr thu a sawi khân Petera’n ani chu a zilh a. (Mk. 8:31-33) Tirhkoh dangte nên ropui ber nih tumin an inhnial fo a ni. (Mk. 9:33, 34) Isua thih hma zân khân Petera’n mi pakhat chu beiin a beng a sah thlâksak a. (Joh. 18:10) Chumi zân vêk chuan, a hlauhna thununa awmin a ṭhian Isua chu vawi thum lai a phat bawk. (Mk. 14:66-72) Chuvângin, a hnuah Petera chu a ṭap ta zawih zawih a ni. Isua chu a tirhkoh lunghnual tak chungah a beidawng lo. A thawhleh hnuah, Petera chu amah a la hmangaih tih lantîr theihna hun remchâng a pe a. Isua’n ani chu inngaitlâwm taka a berâmte vêng tûrin a sâwm a ni. (Joh. 21:15-17) A sâwmna chu Petera’n lâwm takin a pawm a. Ani chu Pentikost nîa Jerusalema thlarau thianghlima hriak thih hmasakte zîngah a tel a ni. w23.09 22 ¶6-7

Tirhkoh Petera chuan upa dangte chu “Pathian pâwlho awmte enkawl” tûrin a fuih a. (1 Pet. 5:1-4) Upa i nih chuan i unaute chu i hmangaihin ngaihsak i duh tih kan hria a ni. Mahse, i buai lutuk emaw, i chauh lutuk emaw avângin chu chanvo chu hlen thei lo nia inhriat châng i nei mai thei. Eng nge i tih theih? Jehova hnênah i rilru hahnate chu hrilh ang che. Petera chuan: “Rawngbâwltu pawhin Pathianin chakna a pêk angin bâwl rawh se,” tiin a ziak a ni. (1 Pet. 4:11, C. L. Re-edited.) I unaute chuan he khawvêla chinfel theih loh buainate chu an hmachhawn thei a. “Berâm vêngtu lalber” Isua Krista chuan i tihtheih aia nasain a ṭanpui thei che tih hre reng ang che. Chu chu tûnah leh khawvêl tharah pawh a ti thei a ni. Pathianin upate chu an unaute hmangaih tûr te, ngaihsak tûr te leh, “berâmte tâna entawn tûr” siam tûrtein a duh a ni. w23.09 29-30 ¶13-14

Ṭanchhan atâna mihringte ngaihtuahna hman chu kan pumpelh tûr a ni. Mihring ngaihtuah dâna thil kan thlîr a nih chuan Jehova leh a tehnate chu kan hnâwl thei a. (1 Kor. 3:19) “He khawvêl finna” hian mite chu Pathian thu zâwm lo tûrin a thunun ṭhîn a ni. Pergamos khua leh Thuatira khuaa Kristian ṭhenkhat chu milem biakna leh nungchang bawlhhlawhna kawngah an chheh vêla mite thununin an awm a. Isua chuan chu kohhran pahnih chu nungchang bawlhhlawhna an pawisak loh avângin zilhna khauh tak a pe a ni. (Thup. 2:14, 20) Tûn laiah pawh, kan chheh vêla mite chuan an ngaih dân dik lote pawm tûrin min thunun an tum thei a. Kan chhûngte leh kan hmêlhriatte chuan kan khirh lutuk tia sawiin, Jehova dânte zâwm lo tûrin min hmin an tum thei a ni. Entîr nân, thianghlim taka nun chu a pawimawh lova, nungchang lama Bible tehnate chu hmân lai tawh lutuk angin an sawi mai thei bawk. Jehova kaihhruaina min pêkte chu chiang tâwk lo anga hriat châng kan nei thei a. ‘Thu ziakte khûm tûra’ thlêm kan ni thei bawk.—1 Kor. 4:6. w23.07 16 ¶10-11

Isua nu Mari chuan chakna a mamawh a. Ani chuan pasal nei si lovin nau a pai dâwn a. Fa enkawl dân chungchângah thiltawn a nei lo va, Messia la ni tûr naupang chu a enkawl dâwn a ni. Chu bâkah, a pasal hual Josefa nên an la awm dûn ngai lo va, engtin nge chûng zawng zawng chu Josefa hnênah chuan a hrilhfiah tâk ang? (Lk. 1:26-33) Engtin nge Mari chuan a mamawh chakna chu a neih? Mi dangte hnên aṭangin ṭanpuina a zawng a ni. Entîr nân, a chanvo chungchânga a hriat duhte chu vântirhkoh Gabriela a zâwt a. (Lk. 1:34) A hnu lawkah, a laichînnu Elizabeti tlawh tûrin “thingtlângah” Judai rama khaw pakhatah a kal ta a ni. Chu chu a hlâwkpui hle a. Elizabeti chuan Mari chu a fak a, Pathian thlarauva thâwk khumin a fapa lo piang tûr chungchânga Jehova hrilh lâwkna phûrawm tak chu a hrilh a ni. (Lk. 1:39-45) Chu chu Mari chuan Jehova’n “a bâna a tha chakzia a entîr” angin a sawi a. (Lk. 1:46-51) Jehova chuan Mari chu Gabriela leh Elizabeti hmangin a tichak a ni. w23.10 14-15 ¶10-12

Krista zirtîr tlêm tê chauh thlarau thianghlima hriak thih an ni a, anni chuan Jehova nêna inlaichînna danglam tak an nei a ni. Chûng mi 1,44,000 te chuan vânah Isua nên puithiam angin rawng an bâwl ang. (Thup. 14:1) Biak bûka Hmun Thianghlim chuan leia an awm laia Pathian fate ni tûra thlarauva hrin an nihna chu a entîr a. (Rom 8:15-17) Biak bûka Hmun Thianghlim Ber chuan Jehova awmna vân a entîr a ni. Hmun Thianghlim leh Hmun Thianghlim Ber daidangtu “puanzâr” chuan thlarau lam biak ina Puthiam Lalber ropui tak a nih anga vâna lût thei lo tûra Isua dâltu a lei taksa a entîr a. Mihringte tlan nân a lei taksa chu hlânin, Kristian hriak thih zawng zawngte tân vân nunna kawng a hawng a ni. Chûng hriak thihte chuan vâna an lâwmman dawng tûrin an lei taksa an kalsan a ngai bawk.—Heb. 10:19, 20; 1 Kor. 15:50. w23.10 28 ¶13

Gideona chuan Ephraim hovin an sawisêl khân thuhnuairawlh takin a chhâng lêt a. (Ro. 8:1-3) Thinur takin a chhâng lêt lo. Rilrua inphah hniam takin an thusawi chu a ngaihthlâksak a, tichuan remhre takin dinhmun sosâng tûr chu a tidai a ni. Upa fing takte chuan sawisêl an nih hunah ṭha taka ngaithlain, leh thuhnuairawlh taka chhâng lêtin Gideona an entawn a. (Jak. 3:13) Chutiang chuan kohhranah remna an awmtîr a ni. Midian-ho an hneh avânga chawimawi a nih khân Gideona chuan chawimawina zawng zawng Jehova hnênah a hlân a. (Ro. 8:22, 23) Engtin nge upate’n Gideona an entawn theih? An thil hlen chhuahte avângin Jehova an chawimawi tûr a ni. (1 Kor. 4:6, 7) Entîr nân, upa pakhat chu mite zirtîr thiam tak a nih avânga fak a nih hunah, ani chuan chutianga a tih theih chhan chu zirtîrna lo chhuahna hnâr Pathian Thu, a nih loh leh Jehova inawpna pâwl aṭanga kan dawn zirtîrna vâng a ni tih a sawi thei a. A châng chuan upate chuan ṭûl lo takin mi dangte ngaihven hlawh duhna an neih leh neih loh an ngaihtuah thei a ni. w23.06 4 ¶7-8

Ṭawngṭaia kan thil dîlte kan dawng lo a nih chuan, ‘Ka thil dîl hi a dik em?’ tiin kan inzâwt thei a. Kan tâna ṭha ber tûr chu hria niin kan inngai ṭhîn a. Mahse, kan thil dîlte chu kan tâna ṭha ber tûr a ni lo thei. Buaina chungchângah kan dîl a nih chuan, kan dîlna aia ṭhaa chinfel dân kawng a awm thei a ni. Kan dîlnate chu Jehova duh zâwng nêna inmil loh châng pawh a awm thei a. (1 Joh. 5:14) ) Entîr nân, thutaka an fate awm reng tûra Jehova hnêna dîltu nu leh pate entîrna hi han ngaihtuah teh. Chu chu dîl âwm tak angin a lang a. Mahse, Jehova chuan tu mah hi a rawngbâwl tûrin a tilui lo. Ani chuan kan fate pawh tiamin, kan vai hian duh thlanna avânga amah be tûrin min duh a ni. (Deut. 10:12, 13; 30:19, 20) Chuvângin, nu leh pate chuan an fate chu Jehova hmangaih tûr leh A ṭhian ni tûra an thinlung hmin thei tûra ṭanpui tûrin Jehova ṭanpuina an dîl zâwk thei a ni.—Thuf. 22:6; Eph. 6:4. w23.11 21 ¶5; 23 ¶12

Engvângin nge mi dangte kan thlamuanna chu anmahni kan hmangaihna lantîr theih dân kawng pawimawh tak a nih? Bible hrilhfiahna lehkhabu pakhat sawi dân chuan, “thlamuan” tih Paula thu mal hman awmzia chu “dinhmun khirh tak tuar, tu emaw chu amah tichak tûra a bula ding” tihna a ni. Chuvângin, hrehawm tuar unaute kan thlamuan hian rinawm taka Jehova rawngbâwl zawm zêl tûrin anni chu kan ṭanpui a ni. Kan unaute kan thlamuan apiang hian hmangaihna kan lantîr a ni. (2 Kor. 7:6, 7, 13) Khawngaihna rilru put hmang leh mite thlamuanna chu awmze inhnaih tak a ni a. Eng kawngin nge? Mi khawngaih thei tak chuan hrehawm tuarte chu a thlamuanin, a ṭanpui a ni. Chuvângin, khawngaihna rilru kan neihna chuan mi dangte thlamuan tûrin min chêttîr a ni. Paula’n Jehova mite a khawngaihna leh a thlamuanna a thlun zawm dân hi lo chhinchhiah ang che. Ani chuan Jehova chu “khawngaihnate Pa leh thlamuanna zawng zawng Pathian,” tiin a târ lang a ni.—2 Kor. 1:3. w23.11 9-10 ¶8-10

Krista hnungzuitu zawng zawng chuan hrehawm tawrh kan beisei thei a. Tirhkoh Paula chungchâng hi han ngaihtuah teh. Ani chuan Thessalonika khuaa mite hnênah: “In hnêna kan awm lai khân hrehawm tuar tûr kan ni tih kan hrilh lâwk ngei che u kha; chutiang ngei chuan a thleng tawh,” tiin a sawi a. (1 Thes. 3:4) Chu bâkah, Korinth khuaa mite hnênah pawh: “Unaute u, . . . kan chunga hrehawm thleng thu kha in hriat loh kan duh lo va, . . . nun rêng pawh beisei lo khawp hiala delh beha kan awm kha,” tiin a ziak a ni. (2 Kor. 1:8; 11:23-27) Tûn laia Kristiante pawhin hrehawm tawrh kan beisei thei a. (2 Tim. 3:12) Isua i rin a, a hnung i zui avângin i ṭhiante leh chhûngkhat lainate’n an nuihsawh mai thei che a. Kawng engkimah dik taka thiltih i tum tlat avângin i hnathawhnaah buaina i tâwk tawh em? (Heb. 13:18) I beiseina chungchâng mi dangte i hrilh avângin sawrkâr thuneitute dodâlna i hmachhawn tawh em? Kan hrehawm tawrh chu eng pawh ni se, Paula chuan kan lâwm tûr a ni tih a sawi a ni. w23.12 10-11 ¶9-10

Jakoba chuan harsatna tam tak a tuar a. Jakoba fapa pahnih, Simeona leh Levia te chuan an chhûngkaw hming leh Pathian Jehova hming an tichhia a. Chu bâkah, Jakoba nupui duh tak Rakili chu fa pahnihna a hrin laiin a thi a ni. Ṭâm nasa tak a tlâk avângin, a tar lamah Jakoba chu loh theih lohva Aigupta rama a pêm a ngai bawk. (Gen. 35:16-19; 37:28; 45:9-11, 28) Hêng zawng zawngah hian Jakoba chuan Jehova leh A thutiamte a rinna a hloh ngai lo va. Chuvângin, Jehova’n A duhsak a hlawh tih a hriattîr a ni. Entîr nân, Jehova’n Jakoba chu tisa lamah mal a sâwm a. Hun rei tak chhûng thi tawha a ngaih, a fapa Josefa nêna an inhmuh laia Jehova chunga Jakoba lâwm dân tûr chu han mitthla teh! Jehova nêna an inṭhian ṭhatna chuan Jakoba chu a harsatna tawhte hlawhtling takin a hmachhawntîr thei a ni. (Gen. 30:43; 32:9, 10; 46:28-30) Keini pawhin Jehova nêna kan inṭhian ṭhatna kan vawng tlat a nih chuan, beisei loh harsatnate chu hlawhtling takin kan hmachhawn ve thei ang. w23.04 15 ¶6-7

Sâm 23-na chu Jehova hmangaihna leh ngaihsakna rinnghehna târ lanna hla a ni a. Fakna hla phuahtu Davida chuan amah leh a Berâmpu Jehova inkâra inlaichînna nghet tak chu a târ lang a ni. Ani chuan Jehova a inkaihhruaitîr avângin him niin a inhria a. Chuvângin, ani chu a rinchhan pumhlûm a ni. Jehova’n a hmangaihna chu a chungah nî tin a lantîr dâwn tih a hria a. Engin nge Davida chu rinnghehna neihtîr? Jehova’n a mamawh zawng zawng a pêk ṭhin avângin Davida chuan ṭha taka ngaihsak niin a inhria a. Ani chuan Jehova nêna inṭhian ṭhatna neiin a duhsak a hlawh bawk. Chuvângin, nakin hunah eng thil pawh thleng mah se, a mamawhte chu Jehova’n a ngaihsak chhunzawm zêl ang tih a chiang a ni. Davida chuan Jehova’n a hmangaih tih leh a ngaihsak reng dâwn tih a rin tlat avângin, chu chuan lungkhamna nei lova, hlimna leh lungawina nei tûrin a ṭanpui a ni.—Sâm 16:11. w24.01 29 ¶12-13

Indopui II-na hnu lam aṭang chuan, Jehova mite chuan ram tam takah zalên takin thu an hril a. Thu hrilhna chu nasa takin a ṭhang chho va ni. Tûn laiah, Governing Body member-te chuan kaihruaitu atân Krista an rinchhan chhunzawm zêl a. Unaute hnêna an kaihhruaina pêkte chu vân lam thil thlîr dân nên inmiltîr an duh a ni. Tichuan, bial kantute leh kohhran upate hmangin kohhran hnênah kaihhruaina an pe a. Kohhran upate chu Krista ‘kut ding lamah’ an awm a ni. (Thup. 2:1) Mahse, chûng kohhran upate chu ṭha famkim lo an nih avângin thil tihsual chângte an nei a. Mosia leh Josua chuan tirhkohte ang bawkin thil tihsual châng an nei a ni. (Num. 20:12; Jos. 9:14, 15; Rom 3:23) Mahse, Krista chuan bâwih rinawm fing leh thlarau thianghlima ruat kohhran upate chu fîmkhur takin a kaihruai a. “Khawvêl tâwp thleng pawhin” chutiang chuan a ti zawm zêl ang. Chuvângin, kaihruai tûra a ruatte hmanga kaihhruaina min pêkte chu rinna tûr chhan ṭha tak kan nei a ni. w24.02 23-24 ¶13-14

Tûn laiah pawh a chunga kan lâwmzia leh amah kan hmangaihzia sawi chhuakin Jehova kan tilâwm thei a. Rawngbâwlnaa kan thiltum ber chu mite Jehova lama hîp a, kan Pa duh tak chunga kan rilru put hmang ang nei ve tûra ṭanpui hi a ni tih kan hre reng a. (Jak. 4:8) Bible-in Jehova hmangaihna, a rorêl dikna, a finna, a thiltihtheihna leh, a mize dang duhawm takte a târ lan chu mite hnênah phûr takin kan hrilh a ni. Theih tâwp chhuaha amah entawnin Jehova chu kan fakin kan tilâwm bawk. Chutianga kan tih chuan, khawvêl suaksual tak laka kan danglamzia kan lantîr thei ang a. Mite chuan kan danglamzia an hmuh hian, chutianga kan awm chhan chu an rawn ngaihven thei a ni. (Mt. 5:14-16) Nî tina anmahni nêna kan indâwrnaah kan danglam chhante kan hrilhfiah thei a. Chu chuan mi rilru ṭha pute chu kan Pathian lamah a hîp thei a ni. Chutiang kawnga Jehova kan fak chuan, a thinlung kan tilâwm ang.—1 Tim. 2:3, 4. w24.02 10 ¶7

Kristian mipa puitling tak ni tûr chuan thiamna ṭangkai tak i neih a ngai a. Chûng thiamnate chuan kohhrana mawhphurhnate la thei tûrin a ṭanpui ang che a, mahni leh i chhûngkaw mamawh phuhrûknaah a ṭanpui theih che bâkah, mi dangte nên inlaichînna ṭha a neihtîr thei che a ni. Entîr nân, ziak leh chhiar thiam zir rawh. Bible chuan mi hlim thei tak leh mi hlawhtling tak chuan nî tin Pathian Thu chhiarin, a thu chhiarte chu a chhût ngun ṭhîn tih a sawi a. (Sâm 1:1-3) Nî tina Bible chhiarna chuan ani chu Pathian Jehova ngaihtuah dân kawngte a hriattîrin, chu chuan chiang taka ngaihtuah dân leh Bible thute nunpui dân hre tûrin a ṭanpui a ni. (Thuf. 1:3, 4) Kan unaute chuan Bible aṭanga zirtîrna leh thurâwnte pe thei unaupa puitling takte an mamawh a. Ṭha taka ziak leh chhiar thiam i nih chuan, mi dangte rinna tichak thei chhânnate leh thusawite bâkah, thusawi bengvârthlâk takte pe tûrin i inbuatsaih thei dâwn a ni. Chutianga chhinchhiahna chuan i rinna tinghet tûr leh mi dangte fuih tûrin a ṭanpui thei ang che. w23.12 26-27 ¶9-11

Hlauhna i neih hian, Setana awm tawh loh hun nakina Jehova la tih tûrte chu chhût ngun ang che. Kum 2014 regional inkhâwmpui lemchan pakhat chuan pa ber leh a chhûngte chuan 2 Timothea 3:1-5-naa thute chu Paradis chungchâng hrilh lâwkna thute nên thlâk danglam ni ta se, a danglam dân tûr chu heti hian an sawiho a ni: “Khawvêl tharah chuan hun hlimawm berte a lo awm ang a. Mi, mi dang hmangaihtu te, thlarau lam ngainatu te, thuhnuairawlh te, inngaitlâwm te, Pathian faktu te, nu leh pa thu âwih te, lâwm nachâng hria te, thianghlim te, hmangaihna pianpui nei te, mi hawihhâwm te, mi ṭhatna sawi ṭhîntu te, insûm thei te, mi ngilnei te, ṭhatna ngainatu te, mi rinawm te, inphahhniam te, mi hnuaihnung te, mahni lâwmna aia Pathian hmangaih zâwk te, Pathian ngaihsakna dik tak chêttîra awmte an ni ang, chutiang mite chu hnaih tlat rawh,” tiin. Khawvêl thara nun dân tûr chungchâng chu i chhûngte nên emaw, Kristian unaute nên emaw in sawiho tawh em? w24.01 6 ¶13-14

Jehova chuan a mite chu a huhovin a lâwm tih hriat chu a va thlamuanthlâk tak êm! Bible chuan: “LALPA chu a mite chungah a lâwm si ṭhîn,” tiin a sawi a. (Sâm 49:4) Mahse, mi ṭhenkhat chuan an lunghnual êm avângin, ‘Jehova lawm hlawh ka ni ve ang em?’ tia ngaihtuah châng an nei a. Bible hun laia Jehova betu mi rinawm ṭhenkhat pawhin chutianga rinhlelhna neih châng chu an nei a ni. (1 Sam. 1:6-10; Job. 29:2, 4; Sâm 51:11) Bible chuan mi ṭha famkim lote’n Jehova lawm an hlawh thei tih chiang takin a târ lang a. Engtin nge? Isua Krista chunga rinna lantîra baptisma kan chan a ngai a ni. (Joh. 3:16) Chutianga tiin, vântlâng hmaah kan sualte kan simin Pathian duh zâwng ti tûrin kan intiam tih kan târ lang a. (Tirh. 2:38; 3:19) Chutianga Jehova nêna inlaichînna ṭha siam kan tumna chuan ani chu a tilâwm a ni. Kan inpumpêkna thutiam mila nung tûra theih tâwp kan chhuah chhûng chuan Jehova lawm kan hlawhin a ṭhian ṭhate kan ni thei ang.—Sâm 25:14. w24.03 26 ¶1-2

Sawrkâr thuneitute’n thu hril tawh lo tûra thu min pe chung pawha hril zawm zêlin, zirtîrte kan entawn thei a. Keini pawhin kan rawngbâwlna hlen chhuak tûrin Jehova’n min ṭanpui ang tih kan ring tlat thei a. Huaisenna leh finna dîla ṭawngṭai bâkah, harsatnate hmachhawn thei tûrin Jehova hnênah a ṭanpuina dîl rawh. Kan zînga tam tak chuan hmangaih tak chânna te, chhûngkaw dinhmun khirh tak te, tihduhdahna te, a nih loh leh thil dangte avângin tisa leh rilru lamah harsatna kan tâwk a. Hripui lêng leh indona te chuan chûng harsatnate chu hmachhawn a tiharsa lehzual a ni. Jehova hnênah i thinlung leih baw rawh. I ṭhian ṭha tak hnêna i hrilh ang maiin i dinhmun chu hrilh la. Jehova’n i tân “a ti vek ang” tih ring tlat ang che. (Sâm 37:3, 5) Ṭawngṭai fan fanna chuan ‘hrehawm tuarna kawnga chhel’ tûrin min ṭanpui ang. (Rom 12:12) Jehova chuan amah betute tawrhna chu a hria a—ṭanpui dîla “an au thâwm a hria” a ni.—Sâm 145:18, 19. w23.05 5-6 ¶12-15

Thu tlûkna pawimawh tak kan siam a ngaih hunah “Lalpa duh zâwng eng nge ni tih” hriat kan tum ang a, chumi mil chuan kan ti tûr a ni. (Eph. 5:17) Kan dinhmun nêna inmil Bible thu bulte hriat tumin, chumi chungchânga Pathian thlîr dân chu hriat kan tum a ni. A thu bulte kan zawm chuan thu tlûkna fingte kan siam thei leh zual ang. “Mi sual,” kan hmêlma Setana chuan Pathian rawngbâwlnaa hun pe thei lo khawpa he khawvêl thilte ûma buai tûrin min duh a ni. (1 Joh. 5:19) Kristian zawng zawngte tân Jehova rawngbâwlna aiin sum leh pai, ei zawnna leh, zirna sâng ûmte chu dah hmasak a awl hle a. Chutianga titu chuan khawvêl ngaihtuahna thununin a awm tih a târ lang a ni. Chûng thilte chu thil sual ni lo mah se, kan nunah kan dah hmasa ber tûr a ni lo. w24.03 24 ¶16-17