Tiurai

Ua pee Iesu i te hiˈoraa o to ˈna Metua ma te tia roa na roto i ta ˈna mau parau, ohipa e semeio. (Ioa. 14:9) Eaha ta tatou e nehenehe e huti mai i te mau semeio a Iesu? Mea here roa na Iesu e na to ˈna Metua ia tatou. I nia i te fenua, ua faaite Iesu i to ˈna here rahi ma te faaohipa i to ˈna mana no te tauturu i te feia tei mauiui. I te hoê taime, ua taparu atu e piti tane matapo ia tauturu ia raua. (Mat. 20:30-34) “Aroha ihora Iesu ia raua” e faaora ˈtura oia ia raua. E faaohipahia te taˈo Heleni hurihia “aroha” no te faaite i te aumihi mau. Na teie aumihi î i te here i turai ia Iesu ia faatamaa i tei poia e ia faaora i te hoê lepera. (Mat. 15:32; Mar. 1:41) Ia papu ia tatou e mea here na Iehova, te Atua “aumihi î i te here,” e na ta ˈna Tamaiti ia tatou e te taa ra ia raua to tatou mauiui. (Luka 1:78; Pet. 1, 5:7) Te tiai ru nei raua i te faaore roa i te mau fifi atoa o te huitaata. w23.04 3 par. 4-5

E tutava anaˈe ïa i te ore e taio aore ra e faaroo i te mau manaˈo tano ore itehia i roto i te ao a Satani. E nehenehe tatou e faaî i to tatou feruriraa i te mau manaˈo maitatai ma te taio e te haapii i te Bibilia, ma te apiti i te putuputuraa e i te pororaa. A na reira ˈi, te fafau mai ra Iehova eita o ˈna e vaiiho ia tamatahia tatou hau aˈe i ta tatou e nehenehe e faaruru. (Kor. 1, 10:12, 13) Mea faufaa ia tamau tatou tataitahi i te pure. No te aha? No te mea te ora nei tatou i te mau mahana hopea, mea faufaa ïa te pure no te vai taiva ore ia Iehova. Te hinaaro ra hoi Iehova ia ‘haamahora outou i to outou aau’ na roto i te pure. (Sal. 62:8) A arue ia Iehova e a haamauruuru ia ˈna no te mau mea atoa ta ˈna e rave no outou. A taparu i ta ˈna tauturu no te faaoromai tamau i te mau fifi e rave rau e no te mau papu i mua i te tamataraa. Eiaha e vaiiho i te tahi noa ˈˈe mea e tapea ia outou ia tamau i te pure ia Iehova. w23.05 7 par. 17-18

No te aha tatou e pahono ai i te putuputuraa? Na mua roa, no te arue ia Iehova. (Sal. 26:12; 111:1) E apiti atoa tatou i te mau putuputuraa no te faaitoito te tahi i te tahi i te tau fifi ta tatou e ora nei. (Tes. 1, 5:11) Ia pahono tatou i te putuputuraa, ua naea ia tatou tera e piti fa. Ia horoa râ tatou i te pahonoraa, e taiâ paha tatou i te pahono. Aore ra, ua rahi roa to tatou anaanatae e pahono, e hinaaro râ tatou ia ui pinepine aˈe te taeae faatere ia tatou. E nafea ïa tatou? Ua parau te aposetolo Paulo e ta tatou fa, ‘ia faaitoito ïa tatou te tahi i te tahi.’ Ia ite tatou e ua itoitohia vetahi ê maoti te hoê pahonoraa poto noa, e anaanatae atu â tatou i te horoa i te pahonoraa. E aita anaˈe tatou e ui-pinepine-hia, e oaoa noa tatou no te mea ua nehenehe te tahi atu e horoa i te pahonoraa.​—Pet. 1, 3:8. w23.04 20 par. 1-3

Ua horoa te arii i ta ˈna faaotiraa. Ua tiamâ te ati Iuda tei hopoi-ê-hia i Babulonia a 70 matahiti na mua ˈtu. E nehenehe ïa ta ratou e hoˈi i to ratou fenua aiˈa, o Iseraela. (Ezr. 1:2-4) Papu, o Iehova to muri mai, inaha aita o Babulonia e tuu hanoa i te feia ta ˈna i hopoi ê. (Isa. 14:4, 17) Ua tahuri râ te faatereraa a te arii tahito o Babulonia, e ua faatia te arii apî ia faarue te ati Iuda i te fenua. Pauroa te ati Iuda, te mau upoo utuafare iho â râ, te tia ia rave i te hoê faaotiraa: e faarue anei i Babulonia aore ra e faaea noa i reira. E ere te reira i te hoê faaotiraa ohie ia rave. Ua paari roa paha vetahi no teie tere rohirohi mau. E i te mea e, ua fanauhia e ua paari te rahiraa o ratou i Babulonia, tera noa te fenua ta ratou i matau. No ratou, e fenua Iseraela o to ratou mau tupuna. E oraraa fanaˈo atoa to vetahi i Babulonia, ua haapeapea paha ratou i te faarue i to ratou mau fare au mau e ta ratou imiraa faufaa no te ora i te hoê fenua ta ratou i ore i matau. w23.05 14 par. 1-2

Te faaitoito mai ra te Bibilia ia faatupu i te faaoromai tamau, te aumihi e te here. Te na ô ra te Luka 21:19: “I to outou faaoromai tamau e ora ˈi outou.” I roto i te Kolosa 3:12 te taiohia ra e: “Ia ahu mai outou i . . . te aumihi.” E te parauhia ra i roto i te Tesalonia 1, 4:9, 10: “Ua haapiihia hoi outou e te Atua ia here te tahi i te tahi. . . . Taeae ma, te faaitoito atu nei râ vau ia outou ia na reira noa ˈtu â.” Ua papaihia teie mau irava no te mau pǐpǐ tei faaite aˈena i tera mau huru maitatai. Ua titauhia râ ia ratou ia tamau i te na reira. Hoê â huru ïa no oe. No reira, e hiˈopoa oe mea nafea te mau Kerisetiano matamua i te faaiteraa i teie mau huru maitatai. I muri mai, e ite oe e nafea ia pee i to ratou hiˈoraa e ia faaite e ua ineine oe no te ati rahi. Ua haamata anaˈe te ati rahi, ua haapii ïa oe e nafea ia faaoromai tamau e e tamau oe i te na reira. w23.07 2 par. 4; 3 par. 8

No roto anei tatou i te feia faatavaihia aore ra te mau “mamoe ê atu,” e titauhia ia tatou ia tamau i te haere na nia i “te Eˈa o te moˈaraa” no te fanaˈo i te mau haamaitairaa a te Faatereraa arii na roto atu i te paradaiso pae varua. (Ioa. 10:16) Mai 1919 mai â, e mirioni tane, vahine e tamarii tei faarue ia Babulonia rahi, oia hoi te taatoaraa o te mau haapaoraa hape, no te haere na nia i taua eˈa taipe ra. I to te ati Iuda faarueraa ia Babulonia, ua haapao maitai Iehova ia faaorehia te mau ohipa atoa o te faataupupu i te tere. (Isa. 57:14) E i teie mahana? E rave rahi hanere matahiti hou 1919, ua faaohipa Iehova i te taata o tei mǎtaˈu ia ˈna ei faaineineraa i te eˈa no te faarue ia Babulonia rahi. (A hiˈo atoa i te Isaia 40:3.) Maoti ratou i nehenehe ai te taata aau maitai e faarue ia Babulonia rahi e e tomo i roto i te paradaiso pae varua, i reira te haamoriraa viivii ore i haamau-faahou-hia ˈi. w23.05 15-16 par. 8-9

Te hinaaro ra Iehova ia tavini tatou ia ˈna ma te oaoa e te aau tae. (Kor. 2, 9:7) E tamau anei ïa tatou i te tapi i te hoê fa ua iti anaˈe to tatou anaanatae? Teie te hiˈoraa o te aposetolo Paulo. Ua parau o ˈna: “Te haavî nei au i to ˈu iho tino, o ta ˈu e faariro ei tîtî na ˈu.” (Kor. 1, 9:25-27, nota) Ua haavî Paulo ia ˈna iho no te rave i te mea tano, noa ˈtu aita o ˈna i hinaaro. Ua oaoa anei Iehova no ta Paulo i rave? Papu roa ïa e! Ua haamaitai atoa Iehova ia ˈna no ta ˈna mau tutavaraa. (Tim. 2, 4:7, 8) Te oaoa nei Iehova a ite ai e te tamau nei tatou i te tapi i te hoê fa noa ˈtu aita tatou e anaanatae roa ra. Te oaoa nei oia no te mea noa ˈtu aita paha tatou e au roa ra i te hoê tuhaa ohipa, ua faaoti tatou i te rave i te reira no to tatou here ia ˈna. Mai ia ˈna i haamaitai ia Paulo no ta ˈna mau tutavaraa, e na reira atoa Iehova no tatou. (Sal. 126:5) A ite ai i te mau haamaitairaa no ǒ mai ia Iehova, e hinaaro atu â tatou e tapi i ta tatou fa. w23.05 29 par. 9-10

Ua faaau te aposetolo Paulo i te feia o te ore e ora mai i te mahana o Iehova i te feia e taoto nei. Aita teie mau feia e ite ra eaha te tupu ati aˈe ia ratou aore ra e taa ra e e taime ru mau â teie. Eita ïa ratou e ite noa ˈˈe i te mau tupuraa e to ratou faufaaraa. I teie mahana, te taoto nei te rahiraa o te taata i te pae varua. (Roma 11:8) Aita ratou e tiaturi ra e te ora nei tatou i “te mau mahana hopea” e te fatata mai ra te ati rahi. (Pet. 2, 3:3, 4) No reira, te taa ra ia tatou te faufaaraa ia vai ara i te mau mahana atoa. (Tes. 1, 5:6) E titau-atoa-hia ia vai papu e ia vai hau noa tatou. Ma te na reira, eita ïa tatou e faaô i roto i te mau ohipa poritita no te faatitiaifaro i te mau fifi e itehia ra. A piri noa mai ai te mahana o Iehova, e rahi atu â te mau faaheporaa no roto mai i teie mau faanahoraa. Noa ˈtu râ, eita tatou e haapeapea no to tatou huru i mua i te reira. E tauturu mai te varua moˈa o te Atua ia vai hau noa, ia mau papu e ia rave i te faaotiraa maitai.​—Luka 12:11, 12. w23.06 10 par. 6-7

Ia faaroo outou i te iˈoa Samasona, eaha te puta mai i roto i to outou feruriraa? E haamanaˈo paha outou i to ˈna puai. Papu, e taata puai mau Samasona, ua rave râ o ˈna i te faaotiraa tano ore e ua amo oia i te utua i muri mai. Noa ˈtu râ, ua tiatonu Iehova i nia i te taiva ore o Samasona e ua faahiti oia i to ˈna hiˈoraa i roto i te Bibilia ei haapiiraa na tatou. Ua faaohipa Iehova ia Samasona no te tauturu i to ˈna nunaa, te ati Iseraela. Tau hanere matahiti i muri aˈe i te pohe o Samasona, ua aratai Iehova ia Paulo ia faahiti ia ˈna i roto i te mau tavini taiva ore tei faaite i te faaroo puai. (Heb. 11:32-34) E itoitohia tatou a hiˈopoa ˈi i te hiˈoraa o Samasona. Ua turui noa o ˈna i nia ia Iehova noa ˈtu te fifi ta ˈna i faaruru. E nehenehe tatou e haapii atu â no nia ia Samasona e e faufaa-atoa-hia tatou i to ˈna hiˈoraa. w23.09 2 par. 1-2

E faaoromai tamau atu â tatou ma te tutava i te pure ia Iehova e ma te faaite atu i ta tatou mau haapeapearaa atoa. (Tes. 1, 5:17) Aita paha tatou e faaruru ra i te fifi rahi. E pure anei râ tatou no te ani i ta Iehova tauturu ia toaruaru aore ia paruparu tatou? Ia tamau tatou i te pure no ta tatou e faaruru nei i te mau mahana atoa, e na reira tatou i mua i te mau fifi rahi aˈe. E papu atu â ïa tatou e ua ite Iehova afea e e nafea ia tauturu tatou. (Sal. 27:1, 3) E ineine tatou i te faaruru i te ati rahi mai te peu e noaa ia tatou ia faaoromai tamau i te mau fifi i teie mahana. (Roma 5:3) E rave rahi taeae e tuahine tei parau e i te mea ua haere ia ratou ia faaruru i te hoê tupuraa fifi mau, ua nehenehe atoa ïa ratou e faaoromai i to muri nei. Mea rahi te mau maitai ta ratou i ite, inaha, ua puai atu â to ratou hinaaro e faaoromai tamau. Ua puai atoa to ratou tiaturi e ua ineine noa Iehova i te tauturu ia ratou. Maoti te reira, ua nehenehe ratou e faaruru i te tahi atu mau fifi.​—Iak. 1:2-4. w23.07 3 par. 7-8

No to ˈna huru au noa, e faaite Iehova i te haehaa e te aumihi. Ei hiˈoraa, ua faaite o ˈna i to ˈna haehaa a opua ˈi oia e haamou i te oire o Sodoma. Na roto i te mau melahi, ua horoa Iehova i te aratairaa ia Lota ia horo ê i te tuhaa fenua mouˈa ra. Ua mǎtaˈu râ Lota e taparu ihora oia ia Iehova ia vaiiho ia ˈna e i to ˈna utuafare ia haere i Zoara, hoê oire nainai ta Iehova i opua e haamou. Ua nehenehe ta Iehova e faahepo ia Lota ia pee noa i ta ˈna aratairaa. Aita râ! Ua farii Iehova i te aniraa a Lota, aita ïa o ˈna i haamou i tera oire mai ta ˈna i opua na. (Gen. 19:18-22) Tau senekele i muri mai, ua faaite Iehova i te aumihi i to Nineve. Ua tono oia i te peropheta Iona no te faaara i to Nineve e e haamou o ˈna i te oire e te feia atoa e ora ra i ǒ. I to ˈna râ iteraa e ua tatarahapa to Nineve, aroha ihora oia e aita ˈtura i haamou ia ratou.​—Iona 3:1, 10; 4:10, 11. w23.07 21 par. 5

Eaha te haapii mai i te hiˈoraa o Iehoasa? E au o ˈna i te hoê tumu raau e ere te aˈa i te mea papu o te titauhia te hoê turu no te mau maite. Ua ere Iehoasa i tera turu, oia hoi i to Iehoiada poheraa. Haamata ihora o ˈna i te faaroo i te mau apotata e taiva ˈtura oia ia Iehova. Eaha te haapiiraa? Eita tatou e mǎtaˈu aore ra e faaroo ia Iehova no te mea noa te hinaaro ra tatou e pee i te hiˈoraa o te mau taeae e tuahine aore ra o te mau mero o to tatou utuafare. Ia puai noa tatou i te pae varua, e tia ia tatou ia haapuai i to tatou auhoaraa e here ia Iehova ma te rave i ta tatou iho haapiiraa Bibilia, ma te feruriruri i nia i te reira e ma te pure tamau ia Iehova. (Ier. 17:7, 8; Kol. 2:6, 7) Aita i rahi roa ta Iehova e titau mai ra ia tatou. Ua faahiti oia eaha ta ˈna e ani ra ia tatou i roto i te Koheleta 12:13. Te na ôhia ra: “A mǎtaˈu i te Atua mau e a haapao i ta ˈna mau faaueraa, tera noa hoi te hopoia a te taata.” Ia mǎtaˈu tatou i te Atua, e noaa ia tatou ia vai taiva ore ia Iehova noa ˈtu eaha te tupu a muri aˈe e ia mau papu. Aita ïa hoê aˈe mea te nehenehe e haafifi i to tatou auhoaraa e o Iehova. w23.06 19 par. 17-19

E omua te Atua i ta ˈna haapapuraa na roto i teie parau: “Parau atura te Atua o te parahi ra i nia i te terono.” (Apo. 21:5a) Mea taa ê teie huru parau, inaha teie hoê o na toru taime e paraparau roa ˈi Iehova i roto i te buka Apokalupo. Te auraa, e ere na te hoê melahi puai e horoa i teie haapapuraa, e ere atoa na Iesu tei faatiahia mai, na Iehova iho râ! E tapao haapapuraa ïa e mea mau te parau e faahitihia i muri mai. No te aha? No te mea eita roa Iehova “e nehenehe e haavare.” (Tito 1:2) Maoti teie irava, e puai roa ˈtu â to tatou tiaturi i te mau parau i roto i te Apokalupo 21:5, 6. A hiˈopoa i teie nei i te taˈo “Inaha!” E ite-pinepine-hia te taˈo Heleni tei hurihia “inaha!” i roto i te buka Apokalupo. Eaha to muri mai i taua taˈo ra? Te parau ïa a te Atua o te na ô ra: “Te hamani nei au i te mau mea atoa.” Papu, te faahiti ra Iehova i te mau tauiraa e tupu a muri aˈe. No te mea râ no ˈna, e tupu mau iho â ta ˈna parau fafau, e faahiti ïa o ˈna i te reira mai te mea ra e ua tupu ê na.​—Isa. 46:10 w23.11 3-4 par. 7-8

Ua aro te aposetolo Petero i to ˈna mau paruparu. Ei hiˈoraa, i to Iesu faaiteraa ˈtu e haamauiuihia e e haapohehia o ˈna ia tupu te parau tohu Bibilia, ua tamaˈi Petero ia ˈna. (Mar. 8:31-33) Pinepine atoa Petero e te tahi atu mau aposetolo i te mârô o vai te mea rahi aˈe. (Mar. 9:33, 34) E i te po hou te pohe o Iesu, no te iria, ua tapu Petero i te tariˈa o te tahi taata. (Ioa. 18:10) I taua noa po ra, no to ˈna riaria, e toru taime to Petero parauraa e aita o ˈna i ite o vai Iesu. (Mar. 14:66-72) I te taaraa ia Petero ta ˈna i rave, auê ihora oia. Aita Iesu i faarue i ta ˈna mau aposetolo tei toaruaru roa. Ia ˈna i tia faahou mai, ua horoa o ˈna ia Petero i te hoê ravea no te haapapu mai i to ˈna here. Ua titau Iesu ia Petero ia aupuru i ta ˈna mau mamoe. (Ioa. 21:15-17) Ua farii Petero i teie hopoia. Tei Ierusalema o ˈna i te mahana o te Penetekose e tei rotopu oia i te mau pǐpǐ matamua tei faatavaihia i te varua moˈa. w23.09 21-22 par. 6-7

Teie te faaitoitoraa ta te aposetolo Petero i horoa i te mau matahiapo: “A aupuru i te nǎnǎ a te Atua.” (Pet. 1, 5:1-4) E te mau matahiapo, ua papu ia matou e mea here na outou i to outou mau taeae e tuahine e e hinaaro iho â outou e aupuru ia ratou. I te tahi râ taime, no te rahi o te ohipa e no te rohirohi, e manaˈo outou e eita e haere ia outou. E nafea outou? A haamahora i to outou aau ia Iehova. Ua papai Petero: “Ia tavini te hoê taata, ia na reira oia ma te turui i nia i te puai ta te Atua e horoa.” (Pet. 1, 4:11) No te tahi mau fifi ta te mau taeae e tuahine e faaruru nei, e faaoromai noa ratou i te reira e tae roa ˈtu i roto i te ao apî. A haamanaˈo râ e mana rahi aˈe to “te tiai mamoe rahi,” o Iesu Mesia, no te tauturu ia ratou i teie nei â e i roto atoa i te ao apî. Ta te Atua noa e ani ra i te mau matahiapo, o te hereraa ïa i to ratou mau taeae e tuahine, te aupururaa ia ratou e te riroraa “ei hiˈoraa no te nǎnǎ.” w23.09 29-30 par. 13-14

E titauhia ia tatou ia patoi i te manaˈo taata. Mai te peu e manaˈo tatou mai te feia o teie nei ao, eita paha tatou e pee faahou ia Iehova e i ta ˈna mau ture aveia. (Kor. 1, 3:19) Pinepine “te paari o teie nei ao” i te faatupu i te mau hinaaro o te tino. Ua pee vetahi mau Kerisetiano i Peregamo e i Tuatira i te hiˈoraa o te feia e haaati ra ia ratou ma te haamori i te idolo e ma te rave i te ohipa tano ore. Ua aˈo etaeta Iesu i teie na amuiraa no te mea ua faatia noa ratou i te peu taotoraa tia ore. (Apo. 2:14, 20) I teie mahana, te turai ra te feia o teie nei ao ia tatou ia farii i to ratou mau manaˈo tano ore. E nehenehe te mau mero utuafare e te feia matauhia e tatou e turai ia tatou ia manaˈo e mea etaeta roa tatou e mea maitai aˈe ia ore e pee faahou i te mau ture a Iehova. Ei hiˈoraa, e parau ratou e aita e faufaa ia tapea i te hoê haerea viivii ore e eita te mau aratairaa Bibilia e tano faahou no teie tau. I te tahi taime, e manaˈo paha tatou e eita e taa-maitai-hia te mau faaueraa a Iehova. E nehenehe paha tatou e “na nia ˈtu i tei papaihia.”​—Kor. 1, 4:6. w23.07 16 par. 10-11

Ua hinaaro mau Maria, te metua vahine o Iesu, i te itoito. Aita hoi o ˈna i faaipoipohia ˈtura e te parauhia mai ra e hapû o ˈna. Aita o ˈna i tamariihia aˈenei e o te Mesia ta ˈna e amo i roto i to ˈna opu. Ua momoˈahia hoi Maria ia Iosepha. E nafea ïa o ˈna e faataa ˈi i te reira ia Iosepha, inaha aita o ˈna i taoto aˈenei e te hoê tane? (Luka 1:26-33) Mea nafea Maria i te fanaˈoraa i te itoito? Ua ani o ˈna i te tauturu a vetahi ê. Ei hiˈoraa, ua ani oia ia Gaberiela i te tahi atu mau haamaramaramaraa no nia i teie hopoia. (Luka 1:34) I muri aˈe, ua tere o ˈna “i te fenua mouˈa i te hoê oire no Iuda” no te haere e farerei i to ˈna fetii Elisabeta. Ua haapopou Elisabeta ia Maria e ua faaohipa Iehova ia ˈna no te faaitoito ia Maria, inaha ua faahiti o ˈna i te hoê parau tohu itoito mau no nia i ta ˈna aiû i roto i to ˈna opu. (Luka 1:39-45) I muri iho, parau atura Maria no Iehova e “ua haa oia ma to ˈna rima puai.” (Luka 1:46-51) Ua faaohipa Iehova ia Gaberiela e ia Elisabeta no te faaitoito ia Maria. w23.10 14-15 par. 10-12

Vetahi noa mau pǐpǐ a te Mesia tei faatavaihia i te varua moˈa, e auhoaraa taa ê to ratou e o Iehova. E 144 000 ratou e e tavini ratou ei tahuˈa e o Iesu i te raˈi. (Apo. 14:1) E faahohoˈa te Vahi Moˈa i to ratou tiaraa faatavaihia i te varua a ora noa ˈi ratou i nia i te fenua ei tamaiti na te Atua. (Roma 8:15-17) E faahohoˈa te Vahi Moˈa Roa o te sekene i te raˈi i reira Iehova e ora ˈi. E taipe “te paruru” o te faataa i te Vahi Moˈa i te Vahi Moˈa Roa o te tino o Iesu. A ora noa ˈi Iesu ei taata, eita ta ˈna e nehenehe e tomo i roto i te raˈi ei Tahuˈa rahi o te hiero pae varua. Ia ˈna râ i pûpû i to ˈna tino ei tusia no te huitaata, ua matara ia Iesu te eˈa e tae atu i te raˈi no te mau Kerisetiano atoa tei faatavaihia. E faarue ratou i to ratou tino a fanaˈo atu ai i ta ratou haamaitairaa i nia i te raˈi.​—Heb. 10:19, 20; Kor. 1, 15:50. w23.10 28 par. 13

I te hoê mahana, ua faaino to Epheraima ia Gideona, aita o ˈna i iria ˈtu, ua faaea hau noa râ. (Tav. 8:1-3) Ma te haehaa, ua faaroo oia i ta ratou mau haapeapearaa e ua paraparau oia ia ratou ma te mǎrû. I te hopearaa, mǎrû roa mai nei ratou. E pee te mau matahiapo feruriraa paari i te hiˈoraa o Gideona ma te faaroo maite i te feia e faaino ra e ma te paraparau atu ma te mǎrû. (Iak. 3:13) Ma te na reira, e tupu te hau i roto i te amuiraa. A faahanahanahia ˈi Gideona no to ˈna upootiaraa i nia i te ati Midiana, ua faahoˈi oia i te hanahana ia Iehova ra. (Tav. 8:22, 23) E nafea te mau matahiapo e pee ai i te hiˈoraa o Gideona? Ma te faahoˈi i te hanahana ia Iehova ua manuïa anaˈe ta ratou ohipa. (Kor. 1, 4:6, 7) Ei hiˈoraa, ia haapopouhia te hoê matahiapo no to ˈna aravihi e horoa i te haapiiraa, e nehenehe o ˈna e haamanaˈo atu e no roto mai ta ˈna mau haapiiraa i te Parau a te Atua e na te faanahonahoraa a Iehova e faaineine ia tatou ia riro ei taata haapii. Mea au ia feruri pinepine te mau matahiapo e aita anei ratou e faahanahana ra ia ratou iho. w23.06 4 par. 7-8

Ia ore tatou ia fanaˈo i ta tatou i ani i roto i te pure, e ui paha ia tatou iho. ‘Mea tano anei ta ˈu aniraa?’ Pinepine, e manaˈo tatou e ua ite tatou eaha te mea maitai no tatou. Te parau mau râ, aita tatou i ite eaha te mea maitai roa ˈˈe no tatou. Ia pure tatou no te tahi fifi, eita e ore e te vai ra te hoê ravea maitai aˈe i te mea ta tatou e ani ra. E i te tahi taime, eita ta tatou aniraa e tuati ra i te hinaaro o Iehova. (Ioa. 1, 5:14) A tapao na i te hiˈoraa o na metua tei ani ia Iehova ia mau papu ta raua tamarii i roto i te parau mau. E au ra e mea tano ta raua aniraa. Tera râ, eita Iehova e faahepo i te taata ia tavini ia ˈna. E hinaaro o ˈna e na tatou iho, oia atoa ta tatou mau tamarii, e faaoti i te tavini ia ˈna. (Deut. 10:12, 13; 30:19, 20) No reira, mea tano aˈe ia ani teie na metua ia tauturu Iehova ia raua ia haaputapû i te aau o ta raua tamarii a riro atu ai ratou ei hoa no ˈna.​—Mas. 22:6; Eph. 6:4. w23.11 21 par. 5; 23 par. 12

No te aha e ravea faufaa roa te tamahanahanaraa ia vetahi ê no te faaite i to tatou here ia ratou? Ia au i te hoê buka tuatapaparaa Bibilia, te taˈo “tamahanahana” ta Paulo i faaohipa, o “te tiaraa ïa i pihai iho i te hoê taata no te faaitoito ia ˈna ia faaruru o ˈna i te hoê ati.” No reira, ia horoa tatou i te tamahanahanaraa i te hoê hoa Kerisetiano i roto i te ati, te tauturu ra ïa tatou ia ˈna ia itoito faahou mai e ia tamau i te haere i nia i te eˈa e aratai ra i te ora. I te mau taime atoa e tamahanahana ˈi tatou i te hoê taeae e te hoê tuahine, te faaite ra ïa tatou i to tatou here ia ˈna. (Kor. 2, 7:6, 7, 13) Mea piri roa te aumihi e te horoaraa i te tamahanahanaraa. Inaha, hoê taata aumihi, e tamahanahana e e imi o ˈna i te ravea no te tauturu i te taata e mauiui ra. No reira, e aumihi tatou na mua a horoa ˈtu ai i te tamahanahanaraa. Te faataa ra Paulo e nafea te aumihi o Iehova e turai ai ia ˈna ia horoa i te tamahanahanaraa. Te parau ra Paulo no Iehova, “te Metua o te aroha hamani maitai î i te here e te Atua o te tamahanahana i roto i te mau tupuraa atoa.”​—Kor. 2, 1:3. w23.11 9-10 par. 8-10

Ua ite maitai tatou e e faaruru iho â te mau pǐpǐ a Iesu i te ati. A feruri na i te hiˈoraa o te aposetolo Paulo tei parau i to Tesalonia: “Ua faaite aˈena ˈtu matou, a parahi ai i rotopu ia outou, e e roohia tatou e te ati, e tera iho â tei tupu mai ta outou e ite ra.” (Tes. 1, 3:4) E ua papai o ˈna i to Korinetia: “Taeae ma, e hinaaro hoi matou ia ite outou e ua fifi-roa-hia matou i te ati ta matou i faaruru . . . Aita atoa i papu e e ora mai anei matou.” (Kor. 2, 1:8; 11:23-27) E nehenehe atoa te mau Kerisetiano e roohia e te ati i teie mahana. (Tim. 2, 3:12) No to outou faaroo ia Iesu, ua faaooo paha aore ra ua patoi uˈana mai te hoa e te fetii. Ua au ore paha to outou paoti e hoa ohipa ia outou no to outou haerea afaro. (Heb. 13:18) Ua faaruru anei outou i te tahi faaheporaa a te hau fenua no te mea te poro ra outou? Ia papu ia outou e noa ˈtu eaha te fifi ta outou e faaruru nei, ua parau Paulo e e oaoa noa outou. w23.12 10-11 par. 9-10

Ua faaruru Iakoba e rave rahi fifi. Ua hopoi mai e piti o ta ˈna tamaiti, o Simeona raua Levi, i te haama i nia i to ˈna utuafare e ua vahavaha i te iˈoa o Iehova. Hau atu, ua pohe ta ˈna vahine here, o Rahela, i to ˈna fanauraa i te piti o ta raua tamarii. E no te oˈe rahi, ua titauhia ia Iakoba ia haere e ora i te fenua Aiphiti, noa ˈtu ua paari roa o ˈna. (Gen. 35:16-19; 37:28; 45:9-11, 28) Noa ˈtu teie mau tamataraa atoa, aita Iakoba i ere noa ˈˈe i to ˈna tiaturi ia Iehova e i ta ˈna mau parau fafau. Ei haamaitairaa, ua fanaˈo Iakoba i te farii maitai a Iehova. Ei hiˈoraa, ua faarahi Iehova i te faufaa a Iakoba. Eaha atoa râ paha Iakoba i te mauruuru ia Iehova i to ˈna farerei-faahou-raa ia Iosepha, te tamaiti ta ˈna i manaˈo na e ua pohe! No to ˈna auhoaraa piri e o Iehova i nehenehe ai Iakoba e faaoromai i teie mau tamataraa. (Gen. 30:43; 32:9, 10; 46:28-30) No reira, ia vai piri noa tatou ia Iehova, e noaa atoa ia tatou ia faaoromai i te mau fifi manaˈo-ore-hia. w23.04 15 par. 6-7

E himene te Salamo 23 o te faahiti ra i to Davida tiaturi i to Iehova here e ta ˈna aupuru ia ˈna. I roto, te faataa ra Davida i to ˈna auhoaraa piri roa e to ˈna Tiai ra o Iehova. Aita oia i taiâ i te vaiiho ia Iehova ia aratai ia ˈna, e ua turui roa oia i nia ia Iehova. Ua papu ia Davida e e faaite noa ˈtu Iehova i to ˈna here i te roaraa o to ˈna oraraa. Na te aha i haapapu ia ˈna? Ua taa ia Davida e te aupuru maitai noa ra Iehova ia ˈna. Ua fanaˈo atoa oia i to Iehova auhoaraa e ta ˈna haamaitairaa. Ua papu ïa ia ˈna e noa ˈtu eaha to ˈna ananahi, e tamau Iehova i te aupuru ia ˈna. Mea puai aˈe to ˈna tiaturi i to Iehova here i ta ˈna mau haapeapearaa, a ite atu ai oia i te oaoa e te mauruuru rahi.​—Sal. 16:11. w24.01 28-29 par. 12-13

Mai te piti o te Tamaˈi rahi, ua nehenehe te mau tavini a Iehova e poro i e rave rahi fenua ma te ore e haafifihia. Maoti te reira, ua haere roa te ohipa pororaa i mua. I teie mahana, te ani noa ra te mau mero o te Tino aratai i te aratairaa a te Mesia. Te hinaaro ra ratou e ia tu te mau haapiiraa ta ratou e horoa i to ratou mau taeae, i to Iehova e to Iesu manaˈo. E na te mau tiaau haaati e te mau matahiapo e horoa ˈtu i te mau amuiraa. To roto teie mau matahiapo faatavaihia e te mau matahiapo atoa o te mau amuiraa i te “rima atau” o te Mesia. (Apo. 2:1) Parau mau, e taata tia ore ratou, e hape atoa ratou. Mai tera atoa no Mose, Iosua e te mau aposetolo i te tahi taime. (Num. 20:12; Ios. 9:14, 15; Roma 3:23) Noa ˈtu râ, te aratai maitai noa ra Iesu i te tavini haapao maitai e te mau matahiapo e e na reira noa oia. No reira, mea tano roa ia tiaturi i te aratairaa ta ˈna e horoa ra na roto i taua mau taeae ra tei faatoroahia. w24.02 23-24 par. 13-14

I teie mahana, e oaoa Iehova ia paraparau tatou no nia ia ˈna ma te mahanahana, te mauruuru e te here. Ta tatou fa matamua i roto i te pororaa, e tauturu i te taata ia faafatata ˈtu ia Iehova to tatou Metua here e ia ite o vai mau â oia. (Iak. 4:8) E oaoa tatou i te faaite i ta te Bibilia e parau ra no nia ia Iehova, to ˈna here, ta ˈna parau-tia, to ˈna paari, to ˈna puai e te tahi atu huru maitatai nehenehe mau. E arue atoa tatou ia Iehova ma te rohi i te pee i to ˈna hiˈoraa, a oaoa ˈtu ai oia. Ia na reira tatou, e taa ê mai tatou i teie nei ao ino, a uiui atu ai vetahi eaha te tumu. (Mat. 5:14-16) Na tatou ïa e faataa ˈtu i te mau taime atoa e paraparau ai tatou ia ratou. Ma te na reira, te arue ra tatou i te iˈoa o Iehova, to tatou Atua, a hinaaro atu ai te feia aau haavare ore e faafatata ˈtu ia ˈna. E oaoa mau â o ˈna.​—Tim. 1, 2:3, 4. w24.02 10 par. 7

E titauhia i te hoê taeae paari i te pae varua te tahi mau aravihi. E tauturu te reira ia ˈna ia amo i te hopoia i roto i te amuiraa, ia noaa mai te hoê ohipa no te aupuru ia ˈna aore ra i to ˈna utuafare e ia maiti i te hoa maitai. Ei hiˈoraa, a haapii i te taio e i te papai maitai. Te parau ra te Bibilia e e oaoa e e manuïa te hoê taata i roto i to ˈna oraraa, ia taio e ia feruriruri oia i te Parau a te Atua i te mau mahana atoa. (Sal. 1:1-3) Ma te taio i te Bibilia i te mau mahana atoa, e taa ia ˈna i to Iehova manaˈo a rave atu ai i te faaotiraa maitai. (Mas. 1:3, 4) E tapiri te mau taeae e tuahine i te mau taeae feruriraa paari no te ani i te aratairaa niuhia i nia i te Bibilia. Mea aravihi anaˈe outou i te taio e i te papai, e nehenehe ïa outou e faaineine i te tahi manaˈo tauturu e te oreroraa parau o te faaitoito i te amuiraa. E nehenehe outou e tapaopao i te tahi mau manaˈo ta outou e faaohipa no te faaitoito ia vetahi ê. w23.12 26-27 par. 9-11

Ia mǎtaˈu outou, a feruriruri i ta Iehova e rave a muri aˈe ua mou anaˈe Satani. I 2014, i te tairururaa e toru mahana, ua hautihia te hoê faahiˈoraa tei faaite i te hoê papa tei tauaparau e to ˈna utuafare i nia i te Timoteo 2, 3:1-5. Ua taui râ o ˈna i te parau o te irava, a feruri ai mai te aha te huru oraraa i roto i te paradaiso. Te taiohia ra: “I roto i te ao apî, e tau oaoa mau â te itehia. E here te taata te tahi i te tahi, e haapao ratou i te ohipa pae varua, e aau faahaihai, e haehaa, e arue i te Atua, e faaroo i te metua, e mauruuru, e taiva ore, e au te taata te tahi i te tahi, e huru au noa to ratou, e parau maitai noa ta ratou, e haavî ia ratou iho, e mǎrû, e au i te mea maitai, e faaite noa i te parau mau, e farii i te aˈoraa, e auraro, mea au na ratou i te Atua eiaha râ i te mau mea navenave, mea au atoa na ratou e haamori i te Atua anaˈe. A vai piri noa i taua mau taata ra.” E tauaparau anei oe e to oe utuafare aore ra hoa Kerisetiano no nia i te ao apî? w24.01 6 par. 13-14

Mea mahanahana ia ite e te mauruuru ra Iehova i ta ˈna mau tavini atoa! Te parau ra te Bibilia: “Mea here hoi na Iehova i to ˈna nunaa.” (Sal. 149:4) I te tahi râ taime, e toaruaru roa vetahi a ui atu ai: ‘Mea here anei na Iehova ia ˈu?’ Ua manaˈo atoa te tahi mau tavini haapao maitai a Iehova i tahito ra mai tera. (Sam. 1, 1:6-10; Ioba 29:2, 4; Sal. 51:11) Te faaite papu ra te Bibilia e nehenehe te taata tia ore e fanaˈo i te farii maitai a Iehova. E nafea? Ma te faatupu i te faaroo ia Iesu Mesia e ma te bapetizo. (Ioa. 3:16) Ua faaite ïa tatou e ua tatarahapa tatou i ta tatou mau hara e ua euhe i te rave i te hinaaro o te Atua. (Ohi. 2:38; 3:19) E oaoa Iehova ia rave tatou i teie mau taahiraa no te riro ei hoa no ˈna. Ia tutava tatou i te tapea i ta tatou euhe, e mauruuru e e hiˈo Iehova ia tatou ei hoa no ˈna.​—Sal. 25:14. w24.03 26 par. 1-2

E nehenehe tatou e pee i te hiˈoraa o te mau pǐpǐ ma te tamau i te poro noa ˈtu e anihia tatou e te mau tia mana ia faaea. E nehenehe atoa tatou e papu e tauturu mai Iehova ia rave i ta tatou taviniraa. A pure ïa ia ˈna no te ani i te mǎtaˈu ore e te paari, oia atoa i te tauturu no te faaoromai tamau i te mau fifi. E rave rau fifi ta tatou e faaruru nei mai te pohe o tei herehia, te fifi i roto i te utuafare, te hamani-ino-raa e te vai atu ra. Ua ino atu â paha to tatou mau fifi i te tau o te maˈi pee e te tamaˈi. A faaite ïa ia Iehova eaha to roto i to tatou aau. A hiˈo ia ˈna mai te hoê hoa piri ta outou e nehenehe e paraparau. Ia papu ia outou e “na ˈna e tauturu ia [outou].” (Sal. 37:3, 5) Ia tamau tatou i te pure, e noaa ia tatou ia “faaoromai tamau i roto i te ati.” (Roma 12:12) Te taa maitai ra ia Iehova eaha ta ˈna mau tavini e faaruru nei. Oia mau, “e faaroo oia i ta ratou aniraa i te tauturu.”​—Sal. 145:18, 19. w23.05 5-6 par. 12-15

Mai te peu e faaotiraa faufaa ta tatou e rave, e titauhia ia taa ia tatou “te hinaaro o Iehova” e ia haa ia au i te reira. (Eph. 5:17) Ia ite mai tatou i te mau faaueraa tumu Bibilia e tano i to tatou tupuraa, te imi ra ïa tatou i to te Atua manaˈo. E ia faaohipa tatou i ta ˈna mau faaueraa tumu, papu ïa e faaotiraa paari ta tatou e rave. E au roa “te varua ino,” to tatou enemi o Satani, ia pau to tatou taime no te mau mea a teie nei ao, aita faahou ïa e taime no ta tatou taviniraa i te Atua. (Ioa. 1, 5:19) Mea ohie roa no te hoê Kerisetiano ia tuu i ta ˈna mau taoˈa, ta ˈna haapiiraa aore ra ta ˈna ohipa na mua aˈe i ta ˈna taviniraa ia Iehova. Ia na reira oia, tapao faaite ïa ua peehia o ˈna i te huru feruriraa o teie nei ao. Parau mau, e ere mea ino tera mau mea, eiaha râ te reira ia tuuhia i te parahiraa matamua o to tatou oraraa. w24.03 24 par. 16-17