Mateo

5 Idi nakitana dagiti bunggoy isu simmang-at idiay bantay; ket idi nakatugawen immay kenkuana dagiti adalanna; 2 ket linuktanna ti ngiwatna ket inrugina nga insuro ida, a kunkunana:

3 “Naragsak dagidiay sipapanunot iti naespirituan a kasapulanda,+ yantangay kukuada ti pagarian ti langlangit.+

4 “Naragsak dagidiay agleddaang, yantangay maliwliwadanto.+

5 “Naragsak dagiti naalumamay ti kababalinda,+ yantangay tawidendanto ti daga.+

6 “Naragsak dagidiay mabisin ken mawaw+ iti kinalinteg, yantangay mapennekdanto.+

7 “Naragsak dagiti naasi,+ yantangay maipakitaandanto iti asi.

8 “Naragsak dagiti nasin-aw ti pusoda,+ yantangay makitadanto ti Dios.+

9 “Naragsak dagiti mannakikappia,+ yantangay maawagandanto iti ‘annak+ ti Dios.’

10 “Naragsak dagidiay maidaddadanes+ maigapu iti kinalinteg, yantangay kukuada ti pagarian ti langlangit.

11 “Naragsakkayo inton umsiendakayo+ dagiti tattao ken idadanesdakayo+ ken siuulbod a sawenda ti tunggal kita ti nadangkes a banag a maibusor kadakayo maigapu kaniak. 12 Agrag-o ken aglagtokayo gapu iti rag-o,+ yantangay dakkel ti gunggonayo+ iti langlangit; ta iti kasta a pamay-an indadanesda dagiti mammadto+ nga immun-una ngem dakayo.

13 “Dakayo ti asin+ ti daga; ngem no ti asin mapukawna ti bilegna, kasanonto a maisubli ti apgadna? Saanen a mabalin nga usaren iti aniaman a banag no di ket maibelleng iti ruar+ tapno payatpayaten dagiti tattao.

14 “Dakayo ti silaw ti lubong.+ Ti maysa a siudad saan a mabalin nga ilemmeng no naisaad iti rabaw ti maysa a bantay. 15 Gangtan ti tattao ti maysa a pagsilawan ket ikabilda dayta, saan nga iti sirok ti pagsukat a labba,+ no di ket iti pagsaadan ti silaw, ket silnaganna amin dagidiay adda iti balay. 16 Kasta met agsilnag koma ti silawyo+ iti sanguanan ti tattao, tapno makitada dagiti nasayaat nga aramidyo+ ket idayawda+ ti Amayo nga adda iti langlangit.

17 “Dikay pagarupen nga immayak tapno dadaelek ti Linteg+ wenno dagiti Mammadto. Immayak, saan a tapno mangdadael, no di ket tapno mangtungpal;+ 18 ta pudno kunak kadakayo nga umun-una pay nga aglabas ti langit ken ti daga+ ngem ti maysa a kabassitan a letra wenno maysa a sangkabassit a paset ti letra nga aglabas manipud iti Linteg iti aniaman a pamay-an ket saan a maaramid amin a bambanag.+ 19 Siasinoman, ngarud, a mangsalungasing+ iti maysa kadagitoy kababassitan a bilin ken mangisuro ti kasta iti sangatauan, isu maawaganto iti ‘kanunumuan’ mainaig iti pagarian ti langlangit.+ No maipapan iti asinoman a mangaramid kadakuada ken mangisuro+ kadakuada, daytoy a tao maawaganto iti ‘dakkel’+ mainaig iti pagarian ti langlangit. 20 Ta kunak kadakayo a no ti kinalintegyo saan a nawadwadwad ngem iti kinalinteg dagiti eskriba ken Fariseo,+ saankayto a pulos makastrek+ iti pagarian ti langlangit.

21 “Nangngegyo a naikuna kadagiti nagbiag idi kadaanan a tiempo, ‘Dika mamapatay;+ ngem ti siasinoman a mangpapatay+ manungsungbatto iti pangukoman ti kinahustisia.’+ 22 Nupay kasta, kunak kadakayo a ti tunggal maysa nga agtultuloy a sipupungtot+ iti kabsatna manungsungbatto+ iti pangukoman ti kinahustisia; ngem siasinoman a mangawag iti kabsatna iti di mabalin nga iyebkas a sao ti panangumsi manungsungbatto iti Kangatuan a Pangukoman; idinto ta siasinoman nga agkuna, ‘Sika makapasimron a maag!’ agpeggadto iti umap-apuy a Gehenna.+

23 “No, ngarud, ip-ipanmo ti sagutmo iti altar+ ket sadiay malagipmo a ti kabsatmo addaan iti maysa a banag a maibusor kenka,+ 24 panawam ti sagutmo sadiay sanguanan ti altar, ket mapanka; umuna a makikappiaka ken kabsatmo,+ ket kalpasanna, inton nakasublikan, idatonmo ti sagutmo.+

25 “Darasem ti makirinnisut iti daydiay mangidardarum kenka iti linteg, bayat a kaduam iti dalan nga agturong sadiay, bareng ti agidardarum+ saannaka nga iyawat iti ukom, ket ti ukom saannaka nga iyawat iti katulongan iti pangukoman, ket maipisokka iti pagbaludan. 26 Kunak kenka iti kinapudnona, Pudno a saankanto a rummuar manipud sadiay agingga a mabayadam ti kamaudianan a sinsilio a bassit unay ti pategna.+

27 “Nangngegyo a naikuna, ‘Dika makikamalala.’+ 28 Ngem kunak kadakayo a ti tunggal maysa nga agtultuloy a mangmatmat iti maysa a babai+ tapno gartemanna nakikamalalan+ kenkuana iti pusona.+ 29 No, ita, dayta makannawan a matam itibtibkolnaka, suatem ket ibellengmo manipud kenka.+ Ta ad-adda a pagimbagam a maysa kadagiti kamengmo ti mapukaw kenka ngem ti maitapuak ti intero a bagim+ idiay Gehenna. 30 Kasta met, no ti makannawan nga imam itibtibkolnaka, putdem ket ibellengmo manipud kenka.+ Ta ad-adda a pagimbagam a maysa kadagiti kamengmo ti mapukaw ngem ti agtungpal ti intero a bagim idiay Gehenna.

31 “Kasta met a naikuna, ‘Siasinoman a mangidiborsio+ iti asawana a babai, mangted koma kenkuana iti kasuratan ti diborsio.’+ 32 Nupay kasta, kunak kadakayo a ti tunggal maysa a mangidiborsio iti asawana a babai, malaksid no maigapu iti pannakiabig,+ isarangna iti pannakikamalala,+ ket siasinoman a mangasawa iti naidiborsio a babai makikamalala.+

33 “Manen nangngegyo a naikuna kadagiti nagbiag idi kadaanan a tiempo, ‘Dika agsapata+ no saanmo a tungpalen, no di ket masapul a tungpalem dagiti karim ken Jehova.’+ 34 Nupay kasta, kunak kadakayo: Dikay agsapata+ a pulos, uray babaen iti langit, agsipud ta dayta ti trono ti Dios;+ 35 wenno uray babaen iti daga, agsipud ta dayta ti pagbatayan+ dagiti sakana; wenno uray babaen iti Jerusalem, agsipud ta dayta ti siudad+ ti naindaklan nga Ari. 36 Dika agsapata uray babaen iti ulom, agsipud ta dika mapagbalin a puraw wenno nangisit ti maysa a buok. 37 Ti koma latta saoyo a Wen kaipapananna ti Wen, ti saoyo a Saan, Saan;+ ta ti aniaman a surok dagitoy ket nagtaud iti daydiay nadangkes.+

38 “Nangngegyo a naikuna, ‘Mata iti mata ken ngipen iti ngipen.’+ 39 Nupay kasta, kunak kadakayo: Dikay busoren daydiay nadangkes; no di ket siasinoman a mangtungpa kenka iti makannawan a pingpingmo,+ iparangmo pay kenkuana ti bangir. 40 Ket no kayat ti maysa a tao ti mapan iti pangukoman a kaduanaka ket tagikuaenna ti makin-uneg a kawesmo, bay-am a mapan met kenkuana ti makinruar a kawesmo;+ 41 ket no ti asinoman iti turay pilitennaka nga agserbi iti maysa a milia, kumuyogka kenkuana iti dua a milia.+ 42 Ikkam daydiay agdawdawat kenka, ket dika tallikudan daydiay kayatna ti bumulod kenka nga awanan patubo.+

43 “Nangngegyo a naikuna, ‘Masapul nga ayatem ti padam a tao+ ket guraem ti kabusormo.’+ 44 Nupay kasta, kunak kadakayo: Itultuloyyo nga ayaten dagiti kabusoryo+ ken ikararagan dagidiay mangidaddadanes kadakayo;+ 45 tapno mapaneknekanyo ti bagbagiyo nga annak ni Amayo nga adda iti langlangit,+ yantangay pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.+ 46 Ta no ayatenyo dagidiay mangay-ayat kadakayo, ania a gunggona ti adda kadakayo?+ Saan aya nga ar-aramiden met dagiti agsingsingir iti buis ti isu met laeng a banag? 47 Ket no ti kakabsatyo laeng ti kablaawanyo, ania a naisangsangayan a banag ti ar-aramidenyo? Saan aya nga ar-aramiden met dagiti tattao iti nasnasion ti isu met laeng a banag? 48 Ngarud masapul nga agbalinkayo a perpekto, a kas iti nailangitan nga Amayo a perpekto.+