Mateo

12 Iti dayta a panawen limmasat ni Jesus iti kataltalonan iti sabbath.+ Nagbisin dagiti adalanna ket rinugianda ti agruros ken mangan kadagiti dawa ti binukel.+ 2 Idi makitada daytoy kinuna kenkuana dagiti Fariseo:+ “Adtoy! Dagiti adalam ar-aramidenda ti saan a nainkalintegan nga aramiden iti sabbath.”+ 3 Kinunana kadakuada: “Dikay kadi nabasa no ania ti inaramid ni David idi isu ken dagiti lallaki a naikuyog kenkuana nagbisinda?+ 4 No kasano nga isu simrek iti balay ti Dios ket kinnanda dagiti tinapay ti panangidiaya,+ maysa a banag a saan a nainkalintegan+ a kanenna, wenno uray dagidiay naikuyog kenkuana, no di agpaay iti papadi laeng?+ 5 Wenno, dikay kadi nabasa iti Linteg+ a kadagiti sabbath ibilang ti papadi iti templo a kasla saan a sagrado ti sabbath ket agtalinaedda nga awanan basol?+ 6 Ngem ibagak kadakayo nga adda ditoy ti maysa a banag a dakdakkel ngem iti templo.+ 7 Nupay kasta, no naawatanyo koma ti kaipapanan daytoy, ‘Kalikagumak ti asi,+ ket saan a sakripisio,’+ saanyo koma a kinondenar dagiti awanan basol. 8 Ta ti Anak ti tao+ ket Apo ti sabbath.”+

9 Idi pimmanaw iti dayta a lugar isu napan iti sinagogada; 10 ket, adtoy! maysa a lalaki nga addaan ima a nagango!+ Gapuna inimtuodda kenkuana, “Nainkalintegan kadi ti mangagas iti sabbath?” tapno adda pangakusaranda kenkuana.+ 11 Kinunana kadakuada: “Asinonto ti tao kadakayo nga addaan maysa a karnero ket, no matnag daytoy iti maysa nga abut+ iti sabbath, saannanto nga iggaman ken aonen dayta?+ 12 No us-usigen, anian a napatpateg pay ti tao ngem iti karnero!+ Gapuna nainkalintegan ti agaramid iti nasayaat a banag iti sabbath.” 13 Idin kinunana iti lalaki: “Unnatem ta imam.” Ket inunnatna, ket naisubli a nasalun-at a kas iti sabali nga imana.+ 14 Ngem rimmuar dagiti Fariseo ket nagnunumoda maibusor kenkuana tapno dadaelenda koma.+ 15 Idi naammuanna daytoy, pimmanaw sadiay ni Jesus. Adu met ti simmurot kenkuana, ket inagasanna ida amin,+ 16 ngem siiinget a binilinna ida nga isu saanda nga ipadlaw;+ 17 tapno matungpal ti naisao babaen ken Isaias a mammadto, a nagkuna:

18 “Adtoy! Ti adipenko+ a pinilik, ti dungdungnguek,+ nga inanamongan ti kararuak! Ikabilkonto kenkuana ti espirituk,+ ket no ania ti kinahustisia ibatadnanto kadagiti nasion. 19 Saanto a makisusik,+ wenno uray agikkis iti napigsa, saanto met a mangngeg ti asinoman ti timekna iti akaba a daldalan. 20 Awanto ti rumekenna a naparpar a runo, ket awanto ti iddepenna nga agkurkuridemdem a pabilo a lino,+ agingga a makairuar iti hustisia+ buyogen ti balligi. 21 Pudno unay, nga iti naganna manginanamanto dagiti nasion.”+

22 Idin nangyegda kenkuana iti lalaki a nagunggan ti sairo, bulsek ken umel; ket inagasanna, iti kasta ti umel a lalaki nakapagsao ken nakakita. 23 Ala ket, amin dagiti bunggoy nagsiddaawda ket rinugianda a kunaen:+ “Saan ngata a nalabit daytoy ti Anak ni David?”+ 24 Idi mangngegda daytoy, kinuna dagiti Fariseo: “Daytoy a tao saanna a paruaren dagiti sairo malaksid no babaen ken Beelzebub, ti agturay kadagiti sairo.”+ 25 Yantangay ammona ti pampanunotda,+ kinunana kadakuada: “Tunggal pagarian a nabingbingay maibusor iti dayta met laeng dumteng iti pannakalangalang,+ ket tunggal siudad wenno balay a nabingbingay maibusor iti dayta met laeng saanto a makapagtakder. 26 Iti isu met laeng a wagas, no ni Satanas paruarenna ni Satanas, nagbalin a nabingbingay maibusor iti bagina; kasano, ngarud, ti panagtakderto ti pagarianna? 27 Mainayon pay, no paruarek dagiti sairo babaen ken Beelzebub,+ babaen iti siasino a paruaren ida ti annakyo? Daytoy ti makagapu nga agbalindanto nga uk-ukom kadakayo. 28 Ngem no babaen iti espiritu ti Dios a paruarek dagiti sairo, pudno a nagtengnakayon ti pagarian ti Dios.+ 29 Wenno kasano a maserrek ti asinoman ti balay ti napigsa a tao ket agawenna dagiti maakar a sanikuana, no di umuna a parautanna ti napigsa a tao? Ket kalpasanna samsamennanto ti balayna.+ 30 Ti awan iti dasigko bumusor kaniak, ket ti di makipagurnong kaniak agiwara.+

31 “Gapu itoy kunak kadakayo, Tunggal kita ti basol ken tabbaaw mapakawanto kadagiti tattao, ngem ti tabbaaw maibusor iti espiritu saanto a mapakawan.+ 32 Kas pagarigan, siasinoman a mangisawang iti maysa a sao a maibusor iti Anak ti tao, mapakawanto kenkuana;+ ngem siasinoman nga agsao maibusor iti nasantuan nga espiritu, saanto a mapakawan kenkuana, saan, saan nga iti daytoy a sistema ti bambanag wenno uray iti daydiay umayto.+

33 “Mabalin nga aramidenyo ti kayo a nasayaat ket ti bungana nasayaat wenno aramidenyo ti kayo a rinuker ket ti bungana rinuker; ta babaen iti bungana maammuan ti kayo.+ 34 Putot dagiti karasaen,+ kasano a makapagsaokayo iti naimbag a bambanag, no nadangkeskayo?+ Ta ti naruay iti puso sawen ti ngiwat.+ 35 Ti naimbag a tao mangiruar manipud iti naimbag a gamengna kadagiti naimbag a banag,+ idinto ta ti nadangkes a tao mangiruar manipud iti nadangkes a gamengna kadagiti nadangkes a banag.+ 36 Ibagak kadakayo a ti tunggal di makagunggona a sasao a sawen dagiti tattao, sungsungbatandanto+ dayta iti Aldaw a Panangukom; 37 ta babaen iti sasaom maideklarakanto a nalinteg, ket babaen iti sasaom makondenarkanto.”+

38 Kalpasanna kas sungbat kenkuana sumagmamano kadagiti eskriba ken Fariseo kinunada: “Mannursuro, kayatmi ti makakita iti pagilasinan manipud kenka.”+ 39 Kas sungbat kinunana kadakuada: “Ti nadangkes ken mannakikamalala+ a kaputotan agtultuloy a mangsapsapul iti pagilasinan, ngem awanto ti pagilasinan a maited iti dayta malaksid ti pagilasinan ni Jonas a mammadto.+ 40 Ta no kasano a ni Jonas+ adda idi iti tian ti nakadakdakkel nga ikan iti tallo nga aldaw ken tallo a rabii, kasta met a ti Anak ti tao+ addanto iti puso ti daga+ iti tallo nga aldaw ken tallo a rabii.+ 41 Dagiti tattao a taga Nineve tumakderdanto iti panangukom agraman itoy a kaputotan+ ket kondenarendanto+ dayta; agsipud ta nagbabawida iti inkaskasaba ni Jonas,+ ngem, adtoy! maysa a nangnangruna ngem ni Jonas ti adda ditoy. 42 Ti reyna ti abagatan+ maibangonto iti panangukom agraman itoy a kaputotan ket kondenarennanto dayta; agsipud ta isu immay manipud kadagiti ungto ti daga tapno dumngeg iti sirib ni Solomon, ngem, adtoy! maysa a nangnangruna ngem ni Solomon ti adda ditoy.+

43 “No ti maysa a narugit nga espiritu rummuar iti maysa a tao, lumasat kadagiti namagmagan a disso nga agbirbirok iti lugar a paginanaan, ket awan masarakanna.+ 44 Kalpasanna kunaenna, ‘Agsubliakto iti balayko a pimmanawak’; ket iti idadatengna masarakanna nga awan nagyan ngem nasagadan a nadalusan ken naarkosan. 45 Kalpasanna mapan ket mangikuyog iti pito a naiduma nga espiritu a dakdakes ngem isu,+ ket, kalpasan a makastrekda, agnaedda sadiay; ket dagiti kamaudianan a kasasaad dayta a tao agbalin a dakdakes ngem idi immuna.+ Kastanto met iti daytoy nadangkes a kaputotan.”+

46 Bayat nga agsasao pay laeng idi kadagiti bunggoy, adtoy! ni inana ken ti kakabsatna+ nagtakderda iti ruar a tartarigagayanda ti makisao kenkuana. 47 Gapuna kinuna kenkuana ti maysa: “Adtoy! Ni inam ken ti kakabsatmo agtaktakderda iti ruar, a tartarigagayanda ti makisao kenka.” 48 Kas sungbat kinunana iti daydiay agibagbaga kenkuana: “Asino ti inak, ken asino dagiti kakabsatko?”+ 49 Ket idi inyunnatna ti imana a maiturong kadagiti adalanna, kinunana: “Adtoy! Ti inak ken dagiti kakabsatko!+ 50 Ta siasinoman a mangaramid iti pagayatan ni Amak nga adda sadi langit, dayta met laeng ti kabsatko a lalaki, ken kabsatko a babai, ken inak.”