Qampitam Jehoväqa kushishqa këkan

1. Jehoväpa wakin sirweqninkunaqa, ¿imataraq pensayanman?

SIRWEQNINKUNAWAN Jehovä kushishqa këkanqanta musyëqa, ¡alläpa kushikuypaqmi! (Sal. 149:4). Tsënö kaptimpis, wakinkunaqa capaz kënö pensayanman: “Jehoväqa sirweqninkunata kuyanmi, peru ¿noqawanqa kushishqatsuraq këkan?”. Tsënö pensarmi höraqa qelanäkuriyanman. Jehoväpa unë sirweqninkunapis höra höraqa pëkunawan Jehovä mana kushishqa këkanqantam pensayarqan (1 Sam. 1:6-10; Job 29:2, 4; Sal. 51:11).

2. ¿Pikunapitataq Jehoväqa kushikun?

² Bibliachöqa clärum nimantsik jutsasapa karpis, Jehoväta kushitsita puëdinqantsikta. Peru tsëpaqqa, ¿imatataq ruranantsik? Jesus wanunqanmanmi markäkunantsik o yärakunantsik y bautizakunantsik (Juan 3:16). Tsëta rurarmi jutsantsikpita arrepentikunqantsikta y Teyta Diosllatana sirwinapaq änikunqantsikta rikätsikuntsik (Hëch. 2:38; 3:19). Amïgun këta munar tsëkunata rurashqaqa, Jehoväqa alläpam kushikun. Äninqantsikta cumplinapaq kallpachakushqaqa, Jehoväqa noqantsikwanmi kushishqa kanqa y amïgun kanatam permitimäshun (Sal. 25:14).

3. ¿Ima tapukuykunatataq këchö contestashun?

³ Peru ¿imanirtan wakinkunaqa pensayan pëkunawan Jehovä mana kushishqa këkanqanta? ¿Imanötan Jehoväqa rikätsimantsik noqantsikwan kushishqa këkanqanta? ¿Imaraq yanapamäshun noqantsikwan Jehovä kushishqa këkanqanta següru kanapaq?

WAKINQA PENSAYAN PËKUNAWAN JEHOVÄ MANA KUSHISHQA KANQANTAM

4, 5. Mana väleqnö sientikurpis, ¿imapitataq següru kanantsik?

⁴ Wakinnintsikqa wamra kanqantsikpitam imapaqpis mana sirwinqantsikta pensarquntsik (Sal. 88:15). Adrian jutiyoq wawqim kënö nin: “Imapaqpis mana välinqätam imëpis pensarqö. Wamra karqa, Shumaq Patsachö familiäkuna kayänampaqmi mañakoq kä, peru noqaqa tsëchö këta mana merecinqätam pensaq kä”. Tonynam mana Testïgu familiachö winarqan. Pëmi kënö nin: “Teytäkunaqa manam imëpis niyämaqtsu kuyayämanqanta ni noqapita kushishqa kayanqanta. Munayanqannö mana kanqätam imëpis niyämaq”.

⁵ Imapaqpis mana välinqantsikta pensanqantsik höraqa, ¿imatataq yarpänantsik? Sirweqnin kanantsikpaq kikin Jehovä akramanqantsiktam (Juan 6:44). Imanö kanqantsikta mana musyashqapis, Teyta Jehoväqa imanö kanqantsikta allim musyan (1 Sam. 16:7; 2 Crön. 6:30). Tsëmi alläpa väleq kanqantsikta nimashqaqa, creinantsik (1 Juan 3:19, 20).

6. ¿Imanötan apostol Pablu sientikoq jutsata ruranqankunaman yarparnin?

⁶ Capaz wakinkunaqa Jehoväpita manaraq yachakur jutsata rurayanqankunata yarpar alläpa llakikuyan (1 Pëd. 4:3). O wakinkunaqa atska watapana Jehoväta sirwikarpis, mana allikunata rurëta munayanraq. Y capazchi alli tsarakuyänampaq kallpachakurpis, mana alli sientikuyan. ¿Tsënöku qampis sientikunki? Tsënö karqa, ama yarpachakuytsu. Jehoväpa unë sirweqninkunapis wakinqa tsënömi sientikuyarqan. Apostol Pablullaman pensarishun. Pëqa jutsata ruranqankunaman yarparmi alläpa llakikoq (Rom. 7:24). Jutsankunapita arrepentikushqana këkar y bautizakushqana këkarpis, ‘apostolkunachöqa mana kaqlla’ kanqanta y “mas jutsa ruraq” kanqantam nirqan (1 Cor. 15:9; 1 Tim. 1:15).

7. Rasumpa arrepentikushqana karqa, ¿imapitataq següru kanantsik?

⁷ Teytantsik Jehoväqa jutsata ruranqantsikpita arrepentikushqaqa, perdonamänapaqmi änimantsik (Sal. 86:5). Jutsata ruranqantsikpita llakikushqa y rasumpa arrepentikushqaqa, änimanqantsikta cumplinqam y perdonamäshunmi (Col. 2:13).

8, 9. ¿Imaraq yanapamäshun ruranqantsikkunawan Jehovä mana kushishqa këkanqanta mana pensanapaq?

⁸ Llapantsikpis llapan puëdinqantsikmannömi Jehoväta sirwita munantsik. Tsënö kaptimpis capazchi wakinkunaqa rurayanqankunawan Jehovä mana kushishqa këkanqanta pensarnin llakikuyanman. Amanda jutiyoq panim kënö nin: “Jehoväta maslla sirwita munarmi cada junaq masta rurëta procurä. Peru höraqa, manam pensanqänö rurëta puëdïtsu. Tsëmi alläpa llakikü y rurëta mana puëdinqäpita Jehoväpis llakishqa këkanqantam pensä”.

⁹ ¿Imatan yanapamäshun ruranqantsikkunapita Jehovä mana kushikunqanta mana pensanapaq? Tsëpaqqa yarpänantsikmi rurëta puëdinqantsikllata ruranantsikta Jehovä shuyaranqanta, y rurëta mana puëdinqantsikkunataqa mana mañamanqantsikta. Llapan shonquntsikwan rurashqaqa, ichiklla o atska kaptimpis alläpam valoran. Pensarishun Jehoväpa unë sirweqninkunaman. Jukqa karqan apostol Pablum. Pëqa atska watakunapam karu markakunapa ëwar Diospita yachatsikurqan y congregacionkunata patsätsirqan. Peru tsëpitaqa manam puëdirqannatsu. Y ¿Diosnintsikqa dejarirqanku? Manam. Tsëpa rantinqa, Pabluqa puëdinqanllatanam rurarqan y Jehoväqa bendicirqanmi (Hëch. 28:30, 31). Tsënöllam Jehoväqa, unënölla ruranantsiktaqa shuyarantsu. Llapan shonquntsikwan rurashqaqa ichiklla kaptimpis alläpam kushikun. Peru ¿imanötan Jehoväqa rikätsimantsik ruranqantsikkunapita kushishqa këkanqanta?

JEHOVÄQA RURANQANTSIKWAN KUSHISHQA KËKANQANTAM RIKÄTSIMANTSIK

10. ¿Imanötan noqantsikwan Jehovä kushishqa këkanqanta musyatsimantsik? (Juan 16:27).

¹⁰ Palabran Bibliawan. Jehoväqa kushishqam sirweqninkunata musyatsin kuyanqanta y pëkunawan kushishqa këkanqanta. Bibliachömi willakun Jesusta ishkë kutipa “kuyë Tsurï” ninqanta y përëkur kushishqa këkanqanta (Mat. 3:17; 17:5). Y ¿qamtaqa gustashunkimantsuraq Jehovä “qampitam alläpa kushikü” nishuptiki? Ciëlupita mana parlapämarnintsikpis Jehoväqa, Bibliawanmi parlapämantsik. Bibliachömi leyintsik qateqninkunata Jesus kuyëpa parlapanqanta. Tsëta leyirqa, kuyëpa Jehovä parlapëkämanqantsiktanömi sientintsik (leyi Juan 16:27). Jesusqa Teytannö kuyakoqmi. Tsëmi jutsasapa qateqninkunata Jesus kuyëpa parlapanqanta leyirqa, noqantsikta Jehovä kuyëpa parlapëkämanqantsikta pensanantsik (Juan 15:9, 15).

11. ¿Imanirtan mana allikunapa pasarninqa Diosnintsik manana kuyamanqantsikta pensanantsiktsu? (Santiägu 1:12).

¹¹ Ruranqankunawan. Jehoväqa mana allikunapa pasanqantsik hörakunam, llapan wananqantsikwan yanapamantsik. Tsënö karpis, Jobta mana allikuna pasananta permitinqannömi, mana allikuna pasamänata permitinqa (Job 1:8-11). Peru mana allikunapa pasarninqa, manam Jehovä manana kuyamanqantsiktaqa pensanantsiktsu. Tsëpa rantinqa, tsë tiemputam provechanantsik llapan shonquntsikwan Jehoväta kuyanqantsikta y pëman confiakunqantsikta rikätsikunapaq (leyi Santiägu 1:12). Mana allikunapa pasanqantsik hörakunam Jehoväqa, alli aguantanapaq yanapamäshun y kuyamanqantsikta rikätsimäshun.

12. ¿Imatataq yachakuntsik Dimitrita pasanqampita?

¹² Asia nacionpita Dimitri jutiyoq wawqi pasanqampaq parlarishun. Pëqa trabäjunnaqmi quedarirqan. Y atska killapana trabäjuta mana tarirmi, Jehoväman confiakunqanta rikätsikunampaq mas yachatsikur qallëkurqan. Peru atska killakuna pasariptimpis, manam trabäjuta tarirqantsu. Tsëpitanam qeshyakurkurqan, y pensarmi qallëkurqan mana alli papä kanqanta, mana alli qowa o runa kanqanta, y pëwanqa Jehoväpis mana kushishqa këkanqanta. Peru juk paqasmi warmi wamran Isaïas 30:15 textu ninqanta imprimirkur papäninta entregarqan. Tsë textuqa kënömi nin: “Tranquïlu kar y noqaman confiakamurmi kallpayoq kayanki”. Tsëta entreganqan höram papäninta kënö nirqan: “Papä, llakikunqëki hörakuna kë textuta yarpanki”. Dimitriqa cuentatam qokurirqan Jehovä yanapaptin familianqa wayiyoq kayanqanta y röpankunapis y mikuyninkunapis mana pishinqanta. Kënömi nin: “Yarpachakurlla kanäpa rantinqa, tranquïlum kanä karqan y Jehovämanmi confiakunä karqan”. ¿Tsënöpaku qampis pasëkanki?Tsëqa segürum kanëki qampaq Jehovä yarpachakunqanta y imëkapa pasaptikipis aguantanëkipaq yanapashunëkipaq kaqta.

13. ¿Imanö mastan Jehoväqa noqantsikwan kushishqa këkanqanta rikätsimantsik?

¹³ Wawqi panikunawan. Jehoväqa sirweqninkunatam utilizan mana allikunapa pasanqantsik hörakuna shumaq parlapämänantsikpaq. Tsëmi pasarqan Asiapita juk panintsikta. Pëqa trabäjunnaqmi quedarirqan, y tsëpitanam alläpa qeshyakurkurqan. Tsënö këkaptinnam, qowan o runan jutsata rurarirqan y mananam anciänunatsu karqan. Tsëkunapa pasarnin y alläpa yarpachakurmi panintsikqa kënö nirqan: “Manam entiendirqätsu imanir tsëkunapa pasëkanqäta. Imatapis mana allita rurashqa kanqäta y noqawan Jehovä manana kushishqa këkanqantam pensarqä”. Tsëpitanam panintsikqa Jehoväman mañakurqan pëwan kushishqa këkanqanta musyatsinampaq. ¡Y Jehoväqa contestarqanmi! ¿Imanö? Panintsikmi kënö nin: “Anciänukunam noqawan parlayarqan y Jehovä kuyamanqantam entienditsiyämarqan”. Tsëpita tiempu pasariptimpis yanapananta munarmi Jehoväman yapë mañakurqan. Y kënömi nin: “Mañakunqä junaqllam congregacionpita kuyakoq turikuna y nanakuna shumaq cartakunata apatsiyämarqan. Tsëta leyirirqa, mañakunqäta Jehovä contestamashqa kanqantam cuentata qokurqä”. Rikärinqantsiknöpis, Jehoväqa jukkunatam utilizan noqantsikwan kushishqa këkanqanta musyatsimänapaq (Sal. 10:17).

14. ¿Imanötan Jehoväqa wawqikunata y panikunata utilizan noqantsikwan kushishqa këkanqanta musyatsimänapaq?

¹⁴ Tsënöllam Jehoväqa, kuyamanqantsikta rikätsimantsik wawqikunawan y panikunawan consejatsimarnintsik. Këllaman pensarishun: punta cristiänukuna kawayanqan witsanmi, sirweqninkunata consejanampaq apostol Pabluta nirqan 14 cartakunata qellqanampaq. Tsë cartakunachöqa shumaq consëjukunam karqan. ¿Imanirtan Jehoväqa tsë consëjukunata Pabluta qellqatsirqan? Alli kar y kuyakoq karninmi. Juk papä “kuyë wamranta corrigeqnömi” sirweqninkunata consejëkarqan (Prov. 3:11, 12). Tsëmi pillapis Bibliawan consejamashqaqa, Jehovä manana kuyamanqantsikta pensanapa rantin kuyamarnintsik consejëkämanqantsikta yarpänantsik (Heb. 12:6). ¿Imanö mastan musyashwan noqantsikwan Jehovä kushishqa këkanqanta?

¿IMANÖ MASTAN JEHOVÄ RIKÄTSIMANTSIK NOQANTSIKWAN KUSHISHQA KANQANTA?

15. ¿Pikunatataq Jehoväqa santu espïritunwan yanapan, y imapitataq següru kanantsik?

¹⁵ Jehoväqa sirweqninwan kushishqa këkanqanta rikätsikun poderninwan yanaparninmi (Mat. 12:18). Tsëmi kënö pensanantsik: “¿Imanötan kawakunqächö rikätsikü santu espïritunwan Teyta Dios yanapamanqanta?”. Këman pensari: ¿Jehoväpita manaraq yachakur pacienciayoq kanqëkipita masku kananqa pacienciayoq kanki? Santu espïritu yanapashunqëkinö kawarqa, segürum kanëki Teyta Jehovä kushishqa këkanqanta. (Leyiri “Santu espïritu pushanqan nunakuna” neq recuadruta).

16. 1 Tesalonicensis 2:4 textu ninqannö, ¿pikunallatataq Jehovä permitin alli noticiakunata willakuyänanta? Y tsëta musyarqa, ¿imanötan sientikunki?

¹⁶ Jehoväqa confiakunqan nunakunallatam alli noticiakunata willakuyänanta permitin (leyi 1 Tesalonicensis 2:4). Tsënö kanqanta entiendirinapaq, Jocelynta pasanqampaq parlarishun. Juk qoyam o wärëmi Jocelynqa gänasninnaq warämurqan. Kënömi nin: “Tsë qoyaqa o wärëqa manam ni imata ruranäpaq gänasnï karqantsu. Peru tsë killachö precursöra karmi tsë junaq yachatsikoq yarqunä karqan. Tsëmi Jehoväman mañakurir yachatsikoq yarqurqä”. Tsë qoyaqa Mary jutiyoq shumaq parlapäkoq warmitam, Bibliapita Jocelyn parlaparqan, y pëqa yachakuytam munarqan. Y juk ishkë killakuna pasariptinmi, Maryqa Jocelynta willarqan punkunta tocakunqan höra, yanapëkunampaq Diosnintsikman mañakuykanqanta. ¿Imatataq Jocelyn cuentata qokurqan tsënö willariptin? Kënömi nin: “‘Qamwanqa kushishqam këkä’ nikämaqtanömi Jehoväta sientirqä”. Awmi, yachatsikushqaqa manam llapan nunakunatsu wiyakuyan, peru segürum kanantsik alli noticiakunata willakunantsikpaq kallpachakushqaqa noqantsikwan Jehovä kushishqa këkanqanta.

17. ¿Imatataq Vicky ninqan yachatsimantsik noqantsikrëkur Jesus wanunqampaq? (Salmus 5:12).

¹⁷ Jehoväqa, kuyanqan nunakuna jutsankunapita libri kayänampaqmi Tsurimpa vïdanwan pagakunqanta välitsin (1 Tim. 2:5, 6). Peru Jesus wanunqanman markäkurpis o yärakurpis y bautizakushqana karpis noqantsikwan Jehovä kushishqa këkanqanta mana següru karqa, ¿imataraq rurashwan? Jehovä nimanqantsikkunamanmi confiakunantsik y manam shonquntsik nimanqantsikkunamanqa. Jesus wanunqanman markäkushqa o yärakushqaqa, Jehoväqa alli ruraq nunatanönam rikämantsik y bendicimänapaqmi änimantsik (leyi Salmus 5:12; Rom. 3:26). Vicky jutiyoq panintsiktam alläpa yanaparqan Jesus wanunqanman alli pensanqan. Pëqa Jehovä mana kuyanqanta pensashqa karpis, kënömi nin: “Jehoväqa mëtsika tiempupam noqawan pacienciayoq kanaq [...]. Tsënö këkaptimpis noqaqa, ‘manam kuyamänëkita merëcïtsu Y Tsuriki wanunqampis manam jutsäta perdonamänëkipaq tinkuntsu’ nikaq cuentam këkarqä”. Tsënö pensashqa karpis, Vickyqa Jesus wanunqanmanmi alli pensarqan. Tsënöllam noqantsikpis Jesus wanunqanman alli pensarqa, Jehovä kuyamanqantsikta y noqantsikwan kushishqa këkanqanta següru kashun.

18. Jehoväta llapan shonquntsikwan kuyarqa, ¿imapitataq següru kanantsik?

¹⁸ Këchö yachakunqantsiknö rurarpis, capazchi höraqa qelanäkurinki o qamwan Jehovä mana kushishqa këkanqanta pensanki. Tsë pasashuptikiqa yarpänëkim, llapan shonqunkunawan kuyaqkunataqa Teyta Jehovä imëpis kuyanqanta (Sant. 1:12). Tsëmi Jehoväpita yachakur sïguinëki y qamwan kushishqa kar yanapashunëkipaq imakunata rurëkämunqanta cuentata qokunëki. Ama imëpis qonqëtsu: pëqa manam noqantsikpita “alläpa karuchötsu këkan” (Hëch. 17:27).