Meecht ich Yeehoowa kefale?

1. Was khene etliche troye tiiner fon Yeehoowa sich frooe?

ES IS aarich ufmuutich se wise tas Yeehoowa sich mit sayn folek kefalt. Ti Piipel saat: “Yeehoowa frayt sich mit sayn folek.” (Psal. 149:4) Awer als mool, khene mer soo oone muut plaype tas mer uns frooe: ‘Tuut Yeehoowa sich mit mich kefale?’ Fiile fon Yeehoowa sayn troye tiiner in te piiplixe tsayte hon es aach xweyer kefun se klaape tas Kot sich mit tëne kefalt hot. (1 Sam. 1:6-10; Yoop 29:2, 4; Psal. 51:11)

2. Weer kriit Yeehoowa sayn tsuxtimung?

² Ti Piipel lost es taytlich tas imperfekte mënxe khene Yeehoowa sayn tsuxtimung kriin. Too tefoer, mise mer aan Yeesus Kristus klaape un uns taafe lose. (Yoo. 3:16) Soo, tsayche mer fer ti anere tas mer uns fon unser sinte peroyt hon un tas mer tsu Yeehoowa ferxproch hon tëm sayn wile mache. (Aph. 2:38; 3:19) Yeehoowa frayt sich aarich fiil mit uns wën mer tiise xrite kepe fer tëm sayn fraaynte wëre. Wën mer unser pestes mache fer unser tetikatsyoon in hale, kefalt sich Yeehoowa mit uns un siit uns wii sayn tichte fraaynte. (Psal. 25:14)

3. Was fer 3 frooche tuun mer in tiise artikel noo kuke?

³ Awer warom tuun etliche als mool tenke tas Yeehoowa sich mit tëne net kefalt? Wii tsaycht Yeehoowa tas eyer froo mit uns is? Un wii khan een krist noch mee traue tas eyer Kot sayn tsuxtimung hot? Wole mer tiise 3 frooche antworte.

WAROM TUUN ETLICHE ALS MOOL TENKE TAS KOT SICH MIT TËNE NET KEFALT?

4-5. Soo kaar wën mer xpiire tas mer khee weyert hon, fon was khene mer uns sicher sin?

⁴ Fon khint aan, hon fiile fon uns kexpiirt tas mer khee weyert hon. (Psal. 88:15) Eene pruuter, woo Adrián heest, saat: “Ich hon imer kexpiirt tas ich khee weyert hat. Ich tenke mich traan tas, wii ich kleen waar, hon ich kepeet tas mayn familye solt im Paratiis leepe, opwool ich mich sicher waar tas ich net kuut kenuuch waar fer tat sin.” Tony, woo net in te woerheet kroos ketsoo waar, saat: “Mayn eltere hon nii kesaat tas se mich keliipt hon orer tas se froo mit mich waare. Tes weeche, hon ich kexpiirt tas ich nii kenuuch kemacht hon.”

⁵ Wën mer als mool xpiire tas mer khee weyert hon, sole mer uns net ferkese tas Yeehoowa selepst uns tsu tëm ketsoo hot. (Yoo. 6:44) Tee siit unser kuute kwaliteete — kwaliteete woo meyer fiilaycht net siin. Tee khënt ti sort persoon woo mer wërklich sin. (1 Sam. 16:7; 2 Kro. 6:30) Soo, meyer khene uf tëm traue wën tee saat tas mer weyertlich sin. (1 Yo. 3:19, 20)

6. Wii hot te aphostel Phaul sich kexpiirt weeche ti sinte woo eyer kemacht hat?

⁶ Etliche fiilaycht xpiire sich noch xultich weeche ti tinge woo se kemacht hon eep se ti woerheet kelërnt hon. (1 Phe. 4:3) Ti woerheet is tas soo kaar troye kriste khëmpfe keeche sayn xwacheete. Un tuu? Xpiirst tuu tas Yeehoowa tich net fertsaye khan? Wën yaa, es khan tich treeste se wise tas tuu net aleen pist. Anere troye tiiner fon Yeehoowa hon xon tas selwiche kexpiirt. Tsum payxpiil: te aphostel Phaul hot sich unutslich kexpiirt wii eyer aan sayn imperfektsyoone ketenkt hot. (Rom. 7:24) Es is woer tas Phaul sich fon sayn sinte peroyt hot un sich taafe kelos hot. Noch soo, hot eyer sich selepst kenënt wii “te kleenste fon te aphostele” un “te xlimste” fon te sintiche layt. (1 Kor. 15:9; 1 Tim. 1:15)

7. Was sole mer uns erinere iwer unser sinte?

⁷ Unser himlixe Fater ferxprecht uns fertsaye wën mer uns peroyt hon. (Psal. 86:5) Soo, wën mer uns wërklich peroyt hon fon unser sinte, khene mer traue aan was Yeehoowa saat — tee hot uns fertsayt. (Kol. 2:13)

8-9. Wii khene mer torich ti xpiirung triwer wech khome tas mer nii kenuuch mache fer Yeehoowa kefale?

⁸ Meyer al wole unser pestes mache fer Yeehoowa tiine. Awer khan sin tas mer xpiire tas mer nii kenuuch mache fer Yeehoowa kefale. Een xwester woo Amanda heest, saat: “Ofts, tenke ich tas mayn pestes tsu Yeehoowa kepe, petayt imer mee mache. Soo ich fersuuche imer mee mache wii ich kemacht kriin. Tan, wën es net funtsyoniirt, tenke ich tas Yeehoowa traurich mit mich is, soo wii ich traurich mit mich sin.”

⁹ Wii khene mer torich ti xpiirung triwer wech khome tas mer nii kenuuch mache fer Yeehoowa kefale? Eriner tich tas Yeehoowa net xtreng is. Tee tuut nii mee fon uns ferlange wii mer kepe khene. Soo lang wii mer uns aan xtrenge, wërt eyer froo too temit. Tenk aach aan piiplixe payxpiile fon layt woo Yeehoowa mit sayn kans hërts ketiint hon. Tsum payxpiil, Phaul hot torich fiile yoore xtram kexaft. Tee is tausente kilometer kereest un hot fiile kemaynte kekrintet. Awer tan, hot sayn leepe sich keënert un tee khont net mee soo fiil preetiche. Meecht Yeehoowa noo kelos hon sich mit tëm kefale? Nee. Phaul hot wayter kemacht was eyer khont un Yeehoowa hot tëm keseechent. (Aph. 28:30, 31) Kraat soo, was mer tsu Yeehoowa mache khene, khan sich als mool ënere. Awer was wichtich fer tëm is, is warom mer tas mache. Wole mer yets xpreche iwer etliche aate wii Yeehoowa tsaycht tas eyer sich mit uns kefalt.

WII TSAYCHT KOT TAS EYER SICH MIT UNS KEFALT?

10. Wii khene mer “heere” Yeehoowa saan tas eyer froo mit uns is? (Yoohan 16:27)

¹⁰ Torich ti Piipel. Yeehoowa suucht aate wii eyer khan fer sayn tiiner tsayche tas eyer se liipt un sich mit tëne kefalt. Ti Piipel xprecht iwer 2 mool woo Yeehoowa fer Yeesus kesaat hot tas eyer Sayn liipe Soon waar un tas eyer Tëm kefalt hot. (Mat. 3:17; 17:5) Teest tuu kërn heere Kot saan tas eyer sich mit tich kefalt? Yeehoowa xprecht net mit uns fom himel aus, awer tee macht tas torich ti Piipel. Wën mer ti liipliche wërter woo Yeesus fer sayn tisipele kesaat hot leese, is es wii wën mer Yeehoowa “heere” khente tiise selwiche wërter fer uns saan. (Lees Yoohan 16:27.)a Yeesus hot ti kwaliteete fon sayn Fater perfekt noo kemacht. Soo, wën mer leese was Yeesus fer sayn imperfekte — awer troye nookeener — kesaat hot, khene mer uns foer xtele Yeehoowa tiise selwiche wërter fer uns saan. (Yoo. 15:9, 15)

11. Warom khene mer saan tas, wën mer proope mit mache, es wil net saan tas mer Kot sayn tsuxtimung ferloer hon? (Tyako 1:12)

¹¹ Torich sayn aktsyoone. Yeehoowa wil uns helfe. Tee tuut uns, tsum payxpiil, fersoriche. Awer als mool, erlaupt Yeehoowa tas mer xwiirichkheete mit mache, soo wii es mit Yoop pasiirt is. (Yoop 1:8-11) Wën mer proope mit mache, tas petayt net tas mer Yeehoowa sayn tsuxtimung ferloer hon. Xtats tas, tii kepe uns ti xans fer se pewayse wii kroos unser liip un fertraung uf Yeehoowa is. (Lees Tyako 1:12.)b Un torich ti proope, siin mer wii kroos Kot sayn liip un hilef is.

12. Was khene mer mit Dmitrii sayn speryens lërne?

¹² Kuk mool ti speryens fon een pruuter in Asya woo Dmitrii heest. Tee hot sayn aarwayt ferloer un torich phaar moonate khont eyer net een aner fine. Fer se tsayche tas eyer uf Yeehoowa ketraut hot, hot eyer ëntxlist mee in te preetich aarwayt mache. Haufe moonate sin rom kang un tee hat noch khee aarwayt kefun. Tan hot eyer een xroo krankheet kriit un khont net ausm pet keen. Tee hot aan kefang se tenke tas eyer net mee een kuute man orer papa weyer. Un eyer hot sich kefroot ep Yeehoowa traurich mit tëm waar. Tan eene nacht, hot sayn meetche ti wërter fon Isayas 30:15 uf een xtik papier aus ketrukt: “Ayre kraft khomt fon in ruu plaype un aan mich traue.” Tii hot tas xtik papier tëm keprung un kesaat: “Papa, wëns tuu tich xlecht xpiirst, tenk aan tiise tekst.” Dmitrii hot kemërkt tas, Kot say tank, hat sayn familye ese, tsaych un een haus. “Was ich mache must — saat eyer —, waar in ruu plaype un wayter uf mayn Kot traue.” Wëns tuu een eenlich proop mit machst, say tich sicher tas Yeehoowa sich mit tich khimert un helft tich aus hale.

13. Weem khan Yeehoowa penutse fer se tsayche tas eyer froo mit uns is, un wii macht eyer tas?

¹³ Torich ti priiter un xwestere. Yeehoowa penutst unser priiter un xwestere fer se tsayche tas eyer froo mit uns is. Tsum payxpiil: tee khan ti anere penutse fer uns uf muute wën mer tas wërklich prayche. Tas is mit een xwester in Asya pasiirt wii se mechtich ëngstlich waar. Tii hot sayn aarwayt ferloer un is aarich krank kep. Tan hot sayn man een xroo sint kemacht un khont net mee wii elteste tiine. Tii hot kesaat: “Ich khont net ferxteen warom tas am pasiire waar. Ich hon kerechent tas fiilaycht hat ich was ferkheertes kemacht un tas ich Yeehoowa net mee kefalt hon.” Unser xwester hot tsu Yeehoowa aan kehal tas eyer se tsayche teet tas eyer froo mit tëne waar. Wii hot Kot tas kemacht? “Ti elteste hon mit mich kexproch — saat se — un hon mich keholef se siin tas Yeehoowa mich wayter keliipt hot.” Xpeeter hot ti xwester noch mool hilef tsu Yeehoowa ferlangt. Tii saat: “Im selwiche taach, hon ich een priif fon een krup priiter un xwestere fon te kemaynt kriit. Soo lang wii ich sayn ufmuutiche wërter kelees hon, hon ich kexpiirt tas Yeehoowa mich keheert hat.” Yawool, ofts tuut Yeehoowa sayn tsuxtimung tsayche torich ti anere sayn liipliche wërter. (Psal. 10:17)

14. Wii noch tuut Yeehoowa tsayche tas eyer sich mit uns kefalt?

¹⁴ Yeehoowa tsaycht aach tas eyer sich mit uns kefalt wën eyer uns aanreete kept torich unser priiter un xwestere. Tsum payxpiil: im eyerste yoer hunert, hot Yeehoowa te aphostel Phaul penutst fer 14 inspiriirte priife fer sayn priiter xraype. In tiise priife, hot Phaul taytliche awer liipliche aanreete kep. Warom hot Yeehoowa Phaul kelenkt soo sorte aanreete kepe? Yeehoowa is een kuute Fater un eyer tisipliniirt sayn liipe khiner. (Xpr. 3:11, 12) Soo, wën yemant uns een aanreet fon te Piipel kept, es wil net saan tas Yeehoowa pees mit uns is. Xtats tas, es tsaycht tas Eyer uns liipt. (Hep. 12:6) Was noch tuut tsayche tas Yeehoowa sich mit uns kefalt?

ANERE PEWAYSUNGE TAS KOT SICH MIT UNS KEFALT

15. Fer weem kept Yeehoowa sayn hayliche kayst un was fer sicherheet kriin mer too temit?

¹⁵ Yeehoowa kept sayn hayliche kayst fer tii woo tëm kefale. (Mat. 12:18) Meyer khene uns frooe: ‘Tsayche ich kwaliteete woo fom hayliche kayst khome?’ Tsum payxpiil: pist tuu hayt ketulticher wiis tuu friier waarst, eeps tuu ti woerheet kelërnt host? Woo peser tuu ëntwikelst ti kwaliteete fom hayliche kayst, woo sicher khanst tuu tich sin tas tuu Yeehoowa kefalst. (Kuk te khaste “Ti frucht fom kayst is…”.)

16. Weem tuut Yeehoowa penutse fer ti kuute notisye preetiche un wii xpiirst tuu tich too triwer? (1 Thesalooniker 2:4)

¹⁶ Yeehoowa fertraut ti kuute notisye tsu tëne woo tëm kefale. (Lees 1 Thesalooniker 2:4.)c Een xwester woo Jocelyn heest, hot tiise sicherheet kriit wii se ti kuute notisye kepreeticht hot. Eene taach, is se tiifsinich uf kextii. “Ich hat kaar khee kraft — saat se. — Un ich hon mich unutslich kexpiirt. Awer ich waar een pyoneerin un es waar mayn taach fer se xafe. Soo, hon ich een kepeet kemacht un sin preetiche kang.” In tiise selwich moynt, hot Jocelyn Mary ketrof, een liiplich fraa woo aan kenom hot ti Piipel xtutiire. Phaar moonate xpeeter, hot Mary kesaat tas se tsu Kot kepeet hat fer hilef kriin un tan hot Jocelyn aan sayn teer keklopt. Was hot Jocelyn too temit kelërnt? “Ich hon kexpiirt — saat se — tas Yeehoowa mich am saan weyer: ‘Tuu kefalst mich!’” Kewis, tuun net al aan nëme tas pexeet woo mer preetiche, awer meyer khene uns sicher sin tas Yeehoowa froo is wën mer unser pestes mache fer ti kuute notisye mit te anere teele.

17. Was lërnst tuu mit Victoria sayn wërter iwer tas fray khaaf opfer? (Psalm 5:12)

¹⁷ Tii woo Yeehoowa kefale, kriin nutse fom fray khaaf opfer. (1 Tim. 2:5, 6) Awer, un wëns tuu xpiirst tas Yeehoowa sich net mit tich kefalt, opwool tuu am fray khaaf opfer klaapst un ketaaft pist? Eriner tich: meyer khene net aan unser xpiirunge traue, awer meyer khene uf Yeehoowa traue. Foer tëm, tii woo aan tëm fray khaaf opfer klaape, sin kerecht un tee ferxprecht se seechne. (Lees Psalm 5:12;d Rom. 3:26.) Tiif too triwer noo tenke, hot Victoria keholef. Tii hot kemërkt: “Yeehoowa [is] aarich ketultich mit mich, xon fon een lang tsayt. (…) Awer in woerheet tas waar wii ich saan teet fer iim: ‘Tayn liip is net kroos kenuuch fer mich noo khome. Tayne Soon sayn opfer is net kenuuch fer mayn sinte teke.’” Soo hot se aan kefang sich keliipt fon Yeehoowa xpiire. Wën mer triwer noo tenke am fray khaaf opfer, tuun mer aach xpiire tas Yeehoowa uns liipt un meyer kriin ti sicherheet tas mer tëm kefale.

18. Was fer sicherheet khene mer hon wën mer unser himlixe Fater wayter liipe?

¹⁸ Opwool meyer uns aan xtrenge fer ti lisyoone fon tiise artikel aan wëne, khene mer uns als mool oone muut xpiire un uns frooe ep mer Yeehoowa wërklich kefale tuun. Wën tas pasiirt, eriner tich tas Eyer sich kefalt mit tëne “woo tëm wayter liipe”. (Tya. 1:12) Soo, xaf tich imer tichter tsu Kot un mërk wii eyer sich mit tich kefalt. Ferkes tich nii: Yeehoowa is “net wayt fon yeete eene fon uns”. (Aph. 17:27)