Йәһваниң сиздин хурсән болидиғанлиғиға ишиниң

1. Йәһва Худаниң бәзи садиқ хизмәтчилири гайида қандақ һис-туйғуда болуши мүмкин?

МУҚӘДДӘС КИТАПТА: «Йәһва Өз хәлқигә илтипатлиқ»,— дәп йезилған. Бу һәқиқәтни билиш көңлүмизни тәсәлли тапқузиду! (Зәб. 149:4) Лекин бәзи кишиләр гайида қаттиқ чүшкүнлүккә чүшүп: «Йәһва мәндин хурсәнму?»— дәп сорайду. Қедимий заманда Йәһваниң нурғунлиған садиқ хизмәтчилири шундақ ой-пикиргә қарши күрәш қилған (Сам. 1-яз. 1:6—10; Аюп 29:2, 4; Зәб. 51:11).

2. Йәһва Худа кимләрдин хурсән болған?

² Муқәддәс китап шуни ениқ көрсәткәнки, намукәммәл инсанлар Йәһваниң қобул қилишиға еришәләйду вә Уни хурсән қилалайду. Амма улар буниң үчүн чоқум Әйса Мәсиһкә ишиниши вә чөмдүрүлүштин өтүши керәк (Йоһ. 3:16). Биз бундақ қилғанда, гуналиримизға товва қилип, Худаниң ирадисини орунлашқа вәдә бәргәнлигимизни очуқ ашкарә көрситимиз (Әлч. 2:38; 3:19). Биз Йәһва билән йеқин дост болуш үчүн бу қәдәмләрни басқанда, Йәһва интайин хошал болиду. Биз пүтүн күчимиз билән өзүмизни беғишлиғанда, бәргән қәсимимизни орунлашқа тиришсақ, Яратқучи Йәһва биздин хурсән болиду вә бизни Өзиниң йеқин достлири дәп қарайду (Зәб. 25:14).

3. Һазир қайси үч соални көрүп чиқимиз?

³ Немә үчүн бәзи кишиләр гайида Йәһва улардин хурсән әмәстәк һис қилиду? Йәһва улардин хурсән екәнлигини қандақ көрситиду? Худа биздин хурсән болғанлиғиға ишәнчимизни қандақ күчәйтәләймиз?

НЕМӘ ҮЧҮН БӘЗИЛӘР ЙӘҺВА УЛАРДИН ХУРСӘН ӘМӘСТӘК ҺИС ҚИЛИДУ?

4, 5. Өзүмизни әрзимәс һис қилсақму, немидин гуман қилмаслиғимиз керәк?

⁴ Аримизда бәзилиримиз балилиқ чағлиримиздин башлап, өзүмизни төвән көрүш һис-туйғуси билән күрәш қилип кәлдуқ (Зәб. 88:15). Адриан исимлиқ бир бурадәр мундақ дәйду: «Мән һәрдайим өзүмни әрзимәс һис қилаттим. Кичик вақтимда аиләмдикиләр билән җәннәттә яшашни тиләп, дуа қилғиним техи есимдә бар. Амма өзүмни у йәрдә яшашқа лайиқ әмәстәк дәп ойлаттим». Мәсиһ әгәшкүчилириниң аилисидә чоң болмиған Тони исимлиқ бир қериндаш мундақ дәйду: «Ата-анам һечқачан мени сөйидиғанлиғини вә мәндин пәхирлинидиғанлиғини ейтмиған. Шуңлашқа мән һәрдайим мәйли қандақла иш қилсам, уларни хошал қилалмаймән дәп ойлидим».

⁵ Әгәр бәзидә өзүмизни әрзимәс һис қилсақ, Йәһваниң бизни Өзигә җәлип қилғанлиғини әсләп көрүң (Йоһ. 6:44). У биздә бәлким өзүмиз көрмәйватқан яхши пәзиләтләрни көрүватиду вә бизниң зади қандақ адәм екәнлигимизни биздин яхширақ билиду (Сам. 1-яз. 16:7; Тар. 2-яз. 6:30). Шуңлашқа Йәһва бизгә қәдирлик екәнлигимизни ейтқинида, биз буниңдин қәтъий гуманланмаслиғимиз керәк (Йоһ. 1-х. 3:19, 20).

6. Әлчи Паул өткүзгән гуналири тоғрилиқ ойланғанда, немини һис қилған?

⁶ Бәзилиримиз һәқиқәтни тонуштин авал бәзи хата ишларни қилип, нәтиҗидә һазирға қәдәр өзүмизни гунакардәк һис қилишимиз мүмкин (Пет. 1-х. 4:3). Һәтта Худаниң садақәтмән хизмәтчилириму гунакар хаһиши билән күрәш қилиду. Сизму шундақ қиливатамсиз? Әгәр шундақ болса, Йәһваниң садиқ хизмәтчилириниңму шуниңға охшаш һис-туйғулар билән күрәш қилғанлиғини билиш көңлүмизни тәсәлли тапқузиду. Мәсилән, әлчи Паул камчилиқлири тоғрилиқ ойланғанда, өзини интайин бечарә һис қилған (Рим. 7:24). Әлвәттә, Паул аллиқачан гуналириға товва қилип, чөмдүрүлүштин өткән болсиму, лекин у «әлчиләрниң арисида әң» төвән биримән вә «мән — әң гунакари» дегән еди (Кор. 1-х. 15:9; Тим. 1-х. 1:15).

7. Биз өткүзгән гуналиримиз тоғрилиқ ойланғинимизда, немини әстин чиқармаслиғимиз керәк?

⁷ Товва қилсақ, асмандики Атимиз бизни кәчүрүм қилидиғанлиғини вәдә қилған (Зәб. 86:5). Әгәр өткүзгән гуналиримизға чин қәлбимиздин пушайман қилип товва қилсақ, Йәһваниң сөзигә қулақ салимиз вә Униң бизни кәчүргәнлигигә ишинимиз (Кол. 2:13).

8, 9. Йәһвани хурсән қилғудәк, яхши хизмәт қилалмидим дегән һис-туйғуни қандақ йеңәләймиз?

⁸ Һәммимиз қолумиздин келишичә Йәһваға хизмәт қилишни халаймиз. Бирақ бәзиләр Йәһваниң қобул қилишиға еришиш үчүн һәргизму әң яхши дәриҗидә хизмәт қилалмайдиғанлиғини һис қилиши мүмкин. Аманда исимлиқ бир қериндишимиз мундақ дәйду: «Мән һемишә чоқум көпирәк ишларни қилишим керәк, шундила Йәһваға әң яхшисини берәләймән дәп ойлаттим. Шуңа дайим қолумдин кәлгәндинму артуқ ишларни қилишқа һәрикәт қилимән. Нәтиҗидә, қилмай қалған чағларда өзүмдин үмүтсизлинип кетимән вә Йәһваму мениңдин үмүтсизләнди дәп ойлаймән».

⁹ Әгәр сиз Йәһвани хурсән қилғудәк яхши хизмәт қилалмидим дәп һис қилсиңиз, бу һис-туйғуни қандақ йеңәләйсиз? Есиңиздә болсунки, Йәһва һәддидин зиядә тәләпчан яки қаттиқ қол Худа әмәс. У һәргизму биз қилалмайдиған ишни тәләп қилмайду. Биз Униңға пүтүн күчимиз билән әң яхшисини бәргинимиздә, У шуларни қәдирләйду. Йәһваниң өтмүштики садиқ хизмәтчилири һәққидә ойлап көрүң. Мәсилән, Паул нурғун жил қизғинлиқ билән вәз қилип, нәччә миң километр йол жүрүп көплигән җамаәтләрни қурған. Амма униң вәзийити өзгирип, вәз ейтиш хизмитигә азирақ қатнашқанда, Худа әнди униңдин хурсән болмиғанму? Яқ. У қолидин келишичә қилишқа тиришқан вә Йәһва уни бәрикәтлигән (Әлч. 28:30, 31). Худди шуниңға охшаш, бизниң вәзийитимиздиму өзгириш йүз берип, Йәһваға илгирикидәк көпирәк хизмәт қилалмай қелишимиз мүмкин. Амма Худа үчүн муһим болғини, бизниң Униңға хизмәт қилиш мәхситимиз. Һазир Йәһваниң биздин хурсән болғанлиғини қандақ көрситидиғанлиғини көрүп бақайли.

ЙӘҺВА БИЗДИН ХУРСӘН БОЛҒАНЛИҒИНИ ҚАНДАҚ КӨРСИТИДУ?

10. Йәһва Худаниң биздин хурсән болғанлиғини қандақ «аңлалаймиз»? (Йоһан 16:27)

¹⁰ Муқәддәс китап арқилиқ. Йәһва Өзи сөйгән кишиләрдин хурсән болғанлиғини көрситишни халайду. Муқәддәс Язмиларда Йәһва Худа икки қетим Әйсани сөйүмлүк Оғлум, униңдин хурсәнмән дәп етирап қилғанлиғи йезилған (Мәт. 3:17; 17:5). Сизму Йәһваниң сиздин хурсән болғанлиғини ейтишни халиғанму? Гәрчә һазир биз асмандин бир авазниң кәлгәнлигини аңлимисақму, бирақ У Өз Сөзи болған Муқәддәс китап арқилиқ бизгә сөз қилиду. Муқәддәс китаптики һәзрити Әйсаниң сөзини оқуғинимизда, Йәһваниң биздин хурсән екәнлигини тәстиқләйдиған сөзлирини «аңлалаймиз» (Йоһан 16:27ни оқуң). У Атисиниң есил пәзиләтлирини мукәммәл әкс әттүргән. Шуңлашқа биз Әйсаниң өзиниң намукәммәл, амма садиқ әгәшкүчилиридин хурсән болғанлиғини ейтқан. Буни оқуғинимизда, Йәһваниң бу сөзләрни бизгиму ейтқанлиғини тәсәввур қилалаймиз (Йоһ. 15:9, 15).

11. Немә үчүн қийинчилиқларни баштин өткүзүш Йәһва Худаниң биздин хурсән әмәслигини билдүрмәйду? (Яқуп 1:12)

¹¹ У бизгә еһтияҗлиқ нәрсиләрни бериду. Йәһва бизгә ярдәм беришкә һәрқачан тәйяр. Мәсилән, бизниң маддий еһтияҗлиримизни қамдайду. Бәзидә У худди садиқ киши Аюпқа охшаш, бизниңму җапа чекишимизгә йол қоюши мүмкин (Аюп 1:8—11). Лекин қийинчилиқлар Йәһваниң биздин хурсән әмәслигини билдүрмәйду, бәлки бу Йәһваға болған сөйгү-муһәббәт вә ишәнчимизниң чоңқурлиғини испатлаш үчүн пурсәт яритип бериду (Яқуп 1:12ни оқуң). Худа әшу қийинчилиқларға бәрдашлиқ беришимизгә ярдәм бәргәндә, Униң көйүмчанлиғини вә қоллап-қувәтләватқанлиғини һис қилимиз.

12. Дмитрийниң мисалидин немиләрни үгәнсәк болиду?

¹² Дмитрийниң мисалини көрүп бақайли. У иш орнидин айрилип, бир қанчә ай иш издәпму иш тапалмиған еди. Шуниң билән, у вәз қилишқа көпирәк вақит чиқиришни қарар қилған вә Йәһваға болған ишәнчисини көрсәткән. Бир қанчә айлар өтүп кәткән, амма у йәнила иш тапалмиған. Кейин Дмитрий кесәл болуп, орун тутуп йетип қалған. У шундақ гуман қилишқа башлиған: «Мән яхши әр вә яхши дада болалмиғачқа, Йәһва мәндин хурсән әмәс». Бир күни кәчтә униң қизи бир варақ қәғәзгә Йәшая 30:15-айәттики (ЙД) сөзләрни йезип дадисиға бәргән. «Тинч-хатирҗәмликни сақлап, маңа таянсаңлар күчлүк болисиләр». Қиз каравәтниң йениға келип: «Дада, көңлүңиз йерим болғанда, бу айәтни есиңизгә елиң»,— дегән. Дмитрий Йәһваниң ярдимидә униң аилисиниң йетәрлик йемәк-ичмәк, кийим-кечәк вә туридиған җайиға еришкәнлигини һис қилған. У мундақ дәйду: «Мениң қилишқа тегишлик ишим пәқәт тинч-хатирҗәмликни сақлаш вә давамлиқ Йәһва Худаға ишиниш». Әгәр сизму шуниңға охшаш синақларға дуч кәлсиңиз, Йәһваниң сизгә ғәмхорлуқ қиливатқанлиғиға вә бәрдашлиқ беришиңиз үчүн ярдәм беридиғанлиғиға ишәнсиңиз болиду.

13. Тәңри Йәһва биздин хурсән болғанлиғини көрситиш үчүн кимләрни ишлитиши мүмкин вә немә үчүн?

¹³ Етиқатчи қериндашлиримиз арқилиқ. Йәһва қериндашлиримизни ишлитип, биздин хурсән болғанлиғини көрситиду. Мәсилән, У башқиларни мувапиқ вақит-сааттә кишини илһамландуридиған сөзләрни қилишқа илһамландуралайду. Азиядики бир қериндишимиз қаттиқ бесимға дуч кәлгәндә, буни баштин кәчүргән. У иш орнидин айрилип қалған вә еғир кесәл болған. Униң үстигә йолдиши еғир гуна өткүзүп, ақсақаллиқ вәзиписидин қалдурулған. У: «Мән немә үчүн бундақ ишларниң йүз беридиғанлиғини чүшәнмидим. Мән бәлким бирәр ишни хата қилип, Йәһваниң көңлини рәнҗитип қойғач, У әнди мәндин хурсән болмайватамдекин»,— дәп ойлиғанди. Бу қериндишимиз Йәһва өзидин хурсән болғанлиғиға көз йәткүзүш үчүн дуа қилип өтүнгән. У дуасиға җавап алдиму? У мундақ дәйду: «Җамаәт ақсақаллири мениң билән параңлашти вә Йәһваниң мени сөйидиғанлиғини көрүп йетишимгә ярдәм бәрди». Бирақ мәлум бир вақит өткәндин кейин, у йәнә Йәһвадин ярдәм сориған. У мундақ дәйду: «Дәл шу күни мән җамаәттики қериндашларниң хетини тапшурувалдим. Уларниң тәсәлли сөзлирини оқуғинимда, Йәһваниң дуайимни аңлиғанлиғини һис қилдим». Шундақ, һәрдайим башқиларниң йеқимлиқ сөзлири арқилиқ Йәһва биздин хурсән екәнлигини көрситиду (Зәб. 10:17).

14. Йәһва биздин хурсән болғанлиғини йәнә қайси усулда көрситиду?

¹⁴ Йәһва йәнә зөрүр болғанда, етиқатчи қериндашлиримиз арқилиқ бизгә нәсиһәт берип, биздин хурсән екәнлигини көрситиду. Мәсилән, биринчи әсирдә Йәһва әлчи Паулни ишлитип, етиқатчи қериндашларға 14 парчә хәт яздурған. Паулниң у хәтлиридә наһайити удул, амма сөйгү-муһәббәткә толған нәсиһәт сөзлири бар. Йәһва немә үчүн Паулни бундақ нәсиһәтләрни йезишқа илһамландурған? Чүнки Йәһва бир көйүмчан Ата болуп, У Өзи сөйгән пәрзәнтлиригә тәлим-тәрбийә бериду (Пәнд н. 3:11, 12). Шуңа бирлири бизгә Муқәддәс китапқа асасланған нәсиһәтләрни бәрсә, бу Йәһваниң биздин рәнҗип қалғанлиғини билдүрмәйду. Әксинчә, бу Йәһваниң йәнила бизни сөйидиғанлиғини көрситиду (Ибр. 12:6). Йәһваниң биздин хурсән болғанлиғини башқа қайси йоллар билән көрситиду?

ЙӘҺВА БИЗДИН ХУРСӘН БОЛҒАНЛИҒИНИ КӨРСИТИДИҒАН БАШҚА ДӘЛЛИЛӘР

15. Йәһва Худа кимләргә Өз муқәддәс роһини бериду вә Униң биздин хурсән болғанлиғини көрситидиған йәнә қандақ дәлилләр бар?

¹⁵ Йәһва Өзиниң муқәддәс роһини бизгә әвәтиш арқилиқ Өзиниң биздин хурсән болғанлиғини көрситиду (Мәт. 12:18). Биз өз-өзүмиздин мундақ дәп сорап көрсәк болиду: «Мән турмушумда муқәддәс роһниң мевисини көрситиватимәнму?» Сиз Йәһвани тонуғандин кейин илгирикигә қариғанда, техиму сәвирчан болдиңизму? Әмәлийәттә, сиз муқәддәс роһниң мевисини қанчә нәмаян қилишни үгәнгәнсири, Йәһваниң сиздин хурсән болғанлиғини көрситидиған нурғун дәлилләрни көрәләйсиз («Муқәддәс роһниң мевиси» дегән рамкиға қараң.)

16. Хуш хәвәрниң вәз қилиниши үчүн Йәһва Худа кимләрни ишлитиду вә бу сизни немигә ишәндүриду? (Салоникилиқларға 1-хәт 2:4)

¹⁶ Йәһва Өзи хурсән болидиған кишиләргә хуш хәвәрни вәз қилиш вәзиписини тапшуриду (Салоникилиқларға 1-хәт 2:4ни оқуң). Джослин исимлиқ қериндаш башқиларға хуш хәвәрни ейтишниң пайдисини көргән. Бир күни әтигәндә у кәйпияти начар ойғанған. У мундақ дәйду: «Өзүмни күчсиз, керәксиздәк һис қилдим. Бирақ мән пионер болуп хизмәт қиливататтим. Шу күни мән вәз хизмәткә чиқидиған күн еди. Шуңа мән дуа қилип хизмәткә чиқип кәттим». Джослин шу күни чүштин бурун Мари исимлиқ бир киши билән көрүшүп, Муқәддәс китап тәтқиқ үгиниши башлашқа қошулған. Бир қанчә айдин кейин Мари Джослин ишигини қеқишидин бурун, у Худадин ярдәм сорап дуа қилғанлиғини ейтқан. Джослин шу кәчүрмиши һәққидә мундақ дәйду: «Йәһва худди маңа “Мән сәндин хурсәнмән” дәп ейтиватқанлиғини һис қилдим». Әлвәттә, биз вәз қиливатқан хуш хәвәргә һәммила адәм иҗабий җавап қайтурмайду. Лекин биз шуниңға ишинимизки, пүтүн күчимиз билән өзүмизни хуш хәвәрни җакалашқа беғишлисақ, Йәһва биздин хурсән болиду.

17. Викки исимлиқ қериндашниң төләм һәққидики ейтқанлиридин немиләрни үгәндиңиз? (Зәбур 5:12)

¹⁷ Йәһва хурсән болған кишиләрниң гуналирини төләм қурбанлиғи арқилиқ кәчүриду (Тим. 1-х. 2:5, 6). Бирақ, биз төләмгә ишинип суға чөмдүрүлгән болсақму, йәнила Йәһва биздин хурсән әмәс дәп ойлисақчу? Есиңиздә болсунки, биз һәрдайим өз һис-туйғулиримизға ишәнч қилалмаймиз, амма Йәһваға ишәнч қилалаймиз. У төләмгә ишәнгәнләрни һәққаний адәм дәп һесаплайду вә уларға бәрикәт беридиғанлиғини вәдә қилиду (Зәбур 5:12ни оқуң; Рим. 3:26). Төләм һәққидә чоңқур ойлиниш Викки исимлиқ қериндашқа ярдәм бәргән. Бир күни төләм тоғрисида чоңқур ойланғандин кейин, у мундақ һис қилған: «Йәһва маңа узундин буян сәвир-тақәт көрситип кәлди вә Өзиниң сөйгү-муһәббитини нурғун тәрәпләрдә маңа көрсәтти. Шундақтиму мән Йәһваға: “Сән мәндәк кишини сөйәлмәйсән, Сениң Оғлуңниң төләм қурбанлиғи мениң гуналиримни жуялмайду”,— дәп кәлгән екәнмән». У төләм соғиси һәққидә ойлиниш арқилиқ Йәһваниң сөйгү-муһәббитини һис қилишқа башлиған. Бизму шундақ қилғинимизда, Худаниң бизни сөйидиғанлиғини һис қилимиз вә биздин хурсән екәнлигигә ишинимиз.

18. Әгәр давамлиқ асмандики көйүмчан Атимизни сөйсәк, немигә ишәнч қилалаймиз?

¹⁸ Гәрчә биз жуқурида көрүп чиққан пикирләрни әмәлий һаятимизда қоллинишқа тиришиватқан болсақму, бәзидә пат-пат үмүтсизлинип, Йәһваниң биздин хурсән яки хурсән әмәсму, дәп гуман қилишимиз мүмкин. Әгәр шундақ гуман пәйда болса, «Йәһва Өзини сөйгәнләр[дин]» хурсән болидиғанлиғини әстин чиқармаң (Яқуп 1:12). Шуңа давамлиқ Йәһваға йеқинлишиң вә Униң сиздин хурсән болғанлиғиниң дәлил-испатлирини көрүп йетишкә тиришиң. Есиңиздә болсунки, Йәһва һәрбиримиздин жирақ әмәс (Әлч. 17:27).