योहानने सांगितलेला संदेश
३ परूश्‍यांपैकी निकदेम+ नावाचा एक माणूस होता. तो यहुदी लोकांचा एक अधिकारी होता. २ हा माणूस रात्रीच्या वेळी येशूजवळ आला+ आणि त्याला म्हणाला: “रब्बी,*+ तुम्ही देवापासून आलेले शिक्षक आहात हे आम्हाला माहीत आहे. कारण, देव एखाद्या माणसासोबत असल्याशिवाय,+ तुम्ही करत आहात तशी अद्‌भुत कार्यं तो करूच शकत नाही.”+ ३ तेव्हा येशू त्याला म्हणाला: “मी तुला खरं सांगतो, जोपर्यंत एखाद्याचा नव्याने जन्म* होत नाही+ तोपर्यंत तो देवाचं राज्य पाहू शकत नाही.”+ ४ निकदेम त्याला म्हणाला: “माणूस मोठा झाल्यानंतर त्याचा नव्याने जन्म होणं कसं शक्य आहे? तो दुसऱ्‍यांदा आपल्या आईच्या पोटात जाऊन जन्म घेऊ शकतो का?” ५ येशूने उत्तर दिलं: “मी तुला खरं सांगतो, पाण्याने+ आणि पवित्र शक्‍तीने* जन्म होईपर्यंत+ कोणीही देवाच्या राज्यात जाऊ शकत नाही. ६ जो शरीरापासून जन्मलाय, तो शारीरिक आहे आणि जो पवित्र शक्‍तीने जन्मलाय तो स्वर्गाचा आहे. ७ तुमचा नव्याने जन्म झाला पाहिजे, असं मी तुला सांगितलं म्हणून आश्‍चर्य करू नकोस. ८ वारा पाहिजे तिथे वाहतो आणि तू त्याचा आवाज ऐकतोस. पण तो कुठून येतो आणि कुठे जातो हे तुला माहीत नसतं. ज्याचा पवित्र शक्‍तीने जन्म झालाय त्याच्या बाबतीतही असंच आहे.”+
९ निकदेम त्याला म्हणाला: “असं कसं होऊ शकतं?” १० येशू म्हणाला: “तू इस्राएली लोकांचा गुरू असूनही तुला या गोष्टी माहीत नाहीत का? ११ मी तुला खरं सांगतो, आम्हाला जे माहीत आहे त्याबद्दल आम्ही सांगतो, आणि जे पाहिलंय त्याबद्दल साक्ष देतो. पण आम्ही दिलेली साक्ष तुम्ही स्वीकारत नाही. १२ मी तुला पृथ्वीबद्दलच्या गोष्टी सांगितल्यावर जर तू विश्‍वास ठेवत नाहीस, तर स्वर्गाबद्दलच्या गोष्टी सांगितल्यावर तू काय विश्‍वास ठेवशील? १३ शिवाय, जो स्वर्गातून खाली उतरला,+ त्या मनुष्याच्या मुलाला सोडून दुसरा कोणीही वर स्वर्गात गेला नाही.+ १४ आणि ज्या प्रकारे मोशेने रानात सापाला उंचावर लटकवलं होतं,+ त्याच प्रकारे मनुष्याच्या मुलाला उंचावर लटकवलं जाईल.+ १५ आणि यामुळे, त्याच्यावर विश्‍वास ठेवणाऱ्‍या प्रत्येकाला सर्वकाळाचं जीवन मिळेल.+
१६ देवाने जगावर इतकं प्रेम केलं, की त्याने आपला एकुलता एक मुलगा दिला.+ कारण त्याची अशी इच्छा आहे, की जो कोणी त्याच्या मुलावर विश्‍वास ठेवतो* त्याचा नाश होऊ नये तर त्याला सर्वकाळाचं जीवन मिळावं.+ १७ देवाने जगाचा न्याय करायला आपल्या मुलाला जगात पाठवलं नाही, तर त्याच्याद्वारे जगाचं तारण व्हावं म्हणून पाठवलं.+ १८ जो त्याच्यावर विश्‍वास ठेवतो त्याचा न्याय केला जाणार नाही.+ जो विश्‍वास ठेवत नाही, त्याचा आधीच न्याय करण्यात आलाय. कारण त्याने देवाच्या एकुलत्या एका मुलावर विश्‍वास ठेवला नाही.+ १९ आणि न्याय याच आधारावर केला जातो, की प्रकाश जगात आला,+ पण माणसांनी प्रकाशापेक्षा अंधाराला जास्त पसंत केलं. कारण त्यांची कार्यं दुष्ट होती. २० कारण जो वाईट कामं करतो त्याला प्रकाश नकोसा वाटतो आणि त्याची कार्यं उघड होऊ नयेत म्हणून तो प्रकाशाकडे येत नाही. २१ पण जो योग्य ते करतो तो प्रकाशाकडे येतो.+ कारण त्याने देवाच्या इच्छेनुसार कार्यं केली आहेत हे उघड व्हावं असं त्याला वाटतं.”
२२ यानंतर येशू आणि त्याचे शिष्य यहूदीयाच्या खेड्यापाड्यांत गेले आणि तिथे तो काही काळ त्यांच्यासोबत राहून बाप्तिस्मा देत होता.+ २३ पण त्याच वेळी योहानसुद्धा शालिमजवळ एनोन इथे बाप्तिस्मा देत होता. तिथे भरपूर पाणी होतं+ आणि लोक त्याच्याकडे येत होते आणि तो त्यांना बाप्तिस्मा देत होता.+ २४ कारण योहानला अजून तुरुंगात टाकण्यात आलं नव्हतं.+
२५ मग योहानच्या शिष्यांचा एका यहुदी माणसाबरोबर शुद्धीकरणावरून वाद झाला. २६ त्यामुळे ते योहानकडे आले आणि त्याला म्हणाले: “गुरू, यार्देनच्या पलीकडे जो माणूस तुझ्यासोबत होता आणि ज्याच्याबद्दल तू साक्ष दिली होतीस,+ तो बाप्तिस्मा देतोय आणि सगळे लोक त्याच्याकडे जात आहेत.” २७ योहानने उत्तर दिलं: “कोणत्याही माणसाला, देवाने दिल्याशिवाय एकही गोष्ट मिळू शकत नाही. २८ ‘मी ख्रिस्त नाही,+ तर मला त्याच्यापुढे पाठवण्यात आलंय,’+ असं मी म्हटल्याचं तुम्ही स्वतः साक्षी आहात. २९ ज्याची नवरी असते तोच नवरा मुलगा असतो.+ पण जेव्हा नवऱ्‍या मुलाचा मित्र उभा राहून त्याचं बोलणं ऐकतो, तेव्हा नवऱ्‍या मुलाचा आवाज ऐकून त्याला खूप आनंद होतो. त्याच प्रकारे माझा आनंद परिपूर्ण झालाय. ३० त्याने वाढत जावं आणि मी कमी होत जावं हे गरजेचं आहे.”
३१ जो वरून येतो+ तो इतर सगळ्यांपेक्षा श्रेष्ठ आहे. जो पृथ्वीपासून आहे तो पृथ्वीचा आहे आणि तो पृथ्वीवरच्या गोष्टींबद्दल बोलतो. जो स्वर्गातून येतो तो इतर सगळ्यांपेक्षा श्रेष्ठ आहे.+ ३२ त्याने जे पाहिलं आणि ऐकलं आहे त्याची तो साक्ष देतो.+ पण कोणीही त्याची साक्ष स्वीकारत नाही.+ ३३ ज्याने त्याची साक्ष स्वीकारली आहे त्याने देव खरा आहे या गोष्टीची खातरी दिली आहे.*+ ३४ देवाने ज्याला पाठवलं तो देवाची वचनं बोलतो.+ कारण देव आपली पवित्र शक्‍ती उदारपणे देतो.* ३५ पित्याचं मुलावर प्रेम आहे+ आणि त्याने सगळ्या गोष्टी त्याच्या हातात दिल्या आहेत.+ ३६ जो मुलावर विश्‍वास ठेवतो त्याला सर्वकाळाचं जीवन मिळेल.+ पण जो मुलाच्या आज्ञा मोडतो त्याला जीवन मिळणार नाही,+ तर देवाचा क्रोध त्याच्यावर कायम राहील.+