Kua Mareka a Iehova ia Koe

1. Eaa te manako ekoko te ka tupu ki te au tavini tiratiratu o Iehova?

E MEA pumaana i te kite e te mareka ra a Iehova i tona iti tangata! Karanga te Pipiria e: “Te tau [me kore te mareka] rā Iehova i tona tangata.” (Sala. 149:4) Inara i tetai taime ka manako ekoko tetai pae e ka ui, ‘Kua mareka ainei a Iehova iaku?’ Kua na roto ana tetai aronga akamori ia Iehova i te tuatau Pipiria i teia turanga taitaia.—1 Samu. 1:​6-10; Iobu 29:​2, 4; Sala. 51:11.

2. Koai ma ta Iehova e mareka ra?

² Te akaari maira te Pipiria e ka rauka i te aronga apa ua i te akamareka ia Iehova. Akapeea? Kia akatupu tatou i te akarongo ki roto ia Iesu Mesia e kia papetito. (Ioa. 3:16) Ka akaari tatou ki te katoatoa e kua tataraara e kua taputou tatou ki te Atua kia rave i tona anoano. (Anga. 2:38; 3:19) Ka mareka a Iehova ia tatou me rave tatou i te au takainga kia riro mai ei oa piri vaitata nona. Me tauta tatou i te akono ua rai i ta tatou tia akatapuanga, ka mareka a Iehova ia tatou e ka riro tatou ei oa nona.—Sala. 25:14.

3. Eaa ta tatou ka uriuri i roto i teia atikara?

³ Inara eaa te tumu ka manako tetai pae e kare te Atua e mareka ana ia ratou? Akapeea a Iehova te akaari anga e te mareka ra aia ia tatou? E akapeea tetai Kerititiano e papu ei te mareka ra te Atua iaia?

TE TUMU KA MANAKO TETAI PAE KARE A IEHOVA E MAREKA ANA IA RATOU

4-5. Me tupu te manako puapinga kore, eaa ta tatou i papu?

⁴ Mei to ratou tamariki anga kua manako puapinga kore tetai pae ia ratou uaorai. (Sala. 88:15) Karanga te taeake ko Adrián: “Kua manako puapinga kore au iaku uaorai mei mua mai. I toku tamariki anga kua maara iaku te pure anga au kia tae toku ngutuare ki te Parataito, noatu kua manako au kare au e tae ki reira.” Karanga a Tony, tei utuutuia i roto i tetai ngutuare kare i te Au Kite: “Kare rava toku nga metua i tuatua ana kiaku e kua inangaro e kua ngakau parau raua iaku. Kua manako au e kare aku apinga e rauka i te rave ei akamareka ia raua.”

⁵ Me tupu te manako puapinga kore kia tatou, e akamaara e na Iehova e akavaitata ia tatou kiaia. (Ioa. 6:44) Te kite ra aia i te au tu meitaki i roto ia tatou kare tatou i kite ana. Te kite katoa ra aia i to tatou ngakau. (1 Samu. 16:7; 2 Para. 6:30) No reira e irinaki tatou kia Iehova me karanga aia te akaperepere ra aia ia tatou.—1 Ioa. 3:​19, 20.

6. Eaa te manako o te apotetoro ko Paulo no tana au ara i rave?

⁶ I mua ake ka apii ei tetai pae ia tatou i te tuatua mou, kua rave tatou i te au angaanga tei akatupu i te manako akaapa. (1 Pete. 4:3) E tupu ana rai te tu paruparu ki te aronga tei tavini tiratiratu ia Iehova. Akapeea koe, te akaapa ra ainei toou ngakau ia koe? E mea pumaana i te kite e kua tupu ana teia ki te au tavini tiratiratu o Iehova. Ei akaraanga, kua taitaia tikai te apotetoro ko Paulo no tona tu apa ua. (Roma 7:24) Kua tataraara a Paulo no tana ara i rave e kua papetitoia. Inara kua manako rai aia “e iti oki [aia] i te au aposetolo ravarai” e koia tei rave “maata” atu i te ara.—1 Kori. 15:9; 1 Timo. 1:15.

7. Eaa ta tatou ka akamaara no ta tatou au ara i rave?

⁷ Kua taputou mai to tatou Metua i te rangi i te akakore i ta tatou ara me tataraara tatou. (Sala. 86:5) No reira me tataraara tikai tatou ma te ngakau tae, ka irinaki tatou e mea mou ta Iehova tuatua e kua akakore aia i ta tatou ara.—Kolo. 2:13.

8-9. Akapeea tatou me kopae i te manako e kare e rava ana ta tatou ka rave no te akamareka ia Iehova?

⁸ Ka inangaro tatou pouroa i te rave i ta tatou ka rauka kia tavini ia Iehova. Inara, ka manako tetai pae e kare e rava ana ta ratou ka rave no te akamareka ia Iehova. Karanga tetai tuaine ko Amanda: “E manako ana au i te oronga i taku mea meitaki kia Iehova, ka anoanoia au kia rave maata atu i te angaanga. No reira ka tauta au kia rave i te au angaanga kare e rauka iaku. Me tupu te reira, ka manako au e kare a Iehova e mareka ana iaku.”

⁹ Akapeea tatou me kopae i te manako e kare e rava ana ta tatou ka rave no te akamareka ia Iehova? E akamaara kare a Iehova i te Atua māro. Kare aia e pati ia tatou kia rave i tetai angaanga kare e rauka ia tatou i te rave. Te mareka ra aia i tetai ua atu mea ta tatou ka rave nona tera ua ka oronga tatou i te mea meitaki. Pera katoa e akamanako i te au akaraanga Pipiria no te aronga tei tavini ia Iehova ma te ngakau katoa. Akamanako ana i te akaraanga o Paulo. Kua angaanga pakari aia no tetai tuatau roa i te teretere aere ki te au ngai mamao no te akamata atu i te au putuputuanga. Inara te taui anga tona turanga e kare e rauka i te tutu aere mei to mua ana, kua mareka kore ainei te Atua iaia? Kare. Kua rave a Paulo i tana i rauka e kua akameitaki a Iehova iaia. (Anga. 28:​30, 31) Mei te reira katoa ka tauiui ua ta tatou ka rauka i te oronga kia Iehova. Inara ko te mea puapinga kiaia ko te tumu i tavini ei tatou iaia. I teianei ka uriuri tatou i te au ravenga e akaari mai ana a Iehova i tona mareka anga ia tatou.

AKAPEEA A IEHOVA TE AKAARI ANGA E TE MAREKA RA AIA IA TATOU?

10. Akapeea tatou e kite ei te mareka ra a Iehova ia tatou? (Ioane 16:27)

¹⁰ Na roto i te Pipiria. E mareka ana a Iehova i te akakite i tona akaperepere maata i tana aronga e inangaro ra. Akakite mai te Pipiria e rua atianga i tuatua ai Aia kia Iesu, ko taku Tamaiti akaperepere teia, kua mareka rava au iaia. (Mata. 3:17; 17:5) Ka inangaro ainei koe i te akarongo i te reo o Iehova te karanga anga kua mareka rava aia ia koe? Kare a Iehova e tuatua kia tatou mei te rangi mai, mari ra na roto i tana Tuatua. Ka rongo tatou i to Iehova reo me tatau tatou i ta Iesu tuatua i roto i te au Evangeria. (E tatau ia Ioane 16:27.) Kua akaata meitaki a Iesu i te tu o tona Metua. No reira me tatau tatou e kua mareka a Iesu i tana au pipi apa ua e te tiratiratu, ka akamanako tatou ia Iehova e tuatua ra i te reira kia tatou.—Ioa. 15:​9, 15.

11. Me tupu te turanga ngatā kia tatou ko te aiteanga ainei e kua mareka kore te Atua ia tatou? (Iakobo 1:12)

¹¹ Na roto i tana e rave ra. Inangaro a Iehova i te tauturu ia tatou, ko tetai ravenga na te oronga anga mai i ta tatou e anoano ra i te pae kopapa. Tetai taime ka akatika a Iehova ia tatou kia na roto i te turanga ngatā mei tei tupu kia Iobu. (Iobu 1:​8-11) Me tupu te au manamanata kare te aiteanga e kua mareka kore te Atua ia tatou. Mari ra, e au atianga te reira no te akaari i te maata o to tatou inangaro e te irinaki ia Iehova. (E tatau ia Iakobo 1:12.) Me na roto tatou i te au tumatetenga, ka kite tatou i tona aroa e ka tauturu aia ia tatou kia akakoromaki.

12. Eaa taau ka apii mei te akaraanga o Dmitrii?

¹² Akamanako i tei tupu ki te taeake ko Dmitrii i Asia. Kua akanooia aia mei tana angaanga e kare e rauka tetai akaou ngai angaanga no tetai au marama. No reira kua iki aia i te akaari i tona irinaki ia Iehova na te rave maata atu i te angaanga tutu aere. Kua pou tetai au marama e kare rai ana angaanga. E oti kua tupu tetai maki kino kiaia e kare e rauka i te aaere. Kua ekoko aia i tona puapinga ei tane e ei metua, e kua manako e kare a Iehova e mareka ana iaia. Tetai aiai kua oake tana tamaine i tetai pepa ma te irava ia Isaia 30:15: “Tei te akatupua ua e te irinaki e maroiroi ei kotou.” Kua tu aia i te pae i te roi e kua karanga, “Tati me taitaia koe e akamaara i teia irava.” Kua kite mai a Dmitrii e kua oronga mai a Iehova i te kai, te kakau e te ngai nooanga no tona ngutuare. Karanga aia: “Kua anoanoia au kia maru ua e kia irinaki ua i toku Atua.” Me tupu te reira kia koe, e irinaki e ka akono e ka tauturu a Iehova ia koe kia akakoromaki.

13. Koai ma ta Iehova ka taangaanga ei akaari i tona tu mareka ia tatou, e akapeea?

¹³ Na roto i te au taeake irinaki. Ka akaari a Iehova e te mareka ra aia ia tatou na roto i te au taeake e te au tuaine. Ei akaraanga, penei ka akakeu aia i tetai taeake kia akamaroiroi ia tatou i te taime tau tikai. Kua tupu teia ki tetai tuaine i Asia te tupuanga te tumatetenga kiaia. Kua akanooia aia mei tana angaanga e kua tu i tetai maki kino. Kua rave tana tane i tetai ara kino e kare e tavini akaou ana ei tangata pakari. Karanga aia: “Kare au i mārama ana i te tumu i tupu ei teia au mea kiaku, kua manako au e kua rave au i tetai tarevake e kare a Iehova e mareka ana iaku.” Kua pure akatenga te tuaine kia Iehova kia akapapu mai a Iehova i tona aroa nona. Akapeea a Iehova te pau anga i tana pure? Karanga aia, “Kua aravei mai te aronga pakari iaku e kua tauturu iaku kia kite te aroa maira a Iehova iaku.” Muri mai kua pati akaou aia i ta Iehova tauturu. Karanga aia: “I taua rā ra kua tae mai tetai reta no ko mai i te au taeake e te au tuaine i roto i taku putuputuanga. Te tatau anga au i taku reta, kua akapumaanaia au i te kite e te akarongo ra a Iehova iaku.” Ae, e akaari ua ana a Iehova i tona tu mareka na roto i te tuatua takinga meitaki a tetai ke.—Sala. 10:17.

14. Eaa atu tetai ravenga e akaari mai ana a Iehova e te mareka ra aia ia tatou?

¹⁴ Ka akaari katoa a Iehova e te mareka ra aia ia tatou me akoia mai tatou. Ei akaraanga, i te anere mataiti mua kua taangaanga a Iehova i te apotetoro ko Paulo kia tata e 14 reta ki tona au taeake. I roto i teia au reta, kua ako a Paulo i tona au taeake e te au tuaine na roto i te aroa. Eaa te tumu i akauru ei a Iehova ia Paulo kia tata i teia akoanga? E Metua meitaki a Iehova tei ako i tana tamariki “tana i akaperepere.” (Mase. 3:​11, 12) No reira me ako mai tetai ia tatou mei roto i te Pipiria, kare te aiteanga e te mareka kore ra a Iehova ia tatou mari ra te aroa ra aia ia tatou. (Ebe. 12:6) Eaa atu tetai ravenga e akaari mai ana a Iehova e te mareka ra aia ia tatou?

AU AKAPAPUANGA E TE MAREKA RA A IEHOVA IA TATOU

15. Ka oronga a Iehova i tona vaerua tapu kiaai ma, e eaa ta teia e akapapu maira?

¹⁵ Ka oronga mai a Iehova i tona vaerua tapu ki te aronga tana e mareka ra. (Mata. 12:18) E ui kia tatou uaorai, ‘Kua akaari ainei au i tetai tu o te vaerua tapu i roto i toku oraanga?’ Kua kite ainei koe e maata atu toou tu akakoromaki mei to mua ana? Ko te maata atu ia koe i te akaari i te ua o te vaerua, mea papu e te mareka ra a Iehova ia koe!—Akara i te pia “Ko te Ua o te Vaerua e . . .”

16. Koai ma ta Iehova ka taangaanga kia tutu aere i te nuti meitaki, e eaa toou manako i te reira? (1 Tesalonia 2:4)

¹⁶ Ka oronga mai a Iehova i te apainga kia tutu aere i te nuti meitaki ki te aronga tana e mareka ra. (E tatau ia 1 Tesalonia 2:4.) Kua puapingaia tetai tuaine ko Jocelyn i te tutu aere anga aia i te nuti meitaki ki tetai ke. I tetai rā, kua ara mai a Jocelyn ma te ngakau taitaia. Karanga aia: “Kare oku maroiroi e kua manako puapinga kore au. Inara e painia au, e ko toku rā tutu aere te reira. No reira kua pure au e kua rave au i te reira.” I tera popongi kua aravei a Jocelyn i tetai vaine maru ko Mary tei āriki i tetai apii Pipiria. I tetai au marama i muri mai kua akakite a Mary e i pure ana aia ki te Atua no te tauturu i te rā i aravei ei aia ia Jocelyn. Eaa ta Jocelyn i apii mei teia tupuanga? Karanga aia: “Mei te mea rai te tuatua ra a Iehova kiaku, ‘Kua mareka rava au ia koe.’” E tika kare te katoatoa e akarongo mai i te karere o te nuti meitaki. Inara ka papu tatou e te mareka ra a Iehova me tauta tatou i te tutu aere i te nuti meitaki ki tetai ke.

17. Eaa taau ka apii mei ia Vicky no runga i te atinga oko? (Salamo 5:12)

¹⁷ Kua oronga mai a Iehova i te oko kia puapingaia te aronga tana e mareka ra. (1 Timo. 2:​5, 6) Akapeea ra me kare to tatou ngakau e āriki i te manako e te mareka ra a Iehova ia tatou, noatu kua papetitoia tatou? E akamaara, kare e rauka i te irinaki ia tatou uaorai mari ra ka irinaki tatou ia Iehova. Ka āriki aia i te aronga tei akatupu i te akarongo i roto i te atinga oko e te taputou ra i te akameitaki ia ratou. (E tatau ia Salamo 5:12; Roma 3:26) Kua tauturuia tetai tuaine ko Vicky, na te akamanako oonu anga i te oko. I tetai rā iaia e rave ra i te reira kua kite mai aia: “E akakoromakianga roa tikai to Iehova iaku. E oti akera, te karanga nei au kiaia e: ‘Kare e rava ana toou aroa te itae mai iaku. Kare e rava ana te atinga a taau Tamaiti ei oko iaku.’” Na te akamanako oonu anga i teia apinga aroa o te oko, kua akamata aia i te kite i to Iehova aroa nona. Ka kite katoa tatou i to Iehova aroa e tona mareka me akamanako tatou i te puapinga o te atinga oko.

18. Eaa ta tatou ka irinaki me akavaitata ua atu tatou ki to tatou Metua i te rangi?

¹⁸ Noatu ka tauta tatou i te aru i te au apiianga i roto i teia atikara, i tetai taime ka taitaia e ka manako ekoko tatou e kare a Iehova e mareka ana ia tatou. Me manako akapera koe, e akamaara te mareka ra aia i “te aronga i anoano iaia ra.” (Iako. 1:12) No reira e akavaitata ua atu kia Iehova e kia kimi i te au akapapuanga e te mareka ra Aia ia koe. E akamaara ua rai tatou e “kare ra aia i atea ke atu ia tatou katoa nei.”—Anga. 17:27.