NUMERI

1 UYehova wathetha noMoses kwintlango yaseSinayi,+ ententeni yokuhlangana,+ ngosuku lokuqala lwenyanga yesibini, ngonyaka wesibini bephumile kwilizwe laseYiputa.+ Wathi: 2 “Balani+ bonke abantu bebandla lakwaSirayeli* ngokweentsapho zabo, ngokwezindlu zootata babo, ngokwenani lamagama awo onke amadoda. 3 Wena noAron nimele nibabhalise ngamaqela abo* bonke abaneminyaka eyi-20 ukuya phezulu,+ abanokungena emkhosini wakwaSirayeli.

4 “Nize nithathe indoda ibe nye kwisizwe ngasinye, nganye imele ibe yintloko endlini katata wayo.+ 5 Nanga amagama amadoda aza kuma nani: KwaRubhen, nguElitsure+ unyana kaShedeyure; 6 kwaSimeyon, nguShelumiyeli+ unyana kaTsurishadayi, 7 kwaYuda, nguNashon+ unyana ka-Aminadabhi, 8 kwaIsakare, nguNetaneli+ unyana kaTsuware, 9 kwaZebhulon, nguEliyabhi+ unyana kaHelon, 10 koonyana bakaYosefu: kwaEfrayim,+ nguElishama unyana ka-Amihudi, kwaManase, nguGamaliyeli unyana kaPedatsure, 11 ­kwaBhenjamin, nguAbhidan+ unyana kaGidiyoni, 12 kwaDan, nguAhiyezere+ unyana ka-Amishadayi, 13 kwa-Ashere, nguPagiyeli+ unyana kaOkeran, 14 kwaGadi, nguEliyasafu+ unyana kaDehuweli, 15 kwaNafetali, nguAhira+ unyana kaEnan. 16 Aba ngabo babizwayo ebandleni. Baziinkosi+ zezizwe zootata babo, iintloko zamawaka akwaSirayeli.”+

17 UMoses noAron bawathatha la madoda ayebizwe ngamagama. 18 Baliqokelela lonke ibandla ngosuku lokuqala lwenyanga yesibini, ukuze bonke abantu babhaliswe ngamagama, ngeentsapho, nangezindlu zootata babo, ukususela kwabaneminyaka eyi-20 ukuya phezulu,+ 19 kanye njengokuba uYehova wayemyalele uMoses. Ngoko wababhalisa besentlango yaseSinayi.+

20 Oonyana bakaRubhen, inzala yezibulo likaSirayeli,+ babhaliswa ngamagama, ngeentsapho nangezindlu zootata babo. Abalwa onke amadoda aneminyaka eyi-20 ukuya phezulu awayenokungena emkhosini, 21 yaye lawo abhaliswayo kwisizwe sakwaRubhen ayeyi-46 500.

22 Inzala kaSimeyon+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 23 yaye lawo abhaliswayo kwisizwe sakwaSimeyon ayeyi-59 300.

24 Inzala kaGadi+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 25 yaye lawo abhaliswayo kwisizwe sakwaGadi ayeyi-45 650.

26 Inzala kaYuda+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 27 yaye lawo abhaliswayo kwisizwe sakwaYuda ayeyi-74 600.

28 Inzala kaIsakare+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 29 yaye lawo abhaliswayo kwisizwe sakwaIsakare ayeyi-54 400.

30 Inzala kaZebhulon+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 31 yaye lawo abhaliswayo kwisizwe sakwaZebhulon ayeyi-57 400.

32 Inzala kaYosefu ephuma kuEfrayim,+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 33 yaye lawo abhaliswayo kwisizwe sakwaEfrayim ayeyi-40 500.

34 Inzala kaManase+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 35 yaye lawo abhaliswayo kwisizwe sakwaManase ayeyi-32 200.

36 Inzala kaBhenjamin+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 37 yaye lawo abhaliswayo kwisizwe sakwaBhenjamin ayeyi-35 400.

38 Inzala kaDan+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 39 yaye lawo abhaliswayo kwisizwe sakwaDan ayeyi-62 700.

40 Inzala ka-Ashere+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 41 yaye lawo abhaliswayo kwisizwe sakwa-Ashere ayeyi-41 500.

42 Inzala kaNafetali+ yabhaliswa ngamagama, ngeentsapho nangezindlu zootata bayo. Abalwa onke amadoda aneminyaka eyi-20 ukuya phezulu awayenokungena emkhosini, 43 yaye lawo abhaliswayo kwisizwe sakwaNafetali ayeyi-53 400.

44 Aba babhaliswa nguMoses noAron neenkosi eziyi-12 zakwaSirayeli, nganye imela indlu katata wayo. 45 Onke amaSirayeli aneminyaka eyi-20 ukuya phezulu nawayenokungena emkhosini wakwaSirayeli, abhaliswa ngezindlu zootata bawo, 46 yaye xa ewonke amaSirayeli awabhaliswayo ayeyi-603 550.+

47 Kodwa bona abaLevi+ abazange babhaliswe ngokwesizwe sootata babo njengezinye izizwe.+ 48 Ngoko uYehova wathi kuMoses: 49 “Uze ungasibhalisi sona isizwe sakwaLevi, ungalifaki nenani laso phakathi kwenani lamanye amaSirayeli.+ 50 Umele unike abaLevi umsebenzi wokujongana nentente engcwele yoBungqina,+ zonke izinto ezisetyenziswa kuyo nazo zonke izinto zayo.+ Baza kuthwala intente engcwele nezinto ezisetyenziswa kuyo,+ basebenze kuyo,+ yaye bamele bahlale ngakuyo macala onke.+ 51 Xa kufuneka ifuduswe intente engcwele, ngabaLevi abamele bayichithe,+ naxa kufuneka iphinde imiswe, imele ibe ngabaLevi abenza loo nto. Nabani na osondelayo kuyo engenalungelo lakusondela* umele abulawe.+

52 “UmSirayeli ngamnye umele amise intente yakhe kwinkampu afakwe kuyo, mntu ngamnye ngokweqela* lakowabo elibunjwa zizizwe ezithathu.+ 53 Bona abaLevi bafanele bamise inkampu yabo macala onke entente engcwele yoBungqina, ukuze kungabikho msindo uza kukhutshelwa kwibandla lamaSirayeli.+ Imele ibe ngabaLevi abahoye* intente engcwele yoBungqina.”+

54 Abantu bakwaSirayeli bayenza yonke into uYehova awayeyiyalele uMoses. Benza kanye loo nto.

2 UYehova wathetha noMoses noAron, wathi: 2 “AmaSirayeli afanele ahlale kwiinkampu zawo, ngokwamaqela abunjwa zizizwe ezithathu,+ indoda nganye ngakwiflegi yendlu katata wayo. Amele ahlale ezinkampini zawo, zijikeleze intente yokuhlangana yaye zijonge ngakuyo.

3 “Abo bahlala kwicala elingasempuma, baza kuba liqela* elibunjwa zizizwe ezithathu elikhokelwa sisizwe sakwaYuda, yaye inkosi yoonyana bakaYuda nguNashon+ unyana ka-Aminadabhi. 4 Ababhaliswayo kumkhosi wakhe bayi-74 600.+ 5 Ecaleni kwakhe iza kuba sisizwe sakwaIsakare, yaye inkosi yoonyana bakaIsakare nguNetaneli+ unyana kaTsuware. 6 Ababhaliswayo kumkhosi wakhe bayi-54 400.+ 7 Esilandelayo sisizwe sakwaZebhulon, yaye inkosi yoonyana bakaZebhulon nguEliyabhi+ unyana kaHelon. 8 Ababhaliswayo kumkhosi wakhe bayi-57 400.+

9 “Bonke ababhaliswayo kule nkampu ikhokelwa nguYuda bayi-186 400. Aba bafanele bahambe kuqala.+

10 “Iqela* elibunjwa zizizwe ezithathu elikhokelwa sisizwe sakwaRubhen,+ liza kuhlala ngasemzantsi, yaye inkosi yoonyana bakaRubhen nguElitsure+ unyana kaShedeyure. 11 Ababhaliswayo kumkhosi wakhe bayi-46 500.+ 12 Ecaleni kwakhe iza kuba sisizwe sakwaSimeyon, yaye inkosi yoonyana bakaSimeyon nguShelumiyeli+ unyana kaTsurishadayi. 13 Ababhaliswayo kumkhosi wakhe bayi-59 300.+ 14 Esilandelayo sisizwe sakwaGadi, yaye inkosi yoonyana bakaGadi nguEliyasafu+ unyana kaRehuweli. 15 Ababhaliswayo kumkhosi wakhe bayi-45 650.+

16 “Bonke ababhaliswayo kule nkampu ikhokelwa nguRubhen bayi-151 450, yaye mababe ngabesibini ukuhamba.+

17 “Xa ihamba intente yokuhlangana,+ isizwe sabaLevi simele sibe sesiphakathini sezinye izizwe.

“Izizwe zimele zihambe ngokwendlela ezihlala ngayo,+ sizwe ngasinye sikwindawo yaso, ngokweqela elibunjwa zizizwe ezithathu.

18 “Iqela* elibunjwa zizizwe ezithathu elikhokelwa sisizwe sakwaEfrayim, liza kuba ngasentshona, yaye inkosi yoonyana bakaEfrayim nguElishama+ unyana ka-Amihudi. 19 Ababhaliswayo kumkhosi wakhe bayi-40 500.+ 20 Ecaleni kwakhe iza kuba sisizwe sakwaManase,+ yaye inkosi yoonyana bakaManase nguGamaliyeli+ unyana kaPedatsure. 21 Ababhaliswayo kumkhosi wakhe bayi-32 200.+ 22 Esilandelayo sisizwe sakwaBhenjamin, yaye inkosi yoonyana bakaBhenjamin nguAbhidan+ unyana kaGidiyoni. 23 Ababhaliswayo kumkhosi wakhe bayi-35 400.+

24 “Bonke ababhaliswayo kule nkampu ikhokelwa nguEfrayim bayi-108 100, yaye mababe ngabesithathu ukuhamba.+

25 “Iqela* elibunjwa zizizwe ezithathu elikhokelwa sisizwe sakwaDan, liza kuba ngasemntla, inkosi yoonyana bakaDan nguAhiyezere+ unyana ka-Amishadayi. 26 Ababhaliswayo kumkhosi wakhe bayi-62 700.+ 27 Ecaleni kwakhe iza kuba sisizwe sakwa-Ashere, yaye inkosi yoonyana baka-Ashere nguPagiyeli+ unyana kaOkeran. 28 Ababhaliswayo kumkhosi wakhe bayi-41 500.+ 29 Esilandelayo sisizwe sakwaNafetali, yaye inkosi yoonyana bakaNafetali nguAhira+ unyana kaEnan. 30 Ababhaliswayo kumkhosi wakhe bayi-53 400.+

31 “Bonke ababhaliswayo kule nkampu ikhokelwa nguDan bayi-157 600. Mababe ngabokugqibela ukuhamba,+ ngokweqela labo elibunjwa zizizwe ezithathu.”

32 Nango ke amaqela amaSirayeli awabhaliswayo ngokwezindlu zootata bawo. Bebonke ababhaliswayo ababenokungena emkhosini babeyi-603 550.+ 33 Kodwa bona abaLevi zange babhaliswe+ kunye namanye amaSirayeli,+ kanye njengokuba uYehova wayemyalele uMoses. 34 AmaSirayeli enza yonke into ngendlela uYehova awayemyalele ngayo uMoses. Ayehlala engamaqela abunjwa zizizwe ezithathu.+ Naxa ehamba, ayehamba ngolo hlobo,+ ngokweentsapho nangokwezindlu zootata bawo.

3 Le yayiyiminombo yeentsapho* zika-Aron noMoses ngala mini uYehova wayethetha noMoses eNtabeni YaseSinayi.+ 2 La ngamagama oonyana baka-Aron: Izibulo yayinguNadabhi, kulandele uAbhihu,+ uEleyazare+ noItamare.+ 3 Ngamagama oonyana baka-Aron lawo, ababingeleli abathanjiswayo baza ­bamiselwa* ­ukuba babe ­ngababingeleli.+ 4 Kodwa ke uNadabhi noAbhihu bafa phambi koYehova xa banikela umlilo ongekho mthethweni phambi koYehova,+ entlango yaseSinayi, yaye babengenabo oonyana. Kodwa uEleyazare+ noItamare+ baqhubeka bengababingeleli kunye noAron utata wabo.

5 Wathi ke uYehova kuMoses: 6 “Sondeza isizwe sakwaLevi,+ usimise phambi koAron umbingeleli, ukuze simncedise.+ 7 Kufuneka senze wonke umsebenzi ekufuneka siwenzele uAron nalo lonke ibandla phambi kwentente yokuhlangana, umsebenzi waso wasententeni engcwele. 8 Simele sijongane nazo zonke izinto+ ezisetyenziswa ententeni engcwele, senze wonke umsebenzi ekufuneka siwenzele amaSirayeli, wonke umsebenzi wasententeni engcwele.+ 9 AbaLevi umele ubanikele kuAron noonyana bakhe. Bathathwe kumaSirayeli banikwa yena.+ 10 Ufanele ukhethe uAron noonyana bakhe benze umsebenzi wababingeleli.+ Nabani na osondelayo engenalungelo lakusondela* umele abulawe.”+

11 UYehova waqhubeka ethetha noMoses esithi: 12 “Mna ke, endaweni yawo onke amazibulo* amaSirayeli ndithatha abaLevi,+ yaye baza kuba ngabam. 13 Kuba onke amazibulo ngawam.+ Ngemini endawaxabela ngayo onke amazibulo elizweni laseYiputa+ ndazingcwalisela onke amazibulo akwaSirayeli, elomntu nelesilwanyana.+ Amele abe ngawam. NdinguYehova.”

14 UYehova waqhubeka ethetha noMoses entlango yaseSinayi+ esithi: 15 “Bhalisa bonke oonyana bakaLevi ngezindlu zootata babo nangeentsapho zabo. Umele ubhalise wonke umntu oyindoda, ukususela konenyanga ezelwe ukuya phezulu.”+ 16 Wababhalisa ke uMoses ngokomyalelo kaYehova, kanye njengokuba wayeyalelwe. 17 La ngamagama oonyana bakaLevi: uGershon, uKohati noMerari.+

18 La ngamagama oonyana bakaGershon ngokweentsapho zabo: uLibhini noShimeyi.+

19 Oonyana bakaKohati ngokweentsapho zabo nguAmram, uItsare, uHebron noUziyeli.+

20 Oonyana bakaMerari ngokweentsapho zabo nguMahali+ noMushi.+

Ezo ziintsapho zabaLevi ngokwezindlu zootata babo.

21 KuGershon kwavela intsapho yamaLibhini+ ­nentsapho yamaShimeyi. Ezo ziintsapho zamaGershon. 22 Amadoda ezo ntsapho awabhaliswayo, ukususela kwenenyanga izelwe ukuya phezulu ayeyi-7 500.+ 23 Iintsapho zamaGershon zazimise inkampu emva kwentente engcwele,+ ngasentshona. 24 Intloko yendlu yootata bamaGershon yayinguEliyasafu unyana kaLayeli. 25 Umsebenzi woonyana bakaGershon+ ententeni yokuhlangana yayikukuhoya intente engcwele,+ isigqubuthelo sayo,+ umkhusane*+ womnyango wentente yokuhlangana, 26 iikhethini+ zeyadi, umkhusane*+ wegeyithi yeyadi ejikeleze intente engcwele nesibingelelo, iintambo zentente, nawo wonke umsebenzi wezo zinto.

27 KuKohati kwavela intsapho yama-Amram, intsapho yamaItsare, intsapho yamaHebron nentsapho yamaUziyeli. Ezo ziintsapho zamaKohati.+ 28 Amadoda ezo ntsapho awabhaliswayo, ukususela kwenenyanga izelwe ukuya phezulu ayeyi-8 600. Umsebenzi wawo yayikukuhoya indawo engcwele.+ 29 Iintsapho zoonyana bakaKohati zazimise inkampu kwicala elingasemzantsi kwentente engcwele.+ 30 Kwiintsapho zamaKohati, nguElitsafan unyana kaUziyeli+ owayeyintloko kwindlu yootata babo. 31 Umsebenzi wabo yayikukuhoya iTyeya,+ itafile,+ isiphatho sezibane,+ izibingelelo,+ izinto ezisetyenziswa kwindawo engcwele,+ umkhusane,*+ nawo wonke umsebenzi wezo zinto.+

32 Umphathi weenkokheli zakwaLevi yayinguEleyazare+ unyana ka-Aron umbingeleli, owayephethe abo babesebenza kwindawo engcwele.

33 KuMerari kwavela intsapho yamaMahali nentsapho yamaMushi. Ezo ziintsapho zakwaMerari.+ 34 Amadoda ezo ntsapho awabhaliswayo, ukususela kwenenyanga izelwe ukuya phezulu ayeyi-6 200.+ 35 Kwiintsapho zamaMerari, nguTsuriyeli unyana ka-Abhihali owayeyintloko kwindlu yootata babo. Ezo ntsapho zazimise inkampu yazo kwicala elingasemntla lentente engcwele.+ 36 Umsebenzi woonyana bakaMerari yayikukuhoya iifreyimi zentente engcwele,+ iipali zayo,+ iintsika zayo,+ iziseko zayo, zonke izinto ezisetyenziswa kuyo,+ nawo wonke umsebenzi wezo zinto,+ 37 iintsika ezijikeleze iyadi neziseko zazo,+ izikhonkwane zazo zentente neentambo zazo zentente.

38 UMoses, uAron noonyana bakhe babemise inkampu phambi kwentente engcwele ngasempuma, phambi kwentente yokuhlangana ngasempumalanga. Umsebenzi ekwakufuneka bawenzele amaSirayeli yayikukuhoya indawo engcwele. Nabani na osondelayo engenalungelo lakusondela* wayemele abulawe.+

39 Onke amadoda angabaLevi, ukususela kwanenyanga ezelwe ukuya phezulu, awabhaliswa nguMoses noAron ngeentsapho zawo ngokomyalelo kaYehova, ayeyi-22 000.

40 Wathi uYehova kuMoses: “Bhalisa onke amazibulo amaSirayeli angamadoda, ukususela kwelinenyanga lizelwe ukuya phezulu,+ wabale uze uwabhale phantsi amagama awo. 41 Endaweni yawo onke amazibulo amaSirayeli uze undithathele abaLevi,+ uthathe nezilwanyana zasekhaya zabaLevi endaweni yamazibulo ezilwanyana zasekhaya zamaSirayeli.+ NdinguYehova.” 42 UMoses wawabhalisa onke amazibulo amaSirayeli, kanye njengokuba uYehova wayemyalele. 43 Xa ewonke amazibulo angamadoda ekwabhaliswa amagama awo, ukususela kwanenyanga ezelwe ukuya phezulu ayeyi-22 273.

44 UYehova waqhubeka ethetha noMoses esithi: 45 “Endaweni yawo onke amazibulo amaSirayeli uze undithathele abaLevi, uthathe nezilwanyana zasekhaya zabaLevi endaweni yamazibulo ezilwanyana zasekhaya zamaSirayeli. AbaLevi bamele babe ngabam. NdinguYehova. 46 Ekubeni amazibulo amaSirayeli emaninzi nge-273 kunabaLevi,+ umele uwabhatalele.+ 47 Izibulo elinye liza ­kubhatalelwa ngeeshekele* ezintlanu,+ ngokweshekele yendawo engcwele.* Ishekele ziigera* eziyi-20.+ 48 Loo mali umele uyinike uAron noonyana bakhe, ukuze ubhatalele la mazibulo amaSirayeli athe kratya kunabo.” 49 Wayithatha ke uMoses loo mali yokukhulula amazibulo athe kratya kwintlawulo engabaLevi. 50 Le mali wayithatha kumazibulo amaSirayeli, iziishekele eziyi-1 365, ngokweshekele yendawo engcwele. 51 Emva koko uMoses wayinika uAron noonyana bakhe loo mali, ngokwelizwi* likaYehova, njengokuba uYehova wayemyalele.

4 UYehova wathetha noMoses noAron, wathi: 2 “Makubalwe oonyana bakaKohati+ phakathi koonyana bakaLevi, ngokweentsapho zabo nangokwezindlu zootata babo, 3 bonke abaneminyaka eyi-30+ ukuya kweyi-50,+ abakwiqela elinikwe umsebenzi ententeni yokuhlangana.+

4 “Umsebenzi woonyana bakaKohati ententeni yokuhlangana+ ngulo. Uyeyona nto ingcwele: 5 Xa kufudukwa, uAron noonyana bakhe baza kungena baze bothule ikhethini,+ bogqume ngayo ityeya+ yoBungqina. 6 Ngaphezulu, baza kubeka isikhumba sentini baze babeke ilaphu eliluhlaza,* bafake neepali+ zokuyithwala loo tyeya.

7 “Bafanele bathathe izitya, iindebe nemiphanda yomnikelo oselwayo,+ bazibeke phezu kwetafile ekubekwa kuyo izonka zokubonisa+ baze bayogqume ngelaphu eliluhlaza;* isonka+ esihlala phezu kwaloo tafile masingasuswa. 8 Bamele baphinde babeke phezu kwayo ilaphu elibomvu krwe, baze bayogqume ngesikhumba sentini, bafake neepali+ zokuyithwala. 9 Emva koko baza kuthatha ilaphu eliluhlaza,* bogqume ngalo isiphatho sezibane+ zokukhanyisa, izibane+ zaso, imicephe yazo yokucima umlilo,+ izitya zaso zomlilo nazo zonke izitya zaso zokuphatha ioli. 10 Bakugqiba baza kusogquma nezixhobo zaso zonke ngesikhumba sentini, bafake neepali zokusithwala. 11 Yaye baza kubeka ilaphu eliluhlaza* phezu kwesibingelelo segolide,+ baze basogqume ngesikhumba sentini, bafake neepali+ zokusithwala. 12 Baza kuzithatha zonke izixhobo+ abasoloko bezisebenzisa kwindawo engcwele, bazisongele ngelaphu eliluhlaza,* bazogqume ngesikhumba sentini, baze bazibeke phezu kweepali zokuzithwala.

13 “Bamele basuse uthuthu* esibingelelweni+ baze basogqume ngelaphu elenziwe ngoboya obumsobo.* 14 Baza kubeka phezu kwaso zonke izixhobo+ abazisebenzisa qho kuso: izitya zaso zomlilo, iifolokhwe, imihlakulo nezitya. Bamele basogqume ngesikhumba sentini, bafake neepali zokusithwala.+

15 “UAron noonyana bakhe bamele babe bagqibile ukogquma indawo engcwele+ nazo zonke izinto zendawo engcwele xa inkampu iza kuhamba. Emva koko baza kungena oonyana bakaKohati baze bazithwale ezo zinto,+ kodwa mabangayichukumisi indawo engcwele, kuba ukuyichukumisa kwabo baza kufa.+ Lowo ngumsebenzi* woonyana bakaKohati apho ententeni yokuhlangana.

16 “UEleyazare+ unyana ka-Aron umbingeleli nguye oza kujongana neoli yezibane,+ isiqhumiso esiqholiweyo,+ umnikelo wokutya onikelwa qho neoli yokuthambisa.+ Nguye omele aphathe wonke umsebenzi owenziwa ententeni engcwele nayo yonke into engaphakathi kuyo, kunye nendawo engcwele nezinto zayo.”

17 UYehova waqhubeka ethetha noMoses noAron, esithi: 18 “Ningavumeli isizwe seentsapho zamaKohati+ sibulawe phakathi kwabaLevi. 19 Bancedeni ukuze bahlale bephila, bangafi xa besondela kwezona zinto zingcwele.+ UAron noonyana bakhe bamele bangene baze babonise ngamnye umsebenzi wakhe nezinto aza kuzithwala. 20 Mabangaziboni nakancinci izinto ezingcwele xa bengena, kungenjalo baza kufa.”+

21 Emva koko uYehova wathetha noMoses, wathi: 22 “Makubalwe oonyana bakaGer­shon,+ ngokwezindlu zootata babo nangokweentsapho zabo. 23 Bhalisa bonke abaneminyaka eyi-30 ukuya kweyi-50, abakwiqela labasebenza ententeni yokuhlangana. 24 Nanku umsebenzi weentsapho zamaGershon nezinto abaza kuzithwala.+ 25 Baza kuthwala amalaphu entente engcwele,+ intente yokuhlangana, amalaphu okuyogquma, isikhumba sentini esibekwa ngaphezulu,+ umkhusane* womnyango wentente yokuhlangana,+ 26 iikhethini zeyadi,+ umkhusane* wegeyithi yeyadi+ ebiyele intente engcwele nesibingelelo, iintambo zentente, zonke izixhobo, nayo yonke into esetyenziswa ententeni. Ngumsebenzi wabo lowo. 27 Wonke umsebenzi wamaGershon+ nemithwalo yawo uza kulawulwa nguAron noonyana bakhe; yonke le mithwalo uza kuyinika wona ibe ngumsebenzi wawo. 28 Lowo ke ngumsebenzi eziza kuwenza iintsapho zamaGershon ententeni yokuhlangana,+ yaye imisebenzi yawo ilawulwa nguItamare+ unyana ka-Aron umbingeleli.

29 “Bona oonyana bakaMerari,+ uza kubabhalisa ngokweentsapho zabo nangokwendlu yootata babo. 30 Bhalisa bonke abaneminyaka eyi-30 ukuya kweyi-50, abakwiqela labasebenza ententeni yokuhlangana. 31 Nazi izinto zentente yokuhlangana abaza kuzithwala:+ iifreyimi zentente engcwele,+ iipali zayo,+ iintsika zayo,+ iziseko zayo,+ 32 iintsika+ zeyadi, iziseko zazo,+ izikhonkwane zazo,+ iintambo zazo, zonke izixhobo zazo nawo wonke umsebenzi owenziwa ngezi zinto. Nimele ninike ngamnye kubo umsebenzi ngokubachazela izinto abaza kuzithwala. 33 Leyo ke yindlela eziza kusebenza ngayo iintsapho zoonyana bakaMerari+ ententeni yokuhlangana, zilawulwa nguItamare unyana ka-Aron umbingeleli.”+

34 UMoses noAron neenko­kheli+ zebandla bababhalisa oonyana bamaKohati,+ ngokweentsapho zabo nangokwendlu yootata babo, 35 bonke abo baneminyaka eyi-30 ukuya kweyi-50, abakwiqela labasebenza ententeni yokuhlangana.+ 36 Bebonke ababhaliswayo ngokweentsapho zabo, babeyi-2 750.+ 37 Aba babhaliswa bethathwa kwiintsapho zamaKohati, bonke ababesebenza ententeni yokuhlangana. UMoses noAron bababhalisa ngokomyalelo uYehova awawunika uMoses.+

38 Oonyana bakaGershon+ babhaliswa ngokweentsapho zabo nangokwezindlu zootata babo, 39 bonke abo baneminyaka eyi-30 ukuya kweyi-50, abakwiqela labasebenza ententeni yokuhlangana. 40 Bebonke ababhaliswayo ngokweentsapho zabo, babeyi-2 630.+ 41 Ngabo aba ababhaliswayo kwiintsapho zoonyana bakaGershon, bonke abo basebenza ententeni yokuhlangana. UMoses noAron bababhalisa ngokomyalelo uYehova awawunika uMoses.+

42 Oonyana bakaMerari babhaliswa ngokweentsapho zabo nangokwendlu yootata babo, 43 bonke abo baneminyaka eyi-30 ukuya kweyi-50, abakwiqela labasebenza ententeni yokuhlangana.+ 44 Bebonke ababhaliswayo ngokweentsapho zabo, babeyi-3 200.+ 45 Ngabo aba ababhaliswayo kwiintsapho zoonyana bakaMerari, awababhalisayo uMoses noAron ngokomyalelo uYehova awawunika uMoses.+

46 UMoses noAron neenkosi zakwaSirayeli bababhalisa aba baLevi ngokweentsapho zabo nangokwezindlu zootata babo, 47 babeneminyaka eyi-30 ukuya kweyi-50, yaye bonke banikwa imisebenzi yokuthwala imithwalo yentente yokuhlangana.+ 48 Ababhaliswayo kubo babeyi-8 580.+ 49 Babhaliswa ngokomyalelo uYehova awawunika uMoses, ngamnye ngokomsebenzi wakhe nangokomthwalo wakhe; babhaliswa kanye njengokuba uYehova wayemyalele uMoses.

5 UYehova waqhubeka ethetha noMoses, esithi: 2 “Wayalele amaSirayeli ukuba amkhuphe enkampini wonke umntu oneqhenqa,+ wonke umntu ophuma ukungcola kwilungu lakhe lenzala+ naye wonke umntu ongcoliswe ngumntu* ofileyo.+ 3 Nokuba yindoda okanye ngumfazi, bafanele bakhutshwe enkampini. Le nto imele yenziwe ukuze bangabi sangcolisa+ yonke inkampu, endihleli* phakathi kwayo.”+ 4 AmaSirayeli ayenza loo nto, abakhupha enkampini bonke abo bantu. Enza kanye le nto uYehova wayeyixelele uMoses.

5 Waqhubeka uYehova ethetha noMoses esithi: 6 “Yithi kumaSirayeli, ‘Ukuba indoda okanye umfazi wenze nokuba sesiphi kwizono zabantu, akathembeka kuYehova, unetyala loo mntu.+ 7 Umele* asivume isono sakhe,+ aze alibhatale lonke ityala lakhe,* ongeze nesihlanu saloo nto abhatala ngayo.+ Umele abhatale loo mntu amonileyo. 8 Kodwa ukuba loo mntu woniweyo akanasalamane ekunokubhatalwa kuso, loo nto kubhatalwa ngayo imele inikwe uYehova. Iza kuba yeyombingeleli, ukongeza kwinkunzi yegusha yokuhlawulela, le umbingeleli aza kumhlawulela ngayo.+

9 “‘Wonke umnikelo ongcwele+ oziswa ngamaSirayeli kumbingeleli, umele ube ngowakhe.+ 10 Izinto ezingcwele umntu anazo ziza kuhlala izezakhe. Kodwa loo nto ayinika umbingeleli, iza kuba yeyombingeleli.’”

11 UYehova waqhubeka ethetha noMoses esithi: 12 “Thetha namaSirayeli uthi, ‘Nantsi into emayenziwe ukuba umfazi uye wenza isono, akathembeka kwindoda yakhe, 13 ngokulala nenye indoda+ kodwa indoda yakhe ingayazi loo nto, abe ke uzingcolisile, kube kungekho bungqina bubambekayo, kungekho nomntu ombonileyo. 14 Nokuba indoda yakhe iye yanesikhwele imrhanela, abe nomfazi ke ezingcolisile nyhani, okanye iye yanesikhwele imrhanela kodwa yena umfazi engazingcolisanga, 15 loo ndoda imele imzise kumbingeleli umfazi wayo, ize nawo nomnikelo womfazi, osisahlulo esinye kwezilishumi ze-efa* yomgubo werhasi. Kufuneka ingagaleli oli kuwo, ingafaki nentlaka yokuqhumisa, kuba lowo ngumnikelo wesikhwele, umnikelo wokutya wokubhenca inyani.

16 “‘Umbingeleli uza kumzisa ngaphambili, ammise phambi koYehova.+ 17 Umbingeleli uza kuthatha isitya sodongwe esinamanzi angcwele, akhe uthuli phantsi ententeni engcwele aze alufake kuloo manzi. 18 Umele ammise phambi koYehova lo mfazi, azikhulule iinwele zakhe, aze abeke ezandleni zakhe umnikelo wokutya wokubhenca inyani, oko kukuthi umnikelo wokutya wesikhwele.+ Yena umbingeleli umele aphathe amanzi akrakrayo okuqalekisa.+

19 “‘Umbingeleli umele amfungise lo mfazi, athi kuye: “Ukuba khange ulale nenye indoda ngoxa ubusephantsi kwendoda yakho,+ yaye khange wenze sono ngokuzingcolisa, kwanga angangakwenzi nto la manzi akrakrayo okuqalekisa. 20 Kodwa ke, ukuba uye wenza isono ngokuzingcolisa ngoxa uphantsi kwendoda yakho, walala nenye indoda+ engeyiyo le yakho—” 21 Umbingeleli umele amfungise umfazi isifungo esinesiqalekiso, athi kuye: “Kwanga uYehova angenza abantu bakowenu bahlale besenza umzekelo ngawe xa beqalekisa naxa befunga, njengokuba uYehova elenza lishwabane* ithanga lakho,* sidumbe nesisu sakho. 22 La manzi okuqalekisa amele angene emathunjini akho, akudumbise isisu aze alenze lishwabane* ithanga lakho.”* Umele athi ke lo mfazi: “Amen! Amen!”*

23 “‘Umbingeleli umele azibhale ezi ziqalekiso encwadini aze azihlambe ngamanzi akrakrayo. 24 Umele amseze umfazi loo manzi akrakrayo okuqalekisa, angene ngaphakathi kuye amanzi okuqalekisa aze amkrakrele. 25 Ngoku ke kufuneka umbingeleli awuthathe umnikelo wokutya wesikhwele+ kulo mfazi, awutshangatshangise phambi koYehova, aze awusondeze esibingelelweni. 26 Umele agcwalise isandla ngaloo mnikelo wokutya aze awutshise esibingelelweni,+ emva koko umele aseze umfazi loo manzi. 27 Ukuba lo mfazi uye wazingcolisa, akathembeka kwindoda yakhe, xa esezwa amanzi okuqalekisa, aza kungena ngaphakathi kuye amkrakrele, yaye isisu sakhe siza kudumba, nethanga lakhe* lishwabane.* Abantu bakowabo baza kwenza umzekelo ngaye xa beqalekisa. 28 Kodwa ke, ukuba loo mfazi khange azingcolise ibe ucocekile, akukho nto iza kwenzeka kuye, yaye uza kukwazi ukumitha aze azale.

29 “‘Lowo ke ngumthetho wesikhwele,+ ukuba kukho umfazi oye wenza isono waza wazingcolisa ngoxa esephantsi kwendoda yakhe, 30 okanye ukuba kukho indoda eye yanesikhwele yaza yamrhanela umfazi wayo, imele imise umfazi wayo phambi koYehova aze umbingeleli enze kuloo mfazi yonke into etshiwo ngulo mthetho. 31 Indoda iza kuhlala ingenatyala, kodwa ukuba umfazi ufunyaniswe enetyala, kuza kufuneka aziphendulele.’”

6 UYehova waqhubeka ethetha noMoses, esithi: 2 “Thetha namaSirayeli uthi, ‘Ukuba indoda okanye umfazi wenza isifungo esikhethekileyo sokuba ngumNaziri*+ kaYehova, 3 ufanele acezele kude kwiwayini nasetywaleni. Ufanele angayiseli iviniga eyenziwe ngewayini okanye iviniga eyenziwe ngobunye utywala.+ Umele angasiseli nasiphi na isiselo esenziwe ngeediliya, angazityi kwaezo diliya, nokuba zisandula ukukhiwa okanye zezomisiweyo. 4 Yonke imihla yobuNaziri bakhe ufanele angatyi nantoni na eyenziwe ngeediliya, nokuba ziidiliya ezingekavuthwa, nokuba ngamaxolo.

5 “‘Loo mntu akamele ayichebe intloko yakhe, lonke ixesha engumNaziri.+ Ufanele ahlale engcwele ngokuthi aziyeke iinwele zentloko yakhe zikhule de liphele ixesha lokuzinikela kwakhe kuYehova. 6 Umele angasondeli kumntu* ofileyo ngalo lonke ixesha anikelwe ngalo kuYehova. 7 Nokuba kunokufa utata wakhe okanye umama wakhe okanye umntakwabo okanye udadewabo, makangazingcolisi,+ kuba uphawu lokuba ngumNaziri kwakhe kuThixo wakhe lusentlokweni yakhe.

8 “‘Loo mntu ungcwele kuYehova yonke imihla engumNaziri. 9 Kodwa ukuba kwenzekile kwafa umntu ngequbuliso ecaleni kwakhe+ aze azingcolise iinwele zakhe ezibonisa ukuba unikelwe kuThixo,* ufanele ayichebe intloko yakhe+ ngemini azicoca ngayo. Ufanele ayichebe ngosuku lwesixhenxe. 10 Ngosuku lwesibhozo ufanele azise kumbingeleli amahobe amabini asendle okanye amantshontsho amabini amahobe afuywayo, kumnyango wentente yokuhlangana. 11 Umbingeleli uza kulithatha elinye ihobe alilungiselele ukuba libe ngumnikelo wesono lize elinye libe ngumnikelo otshiswayo, aze amhlawulele loo mntu ngesono sakhe+ asenze ngenxa yomntu* ofileyo. Emva koko uya kuyingcwalisa intloko yakhe ngolo suku. 12 Umele aphinde azinikele kuYehova ukuze abe ngumNaziri, aze azise itakane legusha eliyinkunzi elinonyaka, libe ngumnikelo wetyala. Kodwa alizukubalwa ixesha eligqithileyo ebengumNaziri ngalo kuba uye wabungcolisa.

13 “‘Nanku umthetho womNaziri: Xa ezigqiba iintsuku zokuba ngumNaziri,+ uza kuziswa kumnyango wentente yokuhlangana. 14 Apho umele asondeze umnikelo wakhe kuYehova: itakane legusha eliyinkunzi eliphilileyo elinonyaka eliza kuba ngumnikelo otshiswayo,+ ithokazi legusha eliphilileyo elinonyaka eliza kuba ngumnikelo wesono,+ inkunzi yegusha ephilileyo eza kuba ngumbingelelo wobuhlobo,+ 15 ibhaskithi yezonka ezirawundi ezingenagwele, ezenziwe ngomgubo ocoliweyo oneoli, izonka ezisicaba ezingenagwele eziqatywe ioli, neminikelo ehamba nezo zinto, umnikelo wokutya+ nomnikelo oselwayo.+ 16 Umbingeleli uza kuyisondeza phambi koYehova, yaye uza kunikela umnikelo wakhe wesono nomnikelo wakhe otshiswayo. 17 Umbingeleli uza kunikela ngenkunzi yegusha nangezonka ezingenagwele ezikwibhaskithi, zibe ngumbingelelo wobuhlobo kuYehova, yaye uza kunikela ngomnikelo wokutya+ nangomnikelo oselwayo.

18 “‘Loo mNaziri uza kuyicheba intloko yakhe+ apho ngakumnyango wentente yokuhlangana. Uza kuzithatha iinwele zakhe ezikhule ngoxa ebengumNaziri, azifake emlilweni ongaphantsi kombingelelo wobuhlobo. 19 Umbingeleli umele athathe umkhono obilisiweyo+ wala nkunzi yegusha nesa sonka sirawundi singenagwele sisebhaskithini, nesa sonka sisicaba singenagwele, azibeke ezandleni zomNaziri, emva kokuba eluchebile uphawu lokuba ngumNaziri kwakhe. 20 Yaye umbingeleli umele azitshangatshangise ezo zinto ukuze zibe ngumnikelo otshangatshangiswayo phambi koYehova.+ Loo mnikelo uyinto engcwele yombingeleli, kunye nesifuba* nomlenze womnikelo.+ Emva koko umNaziri uvumelekile ukuba angayisela iwayini.

21 “‘Nanku umthetho womNaziri+ owenza isifungo: ukuba uyafunga ukunikela kuYehova iminikelo engaphezu kwaleyo ifunwayo kumntu ongumNaziri, kuba enako, makanikele ngokwesifungo sakhe nangokomthetho olawula ukuba ngumNaziri kwakhe.’”

22 Emva koko uYehova wathi kuMoses: 23 “Xelela uAron noonyana bakhe le nto, ‘Nantsi indlela enifanele nibasikelele ngayo+ abantu bakwaSirayeli. Yithini kubo:

24 “Kwanga uYehova angakusikelela+ aze akukhusele.

25 Kwanga uYehova angabukhanyisa kuwe ubuso bakhe,+ yaye kwanga angavuyiswa nguwe.

26 Kwanga uYehova angabuphakamisa ubuso bakhe kuwe, akunike uxolo.”’+

27 Yaye igama lam bamele balibeke kubantu bakwaSirayeli+ ukuze ndibasikelele.”+

7 Ngosuku awagqiba ngalo uMoses ukumisa intente engcwele,+ wayithambisa+ waza wayenza ngcwele, wenza loo nto kuyo, kuzo zonke izinto zayo, nakwisibingelelo nezinto zaso zonke.+ Uthe akugqiba ukuthambisa nokuzenza ngcwele zonke ezi zinto,+ 2 iinkosi zakwaSirayeli,+ iintloko zezindlu zootata bazo zanikela. Ezi nkosi zezizwe ezaziphethe ukubhaliswa kwabantu 3 zazisa umnikelo wazo phambi koYehova, iinqwelo ezinophahla ezintandathu, neenkomo eziyi-12. Iinkosi ezimbini zazisa inqwelo neenkunzi zeenkomo ezimbini, zazizisa phambi kwentente engcwele. 4 UYehova wathi kuMoses: 5 “Zithathe ezi zinto banikela ngazo kuba ziza kusetyenziswa kumsebenzi wasententeni yokuhlangana, uze unike ngamnye kubaLevi ngokomsebenzi wakhe.”

6 Ngoko uMoses wazithatha iinqwelo neenkomo waza wazinika abaLevi. 7 Oonyana bakaGershon wabanika iinqwelo ezimbini neenkomo ezine ngokwemisebenzi yabo;+ 8 waza wanika oonyana bakaMerari iinqwelo ezine neenkomo ezisibhozo ngokwemisebenzi yabo. Babephethwe nguItamare unyana ka-Aron umbingeleli.+ 9 Kodwa akazange abanike nto oonyana bakaKohati, kuba babesebenza kwindawo engcwele,+ ibe izinto ezingcwele babezithwala emagxeni.+

10 Iinkosi zanikela ngomhla wokunikezelwa*+ kwesibingelelo, ngosuku esathanjiswa ngalo. Zathi xa iinkosi zisondeza umnikelo wazo phambi kwesibingelelo, 11 uYehova wathi kuMoses: “Makuze inkosi ibe nye ngosuku, inikele umbingelelo wayo wokunikezelwa kwesibingelelo.”

12 Umntu owazisa umnikelo wakhe ngosuku lokuqala, yaba nguNashon+ unyana ka-Aminadabhi wesizwe sakwaYuda. 13 Wanikela ngesitya esinye sesilivere, esinobunzima obuziishekele* eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.*+ Zombini zazigcwele umgubo ocolekileyo womnikelo wokutya oxutywe neoli,+ 14 wanikela ngendebe* yegolide enobunzima obuziishekele eziyi-10 egcwele isiqhumiso esiqholiweyo. 15 Wanikela ngethole lenkomo eliyinkunzi, ngenkunzi yegusha nangetakane legusha eliyinkunzi elinonyaka, zaba zezomnikelo otshiswayo.+ 16 Wanikela ngetakane lebhokhwe laba ngumnikelo wesono,+ 17 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaNashon unyana ka-Aminadabhi ke lowo.+

18 Ngosuku lwesibini uNeta­neli+ unyana kaTsuware, inkosi yakwaIsakare, wanikela. 19 Wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 20 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo. 21 Wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 22 Wanikela ngetakane lebhokhwe laba ngumnikelo wesono,+ 23 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaNetaneli unyana kaTsuware ke lowo.

24 Ngosuku lwesithathu inkosi yoonyana bakaZebhulon, uEliyabhi+ unyana kaHelon, 25 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 26 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 27 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 28 Wanikela ngetakane lebhokhwe laba ngumnikelo wesono,+ 29 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaEliyabhi+ unyana kaHelon ke lowo.

30 Ngosuku lwesine inkosi yoonyana bakaRubhen, uElitsure+ unyana ­kaShedeyure, 31 wanikela ngesitya esinye sesilivere, ­esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 32 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 33 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 34 Wanikela ngetakane lebhokhwe laba ngumnikelo wesono,+ 35 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaElitsure+ unyana kaShedeyure ke lowo.

36 Ngosuku lwesihlanu inkosi yoonyana bakaSimeyon, uShelumiyeli+ unyana kaTsurishadayi, 37 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 38 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 39 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 40 Wanikela ngetakane lebhokhwe laba ngumnikelo wesono,+ 41 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaShelumiyeli+ unyana kaTsurishadayi ke lowo.

42 Ngosuku lwesithandathu inkosi yoonyana bakaGadi, uEliyasafu+ unyana kaDehuweli, 43 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 44 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 45 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 46 Wanikela ngetakane lebhokhwe laba ngumnikelo wesono,+ 47 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaEliyasafu+ unyana kaDehuweli ke lowo.

48 Ngosuku lwesixhenxe inkosi yoonyana bakaEfrayim, uElishama+ unyana ka-Amihudi, 49 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 50 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 51 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 52 Wanikela ngetakane lebhokhwe laba ngumnikelo wesono,+ 53 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaElishama+ unyana ka-Amihudi ke lowo.

54 Ngosuku lwesibhozo inkosi yoonyana bakaManase, uGamaliyeli+ unyana kaPedatsure, 55 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo woku­tya oxutywe neoli.+ 56 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 57 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 58 Wanikela ngetakane lebhokhwe laba ngumnikelo wesono,+ 59 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaGamaliyeli+ unyana kaPedatsure ke lowo.

60 Ngosuku lwesithoba inkosi+ yoonyana bakaBhenjamin, uAbhidan+ unyana kaGidiyoni, 61 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 62 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 63 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 64 Wanikela ngetakane lebhokhwe laba ngumnikelo wesono,+ 65 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo ka-Abhidan+ unyana kaGidiyoni ke lowo.

66 Ngosuku lweshumi inkosi yoonyana bakaDan, uAhiyezere+ unyana ka-Amishadayi, 67 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 68 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 69 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 70 Wanikela ngetakane lebhokhwe laba ngumnikelo wesono,+ 71 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo ka-Ahiyezere+ unyana ka-Amishadayi ke lowo.

72 Ngosuku lwe-11 inkosi yoonyana baka-Ashere, uPagiyeli+ unyana kaOkeran, 73 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 74 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 75 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 76 Wanikela ngetakane lebhokhwe laba ngumnikelo wesono,+ 77 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo kaPagiyeli+ unyana kaOkeran ke lowo.

78 Ngosuku lwe-12 inkosi yoonyana bakaNafetali, uAhira+ unyana kaEnan, 79 wanikela ngesitya esinye sesilivere, esinobunzima obuziishekele eziyi-130, nesitya sesilivere esinobunzima obuziishekele eziyi-70 ngokomlinganiselo weshekele yendawo engcwele.+ Zombini zazigcwele umgubo ocolekileyo womnikelo wokutya oxutywe neoli.+ 80 Wanikela ngendebe yegolide enobunzima obuziishekele eziyi-10 egcwele isiqhumiso esiqholiweyo, 81 wanikela ngethole lenkomo eliyinkunzi, ngenkunzi yegusha, nangetakane legusha eliyinkunzi elinonyaka, zaba zezomnikelo otshiswayo.+ 82 Wanikela ngetakane lebhokhwe laba ngumnikelo wesono,+ 83 wanikela ngeenkomo ezimbini, ngeenkunzi zeegusha ezintlanu, ngeenkunzi zeebhokhwe ezintlanu, nangamatakane eegusha aziinkunzi anonyaka amahlanu, zaba ngumbingelelo wobuhlobo.+ Yayingumnikelo ka-Ahira+ unyana kaEnan ke lowo.

84 Nanku umnikelo wokunikezela+ isibingelelo owawuvela kwiinkosi zakwaSirayeli xa sasithanjiswa: izitya ezikhulu zesilivere eziyi-12, izitya ezincinci zesilivere eziyi-12 neendebe zegolide eziyi-12.+ 85 Isitya ngasinye esikhulu sasinobunzima obuziishekele eziyi-130, yaye isitya ngasinye esincinci sasinobunzima obuziishekele eziyi-70, iyonke isilivere yezo zitya yaba ziishekele eziyi-2 400 ngokomlinganiselo weshekele yendawo engcwele;+ 86 nganye kwiindebe eziyi-12 ezazigcwele isiqhumiso esiqholiweyo, yayinobunzima obuziishekele eziyi-10 ngokomlinganiselo weshekele yendawo engcwele. Iyonke igolide yezo ndebe yaba ziishekele eziyi-120. 87 Xa zizonke iinkomo zomnikelo otshiswayo, zaba ziinkunzi eziyi-12, iinkunzi zeegu­sha eziyi-12, namatakane eegusha aziinkunzi anonyaka ayi-12 neminikelo yawo yokutya, namatakane eebhokhwe omnikelo wesono ayi-12, 88 ibe zizonke iinkomo zombingelelo wobuhlobo zaba ziinkunzi eziyi-24, iinkunzi zeegusha zaba yi-60, iinkunzi zeebhokhwe zaba yi-60, namatakane eegusha aziinkunzi anonyaka ayi-60. Lowo yaba ngumnikelo wokunikezela+ isibingelelo emva kokuthanjiswa kwaso.+

89 Nanini na uMoses engena ententeni yokuhlangana eyokuthetha noThixo,*+ wayesiva ilizwi lithetha naye livela phezu kwesivalo+ setyeya yoBungqina, phakathi kweekherubhi ezimbini;+ yaye uThixo wayethetha naye.

8 UYehova wathetha noMoses, wathi: 2 “Thetha noAron uthi, ‘Xa ulayita izibane ezisixhenxe, kufuneka zikhanyise indawo ephambi kwesiphatho sezibane.’”+ 3 Nantsi ke into awayenzayo uAron: walayita izibane ezisixhenxe ezikwisiphatho sezibane+ ukuze zikhanyise indawo ephambi kwaso, kanye njengokuba uYehova wayemyalele uMoses. 4 Sasenziwe ngolu hlobo isiphatho sezibane: Sasenziwe ngegolide ekhandiweyo, sikhandwe ukusuka esiqwini ukuyokutsho kwiintyatyambo zaso.+ Sasenziwe ngendlela uYehova awayembonise ngayo uMoses embonweni.+

5 UYehova waphinda wathetha noMoses, wathi: 6 “Thatha abaLevi phakathi kwamaSirayeli, ubacoce.+ 7 Nantsi indlela omele ubacoce ngayo: Batshize ngamanzi okucoca izono, yaye bamele bachebe uboya obusemzimbeni ngebleyidi, bahlambe iimpahla zabo, batsho bacoceke.+ 8 Emva koko baza kuthatha ithole lenkomo eliyinkunzi+ nomnikelo walo wokutya+ ongumgubo ocoliweyo oxutywe neoli, uze wena uthathe elinye ithole lenkomo eliyinkunzi libe ngumnikelo wesono.+ 9 Umele ubasondeze abaLevi phambi kwentente yokuhlangana uze ulihlanganise lonke ibandla lamaSirayeli.+ 10 Xa usondeza abaLevi phambi koYehova, amaSirayeli amele ababeke izandla.+ 11 UAron umele abanikele* kuYehova babe ngumnikelo otshangatshangiswayo+ ovela kumaSirayeli, yaye baza kusebenzela uYehova.+

12 “Emva koko abaLevi bamele babeke izandla zabo phezu kweentloko zezo nkunzi zeenkomo,+ baze enye bayenze umnikelo wesono, enye inikelwe kuYehova ukuze kuhlawulelwe+ abaLevi. 13 Umele ubamise phambi koAron noonyana bakhe, ubanikele* kuYehova babe ngumnikelo otshangatshangiswayo. 14 Umele ubahlule abaLevi kumaSirayeli, bona baza kuba ngabam.+ 15 Emva koko, abaLevi bamele bangene ententeni yokuhlangana ukuze basebenze. Nantso ke indlela omele ubacoce ngayo nomele ubanikele* ngayo babe ngumnikelo otshangatshangiswayo. 16 Kuba banikelwe kum bethathwa kumaSirayeli. Ndiza kuzithathela bona endaweni yawo onke amazibulo* amaSirayeli.+ 17 Kaloku ngawam onke amazibulo amaSirayeli, awabantu nawezilwanyana.+ Ndazingcwalisela wona ngemini endawaxabela ngayo onke amazibulo elizwe laseYiputa.+ 18 Ndiza kuthatha abaLevi endaweni yawo onke amazibulo amaSirayeli. 19 AbaLevi ndiza kubanika uAron noonyana bakhe ndibathatha kumaSirayeli, ukuze bamele amaSirayeli kumsebenzi wasententeni yokuhlangana,+ nokuze bahlawulele amaSirayeli, ukuze amaSirayeli angafikelwa sisibetho+ ngenxa yokusondela endaweni engcwele.”

20 UMoses, uAron nalo lonke ibandla lamaSirayeli bayenza yonke le nto kubaLevi. AmaSirayeli enza yonke into uYehova awayeyiyalele uMoses ngabaLevi. 21 NabaLevi ke bazicoca, bahlamba neempahla zabo,+ emva koko uAron wabanikela* kuYehova bangumnikelo otshangatshangiswayo.+ UAron wabahlawulela ukuze abacoce.+ 22 Emva koko, abaLevi bangena ententeni yokuhlangana ukuze basebenze phambi koAron noonyana bakhe. Yonke into eyenziwayo kubo yileyo kanye uYehova wayeyiyalele uMoses.

23 Wathi uYehova kuMoses: 24 “Nantsi into eza kwenzeka kubaLevi: Indoda eneminyaka eyi-25 ukuya phezulu imele ingene kwiqela labo basebenza ententeni yokuhlangana. 25 Kodwa xa ifika kwiminyaka eyi-50, iza kuyeka ukuba kwiqela labo basebenza ententeni yokuhlangana. 26 Inokuncedisa abantakwayo abasasebenza ententeni yokuhlangana, kodwa yona ayimele isebenze khona. Nantso ke into omele uyenze ngabaLevi nemisebenzi yabo.”+

9 Ngonyaka wesibini wokuphuma kwabo kwilizwe laseYiputa, ngenyanga yokuqala,+ uYehova wathetha noMoses apho kwintlango yaseSinayi esithi: 2 “AmaSirayeli afanele alungise umbingelelo wePasika+ ngexesha lawo elibekiweyo.+ 3 Nifanele niwulungise ngomhla we-14 kule nyanga, ngorhatya,* ngexesha lawo elibekiweyo. Nifanele niwulungise nilandela yonke imithetho yawo neendlela zawo.”+

4 Ngoko uMoses wawaxelela amaSirayeli ukuba alungise umbingelelo wePasika. 5 Awulungisa ke umbingelelo wePasika ngenyanga yokuqala, ngomhla we-14 waloo nyanga, ngorhatya,* entlango yaseSinayi. Enza kanye ngendlela uMoses awayeyalelwe ngayo nguYehova.

6 Kwakukho amadoda awayengacocekanga ngenxa yokuphatha isidumbu somntu,+ kangangokuba awazange akwazi ukulungisa umbingelelo wePasika ngaloo mini. Ngoko aya kuMoses noAron kwangaloo mini+ 7 aza athi kuye: “Asicocekanga ngenxa yokuphatha isidumbu somntu. Kodwa kutheni singavunyelwa sisondeze umnikelo kuYehova ngexesha alibekelweyo amaSirayeli ngenxa yaloo nto?”+ 8 Ngoko ke uMoses wathi kuwo: “Khanilinde apho, khe ndive ukuba uYehova uza kuyalela athini ngani.”+

9 UYehova wathi kuMoses: 10 “Yithi kumaSirayeli, ‘Ukuba umntu kuni okanye kwizizukulwana zenu ezizayo uye akacoceka ngenxa yokuphatha isidumbu somntu,+ okanye angabikho kuba eye kwindawo ekude, usamele amlungiselele uYehova umbingelelo wePasika. 11 Loo mntu uza kuwulungisa ngenyanga yesibini,+ ngomhla we-14, ngorhatya.* Ufanele awutye nesonka esingenagwele nemifuno ekrakra.+ 12 Makuthi kusisa abe ewugqibile,+ kungabikho thambo alophulayo.+ Loo mbingelelo uza kuwulungisa ngokwemithetho yePasika. 13 Kodwa ukuba umntu ucocekile okanye akayanga ndawo, kodwa angakukhathaleli ukulungisa umbingelelo wePasika, loo mntu umele abulawe,+ kuba ­akawuzisanga umnikelo kaYehova ngexesha lawo elibekiweyo. Uza kuphendula ngesono sakhe.

14 “‘Ukuba nihlala nomntu wasemzini, naye ufanele amlungiselele uYehova umbingelelo wePasika.+ Ufanele enze njalo ngokomthetho wePasika nangokwendlela yawo ebekiweyo.+ Makusebenze umthetho omnye kumntu wasemzini nakumhlali walapho.’”+

15 Ngemini eyamiswa ngayo intente engcwele,+ ilifu layogquma loo ntente, intente yoBungqina, kodwa ngokuhlwa laba njengomlilo phezu kwaloo ntente ingcwele kwada kwasa.+ 16 Kwaqhubeka kusenzeka loo nto: Ilifu laliyogquma emini, lize ebusuku libe njengomlilo.+ 17 Nanini na lisuka phezu kwentente, ngokukhawuleza amaSirayeli ayehamba,+ kodwa kuloo ndawo liye lamisa kuyo, nawo ayemisa inkampu kuyo.+ 18 AmaSirayeli ayehamba xa uYehova ewayalele njalo, aze amise inkampu xa uYehova etshilo.+ Lonke ixesha ilifu lihleli phezu kwentente engcwele, namaSirayeli ayeqhubeka emise inkampu. 19 Xa ilifu lihleli ithuba elide phezu kwentente engcwele, amaSirayeli ayemthobela uYehova, angahambi.+ 20 Ngamanye amaxesha elo lifu lalihlala iintsuku ezimbalwa phezu kwentente engcwele. UYehova wayewayalela ukuba amise inkampu, yaye ayehamba xa uYehova etshilo. 21 Ngamanye amaxesha ilifu lalihlala ukususela ngokuhlwa kude kuse, yaye laliphakama kwakusa, aze ahambe. Nokuba ilifu laliphakama emini okanye ngokuhlwa, nawo ayehamba.+ 22 Kungakhathaliseki ukuba ilifu lihlala iintsuku ezimbini, inyanga, okanye ixesha elide phezu kwentente engcwele, amaSirayeli ayehlala enkampini. Kodwa xa liye laphakama ayehamba. 23 Ayemisa inkampu ngokuyalelwa nguYehova aze ahambe xa uYehova ethe mawahambe. Azenza zonke izinto ezazifunwa nguYehova ngokomyalelo uYehova awawunika uMoses.

10 UYehova wathi kuMoses: 2 “Zenzele amaxilongo amabini+ esilivere. Wakhalise xa uqokelela ibandla naxa usithi makuhanjwe. 3 Xa evuthelwa omabini, lonke ibandla limele lize kuwe kumnyango wentente yokuhlangana.+ 4 Xa kuvuthelwe lalinye, makuze kuphela iinkosi, iintloko zamawaka akwaSirayeli.+

5 “Xa niwavuthela ngesandi esitshintsha-tshintshayo, mawahambe amaqela angasempuma.+ 6 Xa niphinda niwavuthela ngesandi esitshintsha-tshintshayo, mawahambe amaqela angasemzantsi.+ Qho ekhaliswa ngolo hlobo amaxilongo, amaqela afanele ahambe.

7 “Kodwa ke xa nibiza ibandla, sanukuwavuthela ngesandi esitshintsha-tshintshayo amaxilongo.+ 8 Mayibe ngoonyana baka-Aron, ababingeleli, abavuthela amaxilongo,+ yaye iza kuhlala ingabo abawavuthelayo kuzo zonke izizukulwana zenu.

9 “Xa kufuneka nilwe nomntu onicinezelayo elizweni lenu, nimele niwakhalisele imfazwe amaxilongo,+ yaye uYehova uThixo wenu uza kuninceda, anisindise kwiintshaba zenu.

10 “Kanti ke naxa nonwabile,+ ingamatheko enu+ okanye kuqala inyanga, nimele niwakhalise la maxilongo xa nisenza iminikelo etshiswayo+ nemibingelelo yobuhlobo;+ yaye uThixo wenu uza kuhlala enikhumbula. NdinguYehova uThixo wenu.”+

11 Ngonyaka wesibini, ngenyanga yesibini, ngosuku lwe-20,+ laphakama ilifu phezu kwentente engcwele+ yoBungqina. 12 Ngoko amaSirayeli emka entlango yaseSinayi, ahamba ngolwa hlobo kwakuthiwe mawahambe ngalo,+ yaye ilifu layokuma entlango yaseParan.+ 13 Aqala ngelo xesha ke ukuhamba ngohlobo uYehova awayexelele uMoses ukuba mawahambe ngalo.+

14 Kwaqala kwahamba iqela lezizwe ezithathu lakwaYuda, yaye laliphethwe nguNashon+ unyana ka-Aminadabhi. 15 Isizwe sakwaIsakare sasiphethwe nguNetaneli+ unyana kaTsuware. 16 Isizwe sakwaZebhulon sasiphethwe nguEliyabhi+ unyana kaHelon.

17 Yathi yakuchithwa intente engcwele,+ oonyana bakaGershon+ noonyana bakaMerari,+ ababethwala intente engcwele, bahamba nayo.

18 Emva koko kwahamba iqela lezizwe ezithathu lakwaRubhen, yaye laliphethwe nguElitsure+ unyana kaShedeyure. 19 Isizwe sakwaSimeyon sasiphethwe nguShelumiyeli+ unyana kaTsurishadayi. 20 Isizwe sakwaGadi sasiphethwe nguEliyasafu+ unyana kaDehuweli.

21 Emva koko kwahamba amaKohati awayethwala izinto zendawo engcwele.+ Kwakufuneka ibe sele imile intente engcwele xa efika.

22 Emva koko kwahamba iqela lezizwe ezithathu lakwaEfrayim, yaye laliphethwe nguElishama+ unyana ka-Amihudi. 23 Isizwe sakwaManase sasiphethwe nguGamaliyeli+ unyana kaPedatsure. 24 Isizwe sakwaBhenjamin sasiphethwe nguAbhidan+ unyana kaGidiyoni.

25 Emva koko, ngasemva kwahamba iqela lezizwe ezithathu lakwaDan, likhusele onke amanye amaqela, yaye laliphethwe nguAhiyezere+ unyana ka-Amishadayi. 26 Isizwe sakwa-Ashere sasiphethwe nguPagiyeli+ unyana kaOkeran. 27 Isizwe sakwaNafetali sasiphethwe nguAhira+ unyana kaEnan. 28 Qho kufuneka emkile amaSirayeli, ayehamba ngolo hlobo.+

29 Wathi uMoses kuHobhabhi unyana kaRehuweli*+ umMidiyan, utata womfazi kaMoses: “Siyahamba ngoku, siya kwilizwe athe uYehova, ‘Ndiza kuninika lona.’+ Hamba nathi,+ siza kukuphatha kakuhle, kuba uYehova umthembise izinto ezintle uSirayeli.”+ 30 Kodwa yena wathi: “Hayi andizukukwazi. Ndiza kubuyela kwilizwe lam nakubantu basekhaya.” 31 UMoses wathi: “Ndicela ungasishiyi, kaloku nguwe ozaziyo iindawo esinokuhlala kuzo kule ntlango, yaye nguwe onokusibonisa indlela.* 32 Ukuba uhamba nathi,+ nantoni na entle asenzela yona uYehova, nawe siza kukunika.”

33 Ngoko bemka entabeni kaYehova,+ bahamba umgama weentsuku ezintathu, ityeya+ kaYehova yesivumelwano iphambi kwabo njengoko babekhangela indawo yokuphumla.+ 34 Ilifu likaYehova+ laliphezu kwabo njengoko babesiya kwindawo ababeza kuhlala kuyo.

35 Kwakusithi xa ihanjiswa iTyeya, uMoses athi: “Phakama Yehova,+ mazichithachitheke iintshaba zakho, futhi mababaleke abo bakucaphukelayo.” 36 Yaye wayesithi xa ibekwa: “Buya Yehova, buyela kumawaka angenakubalwa* akwaSirayeli.”+

11 Abantu baqalisa ukumkhalazela kakhulu uYehova. Wathi uYehova akubeva, wacaphuka kakhulu, waza uYehova wathumela umlilo, watshisa abanye abantu ababesemacaleni enkampu. 2 Xa abantu bakhalela kuMoses, wathandaza kuYehova emcenga,+ waza waphela ke umlilo. 3 Ngoko loo ndawo yabizwa ngokuba yiTabhera,* kuba uYehova wabatshisa ngomlilo.+

4 Abantu ababengengomaSirayeli+ ababehamba nabo bathetha ngezinto abazirhalelayo,+ aza amaSirayeli angenwa nguloo moya, akhala athi: “Ngubani oza kusinika inyama?+ 5 Thina sifuna ezaa ntlanzi sasizitya eYiputa singazithenganga, sifuna iityhukhamba, iivatala, iilike, amatswele neegalikhi!+ 6 Ibuhlungu imeko yethu, kuba kaloku siphelele kule mana.”+

7 Imana+ yayifana neenkozo zekoriyenda,+ ifana nayo nentlaka yebhideliyu. 8 Abantu babesithi saa, bayiqokelele baze bayigube* okanye bayingqushe. Emva koko babeyibilisa ezimbizeni okanye benze ngayo izonka ezirawundi,+ ibe yayimnandi njengesonka esinencasa esigalelwe ioli. 9 Xa kusiwa umbethe enkampini ebusuku, nemana yayisiwa.+

10 UMoses wabeva abantu bekhala, iyile intsapho naleya, mntu ngamnye engakumnyango wentente yakhe. Yamcaphukisa kakhulu le nto uYehova,+ noMoses wakhathazeka kakhulu. 11 Emva koko uMoses wathi kuYehova: “Kutheni usizisela intlungu isicaka sakho? Kutheni ungakholwa ndim ude undinike aba bantu bangumthwalo ongaka?+ 12 Ngaba ndim obemithe aba bantu? Ndibazele na le nto usithi kum, ‘Bafunqule ngendlela impelesi* elufunqula ngayo usana oluncancayo,’ ndibase elizweni owafunga ukuba uza kulinika ookhokho babo?+ 13 Ndiza kuyithatha phi mna inyama endiza kuyinika aba bantu? Kuba bayandikhalela besithi, ‘Sinike inyama sitye!’ 14 Andikwazi ukubathwala ndodwa aba bantu; ndiyohluleka.+ 15 Ngoko ukuba uza kundiphatha ngolu hlobo, kungcono undibulale ngoku.+ Ukuba uyakholwa ndim mandingaphinde ndibone ntlekele.”

16 UYehova wathi kuMoses: “Qokelela amadoda ayi-70 kumadoda angabadala kwaSirayeli, amadoda owaziyo ukuba angabadala namagosa abantu,+ uwazise ententeni yokuhlangana, ume nawo apho. 17 Ndiza kuhla+ ndithethe nawe apho,+ ndicuntsule kumoya okuwe ndize ndiwufake kuwo,+ aze akuncedise ekuthwaleni lo mthwalo ungaba bantu, ungawuthwali wedwa.+ 18 Uze uthi ebantwini, ‘Zingcwaliseni, kuba nakanjani ngomso+ niza kutya inyama, kaloku univile uYehova ngoku benikhala+ nisithi: “Ngubani oza kusinika inyama? Kwakungcono ngokuya sasihlala eYiputa.”+ Uza kuninika ke uYehova inyama, niyitye.+ 19 Anizukuyitya nje usuku olunye okanye iintsuku ezimbini okanye ezintlanu okanye eziyi-10 okanye eziyi-20, 20 kodwa niza kuyitya inyanga yonke, ide iphume ngeempumlo inidike,+ kuba niye namlahla uYehova okunye nani, namkhalela, nisithi: “Sahambela ntoni eYiputa?”’”+

21 Ngoko ke uMoses wathi: “Xa bebonke aba bantu bangamadoda ayi-600 000,*+ kodwa wena uthi, ‘Ndiza kubanika inyama, batye bonele inyanga yonke’! 22 Ukuba ibinokuxhelwa yonke imihlambi yeegusha neyeenkomo, ibiza kubonela? Okanye ukuba bekunokulotywa zonke iintlanzi elwandle, beziza kubonela?”

23 UYehova wathi kuMoses: “Ngaba kukho into enokuxaka uYehova?+ Ngoku uza kuzibonela ukuba le nto ndiyithethayo iza kwenzeka na.”

24 Ngoko uMoses wahamba wayokuchazela abantu into ayixelelwe nguYehova. Waqokelela amadoda ayi-70 angabadala, wawamisa ngasententeni.+ 25 Emva koko uYehova wehla ngelifu,+ wathetha naye,+ waza wacuntsula umoya+ owawukuMoses wawufaka kubo bonke abadala abayi-70. Bathi bakufumana loo moya baprofeta,*+ kodwa abazange baphinde baprofete.

26 Kwakukho abadala ababini ababesenkampini. Amagama abo yayinguEldadi noMedadi. Umoya wahlala kubo kuba nabo babebhalisiwe, kodwa babengayanga ententeni. Ngoko baprofeta apho enkampini. 27 Omnye umfana wabaleka wayokuxelela uMoses wathi: “UEldadi noMedadi bayaprofeta enkampini!” 28 UYoshuwa+ unyana kaNun, owaba sisicaka sikaMoses esengumfana, wathi: “Banqande nkosi yam Moses!”+ 29 Kodwa uMoses wathi kuye: “Unexhala lokuba baza kuthatha indawo yam? Kum, akwaba bonke abantu bakaYehova bebenokuba ngabaprofeti, noYehova abanike umoya wakhe!” 30 Ethubeni uMoses wabuyela enkampini ehamba nabadala bakwaSirayeli.

31 Emva koko umoya kaYehova wabhudla, watyhala izagwityi uzisusa elwandle wayokuziphosa macala onke enkampu.+ Zazininzi kangangokuba kwakunokufuneka umntu ahambe usuku lonke ukuze ayokuphumela kwela cala lazo. Zazifumbe kangangeekubhite* ezimbini ukuphakama. 32 Ngoko yonke loo mini nobusuku bayo, nosuku olulandelayo abantu abazange balale beqokelela izagwityi. Akukho mntu owaqokelela ngaphantsi kweehomere* ezilishumi lezagwityi, yaye bazibeka kuyo yonke indawo enkampini. 33 Bathi besayiluma loo nyama bengekayihlafuni, uYehova wanomsindo, wababetha uYehova ngesibetho esikhulu kakhulu.+

34 Ngoko bayithiya loo ndawo ngokuba yiKibroti-hatava,*+ kuba babangcwabela apho abo bantu babenyolukile.+ 35 Bemka abantu eKibroti-hatava baya eHatseroti, baza bahlala apho.+

12 UMiriyam noAron bamgxeka uMoses kuba etshate umfazi ongumKushe.+ 2 Bathi: “Ngaba uYehova uthetha esebenzisa uMoses yedwa na? Akasisebenzisi na thina?”+ UYehova wayeyimamele yonke loo nto.+ 3 UMoses wayengoyena mntu ululamileyo kubo bonke abantu*+ ababephila emhlabeni.

4 Ngokukhawuleza uYehova wathi kuMoses, uAron noMiriyam: “Nobathathu, hambani niye ententeni yokuhlangana.” Ngoko bahamba bobathathu. 5 UYehova wehla ngelifu,+ wema ngakumnyango wentente waza wabiza uAron noMiriyam. Bobabini basondela. 6 Wathi kubo: “Khanindimameleni. Ukuba bekukho umprofeti kaYehova phakathi kwenu, bendiza kuzazisa kuye embonweni+ kwaye bendiza kuthetha naye ephupheni.+ 7 Kodwa andiyenzi loo nto kwisicaka sam uMoses! Yena uphathiswe yonke indlu yam.*+ 8 Ndithetha naye ubuso ngobuso+ into ecacileyo, andizami kumbhida; yaye mna Yehova ndiyazibonakalisa kuye. Bekutheni ke ngoku ze ningoyiki ukusigxeka isicaka sam uMoses?”

9 Ngoko uYehova wacaphuka kakhulu waza wabashiya. 10 Lemka ilifu phezu kwentente, tyhini! uMiriyam wayebethwe ngeqhenqa, emhlophe okwekhephu.+ UAron wajika wajonga uMiriyam, waza wabona ukuba ubethwe ngeqhenqa.+ 11 UAron wakhawuleza wathi kuMoses: “Owu yhini nkosi yam! Ndicela ungasohlwayi ngesi sono. Senze ubudenge! 12 Ndiyakucela, sukumyeka afane nosana oluzelwe lufile, oluphuma sele enye inyama yalo idlekile!” 13 UMoses wakhalela kuYehova, esithi: “Owu Thixo, ndicela umphilise! Ndiyakucela!”+

14 Wathi ke uYehova kuMoses: “Ukuba utata wakhe ebenokumthufela* ebusweni, ebengazukuhlazeka iintsuku ezisixhenxe na? Ngoko ke makavalelwe yedwa iintsuku ezisixhenxe ngaphandle kwenkampu,+ aze emva koko aphinde abuye.” 15 Wahlaliswa yedwa ke uMiriyam ngaphandle kwenkampu iintsuku ezisixhenxe,+ yaye abazange bahambe abantu de wabuya. 16 Emva koko bahamba abantu eHatseroti+ baya kuhlala kwintlango yaseParan.+

13 UYehova wathi kuMoses: 2 “Thuma amadoda ayokuhlola ilizwe lakwaKanan, eli ndilinika amaSirayeli. Umele uthathe indoda ibe nye kwisizwe ngasinye, yaye nganye imele ibe iyinkokheli.”+

3 Wawathuma ke uMoses loo madoda esentlango yaseParan+ ngokomyalelo kaYehova. Onke ayeziinkokheli zamaSirayeli. 4 Nanga amagama awo: kwisizwe sakwaRubhen, wathatha uShamuwa unyana kaZakure; 5 kwisizwe sakwaSimeyon, wathatha uShafati unyana kaHori; 6 kwisizwe sakwaYuda, wathatha uKalebhi+ unyana kaYefune; 7 kwisizwe sakwaIsakare, wathatha uIgali unyana kaYosefu; 8 kwisizwe sakwaEfrayim, wathatha uHosheya+ unyana kaNun; 9 kwisizwe sakwaBhenjamin, wathatha uPalti unyana kaRafu; 10 kwisizwe sakwaZebhulon, wathatha uGadiyeli unyana kaSodi; 11 kwisizwe sakwaManase+ esiphuma kwisizwe sakwaYosefu,+ wathatha uGadidi unyana kaSusi; 12 kwisizwe sakwaDan, wathatha uAmiyeli unyana kaGemali; 13 kwisizwe sakwa-Ashere, wathatha uSeture unyana kaMikayeli; 14 kwisizwe sakwaNafetali, wathatha uNabhi unyana kaVofesi; 15 kwisizwe sakwaGadi, wathatha uGewuweli unyana kaMaki. 16 Lawo ke ngamagama amadoda awathunywa nguMoses ukuba ayokuhlola ilizwe. Yaye uMoses wathiya uHosheya unyana kaNun ngokuba nguYoshuwa.*+

17 Xa uMoses wayewathuma ukuba ayokuhlola ilizwe lakwaKanan, wathi kuwo: “Yiyani eNegebhi, nize ninyuke niye kummandla weentaba.+ 18 Nize nijonge ukuba linjani elo lizwe,+ nijonge ukuba abantu bakhona bomelele okanye abanamandla na, baninzi okanye bambalwa na, 19 nijonge ukuba ilizwe lihle okanye libi na, nokuba bahlala ezintenteni na okanye kwizixeko ezikhuselekileyo. 20 Nize nijonge ukuba elo lizwe lichumile* okanye alichumanga na,+ nokuba linemithi okanye alinayo na. Yibani nesibindi,+ nisiphathele iziqhamo zelo lizwe.” Ngelo xesha zazisele zivuthiwe iidiliya zokuqala.+

21 Enyuka ke la madoda alihlola ilizwe, aqala kwintlango yaseTsin+ ayokutsho eRehobhi+ ngaseLebho-hamati.*+ 22 Aya eNegebhi aza adlulela eHebron,+ apho kwakuhlala uAhiman, uSheshayi noTalemayi,+ ama-Anaki.+ IHebron yayakhiwe kwiminyaka esixhenxe ngaphambi kokuba kwakhiwe iTsowan yaseYiputa. 23 Xa efika kwiNtlambo YakwaEshkoli,+ anqumla isebe elalinesihlahla seediliya, lathwalwa ngepali ngamadoda amabini. Eza nazo neerharnati namafiya.*+ 24 AmaSirayeli ayibiza loo ndawo ngokuba yiNtlambo Yase-Eshkoli,*+ kuba asinqumla apho isihlahla seediliya.

25 Zathi zakuphela iintsuku eziyi-40,+ loo madoda abuya ekuhloleni ilizwe. 26 Afika kuMoses nakuAron nakwibandla lonke lamaSirayeli entlango yaseParan, eKadeshe.+ Abalisela lonke ibandla ngelo lizwe aza alibonisa neziqhamo zalo. 27 Ambalisela uMoses athi: “Singenile kwela lizwe ubusithume kulo. Nyhani ligcwele ubisi nobusi,+ nazi neziqhamo zalo.+ 28 Kodwa ke, abantu abahlala kulo bomelele kakhulu, nezixeko zabo zikhuseleke ngeyona ndlela; futhi sibone nama-Anaki phaya.+ 29 Ama-Amaleki+ ahlala kwilizwe laseNegebhi,+ wona amaHiti, amaYebhusi+ nama-Amori+ ahlala kwimimandla yeentaba. AmaKanan+ ahlala ngaselwandle+ nangakwiYordan.”

30 Emva koko uKalebhi wazama ukubazolisa abantu ababephambi koMoses, esithi: “Masikhawulezeni sinyuke, ngokuqinisekileyo siza kulithatha ela lizwe, kuba sinako ukuloyisa.”+ 31 Kodwa amadoda awayehambe naye athi: “Asinakukwazi ukuya kulwa naba bantu, kuba bomelele kakhulu kunathi.”+ 32 Kwaye aqhubeka ethetha izinto ezimbi kumaSirayeli+ ngelizwe ayeye kulihlola, esithi: “Ilizwe ebesiyokulihlola, lilizwe elibaqwenga libagqibe abemi balo; yaye bonke abantu esibabonileyo phaya zizigantsontso ezingaqhelekanga.+ 33 Sibone nezigebenga,* oonyana baka-Anaki,+ inzala yeeNefili yaye xa sithelekisa, thina sifana neentethe kuzo.”

14 Emva koko ibandla lonke lenza isijwili, abantu bakhala ubusuku bonke.+ 2 Onke amaSirayeli akhalaza, egxeka uMoses noAron,+ esithi: “Akwaba sasifele eYiputa, okanye sivele sifele kule ntlango! 3 Kutheni uYehova esizise kweli lizwe ukuze sibulawe ngekrele?+ Abafazi nabantwana bethu baza koxuthwa.+ Akungconwanga sibuyele eYiputa ke?”+ 4 Axelelana le nto: “Masizikhetheleni umntu oza kusikhokela, sibuyeleni eYiputa!”+

5 Athi akutsho, uMoses noAron baqubuda emhlabeni, lonke ibandla lamaSirayeli libukele. 6 UYoshuwa+ unyana kaNun noKalebhi+ unyana kaYefune, ababeyokuhlola ilizwe, bazikrazula iimpahla zabo, 7 baza bathi kulo lonke ibandla lamaSirayeli: “Ilizwe ebesiye kulihlola, lilizwe elihle kakhulu.+ 8 Ukuba uYehova uyakholwa sithi, nakanjani uza kusisa kwela lizwe ligcwele ubisi nobusi, asinike lona.+ 9 Kufuneka nje ningamjikeli uYehova, yaye sanukuboyika abantu bela lizwe+ kuba siza kubathi nqwam nqwam.* Akukho nto ibakhuselayo ibe uYehova ukunye nathi,+ sanukuboyika.”

10 Kodwa ke, lonke ibandla lalizimisele ukubabetha ngamatye.+ Kwasuka kwabonakala uzuko lukaYehova ententeni yokuhlangana, lwabonwa ngabo bonke abantu bakwaSirayeli.+

11 Emva koko uYehova wathi kuMoses: “Kuza kude kube nini aba bantu bendidelela?+ Kuza kude kube nini bengakholwa kum nangona ndibenzela imimangaliso* emininzi kangaka?+ 12 Ngoku ndicinga ukubabetha ngesifo esingubhubhani, ndibatshabalalise, ndize wena ndikwenze uhlanga olukhulu nolunamandla kunabo.”+

13 Kodwa uMoses wathi kuYehova: “Laa maYiputa owabakhupha kuwo abantu bakho ngamandla akho, aza kuyiva loo nto,+ 14 aze athethe ngayo nabemi beli lizwe. Nabo sebevile ukuba uphakathi kwamaSirayeli+ yaye aye akubona wena Yehova ngamehlo awo.+ UnguYehova, ilifu lakho liphezu kwawo, kwaye emini uwakhokela uselifini, uze ebusuku uwakhokele usemlilweni.+ 15 Ukuba ubabulala bonke aba bantu, nakanjani iintlanga eziluvileyo udumo lwakho ziza kuthi: 16 ‘UYehova uye wohluleka ukubangenisa kwilizwe ebebafungele ukuba uza kubanika lona, yiyo loo nto ebabulalele entlango.’+ 17 Ndiyakucela Yehova, wenze acace ukuba makhulu amandla akho njengokuba wathembisayo xa wathi: 18 ‘UYehova ongakhawuleziyo ukucaphuka, ophuphuma luthando olungagungqiyo,+ oxolela isono nesiphoso, kodwa ongasoze angamohlwayi umntu owonileyo. Wohlwaya oonyana ngenxa yesono sootata babo, wohlwaya nesizukulwana sesithathu nesesine.’+ 19 Ndiyakucela ubaxolele aba bantu kuba unothando olungagungqiyo, njengokuba ubusoloko ubaxolela ukususela eYiputa kude kube ngoku.”+

20 Emva koko uYehova wathi: “Xa usitsho ke, ndiyabaxolela.+ 21 Kodwa ke ndiphila nje, wonke umhlaba uza kugcwaliswa luzuko lukaYehova.+ 22 Kodwa bonke abantu abalubonayo uzuko lwam nemimangaliso*+ endayenza eYiputa nasentlango, sekunjalo baqhubeka bendidelela+ kwada kwakalishumi, bengalimameli ilizwi lam,+ 23 soze balibone ilizwe endalifungela ootata babo. Nangoku, akukho nomnye kwabo bandidelelayo oza kulibona.+ 24 Kodwa ngenxa yokuba uKalebhi+ isicaka sam eye wohluka kwabanye waza waqhubeka endilandela ngentliziyo yakhe yonke, nakanjani na ndiza kumsa kwilizwe ebeyokulihlola, ize inzala yakhe ihlale kulo.+ 25 Ngenxa yokuba ama-Amaleki namaKanan+ ehlala entlanjeni,* ngomso phindelani entlango nihambe ngendlela egqitha kuLwandle Olubomvu.”+

26 Emva koko uYehova wathi kuMoses noAron: 27 “Kuza kude kube nini eli bandla labenzi bubi lindikhalazela?+ Ndiyivile indlela amaSirayeli andikhalazela ngayo.+ 28 Uze uthi kuwo, ‘uYehova uthi: “Ndiphila nje, yonke laa nto beniyithetha, ndiza kuyenza!+ 29 Niza kufela kule ntlango.+ Wonke umntu owabhaliswayo eneminyaka eyi-20 ukuya phezulu, uza kufela kule ntlango, nonke nina baye bandikhalazela.+ 30 Akukho nomnye kuni oza kungena kwilizwe endafungayo ukuba niza kuhlala kulo,+ ngaphandle kukaKalebhi unyana kaYefune noYoshuwa unyana kaNun.+

31 “‘“Abantwana benu ebenisithi baza kuxuthwa,+ ngabo abaza kungena, balazi ilizwe eniye analifuna.+ 32 Kodwa nina niza kufela kule ntlango. 33 Oonyana benu baza kuba ngabelusi entlango iminyaka eyi-40,+ yaye baza kuva ubunzima ngenxa yokungathembeki kwenu, nide nife nonke.+ 34 Ekubeni ilizwe nalihlola ngeentsuku eziyi-40,+ usuku luza kumela unyaka, usuku lumele unyaka. Ngoko leyo yiminyaka eniza kuva ngayo ubunzima ngenxa yezono zenu, iminyaka eyi-40,+ nitsho nazi ukuba kwenzeka ntoni kumntu olwa nam.*

35 “‘“Mna Yehova ndikuthethile oku. Nantsi into endiza kuyenza kweli bandla labenzi-bubi abaye baqokelelana, bendikhalazela. Baza kuphelela kule ntlango, bafele kuyo.+ 36 Amadoda awayethunywe nguMoses ukuba ayokuhlola ilizwe, aza abuya abangela lonke ibandla ukuba limkhalazele ngenxa yezinto ezimbi awazithethayo ngelo lizwe,+ 37 loo madoda athetha izinto ezimbi ngelo lizwe, uYehova uza kuwabulala ngesibetho.+ 38 Kodwa uYoshuwa unyana kaNun noKalebhi unyana kaYefune, ababehamba nabo babeyokuhlola ilizwe, bona abazukufa.”’”+

39 Uthe uMoses akuthetha la mazwi kuwo onke amaSirayeli, abantu benza isijwili esikhulu. 40 Ngaphezu koko, bavuka ekuseni bazama ukunyuka intaba besithi: “Sonile, kodwa ke ngoku sikulungele ukunyuka siye kulaa ndawo uYehova wayethethe ngayo.”+ 41 Kodwa uMoses wathi: “Kutheni nigqitha ngapha kwento uYehova ayithethileyo? Ayizukuphumelela le nto niyenzayo. 42 Sanukunyuka kuba uYehova akahambi nani; yaye niza koyiswa ziintshaba zenu.+ 43 Ama-Amaleki namaKanan anilindile,+ aza kunibulala ngekrele. UYehova akazukuba kunye nani, kuba niye nayeka ukumlandela uYehova.”+

44 Sekunjalo, benyuka ngenkani+ kodwa ke ityeya yesivumelwano kaYehova ayizange imke enkampini, noMoses akazange emke.+ 45 Ngoko ama-Amaleki namaKanan awayehlala kuloo ntaba, ehla, abaxabela bathi saa bada bayokufika eHor­ma.+

15 UYehova waqhubeka wathi kuMoses: 2 “Yithi kumaSirayeli, ‘Xa nifika kwilizwe endininika lona ukuba nihlale kulo,+ 3 yaye nisenzela uYehova umnikelo wasemlilweni eniwuthatha kumhlambi weenkomo okanye weegusha, nokuba ngumnikelo otshiswayo+ okanye umbingelelo wokwenza isifungo, umnikelo wokuzithandela+ okanye umnikelo eniwenza ngamaxesha amatheko,+ yonke niyenzela ukuba ibe livumba elimnandi* kuYehova,+ 4 loo mntu unikelayo makanikele kuYehova nangomnikelo wokutya ongumgubo ocoliweyo,+ osisahlulo esinye kwezilishumi se-efa,* esixutywe nekota yehin* yeoli. 5 Xa esenza umnikelo otshiswayo+ okanye umbingelelo olitakane legusha eliyinkunzi, umele enze nomnikelo oselwayo wewayini eyikota yehin. 6 Okanye ukuba uza kunikela ngenkunzi yegusha, ufanele ayinikele nomnikelo wokutya ozizahlulo ezibini kwezilishumi ze-efa yomgubo ocoliweyo, oxutywe nesahlulo esinye kwezithathu zehin yeoli. 7 Loo mntu ufanele enze umnikelo oselwayo ngewayini esisahlulo esinye kwezithathu zehin, ube livumba elimnandi* kuYehova.

8 “‘Kodwa ukuba wenza umnikelo otshiswayo ngenkunzi yenkomo+ okanye umbingelelo wesibhambathiso esikhethekileyo+ okanye imibingelelo yobuhlobo kuYehova,+ 9 umele awunikele nomnikelo wokutya+ ozizahlulo ezithathu kwezilishumi zomgubo ocoliweyo, oxutywe nehafu yehin yeoli. 10 Ufanele enze nomnikelo oselwayo+ ngewayini eyihafu yehin, ube ngumnikelo otshiswayo olivumba elimnandi* kuYehova. 11 Yiloo nto efanele yenziwe xa kunikelwa ngenkunzi yenkomo okanye ngenkunzi yegusha okanye ngetakane legusha eliyinkunzi okanye ngebhokhwe. 12 Nokuba ninikela ngezilwanyana ezingaphi, yenzani loo nto kwisilwanyana ngasinye, ngokwenani lazo. 13 Wonke umSirayeli onikela umnikelo otshiswayo olivumba elimnandi* kuYehova, umele awenze ngolo hlobo.

14 “‘Ukuba umntu wasemzini ohlala nani okanye umntu obehlala nani ixesha elide, wenza umnikelo otshiswayo olivumba elimnandi* kuYehova, umele awenze kanye ngendlela nani eniwenza ngayo.+ 15 Kuza kusebenza umthetho omnye kumntu weli bandla nakumntu wasemzini. Loo mthetho uza kuhlala usebenza kuzo zonke izizukulwana zenu. Umntu wasemzini uza kufana nani phambi koYehova.+ 16 Makusebenze umthetho ofanayo nesigwebo esifanayo kuni nakumntu wasemzini ohlala nani.’”

17 UYehova waqhubeka wathi kuMoses: 18 “Yithi kumaSirayeli, ‘Xa nifika kwilizwe endinisa kulo, 19 nize nitye ukutya* kwelo lizwe,+ ­nimele ninikele kuYehova. 20 Nifanele ninikele ngezonka ezirawundi zomgrayo wesivuno sokuqala,+ ngendlela enenza ngayo ngomnikelo osuka kwibala lokubhula. 21 Esinye sesivuno sokuqala esingumgrayo nifanele nisinike uYehova kuzo zonke izizukulwana zenu.

22 “‘Ukuba nenza impazamo yokungayenzi yonke imiyalelo uYehova ayinike uMoses, 23 yonke into uYehova aniyalele yona esebenzisa uMoses, ukususela ngemini awaniyalela ngayo uYehova ukuya phambili, kwizizukulwana zenu, 24 ibe loo nto yenziwe ngempazamo yaye nebandla belingayazi, limele lenze umbingelelo olivumba elimnandi* kuYehova ngethole lenkunzi yenkomo. Loo mnikelo ufanele wenziwe kunye nomnikelo wokutya nomnikelo oselwayo, ngendlela eqhelekileyo,+ kwenziwe nomnikelo wesono ngetakane lebhokhwe.+ 25 Umbingeleli uza kulihlawulela lonke ibandla lamaSirayeli, ibe liza kuxolelwa,+ kuba lenze impazamo, yaye liye lenzela uYehova umnikelo otshiswayo, lenza nomnikelo wesono kuYehova ngenxa yempazamo eliyenzileyo. 26 Lonke ibandla lamaSirayeli nomntu wasemzini ohlala nalo uza kuxolelwa, kuba xa bebonke abantu benze impazamo.

27 “‘Ukuba umntu wone ngempazamo, umele enze umnikelo wesono ngethokazi lebhokhwe elinonyaka.+ 28 Umbingeleli uza kumhlawulela loo mntu wone uYehova ngempazamo, yaye uza kuxolelwa.+ 29 KumSirayeli nakumntu wasemzini ohlala nani owone ngempazamo, kuza kusebenza umthetho omnye.+

30 “‘Kodwa ukuba umntu wona ngabom,+ nokuba ngumSirayeli okanye ngumntu wasemzini, ungcolisa igama likaYehova yaye umele abulawe. 31 Kaloku udelele ilizwi likaYehova yaye waphule umthetho wakhe, ngoko loo mntu umele abulawe nakanjani.+ Nguye onetyala.’”+

32 Xa amaSirayeli ayesesentlango, abhaqa umntu eqokelela iinkuni ngomhla weSabatha.+ 33 Abo bambhaqayo eqokelela iinkuni bamzisa kuMoses noAron nakwibandla lonke. 34 Ngoko bamvalela,+ kuba yayingekachazwa into emayenziwe ngaye.

35 UYehova wathi kuMoses: “Nakanjani loo mntu makabulawe,+ yaye lonke ibandla lifanele limbethe ngamatye ngaphandle kwenkampu.”+ 36 Ngoko lonke ibandla lamkhuphela ngaphandle kwenkampu laza lamgibisela ngamatye wafa, kanye njengokuba uYehova wayeyalele uMoses.

37 UYehova waqhubeka wathi kuMoses: 38 “Yithi kumaSirayeli mawafakele imisonto emazantsi empahla yawo, enze loo nto kuzo zonke izizukulwana zawo. Amele athungele umtya oluhlaza* ngentla kwaloo misonto.+ 39 ‘Nimele nibe nale misonto kwimpahla yenu, ukuze xa niyibona niyikhumbule yonke imiyalelo kaYehova nize niyithobele.+ Animele nilandele iintliziyo zenu namehlo enu, ezinenza nifane nabantu abathengisa ngomzimba.*+ 40 Lo myalelo uza kuninceda niyithobele yonke imiyalelo yam nize nibe ngcwele kuThixo wenu.+ 41 NdinguYehova uThixo wenu, owanikhupha kwilizwe laseYiputa ukuze ndinibonise ukuba ndinguThixo wenu.+ NdinguYehova uThixo wenu.’”+

16 UKora+ unyana kaItsare,+ unyana kaKohati,+ unyana kaLevi,+ wabhunga noDatan noAbhiram oonyana bakaEliyabhi,+ no-Oni unyana kaPelethe, abaphuma kwisizwe sakwaRubhen.+ 2 Bambhunga uMoses bekunye namadoda ayi-250 akwaSirayeli, iinkokheli zebandla, amadoda akhethiweyo ohlanga, amadoda ahloniphekileyo. 3 Baqokelelana bapakanyela+ uMoses noAron besithi kubo: “Sanele nini! Lonke ibandla lingcwele,+ wonke umntu okulo, yaye uYehova ukunye nalo.+ Kutheni ke ngoku nizenza ngcono kunabo bonke abantu bebandla likaYehova?”

4 Wathi uMoses akubeva, ngoko nangoko waqubuda. 5 Emva koko wathi kuKora nakwabo babemxhasa: “Kusasa uYehova uza kusazisa ukuba ngubani owakhe,+ ngubani ongcwele yaye ngubani omele asondele kuye.+ Lowo amkhethileyo+ nguye oza kusondela kuye. 6 Yenzani le nto: Wena Kora nabaxhasi bakho,+ thathani izitya zomlilo,+ 7 nizifake umlilo nesiqhumiso esiqholiweyo phambi koYehova ngomso, yaye loo mntu uYehova amkhethileyo+ nguye ongcwele. Nixakile ngoku bonyana bakaLevi!”+

8 Emva koko uMoses wathi kuKora: “Khanimamele bonyana bakaLevi. 9 Niyijongela phantsi na into yokuba uThixo kaSirayeli enikhethile kwibandla likaSirayeli+ waza wanivumela ukuba nisondele kuye ukuze nisebenze ententeni engcwele kaYehova, nime phambi kwebandla nize nililungiselele,+ 10 nokuba eye wanisondeza kuye kunye nabo bonke abantakwenu, oonyana bakaLevi? Ngoku nifuna nokuba ngababingeleli?+ 11 Ngoko, wena nabo bonke abaxhasi bakho abahlanganiseneyo nilwa noYehova. Xa engubani uAron ukuba ningade nimkhalazele?”+

12 Ethubeni uMoses wathi makubizwe uDatan noAbhiram+ oonyana bakaEliyabhi, kodwa bathi: “Asiy’ apho thina! 13 Ayanelanga na into yokuba usikhuphe kwilizwe eligcwele ubisi nobusi ukuze uzokusibulalela kule ntlango?+ Ngoku ufuna nokusilawula?* 14 Awukasingenisi nakwela lizwe ligcwele ubisi nobusi,+ yaye awusinikanga masimi okanye amasimi eediliya ukuba abe lilifa lethu. Ufuna loo madoda akulandele ngathi aziimfama?* Asiy’ apho thina!”

15 UMoses wacaphuka kakhulu waza wathi ­kuYehova: “Uze ungawuhoyi umnikelo wabo wokutya. Andithathanga nedonki le kubo, yaye akukho nomnye kubo endimlimazileyo.”+

16 Emva koko uMoses wathi kuKora: “Wena nabo bonke abakuxhasayo nize nime phambi koYehova ngomso, wena, nabo noAron. 17 Nonke nize nithathe izitya zomlilo nizifake isiqhumiso esiqholiweyo, yaye ngamnye uza kuma nesitya sakhe somlilo phambi koYehova, izitya eziyi-250. Nawe noAron niza kube niphethe ezenu.” 18 Bonke bathatha izitya zomlilo, bazifaka umlilo nesiqhumiso esiqholiweyo baza bema phambi komnyango wentente yokuhlangana, bema kunye noMoses noAron. 19 Akugqiba uKora ukuqokelela bonke abaxhasi bakhe,+ beze kugagana noMoses noAron kumnyango wentente yokuhlangana, uzuko lukaYehova lwabonakala kulo lonke ibandla.+

20 UYehova wathi kuMoses noAron: 21 “Sukani kwaba bantu ukuze ndibatshabalalise ngokukhawuleza.”+ 22 Ngokukhawuleza baqubuda emhlabeni, bathi: “Owu Thixo, wena unika bonke abantu ubomi,+ ngaba isono somntu omnye singenza ucatshukiswe lilo lonke ibandla?”+

23 Ngoko uYehova wathi kuMoses: 24 “Yithi kulo lonke ibandla, ‘Sukani ezintenteni zikaKora, noDatan noAbhiram!’”+

25 Emva koko uMoses waya kuDatan noAbhiram, ehamba nabadala+ bakwaSirayeli. 26 Wathi kwibandla: “Ndicela nisuke ezintenteni zala madoda enza ububi, ningaphathi kwanto yawo, ukuze ningatshatyalaliswa nawo ngenxa yezono zawo.” 27 Basuka ngokukhawuleza macala onke kwiintente zikaKora, noDatan noAbhiram, ibe uDatan noAbhiram, baphuma baza bema nabafazi babo, oonyana babo nabantwana babo abancinci kwiminyango yeentente zabo.

28 Emva koko uMoses wathi: “Nantsi into eniza kubona ngayo ukuba nguYehova ondithume ukuba ndenze ezi zinto, ibe andenzi kuthanda kwam:* 29 Ukuba aba bantu baye bafa ngendlela eqhelekileyo, okanye bohlwaywa ngendlela abaqhele ukohlwaywa ngayo bonke abanye abantu, uYehova akandithumanga ke.+ 30 Kodwa ukuba uYehova wenze into engaqhelekanga, wavula umhlaba ukuze ubaginye bona nazo zonke izinto zabo, baye engcwabeni* bephila, niza kutsho nazi ngokuqinisekileyo ukuba la madoda aye amdelela uYehova.”

31 Wathi akugqiba ukuthetha, umhlaba awayemi kuwo la madoda wavuleka.+ 32 Wavuleka umhlaba waza wabaginya, bona kunye neentsapho zabo, nabo bonke abantu bendlu kaKora+ nazo zonke izinto zabo. 33 Ngoko bona nabo bonke ababengabendlu yabo, behlela engcwabeni* waza umhlaba wabagqumelela, batshabalala.+ 34 Onke amaSirayeli awayekufutshane nabo abaleka akubeva bekhala, kuba ayesithi: “Soyika ukuginywa ngumhlaba nathi!” 35 Emva koko uYehova wathumela umlilo,+ wawatshabalalisa amadoda ayi-250 awayeqhumisa isiqhumiso esiqholiweyo.+

36 UYehova wathi kuMoses: 37 “Yithi kuEleyazare unyana ka-Aron umbingeleli makakhuphe izitya zomlilo+ emlilweni kuba zingcwele. Mxelele nokuba ayokuwachitha kude amalahle avuthayo akuzo. 38 Izitya zomlilo zamadoda aye abulawa ngenxa yesono sawo mazikhandwe zenziwe iinkcenkce zokogquma isibingelelo,+ kuba baye bazisondeza kuYehova zatsho zangcwele. Ziza kuba sisilumkiso kumaSirayeli.”+ 39 Ngoko uEleyazare umbingeleli wazithatha izitya zomlilo zekopolo ebezisondezwe ngabo baye batshiswa, waza wazikhanda, woleka ngazo isibingelelo, 40 kanye ngendlela uYehova awayemyalele ngayo uMoses. Le nto yaba sisikhumbuzo kumaSirayeli sokuba akukho mntu umele asondele aze atshisele uYehova isiqhumiso esiqholiweyo+ enganikwanga mvume yokwenza loo nto,* yaye engaphumi kwinzala ka-Aron, ukuze kungabikho mntu uba njengoKora nabaxhasi bakhe.+

41 Ngosuku nje olulandelayo, lonke ibandla lamaSirayeli lamkhalazela uMoses noAron+ lisithi: “Nina nibabulele abantu bakaYehova.” 42 Emva kokuba ibandla liqokelelene likhalazela uMoses noAron, bajika bonke bajonga ententeni yokuhlangana baza babona ilifu liyogqumile, kwatsho kwabonakala uzuko lukaYehova.+

43 UMoses noAron baya phambi kwentente yokuhlangana,+ 44 waza uYehova wathi kuMoses: 45 “Sukani kwaba bantu ukuze ndibatshabalalise ngokukhawuleza.”+ Ngoko nangoko baqubuda emhlabeni.+ 46 Emva koko uMoses wathi kuAron: “Thatha isitya somlilo, ufake kuso umlilo owuthathe esibingelelweni,+ ufake nesiqhumiso esiqholiweyo, ukhawuleze uye ebandleni, ulihlawulele kuThixo+ kuba le nto imcaphukisile uYehova. Siqalile isibetho!” 47 Ngoko nangoko, uAron wasithatha isitya somlilo kanye njengokuba uMoses wayetshilo, wabaleka waya ebandleni; uthe akufika wabona ukuba isibetho sele siqalile. Ngoko wafaka isiqhumiso esiqholiweyo waza wabahlawulela. 48 Waqhubeka emile phakathi kwabafileyo nabasaphilayo, saza ekugqibeleni sayeka isibetho. 49 Abantu ababulawa sisibetho baba yi-14 700, ngaphandle kwabafayo ngenxa kaKora. 50 Wathi uAron ebuyela kuMoses kumnyango wentente yokuhlangana, sabe isibetho sesiyekile.

17 UYehova wathi kuMoses: 2 “Thetha namaSirayeli uze uthathe intonga ibe nye kwinkosi yesizwe ngasinye,+ iintonga eziyi-12 xa ziphelele, uze ubhale igama lenkosi nganye kwintonga nganye. 3 Kwintonga yakwaLevi bhala igama lika-Aron, kuba inye intonga yentloko yesizwe ngasinye. 4 Uze uzibeke ententeni yokuhlangana phambi kwetyeya yoBungqina,+ apho ndidla ngokubonakala khona kuwe.+ 5 Intonga yendoda endiyikhethileyo+ iza kudubula iintyatyambo, ndiwenze ayeke ukukhalazela mna+ kunye nani+ amaSirayeli.”

6 Ngoko uMoses wathetha namaSirayeli zaza iinkosi zamnika iintonga zazo eziyi-12, inkosi yesizwe ngasinye yamnika intonga, nentonga ka-Aron yayilapho. 7 Emva koko uMoses wazibeka phambi koYehova ententeni yoBungqina ezo ntonga.

8 Ngosuku olulandelayo xa uMoses wayengena ententeni yoBungqina, tyhini! nantso intonga ka-Aron wendlu yabaLevi idubule inazo neeamangile ezivuthiweyo. 9 Emva koko uMoses wazithatha ezo ntonga phambi koYehova, waya nazo kumaSirayeli. Azijonga, emva koko mntu ngamnye wathatha intonga yakhe.

10 Emva koko uYehova wathi kuMoses: “Buyisela intonga ka-Aron+ phambi kwetyeya yoBungqina, igcinwe ibe sisilumkiso+ kwabo bangathobeliyo,+ baze bayeke ukundikhalazela, ukuze bangafi.” 11 UMoses zange alibazise, wenza kanye ngendlela uYehova awayemyalele ngayo. Wenza kanye loo nto.

12 Emva koko amaSirayeli athi kuMoses: “Ngoku siza kufa, siza kutshabalala, siza kutshabalala sonke! 13 Wonke umntu osondelayo kwintente engcwele kaYehova uza kufa!+ Ngaba siza kufa ngaloo ndlela na?”+

18 UYehova wathi kuAron: “Wena, oonyana bakho nenzala yakho, nini abaza kuba netyala layo nantoni na eyenzeka kwingcwele,+ yaye nguwe noonyana bakho abaza kuba netyala layo nantoni na engafanelekanga eyenziwa ngababingeleli.+ 2 Uze usondeze nabantakwenu abangabaLevi, isizwe sikatata wakho, ukuze babe kunye nawe, bakuncedise+ wena noonyana bakho phambi kwentente yoBungqina.+ 3 Bamele benze imisebenzi obanika yona nayo yonke imisebenzi eyenziwa ententeni.+ Kodwa ke mabangasondeli kwizinto zendawo engcwele nasesibingelelweni, ukuze bangafi, nani ningafi.+ 4 Baza kuba kunye nawe, benze imisebenzi yabo yasententeni, yonke nje imisebenzi yasententeni, yaye akukho mntu unganikwanga mvume* umele asondele kuni.+ 5 Nimele niyenze yonke imisebenzi yendawo engcwele+ neyesibingelelo,+ ukuze ndingaphindi ndicaphuke+ ngenxa yabantu bakwaSirayeli. 6 Phakathi kwamaSirayeli ndiye ndathatha abantakwenu, abaLevi ukuze babe sisipho kuni.+ Banikelwe kuYehova ukuze basebenze ententeni yokuhlangana.+ 7 Wena noonyana bakho niza kwenza imisebenzi yababingeleli esibingelelweni nangaphaya kwekhethini,+ ibe lowo iza kuba ngumsebenzi wenu.+ Ndininike lo msebenzi wababingeleli ukuze ube sisipho kuni, yaye nawuphi na umntu osondelayo, enganikwanga mvume* ufanele abulawe.”+

8 UYehova waqhubeka wathi kuAron: “Ndikubeka ukuba ujonge yonke iminikelo enikwa mna.+ Ezinye izinto ezingcwele ezinikelwa ngamaSirayeli, ndizinike wena noonyana bakho, ibe ziza kuhlala zizezenu.+ 9 Nazi izinto eziza kuba zezakho kwezona zinto zingcwele eziyiminikelo etshiswayo: yonke iminikelo abayizisayo, equka iminikelo yokutya,+ iminikelo yabo yesono+ neminikelo yetyala,+ abayizisa kum. Le minikelo iza kuba yeyona nto ingcwele kuwe nakoonyana bakho. 10 Nimele niyityele kweyona ndawo ingcwele.+ Imele ityiwe ngawo onke amadoda. Mayibe yinto engcwele kuni.+ 11 Nazi ezinye izinto eziza kuba zezakho: izipho abazinikelayo+ nayo yonke iminikelo etshangatshangiswayo+ yamaSirayeli. Ndizinika wena noonyana bakho neentombi zakho, yaye ziza kuhlala zizezenu.+ Zimele zityiwe ngabo bonke abantu abacocekileyo endlini yakho.+

12 “Ndisinika wena sonke isivuno sabo sokuqala+ abasinikela kuYehova, esisesi: eyona oli yabo intle, iwayini yabo entsha eyeyona ilungileyo nokutya okuziinkozo.+ 13 Zonke izinto abazivune kuqala elizweni labo, abazizisa kuYehova, ziza kuba zezakho.+ Zimele zityiwe ngabo bonke abantu abacocekileyo abasendlini yakho.

14 “Yonke into enikelweyo* kwaSirayeli iza kuba yeyakho.+

15 “Izibulo layo yonke into ephilayo+ elinikelwa kuYehova, nokuba lelomntu okanye lelesilwanyana, liza kuba lelakho. Kodwa ke, nakanjani na umele ulikhulule+ izibulo lomntu+ nezibulo lesilwanyana esingacocekanga. 16 Ufanele ulikhulule ngemali yokulikhulula xa linenyanga ukuya phezulu, ulihlawulele ngeeshekele* ezintlanu zesilivere,+ ngokweshekele yendawo engcwele.* Ishekele ziigera* eziyi-20. 17 Uze ungalikhululi lona izibulo lenkomo eliyinkunzi okanye izibulo elilitakane legusha eliyinkunzi okanye izibulo lebhokhwe,+ kuba angcwele. Igazi lawo ufanele ulifefe esibingelelweni,+ wona amanqatha awo uqhumise ngawo, abe ngumnikelo otshiswayo olivumba elimnandi* kuYehova.+ 18 Inyama yawo iza kuba yeyakho, njengokuba iyeyakho inyama yesifuba* nomlenze wasekunene womnikelo otshangatshangiswayo.+ 19 Yonke iminikelo engcwele, amaSirayeli aza kuyinika uYehova,+ ndiyinika wena noonyana bakho neentombi zakho, ibe iza kuhlala iyeyenu.+ Esi sisivumelwano esiza kuhlala sihleli* uYehova asenza nawe nenzala yakho.”

20 UYehova waqhubeka wathi kuAron: “Awuzukuba nalo ilifa elizweni lamaSirayeli, yaye awuzukusikelwa mhlaba kulo.+ Elakho ilifa phakathi kwamaSirayeli ndim.+

21 “Uyabona, ndinike abaLevi zonke izishumi+ zamaSirayeli ukuba zibe lilifa labo ngenxa yomsebenzi abawenzayo, umsebenzi wasententeni yokuhlangana. 22 Abantu bakwaSirayeli abamele baphinde basondele ententeni yokuhlangana, kungenjalo baza kuba nesono baze bafe. 23 NgabaLevi abaza kusebenza ententeni yokuhlangana, ngabo abaza kuthwala ityala lamaSirayeli.+ Kuzo zonke izizukulwana zenu, abaLevi abafanelanga babe nalifa phakathi kwamaSirayeli.+ Lowo iza kuba ngumthetho oza kuhlala uhleli kuzo zonke izizukulwana zenu. 24 Kuba ilifa endilinike abaLevi zizishumi eziza kunikelwa ngabantu bakwaSirayeli, abaza kuzinikela kuYehova. Yiloo nto ndithe kubo, ‘Abamele babe nelifa phakathi kwamaSirayeli.’”+

25 Emva koko uYehova wathi kuMoses: 26 “Yithi kubaLevi, ‘AmaSirayeli aza kuninika izishumi eziza kuba lilifa lenu,+ yaye kuzo nimele ninikele izishumi kuYehova.+ 27 Yaye lowo iza kuba ngumnikelo wenu, ofana nokutya okuziinkozo okuvela kwibala lokubhula,+ okanye iwayini eninzi okanye ioli eninzi, ezisuka kwiindawo ezixovulwa kuzo. 28 Ngale ndlela nani niza kutsho nikwazi ukunikela kuYehova nithatha kuzo zonke izishumi enizifumana kumaSirayeli. Nimele nizinike uAron umbingeleli izinto enizinikela kuYehova. 29 Kwezi zipho zingcwele nizifumeneyo, nize nikhethe ezona zihle, kwenzelwe uYehova lonke uhlobo lweminikelo.’+

30 “Uze uthi kubo, ‘Xa abaLevi benikela ngezona zipho zihle kuza kufana nokuba banikela ngesivuno esivela kwibala lokubhula nangewayini okanye ioli, ezivela kwindawo ezixovulwa kuyo. 31 Nina neentsapho zenu ningazityela naphi na ezishiyekileyo, kuba nibhatalwa ngazo ngenxa yomsebenzi eniwenza ententeni yokuhlangana.+ 32 Anizukuba nasono ukuba nje ninikela ngezona zilungileyo kuzo, yaye nimele ningazisebenzisi kakubi izinto ezingcwele ezivela kumaSirayeli, kungenjalo niza kufa.’”+

19 UYehova waphinda wathi kuMoses noAron: 2 “Nanku umthetho awukhuphileyo uYehova, ‘Xelelani amaSirayeli ukuba anizisele inkomo ebomvu ephilileyo, engenasiphene,+ nengazange yafakwa dyokhweni. 3 Nize niyinike uEleyazare umbingeleli, ayise ngaphandle kwenkampu, ize ixhelwe phambi kwakhe. 4 Emva koko uEleyazare umbingeleli uza kuthatha elinye igazi layo, athi nkxu umnwe wakhe kulo, aze afefe ngalo kasixhenxe ejongise ententeni yokuhlangana.+ 5 Emva koko loo nkomo iza kutshiswa phambi kwakhe. Kuza kutshiswa isikhumba sayo, inyama yayo, igazi layo nobulongwe bayo.+ 6 Emva koko umbingeleli uza kuthatha umsedare, ihisope+ noboya obubomvu krwe, aze aziphose ezo zinto kuloo mlilo itshiswa kuwo inkomo. 7 Akugqiba umbingeleli makahlambe aze ahlambe neempahla zakhe, emva koko angangena enkampini; kodwa ke akazukucoceka de kuhlwe.

8 “‘Umntu obetshisa loo nkomo makahlambe aze ahlambe neempahla zakhe, ibe akazukucoceka de kuhlwe.

9 “‘Indoda ecocekileyo mayiluwole uthuthu lwaloo nkomo,+ ilugalele endaweni ecocekileyo ngaphandle kwenkampu, luze lugcinwe libandla lamaSirayeli ukuze kwenziwe amanzi okucoca.+ Lowo ngumnikelo wesono. 10 Loo mntu uwola uthuthu lwenkomo umele ahlambe iimpahla zakhe yaye akazukucoceka de kuhlwe.

“‘Lowo iza kuba ngumthetho oza kuhlala ulawula amaSirayeli nabantu basemzini abahlala nani.+ 11 Nabani na ochukumisa umntu ofileyo uza kuhlala engacocekanga iintsuku ezisixhenxe.+ 12 Loo mntu ufanele azicoce ngamanzi okucoca ngosuku lwesithathu, yaye uza kucoceka ngosuku lwesixhenxe. Kodwa ukuba akazicoci ngosuku lwesithathu, akazukucoceka ngosuku lwesixhenxe. 13 Wonke umntu ochukumisa umntu ofileyo, aze angazicoci ngamanzi okucoca, uyingcolisile intente engcwele kaYehova,+ yaye ufanele abulawe.+ Ngenxa yokuba engafefwanga ngamanzi okucoca,+ akacocekanga yaye uza kuhlala engacocekanga.

14 “‘Nanku umthetho oza kusebenza xa kuye kwafela umntu ententeni: Bonke abantu abangena kuloo ntente nabasele bengaphakathi, abazukucoceka iintsuku ezisixhenxe. 15 Zonke izitya ezineziciko ezingavalisiswanga* azicocekanga.+ 16 Wonke umntu ongaphandle ochukumisa umntu obulewe ngekrele, isidumbu somntu ozifeleyo, ithambo lomntu okanye ingcwaba, akazukucoceka iintsuku ezisixhenxe.+ 17 Bamele bamcuntsulele kuthuthu lwala mnikelo wesono obutshisiwe, balufake esityeni baze bagalele amanzi asandula ukukhiwa. 18 Emva koko umntu ococekileyo+ uza kuthatha ihisope,+ ayithi nkxu emanzini aze atshize intente, zonke izitya ezingacocekanga, abantu abebelapho nomntu obechukumise ithambo okanye umntu obuleweyo okanye isidumbu somntu ozifeleyo okanye ingcwaba. 19 Lo mntu ucocekileyo uza kutshiza lowo ungacocekanga ngosuku lwesithathu nangosuku lwesixhenxe, atsho acoceke ngosuku lwesixhenxe.+ Lowo ungacocekanga umele ahlambe aze ahlambe neempahla zakhe, yaye uza kucoceka ngokuhlwa.

20 “‘Kodwa umntu ongacocekanga waza akafuna ukuzicoca, umele abulawe+ kuba ungcolise indawo engcwele kaYehova. Ngenxa yokuba engafefwanga ngamanzi okucoca, akacocekanga.

21 “‘Nanku umthetho ekuza kufuneka bahlale bewuthobela: Umntu otshiza ngamanzi okucoca+ ufanele ahlambe iimpahla zakhe, nalowo uchukumisa amanzi okucoca, akazukucoceka de kuhlwe. 22 Kwanto echukunyiswe ngumntu ongacocekanga ayizukucoceka, nomntu ochukumise loo nto akazukucoceka de kuhlwe.’”+

20 Ngenyanga yokuqala, lonke ibandla lamaSirayeli lafika entlango yaseTsin, baza abantu bahlala eKadeshe.+ UMiriyam+ wafela apho waza wangcwatyelwa khona.

2 Ibandla lalingenamanzi okusela,+ ngoko laqokelelana laza lakhalazela uMoses noAron. 3 Abantu baxabana noMoses+ besithi: “Nokuba nathi sasife nabantakwethu phambi koYehova! 4 Kutheni nizise ibandla likaYehova kule ntlango ukuze thina nemfuyo yethu sizokufela apha?+ 5 Yaye nisikhupheleni eYiputa nasizisa kule ndawo imbi kangaka?+ Ayityaleki, akukho mafiya,* zidiliya nazirharnati, akukho namanzi la okusela.”+ 6 UMoses noAron bemka phambi kwebandla, baya emnyangweni wentente yokuhlangana, baqubuda emhlabeni, baza babona uzuko lukaYehova.+

7 Emva koko uYehova wathi kuMoses: 8 “Thatha intonga uze wena noAron umntakwenu nibize ibandla, nithethe neliwa libukele ibandla ukuze likhuphe amanzi. Kuza kuphuma amanzi kwelo liwa, baze abantu nemfuyo yabo basele.”+

9 Ngoko uMoses wayithatha intonga phambi koYehova,+ kanye njengokuba wayemyalele. 10 Emva koko uMoses noAron babizela ibandla phambi kweliwa, waza uMoses wathi kulo: “Mamelani apha baqhankqalazindini! Nifuna sinikhuphele amanzi kweli liwa?”+ 11 Emva kokuba etshilo, uMoses waphakamisa isandla sakhe waza walibetha kabini iliwa ngentonga yakhe; kwaphuma amanzi amaninzi, basela abantu nemfuyo yabo.+

12 Emva koko uYehova wathi kuMoses noAron: “Ekubeni niye anabonisa ukuba niyakholwa kum, anandingcwalisa phambi kwabantu bakwaSirayeli, anizukulingenisa eli bandla kwilizwe endiza kulinika lona.”+ 13 Lawo ke ngamanzi aseMeribha,*+ apho amaSirayeli amkhalazela khona uYehova, waza wawabonisa ukuba ungcwele.

14 UMoses wathumela abathunywa eKadeshe kukumkani wakwaEdom,+ ukuba bathi: “Umntakwenu uSirayeli+ uthi, ‘Ubazi kakuhle ubunzima esabufumanayo. 15 Oobawo baya eYiputa,+ sahlala khona iminyaka emininzi,+ yaye amaYiputa asiphatha kakubi thina noobawo.+ 16 Ekugqibeleni sakhalela uYehova,+ wasiva waza wathumela ingelosi+ yasikhupha eYiputa, yaye ngoku silapha eKadeshe, isixeko esikumda welizwe lakho. 17 Sicela ukunqumla elizweni lakho. Asizukuhamba emasimini nokuba ngaweediliya, yaye akukho qula siza kusela amanzi alo. Siza kuhamba kwiNdlela KaKumkani, singayi ekunene okanye ekhohlo de sidlule.’”+

18 Kodwa uEdom wathi kuye: “Ungakhe ulinge unqumle elizweni lethu. Ukuba unqumlile, ndiza kukuhlangabeza ngekrele.” 19 AmaSirayeli amphendula athi: “Siza kuhamba ngohola wendlela, yaye ukuba kukho amanzi akho aselwe sithi nemfuyo yethu siza kuwabhatala.+ Sifuna nje ukunqumla ngeenyawo.”+ 20 Waphinda wala esithi: “Anizukunqumla apha.”+ Emva koko uEdom waphuma ezokumhlasela, enabantu abaninzi nomkhosi owomeleleyo. 21 Ngoko uEdom zange awavumele amaSirayeli anqumle elizweni lakhe; ajika ke amaSirayeli.+

22 Lonke ibandla ­labantu bakwaSirayeli lemka eKadeshe laya eNtabeni YeHore.+ 23 Emva koko uYehova wathetha noMoses noAron eNtabeni YeHore ngakumda welizwe lakwaEdom, wathi: 24 “UAron uza kuhlanganiselwa kubantu bakowabo.*+ Akazukungena kwilizwe endiza kulinika amaSirayeli, kuba nina nobabini zange niwuthobele umyalelo endaninika wona ngamanzi aseMeribha.+ 25 Hamba noAron noEleyazare unyana wakhe ninyuke iNtaba YeHore. 26 Uze umkhulule uAron iimpahla zakhe,+ uzinxibise uEleyazare+ unyana wakhe, yaye uAron uza kufela apho.”

27 UMoses wayenza yonke into awayeyiyalelwe nguYehova, benyuka iNtaba YeHore lonke ibandla libukele. 28 UMoses wamkhulula uAron iimpahla zakhe wazinxibisa uEleyazare unyana wakhe. Emva koko uAron wafela apho phezulu entabeni.+ UMoses noEleyazare behla. 29 Xa lonke ibandla lamaSirayeli labona ukuba uAron ufile, lamlilela iintsuku eziyi-30.+

21 Xa ukumkani waseAradi, ongumKanan,+ owayehlala eNegebhi wevayo ukuba amaSirayeli ayesiza ngendlela yaseAtarim, wawahlasela waza amanye awo wawathimba. 2 Ngoko uSirayeli wafunga kuYehova wathi: “Ukuba aba bantu ubanikela esandleni sam, nakanjani ndiza kuzitshabalalisa izixeko zabo.” 3 UYehova wasiphendula isicelo sakhe, waza wawanikela kuye amaKanan. Watshabalalisa wona nezixeko zawo. Ngoko uSirayeli wayithiya loo ndawo ngokuba yiHorma.*+

4 Xa abantu besuka eNtabeni YeHore+ behamba ngendlela eya kuLwandle Olubomvu, ukuze bajikele ngaphaya kwelizwe lakwaEdom,+ badinwa. 5 Babesamkhalazela uThixo noMoses+ besithi: “Bekutheni ukuze nisikhuphe eYiputa ukuze sizokufela entlango? Akukho kutya, akukho manzi,+ yaye siyasicaphukela nesi sonka senyanyekayo.”+ 6 Ngoko uYehova wathumela iinyoka ezinetyhefu ebantwini, zabaluma, kwaza kwafa amaSirayeli amaninzi.+

7 Abantu baya kuMoses, bathi: “Sonile ngokukhalazela uYehova nawe.+ Sithethelele kuYehova ukuze azisuse ezi nyoka kuthi.” Waza uMoses wabathethelela abantu.+ 8 Emva koko uYehova wathi kuMoses: “Yenza umfanekiso wenyoka enetyhefu uze uyixhome epalini. Umntu otyiwe yinyoka, kuza kufuneka ajonge le ixhonyiweyo ukuze aphile.” 9 Ngoko nangoko uMoses wenza inyoka ngekopolo+ waza wayixhoma epalini.+ Bekusithi xa umntu elunywe yinyoka, aze ajonge inyoka yekopolo, aphile.+

10 Emva koko amaSirayeli emka apho aya kuhlala eObhoti.+ 11 Emka eObhoti aya kuhlala eIye-abharim,+ kwintlango ephambi kwakwaMowabhi, ngasempuma. 12 Ukusuka apho aya kuhlala ngakwiNtlambo YaseZerede.+ 13 Asuka apho aya kuhlala kwingingqi yaseArnon+ ekwintlango eqala kumda wama-Amori, kuba iArnon ngumda wakwaMowabhi, ophakathi kwamaMowabhi nama-Amori. 14 Yiloo nto incwadi yeemfazwe zikaYehova ithetha “ngeVahebhi eseSufa neentlambo zaseArnon, 15 nethambeka leentlambo eliyokufikelela eAri, lize liyokuthi ngqu kumda wakwaMowabhi.”

16 Emva koko amaSirayeli emka apho, aya eBhere. Elo liqula apho uYehova wathi kuMoses: “Qokelela abantu ukuze ndibanike amanzi.”

17 Ngelo xesha amaSirayeli acula le ngoma:

“Mpompoza qula! Liculeleni!

Emva koko emka entlango aya eMatana, 19 asuka eMatana aya eNahaliyeli, asuka eNahaliyeli aya eBhamoti.+ 20 Asuka eBhamoti aya kwintlambo ekumhlaba wakwaMowabhi,+ phezu kwePisga,+ evelele iYeshimon.*+

21 USirayeli wathumela abathunywa kuSihon ukumkani wama-Amori, esithi:+ 22 “Sicela ukunqumla elizweni lakho. Asizukungena emasimini okanye emasimini eediliya, yaye akukho qula siza kusela amanzi alo. Siza kuhamba kwiNdlela KaKumkani de sidlule.”+ 23 Kodwa uSihon akawavumelanga amaSirayeli ukuba anqumle elizweni lakhe. Kunoko waqokelela bonke abantu bakhe, waya kuhlasela amaSirayeli entlango.+ Wafika eYahatsa waza walwa nawo. 24 Kodwa amaSirayeli amoyisa uSihon ngekrele,+ aza alithatha ilizwe lakhe,+ ukususela eArnon+ ukuya eYabhoki,+ kufutshane nama-Amoni, kuba iYazere+ ikumda wama-Amoni.+

25 Ngoko uSirayeli wazithatha zonke ezi zixeko, waza wahlala kwizixeko zama-Amori,+ eHeshbhon nakuzo zonke iidolophu eziphantsi kwayo.* 26 IHeshbhon yayisisixeko sikaSihon ukumkani wama-Amori, owalwa nokumkani wakwaMowabhi waza wawuthatha umhlaba wakhe ukuya kutsho eArnon. 27 Avela ngolo hlobo amazwi anxwalayo athi:

“Yizani eHeshbhon.

Masakhiwe size siqiniswe isixeko sikaSihon.

28 Kuba kuphume umlilo eHeshbhon, kwaphuma idangatye kwidolophu yaseSihon.

Uyitshabalalisile iAri yakwaMowabhi, abanini beendawo eziphakamileyo zaseArnon.

29 Uza kuthi shu Mowabhi! Niza kutshabalala bantu bakaKemoshe!+

Oonyana bakhe ubenze iimbacu, neentombi zakhe wazenza abathinjwa bakaSihon, ukumkani wama-Amori.

30 Masibatoleni;

IHeshbhon iza kutshatyalaliswa ukuya kutsho eDibhon;+

Masiyitshabalaliseni ukuya kutsho eNofa;

Umlilo uza kunwenwa ukuya kutsho eMedebha.”+

31 Ngoko amaSirayeli aqalisa ukuhlala kwilizwe lama-Amori. 32 UMoses wathumela amadoda ukuba ayokuhlola iYazere.+ AmaSirayeli azithimba iidolophu eziphantsi kwayo* aza awagxotha ama-Amori awayehlala apho. 33 Emva koko ajika ahamba ngeNdlela Eya EBhashan. UOgi+ ukumkani waseBhashan waphuma nabantu bakhe bonke, waya kuwahlasela e-Edreyi.+ 34 UYehova wathi kuMoses: “Sukumoyika,+ kuba ndiza kumnikela kuwe nabo bonke abantu bakhe nomhlaba wakhe.+ Nakuye uza kwenza laa nto uyenze kuSihon ukumkani wama-Amori, obehlala eHeshbhon.”+ 35 Ngoko amaSirayeli amxabela yena noonyana bakhe, nabo bonke abantu bakhe, akwabikho mntu usindayo+ aza alithatha ilizwe lakhe.+

22 Emka ke amaSirayeli ayokuhlala kwintlango yakwaMowabhi, phesheya kweYordan ngaseYeriko.+ 2 UBhalaki+ unyana kaTsipore wayibona yonke into eyenziwa ngamaSirayeli kuma-Amori, 3 aza amaMowabhi awoyika kakhulu amaSirayeli, kuba ayemaninzi gqitha. AmaMowabhi awoyika nyhani amaSirayeli.+ 4 Ngoko amaMowabhi athi kubadala bakwaMidiyan:+ “Eli bandla liza kubimbiliza yonke into esingqongileyo, njengenkunzi yenkomo ibimbiliza ingca endle.”

UBhalaki unyana kaTsipore wayengukumkani wakwaMowabhi ngelo xesha. 5 Wathumela abathunywa kuBhileham unyana kaBhehore ePetore,+ engakuMlambo* welizwe lakowabo. Wathumela ukuba abizwe, esithi: “Kukho abantu abasuka eYiputa. Bagcwele kuwo wonke lo mhlaba,+ yaye naba ngoku behleli kanye phambi kwelizwe lam. 6 Ndicela uze, undiqalekisele aba bantu,+ kuba banamandla kunam. Mhlawumbi ndingaboyisa ndize ndibagxothe kweli lizwe, kuba ndazi kakuhle ukuba umntu omsikelelayo uyasikelelwa, nomntu omqalekisayo uyaqalekiswa.”

7 Ngoko abadala bakwaMowabhi nabadala bakwaMidiyan baya kuBhileham+ bephethe imali enikwa umntu ovumisayo, baza bamxelela into ethethwa nguBhalaki. 8 UBhileham wabaphendula wathi: “Hlalani apha ngobu busuku, ndiza kubuya ndinixelele nantoni na uYehova ayithethileyo kum.” Ngoko iinkosana zakwaMowabhi zahlala.

9 UThixo wafika kuBhileham, wathi:+ “Ngoobani la madoda uhleli nawo?” 10 UBhileham wathi kuThixo wokwenene: “UBhalaki unyana kaTsipore, ukumkani wakwaMowabhi, undithumelele umyalezo othi, 11 ‘Aba bantu basuka eYiputa bagcwele kuwo wonke lo mhlaba. Ndicela uze, undiqalekisele bona.+ Mhlawumbi ndingakwazi ukulwa nabo ndibagxothe.’” 12 Kodwa uThixo wathi kuBhileham: “Sukuhamba nabo. Uze ungabaqalekisi aba bantu kuba basikelelwe.”+

13 UBhileham wavuka ekuseni, wathi kwiinkosana zikaBhalaki: “Buyelani kwilizwe lenu kuba uYehova akavumanga ukuba ndihambe nani.” 14 Ngoko iinkosana zakwaMowabhi zahamba zabuyela kuBhalaki zaza zathi kuye: “UBhileham akavumanga ukubuya nathi.”

15 Kodwa ke uBhalaki waphinda wathumela ezinye iinkosana, ezininzi kakhulu nezihlonipheke ngaphezu kweziya zokuqala. 16 Zafika kuBhileham zathi: “UBhalaki unyana kaTsipore uthi, ‘Ndicela ungavumeli nantoni na ikunqande ungezi kum, 17 kuba ndiza kukuzukisa kakhulu ndize ndenze nantoni na ondixelela yona. Ngoko ndicela uze, undiqalekisele aba bantu.’” 18 Kodwa uBhileham waziphendula izicaka zikaBhalaki wathi: “Nokuba uBhalaki angandinika indlu yakhe igcwele yisilivere negolide, andizukukwazi ukwenza nantoni na angayiyalelanga uYehova uThixo wam, nokuba incinci okanye inkulu.+ 19 Kodwa nani ndicela nihlale apha ngobu busuku ukuze ndibone ukuba ayikho na enye into uYehova aza kundixelela yona.”+

20 UThixo wafika kuBhileham ebusuku, wathi: “Ukuba la madoda afikileyo azokukubiza, hamba nawo. Kodwa uze uthethe into endiza kukuxelela yona.”+ 21 Ngoko uBhileham wavuka ekuseni, wayifaka isali idonki* yakhe waza wahamba neenkosana zakwaMowabhi.+

22 Kodwa uThixo wacaphuka kakhulu kuba ehamba, yaza ingelosi kaYehova yema endleleni ukuze imnqande. UBhileham wayekhwele idonki yakhe yaye wayehamba nezicaka zakhe ezibini. 23 Idonki yayibona ingelosi kaYehova imi endleleni iphethe ikrele, yazama ukuphuma endleleni iye emasimini. Kodwa uBhileham wayibetha ukuze ibuyele endleleni. 24 Ingelosi kaYehova yema kwindlela encinci ephakathi kweentsimi ezimbini zeediliya, ezibiyelwe ngamatye. 25 Xa idonki yabona ingelosi kaYehova, yagudla udonga yaza yaminxisela unyawo lukaBhileham, waphinda wayibetha.

26 Ingelosi kaYehova yaphinda yadlula, yaya kuma kwindawo exineneyo apho kungekho sithuba sakudlula nokuba kungasekunene okanye ekhohlo. 27 Yathi idonki yakubona ingelosi kaYehova, yalala phantsi bhaxa esakhwele kuyo uBhileham, wacaphuka kakhulu waphinda wayibetha ngentonga. 28 Ekugqibeleni uYehova wenza idonki yathetha,*+ yaza yathi kuBhileham: “Ndikwenze ntoni le nto ude undibethe kathathu?”+ 29 UBhileham wathi kwidonki: “Kaloku undenze isidenge. Ukuba nje bendiphethe ikrele, bendiza kukubulala!” 30 Idonki yathi kuBhileham: “Andiyodonki yakho na? Ayindim na lo ubukhwela kuye ubomi bakho bonke de kube namhlanje? Ndakha ndakuphatha ngolu hlobo ngaphambili?” Wathi: “Hayi!” 31 Emva koko uYehova wawavula amehlo kaBhileham,+ watsho wayibona ingelosi kaYehova imi endleleni iphethe ikrele. Ngoko nangoko waqubuda.

32 Ingelosi kaYehova yathi kuye: “Uyibethele ntoni idonki yakho kwade kwakathathu? Ndize kukunqanda ngokwam, kuba le nto uyenzayo ayikokuthanda kwam.+ 33 Idonki indibonile yaza yazama ukundiphepha kwade kwakathathu.+ Ukuba ibingandiphephanga, ngendikubulele ndaza ndayiyeka yona yaphila.” 34 UBhileham wathi kwingelosi kaYehova: “Ndonile, kuba bendingazi ukuba nguwe omi endleleni yam. Ngoku ukuba le nto imbi emehlweni akho, ndiza kujika.” 35 Ingelosi kaYehova yathi kuBhileham: “Hamba nala madoda, kodwa uze uthethe into endiza kukuxelela yona kuphela.” Ngoko uBhileham waqhubeka ehamba neenkosana zikaBhalaki.

36 Xa uBhalaki wevayo ukuba uBhileham ufikile, ngokukhawuleza waya kumhlangabeza kwisixeko sakwaMowabhi, esingakumlambo iArnon, ekumda welo lizwe. 37 UBhalaki wathi kuBhileham: “Kunini ndikubiza? Bekutheni ukuze ungezi? Ubucinga ukuba andizukukwazi ukukuzukisa kakhulu?”+ 38 UBhileham wathi kuBhalaki: “Kodwa ke ndilapha ngoku. Ngaba ndiza kuvunyelwa ukuba ndithethe nantoni na? Ndiza kukwazi kuphela ukuthetha amazwi uThixo awabeka emlonyeni wam.”+

39 Ngoko uBhileham wahamba noBhalaki baya kufika eKiriyati-hutsoti. 40 UBhalaki wabingelela ngeenkomo nangeegusha, waza wathumela enye inyama kuBhileham nakwiinkosana ezazikunye naye. 41 Ekuseni uBhalaki wasa uBhileham eBhamoti-bhahali, ukuze awabone onke amaSirayeli.+

23 Emva koko wathi uBhileham kuBhalaki: “Yakha izibingelelo ezisixhenxe kule ndawo,+ uze undilungisele iinkunzi zeenkomo ezisixhenxe neenkunzi zeegusha ezisixhenxe.” 2 Ngokukhawuleza uBhalaki wenza kanye njengokuba wayetshilo uBhileham. Bobabini banikela ngenkunzi yenkomo nangenkunzi yegusha kwisibingelelo ngasinye.+ 3 Emva koko wathi uBhileham kuBhalaki: “Yima apha ecaleni komnikelo wakho otshiswayo, mna ndiza kuhamba. Mhlawumbi uYehova uza kuthetha nam. Nantoni na andixelela yona ndiza kukuxelela.” Wahamba ke waya kwinduli eyomileyo.

4 UThixo wafika kuBhileham,+ waza uBhileham wathi: “Ndakhe izibingelelo ezisixhenxe ndaza ndanikela ngenkunzi yenkomo nangenkunzi yegusha kwisibingelelo ngasinye.” 5 UYehova waxelela uBhileham into amele ayithethe esithi:+ “Buyela kuBhalaki uze uthethe le nto.” 6 Ngoko wabuyela waza wafika uBhalaki nazo zonke iinkosana zakwaMowabhi zimi ngakumnikelo wakhe otshiswayo. 7 Wathetha intetho engumzekeliso esithi:+

‘Yiza uqalekise uYakobi.

Yiza uqalekise uSirayeli.’+

 8 njani abantu angabaqalekisanga uThixo?

Ndingabaqalekisa njani abantu angabaqalekisanga uYehova?+

11 Emva koko wathi uBhalaki kuBhileham: “Yintoni le undenza yona? Ndikubizele ukuba uziqalekise iintshaba zam, kodwa wena uyazisikelela.”+ 12 UBhileham wathi: “Ngaba ndimele ndingathethi nantoni na uYehova athi mandiyithethe?”+

13 Wathi uBhalaki kuye: “Makhe siye kwenye indawo oza kubabona kuyo. Uza kubona abambalwa; awuzukubabona bonke. Uze ubaqalekise ukuloo ndawo.”+ 14 Ngoko wamsa kumhlaba kaZofim, phezu kwePisga,+ waza wakha izibingelelo ezisixhenxe, wabingelela ngenkunzi yenkomo nangenkunzi yegusha kwisibingelelo ngasinye.+ 15 UBhileham wathi kuBhalaki: “Yima apha ecaleni komnikelo wakho otshiswayo. Mna ndiza kuya kuthetha noThixo phaya.” 16 Ngoko uYehova wathetha noBhileham waza wamxelela into amele ayithethe esithi:+ “Buyela kuBhalaki uze uthethe le nto.” 17 Ngoko wabuyela kuye, wafika uBhalaki nazo zonke iinkosana zakwaMowabhi zimi ngakumnikelo wakhe otshiswayo. UBhalaki wambuza wathi: “Uthini uYehova?” 18 Wathetha intetho engumzekeliso esithi:+

“Phakama Bhalaki, umamele.

Khawundimamele nyana kaTsipore.

Akayenzi na into ayithethileyo?

Akayenzi iphumelele na into ayithethileyo?+

22 UThixo uyawakhupha eYiputa.+

Kuwo ufana neempondo zenkunzi yenkomo yasendle.+

Nantsi into enokuthethwa ngoku ngoYakobi noSirayeli:

‘Khawubone izinto azenzileyo uThixo!’

25 Emva koko wathi uBhalaki kuBhileham: “Ukuba ke awukwazi kubaqalekisa, sukubasikelela.” 26 UBhileham wamphendula uBhalaki wathi: “Bendingatshongo na kuwe ukuba, ‘Ndiza kwenza into ethethwa nguYehova’?”+

27 UBhalaki wathi kuBhileham: “Ndicela siye kwenye indawo. Mhlawumbi kuza kulunga kuThixo wokwenene xa ubaqalekisa ukuloo ndawo aba bantu.”+ 28 UBhalaki wamsa ke uBhileham phezu kwePehore, evelele iYeshimon.*+ 29 Emva koko wathi uBhileham kuBhalaki: “Yakha izibingelelo ezisixhenxe kule ndawo, uze undilungisele iinkunzi zeenkomo ezisixhenxe neenkunzi zeegusha ezisixhenxe.”+ 30 UBhalaki wenza kanye njengokuba wayetshilo uBhileham, wanikela ngenkunzi yenkomo nangenkunzi yegusha kwisibingelelo ngasinye.

24 Wathi akubona uBhileham ukuba uYehova uyithandile into yokusikelelwa kwamaSirayeli, zange aphinde ahambe ayokuzama imilingo eyenzakalisayo,+ kodwa wajika wajonga entlango. 2 UBhileham wathi akuphakamisa amehlo akhe, waza wabona amaSirayeli ehleli ngokwezizwe zawo,+ wafikelwa ngumoya kaThixo.+ 3 Emva koko wathetha intetho engumzekeliso esithi:+

10 UBhalaki wacatshukiswa yile nto yenziwa nguBhileham waza waqhwaba izandla, esithi: “Bendikubizele ukuba uziqalekise iintshaba zam,+ kodwa wena uzisikelele kwade kwakathathu. 11 Ngoku ke khawuleza ugoduke. Bendizimisele ukukuzukisa kakhulu,+ kodwa jonga! uYehova ukuvimbile olo zuko.”

12 UBhileham wathi kuBhalaki: “Andithi bendithe kubathunywa bakho, 13 ‘Nokuba uBhalaki angandinika indlu yakhe igcwele yisilivere negolide, andizukukwazi ukwenza nantoni na efunwa ndim* angayiyalelanga uYehova, nokuba incinci okanye inkulu. Ndiza kuthetha into endiyixelelwe nguYehova kuphela’?+ 14 Ngoku ndiyagoduka ndiya kubantu basekhaya. Khawuze ndikuxelele into eza kwenziwa sesi sizwana kubantu bakho kwixesha elizayo.”* 15 Ngoko wathetha intetho engumzekeliso esithi:+

20 Wathi akubona ama-Amaleki, waqhubeka nentetho yakhe engumzekeliso esithi:

21 Wathi akubona amaKeni,+ waqhubeka nentetho yakhe engumzekeliso esithi:

“Ikhuselekile indawo ohlala kuyo, yaye uyimise eliweni.

22 Kodwa kukho umntu oza kumtshisa uKhayin.

Iza kukuthimba nini iAsiriya?”

Kodwa naye uza kutshabalala.”

25 Emva koko uBhileham+ wagoduka, noBhalaki wagoduka.

25 Xa amaSirayeli ayehlala eShitim,+ alala neentombi zakwaMowabhi.+ 2 Ezo ntombi zawamema amaSirayeli ukuba eze kwimibingelelo yoothixo bazo,+ yaye atya loo mibingelelo aza aqubuda koothixo bazo.+ 3 Ngoko nawo amaSirayeli akhonza uBhahali wasePehore,+ ibe yamcaphukisa kakhulu uYehova loo nto. 4 UYehova wathi kuMoses: “Thatha zonke iinkokheli* zabantu, zibulawe zize zixhonywe phambi koYehova ilanga lihlab’ umhlaba, ukuze uphele umsindo uYehova anawo kuSirayeli.” 5 Emva koko uMoses wathi kubagwebi bakwaSirayeli:+ “Ngamnye kuni makabulale abantu bakhe abaye bakhonza uBhahali wasePehore.”+

6 Kwathi kusenjalo, kwathi gqi omnye umSirayeli ehamba nentombi yakwaMidiyan+ phambi koMoses naphambi kwalo lonke ibandla lamaSirayeli, besalila kumnyango wentente yokuhlangana. 7 Wathi akuyibona loo nto uFinehasi+ unyana kaEleyazare unyana ka-Aron umbingeleli, wasuka ngokukhawuleza phakathi kwebandla, wathi nqaku umkhonto.* 8 Emva koko walandela loo mSirayeli, wangena ententeni waza wabahlaba bobabini. Wahlaba loo mSirayeli naloo ntombi emalungwini ayo enzala. Sabe siyanqandwa ngolo hlobo isibetho kwaSirayeli.+ 9 Abantu abafayo babeyi-24 000.+

10 Emva koko uYehova wathi kuMoses: 11 “UFinehasi+ unyana kaEleyazare unyana ka-Aron umbingeleli uwuphelisile umsindo wam kubantu bakwaSirayeli, kuba khange akunyamezele ukudelelwa kwam ngabo.+ Yiloo nto ndingawatshabalalisanga amaSirayeli nangona ndifuna azinikele ngokupheleleyo kum.+ 12 Ngenxa yoko uze uthi, ‘Ndenza isivumelwano soxolo naye. 13 Yaye iza kuba sisivumelwano sokuba yena nenzala yakhe bahlale bengababingeleli,+ kuba khange akunyamezele ukudelelwa koThixo wakhe,+ yaye uye wabahlawulela abantu bakwaSirayeli.’”

14 Igama lomSirayeli owabulawa nomMidiyanekazi nguZimri unyana kaSalu, inkosi yendlu yootata bamaSimeyon. 15 Igama lentombi yakwaMidiyan eyabulawayo nguKozibhi intombi kaTsure,+ owayeyinkokheli yeentsapho zendlu zootata babo kwaMidiyan.+

16 Emva koko uYehova wathi kuMoses: 17 “Wangcungcuthekiseni amaMidiyan nize niwatshabalalise,+ 18 kuba anizisela intlekele ngokunitsalela ekwenzeni isono ePehore.+ Anitsalela esonweni ngoKozibhi intombi yenkosi yakwaMidiyan, owabulawayo+ ngexesha enanisohlwaywa ngalo ngenxa yento eyenzeka ePehore.”+

26 Emva kweso sibetho,+ uYehova wathetha noMoses noEleyazare unyana ka-Aron umbingeleli wathi: 2 “Balani lonke ibandla lamaSirayeli, nisusele kwabaneminyaka eyi-20 ukonyuka. Balani ngokwezindlu zootata balo bonke abanokungena emkhosini wakwaSirayeli.”+ 3 Ngoko uMoses noEleyazare+ umbingeleli bathetha nabantu kwintlango yakwaMowabhi,+ ngaseYordan eYeriko+ besithi: 4 “Wabaleni amaSirayeli nisusele kwaneminyaka eyi-20 ukonyuka, kanye njengokuba uYehova eyalele uMoses.”+

Naba ke oonyana bakaSirayeli abaphuma kwilizwe laseYiputa: 5 NguRubhen+ izibulo likaSirayeli; naba oonyana bakaRubhen:+ kuHanoki yintsapho yamaHanoki; kuPalu yintsapho yamaPalu; 6 kuHetseron yintsapho yamaHetseron; kuKarmi yintsapho yamaKarmi. 7 Ezo ke ziintsapho zamaRubhen, yaye ababhaliswayo kuzo babeyi-43 730.+

8 Unyana kaPalu yayinguEliyabhi. 9 Bona oonyana bakaEliyabhi yayinguNemuweli, uDatan noAbhiram. Lo Datan nalo Abhiram ngabaya babekhethiwe libandla. Bakhalazela uMoses+ noAron baza baba kwiqela likaKora+ elalisilwa noYehova.+

10 Ngoko umhlaba wavuleka waza wabaginya. Yena uKora wafa nabaxhasi bakhe xa umlilo watshabalalisa amadoda ayi-250.+ Into eyenzekayo kubo yaba sisilumkiso nakwabanye abantu.+ 11 Kodwa ke bona oonyana bakaKora abazange bafe.+

12 Naba ke oonyana bakaSimeyon+ ngokweentsapho zabo: kuNemuweli yintsapho yamaNemuweli; kuYamin yintsapho yamaYamin; kuYakin yintsapho yamaYakin; 13 kuZera yintsapho yamaZera; kuShawule yintsapho yamaShawule. 14 Ngabo ke ababhaliswayo kwiintsapho zamaSimeyon: babeyi-22 200.+

15 Naba ke oonyana bakaGadi+ ngokweentsapho zabo: kuTsefon yintsapho yamaTsefon; kuHagi yintsapho yamaHagi; kuShuni yintsapho yamaShuni; 16 kuOzni yintsapho yamaOzni; kuEri yintsapho yamaEri; 17 kuArodi yintsapho yama-Arodi; kuAreli yintsapho yama-Areli. 18 Ezo ke ziintsapho zoonyana bakaGadi, yaye ababhaliswayo kuzo babeyi-40 500.+

19 Oonyana bakaYuda+ yayinguEre no-Onan.+ Kodwa ke, uEre no-Onan bafela kwilizwe lakwaKanan.+ 20 Naba ke oonyana bakaYuda ngokweentsapho zabo: kuShela+ yintsapho yamaShela; kuPeretse+ yintsapho yamaPeretse; kuZera+ yintsapho yamaZera. 21 Naba oonyana bakaPeretse: kuHetseron+ yintsapho yamaHetseron; kuHamuli+ yintsapho yamaHamuli. 22 Ezo ke ziintsapho zakwaYuda, yaye ababhaliswayo kuzo babeyi-76 500.+

23 Naba ke oonyana bakaIsakare+ ngokweentsapho zabo: kuTola+ yintsapho yamaTola; kuPuva yintsapho yamaPuva; 24 kuYashubhi yintsapho yamaYashubhi; kuShimron yintsapho yamaShimron. 25 Ezo ke ziintsapho zakwaIsakare, yaye ababhaliswayo kuzo babeyi-64 300.+

26 Naba ke oonyana bakaZebhulon+ ngokweentsapho zabo: kuSerede yintsapho yamaSerede; kuElon yintsapho yamaElon; kuYaleli yintsapho yamaYaleli. 27 Ezo ke ziintsapho zamaZebhulon, yaye ababhaliswayo kuzo babeyi-60 500.+

28 Oonyana bakaYosefu+ ngokweentsapho zabo yayinguManase noEfrayim.+ 29 Naba ke oonyana bakaManase:+ kuMakire+ yintsapho yamaMakire; yaye uMakire wazala uGiliyadi;+ kuGiliyadi yintsapho yamaGiliyadi. 30 Naba ke oonyana bakaGiliyadi: kuIyezere yintsapho yamaIyezere; kuHeleki yintsapho yamaHeleki; 31 kuAsriyeli yintsapho yama-Asriyeli; kuShekem yintsapho yamaShekem; 32 kuShemida yintsapho yamaShemida; kuHefere yintsapho yamaHefere. 33 UTselofehadi unyana kaHefere wayengenabo oonyana, wayeneentombi kuphela.+ Amagama eentombi zikaTselofehadi+ yayinguMahala, uNowa, uHogela, uMilka noTirtsa. 34 Ezo ke ziintsapho zakwaManase, yaye ababhaliswayo kuzo babeyi-52 700.+

35 Naba ke oonyana bakaEfrayim+ ngokweentsapho zabo: kuShutela+ yintsapho yamaShutela; kuBhekere yintsapho yamaBhekere; kuTahan yintsapho yamaTahan. 36 Naba oonyana bakaShutela: kuEran yintsapho yamaEran. 37 Ezo ke ziintsapho zoonyana bakaEfrayim, yaye ababhaliswayo kuzo babeyi-32 500.+ Abo ke ngoonyana bakaYosefu ngokweentsapho zabo.

38 Naba ke oonyana bakaBhenjamin+ ngokweentsapho zabo: kuBhela+ yintsapho yamaBhela; kuAshbheli yintsapho yama-Ashbheli; kuAhiram yintsapho yama-Ahiram; 39 kuShefufam yintsapho yamaShefufam; kuHufam yintsapho yamaHufam. 40 Oonyana bakaBhela yayinguArdi noNahaman:+ kuArdi yintsapho yama-Ardi; kuNahaman yintsapho yamaNahaman. 41 Abo ke ngoonyana bakaBhenjamin ngokweentsapho zabo, yaye ababhaliswayo kubo babeyi-45 600.+

42 Naba ke oonyana bakaDan+ ngokweentsapho zabo: kuShuham yintsapho yamaShuham. Ezo ke ziintsapho zakwaDan. 43 Xa bebonke abantu ababhaliswayo, kuzo zonke iintsapho zamaShuham babeyi-64 400.+

44 Naba ke oonyana baka-Ashere+ ngokweentsapho zabo: kuImna yintsapho yamaImna; kuIshvi yintsapho yamaIshvi; kuBheriya yintsapho yamaBheriya; 45 koonyana bakaBheriya: kuHebheri yintsapho yamaHebheri; kuMalekiyeli yintsapho yamaMalekiyeli. 46 Igama lentombi ka-Ashere yayinguSera. 47 Ezo ke ziintsapho zoonyana baka-Ashere, yaye ababhaliswayo kuzo babeyi-53 400.+

48 Naba ke oonyana bakaNafetali+ ngokweentsapho zabo: kuYatseli yintsapho yamaYatseli; kuGuni yintsapho yamaGuni; 49 kuYetsere yintsapho yamaYetsere; kuShilem yintsapho yamaShilem. 50 Ezo ke ziintsapho zakwaNafetali ngokweentsapho zabo, yaye ababhaliswayo kuzo babeyi-45 400.+

51 Xa ewonke amaSirayeli awabhaliswayo aba yi-601 730.+

52 Emva koko uYehova wathi kuMoses: 53 “Bonke aba bahlulele ilizwe libe lilifa labo ngokwamagama abhalisiweyo.+ 54 Uze ulandise ilifa leqela elinabantu abaninzi, ulinciphise ilifa leqela elinabantu abambalwa.+ Ilifa leqela ngalinye limele lilingane abantu ababhalisiweyo kulo. 55 Kodwa ke ilizwe lifanele lahlulwe ngamaqashiso.+ Abantu bamele balinikwe ilifa ngokwamagama ezizwe zootata babo. 56 Ilifa liza kufumaneka ngamaqashiso lize lahlulelwe amaqela amancinci namakhulu.”

57 Naba ke ababhaliswayo kubaLevi+ ngokweentsapho zabo: kuGershon yintsapho yamaGershon; kuKohati yintsapho yamaKohati;+ kuMerari yintsapho yamaMerari. 58 Nazi iintsapho zabaLevi: yintsapho yamaLibhini,+ yintsapho yamaHebron,+ yintsapho yamaMahali,+ yintsapho yamaMushi,+ yintsapho yamaKora.+

UKohati wazala uAmram.+ 59 Igama lomfazi ka-Amram yayinguYokebhede,+ intombi kaLevi, eyazalwa ngumfazi kaLevi eYiputa. Yazalela uAmram uAron, uMoses noMiriyam udadewabo.+ 60 UAron wazalelwa uNadabhi, uAbhihu, uEleyazare noItamare.+ 61 Kodwa uNadabhi noAbhihu bafa ngenxa yokuba bazisa umlilo ongekho mthethweni phambi koYehova.+

62 Xa ewonke amadoda awabhaliswayo ukususela kwenenyanga izelwe ukonyuka ayeyi-23 000.+ Ayengabhaliswanga kunye namaSirayeli+ kuba awazange anikwe ilifa kunye namaSirayeli.+

63 Nabo ke abantu ababhaliswa nguMoses noEleyazare umbingeleli, xa kwakubhaliswa amaSirayeli kwintlango yakwaMowabhi, ngaseYordan eYeriko. 64 Kwaba bantu, akakho owayebhaliswe nguMoses noAron umbingeleli xa kwakubhaliswa amaSirayeli entlango yaseSinayi.+ 65 Kuba uYehova wayethe ngabo: “Ngokuqinisekileyo baza kufela entlango.”+ Ngoko akukho nomnye kubo ongazange afe ngaphandle kukaKalebhi unyana kaYefune noYoshuwa unyana kaNun.+

27 Emva koko zasondela iintombi zikaTselofehadi,+ unyana kaHefere, unyana kaGiliyadi, unyana kaMakire, unyana kaManase, ophuma kwiintsapho zakwaManase, unyana kaYosefu. Amagama ezi ntombi yayinguMahala, uNowa, uHogela, uMilka noTirtsa. 2 Zema phambi koMoses, uEleyazare umbingeleli, iinkokheli+ naphambi kwalo lonke ibandla, kumnyango wentente yokuhlangana zaza zathi: 3 “Utata wethu wafela entlango, kodwa wayengekho kwiqela labaxhasi bakaKora,+ elalisilwa noYehova. Yena wafela esakhe isono kodwa wayengenabo oonyana. 4 Kutheni igama likatata wethu liza kucima kwintsapho yakhe kuba nje engenanyana? Nathi sinike ilifa kunye nabantakwabotata.” 5 Ngoko uMoses wasisa kuYehova isicelo sazo.+

6 UYehova wathi kuMoses: 7 “Iintombi zikaTselofehadi zinyanisile. Qinisekisa ukuba uzinika ilifa kunye nabantakwabotata wazo, ulidlulisele kuzo ilifa likatata wazo.+ 8 Uze uthi kumaSirayeli, ‘Ukuba indoda ifa ingenanyana, ilifa layo nimele nilinike intombi yayo. 9 Ukuba ayinayo intombi, nimele nilinike abantakwayo. 10 Ukuba ayinabantakwayo, nimele nilinike abantakwabotata wayo. 11 Ukuba utata wayo akanabo abantakwabo, nimele ilifa layo nilinike oyena mntu usondeleyo ezalana naye, ibe lelakhe. Esi sigqibo sisemthethweni, siza kuba ngumthetho omele uthotyelwe ngamaSirayeli, kanye njengoko uYehova eyalele uMoses.’”

12 Emva koko uYehova wathi kuMoses: “Nyuka le ntaba yeAbharim+ uze ubone ilizwe endiza kulinika amaSirayeli.+ 13 Emva kokuba ulibonile, uza kuhlanganiselwa kubantu bakowenu,*+ njengoAron umntakwenu,+ 14 kuba xa ibandla laxambulisana nam kwintlango yaseTsin, zange niwuthobele umyalelo wam wokuba nindingcwalise xa ndikhupha amanzi.+ Lawo ngamanzi aseMeribha+ eKadeshe+ entlango yaseTsin.”+

15 Emva koko uMoses wathi kuYehova: 16 “UYehova uThixo onika bonke abantu ubomi makakhethe indoda eza kukhokela ibandla, 17 eza kuququzela phambi kwalo, ilikhokele xa liphuma naxa lingena, ukuze ibandla likaYehova lingabi njengeegusha ezingenamalusi.” 18 Ngoko uYehova wathi kuMoses: “Thatha uYoshuwa unyana kaNun, indoda efanelekayo* uze umbeke isandla.+ 19 Emva koko hamba uye kummisa phambi koEleyazare umbingeleli naphambi kwalo lonke ibandla, umbeke ukuba abe yinkokheli, bebukele.+ 20 Uze umahlulele kwigunya lakho,*+ ukuze lonke ibandla lamaSirayeli limmamele.+ 21 Uza kuma phambi koEleyazare umbingeleli, yena uza kumbuzela kuYehova esebenzisa iUrim.+ Baza kuphuma baze bangene ngokomyalelo wakhe, uYoshuwa, onke amaSirayeli kunye nalo lonke ibandla.”

22 Ngoko uMoses wenza kanye njengoko uYehova wayemyalele. Wathatha uYoshuwa, wammisa phambi koEleyazare umbingeleli naphambi kwalo lonke ibandla, 23 wambeka izandla waza wambeka ukuba abe yinkokheli,+ kanye njengokuba uYehova wayethethile ngoMoses.+

28 UYehova waphinda wathi kuMoses: 2 “Wayalele amaSirayeli uthi kuwo, ‘Qinisekani ukuba nizisa iminikelo yam, ekukutya kwam. Iminikelo elivumba elimnandi* eyenzelwa mna emlilweni imele yenziwe ngamaxesha abekiweyo.’+

3 “Uze uthi kuwo, ‘Lo ngumnikelo otshiswayo enimele niwuzise kuYehova: amatakane eegusha amabini aziinkunzi aphilileyo anonyaka, aza kuba ngumnikelo otshiswayo ngosuku.+ 4 Elinye itakane legusha eliyinkunzi nimele nilinikele ekuseni, nize elinye nilinikele ngorhatya,*+ 5 kunye nomnikelo wokutya ongumgubo ocoliweyo osisahlulo esinye kwezilishumi ze-efa* oxutywe neoli engqushiweyo eyikota yehin.+ 6 Lowo ngumnikelo otshiswayo+ owenziwa qho, owasekwayo kwiNtaba YeSinayi ukuba ube livumba elimnandi,* umnikelo owenzelwa uYehova emlilweni. 7 Takane ngalinye legusha eliyinkunzi malihambe nomnikelo oselwayo oyikota yehin.+ Galela utywala kwindawo engcwele ukuze lowo ibe ngumnikelo oselwayo owenzelwa uYehova. 8 Elinye itakane legusha eliyinkunzi malinikelwe ngorhatya.* Umele ulinikele kunye nomnikelo wokutya ofanayo nalowa wakusasa, ulinikele kunye nomnikelo oselwayo ofanayo, ube livumba elimnandi* kuYehova.+

9 “‘Kodwa ke ngeSabatha+ nikelani ngamatakane eegusha amabini aziinkunzi aphilileyo anonyaka, nomnikelo wokutya ongumgubo ocoliweyo ozizahlulo ezibini kwezilishumi ze-efa ezixutywe neoli, kunye nomnikelo wawo oselwayo. 10 Lowo ngumnikelo otshiswayo owenziwa ngeSabatha, kunye nomnikelo otshiswayo owenziwa qho ohamba nomnikelo oselwayo.+

11 “‘Qho ekuqaleni kwenyanga,* yenzelani uYehova umnikelo otshiswayo ngamathole amabini enkomo aziinkunzi, inkunzi yegusha namatakane eegusha asixhenxe aziinkunzi aphilileyo anonyaka.+ 12 Inkunzi nganye yenkomo imele ihambe nomnikelo wokutya+ ongumgubo ocoliweyo ozizahlulo ezithathu kwezilishumi oxutywe neoli. Inkunzi yegusha imele ihambe nomnikelo wokutya ongumgubo ocoliweyo ozizahlulo ezibini kwezilishumi oxutywe neoli.+ 13 Itakane ngalinye legusha eliyinkunzi limele lihambe nomnikelo wokutya ongumgubo ocoliweyo osisahlulo esinye kwezilishumi oxutywe neoli, libe ngumnikelo otshiswayo olivumba elimnandi*+ kuYehova. 14 Inkunzi yenkomo mayihambe nomnikelo oselwayo oyihafu yehin yewayini,+ inkunzi yegusha ihambe nesahlulo esinye kwezithathu zehin+ yewayini, lona itakane legusha eliyinkunzi lihambe nekota yehin yewayini.+ Lowo ke iza kuba ngumnikelo otshiswayo owenziwa qho ngenyanga kude kuphele unyaka. 15 Iminikelo etshiswayo eyenziwa qho mayihambe kunye netakane lebhokhwe, libe ngumnikelo wesono owenzelwa uYehova kunye nomnikelo oselwayo.

16 “‘Ngenyanga yokuqala ngosuku lwe-14 iza kuba yiPasika kaYehova.+ 17 Yaye ngosuku lwe-15 iza kuba litheko. Kuza kutyiwa izonka ezingenagwele iintsuku ezisixhenxe.+ 18 Ngosuku lokuqala kuza kubakho indibano engcwele. Ze ningenzi nawuphi na umsebenzi onzima. 19 Yenzelani uYehova umnikelo otshiswayo ngamathole amabini enkomo aziinkunzi, inkunzi yegusha namatakane eegusha asixhenxe aziinkunzi anonyaka. Nimele ninikele ngezilwanyana eziphilileyo.+ 20 Zimele zikhatshwe ngumnikelo wazo wokutya ongumgubo ocoliweyo oxutywe neoli.+ Inkunzi yenkomo imele ihambe nomgubo ozizahlulo ezithathu kwezilishumi, yona inkunzi yegusha ihambe nezahlulo ezibini kwezilishumi. 21 Itakane ngalinye legusha eliyinkunzi kula asixhenxe limele lihambe nomgubo ocoliweyo osisahlulo esinye kwezilishumi, 22 nebhokhwe enye engumnikelo wesono ukuze nihlawulelwe. 23 Niza kuyenza le minikelo ukongeza kumnikelo otshiswayo eniwenza qho kusasa. 24 Nimele niyenze ngendlela efanayo iintsuku ezisixhenxe ibe kukutya,* umnikelo otshiswayo olivumba elimnandi kuYehova. Nimele niyinikele kunye nomnikelo otshiswayo owenziwa qho kunye neminikelo yawo eselwayo. 25 Ngosuku lwesixhenxe kuza kubakho indibano engcwele.+ Ze ningenzi nawuphi na umsebenzi onzima.+

26 “‘Ngemini yesivuno sokuqala,+ xa ninikela kuYehova ukutya okutsha,+ nimele nibe nendibano engcwele yetheko leeveki.+ Ze ningenzi nawuphi na umse­benzi onzima.+ 27 Yenzani um­nikelo otshiswayo olivumba ­elimnandi* kuYehova ngamathole amabini enkomo aziinkunzi, inkunzi yegusha namatakane eegusha asixhenxe aziinkunzi aphilileyo anonyaka.+ 28 Inkunzi nganye yenkomo imele ihambe nomnikelo wokutya ongumgubo ocoliweyo, ozizahlulo ezithathu kwezilishumi oxutywe neoli. Inkunzi yegusha imele ihambe nomnikelo wokutya ongumgubo ocoliweyo ozizahlulo ezibini kwezilishumi oxutywe neoli. 29 Itakane ngalinye legusha eliyinkunzi kula asixhenxe limele lihambe nomgubo ocoliweyo osisahlulo esinye kwezilishumi oxutywe neoli, 30 netakane lebhokhwe elinye ukuze nicelelwe uxolo.+ 31 Ezi zinto nimele nizinikele kunye nomnikelo otshiswayo owenziwa qho, nomnikelo wokutya. Nimele ninikele ngezilwanyana eziphilileyo+ kunye neminikelo eselwayo.

29 “‘Ngenyanga yesixhenxe ngosuku lokuqala, nifanele nibe nendibano engcwele. Ze ningenzi nawuphi na umsebenzi onzima.+ Leyo yimini enimele nikhalise ngayo amaxilongo.+ 2 Nimele nenze umnikelo otshiswayo olivumba elimnandi* kuYehova ngethole lenkomo eliyinkunzi, ngenkunzi yegusha nangamatakane eegusha aziinkunzi anonyaka abe sixhenxe. Zonke zimele zibe zizilwanyana eziphilileyo. 3 Zimele zikhatshwe ngumnikelo wokutya ongumgubo ocoliweyo oxutywe neoli, inkunzi yenkomo ihambe nomgubo ozizahlulo ezithathu kwezilishumi ze-efa, inkunzi yegusha ihambe nezahlulo ezibini kwezilishumi, 4 itakane ngalinye legusha eliyinkunzi kula asixhenxe, lihambe nesahlulo esinye kwezilishumi. 5 Zimele zikhatshwe nalitakane lebhokhwe eliyinkunzi elingumnikelo wesono wokunihlawulela. 6 Ezi zinto ziza kunikelwa ukongeza kumnikelo otshiswayo owenziwa qho ngenyanga, ohamba nomnikelo wokutya,+ nomnikelo otshiswayo owenziwa qho, ohamba nomnikelo wokutya,+ kunye neminikelo eselwayo,+ ngendlela ehlala isenziwa ngayo, zibe livumba elimnandi,* umnikelo otshiswayo owenzelwa uYehova.

7 “‘Ngosuku lweshumi lwale nyanga yesixhenxe nimele nibe nendibano engcwele,+ nize nizixhwalekise.* Ze ningenzi nawuphi na umsebenzi.+ 8 Nimele nenzele uYehova umnikelo otshiswayo ube livumba elimnandi, ngethole lenkomo eliyinkunzi, ngenkunzi yegusha, nangamatakane eegusha aziinkunzi anonyaka abe sixhenxe. Zonke zimele zibe zizilwanyana eziphilileyo.+ 9 Yaye zimele zikhatshwe ngumnikelo wokutya ongumgubo ocoliweyo oxutywe neoli, inkunzi yenkomo ihambe nomgubo ozizahlulo ezithathu kwezilishumi, inkunzi yegusha ihambe nezahlulo ezibini kwezilishumi. 10 Itakane ngalinye legusha eliyinkunzi kula asixhenxe, limele lihambe nomgubo ocoliweyo osisahlulo esinye kwezilishumi. 11 Zimele zikhatshwe nalitakane lebhokhwe elingumnikelo wesono, ukongeza kumnikelo wesono wokuhlawulela+ nomnikelo otshiswayo owenziwa qho, ohamba nomnikelo wokutya, kunye neminikelo eselwayo.

12 “‘Ngosuku lwe-15 lwenyanga yesixhenxe nimele nibe nendibano engcwele. Ze ningenzi nawuphi na umsebenzi onzima, yaye nimele nenzele uYehova itheko iintsuku ezisixhenxe.+ 13 Nimele nenze umnikelo otshiswayo,+ umnikelo owenziwa emlilweni, olivumba elimnandi* kuYehova, ngamathole eenkomo aziinkunzi ayi-13, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 14 Zimele zikhatshwe ngumnikelo wokutya ongumgubo oxutywe neoli, inkunzi nganye yenkomo kwezo ziyi-13 ihambe nomgubo ozizahlulo ezithathu kwezilishumi, inkunzi nganye yegusha kwezo zimbini ihambe nezahlulo ezibini kwezilishumi. 15 Itakane ngalinye legusha eliyinkunzi kula ayi-14, limele lihambe nomgubo ocoliweyo osisahlulo esinye kwezilishumi. 16 Zimele zikhatshwe nalitakane lebhokhwe elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, nomnikelo oselwayo.+

17 “‘Ngosuku lwesibini makunikelwe ngamathole enkomo aziinkunzi ayi-12, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 18 Xa kunikelwa ngeenkunzi zeenkomo, iinkunzi zeegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 19 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye neminikelo eselwayo.+

20 “‘Ngosuku lwesithathu makunikelwe ngeenkunzi zeenkomo eziyi-11, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 21 Xa kunikelwa ngeenkunzi zeenkomo, iinkunzi zeegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 22 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye neminikelo eselwayo.+

23 “‘Ngosuku lwesine makunikelwe ngeenkunzi zeenkomo ezilishumi, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 24 Xa kunikelwa ngeenkunzi zeenkomo, iinkunzi zeegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 25 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye neminikelo eselwayo.+

26 “‘Ngosuku lwesihlanu makunikelwe ngeenkunzi zeenkomo ezilithoba, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 27 Xa kunikelwa ngeenkunzi zeenkomo, iinkunzi zeegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 28 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye neminikelo eselwayo.+

29 “‘Ngosuku lwesithandathu makunikelwe ngeenkunzi zeenkomo ezisibhozo, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 30 Xa kunikelwa ngeenkunzi zeenkomo, iinkunzi zeegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 31 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye neminikelo eselwayo.+

32 “‘Ngosuku lwesixhenxe makunikelwe ngeenkunzi zeenkomo ezisixhenxe, ngeenkunzi zeegusha ezimbini, nangamatakane eegusha aziinkunzi anonyaka, abe yi-14. Zonke zimele zibe zizilwanyana eziphilileyo.+ 33 Xa kunikelwa ngeenkunzi zeenkomo, iinkunzi zeegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 34 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye neminikelo eselwayo.+

35 “‘Ngosuku lwesibhozo nimele nibe nendibano engcwele. Ze ningenzi nawuphi na umsebenzi onzima.+ 36 Nimele nenze umnikelo otshiswayo olivumba elimnandi* kuYehova ngethole lenkomo eliyinkunzi, ngenkunzi yegusha nangamatakane eegusha aziinkunzi anonyaka abe sixhenxe. Zonke zimele zibe zizilwanyana eziphilileyo.+ 37 Xa kunikelwa ngenkunzi yenkomo, inkunzi yegusha, namatakane eegusha aziinkunzi, kumele kwenziwe nomnikelo wokutya neminikelo eselwayo, ngokwenani lezo zilwanyana, ngendlela ekuqhele ukwenziwa ngayo. 38 Kumele kunikelwe nangetakane lebhokhwe elinye elingumnikelo wesono, ukongeza kumnikelo otshiswayo owenziwa qho, ohamba nomnikelo wokutya, kunye nomnikelo oselwayo.+

39 “‘Ezi zinto nimele nizinikele kuYehova ngamaxesha amatheko enu,+ ukongeza kwiminikelo yenu yezifungo,+ iminikelo yenu yokuzithandela+ eyiminikelo etshiswayo,+ iminikelo yenu yokutya,+ iminikelo yenu eselwayo+ nemibingelelo yenu yobuhlobo.’”+ 40 UMoses wawaxelela amaSirayeli yonke into uYehova awayemyalele yona.

30 Emva koko uMoses wathetha neenkosi+ zezizwe zakwaSirayeli, esithi: “Uthi uYehova: 2 Ukuba umntu wenza isifungo+ kuYehova okanye uyafunga+ ukuba akazi kuyenza into ethile, umele asigcine isifungo sakhe.+ Ufanele enze kanye ngokwesifungo sakhe.+

3 “Ukuba intombi ithembisa uYehova okanye ifunga ukuba ayizukuyenza into ethile, ngoxa isencinci yaye isahlala endlini katata wayo, 4 aze utata wayo asive isifungo sayo okanye isifungo sayo sokuba ayizukuyenza into ethile ibe akanangxaki naso, zonke izifungo zaloo ntombazana ziza kuma. Ibophelelekile kuyo yonke into ebifunge ukuba ayizukuyenza. 5 Kodwa ukuba utata wayo akavumi, akuva ukuba loo ntombi yenze izifungo okanye ifunge ukuba ayizukuzenza izinto ezithile, azizukuma ezo zifungo. UYehova uza kuyixolela kuba utata wayo akayivumelanga.+

6 “Kodwa ke, ukuba iyatshata ibe isephantsi kwesifungo okanye isithembiso esenziwe ngokungxama sokuba ayizukuyenza into ethile, 7 ize indoda yayo ive ngaso kwaye ingaphikisani naso ngemini eve ngayo, izifungo okanye izifungo ezenzileyo zokuba ayizukuzenza izinto ezithile, ziza kuma. 8 Kodwa ukuba ngaloo mini indoda yayo iyaphikisana nesifungo okanye isithembiso esenze ngokungxama, ingasiphelisa+ yaye uYehova uza kuyixolela.

9 “Ukuba umhlolokazi okanye umfazi oqhawule umtshato wenza isifungo, ubophelelekile kuso.

10 “Kodwa ke ukuba umfazi usenze eso sifungo okanye eso sifungo sokuba akazukuyenza into ethile esahlala endlini yendoda yakhe, 11 yasiva indoda yakhe yaza ayaphikisana naso okanye yasamkela, zonke izifungo okanye izifungo zokuba akazukuzenza izinto ezithile ziza kuma. 12 Kodwa ukuba ngaloo mini indoda yakhe iyeva ngezo zifungo okanye ezo zifungo zokuba akazukuzenza izinto ezithile ize iziphelise, azizukuma.+ Indoda yakhe iza kube iziphelisile yaye uYehova uza kumxolela loo mfazi. 13 Nasiphi na isifungo okanye isifungo sokuba akazukuyenza into ethile, indoda yakhe ingasivumela sime okanye ingasiphelisa. 14 Kodwa ukuba kugqitha iintsuku indoda yakhe ingaphikisani nazo, iza kuba ke iyazimisela zonke izifungo okanye zonke izifungo zaloo mfazi zokuba akazukuzenza izinto ezithile. 15 Kodwa ke ukuba iyaziphelisa sekudlule iintsuku ivile ngazo, iza kulithwala ityala laloo mfazi.+

16 “Leyo ke yimithetho uYehova awayiyalela uMoses, engendoda nomfazi wayo, nangotata nentombi yakhe encinci esahlala endlini yakhe.”

31 Emva koko uYehova wathi kuMoses: 2 “Waphindezelele+ amaSirayeli kumaMidiyan.+ Emva koko uza kuhlanganiselwa kubantu bakowenu.”*+

3 Ngoko uMoses wathi ebantwini: “Xhobisani amadoda ukuze ayokulwa namaMidiyan, ukuze uYehova aziphindezelele ngawo kumaMidiyan. 4 Kwisizwe ngasinye sakwaSirayeli thumelani emkhosini amadoda ayi-1 000.” 5 Kumawaka akwaSirayeli+ kwakhutshwa amadoda ayi-1 000 kwisizwe ngasinye, ngoko ke atsho ayi-12 000 amadoda axhobele imfazwe.

6 Ngoko uMoses wathi kumadoda ayi-1 000 aphuma kwisizwe ngasinye, mawahambe noFinehasi+ unyana kaEleyazare umbingeleli, ephethe izinto ezingcwele namaxilongo+ okuhlaba umkhosi. 7 Loo madoda alwa imfazwe namaMidiyan, kanye njengoko uYehova wayeyalele uMoses, aza awabulala onke amadoda. 8 Phakathi kwabantu awababulalayo, abulala nookumkani bakwaMidiyan abangaba: uEvi, uRekem, uTsure, uHure noRebha, ookumkani abahlanu bakwaMidiyan. Abulala noBhileham+ unyana kaBhehore ngekrele. 9 Kodwa ke amaSirayeli abathimba abafazi nabantwana bakwaMidiyan. Azoxutha izilwanyana zasekhaya, yonke nje imfuyo yawo nazo zonke izinto zawo. 10 Zonke izixeko awayehlala kuzo neenkampu* zawo azitshisa. 11 Awaphanga amaMidiyan, athimba abantu nezilwanyana. 12 Emva koko azisa abantu nezinto awayezithimbile kuMoses nakuEleyazare umbingeleli nakwibandla lamaSirayeli enkampini, kwintlango yakwaMowabhi,+ engaseYordan eYeriko.

13 Ngoko uMoses noEleyazare umbingeleli neenkokheli zebandla baphuma baya kuwahlangabeza ngaphandle kwenkampu. 14 Ngoko zamcaphukisa uMoses iinkokheli zomkhosi, iintloko zamawaka neentloko zamakhulu ezazivela emfazweni. 15 UMoses wathi kuzo: “Kutheni nibasindisile aba bafazi? 16 Ikwangaba bafazi abamamela uBhileham, baza babangela amaSirayeli akathembeka+ kuYehova ngento eyenzeka ePehore,+ laza ibandla likaYehova lafumana isibetho.+ 17 Bulalani bonke abantwana abangamakhwenkwe, nize nibulale wonke umfazi owakha walala nendoda. 18 Kodwa ningawabulali amantombazana angekalali nandoda.+ 19 Emva koko hlalani ngaphandle kwenkampu iintsuku ezisixhenxe. Wonke umntu obuleleyo nomntu ochukumise umntu obuleweyo+ umele azicoce+ ngosuku lwesithathu nangosuku lwesixhenxe, nicoce nabantu enibathimbileyo. 20 Nimele nicoce zonke iimpahla, yonke into eyenziwe ngesikhumba, yonke into eyenziwe ngoboya bebhokhwe nayo yonke into eyenziwe ngomthi.”

21 Emva koko uEleyazare umbingeleli wathi kumadoda awayeye emfazweni: “Nanku umthetho uYehova awunike uMoses, 22 ‘Igolide, isilivere, ikopolo, intsimbi, inkcenkce nelothe, 23 nayo yonke into engatshiyo xa ifakwa emlilweni, imele icocwe ngomlilo. Kodwa ke ifanele icocwe nangamanzi okucoca.+ Yonke into engenakufakwa emlilweni ifanele ihlanjwe ngamanzi. 24 Yaye nimele nihlambe iimpahla zenu ngosuku lwesixhenxe nize nicoceke, emva koko ningangena enkampini.’”+

25 Emva koko uYehova wathi kuMoses: 26 “Bala zonke izinto ezoxuthiweyo, ubale abantu nezilwanyana. Yenze le nto noEleyazare umbingeleli neentloko zezindlu zootata zebandla. 27 Izinto ezoxuthwe emfazweni zahlule kubini, uzahlulele abo bebeye emfazweni nalo lonke ibandla.+ 28 Kwizinto ezahlulelwe amajoni ebeye emfazweni, thatha umntu abe mnye kwabayi-500, uthathe ngolo hlobo nakumhlambi weenkomo, nakoweedonki, nakoweegusha, zibe yirhafu kaYehova. 29 Ezo zinto umele uzithathe kwezo bebezahlulelwe uze uzinike uEleyazare umbingeleli, zibe ngumnikelo kaYehova.+ 30 Kwizinto ebezahlulelwe amaSirayeli, uze uthathe umntu abe mnye kwabayi-50, uthathe kanjalo nakumhlambi weenkomo, nakoweedonki, nakoweegusha, nakuzo zonke iintlobo zezilwanyana zasekhaya uzinike abaLevi,+ abenza umsebenzi wasententeni engcwele kaYehova.”+

31 Ngoko uMoses noEleyazare umbingeleli benza kanye njengoko uYehova wayemyalele uMoses. 32 Izinto ezashiyekayo kwezo abantu babezixuthe emfazweni, yaba ziigusha eziyi-675 000, 33 iinkomo eziyi-72 000, 34 needonki eziyi-61 000. 35 Xa ewonke amabhinqa angazange abelane ngesondo nandoda+ aba yi-32 000. 36 Izinto ababezahlulelwe abo babeye emfazweni yaba ziigusha eziyi-337 500. 37 Irhafu kaYehova yaba ziigusha eziyi-675. 38 Bafumana iinkomo eziyi-36 000, yaye irhafu kaYehova yaba zeziyi-72. 39 Bafumana iidonki eziyi-30 500, yaye irhafu kaYehova yaba zeziyi-61. 40 Bafumana abantu abayi-16 000 yaye irhafu kaYehova yaba ngabayi-32. 41 Emva koko uMoses wanika uEleyazare umbingeleli irhafu yaba ngumnikelo kaYehova,+ kanye njengoko uYehova wayeyalele uMoses.

42 Izinto ezazahlulelwe amaSirayeli, uMoses awayezithathe kumadoda awayeye emfazweni, 43 yayiziigusha eziyi-337 500, 44 iinkomo ziyi-36 000, 45 iidonki ziyi-30 500, 46 bona abantu beyi-16 000. 47 Kwizinto ebezahlulelwe amaSirayeli, uMoses wathatha umntu wamnye kwabayi-50, wenza njalo nakwizilwanyana, waza wanika abaLevi+ abenza umsebenzi wasententeni engcwele kaYehova+ kanye njengokuba uYehova wayeyalele uMoses.

48 Ngoko iinkokheli zomkhosi,+ iintloko zamawaka neentloko zamakhulu zasondela kuMoses, 49 zathi kuye: “Izicaka zakho ziwabalile amadoda emfazwe esiwaphetheyo yaye akukho nenye engekhoyo.+ 50 Sivumele ukuba sonke sinikele kuYehova ngezinto esizifumeneyo, izinto zegolide, amatsheyini afakwa emaqatheni, izacholo ezifakwa esihlahleni, iiringi zokubeka isitampu, amacici, nezinye izacholo, ukuze sizihlawulele kuYehova.”

51 Ngoko uMoses noEleyazare umbingeleli bayamkela igolide nazo zonke izacholo abazinikwayo ngabo bantu 52 Xa iyonke igolide ezanikela ngayo kuYehova iinkokheli zomkhosi, iintloko zamawaka neentloko zamakhulu yaba ziishekele* eziyi-16 750. 53 Ndoda nganye eyayiye emkhosini yayizixuthele izinto. 54 UMoses noEleyazare umbingeleli bayithatha igolide ababeyinikwa ziinkokheli zomkhosi, iintloko zamawaka neentloko zamakhulu baza bayifaka ententeni yokuhlangana ukuze ibe sisikhumbuzo kumaSirayeli phambi koYehova.

32 Oonyana bakaRubhen+ noonyana bakaGadi+ babenemfuyo eninzi kakhulu, yaye babona ukuba umhlaba waseYazere+ nowaseGiliyadi wawuyindawo entle yemfuyo. 2 Ngoko oonyana bakaGadi noonyana bakaRubhen baya kuMoses noEleyazare umbingeleli nakwiinkokheli zebandla, bathi: 3 “IAtaroti, iDibhon, iYazere, iNimra, iHeshbhon,+ iEleyale, iSebham, iNebho+ neBheyon,+ 4 iindawo awazoyisayo uYehova phambi kwamaSirayeli+ ziindawo ezintle zemfuyo, yaye izicaka zakho zinemfuyo eninzi kakhulu.”+ 5 Baqhubeka bathi: “Ukuba siyathandeka emehlweni akho, sicela ukunikwa lo mhlaba ube lilifa lethu. Masingabi sayiwela iYordan.”

6 Emva koko wathi uMoses koonyana bakaGadi noonyana bakaRubhen: “Nifuna abantakwenu baye bodwa emfazweni, ngoxa nina nihleli apha? 7 Kutheni nifuna ukutyhafisa abantu bakwaSirayeli bangaweli baye kwilizwe uYehova aza kubanika lona ngokuqinisekileyo? 8 Yiloo nto kanye eyenziwa ngootata benu xa ndandibathume eKadeshe-bharneya ukuba bayokuhlola ilizwe.+ 9 Xa baya kwiNtlambo Yase-Eshkoli+ baza balibona ilizwe, babuya babatyhafisa abantu bakwaSirayeli, ukuba bangayi kwilizwe uYehova athe uza kubanika lona.+ 10 UYehova wacaphuka kakhulu ngaloo mini waza wafunga wathi:+ 11 ‘Amadoda awaphuma eYiputa eneminyaka eyi-20 ukunyuka awazukulibona ilizwe+ endafunga ngalo kuAbraham, uIsake noYakobi,+ kuba awandilandelanga ngentliziyo yawo yonke, 12 ngaphandle kukaKalebhi+ unyana kaYefune umKenizi noYoshuwa+ unyana kaNun, bona bamlandela ngentliziyo yabo yonke uYehova.’+ 13 Ngoko uSirayeli wamcaphukisa kakhulu uYehova, waza wababhadulisa entlango iminyaka eyi-40,+ sade saphela eso sizukulwana esasisenza ububi emehlweni kaYehova.+ 14 Ngoku nani nifana nootata benu, inzala yabantu abanesono abamenza wanomsindo kakhulu uYehova kuSirayeli. 15 Ukuba niyayeka ukumlandela, uza kuphinda awashiye entlango amaSirayeli, nibe ke nibazisele intlekele aba bantu.”

16 Ethubeni babuyela kuye baza bathi: “Sivumele sakhele imfuyo yethu izibaya zamatye, sakhele nabantwana bethu izixeko. 17 Kodwa thina siza kuhlala sikulungele ukulwa,+ sihambe phambi kwamaSirayeli de afike endaweni yawo, ngoxa abantwana bethu behleli kwizixeko ezikhuselekileyo, bekhuselwe kubemi beli lizwe. 18 Asizukubuyela ezindlini zethu de onke amaSirayeli awufumane umhlaba olilifa lawo.+ 19 Thina asizukufumana lifa kunye nabo ngaphesheya kweYordan, kuba sele silifumene elethu ilifa kweli cala.”+

20 UMoses wathi kubo: “Ukuba niza kuxhobela imfazwe phambi koYehova;+ 21 yaye ukuba nonke nithatha izixhobo nize niwele iYordan phambi koYehova njengoko ezitshayela iintshaba zakhe phambi kwakhe,+ 22 de loyiswe ilizwe phambi koYehova,+ ningabuya+ nize nikhululeke kwityala eninalo kuYehova nakuSirayeli. Ngoko eli lizwe liza kuba lilifa lenu phambi koYehova.+ 23 Kodwa ukuba aniyenzi le nto, niza kube nimonile uYehova, yaye niza kohlwaywa ngenxa yesono senu. 24 Ngoko ningabakhela abantwana benu izixeko, nakhele nemihlambi yenu izibaya,+ kodwa qinisekani ukuba niyayenza le nto niyithembisileyo.”

25 Oonyana bakaGadi noonyana bakaRubhen bathi kuMoses: “Izicaka zakho ziza kwenza kanye njengokuba inkosi yam isitsho. 26 Abantwana bethu, abafazi bethu, imfuyo yethu nazo zonke izilwanyana zethu zasekhaya ziza kushiyeka kwizixeko zaseGiliyadi,+ 27 kodwa zona izicaka zakho ziza kuwela, onke amadoda exhobele imfazwe ukuze alwe phambi koYehova,+ kanye njengokuba inkosi yam ithethile.”

28 Ngoko uMoses wabayaleza kuEleyazare umbingeleli, uYoshuwa unyana kaNun nakwiintloko zezindlu zootata zezizwe zakwaSirayeli. 29 Wathi uMoses kubo: “Ukuba oonyana bakaGadi noonyana bakaRubhen bawela nani iYordan, wonke umntu exhobele imfazwe phambi koYehova, lize loyiswe ilizwe phambi kwenu, nimele nibanike ilizwe laseGiliyadi libe lilifa labo.+ 30 Kodwa ukuba abazithathi izixhobo baze bawele nani, bamele bahlale nani elizweni laseKanan.”

31 Baphendula oonyana bakaGadi noonyana bakaRubhen, bathi: “Into ayithethileyo uYehova kwizicaka zakho siza kuyenza. 32 Siza kuthatha izixhobo size siwele phambi koYehova, siye kwilizwe lakwaKanan,+ kodwa elethu ilifa liza kuba kweli cala leYordan.” 33 Ngoko uMoses wanika oonyana bakaGadi noonyana bakaRubhen+ nehafu yesizwe sakwaManase+ unyana kaYosefu, umhlaba kaSihon+ ukumkani wama-Amori nomhlaba kaOgi+ ukumkani waseBhashan. Wabanika elo lizwe nezixeko zalo, nezixeko ezilijikelezileyo.

34 Oonyana bakaGadi bakha* iDibhon,+ iAtaroti,+ iArohere,+ 35 iAtaroti-shofani, iYazere,+ iYogebheha,+ 36 iBhete-nimra+ neBhete-haran,+ izixeko ezikhuselekileyo baza bakha nezibaya zemihlambi. 37 Bona oonyana bakaRubhen bakha iHeshbhon,+ iEleyale,+ iKiriyatayim,+ 38 iNebho,+ iBhahali-meyon,+ ezatshintshwa amagama, neSibhema. Bazibiza ngamagama amatsha ezo zixeko babezakhile.

39 Oonyana bakaMakire+ unyana kaManase bahlasela iGiliyadi baza bayithimba, bawagxotha ama-Amori awayelapho. 40 Ngoko uMoses wanika uMakire unyana kaManase iGiliyadi, wahlala kuyo.+ 41 Yena uYayire unyana kaManase waya kuthimba iidolophana zama-Amori ezazingqonge iGiliyadi, waza wazibiza ngokuthi yiHavoti-yayire.*+ 42 NoNobha wahlasela waza wathimba iKenati needolophu eziphantsi kwayo;* waza wayibiza ngegama lakhe, wathi yiNobha.

33 Nalu uhambo lwabantu bakwaSirayeli ukuphuma kwabo eYiputa+ behamba ngokwamaqela abo*+ bekhokelwa nguMoses noAron.+ 2 UMoses waqhubeka ezibhala iindawo ababehlala kuzo kuhambo lwabo njengoko wayeyalelwe nguYehova. Nalu uhambo lwabo:+ 3 AmaSirayeli emka eRameses+ ngenyanga yokuqala ngosuku lwe-15.+ Aphuma eYiputa engoyiki, ebonwa ngawo onke amaYiputa, kanye ngosuku olwalusemva kwePasika.+ 4 Ngelo xesha wona amaYiputa ayengcwaba onke amazibulo awayebulewe nguYehova,+ kuba uYehova wayegwebe izithixo zawo.+

5 Ngoko amaSirayeli emka eRameses ayokuhlala eSukoti.+ 6 Emva koko emka eSukoti ayokuhlala e-Etham,+ ngasekupheleni kwentlango. 7 Asuka e-Etham abuyela ngasePihahiroti, ejongene neBhahali-tsefon,+ ahlala phambi kweMigdoli.+ 8 Asuka ePihahiroti anqumla phakathi elwandle+ aya entlango,+ ahamba iintsuku ezintathu entlango yase-Etham,+ aza ayokuhlala eMara.+

9 Emva koko emka eMara aya e-Elim. E-Elim kwakukho imithombo yamanzi eyi-12 nemithi yesundu eyi-70, ngoko ahlala apho.+ 10 Emka e-Elim ayokuhlala ngakuLwandle Olubomvu. 11 Emva koko emka ngakuLwandle Olubomvu ayoku­hlala kwintlango yaseSin.+ 12 Emka kwintlango yaseSin ayokuhlala eDofeka. 13 Ethubeni emka eDofeka ayokuhlala eAlushe. 14 Emva koko emka eAlushe ayokuhlala eRefidim+ yaye apho abantu babengenamanzi okusela. 15 Emka eRefidim ayokuhlala entlango yaseSinayi.+

16 Emka entlango yaseSinayi ayokuhlala eKibroti-hatava.+ 17 Emka eKibroti-hatava ayokuhlala eHatseroti.+ 18 Emva koko emka eHatseroti ayokuhlala eRitema. 19 Emka eRitema ayokuhlala eRimon-peretse. 20 Emva koko emka eRimon-peretse ayokuhlala eLibhena. 21 Emka eLibhena ayokuhlala eRisa. 22 Emka eRisa ayokuhlala eKehelata. 23 Emka eKehelata ayokuhlala eNtabeni YeShefere.

24 Emva koko emka eNtabeni YeShefere ayokuhlala eHarada. 25 Emka eHarada ayokuhlala eMakeloti. 26 Emka+ eMakeloti ayokuhlala eTahati. 27 Emva koko emka eTahati ayokuhlala eTera. 28 Emka eTera ayokuhlala eMiteka. 29 Ethubeni emka eMiteka ayokuhlala eHashmona. 30 Emka eHashmona ayokuhlala eMoseroti. 31 Emka eMoseroti ayokuhlala eBhene-yahakan.+ 32 Emka eBhene-yahakan ayokuhlala eHore-hagidegadi. 33 Emva koko emka eHore-hagidegadi ayokuhlala eYotebhata.+ 34 Ethubeni emka eYotebhata ayokuhlala eAbrona. 35 Emka eAbrona ayokuhlala e-Etsiyon-gebhere.+ 36 Emva koko emka e-Etsiyon-gebhere ayokuhlala entlango yaseTsin,+ oko kukuthi, eKadeshe.

37 Ethubeni emka eKadeshe ayokuhlala eNtabeni YeHore,+ kumda welizwe lakwaEdom. 38 UAron umbingeleli wenyuka iNtaba YeHore njengoko wayeyalelwe nguYehova waza wafela apho. Wafa ngonyaka we-40 amaSirayeli emkile elizweni laseYiputa, ngosuku lokuqala kwinyanga yesihlanu.+ 39 UAron wayeneminyaka eyi-123 ukufa kwakhe eNtabeni YeHore.

40 Ukumkani waseAradi,+ umKanan owayehlala eNegebhi, kwilizwe lakwaKanan, weva ukuba amaSirayeli ayeza.

41 Ethubeni emka eNtabeni YeHore+ ayokuhlala eTsalmona. 42 Emka eTsalmona ayokuhlala ePunon. 43 Emka ePunon ayokuhlala eObhoti.+ 44 Emva koko emka eObhoti ayokuhlala eIye-abharim kumda wakwaMowabhi.+ 45 Ethubeni emka eIyim ayokuhlala eDibhon-gadi.+ 46 Emva koko emka eDibhon-gadi ayokuhlala eAlmon-diblatayim. 47 Emka eAlmon-diblatayim ayokuhlala kwiintaba zeAbharim+ eziphambi kweNebho.+ 48 Ekugqibeleni emka kwiintaba zeAbharim ayokuhlala kwintlango yakwaMowabhi ngaseYordan eYeriko.+ 49 Aqhubeka ehlala ngaseYordan, ukususela eBhete-yeshimoti ukuya kutsho eAbheli-shitim,+ kwintlango yakwaMowabhi.

50 UYehova wathetha noMoses kwintlango yakwaMowabhi ngaseYordan eYeriko, esithi: 51 “Yithi kumaSirayeli, ‘Ngoku niwela iYordan, ningena kwilizwe lakwaKanan.+ 52 Nimele nibagxothe bonke abemi beli lizwe phambi kwenu nize niyitshabalalise yonke imifanekiso yabo yamatye,+ nemifanekiso yabo yesinyithi,+ nitshabalalise nazo zonke iindawo zabo eziphakamileyo ezingcwele.+ 53 Lithatheni elo lizwe nihlale kulo, kuba nakanjani ndiza kuninika lona libe lilifa lenu.+ 54 Nimele niwahlule ngamaqashiso+ umhlaba ube lilifa leentsapho zenu. Nize nilandise ilifa leqela elinabantu abaninzi, nilinciphise ilifa leqela elinabantu abambalwa.+ Wonke umntu uza kunikwa ilifa lakhe apho liwele khona iqashiso lakhe. Niza kufumana ilifa lenu lomhlaba ngokwezizwe zootata benu.+

55 “‘Ukuba anibagxothi abantu beli lizwe,+ abo bashiyekileyo baza kuba njengezinto eziphandlayo emehlweni enu nameva anihlabayo, baze baniphathe kakubi kwilizwe eniza kuhlala kulo.+ 56 Nani ndiza kunenza loo nto bendizimisele ukuyenza kubo.’”+

34 UYehova waphinda wathi kuMoses: 2 “Yithi kumaSirayeli: ‘Ngoku ningena kwilizwe lakwaKanan.+ Lo mhlaba kunye nemida yawo uza kuba lilifa lenu.+

3 “‘Umda wenu osemazantsi uza kusuka entlango yaseTsin ecaleni kwe-Edom, uyokutsho apho luqala khona uLwandle LweTyiwa.*+ 4 Umda wenu uza kujika uye ngasemazantsi eqhina laseAkrabhim,+ uqhubeke uye eTsin, uze uphele emazantsi eKadeshe-bharneya.+ Uza kuya ngaseHatsare-adare+ uyokufika eAzemon. 5 Umda uza kujika eAzemon uye ngakwiNtlambo YaseYiputa, uyokuphela eLwandle.*+

6 “‘Umda wenu osentshona uza kuba luLwandle Olukhulu* nonxweme lwalo. Ngumda wenu wasentshona ke lowo.+

7 “‘Umda wenu osemantla ngulo: Uza kusuka kuLwandle Olukhulu uyokutsho eNtabeni YeHore. 8 Niza kuwucanda umda lowo ukusuka kwiNtaba YeHore ukuya eLebho-hamati,*+ uye kuphela eTsedadi.+ 9 Yaye umele usuke apho uye eZifron, uze uye kuphelela eHatsare-enan.+ Ngumda wenu wasemantla ke lowo.

10 “‘Emva koko niza kucanda umda wenu ongasempuma usuke eHatsare-enan uye eShefam. 11 Uza kusuka eShefam uye eRibhela, ngakwimpuma yeAyin, uze uhle unqumle ithambeka elingasempuma kuLwandle LwaseKinereti.*+ 12 Uza kuhla ngeYordan uye kuphela kuLwandle LweTyiwa.+ Elo ke iza kuba lilizwe lenu+ nemida yalo.’”

13 Ngoko uMoses wayalela amaSirayeli wathi: “Nalo ke ilizwe eniza kwahlulelana ngalo ngamaqashiso,+ kanye njengokuba uYehova eyalele ukuba linikwe izizwe ezisithoba ezinehafu. 14 Kuba isizwe sakwaRubhen ngokwezindlu zootata, isizwe sakwaGadi ngokwezindlu zootata nehafu yesizwe sakwaManase, sele zilithathile elazo ilifa.+ 15 Ezi zizwe zibini nehafu sele zilithathile ilifa lazo nganeno kweYordan ngaseYeriko, empumalanga.”+

16 UYehova waqhubeka ethetha noMoses esithi: 17 “Nanga amagama amadoda aza kunahlulela umhlaba oza kuba lilifa lenu: nguEleyazare+ umbingeleli noYoshuwa+ unyana kaNun. 18 Niza kuthatha inkosi kwisizwe ngasinye ukuze nahlule umhlaba oza kuba lilifa lenu.+ 19 Nanga amagama aloo madoda: kwisizwe sakwaYuda,+ nguKalebhi+ unyana kaYefune; 20 kwisizwe soonyana bakaSimeyon,+ nguShemuweli unyana ka-Amihudi; 21 kwisizwe sakwaBhenjamin,+ nguElidadi unyana kaKislon; 22 kwisizwe soonyana bakaDan,+ yinkosi enguBhuki unyana kaYogeli; 23 koonyana bakaYosefu,+ kwisizwe soonyana bakaManase,+ yinkosi enguHaniyeli unyana kaEfodi; 24 ­kwisizwe soonyana bakaEfrayim,+ yinkosi enguKemuweli unyana kaShifetan; 25 kwisizwe soonyana bakaZebhulon,+ yinkosi enguElitsafan unyana kaParnaki; 26 kwisizwe soonyana ­bakaIsakare,+ yinkosi enguPaltiyeli unyana ka-Azan; 27 kwisizwe soonyana baka-Ashere,+ yinkosi enguAhihudi unyana kaShelomi; 28 kwisizwe soonyana bakaNafetali,+ yinkosi enguPedaheli unyana ka-Amihudi.” 29 Lawo ke ngamadoda uYehova awawayalela ukuba acandele amaSirayeli umhlaba kwilizwe lakwaKanan.+

35 UYehova waqhubeka ethetha noMoses kwintlango yakwaMowabhi, ngaseYordan+ eYeriko, esithi: 2 “Yalela amaSirayeli ukuba kwilifa lawo anike abaLevi izixeko abaza kuhlala kuzo,+ abanike namadlelo angqonge ezo zixeko.+ 3 AbaLevi baza kuhlala kwezi zixeko, wona amadlelo abe ngawemfuyo yabo, izinto zabo, nazo zonke ezinye izilwanyana zabo. 4 Amadlelo ezo zixeko uza kuzinika abaLevi, aza kuqala eludongeni aze anabe umgama oziikubhite* eziyi-1 000, ajikeleze sonke isixeko. 5 Nimele nibale ukusuka ngaphandle kwesixeko iikubhite eziyi-2 000 kwicala elingasempuma, iikubhite eziyi-2 000 kwicala elingasemzantsi, iikubhite eziyi-2 000 kwicala elingasentshona neekubhite eziyi-2 000 kwicala elingasemntla, isixeko sibe phakathi. Lawo iza kuba ngamadlelo ezixeko zabo.

6 “AbaLevi niza kubanika izixeko eziyi-42 kunye nezixeko zokubalekela ezithandathu+ aza kubalekela kuzo umntu obuleleyo.+ 7 Zizonke izixeko eniza kuzinika abaLevi ziyi-48, namadlelo azo.+ 8 Izixeko eniza kubanika zona nimele nizithathe kwilifa lamaSirayeli.+ Kwiqela elinabantu abaninzi nimele nithathe ezininzi, kwelinabantu abambalwa, nithathe ezimbalwa.+ Izixeko iqela elizinika abaLevi ziza kuxhomekeka ekubeni lingakanani ilifa lalo.”

9 UYehova waqhubeka wathi kuMoses: 10 “Yithi kumaSirayeli, ‘Ngoku niwela iYordan ningena kwilizwe lakwaKanan.+ 11 Nimele nikhethe izixeko ekulula ukufikelela kuzo, zibe zizixeko apho umntu obulele ngempazamo anokubalekela khona.+ 12 Ezi zixeko ziza kuba ziindawo enibalekela kuzo ukuze zikhusele umbulali kumphindezeli wegazi,+ de ityala lakhe lixoxwe phambi kwebandla.+ 13 Ngoko ke ezo zixeko zithandathu eniza kuzinika abaLevi, ziza kusetyenziselwa le njongo. 14 Niza kubanika izixeko ezithathu nganeno kweYordan,+ nezixeko ezithathu kwilizwe lakwaKanan,+ zibe zizixeko zokubalekela. 15 Ezi zixeko zithandathu aza kubalekela kuzo amaSirayeli, umntu wasemzini,+ umntu ohlala nani, wonke nje umntu obulele omnye umntu ngempazamo.+

16 “‘Kodwa ukuba umbethe ngentsimbi wafa, loo mntu ngumbulali, nakanjani umele abulawe.+ 17 Ukuba umbethe ngelitye elinokumbulala aze afe, loo mntu ngumbulali, nakanjani umele abulawe. 18 Ukuba umbethe ngento eyenziwe ngomthi enokumbulala aze afe, loo mntu ngumbulali, nakanjani umele abulawe.

19 “‘Ngumphindezeli wegazi oza kubulala umntu obuleleyo. Akudibana naye uza kumbulala ngokwakhe loo mntu. 20 Ukuba umntu uye wafa ngenxa yokuba omnye eye wamtyhala kuba emcaphukela okanye wamgibisela ngento ngenjongo yokumenzakalisa,*+ 21 okanye wambetha ngesandla wafa kuba emcaphukela, nakanjani loo mntu ubuleleyo umele abulawe, ungumbulali. Umphindezeli wegazi uza kumbulala xa edibana naye.

22 “‘Kodwa ukuba umtyhale ngempazamo kungekhona kuba emcaphukela okanye wamgibisela nangantoni na engenazinjongo zakumenzakalisa,*+ 23 okanye uthe engamboni wamwisela ngelitye wabe engelotshaba lwakhe okanye engafuni kumenzakalisa, aze loo mntu afe, 24 ibandla limele ligwebe phakathi komntu obuleleyo nomphindezeli wegazi, ngokwale miyalelo.+ 25 Ngoko ke ibandla limele limsindise lowo ubuleleyo kumphindezeli wegazi, lize limbuyisele kwisixeko ebebalekele kuso, yaye umele ahlale apho de afe umbingeleli omkhulu owathanjiswa ngeoli engcwele.+

26 “‘Kodwa ukuba umntu obuleleyo uyaphuma, agqithe ngaphaya kwemida yesixeko sokubalekela, 27 aze umphindezeli wegazi ambone engaphandle komda weso sixeko aze ambulale, umphindezeli akazukuba netyala legazi. 28 Loo mntu ubuleleyo ufanele ahlale kwisixeko sakhe sokubalekela ade afe umbingeleli omkhulu. Kodwa emva kokuba efile umbingeleli omkhulu, umbulali angabuyela kumhlaba wakhe.+ 29 Le yimithetho eniza kuyisebenzisa kuzo zonke izizukulwana zenu, kuzo zonke iindawo enihlala kuzo.

30 “‘Nawuphi na umntu obulala omnye, ufanele abulawe kuba ungumbulali+ xa kukho abantu abayingqinayo loo nto,+ kodwa ke akukho mntu umele abulawe ngobungqina bomntu omnye. 31 Nimele ningayithathi intlawulo endaweni yobomi bombulali ofanelwe kukufa, kuba nakanjani umele abulawe.+ 32 Yaye animele nithathe ntlawulo ngomntu obalekele kwisixeko sakhe sokubalekela, nize nimvumele aphindele kumhlaba wakhe ngaphambi kokuba afe umbingeleli omkhulu.

33 “‘Animele nilingcolise ilizwe enihlala kulo, kuba igazi liyalingcolisa ilizwe,+ ibe ekuphela kwendlela yokuhlawulela igazi elichithwe elizweni, kukuchitha igazi laloo mntu uchithe igazi.+ 34 Nize ningalingcolisi ilizwe enihlala kulo, nendihlala kulo mna; kuba mna Yehova ndihleli nabantu bakwaSirayeli.’”+

36 Iintloko zeentsapho zenzala kaGiliyadi unyana kaMakire+ unyana kaManase weentsapho zoonyana bakaYosefu, zeza kuthetha noMoses neenkosi, iintloko-ntsapho zakwaSirayeli. 2 Zathi: “UYehova wayalela inkosi yam ukuba ilahlule ilizwe libe lilifa lamaSirayeli ngamaqashiso;+ yaye inkosi yam yayalelwa nguYehova ukuba ilifa likaTselofehadi umntakwethu linikwe iintombi zakhe.+ 3 Ukuba ezi ntombi zitshata namadoda esinye isizwe sakwaSirayeli ilifa lazo liza kuyeka ukuba lelootata bethu, libe lelesizwe ezitshatele kuso, ngaloo ndlela liphume kwiqashiso lelifa lethu. 4 Xa amaSirayeli ebhiyozela uNyaka Wenkululeko,*+ ilifa lezo ntombi liza kongezelelwa kwilifa lesizwe ezitshatele kuso, likhutshwe ilifa lazo kwilifa lootata bethu.”

5 Emva koko uMoses wayalela amaSirayeli ethunywa nguYehova, wathi: “Isizwe soonyana bakaYosefu sinyanisile. 6 Nanku umyalelo kaYehova ngeentombi zikaTselofehadi: ‘Zingatshata nabantu ezifuna ukutshata nabo, kodwa ke zifanele zitshate nomntu ozalwa kwintsapho yesizwe sikatata wazo. 7 Akukho lifa lamaSirayeli limele lisuke kwesinye isizwe liye kwesinye, kuba amaSirayeli amele aligcine ilifa lesizwe sookhokho bawo. 8 Zonke iintombi ezinelifa kwizizwe zakwaSirayeli, zifanele zitshate nomntu oyinzala yesizwe sikatata wazo,+ ukuze amaSirayeli aligcine ilifa lookhokho bawo. 9 Akukho lifa lifanele lisuswe kwesinye isizwe lisiwe kwesinye, kuba izizwe zakwaSirayeli zifanele ziligcine ilifa lazo.’”

10 Iintombi zikaTselofehadi zenza ngokomyalelo uYehova awawunika uMoses.+ 11 Ngoko uMahala, uTirtsa, uHogela, uMilka noNowa, iintombi zikaTselofehadi,+ zatshatela koonyana babantakwabotata wazo. 12 Zatshata namadoda aphuma kwiintsapho zakwaManase, unyana kaYosefu, ukuze ilifa lazo lihlale kwisizwe sentsapho katata wakhe.

13 Leyo yimithetho nemiyalelo uYehova awayinika amaSirayeli ngoMoses kwintlango yakwaMowabhi ngaseYordan eYeriko.+