Julho

Viose via handekele ni ku linga Yesu, cipue vene vikomoueso ua tambuluisile cifua ca kele na ku livuilamo Ise na visinganieka vieni. (Yoa. 14:9) Vika tu hasa ku lilongesa ku vikomoueso via Yesu? Yesu na Ise va tu lema mua kama. Mua kele hano ha mavu, Yesu ua muesele ngecize ua lemene cikuma vantu mu ku linga vikomoueso linga a va tundise mu lamba. Tangua limo, tupuputa vavali va mu tambekele linga a va kuase. (Mat. 20:​30-34) Vinimbu viaco nguavio: “Ua va vuililile cikeketima,” ngeci ua va kanguisile. Lizi lia ciNgelengu li va langulula nguavo, Yesu “ua va vuililile cikeketima,” lia muesa ngecize Yesu ua vuile ku vavala ca kama ku mutima mua muene lamba ya uze yala. Eci cikeketima ca likuata na cilemo, cikeco ca lingisile Yesu ku lisa vantu na ku kanguisa umo mukua mbumba. (Mat. 15:32; Mako 1:41) Tu kalenu na vusunga ngecize Yehova Njambi yetu “ua ngozi” na Muaneni, va tu lema mua kama kaha ve ku ivua ku vavala ku mutima mu ve ku tu mona tu yanda. (Luka 1:78; 1 Pet. 5:7) Mua vusunga, va lavelela mua kama litangua li va ka manusula visoti vie ku yandesa vantu! w23.04 3 ¶4-5

Tu hasa ku lihakela kapandi ka ku liniunga ku viuma vize vi hasa ku pihisa visinganieka vietu, ni vi hasa ku tu sambuisila visinganieka via mu mavu a Satana. Tu hasa ku sulisa visinganieka vietu na viuma via cili mu ku tanda na ku lilongesa Mbimbiliya. Kaha ku kunguluka na ku ambulula naco ci ka niunga visinganieka vietu. Yehova co ua tu kulahesa ngueni, ka ka tavesa tu hite mu vieseko vize ka tu hasa ku kolesa. (1 Kol. 10:​12, 13) Muntu ku muntu ha kati ketu, a tondeka ku tualelelaho ku vundila mua kama linga a tualeleho ku ononoka Yehova, kuno ku matangua a ku kotokela kaha a akalu. Yehova ua tonda tu ‘muanie mitima yetu kuli ikeye’ mu ku vundila. (Visa. 62:8) Puenu na ku sangaziala Yehova na ku mu santsela ku viose vie ku linga. Kaha puenu na ku vundila a mi kuase ku pua va ku simpa mu ku ambulula na ku mi kuasa ku-lua na nkala visoti vi mi solokela ni ku vula nkala vieseko vi muli na ku lihita navio. Kati mu tavese na vimo viahi ni na umo uahi, a mi vindike ku vundila ku-sua kumo kuli Yehova. w23.05 7 ¶17-18

Vika tue ku kungulukila ku viuano? Ca katete, linga tu sangaziale Yehova. (Visa. 26:12; 111:1) Kaha naua tue ku kumbulula ku viuano linga tu hase ku li kaniamesa umo na mukuavo mu vintsimbu vino via vikalu. (1 Tes. 5:11) Mu tue ku imika livoko na ku kumbulula, tue ku puisamo ovu vutumbe vuose vuvali. Vunoni ku tuala ha ku kumbulula, tu hasa ku liuana na vitanga. Ku kumbulula, ci hasa ku tu umisa mutima ni halumo tua lema mua kama ku kumbulula vunoni ka ve tu inika ntsimbu yose i tu na zange. Vati tu hasa kulua na citanga caco? Kapostolo Paulu ua tu lekele ngueni tua pande ku tuala mana ku “ku limamuna vene,” ni nguetu ku likaniamesa umo na mukuavo. Ku nongonona ngecize tu hasa ku kaniamesa vakuetu mu mbunga ambe na mezi a andende lika, ce ku tu vuisa cizango ca ku kumbulula. Kaha ambe nga ka va tu inikile vintsimbu viose vi tu tonda, tu ka viukilila mu ku tantekeya ngecize vamuanetu mu cikungulukilo navo va kala na vukovelelo vua kumbulula.—1 Pet. 3:8. w23.04 20 ¶1-3

Muangana ua lingile mutambi ngecize vaYundeya vose va kele mu vundungo mu Mbambilone mu miaka 70, citava va hiluke kuimbo liavo ku Isaleli. (Ezela 1:​2-4) Yehova ikeye lika ue ku hasele ku puisamo evi. Muomu Mbambilone ka ya kele na ku ecela vindzinda viayo ngoco. (Isa. 14:​4, 17) Vunoni va i vulile kaha muangana ua muha, ua lekele vaYundeya ngecize citava va hiluke ku membo avo. Nkala kaYundeya cikuma-kuma mitue ya vindzivo va pandele ku linga cimo cihangula ca seho: ku tualelelaho ku kala mu Mbambilone ni ku hiluka ku membo avo. Citava cihangula caco ka ca puile ca casi. Vukulupe vua lingisile vamo linga kati va lihake mu vusonde vua ku hiluka ku Isaleli. Kaha mu ku linga cingi ca vaYundeya va semukilile mu Mbambilone, ka va tantekeyele Isaleli. Kuli vakevo, Isaleli ya puile lika cifuti ca vakukuluila yavo. Kaha ci soloka vene ngecize vamo vaYundeya tele va na putuka ku yoya vuino ku Mbambilone. Ngeci mukemuo, ca va kaluuilile ku seza vindzivo viavo via cili na mingoso yavo linga vaye ku cifuti ka va tantekeyele. w23.05 14 ¶1-2

Lizi lia Njambi lia tu kaniamesa ku tualelelaho ku pangela ha ku kolesa, cikeketima na cilemo. Luka 21:19 nguayo: “Miono yenu mu ka i nganiala na lukakatela.” Kolose 3:12 nguayo: “Ngoco vene zalenu . . . mutima ua cikeketima.” Kaha 1 Tesalonika 4:​9, 10 nguauo: “Enu vavene mua lilongesa kuli Njambi ku lilema umo na mukuavo. . . . Vunoni tu mi mamuna, vamuanetu mu tualeleho ku lingamo mu vutuntu.” Vinimbu viose evi, va vi sonekelele vandongesi vaze va kele laza na ku muesa ku kolesa, cikeketima na cilemo. Omo lia vika? Muomu vutuhu va kele laza na ku muesa vifua viaco, kasi va pandele ku tualelelaho ku lingamo. Netu tua pande ku lingamo. Kaha linga mu hase ku vi puisamo, tu hilula vati Vakua Kilistu va ku livanga va muesele nkala cifua, mu nima yaco, tu ka mona vati mu hasa ku tambuluisa vaze vandongesi kaha na ku muesa ngecize mua liviukisila kuiza ca lamba ya kama. Kaha ha i ka hetela lamba ya kama, enu mua lilongesa laza ku kolesa mu vieseko kaha eci ci ka mi kuasa ku tualelelaho ku kolesa ku ntsimbu oyo. w23.07 3 ¶4, 8

Ambe nga tua pua va ku vuavesa ni vakua vampanga veka, tua tondeka ku tualelelaho kuendela mu njila ya ku lela, muomu ikeyo i ka tu tuala ku citungu ca mu lutsilielo kaha na ku vivezikiso via ku lutue vi vu ka neha Vuangana. (Yoa. 10:16) Tunde mu 1919, makulukazi na makulukazi a vamala na vampuevo na vanike va tunda mu Mbambilone ya kama ni nguetu Civunga cose ca Malombelo a Makuli kaha va putuka ku endela mu njila eyi ya cimueso. Yehova ua lingile cose, mu ku tundisa vioua via kele mu tapalo i ve ku endele vaYundeya va kele na ku tunda mu Mbambilone. (Isa. 57:14) Amba co vati va viukisile “Njila ya ku Lela” ya lelo lino? Mu vihita via miaka via kokelele ku muaka ua 1919, Yehova ua pangesele vamala vakua ku mu vuila liova linga va viukise njila ya ku tunda mu Mbambilone ya kama. (Setekesenu na Isaya 40:3.) Va lingile cipanga ca ku viukisa njila ya mu lutsilielo, linga vantu vakua mitima ya cili va hase ku tunda mu Mbambilone ya kama na ku kovela mu citungu ca mu lutsilielo, muze mu va tungulula laza ku lemesa ca ku lela ca Yehova Njambi. w23.05 15-16 ¶8-9

Yehova ua tonda tu mu pangele na ndzolela kaha ku cizango. (2 Kol. 9:7) Ngeci mukemuo, tue ku lihakela kapandi ka ku lihakela vizango via mu lutsilielo ambe nga ku mutima vui. Tu hilulenu via kapostolo Paulu. Ua handekele ngueni: “Nji pokuesa muvila uange, kaha nji u himpuisa ku vundungo.” (1 Kol. 9:​25-27) Paulu ua kele na ku likakateya ku linga via cili, ambe vene ha ntsimbu ya kele na ku ivua cizango ca ku linga vieka. Vuno Yehova ua tavele vipanga via Paulu ni? Eyo ua vi tavele! Kaha ua mu vezikisile ku kapandi kose ka lihakelele. (2 Tim. 4:​7, 8) Na vuno vene, Yehova ue ku ivua ndzolela ya kama mue ku tu mona tu pangela ha cizango cetu ambe nga ku mutima vui. Ue ku ivua ndzolela muomu a tantekeya ngecize vintsimbu vimo, tue ku linga cimo cipanga kati muomu tua lema cipanga caco, vunoni muomu tua lema ikeye. Na vuno vene, ngue muze mua vezikisile kapandi ka Paulu, netu a ka tu vezikisa. (Visa. 126:5) Kaha omo tu ka tambula vivezikiso via Yehova, tu ka putuka ku ivua cizango ka ku lihakela kapandi kakuavo. w23.05 29 ¶9-10

KapostoloPaulu ua setekesele vaze ka va kovoka ku litangua lia Yehova na vakua ku kosa tulo. Muomu ka va tantekeya viuma vie ku lingika ku mukulo uavo ni ku hita ca ntsimbu. Ngeci mukemuo, ka ve ku hasa ku nongonona viuma via seho vie ku soloka ni ku lingako mumo ku tuala ha vikevio. Lelo lino cingi ca vantu va kosa mu lutsilielo. (Loma 11:8) Muomu ka ve ku tuala mana ku viuma vie ku soloka na ku nongonona ngecize tuli ku “matangua a ku manusuila” kaha ngecize lamba ya kama vuovuno i putuka. (2 Pet. 3:​3, 4) Vunoni etu tu tantekeya ngecize nkala litangua lie ku hita cimamuna ca ku tona mu lutsilielo ce ku livuezelela seho. (1 Tes. 5:6) Ngeci mu kemuo, tua pande ku lembama na ku taliangela cahi. Omo lia vika? Linga kati tu uile mu vimpande via pulitika na vikuavo vi ve ku simutuila vantu ku matangua ano. Ntsindiye ya ku likovelesa mu vimpande viaco, ye ku livuezelela nkala litangua omo litangua lia Yehova liya na ku suena. Vunoni ka ci tondeka tu lisosomue ku tuala ha vati tu ka linga nga viuma viaco vi na soloka. Sipilitu ya Njambi i hasa ku tu kuasa ku lembama mu visinganieka na ku linga vihangula via mana.—Luka 12:​11, 12. w23.06 10 ¶6-7

Vika mue ku singanieka mu mue ku ivua lizina lia Samusoni? Halumo mue ku mu vuluka ku pua yala ua ndzili ya kama. Kaha mukemuo vene. Vunoni ua lingile vihangula via ku vihia. Vutuhu ngoco, Yehova ua tualele mana ku viuma via cili via kele na ku linga. Ngeci ua tavesa lungano lua Samusoni lu kale mu Mbimbiliya, linga a tu kuase. Yehova ua pangesele Samusoni mu ku puisamo viuma via ku komouesa na ku kuasa vaIsaleli. Mu nima ya miaka ya ingi tunde ha kutsa ca Samusoni, Yehova ua huiminine kapostolo Paulu ku haka lizina lia Samusoni ha mukana ua vantu va muesele lutsilielo lua ku komouesa. (VaHe. 11:​32-34) Ngeci mukemuo, lungano lua Samusoni lu hasa ku tu kaniamesa muomu ua kulahelele muli Yehova, ambe vene mu vintsimbu via vikalu. Lungano lua Samusoni lu hasa ku tu kaniamesa na viuma via seho vi tu hasa ku lilongesaho. w23.09 2 ¶1-2

Tu hasa ku pangela ha ku kolesa cetu, mu ku lilongesa ku lekako Yehova visoti vietu ku-sua kumo. (1 Tes. 5:17) Ca ku muenako, halumo ka muesi na ku hita mu cisoti mu ntsimbu ino. Vutuhu ngoco, vuno mue ku lengeya ku tuamenena ca Yehova nga muli na matoto, liuayanga ni ka mu tantekeya via ku linga ni? Nga mu lihakela kapandi ka ku vundila vukuasi vua Yehova mu tuvisoti tua tangua na tangua mu ntsimbu ino, ka mu kala na vitanga via ku lingamo, ku lutue, omo mu ka hita mu visoti via kama. Muomu mua tantekeya laza ngecize Yehova a tantekeya viose vi mue ku tondeka kaha ue ku mi kuasa. (Visa. 27:​1, 3) Tu ka hasa ku kolesa mu lamba ya kama, nga tu kolesa mu vieseko via lelo lino. (Loma 5:3) Vika tu handekela ngoco? Cingi ca vamuanetu va limuena ngecize vieseko via mu lutsilielo vi va lihitile navio, via va kuasele ku liviukisila vieseko via hateleko. Ku kolesa, ca va kaniamesele na ku kolesa lutsilielo luavo ngecize Yehova ua liviukisila mu ku va kuasa kaha ue ku lingamo vene. Lutsilielo co, lua va kuasele mu ku kolesa mu ceseko ca hateleko.—Tia. 1:​2-4. w23.07 3 ¶7-8

Ku likehesa na cikeketima ca Yehova, vie ku mu lingisa ku pua ua ku votsika. Ca ku muenako, ku likehesa ca Yehova ca lisoluele ha toma, ha ntsimbu ya nongesele Sondoma. Ku hitila mu tungelo, Yehova ua lekele Lote linga a tinine ku mincinda. Vunoni Lote ua kele na liova lia ku tininako. Ngeci ua lambelele Yehova linga neni na vusoko vueni va tinine ku Zoale, imo mbonge ya indende ya tondele ku nongesa Yehova. Tele nga Yehova ue ku kakateyele Lote ku kava via mu sikile. Vunoni ua tavesele Lote ku tinina ku mbonge yaco, vutuhu eci ca lombolokele ngecize mbonge yaco ka i nongesa naua. (Njen. 19:​18-22) Mu nima ya miaka ya ingi, Yehova ua muesele cikeketima ku vantungi va Ninivayi. Ua tumine kapolofeto Yona a ka ambulule ngecize mbonge yaco vuovuno va i nongesa hamo lika na vantungi vayo vakua vupi. Vunoni omo vaze vakua vupi va alulukile, Yehova ua va vuilile cikeketima kaha ka nongesele naua mbonge.—Yona 3:​1, 10; 4:​10, 11. w23.07 21 ¶5

Vika tu hasa ku lilongesa ku lungano lua Yoase? Ua puile ngue muti ua hitukilile ha citi cikuavo omo lia ku hona mizi ya ku lova. Citi caco ca puile Yehoyanda. Ngeci mukemuo mua tsile, Yoase ua andumukile vuasi na vilongesa via vakua ku alulukila vusunga. Eci ci tu longesa ngecize liova lietu kuli Njambi, ka lia pandele ku hitukila ha vakuetu Vakua Kilistu ni vavusoko. Linga tu tualeleho ku kaniama mu lutsilielo, tua pande ku kaniamesa cilemo cetu kuli Njambi na liova li tue ku mu vuila mu ku lilongesa Mbimbiliya, ku hilula kaha na ku vundila ku-sua kumo. (Yele. 17:​7, 8; Kolo. 2:​6, 7) Yehova ke ku tonda via vingi kuli yetu. Via tonda va vi lombolola muvatu ku Ekelesiaste 12:​13, nguayo: “Vuila Njambi vuoma, na ku niunga masiko eni; muomu eci cikeco kapandi kose ka muntu.” Nga tu vuila Njambi liova, tu ka hasa ku kolesa mu vieseko via ku lutue. Na vimo viahi vi ka hasa ku vihisa vusamba vuetu na Yehova. w23.06 19 ¶17-19

Mukanda ua Ku-Solola 21:5a, ua putuka na mezi aa: “Kaha uze na tumama ku citumamo ca vuangana ua handekele, ngueni.” Aa mezi a pua a seho ya kama, muomu Yehova ua handeka lutatu lika mu livulu lia Ku-solola. Eci cilekesa ngecize Yehova ka pangesele umo kangelo ua ngolo, ni Yesu, vunoni ikeye mpundu ua handekele! Ci muesa ngecize tu hasa mpundu ku tsiliela ku mezi a na hatako. Omo lia vika? Muomu Yehova “ka hasa ku onga.” (Tito 1:2) Ngeci mukemuo, mezi a ku Ku-Solola 21:5 na 6 a pua mpudu a vusungaHilulenu , ha lizi “Talenu!” Mu ciNgelengu lizi “talenu” va lihilukila mu livulu lia Ku-Solola. Vika naua ua handekele? Ua handekele ngueni: “Talenu, Nji panga viose via viha.” Mua vusunga, Yehova mua handekele aa mezi, ua kele mpundu na ku handeka viuma via ka alulula ku lutue. Vunoni mua handekele mezi aco, ca puile ngue na puisamo laza cikulaheso caco.—Isa. 46:10. w23.11 3-4 ¶7-8

Kapostolo Petulu ua vuile na ku mona viuma via cili via lingile Yesu, kasi ua pindile na vuzeye vueni. Tu talenu vimo vimueso. Ca ku muenako, omo Yesu ua lekele vandongesi veni ngecize ue ku yandele na ku-tsa linga a puisemo vupolofeto vua mu Mbimbiliya, Petulu ua setekele ku mu sungamesa. (Mako 8:​31-33) Kaha vintsimbu via vingi, Petulu na vapostolo vakuavo, va lihoyele ku tuala ha iya ua kama ha kati kavo. (Mako 9:​33, 34) Cikuavo naua, ku vutsiki tele Yesu kanda a tse, Petulu vuasi-vuasi ua kuatele mukuale na ku teta lituitui lia umo yala. (Yoa. 18:10) Kaha ku vutsiki vuaco, omo lia liova Petulu ua vianene Yesu lutatu luose. (Mako 14:​66-72) Kaha evi via mu lingisile ku lila mua kama.Yesu ka likelele ku kulahela muli Petulu. Muomu mu nima ya ku sanguka ceni, Yesu ua hanene naua kuli Petulu vukovelelo vua ku muesa ngecize ua mu lemene. Ngeci ua mu kundikile cipanga ca ku niunga vampanga veni. (Yoa. 21:​15-17) Na ku likehesa cose Petulu uononokele. Kaha Petulu ua puile umo ua ku livanga i va muaniene sipilitu santu ku pentekosta ku Yelusalema. w23.09 22 ¶6-7

“Niungenu Vutanga vua Njambi.” Kapostolo Petulu ua hanene eci cimamuna ku vakuavo vakuluntu. (1 Pet. 5:​1-4) Nga mua pua mukuluntu, tu tantekeya ngecize mua lema vamuanoko mu lutsilielo kaha mua tonda ku va niunga. Vunoni halumo mu hasa ku livua ngecize muli na via vingi via ku linga kaha ka muesi na ku hasa ku puisamo citeli caco. Vati mu hasa ku linga? Vundilenu kuli Yehova na ku mu leka viose vili mu mutima uenu. Petulu ngueni: “Nga umosi a panga, a pange ngue ku ngolo ya na mu hie Njambi.” (1 Pet. 4:11) Vamuanoko ve ku hita mu visoti via ku linga, mu mavu ano ka citava ku vi manusula. Vunoni vulukenu ngecize mukuluntu ua tuniungi, Yesu Kilistu, a hasa ku va kuasa mu njila ya ku linga nenu ka mu i hasa. A hasa ku lingamo mu ntsimbu ino na ku mu mavu a aha ku lutue. Via tonda Yehova ku vakuluntu evi: Ku lema vamuanaye, ku va niunga na ku pua “lungano ku vutanga.” w23.09 29-30 ¶13-14

Tua pande ku lihakela kapandi ka ku viana mangana a vantu. Nga tu pua na ku mona viuma na meso a vuntu, tu hasa ku hakela ku mukulo Yehova na vitume vieni. (1 Kol. 3:19) “Mangana a mavu ano,” eku sambeya vizango via ntsitu. Vamo Vakua Kilistu va mu Pelengamo na Tatila, va kele na ku temunuina visinganieka via ku lemesa mahamba na vupangala, via vantu va kele mu vimbonge viaco. Ngeci Yesu ua tumine cilungula ca kama ku vikungulukilo viose vivali, omo lia ku ecelela vupangala. (Ku-So. 2:​14, 20) Lelo lino, tue ku hita mu ntsindiye ya ku tava visinganieka via vavusoko na vandambo ku tuala ha viuma viaco evi. Kaha navo ve tu sindiya ku tsihako vimo vitume via Yehova. Ca ku muenako, va hasa ku handeka nguavo ku puisamo vizango vietu, ka ca puile vupi kaha masiko a mu Mbimbiliya ka a likuatele naua na muono ua matangua ano. Vintsimbu vimo, tu hasa ku singanieka ngecize vitume via na tu hana Yehova ka via puilemo. Kaha eci ci hasa ku tu lingisa ku uila mu ceseko ca “ku pulakana viuma vi va na soneka.”—1 Kol. 4:6. w23.07 16 ¶10-11

Maliya naye ya Yesu, ua pandele ku kolesa. Vutuhu kanda a ci limoneho na yala kaha ka kele na vutongue vua ku lela vana, Maliya ue ku imitile na ku lela kakeke ue ku puile Mesiya. Vunoni vati Maliya ue ku lomboluele citanga caco kuli Yosefe, uze ue ku puile yalieni? (Luka 1:​26-33) Vati Maliya ua hasele ku kolesa? Ua lombele vukuasi ku vakuavo. Ca ku muenako, ua lombele vukuasi kuli kangelo Ngambiele ku tuala ha citeli ci va mu kundikile. (Luka 1:34) Mu nima yaco, ua lingile vungendzi na ku “cifuti ca mincinda kuimbo limo lia Yundeya,” linga a ka meneke Elizambeta kavusoko keni. Kaha Elizambeta ua sangalele Maliya muomu Elizambeta va mu huiminine ku handeka vumo vupolofeto ku tuala hali muana Maliya. (Luka 1:​39-45) Kaha Maliya ua handekele ngueni: “[Yehova a] solola ngolo na livoko lieni.” (Luka 1:​46-51) Mua vusunga, Yehova ua pangesele kangelo Ngambiele na Elizambeta mu ku kaniamesa Maliya. w23.10 14-15 ¶10-12

Imo numelu ya ku puamo ya vandongesi va Yesu va va vuavesa na sipilitu santu kaha va kala na vusamba vua ku lifuila na Yehova. Ava va 144,000 va ka pua vasendote muilu hamo na Yesu. (Ku-So. 14:1) Hondo ya ku Lela ya tavenakulu yemanena ngecize va va hangula na sipilitu santu vutuhu va ci li hano ha mavu, linga va ka pue vana va Njambi. (Loma 8:​15-17) Hondo ya ku Hiana ku Lela ya tavenakulu, yemanena muilu muze mua kala Yehova. Kaha “ntanga” ya tepesele Hondo ya ku Lela na Hondo ya ku Hiana ku Lela, muvila ua Yesu uze ka ca tavele ku kovela nauo muilu, linga a ka pue Sasendote ua Kama mu tembele ya mu lutsilielo. Ngeci mukemuo, mu ku hana muvila ueni mu ku pua nkombelo ya ku kula vantu, Yesu ua sokoluele njila linga Vakua Kilistu va ku vuavesa va ka hase ku yoyela muilu. Navo, va ka tondeka ku seza mivila yavo ya vuntu linga va ka hase kuya muilu.—VaHe. 10:​19, 20; 1 Kol. 15:50. w23.10 28 ¶13

Ngilione ua kumbuluile na ku konkama mu va mu payele vakua Efalimi. (Vang. 8:​1-3) Kaha ka va kumbuluile na matoto, vunoni ua muesele ku likehesa mu ku va halakana na ku vatesa matoto avo. Vakuluntu ve ku tambuluisa Ngilione, mu ku halakana vuino vakuavo na ku kumbulula na civuovuo nga va va paya. (Tia. 3:13) Mua vusunga, evi vie ku kuasa cikungulukilo ku kala mu ciyulo. Ngilione mu va mu sangalele omo lia ku vula vakua Mindiane, ua talekesele visangala viaco kuli Yehova. (Vang. 8:​22, 23) Vati vakuluntu va hasa ku mu temunuina? Mu ku talekesa visangala viose kuli Yehova. (1 Kol. 4:​6, 7) Ca ku muenako, nga umo mukuluntu va mu sangala omo lia vutongue vueni vua ku longesa, a hasa ku talekesa visangala viose ku ndundzi ya vilongesa Lizi lia Njambi, ni ku vi talekesa ku lukungulukilo lua Yehova. Vakuluntu vintsimbu vimo va na pande ku lihilula nga va li na ku limuesa. w23.06 4 ¶7-8

Nga Yehova ka kumbuluile vimo vivundilo vietu, tua pande ku lihula nguetu: Vuno njili na ku vundila mpundu viuma vi nji na fuila ku tambula ni? Vintsimbu via vingi, tue ku livua ngue tu tantekeya mpundu viuma via cili vi na tu pande. Vunoni vimo viuma vi tue ku vundila, halumo ka vi ka tu kuasa. Nga tuli na ku vundila ku tuala ha cimo citanga, halumo kuli imo njila yeka ya ku manusuilamo citanga caco, ku hiana ize i tuli na ku vundilamo. Kaha vimo vi tue ku vundila, halumo ka vie ku litombola na cizango ca Yehova. (1 Yoa. 5:14) Ca ku muenako, tu hilulenu lungano lua visemi va vundilile Yehova linga munavo kati a tunde mu vusunga. Civundilo cavo, ca solokele ngue cikeco mpundu ca va pande. Vunoni Yehova ke ku tu kakatela ku mu pangela. Ua tonda tu vose, hamo lika na vana vetu, tu lihanguile etu vavene ku mu pangela. (Ndeu. 10:​12, 13; 30:​19, 20) Ngeci mukemuo, halumo visemi vaco tele nga va pandele ku vundila Yehova a va kuase ku heta ku mutima ua muanavo linga ivene a kale na cizango ca ku lema Yehova na ku pua ka vusamba Keni.—Visi. 22:6; Efe. 6:4. w23.11 21 ¶5; 23 ¶12

Omo lia vika ku lembezieka vakuetu ca pua ku va muesa cilemo? Kuliya na imo Mbimbiliya, lizi “ku lilembezieka” lia pangesele Paulu, lia lomboloka “ku kala ku mukulo ua muntu mu ku mu kaniamesa omo a hita mu vieseko via kama.” Ngeci mukemuo, ku lembezieka vamuanetu vali mu visoti, ca pua ku va kuasa ku katuka linga va tualeleleho kuendela mu njila ya ya ku muono. Ntsimbu yose i tue ku hana umo muanetu ni ndumbuetu citsili ca ku lilila, tuli na ku mu muesa ngecize tua mu lema. (2 Kol. 7:​6, 7, 13)Ku ivua cikeketima na ku lembezieka via likuata. Mu njila ika? Mukua cikeketima, ue ku ivua cizango ca ku lembezieka vakuavo na ku seteka ku tepulula ku lamba yavo. Ha katete tue ku ivua cikeketima, amba tu lembezieke muntu. Paulu ua tokakanene cikeketima ca Yehova na ku lembezieka ceni. Ngueni: “Ise ya vikeketima, ikeye Njambi ua ku-lembezieka cose.”—2 Kol. 1:3. w23.11 9-10 ¶8-10

Vakua Kilistu vose va na pande ku lavelela ku hita mu visoti. Ca ku muenako, kapostolo Paulu neni vene ua hitilemo. Ua lekele Vakua Kilistu ku Tesalonika ngueni: “Omo tua kele nenu, tua mi lekele laza ngecize tu na pande ku yanda tuyando; [kaha] mukemuo vene tua muene, nenu mua tantekeya.” (1 Tes. 3:4) Kaha kuli vakua Kolintu co ngueni: “Ka tu hianga ngecize enu, vamuanetu, mu ka kale ku ndzimba ya lamba yetu i tua muene . . . Ngecize tua ka zuzukilile muono uetu vene.” (2 Kol. 1:8; 11:​23-27) Vakua Kilistu navo lelo lino, va na pande ku lavelela ku hita mu vimo visoti. (2 Tim. 3:12) Omo lia lutsilielo luenu muli Yesu na ku kava lungano lueni vavusamba venu na vavusoko, va hasa ku mi tsopa ni ku mi yengula. Vuno ku pua mukua vusunga ce ku mi kokela visoti ku vipanga ni? (VaHe. 13:18) Vuno vali na ku mi luisa ku nguvulu omo lia ku ambuluilako vakuenu muzimbu ua cili ni? Mua vusunga, tue ku hita mu tuyando tua tuingi. Vunoni, ambe mu hite mu visoti via ku fua vati, Paulu ua handekele ngueni, tua pande ku tualelelaho ku viukilila. w23.12 10-11 ¶9-10

Yakomba ua pindile na visoti via vingi. Vana vavali va Yakomba, Simeone na Levi, va nehele luvinda mu vusoko na kasahuntu ku lizina lia Yehova. Mu ku vueza kuli evi, Lakele mpuevo ya lemeneho mua kama Yakomba ua tsile ha musongo ua ku sulumuna muaneni ua mu civali. Kaha ndzala ya kama ya hitile mu cifuti ca kele, ya mu lingisile a tinine ku Ingito, vutuhu tele na kulupa mua kama. (Njen. 35:​16-19; 37:28; 45:​9-11, 28) Mu visoti viose evi, Yakomba ka zimbalesele lukulahelo lueni muli Yehova na mu vikulaheso Vieni. Ngeci Yehova neni ua muesele ngecize Yakomba ue ku muya ku mutima. Ca ku muenako, Yehova ua mu vezikisile na vupite. Kaha tuli na vusunga ngecize Yakomba ua santselele mua kama Yehova, mua liuanene lueka naua na muneni Yosefe, uze ya singaniekele ngecize ua tsa laza! Vusamba vua kama vua likuatele Yakomba na Yehova, vua mu kuasele ku kolesa mu vieseko viose evi. (Njen. 30:43; 32:​9, 10; 46:​28-30) Ngeci mukemuo, nga tu kaniamesa vusamba vuetu na Yehova, netu tu ka hasa ku kolesa mu visoti via ku tungumuna. w23.04 15 ¶6-7

Visamo 23 ya pua muaso ua muesa cilemo ca Yehova. Mukua ku soneka Samo yaco Ndaviti, ua muesa ku likata ca kele hali ikeye na Kaniungi keni, Yehova. Ndaviti ua livuile ku lembama na ku tavesa Yehova a mu tuamenene kaha ua hitukilile mu vutuntu hali Ikeye. Ndaviti ua tantekeyele ngecize cilemo ca Yehova ci ka mu kava matangua ose a muono ueni. Vika via mu hele vusunga vua ku pua aha? Ndaviti ua vuile ngecize na vimo vi na mu kambela viahi, muomu Yehova ua mu hele viose via tondekele. Ua puile naua kavusamba ka Yehova kaha ua mu ile ku mutima. Ngeci ua kele na vusunga ngecize viose-ovio vi ka mu solokela, Yehova a ka tualelelaho ku mu kuasa mu viose vi ka mu kambela. Lukulahelo lua Ndaviti mu cilemo ca Yehova, lua kaniamene ku hiana ku lisosomua ceni cose kaha evi via mu vuisile ndzolela ya kama.—Visa. 16:11. w24.01 29 ¶12-13

Tunde mu Ndzita ya mu Civali ya Mavu Ose, vangamba va Yehova vali na kuambuluila mu vifuti via vingi. Kaha vali na ku puisamo cipanga caco mu mavu ose, ngeci vavengi vali na ku tantekeya Yehova. Lelo lino, vakua Civunga ca Vantuamena ve ku tualelelaho kuononoka ku tuamenena ca Yesu. Va tonda vimamuna viose vi ve ku hana vamuanaye, vi litombole na visinganieka via Yehova. Kaha ve ku pangesa tuniungi va ku zinguluka na vakuluntu mu vikungulukilo linga vimamuna viaco vi hete ku vikungulukilo. Vakuluntu va ku vuavesa va kala mu “livoko [lia Kilistu] lia cilio.” (Ku-So. 2:1) Vunoni ambe ngoco, vamuanetu vaco ka va tantulukile kaha ve ku sevuka, ngeci mua Mosesa, Yehosua na vapostolo. (Num. 20:12; Yeho. 9:​14, 15; Loma 3:23) Vunoni tue ku limuena nguetu Kilistu ali na ku tuamenena mukuamanda ua cili na vakuluntu mu cikungulukilo, kaha a ka tualelelaho ku lingamo. Ngeci mukemuo, tuli na vusunga vuose vua pande ku tu lingisa kuononoka vimamuna via vamuanetu ve ku tu tuamenena. w24.02 23-24 ¶13-14

Lelo lino, tu hasa ku vuisa Yehova ndzolela nga tu handeka vieni mu cifua ci muesa ngecize, tue ku mu santsela kaha tua mu lema. Nga tuli mu kuambulula, vutumbe vuetu vua pua ku kuasa vantu va suene kuli Yehova na ku mu lema ngeci muetu. (Tia. 4:8) Mua vusunga, tue kuivua ndzolela mu tue ku leka vantu vati Mbimbiliya ya muesa cilemo ca Yehova, vuviuke, mana, ngolo, na vifua vieni vikuavo. Tu hasa naua ku sangaziala Yehova na ku mu vuisa ndzolela mu ku lihakela kapandi ka ku mu tambuluisa. Ku lingamo, ci ka tu kuasa ku kolesa mu mavu ano a ku pihia. Kaha vantu va hasa ku lihula omo lia vika vilinga vietu via liseza na vilinga viavo. (Mat. 5:​14-16) Omo tu kala navo mu muono ua tangua na tangua, tu hasa ku va lomboluela omo lia vika tue ku lihakela kapandi ka ku kala na vilinga via cili. Omo liaco, vantu ve ku suena kuli Njambi. Nga tu sangaziela Yehova mu vifua viaco, tue ku mu vuisa ndzolela.—1 Tim. 2:​3, 4. w24.02 10 ¶7

Nga mu tonda ku pua Mukua Kilistu ua kuhia, mua pande ku lilongesa vumo vutongue. Ku lingamo ci ka mi kuasa ku puisamo vuino viteli mu cikungulukilo, ku uana vipanga vi ka mi kuasa ku niunga vuino vusoko vuenu kaha na ku likuata vusamba vua ku kaniama na vakuenu. Ca ku muenako, lilongesenu ku tanda na ku soneka vuino. Mbimbiliya ya handeka nguayo linga yala a yoye mu ndzolela na pande ku uana ntsimbu ya ku tanda Lizi lia Njambi tangua na tangua na ku li hilula. (Visa. 1:​1-3) Ku tanda Mbimbiliya tangua na tangua, ce ku kuasa ku tantekeya vuino cifua ce ku singaniekelamo Yehova na ku mi kuasa ku ononoka vitume vieni. (Visi. 1:​3, 4) Vamuanetu na vandumbuetu, ve ku tonda vimamuna na vukuasi vua vamala va hasa ku longesa na ku hana vimamuna via mu Mbimbiliya. Nga mu lihakela kapandi ka ku tanda na ku soneka vuino, mu ka hasa ku hana vimpande na vikumbululo vi ka kaniamesa vakuenu mu lutsilielo. Cikuavo naua, mu ka hasa ku soneka vuino mizimbu i mue ku lilongesa ize i ka mi kuasa ku kaniamesa lutsilielo luenu na lua vakuenu. w23.12 26-27 ¶9-11

Ha vintsimbu vi mue kala na liova, puenu na ku hilula ha viuma via ka linga Yehova ku lutue omo Satana va ka mu tundisako. Cimo cimueso ku ciuano ca muhato ca 2014, ca muesele, umo mutue ua ndzivo ali na ku simutuila na vusoko vueni ku tuala ha 2 Timoteo 3:​1-5, na ku muesa vati vinimbu viaco vi ka aluluka mu citungu. Ua handekele ngueni: “Mu mavu a aha mu ka kala vintsimbu via ndzolela. Muomu vantu va ka pua, vakua ku lema vakuavo, vakua ku lema viuma via mu lutsilielo, vakua ku konkama, vakua ku likehesa, vakua ku sangaziala Njambi, vakua ku ononoka visemi, vakua ku santsela, vakua lukakatela, vakua ku lema mua kama vusoko vuavo, vakua ku litavasiana, vakua ku sangala vakuavo, vakua ku lipokuesa, vakua ku konkama, vakua ku lema vucili, citava ku va kulahela, vakua ku votsika, vakua ku likehesa mu visinganieka, vakua ku lema cikuma Njambi ku hiana via senga, vakua haka seho mu ku pangela Njambi mu vusunga. Likate nava naua.” Vuno mue ku simutuila na vusoko vueni ni vamuanoko mu lutsilielo ku tuala ha vati u ka fua muono mu citungu ni? w24.01 6 ¶13-14

Mua vusunga, ku tantekeya nguetu Yehova ue ku viukilila na vangamba vendi, ce ku tu vuisa ndzolela! Mbimbiliya nguayo: “Yehova a viukilila vantu veni.” (Visa. 149:4) Vintsimbu vimo, vamo ve ku uila mu vusiua ngeci ce ku va kaluuila ku tava nguavo ve kuya Yehova ku mutima. Vamo vangamba va Yehova va va tumbula mu Mbimbiliya, vintsimbu vimo va kele na kulua na citanga caco. (1 Sam. 1:​6-10; Yombi 29:​2, 4; Visa. 51:11) Mbimbiliya ya muesa ha toma ngecize, vutuhu ka tua tantulukile, vunoni tu hasa kuya Yehova ku mutima. Tu hasa ku lingamo, nga tu muesa lutsilielo muli Yesu na ku tu mbatiza. (Yoa. 3:16) Kaha tue ku muesa ku mbunga ngecize tua liveye vipi vietu na ku kulahesa Njambi nguetu tu linga cizango cendi. (Vili. 2:38; 3:19) Yehova ue ku viukilila mu tue ku linga cose tu likuate vusamba nendi. Nga tu lihakela kapandi ka ku puisamo cikulaheso cetu ca ku mu pangela, tue ku muya ku mutima kaha ue ku tu puisa vavusamba vendi.—Visa. 25:14. w24.03 26 ¶1-2

Tu hasa ku tambuluisa vandongesi va Yesu mu ku tualelaho ku ambulula ambe nga vakua nguvulu va tu vindika. Tu hasa ku kala na vusunga ngecize Yehova a ka tu kuasa ku puisamo cipanga cetu ca ku ambulula. Ngeci mukemuo, vundilenu ku simpa na mana, na ku vundila vukuasi vua Yehova nga muli na ku pinda na visoti. Cingi cetu tue ku pinda na visoti via mu muvila ni via mu visinganieka. Halumo tua tsisa muntu u tua lema, tuli na cimo citanga mu vusoko, ku tu luisa ni nkala cisoti ceka. Kaha viuma ngeci mua misongo ya kuli tambuluisa na vindzita via vuezelela ku ku kaluua cevi visoti. Ngeci mukemuo, muanienu mutima uenu kuli Yehova, mu lekenu citanga ci muli na ku pinda naco ngue muli na ku leka kavusamba kaha kalenu na vusunga ngecize “a ka ci lingisa.” (Visa. 37:​3, 5) Ku kakatela mu vivundilo ci hasa ku tu kuasa ku kolesa “mu lamba.” (Loma 12:12) Yehova a tantekeya ngecize vangamba veni ve ku hita mu visoti, ngeci “a kevua mutambi uavo.”—Visa. 145:​18, 19. w23.05 5-6 ¶12-15

Nga tu linga vihangula via seho, tua pande ku nongonona “cizango ca Muangana” kaha na ku tombuesa vihangula vietu ku cizango ca Yehova. (Efe. 5: 17) Nga tu tondesesa vitume via mu Mbimbiliya via likuata na cisoti cetu, tuli na ku tonda mpundu vukuasi vua Yehova. Kaha nga tuononoka vitume viendi, tu ka hasa ku linga vihangula via cili. “Mukua vupi” ni nguetu Satana a tonda lika tu pihise ntsimbu yetu ku viuma via ano mavu, na ku hona na ntsimbu ya ku pangela Njambi. (1 Yoa. 5:19) Mukua Kilistu a hasa ku putuka ku tuala mana ku ku tonda vimbonga, kuya ku sikola ya kama ni vipanga, mu cihela ca ku tonda vinjila via ku lemeselamo Yehova. Nga tu lingamo, tu muesa ngecize tuli na ku singanieka ngue vantu vaze ka ve ku pangela Yehova. Mua vusunga, ku vi linga ka via puile vuhenge, vutuhu ngoco ka tua pandele ku vi tuameka mu muono uetu. w24.03 24 ¶16-17