Masalimo

37 Usapse mtima chifukwa cha anthu ochita zoipa.+

Usakhumbe kukhala ngati anthu ochita zosalungama.+

 2 Pakuti adzafota mwamsanga ngati udzu,+

Adzanyala ngati msipu watsopano wobiriwira.+

 3 Khulupirira Yehova ndipo chita zabwino.+

Khala padziko lapansi, ndipo khala wokhulupirika m’zochita zako zonse.+

 4 Komanso sangalala mwa Yehova,+

Ndipo adzakupatsa zokhumba za mtima wako.+

 5 Lola kuti Yehova akutsogolere panjira yako,+

Umudalire+ ndipo iye adzachitapo kanthu.+

 6 Iye adzaonetsa poyera kulungama kwako kuti kuunike ngati kuwala,+

Adzaonetsa poyera chilungamo chako kuti chiwale ngati usana.+

 7 Khala chete pamaso pa Yehova,+

Ndipo umuyembekezere ndi mtima wako wonse.+

Usapse mtima ndi aliyense amene zinthu zikumuyendera bwino,+

Munthu amene akukwaniritsa zolinga zake zoipa.+

 8 Usapse mtima ndipo pewa kukwiya.+

Usapse mtima kuti ungachite choipa.+

 9 Pakuti ochita zoipa adzaphedwa.+

Koma oyembekezera Yehova ndi amene adzalandire dziko lapansi.+

10 Patsala kanthawi kochepa, woipa sadzakhalakonso.+

Udzayang’ana pamene anali kukhala, ndipo sadzapezekapo.+

11 Koma anthu ofatsa adzalandira dziko lapansi,+

Ndipo adzasangalala ndi mtendere wochuluka.+

12 Woipa akukonzera chiwembu munthu wolungama,+

Ndipo akumukukutira mano.+

13 Koma Yehova adzamuseka,+

Pakuti akuona kuti chimaliziro chake chifika.+

14 Oipa asolola lupanga ndipo akunga uta wawo,+

Kuti agwetse osautsika ndi osauka,+

Kuti aphe anthu amene njira zawo ndi zowongoka.+

15 Lupanga lawo lidzalowa mumtima mwawo,+

Ndipo mauta awo adzathyoka.+

16 Zinthu zochepa za munthu wolungama ndi zabwino+

Kusiyana ndi zinthu zochuluka za anthu ambiri oipa.+

17 Pakuti manja a anthu oipa adzathyoledwa,+

Koma Yehova adzathandiza anthu olungama.+

18 Yehova amadziwa za moyo wa anthu osalakwa,+

Ndipo cholowa chawo chidzakhalapo mpaka kalekale.+

19 Pa nthawi yatsoka sadzachita manyazi,+

Ndipo pa nthawi ya njala adzakhuta.+

20 Pakuti anthu oipa adzatheratu onse,+

Ndipo adani a Yehova adzafanana ndi busa la msipu wobiriwira mochititsa kaso.

Iwo adzatha.+ Adzazimiririka ndi kusanduka utsi.+

21 Munthu woipa amakongola zinthu za ena koma osabweza,+

Koma wolungama amakomera mtima ena ndipo amapereka mphatso.+

22 Anthu amene Mulungu akuwadalitsa adzalandira dziko lapansi,+

Koma amene wawatemberera adzaphedwa.+

23 Yehova walimbitsa mapazi a munthu wamphamvu zake,+

Ndipo Mulungu amakondwera ndi njira zake.+

24 Ngakhale atapunthwa, sadzagweratu,+

Pakuti Yehova wamugwira dzanja.+

25 Ndinali mwana, ndipo tsopano ndakula,+

Koma sindinaonepo munthu aliyense wolungama atasiyidwa,+

Kapena ana ake akupemphapempha chakudya.+

26 Tsiku lililonse amakomera mtima ena ndi kuwakongoza zinthu,+

Ndipo ana ake adzalandira madalitso.+

27 Patuka pa choipa ndipo uchite chabwino,+

Ukatero udzakhala padziko lapansi mpaka kalekale.+

28 Pakuti Yehova amakonda chilungamo,+

Ndipo sadzasiya anthu ake okhulupirika.+

ע [ʽAʹyin]

Adzawateteza mpaka kalekale.+

Koma ana a anthu oipa adzaphedwa.+

29 Olungama adzalandira dziko lapansi,+

Ndipo adzakhala mmenemo kwamuyaya.+

30 Pakamwa pa munthu wolungama pamalankhula zinthu zanzeru,+

Ndipo lilime lake limalankhula zinthu zachilungamo.+

31 Chilamulo cha Mulungu wake chili mumtima mwake.+

Poyenda mapazi ake sadzaterereka.+

32 Woipa amalondalonda munthu wolungama,+

Ndipo amafuna kuti amuphe.+

33 Koma Yehova sadzasiya wolungama m’manja mwa woipayo,+

Ndipo pamene wolungamayo akuweruzidwa, Mulungu sadzamuona monga wolakwa.+

34 Yembekezera Yehova, ndi kusunga njira zake,+

Ndipo adzakukweza kuti ulandire dziko lapansi.+

Pamene oipa akuphedwa, iwe udzaona.+

35 Ine ndaona munthu woipa, wolamulira mwankhanza+

Zinthu zikumuyendera bwino ngati mtengo waukulu wa masamba obiriwira bwino panthaka yake.+

36 Koma anafa ndipo sanapezekenso.+

Ndinamufunafuna ndipo sindinamupeze.+

37 Ona munthu wosalakwa ndipo yang’anitsitsa munthu wolungama,+

Pakuti tsogolo la munthu ameneyu ndi lamtendere.+

38 Koma anthu onse ochimwa adzafafanizidwa.+

M’tsogolo, anthu oipa adzaphedwa.+

39 Chipulumutso cha anthu olungama chimachokera kwa Yehova.+

Iye ndi malo awo achitetezo champhamvu pa nthawi ya nsautso.+

40 Yehova adzawathandiza ndi kuwapulumutsa.+

Adzawapulumutsa kwa anthu oipa ndi kuwalanditsa,+

Chifukwa athawira kwa iye.+